3. து³க்க²ப்பஹானவாயமபஞ்ஹோ

3. ராஜா ஆஹ ‘‘ப⁴ந்தே நாக³ஸேன, கிம் தும்ஹே அதீதஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘கிம் பன, ப⁴ந்தே, அனாக³தஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘கிம் பன பச்சுப்பன்னஸ்ஸ து³க்க²ஸ்ஸ பஹானாய வாயமதா²’’தி? ‘‘ந ஹி, மஹாராஜா’’தி. ‘‘யதி³ தும்ஹே ந அதீதஸ்ஸ து³க்க²ஸ்ஸ பஹானாய வாயமத², ந அனாக³தஸ்ஸ து³க்க²ஸ்ஸ பஹானாய வாயமத², ந பச்சுப்பன்னஸ்ஸ து³க்க²ஸ்ஸ பஹானாய வாயமத², அத² கிமத்தா²ய வாயமதா²’’தி. தே²ரோ ஆஹ ‘கிந்தி, மஹாராஜ, இத³ஞ்ச து³க்க²ம் நிருஜ்ஜே²ய்ய, அஞ்ஞஞ்ச து³க்க²ம் நுப்பஜ்ஜேய்யா’தி ஏதத³த்தா²ய வாயமாமா’’தி.

‘‘அத்தி² பன தே, ப⁴ந்தே நாக³ஸேன, அனாக³தம் து³க்க²’’ந்தி? ‘‘நத்தி² [கதா². 828, 829 பஸ்ஸிதப்³ப³ம்], மஹாராஜா’’தி ‘‘தும்ஹே கோ², ப⁴ந்தே நாக³ஸேன, அதிபண்டி³தா, யே தும்ஹே அஸந்தானம் அனாக³தானம் து³க்கா²னம் பஹானாய வாயமதா²’’தி? ‘‘அத்தி² பன தே, மஹாராஜ, கேசி படிராஜானோ பச்சத்தி²கா பச்சாமித்தா பச்சுபட்டி²தா ஹோந்தீ’’தி? ‘‘ஆம, ப⁴ந்தே, அத்தீ²’’தி. ‘‘கிம்னு கோ², மஹாராஜ, ததா³ தும்ஹே பரிக²ம் க²ணாபேய்யாத², பாகாரம் சினாபேய்யாத² கோ³புரம் காராபேய்யாத², அட்டாலகம் காராபேய்யாத², த⁴ஞ்ஞம் அதிஹராபேய்யாதா²’’தி? ‘‘ந ஹி, ப⁴ந்தே, படிகச்சேவ தம் படியத்தம் ஹோதீ’’தி. ‘‘கிம் தும்ஹே, மஹாராஜ, ததா³ ஹத்தி²ஸ்மிம் ஸிக்கே²ய்யாத², அஸ்ஸஸ்மிம் ஸிக்கே²ய்யாத², ரத²ஸ்மிம் ஸிக்கே²ய்யாத², த⁴னுஸ்மிம் ஸிக்கே²ய்யாத², த²ருஸ்மிம் ஸிக்கே²ய்யாதா²’’தி? ‘‘ந ஹி, ப⁴ந்தே, படிகச்சேவ தம் ஸிக்கி²தம் ஹோதீ’’தி. ‘‘கிஸ்ஸத்தா²யா’’தி? ‘‘அனாக³தானம், ப⁴ந்தே, ப⁴யானம் படிபா³ஹனத்தா²யா’’தி. ‘‘கிம் நு கோ², மஹாராஜ, அத்தி² அனாக³தம் ப⁴ய’’ந்தி? ‘‘நத்தி², ப⁴ந்தே’’தி. ‘‘தும்ஹே ச கோ², மஹாராஜ, அதிபண்டி³தா, யே தும்ஹே அஸந்தானம் அனாக³தானம் ப⁴யானம் படிபா³ஹனத்தா²ய படியாதே³தா²’’தி.

‘‘பி⁴ய்யோ ஓபம்மம் கரோஹீதி. ‘‘தம் கிம் மஞ்ஞஸி, மஹாராஜ, யதா³ த்வம் பிபாஸிதோ ப⁴வேய்யாஸி, ததா³ த்வம் உத³பானம் க²ணாபேய்யாஸி, போக்க²ரணிம் க²ணாபேய்யாஸி, தளாகம் க²ணாபேய்யாஸி ‘பானீயம் பிவிஸ்ஸாமீ’’’தி? ‘‘ந ஹி, ப⁴ந்தே, படிகச்சேவ தம் படியத்தம் ஹோதீ’’தி. ‘‘கிஸ்ஸத்தா²யா’’தி? ‘‘அனாக³தானம், ப⁴ந்தே, பிபாஸானம் படிபா³ஹனத்தா²ய படியத்தம் ஹோதீ’’தி. ‘‘அத்தி² பன, மஹாராஜ, அனாக³தா பிபாஸா’’தி? ‘‘நத்தி², ப⁴ந்தே’’தி. ‘‘தும்ஹே கோ², மஹாராஜ, அதிபண்டி³தா, யே தும்ஹே அஸந்தானம் அனாக³தானம் பிபாஸானம் படிபா³ஹனத்தா²ய தம் படியாதே³தா²’’தி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யதா³ த்வம் பு³பு⁴க்கி²தோ ப⁴வேய்யாஸி, ததா³ த்வம் கே²த்தம் கஸாபேய்யாஸி, ஸாலிம் வபாபேய்யாஸி ‘ப⁴த்தம் பு⁴ஞ்ஜிஸ்ஸாமீ’’’தி? ‘‘ந ஹி, ப⁴ந்தே, படிகச்சேவ தம் படியத்தம் ஹோதீ’’தி. ‘‘கிஸ்ஸத்தா²யா’’தி. ‘‘அனாக³தானம், ப⁴ந்தே, பு³பு⁴க்கா²னம் படிபா³ஹனத்தா²யா’’தி. ‘‘அத்தி² பன, மஹாராஜ, அனாக³தா பு³பு⁴க்கா²’’தி? ‘‘நத்தி², ப⁴ந்தே’’தி. ‘‘தும்ஹே கோ², மஹாராஜ, அதிபண்டி³தா, யே தும்ஹே அஸந்தானம் அனாக³தானம் பு³பு⁴க்கா²னம் படிபா³ஹனத்தா²ய படியாதே³தா²’’தி.

‘‘கல்லோஸி, ப⁴ந்தே நாக³ஸேனா’’தி.

து³க்க²ப்பஹானவாயமபஞ்ஹோ ததியோ.