5. அகம்மஜாதி³பஞ்ஹோ

5. ‘‘ப⁴ந்தே நாக³ஸேன, தி³ஸ்ஸந்தி லோகே கம்மனிப்³ப³த்தா, தி³ஸ்ஸந்தி ஹேதுனிப்³ப³த்தா, தி³ஸ்ஸந்தி உதுனிப்³ப³த்தா, யம் லோகே அகம்மஜம் அஹேதுஜம் அனுதுஜம், தம் மே கதே²ஹீ’’தி. ‘‘த்³வேமே, மஹாராஜ, லோகஸ்மிம் அகம்மஜா அஹேதுஜா அனுதுஜா. கதமே த்³வே? ஆகாஸோ, மஹாராஜ, அகம்மஜோ அஹேதுஜோ அனுதுஜோ; நிப்³பா³னம், மஹாராஜ, அகம்மஜம் அஹேதுஜம் அனுதுஜம். இமே கோ², மஹாராஜ, த்³வே அகம்மஜா அஹேதுஜா அனுதுஜா’’தி.

‘‘மா, ப⁴ந்தே நாக³ஸேன, ஜினவசனம் மக்கே²ஹி, மா அஜானித்வா பஞ்ஹம் ப்³யாகரோஹீ’’தி. ‘‘கிம் கோ², மஹாராஜ, அஹம் வதா³மி, யம் மம் த்வம் ஏவம் வதே³ஸி ‘மா, ப⁴ந்தே நாக³ஸேன, ஜினவசனம் மக்கே²ஹி, மா அஜானித்வா பஞ்ஹம் ப்³யாகரோஹீ’’’தி? ‘‘ப⁴ந்தே நாக³ஸேன, யுத்தமித³ம் தாவ வத்தும் ‘ஆகாஸோ அகம்மஜோ அஹேதுஜோ அனுதுஜோ’தி. அனேகஸதேஹி பன, ப⁴ந்தே நாக³ஸேன, காரணேஹி ப⁴க³வதா ஸாவகானம் நிப்³பா³னஸ்ஸ ஸச்சி²கிரியாய மக்³கோ³ அக்கா²தோ, அத² ச பன த்வம் ஏவம் வதே³ஸி ‘அஹேதுஜம் நிப்³பா³ன’’’ந்தி. ‘‘ஸச்சம், மஹாராஜ, ப⁴க³வதா அனேகஸதேஹி காரணேஹி ஸாவகானம் நிப்³பா³னஸ்ஸ ஸச்சி²கிரியாய மக்³கோ³ அக்கா²தோ, ந ச பன நிப்³பா³னஸ்ஸ உப்பாதா³ய ஹேது அக்கா²தோ’’தி.

‘‘ஏத்த² மயம், ப⁴ந்தே நாக³ஸேன, அந்த⁴காரதோ அந்த⁴காரதரம் பவிஸாம, வனதோ வனதரம் பவிஸாம, க³ஹனதோ க³ஹனதரம் [க³ஹனந்தரதோ க³ஹனந்தரம் (க.)] பவிஸாம, யத்ர ஹி நாம நிப்³பா³னஸ்ஸ ஸச்சி²கிரியாய ஹேது அத்தி², தஸ்ஸ பன த⁴ம்மஸ்ஸ உப்பாதா³ய ஹேது நத்தி². யதி³, ப⁴ந்தே நாக³ஸேன, நிப்³பா³னஸ்ஸ ஸச்சி²கிரியாய ஹேது அத்தி², தேன ஹி நிப்³பா³னஸ்ஸ உப்பாதா³யபி ஹேது இச்சி²தப்³போ³.

‘‘யதா² பன, ப⁴ந்தே நாக³ஸேன, புத்தஸ்ஸ பிதா அத்தி², தேன காரணேன பிதுனோபி பிதா இச்சி²தப்³போ³. யதா² அந்தேவாஸிகஸ்ஸ ஆசரியோ அத்தி², தேன காரணேன ஆசரியஸ்ஸபி ஆசரியோ இச்சி²தப்³போ³. யதா² அங்குரஸ்ஸ பீ³ஜம் அத்தி², தேன காரணேன பீ³ஜஸ்ஸபி பீ³ஜம் இச்சி²தப்³ப³ம். ஏவமேவ கோ², ப⁴ந்தே நாக³ஸேன, யதி³ நிப்³பா³னஸ்ஸ ஸச்சி²கிரியாய ஹேது அத்தி², தேன காரணேன நிப்³பா³னஸ்ஸ உப்பாதா³யபி ஹேது இச்சி²தப்³போ³.

‘‘யதா² ருக்க²ஸ்ஸ வா லதாய வா அக்³கே³ ஸதி தேன காரணேன மஜ்ஜ²ம்பி அத்தி², மூலம்பி அத்தி². ஏவமேவ கோ², ப⁴ந்தே நாக³ஸேன, யதி³ நிப்³பா³னஸ்ஸ ஸச்சி²கிரியாய ஹேது அத்தி², தேன காரணேன நிப்³பா³னஸ்ஸ உப்பாதா³யபி ஹேது இச்சி²தப்³போ³’’’தி.

‘‘அனுப்பாத³னீயம், மஹாராஜ, நிப்³பா³னம், தஸ்மா ந நிப்³பா³னஸ்ஸ உப்பாதா³ய ஹேது அக்கா²தோ’’தி. ‘‘இங்க⁴, ப⁴ந்தே நாக³ஸேன, காரணம் த³ஸ்ஸேத்வா காரணேன மம் ஸஞ்ஞாபேஹி, யதா²ஹம் ஜானேய்யம் நிப்³பா³னஸ்ஸ ஸச்சி²கிரியாய ஹேது அத்தி², நிப்³பா³னஸ்ஸ உப்பாதா³ய ஹேது நத்தீ²’’தி.

‘‘தேன ஹி, மஹாராஜ, ஸக்கச்சம் ஸோதம் ஓத³ஹ, ஸாது⁴கம் ஸுணோஹி, வக்கா²மி தத்த² காரணம், ஸக்குணேய்ய, மஹாராஜ, புரிஸோ பாகதிகேன ப³லேன இதோ ஹிமவந்தம் பப்³ப³தராஜம் உபக³ந்து’’ந்தி? ‘‘ஆம, ப⁴ந்தே’’தி. ‘‘ஸக்குணேய்ய பன ஸோ, மஹாராஜ, புரிஸோ பாகதிகேன ப³லேன ஹிமவந்தம் பப்³ப³தராஜம் இத⁴ ஆஹரிது’’ந்தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ஸக்கா நிப்³பா³னஸ்ஸ ஸச்சி²கிரியாய மக்³கோ³ அக்கா²தும், ந ஸக்கா நிப்³பா³னஸ்ஸ உப்பாதா³ய ஹேது த³ஸ்ஸேதும்.

‘‘ஸக்குணேய்ய, மஹாராஜ, புரிஸோ பாகதிகேன ப³லேன மஹாஸமுத்³த³ம் நாவாய உத்தரித்வா பாரிமதீரம் க³ந்து’’ந்தி? ‘‘ஆம, ப⁴ந்தே’’தி? ‘‘ஸக்குணேய்ய பன ஸோ, மஹாராஜ, புரிஸோ பாகதிகேன ப³லேன மஹாஸமுத்³த³ஸ்ஸ பாரிமதீரம் இத⁴ ஆஹரிது’’ந்தி? ‘‘ந ஹி ப⁴ந்தே’’தி. ‘‘ஏவமேவ கோ², மஹாராஜ, ஸக்கா நிப்³பா³னஸ்ஸ ஸச்சி²கிரியாய மக்³கோ³ அக்கா²தும், ந ஸக்கா நிப்³பா³னஸ்ஸ உப்பாதா³ய ஹேது த³ஸ்ஸேதும். கிம் காரணா? அஸங்க²தத்தா த⁴ம்மஸ்ஸா’’தி.

‘‘அஸங்க²தம், ப⁴ந்தே நாக³ஸேன, நிப்³பா³ன’’ந்தி? ‘‘ஆம, மஹாராஜ, அஸங்க²தம் நிப்³பா³னம் ந கேஹிசி கதம், நிப்³பா³னம், மஹாராஜ, ந வத்தப்³ப³ம் உப்பன்னந்தி வா அனுப்பன்னந்தி வா உப்பாத³னீயந்தி வா அதீதந்தி வா அனாக³தந்தி வா பச்சுப்பன்னந்தி வா சக்கு²விஞ்ஞேய்யந்தி வா ஸோதவிஞ்ஞேய்யந்தி வா கா⁴னவிஞ்ஞேய்யந்தி வா ஜிவ்ஹாவிஞ்ஞேய்யந்தி வா காயவிஞ்ஞேய்யந்தி வா’’தி. ‘‘யதி³, ப⁴ந்தே நாக³ஸேன, நிப்³பா³னம் ந உப்பன்னம் ந அனுப்பன்னம் ந உப்பாத³னீயம் ந அதீதம் ந அனாக³தம் ந பச்சுப்பன்னம் ந சக்கு²விஞ்ஞேய்யம் ந ஸோதவிஞ்ஞேய்யம் ந கா⁴னவிஞ்ஞேய்யம் ந ஜிவ்ஹாவிஞ்ஞேய்யம் ந காயவிஞ்ஞேய்யம், தேன ஹி, ப⁴ந்தே நாக³ஸேன, தும்ஹே நத்தி²த⁴ம்மம் நிப்³பா³னம் அபதி³ஸத² ‘நத்தி² நிப்³பா³ன’ந்தி. ‘‘அத்தி², மஹாராஜ, நிப்³பா³னம், மனோவிஞ்ஞேய்யம் நிப்³பா³னம், விஸுத்³தே⁴ன மானஸேன பணீதேன உஜுகேன அனாவரணேன நிராமிஸேன ஸம்மாபடிபன்னோ அரியஸாவகோ நிப்³பா³னம் பஸ்ஸதீ’’தி.

‘‘கீதி³ஸம் பன தம், ப⁴ந்தே, நிப்³பா³னம், யம் தம் ஓபம்மேஹி ஆதீ³பனீயம் காரணேஹி மம் ஸஞ்ஞாபேஹி, யதா² அத்தி²த⁴ம்மம் ஓபம்மேஹி ஆதீ³பனீய’’ந்தி. ‘‘அத்தி², மஹாராஜ, வாதோ நாமா’’தி? ‘‘ஆம, ப⁴ந்தே’’தி. ‘‘இங்க⁴, மஹாராஜ, வாதம் த³ஸ்ஸேஹி வண்ணதோ வா ஸண்டா²னதோ வா அணும் வா தூ²லம் வா தீ³க⁴ம் வா ரஸ்ஸம் வா’’தி. ‘‘ந ஸக்கா, ப⁴ந்தே நாக³ஸேன, வாதோ உபத³ஸ்ஸயிதும், ந ஸோ வாதோ ஹத்த²க்³க³ஹணம் வா நிம்மத்³த³னம் வா உபேதி, அபி ச அத்தி² ஸோ வாதோ’’தி. ‘‘யதி³, மஹாராஜ, ந ஸக்கா வாதோ உபத³ஸ்ஸயிதும், தேன ஹி நத்தி² வாதோ’’தி? ‘‘ஜானாமஹம், ப⁴ந்தே நாக³ஸேன, வாதோ அத்தீ²தி மே ஹத³யே அனுபவிட்ட²ம், ந சாஹம் ஸக்கோமி வாதம் உபத³ஸ்ஸயிது’’ந்தி. ‘‘ஏவமேவ கோ², மஹாராஜ, அத்தி² நிப்³பா³னம், ந ச ஸக்கா நிப்³பா³னம் உபத³ஸ்ஸயிதும் வண்ணேன வா ஸண்டா²னேன வா’’தி. ‘‘ஸாது⁴, ப⁴ந்தே நாக³ஸேன, ஸூபத³ஸ்ஸிதம் ஓபம்மம், ஸுனித்³தி³ட்ட²ம் காரணம், ஏவமேதம் ததா² ஸம்படிச்சா²மி ‘அத்தி² நிப்³பா³ன’’’ந்தி.

அகம்மஜாதி³பஞ்ஹோ பஞ்சமோ.