4. பத³ட்டா²னஹாரவிப⁴ங்கோ³

22. தத்த² கதமோ பத³ட்டா²னோ ஹாரோ? ‘‘த⁴ம்மம் தே³ஸேதி ஜினோ’’தி, அயம் பத³ட்டா²னோ ஹாரோ. கிம் தே³ஸேதி? ஸப்³ப³த⁴ம்மயாதா²வஅஸம்படிவேத⁴லக்க²ணா அவிஜ்ஜா, தஸ்ஸா விபல்லாஸா பத³ட்டா²னம். அஜ்ஜோ²ஸானலக்க²ணா தண்ஹா, தஸ்ஸா பியரூபம் ஸாதரூபம் பத³ட்டா²னம். பத்த²னலக்க²ணோ லோபோ⁴, தஸ்ஸ அதி³ன்னாதா³னம் பத³ட்டா²னம். வண்ணஸண்டா²னப்³யஞ்ஜனக்³க³ஹணலக்க²ணா ஸுப⁴ஸஞ்ஞா, தஸ்ஸா இந்த்³ரியா ஸம்வரோ பத³ட்டா²னம். ஸாஸவப²ஸ்ஸஉபக³மனலக்க²ணா ஸுக²ஸஞ்ஞா, தஸ்ஸா அஸ்ஸாதோ³ பத³ட்டா²னம். ஸங்க²தலக்க²ணானம் த⁴ம்மானம் அஸமனுபஸ்ஸனலக்க²ணா நிச்சஸஞ்ஞா, தஸ்ஸா விஞ்ஞாணம் பத³ட்டா²னம். அனிச்சஸஞ்ஞாது³க்க²ஸஞ்ஞாஅஸமனுபஸ்ஸனலக்க²ணா அத்தஸஞ்ஞா, தஸ்ஸா நாமகாயோ பத³ட்டா²னம். ஸப்³ப³த⁴ம்மஸம்படிவேத⁴லக்க²ணா விஜ்ஜா, தஸ்ஸா ஸப்³ப³ம் நேய்யம் பத³ட்டா²னம். சித்தவிக்கே²பபடிஸம்ஹரணலக்க²ணோ ஸமதோ², தஸ்ஸ அஸுபா⁴ பத³ட்டா²னம். இச்சா²வசரபடிஸம்ஹரணலக்க²ணோ அலோபோ⁴, தஸ்ஸ அதி³ன்னாதா³னா வேரமணீ [வேரமணி (க.)] பத³ட்டா²னம். அப்³யாபஜ்ஜலக்க²ணோ அதோ³ஸோ, தஸ்ஸ பாணாதிபாதா வேரமணீ பத³ட்டா²னம். வத்து²அவிப்படிபத்திலக்க²ணோ [வத்து²அவிப்படிபாதா³னலக்க²ணோ (ஸீ. க.)] அமோஹோ, தஸ்ஸ ஸம்மாபடிபத்தி பத³ட்டா²னம். வினீலகவிபுப்³ப³கக³ஹணலக்க²ணா அஸுப⁴ஸஞ்ஞா, தஸ்ஸா நிப்³பி³தா³ பத³ட்டா²னம். ஸாஸவப²ஸ்ஸபரிஜானனலக்க²ணா து³க்க²ஸஞ்ஞா, தஸ்ஸா வேத³னா பத³ட்டா²னம். ஸங்க²தலக்க²ணானம் த⁴ம்மானம் ஸமனுபஸ்ஸனலக்க²ணா அனிச்சஸஞ்ஞா, தஸ்ஸா உப்பாத³வயா பத³ட்டா²னம். ஸப்³ப³த⁴ம்மஅபி⁴னிவேஸலக்க²ணா அனத்தஸஞ்ஞா, தஸ்ஸா த⁴ம்மஸஞ்ஞா பத³ட்டா²னம்.

பஞ்ச காமகு³ணா காமராக³ஸ்ஸ பத³ட்டா²னம், பஞ்சிந்த்³ரியானி ரூபீனி ரூபராக³ஸ்ஸ பத³ட்டா²னம், ச²ட்டா²யதனம் ப⁴வராக³ஸ்ஸ பத³ட்டா²னம், நிப்³ப³த்தப⁴வானுபஸ்ஸிதா பஞ்சன்னம் உபாதா³னக்க²ந்தா⁴னம் பத³ட்டா²னம், புப்³பே³னிவாஸானுஸ்ஸதிஞாணத³ஸ்ஸனஸ்ஸ பத³ட்டா²னம். ஓகப்பனலக்க²ணா ஸத்³தா⁴ அதி⁴முத்திபச்சுபட்டா²னா ச, அனாவிலலக்க²ணோ பஸாதோ³ ஸம்பஸீத³னபச்சுபட்டா²னோ ச. அபி⁴பத்தி²யனலக்க²ணா ஸத்³தா⁴, தஸ்ஸா அவேச்சபஸாதோ³ பத³ட்டா²னம். அனாவிலலக்க²ணோ பஸாதோ³, தஸ்ஸ ஸத்³தா⁴ பத³ட்டா²னம். ஆரம்ப⁴லக்க²ணம் வீரியம், தஸ்ஸ ஸம்மப்பதா⁴னம் பத³ட்டா²னம். அபிலாபனலக்க²ணா ஸதி, தஸ்ஸா ஸதிபட்டா²னம் பத³ட்டா²னம். ஏகக்³க³லக்க²ணோ ஸமாதி⁴, தஸ்ஸ ஜா²னானி பத³ட்டா²னம். பஜானனலக்க²ணா பஞ்ஞா, தஸ்ஸா ஸச்சானி பத³ட்டா²னம்.

அபரோ நயோ, அஸ்ஸாத³மனஸிகாரலக்க²ணோ அயோனிஸோமனஸிகாரோ, தஸ்ஸ அவிஜ்ஜா பத³ட்டா²னம். ஸச்சஸம்மோஹனலக்க²ணா அவிஜ்ஜா, ஸா ஸங்கா²ரானம் பத³ட்டா²னம். புனப்³ப⁴வவிரோஹணலக்க²ணா ஸங்கா²ரா, தே [தம் (க.)] விஞ்ஞாணஸ்ஸ பத³ட்டா²னம். ஓபபச்சயிகனிப்³ப³த்திலக்க²ணம் விஞ்ஞாணம், தம் நாமரூபஸ்ஸ பத³ட்டா²னம். நாமகாயரூபகாயஸங்கா⁴தலக்க²ணம் நாமரூபம், தம் ச²ளாயதனஸ்ஸ பத³ட்டா²னம். இந்த்³ரியவவத்தா²னலக்க²ணம் ச²ளாயதனம், தம் ப²ஸ்ஸஸ்ஸ பத³ட்டா²னம். சக்கு²ரூபவிஞ்ஞாணஸன்னிபாதலக்க²ணோ ப²ஸ்ஸோ, ஸோ வேத³னாய பத³ட்டா²னம். இட்டா²னிட்ட²அனுப⁴வனலக்க²ணா வேத³னா, ஸா தண்ஹாய பத³ட்டா²னம். அஜ்ஜோ²ஸானலக்க²ணா தண்ஹா, ஸா உபாதா³னஸ்ஸ பத³ட்டா²னம். ஓபபச்சயிகம் உபாதா³னம், தம் ப⁴வஸ்ஸ பத³ட்டா²னம். நாமகாயரூபகாயஸம்ப⁴வனலக்க²ணோ ப⁴வோ, ஸோ ஜாதியா பத³ட்டா²னம். க²ந்த⁴பாதுப⁴வனலக்க²ணா ஜாதி, ஸா ஜராய பத³ட்டா²னம். உபதி⁴பரிபாகலக்க²ணா ஜரா, ஸா மரணஸ்ஸ பத³ட்டா²னம். ஜீவிதிந்த்³ரியுபச்சே²த³லக்க²ணம் மரணம், தம் ஸோகஸ்ஸ பத³ட்டா²னம். உஸ்ஸுக்ககாரகோ ஸோகோ, ஸோ பரிதே³வஸ்ஸ பத³ட்டா²னம். லாலப்பகாரகோ பரிதே³வோ, ஸோ து³க்க²ஸ்ஸ பத³ட்டா²னம். காயஸம்பீளனம் து³க்க²ம், தம் தோ³மனஸ்ஸஸ்ஸ பத³ட்டா²னம். சித்தஸம்பீளனம் தோ³மனஸ்ஸம், தம் உபாயாஸஸ்ஸ பத³ட்டா²னம். ஓத³ஹனகாரகோ உபாயாஸோ, ஸோ ப⁴வஸ்ஸ பத³ட்டா²னம். இமானி ப⁴வங்கா³னி யதா³ ஸமக்³கா³னி நிப்³ப³த்தானி ப⁴வந்தி ஸோ ப⁴வோ, தம் ஸம்ஸாரஸ்ஸ பத³ட்டா²னம். நிய்யானிகலக்க²ணோ மக்³கோ³, ஸோ நிரோத⁴ஸ்ஸ பத³ட்டா²னம்.

தித்த²ஞ்ஞுதா பீதஞ்ஞுதாய பத³ட்டா²னம், பீதஞ்ஞுதா பத்தஞ்ஞுதாய [மத்தஞ்ஞுதாய (ஸீ. க.)] பத³ட்டா²னம், பத்தஞ்ஞுதா அத்தஞ்ஞுதாய பத³ட்டா²னம், அத்தஞ்ஞுதா புப்³பே³கதபுஞ்ஞதாய பத³ட்டா²னம், புப்³பே³கதபுஞ்ஞதா பதிரூபதே³ஸவாஸஸ்ஸ பத³ட்டா²னம், பதிரூபதே³ஸவாஸோ ஸப்புரிஸூபனிஸ்ஸயஸ்ஸ பத³ட்டா²னம், ஸப்புரிஸூபனிஸ்ஸயோ அத்தஸம்மாபணிதா⁴னஸ்ஸ பத³ட்டா²னம், அத்தஸம்மாபணிதா⁴னம் ஸீலானம் பத³ட்டா²னம், ஸீலானி அவிப்படிஸாரஸ்ஸ பத³ட்டா²னம், அவிப்படிஸாரோ பாமோஜ்ஜஸ்ஸ பத³ட்டா²னம், பாமோஜ்ஜம் பீதியா பத³ட்டா²னம், பீதி பஸ்ஸத்³தி⁴யா பத³ட்டா²னம், பஸ்ஸத்³தி⁴ ஸுக²ஸ்ஸ பத³ட்டா²னம், ஸுக²ம் ஸமாதி⁴ஸ்ஸ பத³ட்டா²னம், ஸமாதி⁴ யதா²பூ⁴தஞாணத³ஸ்ஸனஸ்ஸ பத³ட்டா²னம், யதா²பூ⁴தஞாணத³ஸ்ஸனம் நிப்³பி³தா³ய பத³ட்டா²னம், நிப்³பி³தா³ விராக³ஸ்ஸ பத³ட்டா²னம், விராகோ³ விமுத்தியா பத³ட்டா²னம். விமுத்தி விமுத்திஞாணத³ஸ்ஸனஸ்ஸ பத³ட்டா²னம். ஏவம் யோ கோசி உபனிஸ்ஸயோ யோ கோசி பச்சயோ, ஸப்³போ³ ஸோ பத³ட்டா²னம். தேனாஹ ஆயஸ்மா மஹாகச்சாயனோ ‘‘த⁴ம்மம் தே³ஸேதி ஜினோ’’தி.

நியுத்தோ பத³ட்டா²னோ ஹாரோ.