5. த்³வின்னம் லோகுப்பன்னானம் ஸமகபா⁴வபஞ்ஹோ

5. ராஜா ஆஹ ‘‘ப⁴ந்தே நாக³ஸேன, யோ இத⁴ காலங்கதோ ப்³ரஹ்மலோகே உப்பஜ்ஜேய்ய, யோ ச இத⁴ காலங்கதோ கஸ்மீரே உப்பஜ்ஜேய்ய, கோ சிரதரம் கோ ஸீக⁴தர’’ந்தி? ‘‘ஸமகம், மஹாராஜா’’தி.

‘‘ஓபம்மம் கரோஹீ’’தி. ‘‘குஹிம் பன, மஹாராஜ, தவ ஜாதனக³ர’’ந்தி? ‘‘அத்தி², ப⁴ந்தே, கலஸிகா³மோ நாம, தத்தா²ஹம் ஜாதோ’’தி. ‘‘கீவ தூ³ரோ, மஹாராஜ, இதோ கலஸிகா³மோ ஹோதீ’’தி. ‘‘த்³விமத்தானி, ப⁴ந்தே, யோஜனஸதானீ’’தி. ‘‘கீவ தூ³ரம், மஹாராஜ, இதோ கஸ்மீரம் ஹோதீ’’தி? ‘‘த்³வாத³ஸ, ப⁴ந்தே, யோஜனானீ’’தி. ‘‘இங்க⁴, த்வம் மஹாராஜ, கலஸிகா³மம் சிந்தேஹீ’’தி. ‘‘சிந்திதோ, ப⁴ந்தே’’தி. ‘‘இங்க⁴, த்வம் மஹாராஜ, கஸ்மீரம் சிந்தேஹீ’’தி. ‘‘சிந்திதம் ப⁴ந்தே’’தி. ‘‘கதமம் நு கோ², மஹாராஜ, சிரேன சிந்திதம், கதமம் ஸீக⁴தர’’ந்தி? ‘‘ஸமகம் ப⁴ந்தே’’தி. ‘‘ஏவமேவ கோ², மஹாராஜ, யோ இத⁴ காலங்கதோ ப்³ரஹ்மலோகே உப்பஜ்ஜேய்ய, யோ ச இத⁴ காலங்கதோ கஸ்மீரே உப்பஜ்ஜேய்ய, ஸமகம் யேவ உப்பஜ்ஜந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, த்³வே ஸகுணா ஆகாஸேன க³ச்சே²ய்யும், தேஸு ஏகோ உச்சே ருக்கே² நிஸீதே³ய்ய, ஏகோ நீசே ருக்கே² நிஸீதே³ய்ய, தேஸம் ஸமகம் பதிட்டி²தானம் கதமஸ்ஸ சா²யா பட²மதரம் பத²வியம் பதிட்ட²ஹேய்ய, கதமஸ்ஸ சா²யா சிரேன பத²வியம் பதிட்ட²ஹேய்யா’’தி? ‘‘ஸமகம், ப⁴ந்தே’’தி. ‘‘ஏவமேவ கோ², மஹாராஜ, யோ இத⁴ காலங்கதோ ப்³ரஹ்மலோகே உப்பஜ்ஜேய்ய, யோ ச இத⁴ காலங்கதோ கஸ்மீரே உப்பஜ்ஜேய்ய, ஸமகம் யேவ உப்பஜ்ஜந்தீ’’தி.

‘‘கல்லோஸி, ப⁴ந்தே நாக³ஸேனா’’தி.

த்³வின்னம் லோகுப்பன்னானம் ஸமகபா⁴வபஞ்ஹோ பஞ்சமோ.