6. ஸதிவக்³கோ³

1. காயபியாயனபஞ்ஹோ

1. ராஜா ஆஹ ‘‘ப⁴ந்தே நாக³ஸேன, பியோ பப்³ப³ஜிதானம் காயோ’’தி? ‘‘ந கோ², மஹாராஜ, பியோ பப்³ப³ஜிதானம் காயோ’’தி. ‘‘அத² கிஸ்ஸ நு கோ², ப⁴ந்தே, கேலாயத² மமாயதா²’’தி? ‘‘கிம் பன தே, மஹாராஜ, கதா³சி கரஹசி ஸங்கா³மக³தஸ்ஸ கண்ட³ப்பஹாரோ ஹோதீ’’தி? ‘‘ஆம, ப⁴ந்தே, ஹோதீ’’தி. ‘‘கிம்னு கோ², மஹாராஜ, ஸோ வணோ ஆலேபேன ச ஆலிம்பீயதி தேலேன ச மக்கீ²யதி ஸுகு²மேன ச சோளபட்டேன பலிவேடீ²யதீ’’தி? ‘‘ஆம, ப⁴ந்தே, ஆலேபேன ச ஆலிம்பீயதி தேலேன ச மக்கீ²யதி ஸுகு²மேன ச சோளபட்டேன பலிவேடீ²யதீ’’தி. ‘‘கிம்னு கோ², மஹாராஜ, பியோ தே வணோ, தேன ஆலேபேன ச ஆலிம்பீயதி தேலேன ச மக்கீ²யதி ஸுகு²மேன ச சோளபட்டேன பலிவேடீ²யதீ’’தி? ‘‘ந மே, ப⁴ந்தே, பியோ வணோ, அபி ச மம்ஸஸ்ஸ ருஹனத்தா²ய ஆலேபேன ச ஆலிம்பீயதி தேலேன ச மக்கீ²யதி ஸுகு²மேன ச சோளபட்டேன பலிவேடீ²யதீ’’தி. ‘‘ஏவமேவ கோ², மஹாராஜ, அப்பியோ பப்³ப³ஜிதானம் காயோ, அத² ச பப்³ப³ஜிதா அனஜ்ஜோ²ஸிதா காயம் பரிஹரந்தி ப்³ரஹ்மசரியானுக்³க³ஹாய. அபி ச கோ², மஹாராஜ, வணூபமோ காயோ வுத்தோ ப⁴க³வதா, தேன பப்³ப³ஜிதா வணமிவ காயம் பரிஹரந்தி அனஜ்ஜோ²ஸிதா. பா⁴ஸிதம்பேதம் மஹாராஜ ப⁴க³வதா –

‘‘‘அல்லசம்மபடிச்ச²ன்னோ, நவத்³வாரோ மஹாவணோ;

ஸமந்ததோ பக்³க⁴ரதி, அஸுசிபூதிக³ந்தி⁴யோ’’’தி.

‘‘கல்லோஸி, ப⁴ந்தே நாக³ஸேனா’’தி.

காயபியாயனபஞ்ஹோ பட²மோ.

2. ஸப்³ப³ஞ்ஞூபா⁴வபஞ்ஹோ

2. ராஜா ஆஹ ‘‘ப⁴ந்தே நாக³ஸேன, பு³த்³தோ⁴ ஸப்³ப³ஞ்ஞூ ஸப்³ப³த³ஸ்ஸாவீ’’தி? ‘‘ஆம, மஹாராஜ, ப⁴க³வா ஸப்³ப³ஞ்ஞூ ஸப்³ப³த³ஸ்ஸாவீ’’தி. ‘‘அத² கிஸ்ஸ நு கோ², ப⁴ந்தே நாக³ஸேன, ஸாவகானம் அனுபுப்³பே³ன ஸிக்கா²பத³ம் பஞ்ஞபேஸீ’’தி? ‘‘அத்தி² பன தே மஹாராஜ, கோசி வேஜ்ஜோ, யோ இமிஸ்ஸம் பத²வியம் ஸப்³ப³பே⁴ஸஜ்ஜானி ஜானாதீ’’தி? ‘‘ஆம, ப⁴ந்தே, அத்தீ²’’தி. ‘‘கிம்னு கோ², மஹாராஜ, ஸோ வேஜ்ஜோ கி³லானகம் ஸம்பத்தே காலே பே⁴ஸஜ்ஜம் பாயேதி, உதா³ஹு அஸம்பத்தே காலே’’தி? ‘‘ஸம்பத்தே காலே, ப⁴ந்தே, கி³லானகம் பே⁴ஸஜ்ஜம் பாயேதி, நோ அஸம்பத்தே காலே’’தி? ‘‘ஏவமேவ கோ², மஹாராஜ, ப⁴க³வா ஸப்³ப³ஞ்ஞூ ஸப்³ப³த³ஸ்ஸாவீ ந அஸம்பத்தே காலே ஸாவகானம் ஸிக்கா²பத³ம் பஞ்ஞாபேதி, ஸம்பத்தே காலே ஸாவகானம் ஸிக்கா²பத³ம் பஞ்ஞாபேதி யாவஜீவம் அனதிக்கமனீய’’ந்தி.

‘‘கல்லோஸி, ப⁴ந்தே நாக³ஸேனா’’தி.

ஸப்³ப³ஞ்ஞூபா⁴வபஞ்ஹோ து³தியோ.

3. மஹாபுரிஸலக்க²ணபஞ்ஹோ

3. ராஜா ஆஹ ‘‘ப⁴ந்தே நாக³ஸேன, பு³த்³தோ⁴ த்³வத்திம்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴’’தி? ‘‘ஆம, மஹாராஜ, ப⁴க³வா த்³வத்திம்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴’’தி.

‘‘கிம் பனஸ்ஸ, ப⁴ந்தே, மாதாபிதரோபி த்³வத்திம்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி? ‘‘நோ சஸ்ஸ, மஹாராஜ, மாதாபிதரோ த்³வத்திம்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி.

‘‘ஏவம் ஸந்தே கோ², ப⁴ந்தே நாக³ஸேன, ந உப்பஜ்ஜதி பு³த்³தோ⁴ த்³வத்திம்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴தி, அபி ச மாதுஸதி³ஸோ வா புத்தோ ஹோதி மாதுபக்கோ² வா, பிதுஸதி³ஸோ வா புத்தோ ஹோதி பிதுபக்கோ² வா’’தி. தே²ரோ ஆஹ ‘‘அத்தி² பன, மஹாராஜ, கிஞ்சி பது³மம் ஸதபத்த’’ந்தி? ‘‘ஆம, ப⁴ந்தே, அத்தீ²’’தி. ‘‘தஸ்ஸ பன குஹிம் ஸம்ப⁴வோ’’தி? ‘‘கத்³த³மே ஜாயதி உத³கே ஆஸீயதீ’’தி. ‘‘கிம்னு கோ², மஹாராஜ, பது³மம் கத்³த³மேன ஸதி³ஸம் வண்ணேன வா க³ந்தே⁴ன வா ரஸேன வா’’தி? ‘‘ந ஹி, ப⁴ந்தே’’தி. ‘‘அத² உத³கேன வா க³ந்தே⁴ன வா ரஸேன வா’’தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ப⁴க³வா த்³வத்திம்ஸமஹாபுரிஸலக்க²ணேஹி ஸமன்னாக³தோ அஸீதியா ச அனுப்³யஞ்ஜனேஹி பரிரஞ்ஜிதோ ஸுவண்ணவண்ணோ கஞ்சனஸன்னிப⁴த்தசோ ப்³யாமப்பபோ⁴, நோ சஸ்ஸ மாதாபிதரோ த்³வத்திம்ஸமஹாபுரிஸலக்க²ணேஹி ஸமன்னாக³தா அஸீதியா ச அனுப்³யஞ்ஜனேஹி பரிரஞ்ஜிதா ஸுவண்ணவண்ணா கஞ்சனஸன்னிப⁴த்தசா ப்³யாமப்பபா⁴’’தி.

‘‘கல்லோஸி, ப⁴ந்தே நாக³ஸேனா’’தி.

மஹாபுரிஸலக்க²ணபஞ்ஹோ ததியோ.

4. ப⁴க³வதோ ப்³ரஹ்மசாரிபஞ்ஹோ

4. ராஜா ஆஹ ‘‘ப⁴ந்தே நாக³ஸேன, பு³த்³தோ⁴ ப்³ரஹ்மசாரீ’’தி? ‘‘ஆம, மஹாராஜ, ப⁴க³வா ப்³ரஹ்மசாரீ’’தி. ‘‘தேன ஹி, ப⁴ந்தே நாக³ஸேன, பு³த்³தோ⁴ ப்³ரஹ்முனோ ஸிஸ்ஸோ’’தி? ‘‘அத்தி² பன தே, மஹாராஜ, ஹத்தி²பாமோக்கோ²’’தி? ‘‘அத்தி², ப⁴ந்தே’’தி. ‘‘கிம்னு கோ², மஹாராஜ, ஸோ ஹத்தீ² கதா³சி கரஹசி கோஞ்சனாத³ம் நத³தீதி? ‘‘ஆம, ப⁴ந்தே, நத³தீ’’தி ‘‘தேன ஹி, மஹாராஜ, ஸோ ஹத்தீ² கோஞ்சஸகுணஸ்ஸ ஸிஸ்ஸோ’’தி? ‘‘ந ஹி, ப⁴ந்தே’’தி. ‘‘கிம் பன, மஹாராஜ, ப்³ரஹ்மா ஸபு³த்³தி⁴கோ அபு³த்³தி⁴கோ’’தி? ‘‘ஸபு³த்³தி⁴கோ, ப⁴ந்தே’’தி. ‘‘தேன ஹி, மஹாராஜ, ப்³ரஹ்மா ப⁴க³வதோ ஸிஸ்ஸோ’’தி.

‘‘கல்லோஸி, ப⁴ந்தே நாக³ஸேனா’’தி.

ப⁴க³வதோ ப்³ரஹ்மசாரிபஞ்ஹோ சதுத்தோ².

5. ப⁴க³வதோ உபஸம்பதா³பஞ்ஹோ

5. ராஜா ஆஹ ‘‘ப⁴ந்தே நாக³ஸேன, உபஸம்பதா³ ஸுந்த³ரா’’தி? ‘‘ஆம, மஹாராஜ, உபஸம்பதா³ ஸுந்த³ரா’’தி. ‘‘அத்தி² பன, ப⁴ந்தே, பு³த்³த⁴ஸ்ஸ உபஸம்பதா³, உதா³ஹு நத்தீ²’’தி? ‘‘உபஸம்பன்னோ கோ², மஹாராஜ, ப⁴க³வா போ³தி⁴ருக்க²மூலே ஸஹ ஸப்³ப³ஞ்ஞுதஞாணேன, நத்தி² ப⁴க³வதோ உபஸம்பதா³ அஞ்ஞேஹி தி³ன்னா, யதா² ஸாவகானம், மஹாராஜ, ப⁴க³வா ஸிக்கா²பத³ம் பஞ்ஞபேதி யாவஜீவம் அனதிக்கமனீய’’ந்தி.

‘‘கல்லோஸி, ப⁴ந்தே நாக³ஸேனா’’தி.

ப⁴க³வதோ உபஸம்பதா³பஞ்ஹோ பஞ்சமோ.

6. அஸ்ஸுபே⁴ஸஜ்ஜாபே⁴ஸஜ்ஜபஞ்ஹோ

6. ராஜா ஆஹ ‘‘ப⁴ந்தே நாக³ஸேன, யோ ச மாதரி மதாய ரோத³தி, யோ ச த⁴ம்மபேமேன ரோத³தி, உபி⁴ன்னம் தேஸம் ரோத³ந்தானம் கஸ்ஸ அஸ்ஸு பே⁴ஸஜ்ஜம், கஸ்ஸ ந பே⁴ஸஜ்ஜ’’ந்தி? ‘‘ஏகஸ்ஸ கோ², மஹாராஜ, அஸ்ஸு ராக³தோ³ஸமோஹேஹி ஸமலம் உண்ஹம், ஏகஸ்ஸ பீதிஸோமனஸ்ஸேன விமலம் ஸீதலம். யம் கோ², மஹாராஜ, ஸீதலம், தம் பே⁴ஸஜ்ஜம், யம் உண்ஹம், தம் ந பே⁴ஸஜ்ஜ’’ந்தி.

‘‘கல்லோஸி, ப⁴ந்தே நாக³ஸேனா’’தி.

அஸ்ஸுபே⁴ஸஜ்ஜாபே⁴ஸஜ்ஜபஞ்ஹோ ச²ட்டோ².

7. ஸராக³வீதராக³னானாகரணபஞ்ஹோ

7. ராஜா ஆஹ ‘‘ப⁴ந்தே நாக³ஸேன, கிம் நானாகரணம் ஸராக³ஸ்ஸ ச வீதராக³ஸ்ஸ சா’’தி? ‘‘ஏகோ கோ², மஹாராஜ, அஜ்ஜோ²ஸிதோ, ஏகோ அனஜ்ஜோ²ஸிதோ’’தி. ‘‘கிம் ஏதம், ப⁴ந்தே, அஜ்ஜோ²ஸிதோ அனஜ்ஜோ²ஸிதோ நாமா’’தி? ‘‘ஏகோ கோ², மஹாராஜ, அத்தி²கோ, ஏகோ அனத்தி²கோ’’தி. ‘‘பஸ்ஸாமஹம், ப⁴ந்தே, ஏவரூபம் யோ ச ஸராகோ³, யோ ச வீதராகோ³, ஸப்³போ³பேஸோ ஸோப⁴னம் யேவ இச்ச²தி கா²த³னீயம் வா போ⁴ஜனீயம் வா, ந கோசி பாபகம் இச்ச²தீ’’தி. ‘‘அவீதராகோ³ கோ², மஹாராஜ, ரஸபடிஸம்வேதீ³ ச ரஸராக³படிஸம்வேதீ³ ச போ⁴ஜனம் பு⁴ஞ்ஜதி, வீதராகோ³ பன ரஸபடிஸம்வேதீ³ போ⁴ஜனம் பு⁴ஞ்ஜதி, நோ ச கோ² ரஸராக³படிஸம்வேதீ³’’தி.

‘‘கல்லோஸி, ப⁴ந்தே நாக³ஸேனா’’தி.

ஸராக³வீதராக³னானாகரணபஞ்ஹோ ஸத்தமோ.

8. பஞ்ஞாபதிட்டா²னபஞ்ஹோ

8. ராஜா ஆஹ ‘‘ப⁴ந்தே நாக³ஸேன, பஞ்ஞா குஹிம் படிவஸதீ’’தி? ‘‘ந கத்த²சி மஹாராஜா’’தி. ‘‘தேன ஹி, ப⁴ந்தே நாக³ஸேன, நத்தி² பஞ்ஞா’’தி. ‘‘வாதோ, மஹாராஜ, குஹிம் படிவஸதீ’’தி? ‘‘ந கத்த²சி ப⁴ந்தே’’தி. ‘‘தேன ஹி, மஹாராஜ, நத்தி² வாதோ’’தி.

‘‘கல்லோஸி, ப⁴ந்தே நாக³ஸேனா’’தி.

பஞ்ஞாபதிட்டா²னபஞ்ஹோ அட்ட²மோ.

9. ஸம்ஸாரபஞ்ஹோ

9. ராஜா ஆஹ ‘‘ப⁴ந்தே நாக³ஸேன, யம் பனேதம் ப்³ரூஸி ‘ஸம்ஸாரோ’தி, கதமோ ஸோ ஸம்ஸாரோ’’தி? ‘‘இத⁴, மஹாராஜ, ஜாதோ இதே⁴வ மரதி, இத⁴ மதோ அஞ்ஞத்ர உப்பஜ்ஜதி, தஹிம் ஜாதோ தஹிம் யேவ மரதி, தஹிம் மதோ அஞ்ஞத்ர உப்பஜ்ஜதி, ஏவம் கோ², மஹாராஜ, ஸம்ஸாரோ ஹோதீ’’தி. ‘‘ஓபம்மம் கரோஹீ’’தி. ‘‘யதா², மஹாராஜ, கோசிதே³வ புரிஸோ பக்கம் அம்ப³ம் கா²தி³த்வா அட்டி²ம் ரோபேய்ய, ததோ மஹந்தோ அம்ப³ருக்கோ² நிப்³ப³த்தித்வா ப²லானி த³தே³ய்ய, அத² ஸோ புரிஸோ ததோபி பக்கம் அம்ப³ம் கா²தி³த்வா அட்டி²ம் ரோபேய்ய, ததோபி மஹந்தோ அம்ப³ருக்கோ² நிப்³ப³த்தித்வா ப²லானி த³தே³ய்ய, ஏவமேதேஸம் ருக்கா²னம் கோடி ந பஞ்ஞாயதி, ஏவமேவ கோ², மஹாராஜ, இத⁴ ஜாதோ இதே⁴வ மரதி, இத⁴ மதோ அஞ்ஞத்ர உப்பஜ்ஜதி, தஹிம் ஜாதோ தஹிம் யேவ மரதி, தஹிம் மதோ அஞ்ஞத்ர உப்பஜ்ஜதி, ஏவம் கோ², மஹாராஜ, ஸம்ஸாரோ ஹோதீ’’தி.

‘‘கல்லோஸி, ப⁴ந்தே நாக³ஸேனா’’தி.

ஸம்ஸாரபஞ்ஹோ நவமோ.

10. சிரகதஸரணபஞ்ஹோ

10. ராஜா ஆஹ ‘‘ப⁴ந்தே நாக³ஸேன, கேன அதீதம் சிரகதம் ஸரதீ’’தி? ‘‘ஸதியா, மஹாராஜா’’தி. ‘‘நனு, ப⁴ந்தே நாக³ஸேன, சித்தேன ஸரதி நோ ஸதியா’’தி? ‘‘அபி⁴ஜானாஸி நு, த்வம் மஹாராஜ, கிஞ்சிதே³வ கரணீயம் கத்வா பமுட்ட²’’ந்தி? ‘‘ஆம ப⁴ந்தே’’தி. ‘‘கிம் நு கோ², த்வம் மஹாராஜ, தஸ்மிம் ஸமயே அசித்தகோ அஹோஸீ’’தி? ‘‘ந ஹி, ப⁴ந்தே, ஸதி தஸ்மிம் ஸமயே நாஹோஸீ’’தி. ‘‘அத² கஸ்மா, த்வம் மஹாராஜ, ஏவமாஹ ‘சித்தேன ஸரதி, நோ ஸதியா’’’தி?

‘‘கல்லோஸி, ப⁴ந்தே நாக³ஸேனா’’தி.

சிரகதஸரணபஞ்ஹோ த³ஸமோ.

11. அபி⁴ஜானந்தஸதிபஞ்ஹோ

11. ராஜா ஆஹ ‘‘ப⁴ந்தே நாக³ஸேன, ஸப்³பா³ ஸதி அபி⁴ஜானந்தீ உப்பஜ்ஜதி, உதா³ஹு கடுமிகாவ ஸதீ’’தி? ‘‘அபி⁴ஜானந்தீபி, மஹாராஜ, கடுமிகாபி ஸதீ’’தி. ‘‘ஏவஞ்ஹி கோ², ப⁴ந்தே நாக³ஸேன, ஸப்³பா³ ஸதி அபி⁴ஜானந்தீ, நத்தி² கடுமிகா ஸதீ’’தி? ‘‘யதி³ நத்தி², மஹாராஜ, கடுமிகா ஸதி, நத்தி² கிஞ்சி ஸிப்பிகானம் கம்மாயதனேஹி வா ஸிப்பாயதனேஹி வா விஜ்ஜாட்டா²னேஹி வா கரணீயம், நிரத்த²கா ஆசரியா, யஸ்மா ச கோ², மஹாராஜ, அத்தி² கடுமிகா ஸதி, தஸ்மா அத்தி² கம்மாயதனேஹி வா ஸிப்பாயதனேஹி வா விஜ்ஜாட்டா²னேஹி வா கரணீயம், அத்தோ² ச ஆசரியேஹீ’’தி.

‘‘கல்லோஸி, ப⁴ந்தே நாக³ஸேனா’’தி.

அபி⁴ஜானந்தஸதிபஞ்ஹோ ஏகாத³ஸமோ.

ஸதிவக்³கோ³ ச²ட்டோ².

இமஸ்மிம் வக்³கே³ ஏகாத³ஸ பஞ்ஹா.