33. அரணவிஹாரஞாணனித்³தே³ஸோ

82. கத²ம் த³ஸ்ஸனாதி⁴பதேய்யம் ஸந்தோ ச விஹாராதி⁴க³மோ பணீதாதி⁴முத்ததா பஞ்ஞா அரணவிஹாரே ஞாணம்? த³ஸ்ஸனாதி⁴பதேய்யந்தி அனிச்சானுபஸ்ஸனா த³ஸ்ஸனாதி⁴பதேய்யம், து³க்கா²னுபஸ்ஸனா த³ஸ்ஸனாதி⁴பதேய்யம், அனத்தானுபஸ்ஸனா த³ஸ்ஸனாதி⁴பதேய்யம், ரூபே அனிச்சானுபஸ்ஸனா த³ஸ்ஸனாதி⁴பதேய்யம், ரூபே து³க்கா²னுபஸ்ஸனா த³ஸ்ஸனாதி⁴பதேய்யம், ரூபே அனத்தானுபஸ்ஸனா த³ஸ்ஸனாதி⁴பதேய்யம்; வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே… சக்கு²ஸ்மிம்…பே… ஜராமரணே அனிச்சானுபஸ்ஸனா த³ஸ்ஸனாதி⁴பதேய்யம், ஜராமரணே து³க்கா²னுபஸ்ஸனா த³ஸ்ஸனாதி⁴பதேய்யம், ஜராமரணே அனத்தானுபஸ்ஸனா த³ஸ்ஸனாதி⁴பதேய்யம்.

ஸந்தோ ச விஹாராதி⁴க³மோதி ஸுஞ்ஞதோ விஹாரோ ஸந்தோ விஹாராதி⁴க³மோ. அனிமித்தோ விஹாரோ ஸந்தோ விஹாராதி⁴க³மோ. அப்பணிஹிதோ விஹாரோ ஸந்தோ விஹாராதி⁴க³மோ.

பணீதாதி⁴முத்ததாதி ஸுஞ்ஞதே அதி⁴முத்ததா பணீதாதி⁴முத்ததா. அனிமித்தே அதி⁴முத்ததா பணீதாதி⁴முத்ததா. அப்பணிஹிதே அதி⁴முத்ததா பணீதாதி⁴முத்ததா.

அரணவிஹாரோதி பட²மம் ஜா²னம் அரணவிஹாரோ. து³தியம் ஜா²னம் அரணவிஹாரோ. ததியம் ஜா²னம் அரணவிஹாரோ. சதுத்த²ம் ஜா²னம் அரணவிஹாரோ. ஆகாஸானஞ்சாயதனஸமாபத்தி அரணவிஹாரோ…பே… நேவஸஞ்ஞானாஸஞ்ஞாயதனஸமாபத்தி அரணவிஹாரோ.

அரணவிஹாரோதி கேனட்டே²ன அரணவிஹாரோ? பட²மேன ஜா²னேன நீவரணே ஹரதீதி – அரணவிஹாரோ. து³தியேன ஜா²னேன விதக்கவிசாரே ஹரதீதி – அரணவிஹாரோ. ததியேன ஜா²னேன பீதிம் ஹரதீதி – அரணவிஹாரோ. சதுத்தே²ன ஜா²னேன ஸுக²து³க்கே² ஹரதீதி – அரணவிஹாரோ. ஆகாஸானஞ்சாயதனஸமாபத்தியா ரூபஸஞ்ஞம் படிக⁴ஸஞ்ஞம் நானத்தஸஞ்ஞம் ஹரதீதி – அரணவிஹாரோ. விஞ்ஞாணஞ்சாயதனஸமாபத்தியா ஆகாஸானஞ்சாயதனஸஞ்ஞம் ஹரதீதி – அரணவிஹாரோ. ஆகிஞ்சஞ்ஞாயதனஸமாபத்தியா விஞ்ஞாணஞ்சாயதனஸஞ்ஞம் ஹரதீதி – அரணவிஹாரோ. நேவஸஞ்ஞானாஸஞ்ஞாயதனஸமாபத்தியா ஆகிஞ்சஞ்ஞாயதனஸஞ்ஞம் ஹரதீதி – அரணவிஹாரோ. அயம் அரணவிஹாரோ. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘த³ஸ்ஸனாதி⁴பதேய்யம் ஸந்தோ ச விஹாராதி⁴க³மோ பணீதாதி⁴முத்ததா பஞ்ஞா அரணவிஹாரே ஞாணம்’’.

அரணவிஹாரஞாணனித்³தே³ஸோ தேத்திம்ஸதிமோ.