19. த⁴ம்மனானத்தஞாணனித்³தே³ஸோ

73. கத²ம் நவத⁴ம்மவவத்தா²னே பஞ்ஞா த⁴ம்மனானத்தே ஞாணம்? கத²ம் த⁴ம்மே வவத்தே²தி? காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி. ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி. அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி. அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி.

கத²ம் காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி? த³ஸ குஸலகம்மபதே² குஸலதோ வவத்தே²தி, த³ஸ அகுஸலகம்மபதே² அகுஸலதோ வவத்தே²தி, ரூபஞ்ச விபாகஞ்ச கிரியஞ்ச அப்³யாகததோ வவத்தே²தி – ஏவம் காமாவசரே த⁴ம்மே குஸலதோ வவத்தே²தி, அகுஸலதோ வவத்தே²தி, அப்³யாகததோ வவத்தே²தி.

கத²ம் ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி? இத⁴ட்ட²ஸ்ஸ சத்தாரி ஜா²னானி குஸலதோ வவத்தே²தி, தத்ரூபபன்னஸ்ஸ சத்தாரி ஜா²னானி அப்³யாகததோ வவத்தே²தி – ஏவம் ரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி.

கத²ம் அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி? இத⁴ட்ட²ஸ்ஸ சதஸ்ஸோ அரூபாவசரஸமாபத்தியோ குஸலதோ வவத்தே²தி, தத்ரூபபன்னஸ்ஸ சதஸ்ஸோ அரூபாவசரஸமாபத்தியோ அப்³யாகததோ வவத்தே²தி – ஏவம் அரூபாவசரே த⁴ம்மே குஸலதோ வவத்தே²தி, அப்³யாகததோ வவத்தே²தி.

கத²ம் அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி? சத்தாரோ அரியமக்³கே³ குஸலதோ வவத்தே²தி, சத்தாரி ச ஸாமஞ்ஞப²லானி நிப்³பா³னஞ்ச அப்³யாகததோ வவத்தே²தி – ஏவம் அபரியாபன்னே த⁴ம்மே குஸலதோ வவத்தே²தி, அப்³யாகததோ வவத்தே²தி. ஏவம் த⁴ம்மே வவத்தே²தி.

நவ பாமோஜ்ஜமூலகா த⁴ம்மா. அனிச்சதோ மனஸிகரோதோ பாமோஜ்ஜம் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ம் வேதே³தி, ஸுகி²னோ சித்தம் ஸமாதி⁴யதி. ஸமாஹிதே சித்தே யதா²பூ⁴தம் பஜானாதி பஸ்ஸதி. யதா²பூ⁴தம் ஜானம் பஸ்ஸம் நிப்³பி³ந்த³தி, நிப்³பி³ந்த³ம் விரஜ்ஜதி, விராகா³ விமுச்சதி. து³க்க²தோ மனஸிகரோதோ பாமோஜ்ஜம் ஜாயதி…பே… அனத்ததோ மனஸிகரோதோ பாமோஜ்ஜம் ஜாயதி…பே… விமுச்சதி.

ரூபம் அனிச்சதோ மனஸிகரோதோ பாமோஜ்ஜம் ஜாயதி…பே… ரூபம் து³க்க²தோ மனஸிகரோதோ…பே… வேத³னம்… ஸஞ்ஞம்… ஸங்கா²ரே… விஞ்ஞாணம்… சக்கு²ம்…பே… ஜராமரணம் அனிச்சதோ மனஸிகரோதோ பாமோஜ்ஜம் ஜாயதி…பே… ஜராமரணம் து³க்க²தோ மனஸிகரோதோ பாமோஜ்ஜம் ஜாயதி…பே… ஜராமரணம் அனத்ததோ மனஸிகரோதோ பாமோஜ்ஜம் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ம் வேதே³தி, ஸுகி²னோ சித்தம் ஸமாதி⁴யதி. ஸமாஹிதே சித்தே யதா²பூ⁴தம் பஜானாதி பஸ்ஸதி. யதா²பூ⁴தம் ஜானம் பஸ்ஸம் நிப்³பி³ந்த³தி, நிப்³பி³ந்த³ம் விரஜ்ஜதி, விராகா³ விமுச்சதி. இமே நவ பாமோஜ்ஜமூலகா த⁴ம்மா.

74. நவ யோனிஸோ மனஸிகாரமூலகா த⁴ம்மா. அனிச்சதோ யோனிஸோ மனஸிகரோதோ பாமோஜ்ஜம் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ம் வேதே³தி, ஸுகி²னோ சித்தம் ஸமாதி⁴யதி. ஸமாஹிதேன சித்தேன ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. து³க்க²தோ யோனிஸோ மனஸிகரோதோ பாமோஜ்ஜம் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ம் வேதே³தி, ஸுகி²னோ சித்தம் ஸமாதி⁴யதி. ஸமாஹிதேன சித்தேன ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. அனத்ததோ யோனிஸோ மனஸிகரோதோ பாமோஜ்ஜம் ஜாயதி…பே….

ரூபம் அனிச்சதோ யோனிஸோ மனஸிகரோதோ பாமோஜ்ஜம் ஜாயதி…பே… ரூபம் து³க்க²தோ யோனிஸோ மனஸிகரோதோ பாமோஜ்ஜம் ஜாயதி…பே… ரூபம் அனத்ததோ யோனிஸோ மனஸிகரோதோ பாமோஜ்ஜம் ஜாயதி…பே… வேத³னம்… ஸஞ்ஞம்… ஸங்கா²ரே… விஞ்ஞாணம்… சக்கு²ம்…பே… ஜராமரணம் அனிச்சதோ யோனிஸோ மனஸிகரோதோ பாமோஜ்ஜம் ஜாயதி…பே… ஜராமரணம் து³க்க²தோ யோனிஸோ மனஸிகரோதோ பாமோஜ்ஜம் ஜாயதி…பே… ஜராமரணம் அனத்ததோ யோனிஸோ மனஸிகரோதோ பாமோஜ்ஜம் ஜாயதி, பமுதி³தஸ்ஸ பீதி ஜாயதி, பீதிமனஸ்ஸ காயோ பஸ்ஸம்ப⁴தி, பஸ்ஸத்³த⁴காயோ ஸுக²ம் வேதே³தி, ஸுகி²னோ சித்தம் ஸமாதி⁴யதி. ஸமாஹிதேன சித்தேன ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா²பூ⁴தம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதி. இமே நவ யோனிஸோ மனஸிகாரமூலகா த⁴ம்மா.

நவ நானத்தா – தா⁴துனானத்தம் படிச்ச உப்பஜ்ஜதி ப²ஸ்ஸனானத்தம், ப²ஸ்ஸனானத்தம் படிச்ச உப்பஜ்ஜதி வேத³னானானத்தம், வேத³னானானத்தம் படிச்ச உப்பஜ்ஜதி ஸஞ்ஞானானத்தம், ஸஞ்ஞானானத்தம் படிச்ச உப்பஜ்ஜதி ஸங்கப்பனானத்தம், ஸங்கப்பனானத்தம் படிச்ச உப்பஜ்ஜதி ச²ந்த³னானத்தம், ச²ந்த³னானத்தம் படிச்ச உப்பஜ்ஜதி பரிளாஹனானத்தம், பரிளாஹனானத்தம் படிச்ச உப்பஜ்ஜதி பரியேஸனானானத்தம், பரியேஸனானானத்தம் படிச்ச உப்பஜ்ஜதி லாப⁴னானத்தம் – இமே நவ நானத்தா. தம் ஞாதட்டே²ன ஞாணம், பஜானனட்டே²ன பஞ்ஞா. தேன வுச்சதி – ‘‘நவத⁴ம்மவவத்தா²னே பஞ்ஞா த⁴ம்மனானத்தே ஞாணம்’’.

த⁴ம்மனானத்தஞாணனித்³தே³ஸோ ஏகூனவீஸதிமோ.