14. ஸமாதி⁴பஞ்ஹோ

14. ராஜா ஆஹ ‘‘ப⁴ந்தே நாக³ஸேன, கிம்லக்க²ணோ ஸமாதீ⁴’’தி? ‘‘பமுக²லக்க²ணோ, மஹாராஜ, ஸமாதி⁴, யே கேசி குஸலா த⁴ம்மா, ஸப்³பே³ தே ஸமாதி⁴பமுகா² ஹோந்தி ஸமாதி⁴னின்னா ஸமாதி⁴போணா ஸமாதி⁴பப்³பா⁴ரா’’தி.

‘‘ஓபம்மம் கரோஹீ’’தி. ‘‘யதா², மஹாராஜ, கூடாகா³ரஸ்ஸ யா யாசி கோ³பானஸியோ, ஸப்³பா³ தா கூடங்க³மா ஹோந்தி கூடனின்னா கூடஸமோஸரணா, கூடம் தாஸம் அக்³க³மக்கா²யதி. ஏவமேவ கோ², மஹாராஜ, யே கேசி குஸலா த⁴ம்மா, ஸப்³பே³ தே ஸமாதி⁴பமுகா² ஹோந்தி ஸமாதி⁴னின்னா ஸமாதி⁴போணா ஸமாதி⁴பப்³பா⁴ராதி.

‘‘பி⁴ய்யோ ஓபம்மம் கரோஹீ’’தி. ‘‘யதா², மஹாராஜ, கோசி ராஜா சதுரங்கி³னியா ஸேனாய ஸத்³தி⁴ம் ஸங்கா³மம் ஓதரேய்ய, ஸப்³பா³வ ஸேனா ஹத்தீ² ச அஸ்ஸா ச ரதா² ச பத்தீ ச தப்பமுகா² [தம்பமுகா² (ஸ்யா. க.)] ப⁴வேய்யும் தன்னின்னா தப்போணா தப்பப்³பா⁴ரா தம் யேவ அனுபரியாயேய்யும். ஏவமேவ கோ², மஹாராஜ, யே கேசி குஸலா த⁴ம்மா, ஸப்³பே³ தே ஸமாதி⁴பமுகா² ஹோந்தி ஸமாதி⁴னின்னா ஸமாதி⁴போணா ஸமாதி⁴பப்³பா⁴ரா. ஏவம் கோ², மஹாராஜ, பமுக²லக்க²ணோ ஸமாதி⁴. பா⁴ஸிதம்பேதம், மஹாராஜ, ப⁴க³வதா – ‘‘ஸமாதி⁴ம், பி⁴க்க²வே, பா⁴வேத², ஸமாஹிதோ, பி⁴க்க²வே, பி⁴க்கு² யதா²பூ⁴தம் பஜானாதீ’’தி.

‘‘கல்லோஸி, ப⁴ந்தே நாக³ஸேனா’’தி.

ஸமாதி⁴பஞ்ஹோ சுத்³த³ஸமோ.