524. ஸங்க²பாலஜாதகம் (4)

143. ‘‘அரியாவகாஸோஸி பஸன்னனேத்தோ, மஞ்ஞே ப⁴வம் பப்³ப³ஜிதோ குலம்ஹா;

கத²ம் நு வித்தானி பஹாய போ⁴கே³, பப்³ப³ஜி நிக்க²ம்ம க⁴ரா ஸபஞ்ஞ’’ [ஸபஞ்ஞோ (ஸ்யா.), ஸபஞ்ஞா (பீ.)].

144. ‘‘ஸயம் விமானம் நரதே³வ தி³ஸ்வா, மஹானுபா⁴வஸ்ஸ மஹோரக³ஸ்ஸ;

தி³ஸ்வான புஞ்ஞான மஹாவிபாகம், ஸத்³தா⁴யஹம் பப்³ப³ஜிதோம்ஹி ராஜ’’.

145. ‘‘ந காமகாமா ந ப⁴யா ந தோ³ஸா, வாசம் முஸா பப்³ப³ஜிதா ப⁴ணந்தி;

அக்கா²ஹி மே புச்சி²தோ ஏதமத்த²ம், ஸுத்வான மே ஜாயிஹிதிப்பஸாதோ³’’.

146. ‘‘வாணிஜ்ஜ [வணிஜ்ஜ (பீ.)] ரட்டா²தி⁴ப க³ச்ச²மானோ, பதே² அத்³த³ஸாஸிம்ஹி போ⁴ஜபுத்தே [மிலாசபுத்தே (ஸீ. பீ.)];

பவத்³த⁴காயம் உரக³ம் மஹந்தம், ஆதா³ய க³ச்ச²ந்தே பமோத³மானே’’.

147. ‘‘ஸோஹம் ஸமாக³ம்ம ஜனிந்த³ தேஹி, பஹட்ட²லோமோ அவசம்ஹி பீ⁴தோ;

குஹிம் அயம் நீயதி [நிய்யதி (க.)] பீ⁴மகாயோ, நாகே³ன கிம் காஹத² போ⁴ஜபுத்தா.

148. ‘‘நாகோ³ அயம் நீயதி போ⁴ஜனத்தா² [போ⁴ஜனத்த²ம் (ஸீ. ஸ்யா. பீ.)], பவத்³த⁴காயோ உரகோ³ மஹந்தோ;

ஸாது³ஞ்ச தூ²லஞ்ச முது³ஞ்ச மம்ஸம், ந த்வம் ரஸஞ்ஞாஸி விதே³ஹபுத்த.

149. ‘‘இதோ மயம் க³ந்த்வா ஸகம் நிகேதம் [நிகேதனம் (பீ.)], ஆதா³ய ஸத்தா²னி விகோபயித்வா;

மம்ஸானி போ⁴க்கா²ம [ப⁴க்கா²ம (ஸ்யா.)] பமோத³மானா, மயஞ்ஹி வே ஸத்தவோ பன்னகா³னம்.

150. ‘‘ஸசே அயம் நீயதி போ⁴ஜனத்தா², பவத்³த⁴காயோ உரகோ³ மஹந்தோ;

த³தா³மி வோ ப³லிப³த்³தா³னி [ப³லிவத்³தா³னி (பீ.)] ஸோளஸ, நாக³ம் இமம் முஞ்சத² ப³ந்த⁴னஸ்மா.

151. ‘‘அத்³தா⁴ ஹி நோ ப⁴க்கோ² அயம் மனாபோ, ப³ஹூ ச நோ உரகா³ பு⁴த்தபுப்³பா³ [ப³ஹும் ச நோ உரகோ³ பு⁴த்தபுப்³போ³ (க.)];

கரோம தே தம் வசனம் அளார [ஆளார (க.) ஏவமுபரிபி], மித்தஞ்ச நோ ஹோஹி விதே³ஹபுத்த.

152. ‘‘தத³ஸ்ஸு தே ப³ந்த⁴னா மோசயிம்ஸு, யம் நத்து²தோ படிமோக்கஸ்ஸ பாஸே;

முத்தோ ச ஸோ ப³ந்த⁴னா நாக³ராஜா, பக்காமி பாசீனமுகோ² முஹுத்தம்.

153. ‘‘க³ந்த்வான பாசீனமுகோ² முஹுத்தம், புண்ணேஹி நேத்தேஹி பலோகயீ மம்;

ததா³ஸ்ஸஹம் பிட்டி²தோ அன்வக³ச்சி²ம், த³ஸங்கு³லிம் அஞ்ஜலிம் பக்³க³ஹேத்வா.

154. ‘‘க³ச்சே²வ கோ² த்வம் தரமானரூபோ, மா தம் அமித்தா புனரக்³க³ஹேஸும்;

து³க்கோ² ஹி லுத்³தே³ஹி புனா ஸமாக³மோ, அத³ஸ்ஸனம் போ⁴ஜபுத்தான க³ச்ச².

155. ‘‘அக³மாஸி ஸோ ரஹத³ம் விப்பஸன்னம், நீலோபா⁴ஸம் ரமணீயம் ஸுதித்த²ம்;

ஸமோததம் [ஸமோனதம் (ஸ்யா. க.)] ஜம்பு³ஹி வேதஸாஹி, பாவேக்கி² நித்திண்ணப⁴யோ பதீதோ.

156. ‘‘ஸோ தம் பவிஸ்ஸ ந சிரஸ்ஸ நாகோ³, தி³ப்³பே³ன மே பாதுரஹும் ஜனிந்த³;

உபட்ட²ஹீ மம் பிதரம்வ புத்தோ, ஹத³யங்க³மம் கண்ணஸுக²ம் ப⁴ணந்தோ.

157. ‘‘த்வம் மேஸி மாதா ச பிதா [பிதா ச (பீ.)] அளார, அப்³ப⁴ந்தரோ பாணத³தோ³ ஸஹாயோ;

ஸகஞ்ச இத்³தி⁴ம் படிலாப⁴கோஸ்மி [படிலாபி⁴தோஸ்மி (பீ.)], அளார பஸ்ஸ மே நிவேஸனானி;

பஹூதப⁴க்க²ம் ப³ஹுஅன்னபானம், மஸக்கஸாரம் விய வாஸவஸ்ஸ’’.

158. ‘‘தம் பூ⁴மிபா⁴கே³ஹி உபேதரூபம், அஸக்க²ரா சேவ முதூ³ ஸுபா⁴ ச;

நீசத்திணா [நீசா திணா (ஸ்யா. பீ.)] அப்பரஜா ச பூ⁴மி, பாஸாதி³கா யத்த² ஜஹந்தி ஸோகம்.

159. ‘‘அனாவகுலா வேளுரியூபனீலா, சதுத்³தி³ஸம் அம்ப³வனம் ஸுரம்மம்;

பக்கா ச பேஸீ ச ப²லா ஸுபு²ல்லா, நிச்சோதுகா தா⁴ரயந்தீ ப²லானி.

160. ‘‘தேஸம் வனானம் நரதே³வ மஜ்ஜே², நிவேஸனம் ப⁴ஸ்ஸரஸன்னிகாஸம்;

ரஜதக்³க³ளம் ஸோவண்ணமயம் உளாரம், ஓபா⁴ஸதீ விஜ்ஜுரிவந்தலிக்கே².

161. ‘‘மணீமயா ஸோண்ணமயா [ஸோவண்ணமயா (ஸீ. ஸ்யா. பீ.)] உளாரா, அனேகசித்தா ஸததம் ஸுனிம்மிதா;

பரிபூரா கஞ்ஞாஹி அலங்கதாபி⁴, ஸுவண்ணகாயூரத⁴ராஹி ராஜ.

162. ‘‘ஸோ ஸங்க²பாலோ தரமானரூபோ, பாஸாத³மாருய்ஹ அனோமவண்ணோ;

ஸஹஸ்ஸத²ம்ப⁴ம் அதுலானுபா⁴வம், யத்த²ஸ்ஸ ப⁴ரியா மஹேஸீ அஹோஸி.

163. ‘‘ஏகா ச நாரீ தரமானரூபா, ஆதா³ய வேளுரியமயம் மஹக்³க⁴ம்;

ஸுப⁴ம் மணிம் ஜாதிமந்தூபபன்னம், அசோதி³தா ஆஸனமப்³பி⁴ஹாஸி.

164. ‘‘ததோ மம் உரகோ³ ஹத்தே² க³ஹேத்வா, நிஸீத³யீ பாமுக²ஆஸனஸ்மிம்;

இத³மாஸனம் அத்ர ப⁴வம் நிஸீத³து, ப⁴வஞ்ஹி மே அஞ்ஞதரோ க³ரூனம்.

165. ‘‘அஞ்ஞா ச நாரீ தரமானரூபா, ஆதா³ய வாரிம் உபஸங்கமித்வா;

பாதா³னி பக்கா²லயீ மே ஜனிந்த³, ப⁴ரியாவ [ப⁴ரியா ச (பீ.)] ப⁴த்தூ பதினோ பியஸ்ஸ.

166. ‘‘அபரா ச நாரீ தரமானரூபா, பக்³க³ய்ஹ ஸோவண்ணமயாய [ஸோவண்ணமயா (பீ.)] பாதியா;

அனேகஸூபம் விவித⁴ம் வியஞ்ஜனம், உபனாமயீ ப⁴த்த மனுஞ்ஞரூபம்.

167. ‘‘துரியேஹி [தூரியேஹி (க.)] மம் பா⁴ரத பு⁴த்தவந்தம், உபட்ட²ஹும் ப⁴த்து மனோ விதி³த்வா;

ததுத்தரிம் [தது³த்தரிம் (க.)] மம் நிபதீ மஹந்தம், தி³ப்³பே³ஹி காமேஹி அனப்பகேஹி.

168. ‘‘ப⁴ரியா மமேதா திஸதா அளார, ஸப்³ப³த்தமஜ்ஜா² பது³முத்தராபா⁴;

அளார ஏதாஸ்ஸு தே காமகாரா, த³தா³மி தே தா பரிசாரயஸ்ஸு.

169. ‘‘ஸம்வச்ச²ரம் தி³ப்³ப³ரஸானுபு⁴த்வா, ததா³ஸ்ஸுஹம் [தத³ஸ்ஸஹம் (பீ.)] உத்தரிமஜ்ஜ²பா⁴ஸிம் [உத்தரி பச்சபா⁴ஸிம் (ஸீ. ஸ்யா.), உத்தரிம் பச்சபா⁴ஸிம் (பீ.)];

நாக³ஸ்ஸித³ம் கிந்தி கத²ஞ்ச லத்³த⁴ம், கத²ஜ்ஜ²க³மாஸி விமானஸேட்ட²ம்’’.

170. ‘‘அதி⁴ச்ச லத்³த⁴ம் பரிணாமஜம் தே, ஸயம்கதம் உதா³ஹு தே³வேஹி தி³ன்னம்;

புச்சா²மி தம் [தே (பீ.)] நாக³ராஜேதமத்த²ம், கத²ஜ்ஜ²க³மாஸி விமானஸேட்ட²ம்’’.

171. ‘‘நாதி⁴ச்ச லத்³த⁴ம் ந பரிணாமஜம் மே, ந ஸயம்கதம் நாபி தே³வேஹி தி³ன்னம்;

ஸகேஹி கம்மேஹி அபாபகேஹி, புஞ்ஞேஹி மே லத்³த⁴மித³ம் விமானம்’’.

172. ‘‘கிம் தே வதம் கிம் பன ப்³ரஹ்மசரியம், கிஸ்ஸ ஸுசிண்ணஸ்ஸ அயம் விபாகோ;

அக்கா²ஹி மே நாக³ராஜேதமத்த²ம், கத²ம் நு தே லத்³த⁴மித³ம் விமானம்’’.

173. ‘‘ராஜா அஹோஸிம் மக³தா⁴னமிஸ்ஸரோ, து³ய்யோத⁴னோ நாம மஹானுபா⁴வோ;

ஸோ இத்தரம் ஜீவிதம் ஸம்விதி³த்வா, அஸஸ்ஸதம் விபரிணாமத⁴ம்மம்.

174. ‘‘அன்னஞ்ச பானஞ்ச பஸன்னசித்தோ, ஸக்கச்ச தா³னம் விபுலம் அதா³ஸிம் [அதா³ஸி (பீ.)];

ஓபானபூ⁴தம் மே க⁴ரம் ததா³ஸி, ஸந்தப்பிதா ஸமணப்³ராஹ்மணா ச.

175. [அயம் கா³தா² பீ. போத்த²கே நத்தி²] ‘‘மாலஞ்ச க³ந்த⁴ஞ்ச விலேபனஞ்ச, பதீ³பியம் [பதீ³பயம் (ஸ்யா. க.)] யானமுபஸ்ஸயஞ்ச;

அச்சா²த³னம் ஸேய்யமத²ன்னபானம், ஸக்கச்ச தா³னானி அத³ம்ஹ தத்த² [அயம் கா³தா² பீ. போத்த²கே நத்தி²].

176. ‘‘தம் மே வதம் தம் பன ப்³ரஹ்மசரியம், தஸ்ஸ ஸுசிண்ணஸ்ஸ அயம் விபாகோ;

தேனேவ மே லத்³த⁴மித³ம் விமானம், பஹூதப⁴க்க²ம் ப³ஹுஅன்னபானம்’’;

‘‘நச்சேஹி கீ³தேஹி சுபேதரூபம், சிரட்டி²திகம் ந ச ஸஸ்ஸதாயம்.

177. ‘‘அப்பானுபா⁴வா தம் மஹானுபா⁴வம், தேஜஸ்ஸினம் ஹந்தி அதேஜவந்தோ;

கிமேவ தா³டா²வுத⁴ கிம் படிச்ச, ஹத்த²த்த [ஹத்த²த்த² (ஸீ. ஸ்யா. பீ.)] மாக³ச்சி² வனிப்³ப³கானம் [வணிப்³ப³கானம் (ஸீ.)].

178. ‘‘ப⁴யம் நு தே அன்வக³தம் மஹந்தம், தேஜோ நு தே நான்வக³ம் த³ந்தமூலம்;

கிமேவ தா³டா²வுத⁴ கிம் படிச்ச, கிலேஸமாபஜ்ஜி வனிப்³ப³கானம்’’.

179. ‘‘ந மே ப⁴யம் அன்வக³தம் மஹந்தம், தேஜோ ந ஸக்கா மம தேஹி ஹந்தும் [தேபி⁴ஹந்தும் (ஸ்யா. க.)];

ஸதஞ்ச த⁴ம்மானி ஸுகித்திதானி, ஸமுத்³த³வேலாவ து³ரச்சயானி.

180. ‘‘சாதுத்³த³ஸிம் பஞ்சத³ஸிம் அளார, உபோஸத²ம் நிச்சமுபாவஸாமி;

அதா²க³மும் ஸோளஸ போ⁴ஜபுத்தா, ரஜ்ஜும் க³ஹேத்வான த³ள்ஹஞ்ச பாஸம்.

181. ‘‘பே⁴த்வான நாஸம் அதிகஸ்ஸ [அந்தகஸ்ஸ (க.)] ரஜ்ஜும், நயிம்ஸு மம் ஸம்பரிக³ய்ஹ லுத்³தா³;

ஏதாதி³ஸம் து³க்க²மஹம் திதிக்க²ம் [திதிக்கி²ம் (பீ.)], உபோஸத²ம் அப்படிகோபயந்தோ’’.

182. ‘‘ஏகாயனே தம் பதே² அத்³த³ஸம்ஸு, ப³லேன வண்ணேன சுபேதரூபம்;

ஸிரியா பஞ்ஞாய ச பா⁴விதோஸி, கிம் பத்த²யம் [கிமத்தி²யம் (ஸீ. ஸ்யா. பீ.)] நாக³ தபோ கரோஸி.

183. ‘‘ந புத்தஹேதூ ந த⁴னஸ்ஸ ஹேது, ந ஆயுனோ சாபி அளார ஹேது;

மனுஸ்ஸயோனிம் அபி⁴பத்த²யானோ, தஸ்மா பரக்கம்ம தபோ கரோமி’’.

184. ‘‘த்வம் லோஹிதக்கோ² விஹதந்தரம்ஸோ, அலங்கதோ கப்பிதகேஸமஸ்ஸு;

ஸுரோஸிதோ லோஹிதசந்த³னேன, க³ந்த⁴ப்³ப³ராஜாவ தி³ஸா பபா⁴ஸஸி [பபா⁴ஸி (க.)].

185. ‘‘தே³வித்³தி⁴பத்தோஸி மஹானுபா⁴வோ, ஸப்³பே³ஹி காமேஹி ஸமங்கி³பூ⁴தோ;

புச்சா²மி தம் நாக³ராஜேதமத்த²ம், ஸேய்யோ இதோ கேன மனுஸ்ஸலோகோ’’.

186. ‘‘அளார நாஞ்ஞத்ர மனுஸ்ஸலோகா, ஸுத்³தீ⁴ வ ஸம்விஜ்ஜதி ஸம்யமோ வா;

அஹஞ்ச லத்³தா⁴ன மனுஸ்ஸயோனிம், காஹாமி ஜாதிமரணஸ்ஸ அந்தம்’’.

187. ‘‘ஸம்வச்ச²ரோ மே வஸதோ [வுஸிதோ (பீ.)] தவந்திகே, அன்னேன பானேன உபட்டி²தோஸ்மி;

ஆமந்தயித்வான பலேமி நாக³, சிரப்பவுட்டோ²ஸ்மி [சிரப்பவுத்தோ² அஸ்மி (பீ.)] அஹம் ஜனிந்த³’’.

188. ‘‘புத்தா ச தா³ரா அனுஜீவினோ ச [ச’நுஜீவினோ (ஸ்யா. பீ.)], நிச்சானுஸிட்டா² உபதிட்ட²தே தம்;

கச்சின்னு தம் நாபி⁴ஸபித்த² [நாபி⁴ஸம்ஸித்த² (ஸ்யா. பீ.)] கோசி, பியஞ்ஹி மே த³ஸ்ஸனம் துய்ஹம் [துய்ஹ (பீ.)] அளார’’.

189. ‘‘யதா²பி மாதூ ச பிதூ அகா³ரே, புத்தோ பியோ படிவிஹிதோ வஸேய்ய [ஸேய்யோ (பீ.)];

ததோபி மய்ஹம் இத⁴மேவ ஸேய்யோ, சித்தஞ்ஹி தே நாக³ மயீ பஸன்னம்’’.

190. ‘‘மணீ மமம் விஜ்ஜதி லோஹிதங்கோ [லோஹிதங்கோ³ (க.)], த⁴னாஹரோ மணிரதனம் உளாரம்;

ஆதா³ய த்வம் [தம் (பீ.)] க³ச்ச² ஸகம் நிகேதம், லத்³தா⁴ த⁴னம் தம் மணிமோஸ்ஸஜஸ்ஸு’’.

191. ‘‘தி³ட்டா² மயா மானுஸகாபி காமா, அஸஸ்ஸதா விபரிணாமத⁴ம்மா;

ஆதீ³னவம் காமகு³ணேஸு தி³ஸ்வா, ஸத்³தா⁴யஹம் பப்³ப³ஜிதோம்ஹி ராஜ.

192. ‘‘து³மப்ப²லானீவ பதந்தி மாணவா, த³ஹரா ச வுத்³தா⁴ ச ஸரீரபே⁴தா³;

ஏதம்பி தி³ஸ்வா பப்³ப³ஜிதோம்ஹி ராஜ, அபண்ணகம் ஸாமஞ்ஞமேவ ஸேய்யோ’’.

193. ‘‘அத்³தா⁴ ஹவே ஸேவிதப்³பா³ ஸபஞ்ஞா, ப³ஹுஸ்ஸுதா யே ப³ஹுடா²னசிந்தினோ;

நாக³ஞ்ச ஸுத்வான தவஞ்சளார, காஹாமி புஞ்ஞானி அனப்பகானி’’.

194. ‘‘அத்³தா⁴ ஹவே ஸேவிதப்³பா³ ஸபஞ்ஞா, ப³ஹுஸ்ஸுதா யே ப³ஹுடா²னசிந்தினோ;

நாக³ஞ்ச ஸுத்வான மமஞ்ச ராஜ, கரோஹி புஞ்ஞானி அனப்பகானீ’’தி.

ஸங்க²பாலஜாதகம் சதுத்த²ம்.