5. உலூகங்க³பஞ்ஹோ

5. ‘‘ப⁴ந்தே நாக³ஸேன, ‘உலூகஸ்ஸ த்³வே அங்கா³னி க³ஹேதப்³பா³னீ’தி யம் வதே³ஸி, கதமானி தானி த்³வே அங்கா³னி க³ஹேதப்³பா³னீ’’தி? ‘‘யதா², மஹாராஜ, உலூகோ காகேஹி படிவிருத்³தோ⁴, ரத்திம் காகஸங்க⁴ம் க³ந்த்வா ப³ஹூபி காகே ஹனதி, ஏவமேவ கோ², மஹாராஜ, யோகி³னா யோகா³வசரேன அஞ்ஞாணேன படிவிருத்³தோ⁴ காதப்³போ³, ஏகேன ரஹோ நிஸீதி³த்வா அஞ்ஞாணம் ஸம்பமத்³தி³தப்³ப³ம், மூலதோ சி²ந்தி³தப்³ப³ம். இத³ம், மஹாராஜ, உலூகஸ்ஸ பட²மம் க³ஹேதப்³ப³ம்.

‘‘புன சபரம், மஹாராஜ, உலூகோ ஸுப்படிஸல்லீனோ ஹோதி, ஏவமேவ கோ², மஹாராஜ, யோகி³னா யோகா³வசரேன படிஸல்லானாராமேன ப⁴விதப்³ப³ம் படிஸல்லானரதேன. இத³ம், மஹாராஜ, உலூகஸ்ஸ து³தியம் அங்க³ம் க³ஹேதப்³ப³ம். பா⁴ஸிதம்பேதம், மஹாராஜ, ப⁴க³வதா தே³வாதிதே³வேன ஸம்யுத்தனிகாயவரே –

‘‘‘இத⁴, பி⁴க்க²வே, பி⁴க்கு² படிஸல்லானாராமோ படிஸல்லானரதோ ‘‘இத³ம் து³க்க²’’ந்தி யதா²பூ⁴தம் பஜானாதி, ‘‘அயம் து³க்க²ஸமுத³யோ’’தி யதா² பூ⁴த²ம் பஜானாதி, ‘‘அயம் து³க்க²னிரோதோ⁴’’தி யதா²பூ⁴தம் பஜானாதி, ‘‘அயம் து³க்க²னிரோத⁴கா³மினீ படிபதா³’’தி யதா²பூ⁴தம் பஜானாதீ’’’தி.

உலூகங்க³பஞ்ஹோ பஞ்சமோ.