13. ஸதிலக்க²ணபஞ்ஹோ

13. ராஜா ஆஹ ‘‘ப⁴ந்தே நாக³ஸேன, கிம்லக்க²ணா ஸதீ’’தி? ‘‘அபிலாபனலக்க²ணா, மஹாராஜ, ஸதி, உபக்³க³ண்ஹனலக்க²ணா சா’’தி. ‘‘கத²ம், ப⁴ந்தே, அபிலாபனலக்க²ணா ஸதீ’’தி? ‘‘ஸதி, மஹாராஜ, உப்பஜ்ஜமானா குஸலாகுஸலஸாவஜ்ஜானவஜ்ஜஹீனப்பணீதகண்ஹஸுக்கஸப்படிபா⁴க³த⁴ம்மே அபிலாபேதி ‘இமே சத்தாரோ ஸதிபட்டா²னா, இமே சத்தாரோ ஸம்மப்பதா⁴னா, இமே சத்தாரோ இத்³தி⁴பாதா³, இமானி பஞ்சிந்த்³ரியானி, இமானி பஞ்ச ப³லானி, இமே ஸத்த போ³ஜ்ஜ²ங்கா³, அயம் அரியோ அட்ட²ங்கி³கோ மக்³கோ³, அயம் ஸமதோ², அயம் விபஸ்ஸனா, அயம் விஜ்ஜா, அயம் விமுத்தீ’தி. ததோ யோகா³வசரோ ஸேவிதப்³பே³ த⁴ம்மே ஸேவதி, அஸேவிதப்³பே³ த⁴ம்மே ந ஸேவதி. ப⁴ஜிதப்³பே³ த⁴ம்மே ப⁴ஜதி அப⁴ஜித்தப்³பே³ த⁴ம்மே ந ப⁴ஜதி. ஏவம் கோ², மஹாராஜ, அபிலாபனலக்க²ணா ஸதீ’’தி.

‘‘ஓபம்மம் கரோஹீ’’தி. ‘‘யதா², மஹாராஜ, ரஞ்ஞோ சக்கவத்திஸ்ஸ ப⁴ண்டா³கா³ரிகோ ராஜானம் சக்கவத்திம் ஸாயம் பாதம் யஸம் ஸராபேதி ‘ஏத்தகா, தே³வ, தே ஹத்தீ², ஏத்தகா அஸ்ஸா, ஏத்தகா ரதா², ஏத்தகா பத்தீ, ஏத்தகம் ஹிரஞ்ஞம், ஏத்தகம் ஸுவண்ணம், ஏத்தகம் ஸாபதேய்யம், தம் தே³வோ ஸரதூ’தி ரஞ்ஞோ ஸாபதேய்யம் அபிலாபேதி. ஏவமேவ கோ², மஹாராஜ, ஸதி உப்பஜ்ஜமானா குஸலாகுஸலஸாவஜ்ஜானவஜ்ஜஹீனப்பணீதகண்ஹஸுக்கஸப்படிபா⁴க³த⁴ம்மே அபிலாபேதி ‘இமே சத்தாரோ ஸதிபட்டா²னா, இமே சத்தாரோ ஸம்மப்பதா⁴னா, இமே சத்தாரோ இத்³தி⁴பாதா³, இமானி பஞ்சிந்த்³ரியானி, இமானி பஞ்ச ப³லானி, இமே ஸத்த போ³ஜ்ஜ²ங்கா³, அயம் அரியோ அட்ட²ங்கி³கோ மக்³கோ³, அயம் ஸமதோ², அயம் விபஸ்ஸனா, அயம் விஜ்ஜா, அயம் விமுத்தீ’தி. ததோ யோகா³வசரோ ஸேவிதப்³பே³ த⁴ம்மே ஸேவதி, அஸேவிதப்³பே³ த⁴ம்மே ந ஸேவதி. ப⁴ஜிதப்³பே³ த⁴ம்மே ப⁴ஜதி, அப⁴ஜிதப்³பே³ த⁴ம்மே ந ப⁴ஜதி. ஏவம் கோ², மஹாராஜ, அபிலாபனலக்க²ணா ஸதீ’’தி.

‘‘கத²ம், ப⁴ந்தே, உபக்³க³ண்ஹனலக்க²ணா ஸதீ’’தி? ‘‘ஸதி, மஹாராஜ, உப்பஜ்ஜமானா ஹிதாஹிதானம் த⁴ம்மானம் க³தியோ ஸமன்வேதி ‘இமே த⁴ம்மா ஹிதா, இமே த⁴ம்மா அஹிதா. இமே த⁴ம்மா உபகாரா, இமே த⁴ம்மா அனுபகாரா’தி. ததோ யோகா³வசரோ அஹிதே த⁴ம்மே அபனுதே³தி, ஹிதே த⁴ம்மே உபக்³க³ண்ஹாதி. அனுபகாரே த⁴ம்மே அபனுதே³தி, உபகாரே த⁴ம்மே உபக்³க³ண்ஹாதி. ஏவம் கோ², மஹாராஜ, உபக்³க³ண்ஹனலக்க²ணா ஸதீ’’தி.

‘‘ஓபம்மம் கரோஹீ’’தி. ‘‘யதா², மஹாராஜ, ரஞ்ஞோ சக்கவத்திஸ்ஸ பரிணாயகரதனம் ரஞ்ஞோ ஹிதாஹிதே ஜானாதி ‘இமே ரஞ்ஞோ ஹிதா, இமே அஹிதா. இமே உபகாரா, இமே அனுபகாரா’தி. ததோ அஹிதே அபனுதே³தி, ஹிதே உபக்³க³ண்ஹாதி. அனுபகாரே அபனுதே³தி, உபகாரே உபக்³க³ண்ஹாதி. ஏவமேவ கோ², மஹாராஜ, ஸதி உப்பஜ்ஜமானா ஹிதாஹிதானம் த⁴ம்மானம் க³தியோ ஸமன்வேதி ‘இமே த⁴ம்மா ஹிதா, இமே த⁴ம்மா அஹிதா. இமே த⁴ம்மா உபகாரா, இமே த⁴ம்மா அனுபகாரா’தி. ததோ யோகா³வசரோ அஹிதே த⁴ம்மே அபனுதே³தி, ஹிதே த⁴ம்மே உபக்³க³ண்ஹா’தி. அனுபகாரே த⁴ம்மே அபனுதே³தி, உபகாரே த³ம்மே உபக்³க³ண்ஹாதி. ஏவம் கோ², மஹாராஜ, உபக்³க³ண்ஹனலக்க²ணா ஸதி. பா⁴ஸிதம்பேதம், மஹாராஜ, ப⁴க³வதா – ‘ஸதிஞ்ச க்²வாஹம், பி⁴க்க²வே, ஸப்³ப³த்தி²கம் வதா³மீ’’’தி.

‘‘கல்லோஸி, ப⁴ந்தே நாக³ஸேனா’’தி.

ஸதிலக்க²ணபஞ்ஹோ தேரஸமோ.