18. பூ⁴மினானத்தஞாணனித்³தே³ஸோ

72. கத²ம் சதுத⁴ம்மவவத்தா²னே பஞ்ஞா பூ⁴மினானத்தே ஞாணம்? சதஸ்ஸோ பூ⁴மியோ – காமாவசரா பூ⁴மி, ரூபாவசரா பூ⁴மி, அரூபாவசரா பூ⁴மி, அபரியாபன்னா பூ⁴மி. கதமா காமாவசரா பூ⁴மி? ஹேட்ட²தோ அவீசினிரயம் பரியந்தம் கரித்வா உபரிதோ பரனிம்மிதவஸவத்தீ தே³வே [பரனிம்மிதவஸவத்திதே³வே (க.)] அந்தோகரித்வா யம் ஏதஸ்மிம் அந்தரே ஏத்தா²வசரா ஏத்த² பரியாபன்னா க²ந்த⁴தா⁴துஆயதனா ரூபம் வேத³னா ஸஞ்ஞா ஸங்கா²ரா விஞ்ஞாணம் – அயம் காமாவசரா பூ⁴மி.

கதமா ரூபாவசரா பூ⁴மி? ஹேட்ட²தோ ப்³ரஹ்மலோகம் பரியந்தம் கரித்வா உபரிதோ அகனிட்டே² தே³வே அந்தோகரித்வா யம் ஏதஸ்மிம் அந்தரே ஏத்தா²வசரா ஏத்த² பரியாபன்னா ஸமாபன்னஸ்ஸ வா உபபன்னஸ்ஸ வா தி³ட்ட²த⁴ம்மஸுக²விஹாரிஸ்ஸ வா சித்தசேதஸிகா த⁴ம்மா – அயம் ரூபாவசரா பூ⁴மி.

கதமா அரூபாவசரா பூ⁴மி? ஹேட்ட²தோ ஆகாஸானஞ்சாயதனூபகே³ தே³வே பரியந்தம் கரித்வா உபரிதோ நேவஸஞ்ஞானாஸஞ்ஞாயதனூபகே³ தே³வே அந்தோகரித்வா யம் ஏதஸ்மிம் அந்தரே ஏத்தா²வசரா ஏத்த² பரியாபன்னா ஸமாபன்னஸ்ஸ வா உபபன்னஸ்ஸ வா தி³ட்ட²த⁴ம்மஸுக²விஹாரிஸ்ஸ வா சித்தசேதஸிகா த⁴ம்மா – அயம் அரூபாவசரா பூ⁴மி.

கதமா அபரியாபன்னா பூ⁴மி? அபரியாபன்னா மக்³கா³ ச மக்³க³ப²லானி ச அஸங்க²தா ச தா⁴து – அயம் அபரியாபன்னா பூ⁴மி. இமா சதஸ்ஸோ பூ⁴மியோ.

அபராபி சதஸ்ஸோ பூ⁴மியோ சத்தாரோ ஸதிபட்டா²னா சத்தாரோ ஸம்மப்பதா⁴னா, சத்தாரோ இத்³தி⁴பாதா³, சத்தாரி ஜா²னானி, சதஸ்ஸோ அப்பமஞ்ஞாயோ, சதஸ்ஸோ அரூபஸமாபத்தியோ, சதஸ்ஸோ படிஸம்பி⁴தா³, சதஸ்ஸோ படிபதா³, சத்தாரி ஆரம்மணானி, சத்தாரோ அரியவம்ஸா, சத்தாரி ஸங்க³ஹவத்தூ²னி, சத்தாரி சக்கானி, சத்தாரி த⁴ம்மபதா³னி – இமா சதஸ்ஸோ பூ⁴மியோ. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘சதுத⁴ம்மவவத்தா²னே பஞ்ஞா பூ⁴மினானத்தே ஞாணம்’’.

பூ⁴மினானத்தஞாணனித்³தே³ஸோ அட்டா²ரஸமோ.