6. கம்மஜாதி³பஞ்ஹோ

6. ‘‘ப⁴ந்தே நாக³ஸேன, கதமே ஏத்த² கம்மஜா, கதமே ஹேதுஜா, கதமே உதுஜா, கதமே ந கம்மஜா, ந ஹேதுஜா, ந உதுஜா’’தி? ‘‘யே கேசி, மஹாராஜ, ஸத்தா ஸசேதனா, ஸப்³பே³ தே கம்மஜா; அக்³கி³ ச ஸப்³பா³னி ச பீ³ஜஜாதானி ஹேதுஜானி; பத²வீ ச பப்³ப³தா ச உத³கஞ்ச வாதோ ச, ஸப்³பே³ தே உதுஜா; ஆகாஸோ ச நிப்³பா³னஞ்ச இமே த்³வே அகம்மஜா அஹேதுஜா அனுதுஜா. நிப்³பா³னம் பன, மஹாராஜ, ந வத்தப்³ப³ம் கம்மஜந்தி வா ஹேதுஜந்தி வா உதுஜந்தி வா உப்பன்னந்தி வா அனுப்பன்னந்தி வா உப்பாத³னீயந்தி வா அதீதந்தி வா அனாக³தந்தி வா பச்சுப்பன்னந்தி வா சக்கு²விஞ்ஞேய்யந்தி வா ஸோதவிஞ்ஞேய்யந்தி வா கா⁴னவிஞ்ஞேய்யந்தி வா ஜிவ்ஹாவிஞ்ஞேய்யந்தி வா காயவிஞ்ஞேய்யந்தி வா, அபி ச, மஹாராஜ, மனோவிஞ்ஞேய்யம் நிப்³பா³னம், யம் ஸோ ஸம்மாபடிபன்னோ அரியஸாவகோ விஸுத்³தே⁴ன ஞாணேன பஸ்ஸதீ’’தி. ‘‘ரமணீயோ, ப⁴ந்தே நாக³ஸேன, பஞ்ஹோ ஸுவினிச்சி²தோ நிஸ்ஸம்ஸயோ ஏகந்தக³தோ, விமதி உப்பச்சி²ன்னா, த்வம் க³ணிவரபவரமாஸஜ்ஜா’’தி.

கம்மஜாதி³பஞ்ஹோ ச²ட்டோ².