2. நாக³ஸேனபஞ்ஹோ

2. தே²ரோ ஆஹ ‘‘லோணம், மஹாராஜ, சக்கு²விஞ்ஞேய்ய’’ந்தி. ‘‘ஆம, ப⁴ந்தே, சக்கு²விஞ்ஞேய்ய’’ந்தி. ‘‘ஸுட்டு² கோ², மஹாராஜ, ஜானாஹீ’’தி. ‘‘கிம் பன, ப⁴ந்தே, ஜிவ்ஹாவிஞ்ஞேய்ய’’ந்தி? ‘‘ஆம, மஹாராஜ, ஜிவ்ஹாவிஞ்ஞேய்ய’’ந்தி. ‘‘கிம் பன, ப⁴ந்தே, ஸப்³ப³ம் லோணம் ஜிவ்ஹாய விஜானாதீ’’தி? ‘‘ஆம, மஹாராஜ, ஸப்³ப³ம் லோணம் ஜிவ்ஹாய விஜானாதி’’.

‘‘யதி³, ப⁴ந்தே, ஸப்³ப³ம் லோணம் ஜிவ்ஹாய விஜானாதி, கிஸ்ஸ பன தம் ஸகடேஹி ப³லீப³த்³தா³ [ப³லிப³த்³தா³ (ஸீ. பீ.)] ஆஹரந்தி, நனு லோணமேவ ஆஹரிதப்³ப³’’ந்தி? ‘‘ந ஸக்கா, மஹாராஜ, லோணமேவ ஆஹரிதும் ஏகதோபா⁴வக³தா ஏதே த⁴ம்மா கோ³சரனானத்தக³தா லோணம் க³ருபா⁴வோ சாதி. ஸக்கா பன, மஹாராஜ, லோணம் துலாய துலயிது’’ந்தி? ‘‘ஆம, ப⁴ந்தே, ஸக்கா’’தி. ‘‘ந ஸக்கா, மஹாராஜ, லோணம் துலாய துலயிதும், க³ருபா⁴வோ துலாய துலியதீ’’தி.

‘‘கல்லோஸி, ப⁴ந்தே நாக³ஸேனா’’தி.

நாக³ஸேனபஞ்ஹோ து³தியோ.