9. உத்தரகுருகாதி³க³மனபஞ்ஹோ

9. ராஜா ஆஹ ‘‘ப⁴ந்தே நாக³ஸேன, அத்தி² கோசி, யோ இமினா ஸரீரேன உத்தரகுரும் வா க³ச்சே²ய்ய, ப்³ரஹ்மலோகம் வா, அஞ்ஞம் வா பன தீ³ப’’ந்தி? ‘‘அத்தி², மஹாராஜ, யோ இமினா சாதும்மஹாபூ⁴திகேன காயேன உத்தரகுரும் வா க³ச்சே²ய்ய, ப்³ரஹ்மலோகம் வா, அஞ்ஞம் வா பன தீ³ப’’ந்தி.

‘‘கத²ம், ப⁴ந்தே நாக³ஸேன, இமினா சாதும்மஹாபூ⁴திகேன காயேன உத்தரகுரும் வா க³ச்சே²ய்ய, ப்³ரஹ்மலோகம் வா, அஞ்ஞம் வா பன தீ³ப’’ந்தி? ‘‘அபி⁴ஜானாஸி நு, த்வம் மஹாராஜ, இமிஸ்ஸா பத²வியா வித³த்தி²ம் வா ரதனம் வா லங்கி⁴தா’’தி? ‘‘ஆம, ப⁴ந்தே, அபி⁴ஜானாமி ‘அஹம், ப⁴ந்தே நாக³ஸேன, அட்ட²பி ரதனியோ லங்கே⁴மீ’’’தி. ‘‘கத²ம், த்வம் மஹாராஜ, அட்ட²பி ரதனியோ லங்கே⁴ஸீ’’தி? ‘‘அஹஞ்ஹி, ப⁴ந்தே, சித்தம் உப்பாதே³மி ‘ஏத்த² நிபதிஸ்ஸாமீ’தி ஸஹ சித்துப்பாதே³ன காயோ மே லஹுகோ ஹோதீ’’தி. ‘‘ஏவமேவ கோ², மஹாராஜ, இத்³தி⁴மா பி⁴க்கு² சேதோவஸிப்பத்தோ காயம் சித்தே ஸமாரோபேத்வா சித்தவஸேன வேஹாஸம் க³ச்ச²தீ’’தி.

‘‘கல்லோஸி, ப⁴ந்தே நாக³ஸேனா’’தி.

உத்தரகுருகாதி³க³மனபஞ்ஹோ நவமோ.