4. கம்மனானாகரணபஞ்ஹோ

4. ராஜா ஆஹ ‘‘ப⁴ந்தே நாக³ஸேன, கேன காரணேன மனுஸ்ஸா ந ஸப்³பே³ ஸமகா, அஞ்ஞே அப்பாயுகா, அஞ்ஞே தீ³கா⁴யுகா, அஞ்ஞே ப³ஹ்வாபா³தா⁴ அஞ்ஞே அப்பாபா³தா⁴, அஞ்ஞே து³ப்³ப³ண்ணா, அஞ்ஞே வண்ணவந்தோ, அஞ்ஞே அப்பேஸக்கா², அஞ்ஞே மஹேஸக்கா², அஞ்ஞே அப்பபோ⁴கா³, அஞ்ஞே மஹாபோ⁴கா³, அஞ்ஞே நீசகுலீனா, அஞ்ஞே மஹாகுலீனா, அஞ்ஞே து³ப்பஞ்ஞா, அஞ்ஞே பஞ்ஞவந்தோ’’தி?

தே²ரோ ஆஹ ‘‘கிஸ்ஸ பன, மஹாராஜ, ருக்கா² ந ஸப்³பே³ ஸமகா, அஞ்ஞே அம்பி³லா, அஞ்ஞே லவணா, அஞ்ஞே தித்தகா, அஞ்ஞே கடுகா, அஞ்ஞே கஸாவா, அஞ்ஞே மது⁴ரா’’தி? ‘‘மஞ்ஞாமி, ப⁴ந்தே, பீ³ஜானம் நானாகரணேனா’’தி. ‘‘ஏவமேவ கோ², மஹாராஜ, கம்மானம் நானாகரணேன மனுஸ்ஸா ந ஸப்³பே³ ஸமகா, அஞ்ஞே அப்பாயுகா, அஞ்ஞே தீ³கா⁴யுகா, அஞ்ஞே ப³ஹ்வாபா³தா⁴, அஞ்ஞே அப்பாபா³தா⁴, அஞ்ஞே து³ப்³ப³ண்ணா, அஞ்ஞே வண்ணவந்தோ, அஞ்ஞே அப்பேஸக்கா², அஞ்ஞே மஹேஸக்கா², அஞ்ஞே அப்பபோ⁴கா³, அஞ்ஞே மஹாபோ⁴கா³, அஞ்ஞே நீசகுலீனா, அஞ்ஞே மஹாகுலீனா, அஞ்ஞே து³ப்பஞ்ஞா, அஞ்ஞே பஞ்ஞவந்தோ. பா⁴ஸிதம்பேதம் மஹாராஜ ப⁴க³வதா – ‘கம்மஸ்ஸகா, மாணவ, ஸத்தா கம்மதா³யாதா³ கம்மயோனீ கம்மப³ந்தூ⁴ கம்மப்படிஸரணா, கம்மம் ஸத்தே விப⁴ஜதி யதி³த³ம் ஹீனப்பணீததாயா’’’தி.

‘‘கல்லோஸி, ப⁴ந்தே நாக³ஸேனா’’தி.

கம்மனானாகரணபஞ்ஹோ சதுத்தோ².