பட²மகா³தா²ஸங்க³ணிகம்

ஸத்தனக³ரேஸு பஞ்ஞத்தஸிக்கா²பத³வண்ணனா

335. ஏகம்ஸம் சீவரம் கத்வாதி ஏகஸ்மிம் அம்ஸகூடே சீவரம் கத்வா; ஸாது⁴கம் உத்தராஸங்க³ம் கத்வாதி அத்தோ². பக்³க³ண்ஹித்வான அஞ்ஜலிந்தி த³ஸனக²ஸமோதா⁴னஸமுஜ்ஜலம் அஞ்ஜலிம் உக்கி²பித்வா. ஆஸீஸமானரூபோ வாதி பச்சாஸீஸமானரூபோ விய. கிஸ்ஸ த்வம் இத⁴ மாக³தோதி கேன காரணேன கிமத்த²ம் பத்த²யமானோ த்வம் இத⁴ ஆக³தோ. கோ ஏவமாஹ? ஸம்மாஸம்பு³த்³தோ⁴. கம் ஏவமாஹ? ஆயஸ்மந்தம் உபாலிம். இதி ஆயஸ்மா உபாலி ப⁴க³வந்தம் உபஸங்கமித்வா ‘‘த்³வீஸு வினயேஸூ’’தி இமம் கா³த²ம் புச்சி². அத²ஸ்ஸ ப⁴க³வா ‘‘ப⁴த்³த³கோ தே உம்மங்கோ³’’திஆதீ³னி வத்வா தம் விஸ்ஸஜ்ஜேஸி. ஏஸ நயோ ஸப்³ப³த்த². இதி இமே ஸப்³ப³பஞ்ஹே பு³த்³த⁴காலே உபாலித்தே²ரோ புச்சி². ப⁴க³வா ப்³யாகாஸி. ஸங்கீ³திகாலே பன மஹாகஸ்ஸபத்தே²ரோ புச்சி². உபாலித்தே²ரோ ப்³யாகாஸி.

தத்த² ப⁴த்³த³கோ தே உம்மங்கோ³தி ப⁴த்³த³கா தே பஞ்ஹா; பஞ்ஹா ஹி அவிஜ்ஜந்த⁴காரதோ உம்முஜ்ஜித்வா டி²தத்தா ‘‘உம்மங்கோ³’’தி வுச்சதி. தக்³கா⁴தி காரணத்தே² நிபாதோ. யஸ்மா மம் புச்ச²ஸி, தஸ்மா தே அஹமக்கி²ஸ்ஸந்தி அத்தோ². ஸம்படிச்ச²னத்தே² வா, ‘‘தக்³கா⁴’’தி ஹி இமினா வசனம் ஸம்படிச்சி²த்வா அக்கி²ஸ்ஸந்தி ஆஹ. ‘‘ஸமாத³ஹித்வா விஸிப்³பே³ந்தி, ஸாமிஸேன, ஸஸித்த²க’’ந்தி இமானி தீணியேவ ஸிக்கா²பதா³னி ப⁴க்³கே³ஸு பஞ்ஞத்தானி.

சதுவிபத்திவண்ணனா

336. யம் தம் புச்சி²ம்ஹாதி யம் த்வம் அபுச்சி²ம்ஹா. அகித்தயீதி அபா⁴ஸி. நோதி அம்ஹாகம். தம் தம் ப்³யாகதந்தி யம் யம் புட்ட²ம், தம் ததே³வ ப்³யாகதம். அனஞ்ஞதா²தி அஞ்ஞதா² அகத்வா ப்³யாகதம்.

யே து³ட்டு²ல்லா ஸா ஸீலவிபத்தீதி ஏத்த² கிஞ்சாபி ஸீலவிபத்தி நாம பஞ்ஹே நத்தி², அத² கோ² து³ட்டு²ல்லம் விஸ்ஸஜ்ஜேதுகாமதாயேதம் வுத்தம். சதூஸு ஹி விபத்தீஸு து³ட்டு²ல்லம் ஏகாய விபத்தியா ஸங்க³ஹிதம், அது³ட்டு²ல்லம் தீஹி விபத்தீஹி ஸங்க³ஹிதம். தஸ்மா ‘‘யே து³ட்டு²ல்லா ஸா ஸீலவிபத்தீ’’தி வத்வா தமேவ வித்தா²ரதோ த³ஸ்ஸேதும் ‘‘பாராஜிகம் ஸங்கா⁴தி³ஸேஸோ ஸீலவிபத்தீதி வுச்சதீ’’தி ஆஹ.

இதா³னி திஸ்ஸன்னம் விபத்தீனம் வஸேன அது³ட்டு²ல்லம் த³ஸ்ஸேதும் ‘‘து²ல்லச்சய’’ந்திஆதி³மாஹ. தத்த² யோ சாயம், அக்கோஸதி ஹஸாதி⁴ப்பாயோதி இத³ம் து³ப்³பா⁴ஸிதஸ்ஸ வத்து²த³ஸ்ஸனத்த²ம் வுத்தம்.

அப்³பா⁴சிக்க²ந்தீதி ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமீ’’தி வத³ந்தா அப்³பா⁴சிக்க²ந்தி.

அயம் ஸா ஆஜீவவிபத்திஸம்மதாதி அயம் ச²ஹி ஸிக்கா²பதே³ஹி ஸங்க³ஹிதா ஆஜீவவிபத்தி நாம சதுத்தா² விபத்தி ஸம்மதாதி ஏத்தாவதா ‘‘அது³ட்டு²ல்ல’’ந்தி இத³ம் விஸ்ஸஜ்ஜிதம் ஹோதி.

இதா³னி ‘‘யே ச யாவததியகா’’தி பஞ்ஹம் விஸ்ஸஜ்ஜேதும் ‘‘ஏகாத³ஸா’’திஆதி³மாஹ.

சே²த³னகாதி³வண்ணனா

337. யஸ்மா பன ‘‘யே ச யாவததியகா’’தி அயம் பஞ்ஹோ ‘‘ஏகாத³ஸ யாவததியகா’’தி ஏவம் ஸங்கா²வஸேன விஸ்ஸஜ்ஜிதோ, தஸ்மா ஸங்கா²னுஸந்தி⁴வஸேனேவ ‘‘கதி சே²த³னகானீ’’திஆதி³கே அஞ்ஞே அந்தராபஞ்ஹே புச்சி². தேஸம் விஸ்ஸஜ்ஜனத்த²ம் ‘‘ச² சே²த³னகானீ’’திஆதி³ வுத்தம். தத்த² ‘‘ஏகம் பே⁴த³னகம், ஏகம் உத்³தா³லனகம், ஸோத³ஸ ஜானந்தி பஞ்ஞத்தா’’தி இத³மேவ அபுப்³ப³ம். ஸேஸம் மஹாவக்³கே³ விப⁴த்தமேவ. யம் பனேதம் அபுப்³ப³ம் தத்த² ஏகம் பே⁴த³னகந்தி ஸூசிக⁴ரம். ஏகம் உத்³தா³லனகந்தி தூலோனத்³த⁴மஞ்சபீட²ம். ஸோத³ஸாதி ஸோளஸ. ஜானந்தி பஞ்ஞத்தாதி ‘‘ஜான’’ந்தி ஏவம் வத்வா பஞ்ஞத்தா, தே ஏவம் வேதி³தப்³பா³ – ‘‘ஜானம் ஸங்கி⁴கம் லாப⁴ம் பரிணதம் அத்தனோ பரிணாமேய்ய, ஜானம் புப்³பு³பக³தம் பி⁴க்கு²ம் அனுபக²ஜ்ஜ நிஸஜ்ஜம் கப்பேய்ய, ஜானம் ஸப்பாணகம் உத³கம் திணம் வா மத்திகம் வா ஸிஞ்சேய்ய வா ஸிஞ்சாபேய்ய வா, ஜானம் பி⁴க்கு²னிபரிபாசிதம் பிண்ட³பாதம் பு⁴ஞ்ஜேய்ய, ஜானம் ஆஸாத³னாபேக்கோ² பு⁴த்தஸ்மிம் பாசித்தியம், ஜானம் ஸப்பாணகம் உத³கம் பரிபு⁴ஞ்ஜேய்ய, ஜானம் யதா²த⁴ம்மம் நிஹதாதி⁴கரணம், ஜானம் து³ட்டு²ல்லம் ஆபத்திம் படிச்சா²தே³ய்ய, ஜானம் ஊனவீஸதிவஸ்ஸம் புக்³க³லம் உபஸம்பாதே³ய்ய, ஜானம் தே²ய்யஸத்தே²ன ஸத்³தி⁴ம், ஜானம் ததா²வாதி³னா பி⁴க்கு²னா அகதானுத⁴ம்மேன, ஜானம் ததா²னாஸிதம் ஸமணுத்³தே³ஸம், ஜானம் ஸங்கி⁴கம் லாப⁴ம் பரிணதம் புக்³க³லஸ்ஸ பரிணாமேய்ய, ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவ அத்தனா படிசோதே³ய்ய, ஜானம் சோரிம் வஜ்ஜ²ம் விதி³தம் அனபலோகேத்வா, ஜானம் ஸபி⁴க்கு²கம் ஆராமம் அனாபுச்சா² பவிஸேய்யா’’தி.

அஸாதா⁴ரணாதி³வண்ணனா

338. இதா³னி ‘‘ஸாதா⁴ரணம் அஸாதா⁴ரண’’ந்தி இமம் புரிமபஞ்ஹம் விஸ்ஸஜ்ஜேந்தோ ‘‘வீஸம் த்³வே ஸதானீ’’திஆதி³மாஹ. தத்த² பி⁴க்கு²னீஹி அஸாதா⁴ரணேஸு ச² ஸங்கா⁴தி³ஸேஸாதி விஸ்ஸட்டி², காயஸம்ஸக்³கோ³, து³ட்டு²ல்லம், அத்தகாம, குடி, விஹாரோதி. த்³வே அனியதேஹி அட்டா²தி த்³வீஹி அனியதேஹி ஸத்³தி⁴ம் அட்ட² இமே.

நிஸ்ஸக்³கி³யானி த்³வாத³ஸாதி –

தோ⁴வனஞ்ச படிக்³க³ஹோ, கோஸேய்யஸுத்³த⁴த்³வேபா⁴கா³;

ச²ப்³ப³ஸ்ஸானி நிஸீத³னம், த்³வே லோமா பட²மோ பத்தோ;

வஸ்ஸிகா ஆரஞ்ஞகேன சாதி – இமே த்³வாத³ஸ.

த்³வேவீஸதி கு²த்³த³காதி –

ஸகலோ பி⁴க்கு²னீவக்³கோ³, பரம்பரஞ்ச போ⁴ஜனம்;

அனதிரித்தம் அபி⁴ஹடம், பணீதஞ்ச அசேலகம்;

ஊனம் து³ட்டு²ல்லசா²த³னம்.

மாதுகா³மேன ஸத்³தி⁴ஞ்ச, யா ச அனிக்க²ந்தராஜகே;

ஸந்தம் பி⁴க்கு²ம் அனாபுச்சா², விகாலே கா³மப்பவேஸனா.

நிஸீத³னே ச யா ஸிக்கா², வஸ்ஸிகா யா ச ஸாடிகா;

த்³வாவீஸதி இமா ஸிக்கா², கு²த்³த³கேஸு பகாஸிதாதி.

பி⁴க்கூ²ஹி அஸாதா⁴ரணேஸுபி ஸங்க⁴ம்ஹா த³ஸ நிஸ்ஸரேதி ‘‘ஸங்க⁴ம்ஹா நிஸ்ஸாரீயதீ’’தி ஏவம் விப⁴ங்கே³ வுத்தா, மாதிகாயம் பன ‘‘நிஸ்ஸாரணீயம் ஸங்கா⁴தி³ஸேஸ’’ந்தி ஏவம் ஆக³தா த³ஸ. நிஸ்ஸக்³கி³யானி த்³வாத³ஸாதி பி⁴க்கு²னிவிப⁴ங்கே³ விப⁴த்தானி நிஸ்ஸக்³கி³யானேவ. கு²த்³த³காபி தத்த² விப⁴த்தகு²த்³த³கா ஏவ. ததா² சத்தாரோ பாடிதே³ஸனீயா, இதி ஸதஞ்சேவ திம்ஸஞ்ச ஸிக்கா² விப⁴ங்கே³ பி⁴க்கு²னீனம் பி⁴க்கூ²ஹி அஸாதா⁴ரணா. ஸேஸம் இமஸ்மிம் ஸாதா⁴ரணாஸாதா⁴ரணவிஸ்ஸஜ்ஜனே உத்தானமேவ.

இதா³னி விபத்தியோ ச ‘‘யேஹி ஸமதே²ஹி ஸம்மந்தீ’’தி இத³ம் பஞ்ஹம் விஸ்ஸஜ்ஜேந்தோ அட்டே²வ பாராஜிகாதிஆதி³மாஹ. தத்த² து³ராஸதா³தி இமினா தேஸம் ஸப்படிப⁴யதம் த³ஸ்ஸேதி. கண்ஹஸப்பாத³யோ விய ஹி ஏதே து³ராஸதா³ து³ரூபக³மனா து³ராஸஜ்ஜனா, ஆபஜ்ஜியமானா மூலச்சே²தா³ய ஸம்வத்தந்தி. தாலவத்து²ஸமூபமாதி ஸப்³ப³ம் தாலம் உத்³த⁴ரித்வா தாலஸ்ஸ வத்து²மத்தகரணேன ஸமூபமா. யதா² வத்து²மத்தகதோ தாலோ ந புன பாகதிகோ ஹோதி, ஏவம் ந புன பாகதிகா ஹோந்தி.

ஏவம் ஸாதா⁴ரணம் உபமம் த³ஸ்ஸேத்வா புன ஏகேகஸ்ஸ வுத்தம் உபமம் த³ஸ்ஸேந்தோ பண்டு³பலாஸோதிஆதி³மாஹ. அவிருள்ஹீ ப⁴வந்தி தேதி யதா² ஏதே பண்டு³பலாஸாத³யோ புனஹரிதாதி³பா⁴வேன அவிருள்ஹித⁴ம்மா ஹோந்தி; ஏவம் பாராஜிகாபி புன பகதிஸீலாபா⁴வேன அவிருள்ஹித⁴ம்மா ஹோந்தீதி அத்தோ². ஏத்தாவதா ‘‘விபத்தியோ ச யேஹி ஸமதே²ஹி ஸம்மந்தீ’’தி ஏத்த² இமா தாவ அட்ட² பாராஜிகவிபத்தியோ கேஹிசி ஸமதே²ஹி ந ஸம்மந்தீதி ஏவம் த³ஸ்ஸிதம் ஹோதி. யா பன விபத்தியோ ஸம்மந்தி, தா த³ஸ்ஸேதும் தேவீஸதி ஸங்கா⁴தி³ஸேஸாதிஆதி³ வுத்தம். தத்த² தீஹி ஸமதே²ஹீதி ஸப்³ப³ஸங்கா³ஹிகவசனமேதம். ஸங்கா⁴தி³ஸேஸா ஹி த்³வீஹி ஸமதே²ஹி ஸம்மந்தி, ந திணவத்தா²ரகேன. ஸேஸா தீஹிபி ஸம்மந்தி.

த்³வே உபோஸதா² த்³வே பவாரணாதி இத³ம் பி⁴க்கூ²னஞ்ச பி⁴க்கு²னீனஞ்ச வஸேன வுத்தம். விப⁴த்திமத்தத³ஸ்ஸனேனேவ சேதம் வுத்தம், ந ஸமதே²ஹி வூபஸமனவஸேன. பி⁴க்கு²உபோஸதோ², பி⁴க்கு²னிஉபோஸதோ², பி⁴க்கு²பவாரணா, பி⁴க்கு²னிபவாரணாதி இமாபி ஹி சதஸ்ஸோ விப⁴த்தியோ; விப⁴ஜனானீதி அத்தோ². சத்தாரி கம்மானீதி அத⁴ம்மேனவக்³கா³தீ³னி உபோஸத²கம்மானி. பஞ்சேவ உத்³தே³ஸா சதுரோ ப⁴வந்தி அனஞ்ஞதா²தி பி⁴க்கூ²னம் பஞ்ச உத்³தே³ஸா பி⁴க்கு²னீனம் சதுரோ ப⁴வந்தி, அஞ்ஞதா² ந ப⁴வந்தி; இமா அபராபி விப⁴த்தியோ. ஆபத்திக்க²ந்தா⁴ ச ப⁴வந்தி ஸத்த, அதி⁴கரணானி சத்தாரீதி இமா பன விப⁴த்தியோ ஸமதே²ஹி ஸம்மந்தி, தஸ்மா ஸத்தஹி ஸமதே²ஹீதிஆதி³மாஹ. அத² வா ‘‘த்³வே உபோஸதா² த்³வே பவாரணா சத்தாரி கம்மானி பஞ்சேவ உத்³தே³ஸா சதுரோ ப⁴வந்தி, அனஞ்ஞதா²’’தி இமாபி சதஸ்ஸோ விப⁴த்தியோ நிஸ்ஸாய ‘‘நஸ்ஸந்தேதே வினஸ்ஸந்தேதே’’திஆதி³னா நயேன யா ஆபத்தியோ ஆபஜ்ஜந்தி, தா யஸ்மா வுத்தப்பகாரேஹேவ ஸமதே²ஹி ஸம்மந்தி, தஸ்மா தம்மூலகானம் ஆபத்தீனம் ஸமத²த³ஸ்ஸனத்த²ம்பி தா விப⁴த்தியோ வுத்தாதி வேதி³தப்³பா³. கிச்சம் ஏகேனாதி கிச்சாதி⁴கரணம் ஏகேன ஸமதே²ன ஸம்மதி.

பாராஜிகாதி³ஆபத்திவண்ணனா

339. ஏவம் புச்சா²னுக்கமேன ஸப்³ப³பஞ்ஹே விஸ்ஸஜ்ஜேத்வா இதா³னி ‘‘ஆபத்திக்க²ந்தா⁴ ச ப⁴வந்தி ஸத்தா’’தி ஏத்த² ஸங்க³ஹிதஆபத்திக்க²ந்தா⁴னம் பச்சேகம் நிப்³ப³சனமத்தம் த³ஸ்ஸேந்தோ பாராஜிகந்திஆதி³மாஹ. தத்த² பாராஜிகந்தி கா³தா²ய அயமத்தோ² – யதி³த³ம் புக்³க³லாபத்திஸிக்கா²பத³பாராஜிகேஸு ஆபத்திபாராஜிகம் நாம வுத்தம், தம் ஆபஜ்ஜந்தோ புக்³க³லோ யஸ்மா பராஜிதோ பராஜயமாபன்னோ ஸத்³த⁴ம்மா சுதோ பரத்³தோ⁴ ப⁴ட்டோ² நிரங்கதோ ச ஹோதி, அனிஹதே தஸ்மிம் புக்³க³லே புன உபோஸத²ப்பவாரணாதி³பே⁴தோ³ ஸம்வாஸோ நத்தி². தேனேதம் இதி வுச்சதீதி தேன காரணேன ஏதம் ஆபத்திபாராஜிகந்தி வுச்சதி. அயஞ்ஹேத்த² ஸங்கே²பத்தோ² – யஸ்மா பராஜிதோ ஹோதி தேன, தஸ்மா ஏதம் பாராஜிகந்தி வுச்சதி.

து³தியகா³தா²யபி ப்³யஞ்ஜனம் அனாதி³யித்வா அத்த²மத்தமேவ த³ஸ்ஸேதும் ஸங்கோ⁴வ தே³தி பரிவாஸந்திஆதி³ வுத்தம். அயம் பனேத்த² அத்தோ² – இமம் ஆபத்திம் ஆபஜ்ஜித்வா வுட்டா²துகாமஸ்ஸ யம் தம் ஆபத்திவுட்டா²னம் தஸ்ஸ ஆதி³ம்ஹி சேவ பரிவாஸதா³னத்தா²ய ஆதி³தோ ஸேஸே மஜ்ஜே² மானத்ததா³னத்தா²ய மூலாயபடிகஸ்ஸனேன வா ஸஹ மானத்ததா³னத்தா²ய, அவஸானே அப்³பா⁴னத்தா²ய ச ஸங்கோ⁴ இச்சி²தப்³போ³, ந ஹேத்த² ஏகம்பி கம்மம் வினா ஸங்கே⁴ன ஸக்கா காதுந்தி ஸங்கோ⁴, ஆதி³ம்ஹி சேவ ஸேஸே ச இச்சி²தப்³போ³ அஸ்ஸாதி ஸங்கா⁴தி³ஸேஸோ.

ததியகா³தா²ய அனியதோ ந நியதோதி யஸ்மா ந நியதோ, தஸ்மா அனியதோ அயமாபத்திக்க²ந்தோ⁴தி அத்தோ². கிம் காரணா ந நியதோதி? அனேகம்ஸிகதம் பத³ம், யஸ்மா இத³ம் ஸிக்கா²பத³ம் அனேகம்ஸேன கதந்தி அத்தோ². கத²ம் அனேகம்ஸேன? திண்ணமஞ்ஞதரம் டா²னம், திண்ணம் த⁴ம்மானம் அஞ்ஞதரேன காரேதப்³போ³தி ஹி தத்த² வுத்தம், தஸ்மா ‘‘அனியதோ’’தி பவுச்சதி, ஸோ ஆபத்திக்க²ந்தோ⁴ அனியதோதி வுச்சதி. யதா² ச திண்ணம் அஞ்ஞதரம் டா²னம், ஏவம் த்³வின்னம் த⁴ம்மானம் அஞ்ஞதரம் டா²னம் யத்த² வுத்தம், ஸோபி அனியதோ ஏவ.

சதுத்த²கா³தா²ய அச்சயோ தேன ஸமோ நத்தீ²தி தே³ஸனாகா³மினீஸு அச்சயேஸு தேன ஸமோ தூ²லோ அச்சயோ நத்தி², தேனேதம் இதி வுச்சதி; தூ²லத்தா அச்சயஸ்ஸ ஏதம் து²ல்லச்சயந்தி வுச்சதீதி அத்தோ².

பஞ்சமகா³தா²ய நிஸ்ஸஜ்ஜித்வான தே³ஸேதி தேனேதந்தி நிஸ்ஸஜ்ஜித்வா தே³ஸேதப்³ப³தோ நிஸ்ஸக்³கி³யந்தி வுச்சதீதி அத்தோ².

ச²ட்ட²கா³தா²ய பாதேதி குஸலம் த⁴ம்மந்தி ஸஞ்சிச்ச ஆபஜ்ஜந்தஸ்ஸ குஸலத⁴ம்மஸங்கா²தம் குஸலசித்தம் பாதேதி, தஸ்மா பாதேதி சித்தந்தி பாசித்தியம். யம் பன சித்தம் பாதேதி, தம் யஸ்மா அரியமக்³க³ம் அபரஜ்ஜ²தி, சித்தஸம்மோஹகாரணஞ்ச ஹோதி, தஸ்மா ‘‘அரியமக்³க³ம் அபரஜ்ஜ²தி, சித்தஸம்மோஹனட்டா²ன’’ந்தி ச வுத்தம்.

பாடிதே³ஸனீயகா³தா²ஸு ‘‘கா³ரய்ஹம் ஆவுஸோ த⁴ம்மம் ஆபஜ்ஜி’’ந்தி வுத்தகா³ரய்ஹபா⁴வகாரணத³ஸ்ஸனத்த²மேவ பி⁴க்கு² அஞ்ஞாதகோ ஸந்தோதிஆதி³ வுத்தம். படிதே³ஸேதப்³ப³தோ பன ஸா ஆபத்தி பாடிதே³ஸனீயாதி வுச்சதி.

து³க்கடகா³தா²ய அபரத்³த⁴ம் விரத்³த⁴ஞ்ச க²லிதந்தி ஸப்³ப³மேதம் ‘‘யஞ்ச து³க்கட’’ந்தி ஏத்த² வுத்தஸ்ஸ து³க்கடஸ்ஸ பரியாயவசனம். யஞ்ஹி து³ட்டு² கதம் விரூபம் வா கதம், தம் து³க்கடம். தம் பனேதம் யதா² ஸத்தா²ரா வுத்தம்; ஏவம் அகதத்தா அபரத்³த⁴ம், குஸலம் விரஜ்ஜி²த்வா பவத்தத்தா விரத்³த⁴ம், அரியவத்தபடிபத³ம் அனாருள்ஹத்தா க²லிதம். யம் மனுஸ்ஸோ கரேதி இத³ம் பனஸ்ஸ ஓபம்மனித³ஸ்ஸனம். தஸ்ஸத்தோ² – யதா² ஹி யம் லோகே மனுஸ்ஸோ ஆவி வா யதி³ வா ரஹோ பாபம் கரோதி, தம் து³க்கடந்தி பவேதே³ந்தி; ஏவமித³ம்பி பு³த்³த⁴ப்படிகுட்டே²ன லாமகபா⁴வேன பாபம், தஸ்மா து³க்கடந்தி வேதி³தப்³ப³ம்.

து³ப்³பா⁴ஸிதகா³தா²ய து³ப்³பா⁴ஸிதம் து³ராப⁴ட்ட²ந்தி து³ட்டு² ஆப⁴ட்ட²ம் பா⁴ஸிதம் லபிதந்தி து³ராப⁴ட்ட²ம். யம் து³ராப⁴ட்ட²ம், தம் து³ப்³பா⁴ஸிதந்தி அத்தோ². கிஞ்ச பி⁴ய்யோ? ஸம்கிலிட்ட²ஞ்ச யம் பத³ம், ஸம்கிலிட்ட²ம் யஸ்மா தம் பத³ம் ஹோதீதி அத்தோ². ததா² யஞ்ச விஞ்ஞூ க³ரஹந்தி, யஸ்மா ச நம் விஞ்ஞூ க³ரஹந்தீதி அத்தோ². தேனேதம் இதி வுச்சதீதி தேன ஸம்கிலிட்ட²பா⁴வேன ச விஞ்ஞுக³ரஹனேனாபி ச ஏதம் இதி வுச்சதி; ‘‘து³ப்³பா⁴ஸித’’ந்தி ஏவம் வுச்சதீதி அத்தோ².

ஸேகி²யகா³தா²ய ‘‘ஆதி³ சேதம் சரணஞ்சா’’திஆதி³னா நயேன ஸேக²ஸ்ஸ ஸந்தகபா⁴வம் தீ³பேதி. தஸ்மா ஸேக²ஸ்ஸ இத³ம் ஸேகி²யந்தி அயமேத்த² ஸங்கே²பத்தோ². இத³ம் ‘‘க³ருகலஹுகஞ்சாபீ’’திஆதி³பஞ்ஹேஹி அஸங்க³ஹிதஸ்ஸ ‘‘ஹந்த³ வாக்யம் ஸுணோம தே’’தி இமினா பன ஆயாசனவசனேன ஸங்க³ஹிதஸ்ஸ அத்த²ஸ்ஸ தீ³பனத்த²ம் வுத்தந்தி வேதி³தப்³ப³ம்.

ச²ன்னமதிவஸ்ஸதீதிஆதி³ம்ஹிபி ஏஸேவ நயோ. தத்த² ச²ன்னமதிவஸ்ஸதீதி கே³ஹம் தாவ திணாதீ³ஹி அச்ச²ன்னம் அதிவஸ்ஸதி. இத³ம் பன ஆபத்திஸங்கா²தம் கே³ஹம் ச²ன்னம் அதிவஸ்ஸதி; மூலாபத்திஞ்ஹி சா²தே³ந்தோ அஞ்ஞம் நவம் ஆபத்திம் ஆபஜ்ஜதி. விவடம் நாதிவஸ்ஸதீதி கே³ஹம் தாவ அவிவடம் ஸுச்ச²ன்னம் நாதிவஸ்ஸதி. இத³ம் பன ஆபத்திஸங்கா²தம் கே³ஹம் விவடம் நாதிவஸ்ஸதி; மூலாபத்திஞ்ஹி விவரந்தோ தே³ஸனாகா³மினிம் தே³ஸேத்வா வுட்டா²னகா³மினிதோ வுட்ட²ஹித்வா ஸுத்³த⁴ந்தே பதிட்டா²தி. ஆயதிம் ஸம்வரந்தோ அஞ்ஞம் ஆபத்திம் நாபஜ்ஜதி. தஸ்மா ச²ன்னம் விவரேதா²தி தேன காரணேன தே³ஸனாகா³மினிம் தே³ஸேந்தோ வுட்டா²னகா³மினிதோ ச வுட்ட²ஹந்தோ ச²ன்னம் விவரேத². ஏவம் தம் நாதிவஸ்ஸதீதி ஏவஞ்சேதம் விவடம் நாதிவஸ்ஸதீதி அத்தோ².

க³தி மிகா³னம் பவனந்தி அஜ்ஜோ²காஸே ப்³யக்³கா⁴தீ³ஹி பரிபாதியமானானம் மிகா³னம் பவனம் ருக்கா²தி³க³ஹனம் அரஞ்ஞம் க³தி படிஸரணம் ஹோதி, தம் பத்வா தே அஸ்ஸாஸந்தி. ஏதேனேவ நயேன ஆகாஸோ பக்கீ²னம் க³தி. அவஸ்ஸம் உபக³மனட்டே²ன பன விப⁴வோ க³தி த⁴ம்மானம், ஸப்³பே³ஸம்பி ஸங்க²தத⁴ம்மானம் வினாஸோவ தேஸம் க³தி. ந ஹி தே வினாஸம் அக³ச்ச²ந்தா டா²தும் ஸக்கோந்தி. ஸுசிரம்பி ட²த்வா பன நிப்³பா³னம் அரஹதோ க³தி, கீ²ணாஸவஸ்ஸ அரஹதோ அனுபாதி³ஸேஸனிப்³பா³னதா⁴து ஏகம்ஸேன க³தீதி அத்தோ².

பட²மகா³தா²ஸங்க³ணிகவண்ணனா நிட்டி²தா.