9. ஸப்பங்க³பஞ்ஹோ

9. ‘‘ப⁴ந்தே நாக³ஸேன, ‘ஸப்பஸ்ஸ தீணி அங்கா³னி க³ஹேதப்³பா³னீ’தி யம் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, ஸப்போ உரேன க³ச்ச²தி, ஏவமேவ கோ², மஹாராஜ, யோகி³னா யோகா³வசரேன பஞ்ஞாய சரிதப்³ப³ம், பஞ்ஞாய சரமானஸ்ஸ கோ², மஹாராஜ, யோகி³னோ சித்தம் ஞாயே சரதி, விலக்க²ணம் விவஜ்ஜேதி, ஸலக்க²ணம் பா⁴வேதி. இத³ம், மஹாராஜ, ஸப்பஸ்ஸ பட²மம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸப்போ சரமானோ ஓஸத⁴ம் பரிவஜ்ஜேந்தோ சரதி, ஏவமேவ கோ², மஹாராஜ, யோகி³னா யோகா³வசரேன து³ச்சரிதம் பரிவஜ்ஜேந்தேன சரிதப்³ப³ம். இத³ம், மஹாராஜ, ஸப்பஸ்ஸ து³தியம் அங்க³ம் க³ஹேதப்³ப³ம்.

‘‘புன சபரம், மஹாராஜ, ஸப்போ மனுஸ்ஸே தி³ஸ்வா தப்பதி [மனுஸ்ஸம் தி³ஸ்வா கம்பதி (க.)] ஸோசதி சிந்தயதி, ஏவமேவ கோ² மஹாராஜ யோகி³னா யோகா³வசரேன குவிதக்கே, விதக்கேத்வா அரதிம் உப்பாத³யித்வா தப்பிதப்³ப³ம் ஸோசிதப்³ப³ம் சிந்தயிதப்³ப³ம் ‘பமாதே³ன மே தி³வஸோ வீதினாமிதோ, ந ஸோ புன ஸக்கா லத்³து⁴’ந்தி. இத³ம், மஹாராஜ, ஸப்பஸ்ஸ ததியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா ப⁴ல்லாடியஜாதகே த்³வின்னம் கின்னரானம் –

‘‘‘மயேகரத்தம் [யமேகரத்திம் (ஸீ. பீ.)] விப்பவஸிம்ஹ லுத்³த³, அகாமகா அஞ்ஞமஞ்ஞம் ஸரந்தா;

தமேகரத்தம் [தமேகரத்திம் (ஸீ. பீ.)] அனுதப்பமானா, ஸோசாம ‘ஸா ரத்தி புன நஹேஸ்ஸதீ’’’தி.

ஸப்பங்க³பஞ்ஹோ நவமோ.