9. ஏகந்தஸுக²னிப்³பா³னபஞ்ஹோ

9. ‘‘ப⁴ந்தே நாக³ஸேன, கிம் ஏகந்தஸுக²ம் நிப்³பா³னம், உதா³ஹு து³க்கே²ன மிஸ்ஸ’’ந்தி? ‘‘ஏகந்தஸுக²ம், மஹாராஜ, நிப்³பா³னம், து³க்கே²ன அமிஸ்ஸ’’ந்தி.

‘‘ந மயம் தம், ப⁴ந்தே நாக³ஸேன, வசனம் ஸத்³த³ஹாம ‘ஏகந்தஸுக²ம் நிப்³பா³ன’ந்தி, ஏவமேத்த² மயம், ப⁴ந்தே நாக³ஸேன, பச்சேம ‘நிப்³பா³னம் து³க்கே²ன மிஸ்ஸ’ந்தி, காரணஞ்சேத்த² உபலபா⁴ம ‘நிப்³பா³னம் து³க்கே²ன மிஸ்ஸ’ந்தி. கதமம் ஏத்த² காரணம்? யே தே, ப⁴ந்தே நாக³ஸேன, நிப்³பா³னம் பரியேஸந்தி, தேஸம் தி³ஸ்ஸதி காயஸ்ஸ ச சித்தஸ்ஸ ச ஆதாபோ பரிதாபோ டா²னசங்கமனிஸஜ்ஜாஸயனாஹாரபரிக்³க³ஹோ மித்³த⁴ஸ்ஸ ச உபரோதோ⁴ ஆயதனானஞ்ச படிபீளனம் த⁴னத⁴ஞ்ஞபியஞாதிமித்தப்பஜஹனம். யே கேசி லோகே ஸுகி²தா ஸுக²ஸமப்பிதா, தே ஸப்³பே³பி பஞ்சஹி காமகு³ணேஹி ஆயதனே ரமேந்தி ப்³ரூஹேந்தி, மனாபிகமனாபிகப³ஹுவித⁴ஸுப⁴னிமித்தேன ரூபேன சக்கு²ம் ரமேந்தி ப்³ரூஹேந்தி, மனாபிகமனாபிககீ³தவாதி³தப³ஹுவித⁴ஸுப⁴னிமித்தேன ஸத்³தே³ன ஸோதம் ரமேந்தி ப்³ரூஹேந்தி, மனாபிகமனாபிகபுப்ப²ப²லபத்ததசமூலஸாரப³ஹுவித⁴ஸுப⁴னிமித்தேன க³ந்தே⁴ன கா⁴னம் ரமேந்தி ப்³ரூஹேந்தி, மனாபிகமனாபிகக²ஜ்ஜபோ⁴ஜ்ஜலேய்யபேய்யஸாயனீயப³ஹுவித⁴ஸுப⁴னிமித்தேன ரஸேன ஜிவ்ஹம் ரமேந்தி ப்³ருஹேந்தி, மனாபிகமனாபிகஸண்ஹஸுகு²மமுது³மத்³த³வப³ஹுவித⁴ஸுப⁴னிமித்தேன ப²ஸ்ஸேன காயம் ரமேந்தி ப்³ரூஹேந்தி, மனாபிகமனாபிககல்யாணபாபகஸுபா⁴ஸுப⁴ப³ஹுவித⁴விதக்கமனஸிகாரேன மனம் ரமேந்தி ப்³ரூஹேந்தி. தும்ஹே தம் சக்கு²ஸோதகா⁴னஜிவ்ஹாகாயமனோப்³ரூஹனம் ஹனத² உபஹனத², சி²ந்த³த² உபச்சி²ந்த³த², ருந்த⁴த² உபருந்த⁴த². தேன காயோபி பரிதபதி, சித்தம்பி பரிதபதி, காயே பரிதத்தே காயிகது³க்க²வேத³னம் வேதி³யதி, சித்தே பரிதத்தே சேதஸிகது³க்க²வேத³னம் வேத³யதி. நனு மாக³ண்டி³யோபி [மாக³ந்தி³யோபி (ஸீ. பீ.)] பரிப்³பா³ஜகோ ப⁴க³வந்தம் க³ரஹமானோ ஏவமாஹ ‘பூ⁴னஹு [பூ⁴தஹச்சோ (பீ.), பூ⁴னஹச்சோ (க.)] ஸமணோ கோ³தமோ’தி. இத³மேத்த² காரணம், யேனாஹம் காரணேன ப்³ரூமி ‘நிப்³பா³னம் து³க்கே²ன மிஸ்ஸ’’’ந்தி.

‘‘ந ஹி, மஹாராஜ, நிப்³பா³னம் து³க்கே²ன மிஸ்ஸம், ஏகந்தஸுக²ம் நிப்³பா³னம். யம் பன த்வம், மஹாராஜ, ப்³ரூஸி ‘நிப்³பா³னம் து³க்க²’ந்தி, நேதம் து³க்க²ம் நிப்³பா³னம் நாம, நிப்³பா³னஸ்ஸ பன ஸச்சி²கிரியாய புப்³ப³பா⁴கோ³ ஏஸோ, நிப்³பா³னபரியேஸனம் ஏதம், ஏகந்தஸுக²ம் யேவ, மஹாராஜ, நிப்³பா³னம், ந து³க்கே²ன மிஸ்ஸம். ஏத்த² காரணம் வதா³மி. அத்தி², மஹாராஜ, ராஜூனம் ரஜ்ஜஸுக²ம் நாமா’’தி? ‘‘ஆம, ப⁴ந்தே, அத்தி² ராஜூனம் ரஜ்ஜஸுக²’’ந்தி. ‘‘அபி நு கோ² தம், மஹாராஜ, ரஜ்ஜஸுக²ம் து³க்கே²ன மிஸ்ஸ’’ந்தி? ‘‘ந ஹி, ப⁴ந்தே’’தி. ‘‘கிஸ்ஸ பன தே, மஹாராஜ, ராஜானோ பச்சந்தே குபிதே தேஸம் பச்சந்தனிஸ்ஸிதானம் படிஸேதா⁴ய அமச்சேஹி பரிணாயகேஹி ப⁴டேஹி ப³லத்தே²ஹி பரிவுதா பவாஸம் க³ந்த்வா ட³ம்ஸமகஸவாதாதபபடிபீளிதா ஸமவிஸமே பரிதா⁴வந்தி, மஹாயுத்³த⁴ஞ்ச கரோந்தி, ஜீவிதஸம்ஸயஞ்ச பாபுணந்தீ’’தி? ‘‘நேதம், ப⁴ந்தே நாக³ஸேன, ரஜ்ஜஸுக²ம் நாம, ரஜ்ஜஸுக²ஸ்ஸ பரியேஸனாய புப்³ப³பா⁴கோ³ ஏஸோ, து³க்கே²ன, ப⁴ந்தே நாக³ஸேன, ராஜானோ ரஜ்ஜம் பரியேஸித்வா ரஜ்ஜஸுக²ம் அனுப⁴வந்தி, ஏவம், ப⁴ந்தே நாக³ஸேன, ரஜ்ஜஸுக²ம் து³க்கே²ன அமிஸ்ஸம், அஞ்ஞம் தம் ரஜ்ஜஸுக²ம், அஞ்ஞம் து³க்க²’’ந்தி. ‘‘ஏவமேவ கோ², மஹாராஜ, ஏகந்தஸுக²ம் நிப்³பா³னம், ந து³க்கே²ன மிஸ்ஸம். யே பன தம் நிப்³பா³னம் பரியேஸந்தி, தே காயஞ்ச சித்தஞ்ச ஆதாபேத்வா டா²னசங்கமனிஸஜ்ஜாஸயனாஹாரம் பரிக்³க³ஹேத்வா மித்³த⁴ம் உபருந்தி⁴த்வா ஆயதனானி படிபீளேத்வா காயஞ்ச ஜீவிதஞ்ச பரிச்சஜித்வா து³க்கே²ன நிப்³பா³னம் பரியேஸித்வா ஏகந்தஸுக²ம் நிப்³பா³னம் அனுப⁴வந்தி, நிஹதபச்சாமித்தா விய ராஜானோ ரஜ்ஜஸுக²ம். ஏவம், மஹாராஜ, ஏகந்தஸுக²ம் நிப்³பா³னம், ந து³க்கே²ன மிஸ்ஸம், அஞ்ஞம் நிப்³பா³னம், அஞ்ஞம் து³க்க²ந்தி.

‘‘அபரம்பி, மஹாராஜ, உத்தரிம் காரணம் ஸுணோஹி ஏகந்தஸுக²ம் நிப்³பா³னம், ந து³க்கே²ன மிஸ்ஸம், அஞ்ஞம் து³க்க²ம், அஞ்ஞம் நிப்³பா³னந்தி. அத்தி², மஹாராஜ, ஆசரியானம் ஸிப்பவந்தானம் ஸிப்பஸுக²ம் நாமா’’தி? ‘‘ஆம, ப⁴ந்தே, அத்தி² ஆசரியானம் ஸிப்பவந்தானம் ஸிப்பஸுக²’’ந்தி. ‘‘அபி நு கோ² தம், மஹாராஜ, ஸிப்பஸுக²ம் து³க்கே²ன மிஸ்ஸ’’ந்தி? ‘‘ந ஹி, ப⁴ந்தே’’தி. ‘‘கிஸ்ஸ பன தே, மஹாராஜ, ஆசரியா [இத³ம் பத³ம் ஸீ. பீ. போத்த²கேஸு நத்தி²] ஆசரியானம் அபி⁴வாத³னபச்சுட்டா²னேன உத³காஹரணக⁴ரஸம்மஜ்ஜனத³ந்தகட்ட²முகோ²த³கானுப்பதா³னேன உச்சி²ட்ட²படிக்³க³ஹணஉச்சா²த³னனஹாபனபாத³பரிகம்மேன ஸகசித்தம் நிக்கி²பித்வா பரசித்தானுவத்தனேன து³க்க²ஸேய்யாய விஸமபோ⁴ஜனேன காயம் ஆதாபேந்தீ’’தி? ‘‘நேதம், ப⁴ந்தே நாக³ஸேன, ஸிப்பஸுக²ம் நாம, ஸிப்பபரியேஸனாய புப்³ப³பா⁴கோ³ ஏஸோ, து³க்கே²ன, ப⁴ந்தே நாக³ஸேன, ஆசரியா ஸிப்பம் பரியேஸித்வா ஸிப்பஸுக²ம் அனுப⁴வந்தி, ஏவம், ப⁴ந்தே நாக³ஸேன, ஸிப்பஸுக²ம் து³க்கே²ன அமிஸ்ஸம், அஞ்ஞம் தம் ஸிப்பஸுக²ம், அஞ்ஞம் து³க்க²’’ந்தி. ‘‘ஏவமேவ கோ², மஹாராஜ, ஏகந்தஸுக²ம் நிப்³பா³னம், ந து³க்கே²ன மிஸ்ஸம். யே பன தம் நிப்³பா³னம் பரியேஸந்தி, தே காயஞ்ச சித்தஞ்ச ஆதாபேத்வா டா²னசங்கமனிஸஜ்ஜாஸயனாஹாரம் பரிக்³க³ஹேத்வா மித்³த⁴ம் உபருந்தி⁴த்வா ஆயதனானி படிபீளேத்வா காயஞ்ச ஜீவிதஞ்ச பரிச்சஜித்வா து³க்கே²ன நிப்³பா³னம் பரியேஸித்வா ஏகந்தஸுக²ம் நிப்³பா³னம் அனுப⁴வந்தி, ஆசரியா விய ஸிப்பஸுக²ம். ஏவம், மஹாராஜ, ஏகந்தஸுக²ம் நிப்³பா³னம், ந து³க்கே²ன மிஸ்ஸம், அஞ்ஞம் து³க்க²ம், அஞ்ஞம் நிப்³பா³ன’’ந்தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

ஏகந்தஸுக²னிப்³பா³னபஞ்ஹோ நவமோ.