15. பஞ்ஞாலக்க²ணபஞ்ஹோ

15. ராஜா ஆஹ ‘‘ப⁴ந்தே நாக³ஸேன, கிம்லக்க²ணா பஞ்ஞா’’தி? ‘‘புப்³பே³வ கோ², மஹாராஜ, மயா வுத்தம் ‘சே²த³னலக்க²ணா பஞ்ஞா’தி, அபி ச ஓபா⁴ஸனலக்க²ணா பஞ்ஞா’’தி. ‘‘கத²ம், ப⁴ந்தே, ஓபா⁴ஸனலக்க²ணா பஞ்ஞா’’தி? ‘‘பஞ்ஞா, மஹாராஜ, உப்பஜ்ஜமானா அவிஜ்ஜந்த⁴காரம் வித⁴மேதி, விஜ்ஜோபா⁴ஸம் ஜனேதி, ஞாணாலோகம் வித³ம்ஸேதி, அரியஸச்சானி பாகடானி கரோதி. ததோ யோகா³வசரோ ‘அனிச்ச’ந்தி வா ‘து³க்க²’ந்தி வா ‘அனத்தா’தி வா ஸம்மப்பஞ்ஞாய பஸ்ஸதீ’’தி.

‘‘ஓபம்மம் கரோஹீ’’தி. ‘‘யதா², மஹாராஜ, புரிஸோ அந்த⁴காரே கே³ஹே பதீ³பம் பவேஸேய்ய, பவிட்டோ² பதீ³போ அந்த⁴காரம் வித⁴மேதி, ஓபா⁴ஸம் ஜனேதி, ஆலோகம் வித³ம்ஸேதி, ரூபானி பாகடானி கரோதி. ஏவமேவ கோ², மஹாராஜ, பஞ்ஞா உப்பஜ்ஜமானா அவிஜ்ஜந்த⁴காரம் வித⁴மேதி, விஜ்ஜோபா⁴ஸம் ஜனேதி, ஞாணாலோகம் வித³ம்ஸேதி, அரியஸச்சானி பாகடானி கரோதி. ததோ யோகா³வசரோ ‘அனிச்ச’ந்தி வா ‘து³க்க²’ந்தி வா ‘அனத்தா’தி வா ஸம்மப்பஞ்ஞாய பஸ்ஸதி. ஏவம் கோ², மஹாராஜ, ஓபா⁴ஸனலக்க²ணா பஞ்ஞா’’தி.

‘‘கல்லோஸி, ப⁴ந்தே நாக³ஸேனா’’தி.

பஞ்ஞாலக்க²ணபஞ்ஹோ பன்னரஸமோ.