1. தே³ஸனாஹாரவிப⁴ங்கோ³

5. தத்த² கதமோ தே³ஸனாஹாரோ? ‘‘அஸ்ஸாதா³தீ³னவதா’’தி கா³தா² அயம் தே³ஸனாஹாரோ. கிம் தே³ஸயதி? அஸ்ஸாத³ம் ஆதீ³னவம் நிஸ்ஸரணம் ப²லம் உபாயம் ஆணத்திம். த⁴ம்மம் வோ, பி⁴க்க²வே, தே³ஸேஸ்ஸாமி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேஸ்ஸாமீதி.

தத்த² கதமோ அஸ்ஸாதோ³?

‘‘காமம் [காமமாதி³கா இமா ச² கா³தா² ஸு. நி. 772 பஸ்ஸிதப்³பா³] காமயமானஸ்ஸ, தஸ்ஸ சேதம் ஸமிஜ்ஜ²தி;

அத்³தா⁴ பீதிமனோ ஹோதி, லத்³தா⁴ மச்சோ யதி³ச்ச²தீ’’தி.

அயம் அஸ்ஸாதோ³.

தத்த² கதமோ ஆதீ³னவோ?

‘‘தஸ்ஸ சே காமயானஸ்ஸ, ச²ந்த³ஜாதஸ்ஸ ஜந்துனோ;

தே காமா பரிஹாயந்தி, ஸல்லவித்³தோ⁴வ ருப்பதீ’’தி.

அயம் ஆதீ³னவோ.

தத்த² கதமம் நிஸ்ஸரணம்?

‘‘யோ காமே பரிவஜ்ஜேதி, ஸப்பஸ்ஸேவ பதா³ ஸிரோ;

ஸோமம் விஸத்திகம் லோகே, ஸதோ ஸமதிவத்ததீ’’தி.

இத³ம் நிஸ்ஸரணம்.

தத்த² கதமோ அஸ்ஸாதோ³?

‘‘கே²த்தம் வத்து²ம் ஹிரஞ்ஞம் வா, க³வாஸ்ஸம் தா³ஸபோரிஸம்;

தி²யோ ப³ந்தூ⁴ புதூ² காமே, யோ நரோ அனுகி³ஜ்ஜ²தீ’’தி.

அயம் அஸ்ஸாதோ³.

தத்த² கதமோ ஆதீ³னவோ?

‘‘அப³லா நம் ப³லீயந்தி, மத்³த³ந்தே நம் பரிஸ்ஸயா;

ததோ நம் து³க்க²மன்வேதி, நாவம் பி⁴ன்னமிவோத³க’’ந்தி.

அயம் ஆதீ³னவோ.

தத்த² கதமம் நிஸ்ஸரணம்?

‘‘தஸ்மா ஜந்து ஸதா³ ஸதோ, காமானி பரிவஜ்ஜயே;

தே பஹாய தரே ஓக⁴ம், நாவம் ஸித்வாவ பாரகூ³’’தி.

இத³ம் நிஸ்ஸரணம்.

தத்த² கதமம் ப²லம்?

‘‘த⁴ம்மோ ஹவே ரக்க²தி த⁴ம்மசாரிம், ச²த்தம் மஹந்தம் யத² வஸ்ஸகாலே;

ஏஸானிஸம்ஸோ த⁴ம்மே ஸுசிண்ணே, ந து³க்³க³திம் க³ச்ச²தி த⁴ம்மசாரீ’’தி.

இத³ம் ப²லம்.

தத்த² கதமோ உபாயோ?

‘‘ஸப்³பே³ ஸங்கா²ரா அனிச்சா’’தி…பே…

‘‘ஸப்³பே³ ஸங்கா²ரா [பஸ்ஸ த⁴. ப. 277] து³க்கா²’’தி…பே…

‘‘ஸப்³பே³ த⁴ம்மா அனத்தா’’தி, யதா³ பஞ்ஞாய பஸ்ஸதி;

அத² நிப்³பி³ந்த³தி து³க்கே², ஏஸ மக்³கோ³ விஸுத்³தி⁴யா’’தி.

அயம் உபாயோ.

தத்த² கதமா ஆணத்தி?

‘‘சக்கு²மா [பஸ்ஸ உதா³. 43] விஸமானீவ, விஜ்ஜமானே பரக்கமே;

பண்டி³தோ ஜீவலோகஸ்மிம், பாபானி பரிவஜ்ஜயே’’தி.

அயம் ஆணத்தி.

‘‘‘ஸுஞ்ஞதோ லோகம் அவேக்க²ஸ்ஸு,

மோக⁴ராஜா’தி ஆணத்தி, ‘ஸதா³ ஸதோ’தி உபாயோ;

‘அத்தானுதி³ட்டி²ம் ஊஹச்ச [உஹச்ச (க.) பஸ்ஸ ஸு. நி. 1125], ஏவம் மச்சுதரோ ஸியா’’’.

இத³ம் ப²லம்.

6. தத்த² ப⁴க³வா உக்³க⁴டிதஞ்ஞுஸ்ஸ புக்³க³லஸ்ஸ நிஸ்ஸரணம் தே³ஸயதி, விபஞ்சிதஞ்ஞுஸ்ஸ புக்³க³லஸ்ஸ ஆதீ³னவஞ்ச நிஸ்ஸரணஞ்ச தே³ஸயதி, நேய்யஸ்ஸ புக்³க³லஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச தே³ஸயதி.

தத்த² சதஸ்ஸோ படிபதா³, சத்தாரோ புக்³க³லா. தண்ஹாசரிதோ மந்தோ³ ஸதிந்த்³ரியேன து³க்கா²ய படிபதா³ய த³ந்தா⁴பி⁴ஞ்ஞாய நிய்யாதி ஸதிபட்டா²னேஹி நிஸ்ஸயேஹி. தண்ஹாசரிதோ உத³த்தோ [உத³த்தோ² (ஸீ.) உ + ஆ + தா³ + த] ஸமாதி⁴ந்த்³ரியேன து³க்கா²ய படிபதா³ய கி²ப்பாபி⁴ஞ்ஞாய நிய்யாதி ஜா²னேஹி நிஸ்ஸயேஹி. தி³ட்டி²சரிதோ மந்தோ³ வீரியிந்த்³ரியேன ஸுகா²ய படிபதா³ய த³ந்தா⁴பி⁴ஞ்ஞாய நிய்யாதி ஸம்மப்பதா⁴னேஹி நிஸ்ஸயேஹி. தி³ட்டி²சரிதோ உத³த்தோ பஞ்ஞிந்த்³ரியேன ஸுகா²ய படிபதா³ய கி²ப்பாபி⁴ஞ்ஞாய நிய்யாதி ஸச்சேஹி நிஸ்ஸயேஹி.

உபோ⁴ தண்ஹாசரிதா ஸமத²புப்³ப³ங்க³மாய விபஸ்ஸனா நிய்யந்தி ராக³விராகா³ய சேதோவிமுத்தியா. உபோ⁴ தி³ட்டி²சரிதா விபஸ்ஸனாபுப்³ப³ங்க³மே ஸமதே²ன நிய்யந்தி அவிஜ்ஜாவிராகா³ய பஞ்ஞாவிமுத்தியா.

தத்த² யே ஸமத²புப்³ப³ங்க³மாஹி படிபதா³ஹி நிய்யந்தி, தே நந்தி³யாவட்டேன நயேன ஹாதப்³பா³, யே விபஸ்ஸனாபுப்³ப³ங்க³மாஹி படிபதா³ஹி நிய்யந்தி, தே ஸீஹவிக்கீளிதேன நயேன ஹாதப்³பா³.

7. ஸ்வாயம் ஹாரோ கத்த² ஸம்ப⁴வதி, யஸ்ஸ ஸத்தா² வா த⁴ம்மம் தே³ஸயதி அஞ்ஞதரோ வா க³ருட்டா²னீயோ ஸப்³ரஹ்மசாரீ, ஸோ தம் த⁴ம்மம் ஸுத்வா ஸத்³த⁴ம் படிலப⁴தி. தத்த² யா வீமம்ஸா உஸ்ஸாஹனா துலனா உபபரிக்கா², அயம் ஸுதமயீ பஞ்ஞா. ததா² ஸுதேன நிஸ்ஸயேன யா வீமம்ஸா துலனா உபபரிக்கா² மனஸானுபேக்க²ணா, அயம் சிந்தாமயீ பஞ்ஞா. இமாஹி த்³வீஹி பஞ்ஞாஹி மனஸிகாரஸம்பயுத்தஸ்ஸ யம் ஞாணம் உப்பஜ்ஜதி த³ஸ்ஸனபூ⁴மியம் வா பா⁴வனாபூ⁴மியம் வா, அயம் பா⁴வனாமயீ பஞ்ஞா.

8. பரதோகோ⁴ஸா ஸுதமயீ பஞ்ஞா. பச்சத்தஸமுட்டி²தா யோனிஸோ மனஸிகாரா சிந்தாமயீ பஞ்ஞா. யம் பரதோ ச கோ⁴ஸேன பச்சத்தஸமுட்டி²தேன ச யோனிஸோமனஸிகாரேன ஞாணம் உப்பஜ்ஜதி, அயம் பா⁴வனாமயீ பஞ்ஞா. யஸ்ஸ இமா த்³வே பஞ்ஞா அத்தி² ஸுதமயீ சிந்தாமயீ ச, அயம் உக்³க⁴டிதஞ்ஞூ. யஸ்ஸ ஸுதமயீ பஞ்ஞா அத்தி², சிந்தாமயீ நத்தி², அயம் விபஞ்சிதஞ்ஞூ [விபச்சிதஞ்ஞூ (ஸீ.)]. யஸ்ஸ நேவ ஸுதமயீ பஞ்ஞா அத்தி² ந சிந்தாமயீ, அயம் நேய்யோ.

9. ஸாயம் த⁴ம்மதே³ஸனா கிம் தே³ஸயதி? சத்தாரி ஸச்சானி து³க்க²ம் ஸமுத³யம் நிரோத⁴ம் மக்³க³ம். ஆதீ³னவோ ச ப²லஞ்ச து³க்க²ம், அஸ்ஸாதோ³ ஸமுத³யோ, நிஸ்ஸரணம் நிரோதோ⁴, உபாயோ ஆணத்தி ச மக்³கோ³. இமானி சத்தாரி ஸச்சானி. இத³ம் த⁴ம்மசக்கம்.

யதா²ஹ ப⁴க³வா – ‘‘இத³ம் து³க்க²’’ந்தி மே, பி⁴க்க²வே, பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம், ஸப்³ப³ம் த⁴ம்மசக்கம்.

தத்த² அபரிமாணா பதா³, அபரிமாணா அக்க²ரா, அபரிமாணா ப்³யஞ்ஜனா, அபரிமாணா ஆகாரா நேருத்தா நித்³தே³ஸா. ஏதஸ்ஸேவ அத்த²ஸ்ஸ ஸங்காஸனா பகாஸனா விவரணா விப⁴ஜனா உத்தானீகம்மம் [உத்தானிகம்மம் (க.)] பஞ்ஞத்தி, இதிபித³ம் து³க்க²ம் அரியஸச்சம்.

‘‘அயம் து³க்க²ஸமுத³யோ’’தி மே, பி⁴க்க²வே, பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம்…பே… ‘‘அயம் து³க்க²னிரோதோ⁴’’தி மே, பி⁴க்க²வே…பே… ‘‘அயம் து³க்க²னிரோத⁴கா³மினீ படிபதா³’’தி மே, பி⁴க்க²வே, பா³ராணஸியம் இஸிபதனே மிக³தா³யே அனுத்தரம் த⁴ம்மசக்கம் பவத்திதம் அப்படிவத்தியம் ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா கேனசி வா லோகஸ்மிம்.

தத்த² அபரிமாணா பதா³, அபரிமாணா அக்க²ரா, அபரிமாணா ப்³யஞ்ஜனா, அபரிமாணா ஆகாரா நேருத்தா நித்³தே³ஸா. ஏதஸ்ஸேவ அத்த²ஸ்ஸ ஸங்காஸனா பகாஸனா விவரணா விப⁴ஜனா உத்தானீகம்மம் பஞ்ஞத்தி இதிபித³ம் து³க்க²னிரோத⁴கா³மினீ படிபதா³ அரியஸச்சம்.

தத்த² ப⁴க³வா அக்க²ரேஹி ஸங்காஸேதி, பதே³ஹி பகாஸேதி, ப்³யஞ்ஜனேஹி விவரதி, ஆகாரேஹி விப⁴ஜதி, நிருத்தீஹி உத்தானீகரோதி [உத்தானிம் கரோதி (க.)], நித்³தே³ஸேஹி பஞ்ஞபேதி. தத்த² ப⁴க³வா அக்க²ரேஹி ச பதே³ஹி ச உக்³க⁴டேதி [உக்³கா⁴டேதி (ஸீ.)], ப்³யஞ்ஜனேஹி ச ஆகாரேஹி ச விபஞ்சயதி, நிருத்தீஹி ச நித்³தே³ஸேஹி ச வித்தா²ரேதி. தத்த² உக்³க⁴டனா [உக்³கா⁴டனா (ஸீ.)] ஆதி³, விபஞ்சனா மஜ்ஜே², வித்தா²ரணா பரியோஸானம். ஸோயம் த⁴ம்மவினயோ உக்³க⁴டீயந்தோ உக்³க⁴டிதஞ்ஞூபுக்³க³லம் வினேதி, தேன நம் ஆஹு ‘‘ஆதி³கல்யாணோ’’தி. விபஞ்சீயந்தோ விபஞ்சிதஞ்ஞூபுக்³க³லம் வினேதி, தேன நம் ஆஹு ‘‘மஜ்ஜே²கல்யாணோ’’தி. வித்தா²ரீயந்தோ நேய்யம் புக்³க³லம் வினேதி, தேன நம் ஆஹு ‘‘பரியோஸானகல்யாணோ’’தி.

10. தத்த² ச²ப்பதா³னி அத்தோ² ஸங்காஸனா பகாஸனா விவரணா விப⁴ஜனா உத்தானீகம்மம் பஞ்ஞத்தி, இமானி ச²ப்பதா³னி அத்தோ². ச²ப்பதா³னி ப்³யஞ்ஜனம் அக்க²ரம் பத³ம் ப்³யஞ்ஜனம் ஆகாரோ நிருத்தி நித்³தே³ஸோ, இமானி ச²ப்பதா³னி ப்³யஞ்ஜனம். தேனாஹ ப⁴க³வா ‘‘த⁴ம்மம் வோ, பி⁴க்க²வே, தே³ஸேஸ்ஸாமி ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜன’’ந்தி.

கேவலந்தி லோகுத்தரம், ந மிஸ்ஸம் லோகியேஹி த⁴ம்மேஹி. பரிபுண்ணந்தி பரிபூரம் அனூனம் அனதிரேகம். பரிஸுத்³த⁴ந்தி நிம்மலம் ஸப்³ப³மலாபக³தம் பரியோதா³தம் உபட்டி²தம் ஸப்³ப³விஸேஸானம், இத³ம் வுச்சதி ததா²க³தபத³ம்இதிபி ததா²க³தனிஸேவிதம்இதிபி ததா²க³தாரஞ்ஜிதம்இதிபி, அதோசேதம் ப்³ரஹ்மசரியம் பஞ்ஞாயதி. தேனாஹ ப⁴க³வா ‘‘கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேஸ்ஸாமீ’’தி.

கேஸம் அயம் த⁴ம்மதே³ஸனா, யோகீ³னம். தேனாஹ ஆயஸ்மா மஹாகச்சாயனோ –

‘‘அஸ்ஸாதா³தீ³னவதா, நிஸ்ஸரணம்பி ச ப²லம் உபாயோ ச;

ஆணத்தீ ச ப⁴க³வதோ, யோகீ³னம் தே³ஸனாஹாரோ’’தி.

நியுத்தோ தே³ஸனாஹாரோ.