4. நிப்³பா³னவக்³கோ³

1. ப²ஸ்ஸாதி³வினிப்³பு⁴ஜனபஞ்ஹோ

1. ராஜா ஆஹ ‘‘ப⁴ந்தே நாக³ஸேன, ஸக்கா இமேஸம் த⁴ம்மானம் ஏகதோபா⁴வக³தானம் வினிப்³பு⁴ஜித்வா வினிப்³பு⁴ஜித்வா நானாகரணம் பஞ்ஞாபேதும் ‘அயம் ப²ஸ்ஸோ, அயம் வேத³னா, அயம் ஸஞ்ஞா, அயம் சேதனா, இத³ம் விஞ்ஞாணம், அயம் விதக்கோ, அயம் விசாரோ’தி’’? ‘‘ந ஸக்கா, மஹாராஜ, இமேஸம் த⁴ம்மானம் ஏகதோபா⁴வக³தானம் வினிப்³பு⁴ஜித்வா வினிப்³பு⁴ஜித்வா நானாகரணம் பஞ்ஞாபேதும் ‘அயம் ப²ஸ்ஸோ, அயம் வேத³னா, அயம் ஸஞ்ஞா, அயம் சேதனா, இத³ம் விஞ்ஞாணம், அயம் விதக்கோ, அயம் விசாரோ’’’தி.

‘‘ஓபம்மம் கரோஹீ’’தி. ‘‘யதா², மஹாராஜ, ரஞ்ஞோ ஸூதோ³ அரஸம் வா ரஸம் வா [யூஸம் வா ரஸம் வா (ஸீ. ஸ்யா. பீ.)] கரேய்ய, ஸோ தத்த² த³தி⁴ம்பி பக்கி²பேய்ய, லோணம்பி பக்கி²பேய்ய, ஸிங்கி³வேரம்பி பக்கி²பேய்ய, ஜீரகம்பி பக்கி²பேய்ய, மரிசம்பி பக்கி²பேய்ய, அஞ்ஞானிபி பகாரானி பக்கி²பேய்ய, தமேனம் ராஜா ஏவம் வதே³ய்ய, ‘த³தி⁴ஸ்ஸ மே ரஸம் ஆஹர, லோணஸ்ஸ மே ரஸம் ஆஹர, ஸிங்கி³வேரஸ்ஸ மே ரஸம் ஆஹர, ஜீரகஸ்ஸ மே ரஸம் ஆஹர, மரிசஸ்ஸ மே ரஸம் ஆஹர, ஸப்³பே³ஸம் மே பக்கி²த்தானம் ரஸம் ஆஹரா’தி. ஸக்கா நு கோ², மஹாராஜ, தேஸம் ரஸானம் ஏகதோபா⁴வக³தானம் வினிப்³பு⁴ஜித்வா வினிப்³பு⁴ஜித்வா ரஸம் ஆஹரிதும் அம்பி³லத்தம் வா லவணத்தம் வா தித்தகத்தம் வா கடுகத்தம் வா கஸாயத்தம் வா மது⁴ரத்தம் வா’’தி? ‘‘ந ஹி, ப⁴ந்தே, ஸக்கா தேஸம் ரஸானம் ஏகதோபா⁴வக³தானம் வினிப்³பு⁴ஜித்வா வினிப்³பு⁴ஜித்வா ரஸம் ஆஹரிதும் அம்பி³லத்தம் வா லவணத்தம் வா தித்தகத்தம் வா கடுகத்தம் வா கஸாயத்தம் வா மது⁴ரத்தம் வா, அபி ச கோ² பன ஸகேன ஸகேன லக்க²ணேன உபட்ட²ஹந்தீ’’தி. ‘‘ஏவமேவ கோ², மஹாராஜ, ந ஸக்கா இமேஸம் த⁴ம்மானம் ஏகதோபா⁴வக³தானம் வினிப்³பு⁴ஜித்வா வினிப்³பு⁴ஜித்வா நானாகரணம் பஞ்ஞாபேதும் ‘அயம் ப²ஸ்ஸோ, அயம் வேத³னா, அயம் ஸஞ்ஞா, அயம் சேதனா, இத³ம் விஞ்ஞாணம், அயம் விதக்கோ, அயம் விசாரோ’தி, அபி ச கோ² பன ஸகேன ஸகேன லக்க²ணேன உபட்ட²ஹந்தீ’’தி.

‘‘கல்லோஸி, ப⁴ந்தே நாக³ஸேனா’’தி.

ப²ஸ்ஸாதி³வினிப்³பு⁴ஜனபஞ்ஹோ பட²மோ.

2. நாக³ஸேனபஞ்ஹோ

2. தே²ரோ ஆஹ ‘‘லோணம், மஹாராஜ, சக்கு²விஞ்ஞேய்ய’’ந்தி. ‘‘ஆம, ப⁴ந்தே, சக்கு²விஞ்ஞேய்ய’’ந்தி. ‘‘ஸுட்டு² கோ², மஹாராஜ, ஜானாஹீ’’தி. ‘‘கிம் பன, ப⁴ந்தே, ஜிவ்ஹாவிஞ்ஞேய்ய’’ந்தி? ‘‘ஆம, மஹாராஜ, ஜிவ்ஹாவிஞ்ஞேய்ய’’ந்தி. ‘‘கிம் பன, ப⁴ந்தே, ஸப்³ப³ம் லோணம் ஜிவ்ஹாய விஜானாதீ’’தி? ‘‘ஆம, மஹாராஜ, ஸப்³ப³ம் லோணம் ஜிவ்ஹாய விஜானாதி’’.

‘‘யதி³, ப⁴ந்தே, ஸப்³ப³ம் லோணம் ஜிவ்ஹாய விஜானாதி, கிஸ்ஸ பன தம் ஸகடேஹி ப³லீப³த்³தா³ [ப³லிப³த்³தா³ (ஸீ. பீ.)] ஆஹரந்தி, நனு லோணமேவ ஆஹரிதப்³ப³’’ந்தி? ‘‘ந ஸக்கா, மஹாராஜ, லோணமேவ ஆஹரிதும் ஏகதோபா⁴வக³தா ஏதே த⁴ம்மா கோ³சரனானத்தக³தா லோணம் க³ருபா⁴வோ சாதி. ஸக்கா பன, மஹாராஜ, லோணம் துலாய துலயிது’’ந்தி? ‘‘ஆம, ப⁴ந்தே, ஸக்கா’’தி. ‘‘ந ஸக்கா, மஹாராஜ, லோணம் துலாய துலயிதும், க³ருபா⁴வோ துலாய துலியதீ’’தி.

‘‘கல்லோஸி, ப⁴ந்தே நாக³ஸேனா’’தி.

நாக³ஸேனபஞ்ஹோ து³தியோ.

3. பஞ்சாயதனகம்மனிப்³ப³த்தபஞ்ஹோ

3. ராஜா ஆஹ ‘‘ப⁴ந்தே நாக³ஸேன, யானிமானி பஞ்சாயதனானி, கிம் நு தானி நானாகம்மேஹி நிப்³ப³த்தானி, உதா³ஹு ஏகேன கம்மேனா’’தி? ‘‘நானாகம்மேஹி, மஹாராஜ, நிப்³ப³த்தானி, ந ஏகேன கம்மேனா’’தி.

‘‘ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, ஏகஸ்மிம் கே²த்தே நானாபீ³ஜானி வப்பேய்யும், தேஸம் நானாபீ³ஜானம் நானாப²லானி நிப்³ப³த்தேய்யு’’ந்தி? ‘‘ஆம, ப⁴ந்தே, நிப்³ப³த்தேய்யு’’ந்தி. ‘‘ஏவமேவ கோ², மஹாராஜ, யானி யானி பஞ்சாயதனானி, தானி தானி நானாகம்மேஹி நிப்³ப³த்தானி, ந ஏகேன கம்மேனா’’தி.

‘‘கல்லோஸி, ப⁴ந்தே நாக³ஸேனா’’தி.

பஞ்சாயதனகம்மனிப்³ப³த்தபஞ்ஹோ ததியோ.

4. கம்மனானாகரணபஞ்ஹோ

4. ராஜா ஆஹ ‘‘ப⁴ந்தே நாக³ஸேன, கேன காரணேன மனுஸ்ஸா ந ஸப்³பே³ ஸமகா, அஞ்ஞே அப்பாயுகா, அஞ்ஞே தீ³கா⁴யுகா, அஞ்ஞே ப³ஹ்வாபா³தா⁴ அஞ்ஞே அப்பாபா³தா⁴, அஞ்ஞே து³ப்³ப³ண்ணா, அஞ்ஞே வண்ணவந்தோ, அஞ்ஞே அப்பேஸக்கா², அஞ்ஞே மஹேஸக்கா², அஞ்ஞே அப்பபோ⁴கா³, அஞ்ஞே மஹாபோ⁴கா³, அஞ்ஞே நீசகுலீனா, அஞ்ஞே மஹாகுலீனா, அஞ்ஞே து³ப்பஞ்ஞா, அஞ்ஞே பஞ்ஞவந்தோ’’தி?

தே²ரோ ஆஹ ‘‘கிஸ்ஸ பன, மஹாராஜ, ருக்கா² ந ஸப்³பே³ ஸமகா, அஞ்ஞே அம்பி³லா, அஞ்ஞே லவணா, அஞ்ஞே தித்தகா, அஞ்ஞே கடுகா, அஞ்ஞே கஸாவா, அஞ்ஞே மது⁴ரா’’தி? ‘‘மஞ்ஞாமி, ப⁴ந்தே, பீ³ஜானம் நானாகரணேனா’’தி. ‘‘ஏவமேவ கோ², மஹாராஜ, கம்மானம் நானாகரணேன மனுஸ்ஸா ந ஸப்³பே³ ஸமகா, அஞ்ஞே அப்பாயுகா, அஞ்ஞே தீ³கா⁴யுகா, அஞ்ஞே ப³ஹ்வாபா³தா⁴, அஞ்ஞே அப்பாபா³தா⁴, அஞ்ஞே து³ப்³ப³ண்ணா, அஞ்ஞே வண்ணவந்தோ, அஞ்ஞே அப்பேஸக்கா², அஞ்ஞே மஹேஸக்கா², அஞ்ஞே அப்பபோ⁴கா³, அஞ்ஞே மஹாபோ⁴கா³, அஞ்ஞே நீசகுலீனா, அஞ்ஞே மஹாகுலீனா, அஞ்ஞே து³ப்பஞ்ஞா, அஞ்ஞே பஞ்ஞவந்தோ. பா⁴ஸிதம்பேதம் மஹாராஜ ப⁴க³வதா – ‘கம்மஸ்ஸகா, மாணவ, ஸத்தா கம்மதா³யாதா³ கம்மயோனீ கம்மப³ந்தூ⁴ கம்மப்படிஸரணா, கம்மம் ஸத்தே விப⁴ஜதி யதி³த³ம் ஹீனப்பணீததாயா’’’தி.

‘‘கல்லோஸி, ப⁴ந்தே நாக³ஸேனா’’தி.

கம்மனானாகரணபஞ்ஹோ சதுத்தோ².

5. வாயாமகரணபஞ்ஹோ

5. ராஜா ஆஹ ‘‘ப⁴ந்தே நாக³ஸேன, தும்ஹே ப⁴ணத² ‘கிந்தி இமம் து³க்க²ம் நிருஜ்ஜே²ய்ய, அஞ்ஞஞ்ச து³க்க²ம் நுப்பஜ்ஜேய்யா’தி. ஏதத³த்தா², மஹாராஜ, அம்ஹாகம் பப்³ப³ஜ்ஜா’’தி. ‘‘கிம் படிகச்சேவ வாயமிதேன, நனு ஸம்பத்தே காலே வாயமிதப்³ப³’’ந்தி? தே²ரோ ஆஹ ‘‘ஸம்பத்தே காலே, மஹாராஜ, வாயாமோ அகிச்சகரோ ப⁴வதி, படிகச்சேவ வாயாமோ கிச்சகரோ ப⁴வதீ’’தி.

‘‘ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யதா³ த்வம் பிபாஸிதோ ப⁴வேய்யாஸி, ததா³ த்வம் உத³பானம் க²ணாபேய்யாஸி, தளாகம் க²ணாபேய்யாஸி ‘பானீயம் பிவிஸ்ஸாமீ’தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ஸம்பத்தே காலே வாயாமோ அகிச்சகரோ ப⁴வதி, படிகச்சேவ வாயாமோ கிச்சகரோ ப⁴வதீ’’தி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யதா³ த்வம் பு³பு⁴க்கி²தோ ப⁴வேய்யாஸி, ததா³ த்வம் கே²த்தம் கஸாபேய்யாஸி, ஸாலிம் ரோபாபேய்யாஸி, த⁴ஞ்ஞம் அதிஹராபேய்யாஸி ‘ப⁴த்தம் பு⁴ஞ்ஜிஸ்ஸாமீ’தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ஸம்பத்தே காலே வாயாமோ அகிச்சகரோ ப⁴வதி, படிகச்சேவ வாயாமோ கிச்சகரோ ப⁴வதீதி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யதா³ தே ஸங்கா³மோ பச்சுபட்டி²தோ ப⁴வேய்ய, ததா³ த்வம் பரிக²ம் க²ணாபேய்யாஸி, பாகாரம் காராபேய்யாஸி, கோ³புரம் காராபேய்யாஸி, அட்டாலகம் காராபேய்யாஸி, த⁴ஞ்ஞம் அதிஹராபேய்யாஸி, ததா³ த்வம் ஹத்தி²ஸ்மிம் ஸிக்கே²ய்யாஸி, அஸ்ஸஸ்மிம் ஸிக்கே²ய்யாஸி, ரத²ஸ்மிம் ஸிக்கே²ய்யாஸி, த⁴னுஸ்மிம் ஸிக்கே²ய்யாஸி, த²ருஸ்மிம் ஸிக்கே²ய்யாஸீ’’தி? ‘‘ந ஹி, ப⁴ந்தே’’தி. ‘‘ஏவமேவ கோ², மஹாராஜ, ஸம்பத்தே காலே வாயாமோ அகிச்சகரோ ப⁴வதி, படிகச்சேவ வாயாமோ கிச்சகரோ ப⁴வதி. பா⁴ஸிதம்பேதம் மஹாராஜ ப⁴க³வதா –

‘‘‘படிகச்சேவ தம் கயிரா, யம் ஜஞ்ஞா ஹிதமத்தனோ;

ந ஸாகடிகசிந்தாய, மந்தா தீ⁴ரோ பரக்கமே.

‘‘‘யதா² ஸாகடிகோ மட்ட²ம் [நாம (ஸீ. பீ. க.) ஸம். நி. 1.103], ஸமம் ஹித்வா மஹாபத²ம்;

விஸமம் மக்³க³மாருய்ஹ, அக்க²ச்சி²ன்னோவ ஜா²யதி.

‘‘‘ஏவம் த⁴ம்மா அபக்கம்ம, அத⁴ம்மமனுவத்திய;

மந்தோ³ மச்சு முக²ம் பத்தோ, அக்க²ச்சி²ன்னோவ ஜா²யதீ’’’தி [ஸோசதீதி (ஸப்³ப³த்த²)].

‘‘கல்லோஸி, ப⁴ந்தே நாக³ஸேனா’’தி.

வாயாமகரணபஞ்ஹோ பஞ்சமோ.

6. நேரயிகக்³கி³உண்ஹபா⁴வபஞ்ஹோ

6. ராஜா ஆஹ ‘‘ப⁴ந்தே நாக³ஸேன, தும்ஹே ப⁴ணத² ‘பாகதிகஅக்³கி³தோ நேரயிகோ அக்³கி³ மஹாபி⁴தாபதரோ ஹோதி, கு²த்³த³கோபி பாஸாணோ பாகதிகே அக்³கி³ம்ஹி பக்கி²த்தோ தி³வஸம்பி பச்சமானோ [த⁴மமானோ (ஸீ. பீ.)] ந விலயம் க³ச்ச²தி, கூடாகா³ரமத்தோபி பாஸாணோ நேரயிகக்³கி³ம்ஹி பக்கி²த்தோ க²ணேன விலயம் க³ச்ச²தீ’தி, ஏதம் வசனம் ந ஸத்³த³ஹாமி, ஏவஞ்ச பன வதே³த² ‘யே ச தத்த² உப்பன்னா ஸத்தா, தே அனேகானிபி வஸ்ஸஸஹஸ்ஸானி நிரயே பச்சமானா ந விலயம் க³ச்ச²ந்தீ’தி, தம்பி வசனம் ந ஸத்³த³ஹாமீ’’தி.

தே²ரோ ஆஹ ‘‘தம் கிம் மஞ்ஞஸி, மஹாராஜ, யா தா ஸந்தி மகரினியோபி ஸுஸுமாரினியோபி கச்ச²பினியோபி மோரினியோபி கபோதினியோபி, கிம்னு தா கக்க²ளானி பாஸாணானி ஸக்க²ராயோ ச கா²த³ந்தீ’’தி? ‘‘ஆம, ப⁴ந்தே, கா²த³ந்தீ’’தி. ‘‘கிம் பன தானி தாஸம் குச்சி²யம் கோட்ட²ப்³ப⁴ந்தரக³தானி விலயம் க³ச்ச²ந்தீ’’தி? ‘‘ஆம, ப⁴ந்தே, விலயம் க³ச்ச²ந்தீ’’தி. ‘‘யோ பன தாஸம் குச்சி²யம் க³ப்³போ⁴, ஸோபி விலயம் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி? ‘‘மஞ்ஞாமி, ப⁴ந்தே, கம்மாதி⁴கதேன ந விலயம் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயம் க³ச்ச²ந்தி. பா⁴ஸிதம்பேதம், மஹாராஜ, ப⁴க³வதா – ‘ஸோ ந தாவ காலம் கரோதி, யாவ ந தம் பாபகம்மம் ப்³யந்தீஹோதீ’’’தி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யா தா ஸந்தி ஸீஹினியோபி ப்³யக்³கி⁴னியோபி தீ³பினியோபி குக்குரினியோபி, கிம்னு தா கக்க²ளானி அட்டி²கானி மம்ஸானி கா²த³ந்தீதி? ‘‘ஆம, ப⁴ந்தே, கா²த³ந்தீ’’தி. ‘‘கிம் பன தானி தாஸம் குச்சி²யம் கோட்ட²ப்³ப⁴ந்தரக³தானி விலயம் க³ச்ச²ந்தீ’’தி? ‘‘ஆம, ப⁴ந்தே, விலயம் க³ச்ச²ந்தீ’’தி. ‘‘யோ பன தாஸம் குச்சி²யம் க³ப்³போ⁴, ஸோபி விலயம் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி? ‘‘மஞ்ஞாமி, ப⁴ந்தே, கம்மாதி⁴கதேன ந விலயம் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயம் க³ச்ச²ந்தீ’’தி.

‘‘பி⁴ய்யோ ஓபம்மம் கரோஹீ’’தி. ‘‘தம் கிம் மஞ்ஞஸி, மஹாராஜ, யா தா ஸந்தி யோனகஸுகு²மாலினியோபி க²த்தியஸுகு²மாலினியோபி ப்³ராஹ்மணஸுகு²மாலினியோபி க³ஹபதிஸுகு²மாலினியோபி, கிம்னு தா கக்க²ளானி க²ஜ்ஜகானி மம்ஸானி கா²த³ந்தீ’’தி? ‘‘ஆம, ப⁴ந்தே, கா²த³ந்தீ’’தி. ‘‘கிம் பன தானி தாஸம் குச்சி²யம் கோட்ட²ப்³ப⁴ந்தரக³தானி விலயம் க³ச்ச²ந்தீ’’தி? ‘‘ஆம, ப⁴ந்தே, விலயம் க³ச்ச²ந்தீ’’தி. ‘‘யோ பன தாஸம் குச்சி²யம் க³ப்³போ⁴ ஸோபி விலயம் க³ச்ச²தீ’’தி? ‘‘ந ஹி ப⁴ந்தே’’தி. ‘‘கேன காரணேனா’’தி. ‘‘மஞ்ஞாமி, ப⁴ந்தே, கம்மாதி⁴கதேன ந விலயம் க³ச்ச²தீ’’தி. ‘‘ஏவமேவ கோ², மஹாராஜ, கம்மாதி⁴கதேன நேரயிகா ஸத்தா அனேகானிபி வஸ்ஸஸஹஸ்ஸானி நிரயே பச்சமானா ந விலயம் க³ச்ச²ந்தி. பா⁴ஸிதம்பேதம், மஹாராஜ, ப⁴க³வதா – ‘‘ஸோ ந தாவ காலம் கரோதி, யாவ ந தம் பாபகம்மம் ப்³யந்தீஹோதீ’’தி.

‘‘கல்லோஸி, ப⁴ந்தே நாக³ஸேனா’’தி.

நேரயிகக்³கி³உண்ஹபா⁴வபஞ்ஹோ ச²ட்டோ².

7. பத²விஸந்தா⁴ரகபஞ்ஹோ

7. ராஜா ஆஹ ‘‘ப⁴ந்தே நாக³ஸேன, தும்ஹே ப⁴ணத² ‘அயம் மஹா பத²வீ உத³கே பதிட்டி²தா, உத³கம் வாதே பதிட்டி²தம், வாதோ ஆகாஸே பதிட்டி²தோ’தி, ஏதம்பி வசனம் ந ஸத்³த³ஹாமீ’’தி. தே²ரோ த⁴ம்மகரகேன [த⁴ம்மகரணேன (க.)] உத³கம் க³ஹேத்வா ராஜானம் மிலிந்த³ம் ஸஞ்ஞாபேஸி ‘‘யதா², மஹாராஜ, இமம் உத³கம் வாதேன ஆதா⁴ரிதம், ஏவம் தம்பி உத³கம் வாதேன ஆதா⁴ரித’’ந்தி.

‘‘கல்லோஸி, ப⁴ந்தே நாக³ஸேனா’’தி.

பத²விஸந்தா⁴ரகபஞ்ஹோ ஸத்தமோ.

8. நிரோத⁴னிப்³பா³னபஞ்ஹோ

8. ராஜா ஆஹ ‘‘ப⁴ந்தே நாக³ஸேன, நிரோதோ⁴ நிப்³பா³ன’’ந்தி? ‘‘ஆம, மஹாராஜ, நிரோதோ⁴ நிப்³பா³ன’’ந்தி. ‘‘கத²ம், ப⁴ந்தே, நாக³ஸேன, நிரோதோ⁴ நிப்³பா³ன’’ந்தி? ‘‘ஸப்³பே³ பா³லபுது²ஜ்ஜனா கோ², மஹாராஜ, அஜ்ஜ²த்திகபா³ஹிரே ஆயதனே அபி⁴னந்த³ந்தி அபி⁴வத³ந்தி அஜ்ஜோ²ஸாய திட்ட²ந்தி, தே தேன ஸோதேன வுய்ஹந்தி, ந பரிமுச்சந்தி ஜாதியா ஜராய மரணேன ஸோகேன பரிதே³வேன து³க்கே²ஹி தோ³மனஸ்ஸேஹி உபாயாஸேஹி ந பரிமுச்சந்தி து³க்க²ஸ்மாதி வதா³மி. ஸுதவா ச கோ², மஹாராஜ, அரியஸாவகோ அஜ்ஜ²த்திகபா³ஹிரே ஆயதனே நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, தஸ்ஸ தம் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ தண்ஹா நிருஜ்ஜ²தி, தண்ஹானிரோதா⁴ உபாதா³னனிரோதோ⁴, உபாதா³னனிரோதா⁴ ப⁴வனிரோதோ⁴, ப⁴வனிரோதா⁴ ஜாதினிரோதோ⁴, ஜாதினிரோதா⁴ ஜராமரணம் ஸோகபரிதே³வது³க்க²தோ³மனஸ்ஸுபாயாஸா நிருஜ்ஜ²ந்தி, ஏவமேதஸ்ஸ கேவலஸ்ஸ து³க்க²க்க²ந்த⁴ஸ்ஸ நிரோதோ⁴ ஹோதி, ஏவம் கோ², மஹாராஜ, நிரோதோ⁴ நிப்³பா³ன’’ந்தி.

‘‘கல்லோஸி, ப⁴ந்தே நாக³ஸேனா’’தி.

நிரோத⁴னிப்³பா³னபஞ்ஹோ அட்ட²மோ.

9. நிப்³பா³னலப⁴னபஞ்ஹோ

9. ராஜா ஆஹ ‘‘ப⁴ந்தே நாக³ஸேன, ஸப்³பே³வ லப⁴ந்தி நிப்³பா³ன’’ந்தி? ‘‘ந கோ², மஹாராஜ, ஸப்³பே³வ லப⁴ந்தி நிப்³பா³னம், அபி ச கோ², மஹாராஜ, யோ ஸம்மா படிபன்னோ அபி⁴ஞ்ஞேய்யே த⁴ம்மே அபி⁴ஜானாதி, பரிஞ்ஞேய்யே த⁴ம்மே பரிஜானாதி, பஹாதப்³பே³ த⁴ம்மே பஜஹதி, பா⁴வேதப்³பே³ த⁴ம்மே பா⁴வேதி, ஸச்சி²காதப்³பே³ த⁴ம்மே ஸச்சி²கரோதி, ஸோ லப⁴தி நிப்³பா³ன’’ந்தி.

‘‘கல்லோஸி, ப⁴ந்தே நாக³ஸேனா’’தி.

நிப்³பா³னலப⁴னபஞ்ஹோ நவமோ.

10. நிப்³பா³னஸுக²ஜானனபஞ்ஹோ

10. ராஜா ஆஹ ‘‘ப⁴ந்தே நாக³ஸேன, யோ ந லப⁴தி நிப்³பா³னம், ஜானாதி ஸோ ‘ஸுக²ம் நிப்³பா³ன’’’ந்தி? ‘‘ஆம, மஹாராஜ, யோ ந லப⁴தி நிப்³பா³னம், ஜானாதி ஸோ ‘ஸுக²ம் நிப்³பா³ன’’’ந்தி. ‘‘கத²ம், ப⁴ந்தே நாக³ஸேன, அலப⁴ந்தோ ஜானாதி ‘ஸுக²ம் நிப்³பா³ன’’’ந்தி? ‘‘தம் கிம் மஞ்ஞஸி, மஹாராஜ, யேஸம் நச்சி²ன்னா ஹத்த²பாதா³, ஜானேய்யும் தே, மஹாராஜ, ‘து³க்க²ம் ஹத்த²பாத³ச்சே²த³ன’’’ந்தி? ‘‘ஆம, ப⁴ந்தே, ஜானேய்யு’’ந்தி. ‘‘கத²ம் ஜானேய்யு’’ந்தி? ‘‘அஞ்ஞேஸம், ப⁴ந்தே, சி²ன்னஹத்த²பாதா³னம் பரிதே³விதஸத்³த³ம் ஸுத்வா ஜானந்தி ‘து³க்க²ம் ஹத்த²பாத³ச்சே²த³ன’’’ந்தி. ‘‘ஏவமேவ கோ², மஹாராஜ, யேஸம் தி³ட்ட²ம் நிப்³பா³னம், தேஸம் ஸத்³த³ம் ஸுத்வா ஜானாதி ‘ஸுக²ம் நிப்³பா³ன’’’ந்தி.

‘‘கல்லோஸி, ப⁴ந்தே நாக³ஸேனா’’தி.

நிப்³பா³னஸுக²ஜானனபஞ்ஹோ த³ஸமோ.

நிப்³பா³னவக்³கோ³ சதுத்தோ².

இமஸ்மிம் வக்³கே³ த³ஸ பஞ்ஹா.