10. நிப்³பா³னரூபஸண்டா²னபஞ்ஹோ

10. ‘‘ப⁴ந்தே நாக³ஸேன, ‘நிப்³பா³னம் நிப்³பா³ன’ந்தி யம் வதே³ஸி, ஸக்கா பன தஸ்ஸ நிப்³பா³னஸ்ஸ ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிது’’ந்தி? ‘‘அப்படிபா⁴க³ம், மஹாராஜ, நிப்³பா³னம், ந ஸக்கா நிப்³பா³னஸ்ஸ ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிது’’ந்தி. ‘‘ஏதம்பாஹம், ப⁴ந்தே நாக³ஸேன, ந ஸம்படிச்சா²மி, யம் அத்தி²த⁴ம்மஸ்ஸ நிப்³பா³னஸ்ஸ ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா அபஞ்ஞாபனம், காரணேன மம் ஸஞ்ஞாபேஹீ’’தி. ‘‘ஹோது, மஹாராஜ, காரணேன தம் ஸஞ்ஞாபேஸ்ஸாமி. அத்தி², மஹாராஜ, மஹாஸமுத்³தோ³ நாமா’’தி? ‘‘ஆம, ப⁴ந்தே, அத்தே²ஸோ மஹாஸமுத்³தோ³’’தி. ‘‘ஸசே தம், மஹாராஜ, கோசி ஏவம் புச்சே²ய்ய ‘கித்தகம், மஹாராஜ, மஹாஸமுத்³தே³ உத³கம், கதி பன தே ஸத்தா, யே மஹாஸமுத்³தே³ படிவஸந்தீ’தி, ஏவம் புட்டோ² த்வம், மஹாராஜ, கிந்தி தஸ்ஸ ப்³யாகரேய்யாஸீ’’தி? ‘‘ஸசே மம், ப⁴ந்தே, கோசி ஏவம் புச்சே²ய்ய ‘கித்தகம், மஹாராஜ, மஹாஸமுத்³தே³ உத³கம், கதி பன தே ஸத்தா, யே மஹாஸமுத்³தே³ படிவஸந்தீ’தி, தமஹம், ப⁴ந்தே, ஏவம் வதே³ய்யம் ‘அபுச்சி²தப்³ப³ம் மம் த்வம் அம்போ⁴ புரிஸ புச்ச²ஸி, நேஸா புச்சா² கேனசி புச்சி²தப்³பா³, ட²பனீயோ ஏஸோ பஞ்ஹோ. அவிப⁴த்தோ லோகக்கா²யிகேஹி மஹாஸமுத்³தோ³, ந ஸக்கா மஹாஸமுத்³தே³ உத³கம் பரிமினிதும் ஸத்தா வா யே தத்த² வாஸமுபக³தாதி ஏவாஹம் ப⁴ந்தே தஸ்ஸ படிவசனம் த³தே³ய்ய’’’ந்தி.

‘‘கிஸ்ஸ பன, த்வம் மஹாராஜ, அத்தி²த⁴ம்மே மஹாஸமுத்³தே³ ஏவம் படிவசனம் த³தே³ய்யாஸி, நனு விக³ணேத்வா [மினித்வா (க.)] தஸ்ஸ ஆசிக்கி²தப்³ப³ம் ‘ஏத்தகம் மஹாஸமுத்³தே³ உத³கம், ஏத்தகா ச ஸத்தா மஹாஸமுத்³தே³ படிவஸந்தீ’’தி? ‘‘ந ஸக்கா, ப⁴ந்தே, அவிஸயோ ஏஸோ பஞ்ஹோ’’தி.

‘‘யதா², மஹாராஜ, அத்தி²த⁴ம்மே யேவ மஹாஸமுத்³தே³ ந ஸக்கா உத³கம் பரிக³ணேதும் [பரிமினிதும் (க.)] ஸத்தா வா யே தத்த² வாஸமுபக³தா, ஏவமேவ கோ², மஹாராஜ, அத்தி²த⁴ம்மஸ்ஸேவ நிப்³பா³னஸ்ஸ ந ஸக்கா ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிதும், விக³ணேய்ய, மஹாராஜ, இத்³தி⁴மா சேதோவஸிப்பத்தோ மஹாஸமுத்³தே³ உத³கம் தத்ராஸயே ச ஸத்தே, ந த்வேவ ஸோ இத்³தி⁴மா சேதோவஸிப்பத்தோ ஸக்குணேய்ய நிப்³பா³னஸ்ஸ ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிதும்.

‘‘அபரம்பி, மஹாராஜ, உத்தரிம் காரணம் ஸுணோஹி, அத்தி²த⁴ம்மஸ்ஸேவ நிப்³பா³னஸ்ஸ ந ஸக்கா ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிதுந்தி. அத்தி², மஹாராஜ, தே³வேஸு அரூபகாயிகா நாம தே³வா’’தி. ‘‘ஆம, ப⁴ந்தே, ஸுய்யதி ‘அத்தி² தே³வேஸு அரூபகாயிகா நாம தே³வா’’’தி. ‘‘ஸக்கா பன, மஹாராஜ, தேஸம் அரூபகாயிகானம் தே³வானம் ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிது’’ந்தி? ‘‘ந ஹி, ப⁴ந்தே’’தி. ‘‘தேன ஹி, மஹாராஜ, நத்தி² அரூபகாயிகா தே³வா’’தி? ‘‘அத்தி², ப⁴ந்தே, அரூபகாயிகா தே³வா, ந ச ஸக்கா தேஸம் ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிது’’ந்தி. ‘‘யதா², மஹாராஜ, அத்தி²ஸத்தானம் யேவ அரூபகாயிகானம் தே³வானம் ந ஸக்கா ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிதும், ஏவமேவ கோ², மஹாராஜ, அத்தி²த⁴ம்மஸ்ஸேவ நிப்³பா³னஸ்ஸ ந ஸக்கா ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிது’’ந்தி.

‘‘ப⁴ந்தே நாக³ஸேன, ஹோது ஏகந்தஸுக²ம் நிப்³பா³னம், ந ச ஸக்கா தஸ்ஸ ரூபம் வா ஸண்டா²னம் வா வயம் வா பமாணம் வா ஓபம்மேன வா காரணேன வா ஹேதுனா வா நயேன வா உபத³ஸ்ஸயிதும். அத்தி² பன, ப⁴ந்தே, நிப்³பா³னஸ்ஸ கு³ணம் அஞ்ஞேஹி அனுபவிட்ட²ம் கிஞ்சி ஓபம்மனித³ஸ்ஸனமத்த’’ந்தி? ‘‘ஸரூபதோ, மஹாராஜ, நத்தி², கு³ணதோ பன ஸக்கா கிஞ்சி ஓபம்மனித³ஸ்ஸனமத்தம் உபத³ஸ்ஸயிது’’ந்தி. ‘‘ஸாது⁴, ப⁴ந்தே நாக³ஸேன, யதா²ஹம் லபா⁴மி நிப்³பா³னஸ்ஸ கு³ணதோபி ஏகதே³ஸபரிதீ³பனமத்தம், ததா² ஸீக⁴ம் ப்³ரூஹி, நிப்³பா³பேஹி மே ஹத³யபரிளாஹம் வினய ஸீதலமது⁴ரவசனமாலுதேனா’’தி.

‘‘பது³மஸ்ஸ, மஹாராஜ, ஏகோ கு³ணோ நிப்³பா³னம் அனுபவிட்டோ², உத³கஸ்ஸ த்³வே கு³ணா, அக³த³ஸ்ஸ தயோ கு³ணா, மஹாஸமுத்³த³ஸ்ஸ சத்தாரோ கு³ணா, போ⁴ஜனஸ்ஸ பஞ்ச கு³ணா, ஆகாஸஸ்ஸ த³ஸ கு³ணா, மணிரதனஸ்ஸ தயோ கு³ணா, லோஹிதசந்த³னஸ்ஸ தயோ கு³ணா, ஸப்பிமண்ட³ஸ்ஸ தயோ கு³ணா, கி³ரிஸிக²ரஸ்ஸ பஞ்ச கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘பது³மஸ்ஸ ஏகோ கு³ணோ நிப்³பா³னம் அனுபவிட்டோ²’தி யம் வதே³ஸி, கதமோ பது³மஸ்ஸ ஏகோ கு³ணோ நிப்³பா³னம் அனுபவிட்டோ²’’தி? ‘‘யதா², மஹாராஜ, பது³மம் அனுபலித்தம் உத³கேன, ஏவமேவ கோ², மஹாராஜ, நிப்³பா³னம் ஸப்³ப³கிலேஸேஹி அனுபலித்தம். அயம், மஹாராஜ, பது³மஸ்ஸ ஏகோ கு³ணோ நிப்³பா³னம் அனுபவிட்டோ²’’தி.

‘‘ப⁴ந்தே நாக³ஸேன, ‘உத³கஸ்ஸ த்³வே கு³ணா நிப்³பா³னம் அனுபவிட்டா²’தி யம் வதே³ஸி, கதமே உத³கஸ்ஸ த்³வே கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, உத³கம் ஸீதலம் பரிளாஹனிப்³பா³பனம், ஏவமேவ கோ², மஹாராஜ, நிப்³பா³னம் ஸீதலம் ஸப்³ப³கிலேஸபரிளாஹனிப்³பா³பனம். அயம், மஹாராஜ, உத³கஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, உத³கம் கிலந்ததஸிதபிபாஸிதக⁴ம்மாபி⁴தத்தானம் ஜனபஸுபஜானம் பிபாஸாவினயனம், ஏவமேவ கோ², மஹாராஜ, நிப்³பா³னம் காமதண்ஹாப⁴வதண்ஹாவிப⁴வதண்ஹாபிபாஸாவினயனம். அயம், மஹாராஜ, உத³கஸ்ஸ து³தியோ கு³ணோ நிப்³பா³னம் அனுபவிட்டோ². இமே கோ², மஹாராஜ, உத³கஸ்ஸ த்³வே கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘அக³த³ஸ்ஸ தயோ கு³ணா நிப்³பா³னம் அனுபவிட்டா²’தி யம் வதே³ஸி, கதமே அக³த³ஸ்ஸ தயோ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, அக³தோ³ விஸபீளிதானம் ஸத்தானம் படிஸரணம், ஏவமேவ கோ², மஹாராஜ, நிப்³பா³னம் கிலேஸவிஸபீளிதானம் ஸத்தானம் படிஸரணம். அயம், மஹாராஜ, அக³த³ஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, அக³தோ³ ரோகா³னம் அந்தகரோ, ஏவமேவ கோ², மஹாராஜ, நிப்³பா³னம் ஸப்³ப³து³க்கா²னம் அந்தகரம். அயம், மஹாராஜ, அக³த³ஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, அக³தோ³ அமதம், ஏவமேவ கோ², மஹாராஜ, நிப்³பா³னம் அமதம். அயம், மஹாராஜ, அக³த³ஸ்ஸ ததியோ கு³ணோ நிப்³பா³னம் அனுபவிட்டோ². இமே கோ², மஹாராஜ, அக³த³ஸ்ஸ தயோ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘மஹாஸமுத்³த³ஸ்ஸ சத்தாரோ கு³ணா நிப்³பா³னம் அனுபவிட்டா²’தி யம் வதே³ஸி, கதமே மஹாஸமுத்³த³ஸ்ஸ சத்தாரோ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, மஹாஸமுத்³தோ³ ஸுஞ்ஞோ ஸப்³ப³குணபேஹி, ஏவமேவ கோ², மஹாராஜ, நிப்³பா³னம் ஸுஞ்ஞம் ஸப்³ப³கிலேஸகுணபேஹி. அயம், மஹாராஜ, மஹாஸமுத்³த³ஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, மஹாஸமுத்³தோ³ மஹந்தோ அனோரபாரோ, ந பரிபூரதி ஸப்³ப³ஸவந்தீஹி, ஏவமேவ கோ², மஹாராஜ, நிப்³பா³னம் மஹந்தம் அனோரபாரம், ந பூரதி ஸப்³ப³ஸத்தேஹி. அயம், மஹாராஜ, மஹாஸமுத்³த³ஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, மஹாஸமுத்³தோ³ மஹந்தானம் பூ⁴தானம் ஆவாஸோ, ஏவமேவ கோ², மஹாராஜ, நிப்³பா³னம் மஹந்தானம் அரஹந்தானம் விமலகீ²ணாஸவப³லப்பத்தவஸீபூ⁴தமஹாபூ⁴தானம் ஆவாஸோ. அயம், மஹாராஜ, மஹாஸமுத்³த³ஸ்ஸ ததியோ கு³ணோ நிப்³பா³னம் அனுபவிட்டோ². புன சபரம், மஹாராஜ, மஹாஸமுத்³தோ³ அபரிமிதவிவித⁴விபுலவீசிபுப்ப²ஸம்குஸுமிதோ, ஏவமேவ கோ², மஹாராஜ, நிப்³பா³னம் அபரிமிதவிவித⁴விபுலபரிஸுத்³த⁴விஜ்ஜாவிமுத்திபுப்ப²ஸம்குஸுமிதம். அயம், மஹாராஜ, மஹாஸமுத்³த³ஸ்ஸ சதுத்தோ² கு³ணோ நிப்³பா³னம் அனுபவிட்டோ². இமே கோ², மஹாராஜ, மஹாஸமுத்³த³ஸ்ஸ சத்தாரோ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘போ⁴ஜனஸ்ஸ பஞ்ச கு³ணா நிப்³பா³னம் அனுபவிட்டா²’தி யம் வதே³ஸி, கதமே போ⁴ஜனஸ்ஸ பஞ்ச கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, போ⁴ஜனம் ஸப்³ப³ஸத்தானம் ஆயுதா⁴ரணம், ஏவமேவ கோ², மஹாராஜ, நிப்³பா³னம் ஸச்சி²கதம் ஜராமரணனாஸனதோ ஆயுதா⁴ரணம். அயம், மஹாராஜ, போ⁴ஜனஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, போ⁴ஜனம் ஸப்³ப³ஸத்தானம் ப³லவட்³ட⁴னம், ஏவமேவ கோ², மஹாராஜ, நிப்³பா³னம் ஸச்சி²கதம் ஸப்³ப³ஸத்தானம் இத்³தி⁴ப³லவட்³ட⁴னம். அயம், மஹாராஜ, போ⁴ஜனஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, போ⁴ஜனம் ஸப்³ப³ஸத்தானம் வண்ணஜனனம், ஏவமேவ கோ², மஹாராஜ, நிப்³பா³னம் ஸச்சி²கதம் ஸப்³ப³ஸத்தானம் கு³ணவண்ணஜனனம். அயம், மஹாராஜ, போ⁴ஜனஸ்ஸ ததியோ கு³ணோ நிப்³பா³னம் அனுபவிட்டோ². புன சபரம், மஹாராஜ, போ⁴ஜனம் ஸப்³ப³ஸத்தானம் த³ரத²வூபஸமனம், ஏவமேவ கோ², மஹாராஜ, நிப்³பா³னம் ஸச்சி²கதம் ஸப்³ப³ஸத்தானம் ஸப்³ப³கிலேஸத³ரத²வூபஸமனம். அயம், மஹாராஜ, போ⁴ஜனஸ்ஸ சதுத்தோ² கு³ணோ நிப்³பா³னம் அனுபவிட்டோ². புன சபரம், மஹாராஜ, போ⁴ஜனம் ஸப்³ப³ஸத்தானம் ஜிக⁴ச்சா²து³ப்³ப³ல்யபடிவினோத³னம், ஏவமேவ கோ², மஹாராஜ, நிப்³பா³னம் ஸச்சி²கதம் ஸப்³ப³ஸத்தானம் ஸப்³ப³து³க்க²ஜிக⁴ச்சா²து³ப்³ப³ல்யபடிவினோத³னம். அயம், மஹாராஜ, போ⁴ஜனஸ்ஸ பஞ்சமோ கு³ணோ நிப்³பா³னம் அனுபவிட்டோ². இமே கோ², மஹாராஜ, போ⁴ஜனஸ்ஸ பஞ்ச கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘ஆகாஸஸ்ஸ த³ஸ கு³ணா நிப்³பா³னம் அனுபவிட்டா²’தி யம் வதே³ஸி, கதமே ஆகாஸஸ்ஸ த³ஸ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, ஆகாஸோ ந ஜாயதி, ந ஜீயதி, ந மீயதி, ந சவதி, ந உப்பஜ்ஜதி, து³ப்பஸஹோ, அசோராஹரணோ, அனிஸ்ஸிதோ, விஹக³க³மனோ, நிராவரணோ, அனந்தோ. ஏவமேவ கோ², மஹாராஜ, நிப்³பா³னம் ந ஜாயதி, ந ஜீயதி, ந மீயதி, ந சவதி, ந உப்பஜ்ஜதி, து³ப்பஸஹம், அசோராஹரணம், அனிஸ்ஸிதம், அரியக³மனம், நிராவரணம், அனந்தம். இமே கோ², மஹாராஜ, ஆகாஸஸ்ஸ த³ஸ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘மணிரதனஸ்ஸ தயோ கு³ணா நிப்³பா³னம் அனுபவிட்டா²’தி யம் வதே³ஸி, கதமே மணிரதனஸ்ஸ தயோ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, மணிரதனம் காமத³த³ம், ஏவமேவ கோ², மஹாராஜ, நிப்³பா³னம் காமத³த³ம். அயம், மஹாராஜ, மணிரதனஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, மணிரதனம் ஹாஸகரம், ஏவமேவ கோ², மஹாராஜ, நிப்³பா³னம் ஹாஸகரம். அயம், மஹாராஜ, மணிரதனஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, மணிரதனம் உஜ்ஜோதத்தகரம், ஏவமேவ கோ², மஹாராஜ, நிப்³பா³னம் உஜ்ஜோதத்தகரம் [உஜ்ஜோதத்த²கரம் (ஸீ. பீ.), உஜ்ஜோதிதத்த²கரம் (ஸ்யா.)]. அயம், மஹாராஜ, மணிரதனஸ்ஸ ததியோ கு³ணோ நிப்³பா³னம் அனுபவிட்டோ². இமே கோ², மஹாராஜ, மணிரதனஸ்ஸ தயோ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘லோஹிதசந்த³னஸ்ஸ தயோ கு³ணா நிப்³பா³னம் அனுபவிட்டா²’தி யம் வதே³ஸி, கதமே லோஹிதசந்த³னஸ்ஸ தயோ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, லோஹிதசந்த³னம் து³ல்லப⁴ம், ஏவமேவ கோ², மஹாராஜ, நிப்³பா³னம் து³ல்லப⁴ம். அயம், மஹாராஜ, லோஹிதசந்த³னஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, லோஹிதசந்த³னம் அஸமஸுக³ந்த⁴ம், ஏவமேவ கோ², மஹாராஜ, நிப்³பா³னம் அஸமஸுக³ந்த⁴ம். அயம், மஹாராஜ, லோஹிதசந்த³னஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, லோஹிதசந்த³னம் ஸஜ்ஜனபஸத்த²ம் [ஸப்³ப³ஜனபஸத்த²ம் (ஸ்யா.)], ஏவமேவ கோ², மஹாராஜ, நிப்³பா³னம் அரியஸஜ்ஜனபஸத்த²ம். அயம், மஹாராஜ, லோஹிதசந்த³னஸ்ஸ ததியோ கு³ணோ நிப்³பா³னம் அனுபவிட்டோ². இமே கோ², மஹாராஜ, லோஹிதசந்த³னஸ்ஸ தயோ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘ஸப்பிமண்ட³ஸ்ஸ தயோ கு³ணா நிப்³பா³னம் அனுபவிட்டா²’தி யம் வதே³ஸி, கதமே ஸப்பிமண்ட³ஸ்ஸ தயோ கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, ஸப்பிமண்டோ³ வண்ணஸம்பன்னோ, ஏவமேவ கோ², மஹாராஜ, நிப்³பா³னம் கு³ணவண்ணஸம்பன்னம். அயம், மஹாராஜ, ஸப்பிமண்ட³ஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, ஸப்பிமண்டோ³ க³ந்த⁴ஸம்பன்னோ, ஏவமேவ கோ², மஹாராஜ, நிப்³பா³னம் ஸீலக³ந்த⁴ஸம்பன்னம். அயம், மஹாராஜ, ஸப்பிமண்ட³ஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, ஸப்பிமண்டோ³ ரஸஸம்பன்னோ, ஏவமேவ கோ², மஹாராஜ, நிப்³பா³னம் ரஸஸம்பன்னம். அயம், மஹாராஜ, ஸப்பிமண்ட³ஸ்ஸ ததியோ கு³ணோ நிப்³பா³னம் அனுபவிட்டோ². இமே கோ², மஹாராஜ, ஸப்பிமண்ட³ஸ்ஸ தயோ கு³ணா நிப்³பா³னம் அனுபவிட்டா²’’தி.

‘‘ப⁴ந்தே நாக³ஸேன, ‘கி³ரிஸிக²ரஸ்ஸ பஞ்ச கு³ணா நிப்³பா³னம் அனுபவிட்டா²’தி யம் வதே³ஸி, கதமே கி³ரிஸிக²ரஸ்ஸ பஞ்ச கு³ணா நிப்³பா³னம் அனுபவிட்டா²’’தி? ‘‘யதா², மஹாராஜ, கி³ரிஸிக²ரம் அச்சுக்³க³தம், ஏவமேவ கோ², மஹாராஜ, நிப்³பா³னம் அச்சுக³தம். அயம், மஹாராஜ, கி³ரிஸிக²ரஸ்ஸ பட²மோ கு³ணோ நிப்³பா³னம் அனுபவிட்டோ². புன சபரம், மஹாராஜ, கி³ரிஸிக²ரம் அசலம், ஏவமேவ கோ², மஹாராஜ, நிப்³பா³னம் அசலம். அயம், மஹாராஜ, கி³ரிஸிக²ரஸ்ஸ து³தியோ கு³ணோ நிப்³பா³னம் அனுபவிட்டோ². புன சபரம், மஹாராஜ, கி³ரிஸிக²ரம் து³ரதி⁴ரோஹம், ஏவமேவ கோ², மஹாராஜ, நிப்³பா³னம் து³ரதி⁴ரோஹம் ஸப்³ப³கிலேஸானம். அயம், மஹாராஜ, கி³ரிஸிக²ரஸ்ஸ ததியோ கு³ணோ நிப்³பா³னம் அனுபவிட்டோ². புன சபரம், மஹாராஜ, கி³ரிஸிக²ரம் ஸப்³ப³பீ³ஜானம் அவிரூஹனம், ஏவமேவ கோ², மஹாராஜ, நிப்³பா³னம் ஸப்³ப³கிலேஸானம் அவிரூஹனம். அயம், மஹாராஜ, கி³ரிஸிக²ரஸ்ஸ சதுத்தோ² கு³ணோ நிப்³பா³னம் அனுபவிட்டோ². புன சபரம், மஹாராஜ, கி³ரிஸிக²ரம் அனுனயப்படிக⁴விப்பமுத்தம், ஏவமேவ கோ², மஹாராஜ, நிப்³பா³னம் அனுனயப்படிக⁴விப்பமுத்தம். அயம், மஹாராஜ, கி³ரிஸிக²ரஸ்ஸ பஞ்சமோ கு³ணோ நிப்³பா³னம் அனுபவிட்டோ². இமே கோ², மஹாராஜ, கி³ரிஸிக²ரஸ்ஸ பஞ்ச கு³ணா நிப்³பா³னம் அனுபவிட்டா²’’தி. ‘‘ஸாது⁴, ப⁴ந்தே நாக³ஸேன, ஏவமேதம் ததா² ஸம்படிச்சா²மீ’’தி.

நிப்³பா³னரூபஸண்டா²னபஞ்ஹோ த³ஸமோ.