8. மாக³விகங்க³பஞ்ஹோ

8. ‘‘ப⁴ந்தே நாக³ஸேன, ‘மாக³விகஸ்ஸ சத்தாரி அங்கா³னி க³ஹேதப்³பா³னீ’தி யம் வதே³ஸி, கதமானி தானி சத்தாரி அங்கா³னி க³ஹேதப்³பா³னீ’’தி? ‘‘யதா², மஹாராஜ, மாக³விகோ அப்பமித்³தோ⁴ ஹோதி, ஏவமேவ கோ², மஹாராஜ, யோகி³னா யோகா³வசரேன அப்பமித்³தே⁴ன ப⁴விதப்³ப³ம். இத³ம், மஹாராஜ, மாக³விகஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, மாக³விகோ மிகே³ஸு யேவ சித்தம் உபனிப³ந்த⁴தி, ஏவமேவ கோ², மஹாராஜ, யோகி³னா யோகா³வசரேன ஆரம்மணேஸு யேவ சித்தம் உபனிப³ந்தி⁴தப்³ப³ம். இத³ம், மஹாராஜ, மாக³விகஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மாக³விகோ காலம் கம்மஸ்ஸ ஜானாதி, ஏவமேவ கோ², மஹாராஜ, யோகி³னா யோகா³வசரேன படிஸல்லானஸ்ஸ காலோ ஜானிதப்³போ³ ‘அயம் காலோ படிஸல்லானஸ்ஸ, அயம் காலோ நிக்க²மனாயா’தி. இத³ம், மஹாராஜ, மாக³விகஸ்ஸ ததியம் அங்க³ம் க³ஹேதப்³ப³ம்.

‘‘புன சபரம், மஹாராஜ, மாக³விகோ மிக³ம் தி³ஸ்வா ஹாஸமபி⁴ஜனேதி ‘இமம் லச்சா²மீ’தி, ஏவமேவ கோ², மஹாராஜ, யோகி³னா யோகா³வசரேன ஆரம்மணே அபி⁴ரமிதப்³ப³ம், ஹாஸமபி⁴ஜனேதப்³ப³ம் ‘உத்தரிம் விஸேஸமதி⁴க³ச்சி²ஸ்ஸாமீ’தி. இத³ம், மஹாராஜ, மாக³விகஸ்ஸ சதுத்த²ம் அங்க³ம் க³ஹேதப்³ப³ம். பா⁴ஸிதம்பேதம் மஹாராஜ தே²ரேன மோக⁴ராஜேன –

‘‘‘ஆரம்மணே லபி⁴த்வான, பஹிதத்தேன பி⁴க்கு²னா;

பி⁴ய்யோ ஹாஸோ ஜனேதப்³போ³, அதி⁴க³ச்சி²ஸ்ஸாமி உத்தரி’’’ந்தி.

மாக³விகங்க³பஞ்ஹோ அட்ட²மோ.