நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

வினயபிடகே

பரிவார-அட்ட²கதா²

ஸோளஸமஹாவாரோ

பஞ்ஞத்திவாரவண்ணனா

விஸுத்³த⁴பரிவாரஸ்ஸ, பரிவாரோதி ஸாஸனே;

த⁴ம்மக்க²ந்த⁴ஸரீரஸ்ஸ, க²ந்த⁴கானம் அனந்தரா.

ஸங்க³ஹம் யோ ஸமாருள்ஹோ, தஸ்ஸ புப்³பா³க³தம் நயம்;

ஹித்வா தா³னி கரிஸ்ஸாமி, அனுத்தானத்த²வண்ணனம்.

1. தத்த² யம் தேன ப⁴க³வதா…பே… பஞ்ஞத்தந்தி ஆதி³னயப்பவத்தாய தாவ புச்சா²ய அயம் ஸங்கே²பத்தோ² – யோ ஸோ ப⁴க³வா ஸாஸனஸ்ஸ சிரட்டி²திகத்த²ம் த⁴ம்மஸேனாபதினா ஸத்³த⁴ம்மகா³ரவப³ஹுமானவேக³ஸமுஸ்ஸிதம் அஞ்ஜலிம் ஸிரஸ்மிம் பதிட்டா²பேத்வா யாசிதோ த³ஸ அத்த²வஸே படிச்ச வினயபஞ்ஞத்திம் பஞ்ஞபேஸி, தேன ப⁴க³வதா தஸ்ஸ தஸ்ஸ ஸிக்கா²பத³ஸ்ஸ பஞ்ஞத்திகாலம் ஜானதா, தஸ்ஸா தஸ்ஸா ஸிக்கா²பத³பஞ்ஞத்தியா த³ஸ அத்த²வஸே பஸ்ஸதா; அபிச புப்³பே³னிவாஸாதீ³ஹி ஜானதா, தி³ப்³பே³ன சக்கு²னா பஸ்ஸதா, தீஹி விஜ்ஜாஹி ச²ஹி வா பன அபி⁴ஞ்ஞாஹி ஜானதா, ஸப்³ப³த்த² அப்படிஹதேன ஸமந்தசக்கு²னா பஸ்ஸதா, ஸப்³ப³த⁴ம்மஜானனஸமத்தா²ய பஞ்ஞாய ஜானதா, ஸப்³ப³ஸத்தானம் சக்கு²விஸயாதீதானி திரோகுட்டாதி³க³தானி சாபி ரூபானி அதிவிஸுத்³தே⁴ன மம்ஸசக்கு²னா ச பஸ்ஸதா, அத்தஹிதஸாதி⁴காய ஸமாதி⁴பத³ட்டா²னாய படிவேத⁴பஞ்ஞாய ஜானதா, பரஹிதஸாதி⁴காய கருணாபத³ட்டா²னாய தே³ஸனாபஞ்ஞாய பஸ்ஸதா, அரஹதா ஸம்மாஸம்பு³த்³தே⁴ன ‘‘யம் பட²மம் பாராஜிகம் பஞ்ஞத்தம், தம் கத்த² பஞ்ஞத்தம், கம் ஆரப்³ப⁴ பஞ்ஞத்தம், கிஸ்மிம் வத்து²ஸ்மிம் பஞ்ஞத்தம், அத்தி² தத்த² பஞ்ஞத்தி…பே… கேனாப⁴த’’ந்தி.

2. புச்சா²விஸ்ஸஜ்ஜனே பன ‘‘யம் தேன ப⁴க³வதா ஜானதா பஸ்ஸதா அரஹதா ஸம்மாஸம்பு³த்³தே⁴ன பட²மம் பாராஜிக’’ந்தி இத³ம் கேவலம் புச்சா²ய ஆக³தஸ்ஸ ஆதி³பத³ஸ்ஸ பச்சுத்³த⁴ரணமத்தமேவ, ‘‘கத்த² பஞ்ஞத்தந்தி வேஸாலியா பஞ்ஞத்தம்; கம் ஆரப்³பா⁴தி ஸுதி³ன்னம் கலந்த³புத்தம் ஆரப்³பா⁴’’தி ஏவமாதி³னா பன நயேன புனபி ஏத்த² ஏகேகம் பத³ம் புச்சி²த்வாவ விஸ்ஸஜ்ஜிதம். ஏகா பஞ்ஞத்தீதி ‘‘யோ பன பி⁴க்கு² மேது²னம் த⁴ம்மம் படிஸேவேய்ய பாராஜிகோ ஹோதி அஸம்வாஸோ’’தி அயம் ஏகா பஞ்ஞத்தி. த்³வே அனுபஞ்ஞத்தியோதி ‘‘அந்தமஸோ திரச்சா²னக³தாயபீ’’தி ச, ‘‘ஸிக்க²ம் அபச்சக்கா²யா’’தி ச மக்கடிவஜ்ஜிபுத்தகவத்தூ²னம் வஸேன வுத்தா – இமா த்³வே அனுபஞ்ஞத்தியோ. ஏத்தாவதா ‘‘அத்தி² தத்த² பஞ்ஞத்தி அனுபஞ்ஞத்தி அனுப்பன்னபஞ்ஞத்தீ’’தி இமிஸ்ஸா புச்சா²ய த்³வே கோட்டா²ஸா விஸ்ஸஜ்ஜிதா ஹோந்தி. ததியம் விஸ்ஸஜ்ஜேதும் பன ‘‘அனுப்பன்னபஞ்ஞத்தி தஸ்மிம் நத்தீ²’’தி வுத்தம். அயஞ்ஹி அனுப்பன்னபஞ்ஞத்தி நாம அனுப்பன்னே தோ³ஸே பஞ்ஞத்தா; ஸா அட்ட²க³ருத⁴ம்மவஸேன பி⁴க்கு²னீனம்யேவ ஆக³தா, அஞ்ஞத்ர நத்தி². தஸ்மா வுத்தம் ‘‘அனுப்பன்னபஞ்ஞத்தி தஸ்மிம் நத்தீ²’’தி. ஸப்³ப³த்த²பஞ்ஞத்தீதி மஜ்ஜி²மதே³ஸே சேவ பச்சந்திமஜனபதே³ஸு ச ஸப்³ப³த்த²பஞ்ஞத்தி. வினயத⁴ரபஞ்சமேன க³ணேன ‘‘உபஸம்பதா³, கு³ணங்கு³ணூபாஹனா, து⁴வனஹானம், சம்மத்த²ரண’’ந்தி இமானி ஹி சத்தாரி ஸிக்கா²பதா³னி மஜ்ஜி²மதே³ஸேயேவ பஞ்ஞத்தி. ஏத்தே²வ ஏதேஹி ஆபத்தி ஹோதி, ந பச்சந்திமஜனபதே³ஸு. ஸேஸானி ஸப்³பா³னேவ ஸப்³ப³த்த²பஞ்ஞத்தி நாம.

ஸாதா⁴ரணபஞ்ஞத்தீதி பி⁴க்கூ²னஞ்சேவ பி⁴க்கு²னீனஞ்ச ஸாதா⁴ரணபஞ்ஞத்தி; ஸுத்³த⁴பி⁴க்கூ²னமேவ ஹி ஸுத்³த⁴பி⁴க்கு²னீனம் வா பஞ்ஞத்தம் ஸிக்கா²பத³ம் அஸாதா⁴ரணபஞ்ஞத்தி நாம ஹோதி. இத³ம் பன பி⁴க்கு²ம் ஆரப்³ப⁴ உப்பன்னே வத்து²ஸ்மிம் ‘‘யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்ய, அந்தமஸோ திரச்சா²னக³தேனபி பாராஜிகா ஹோதி அஸம்வாஸா’’தி பி⁴க்கு²னீனம்பி பஞ்ஞத்தம், வினீதகதா²மத்தமேவ ஹி தாஸம் நத்தி², ஸிக்கா²பத³ம் பன அத்தி², தேன வுத்தம் ‘‘ஸாதா⁴ரணபஞ்ஞத்தீ’’தி. உப⁴தோபஞ்ஞத்தியம்பி ஏஸேவ நயோ. ப்³யஞ்ஜனமத்தமேவ ஹி ஏத்த² நானம், பி⁴க்கூ²னம் பி⁴க்கு²னீனம்பி ஸாதா⁴ரணத்தா ஸாதா⁴ரணபஞ்ஞத்தி, உபி⁴ன்னம்பி பஞ்ஞத்தத்தா உப⁴தோபஞ்ஞத்தீதி. அத்தே² பன பே⁴தோ³ நத்தி².

நிதா³னோக³த⁴ந்தி ‘‘யஸ்ஸ ஸியா ஆபத்தி ஸோ ஆவிகரேய்யா’’தி ஏத்த² ஸப்³பா³பத்தீனம் அனுபவிட்ட²த்தா நிதா³னோக³த⁴ம்; நிதா³னே அனுபவிட்ட²ந்தி அத்தோ². து³தியேன உத்³தே³ஸேனாதி நிதா³னோக³த⁴ம் நிதா³னபரியாபன்னம்பி ஸமானம் ‘‘தத்ரிமே சத்தாரோ பாராஜிகா த⁴ம்மா’’திஆதி³னா து³தியேனேவ உத்³தே³ஸேன உத்³தே³ஸம் ஆக³ச்ச²தி. சதுன்னம் விபத்தீனந்தி ஸீலவிபத்திஆதீ³னம். பட²மா ஹி த்³வே ஆபத்திக்க²ந்தா⁴ ஸீலவிபத்தி நாம, அவஸேஸா பஞ்ச ஆசாரவிபத்தி நாம. மிச்சா²தி³ட்டி² ச அந்தக்³கா³ஹிகதி³ட்டி² ச தி³ட்டி²விபத்தி நாம, ஆஜீவஹேது பஞ்ஞத்தானி ச² ஸிக்கா²பதா³னி ஆஜீவவிபத்தி நாம. இதி இமாஸம் சதுன்னம் விபத்தீனம் இத³ம் பாராஜிகம் ஸீலவிபத்தி நாம ஹோதி.

ஏகேன ஸமுட்டா²னேனாதி த்³வங்கி³கேன ஏகேன ஸமுட்டா²னேன. ஏத்த² ஹி சித்தம் அங்க³ம் ஹோதி, காயேன பன ஆபத்திம் ஆபஜ்ஜதி. தேன வுத்தம் ‘‘காயதோ ச சித்ததோ ச ஸமுட்டா²தீ’’தி. த்³வீஹி ஸமதே²ஹி ஸம்மதீதி ‘‘ஆபன்னோஸீ’’தி ஸம்முகா² புச்சி²யமானோ ‘‘ஆம ஆபன்னோம்ஹீ’’தி படிஜானாதி, தாவதே³வ ப⁴ண்ட³னகலஹவிக்³க³ஹா வூபஸந்தா ஹோந்தி, ஸக்கா ச ஹோதி தம் புக்³க³லம் அபனேத்வா உபோஸதோ² வா பவாரணா வா காதும். இதி ஸம்முகா²வினயேன ச படிஞ்ஞாதகரணேன சாதி த்³வீஹி ஸமதே²ஹி ஸம்மதி, ந ச தப்பச்சயா கோசி உபத்³த³வோ ஹோதி. யம் பன உபரி பஞ்ஞத்திவக்³கே³ ‘‘ந கதமேன ஸமதே²ன ஸம்மதீ’’தி வுத்தம், தம் ஸமத²ம் ஓதாரேத்வா அனாபத்தி காதும் ந ஸக்காதி இமமத்த²ம் ஸந்தா⁴ய வுத்தம்.

பஞ்ஞத்தி வினயோதி ‘‘யோ பன பி⁴க்கூ²’’திஆதி³னா நயேன வுத்தமாதிகா பஞ்ஞத்தி வினயோதி அத்தோ². விப⁴த்தீதி பத³பா⁴ஜனம் வுச்சதி; விப⁴த்தீதி ஹி விப⁴ங்க³ஸ்ஸேவேதம் நாமம். அஸம்வரோதி வீதிக்கமோ. ஸம்வரோதி அவீதிக்கமோ. யேஸம் வத்ததீதி யேஸம் வினயபிடகஞ்ச அட்ட²கதா² ச ஸப்³பா³ பகு³ணாதி அத்தோ². தே தா⁴ரேந்தீதி தே ஏதம் பட²மபாராஜிகம் பாளிதோ ச அத்த²தோ ச தா⁴ரேந்தி; ந ஹி ஸக்கா ஸப்³ப³ம் வினயபிடகம் அஜானந்தேன ஏதஸ்ஸ அத்தோ² ஜானிதுந்தி. கேனாப⁴தந்தி இத³ம் பட²மபாராஜிகம் பாளிவஸேன ச அத்த²வஸேன ச யாவ அஜ்ஜதனகாலம் கேன ஆனீதந்தி. பரம்பராப⁴தந்தி பரம்பராய ஆனீதம்.

3. இதா³னி யாய பரம்பராய ஆனீதம், தம் த³ஸ்ஸேதும் ‘‘உபாலி தா³ஸகோ சேவா’’திஆதி³னா நயேன போராணகேஹி மஹாதே²ரேஹி கா³தா²யோ ட²பிதா. தத்த² யம் வத்தப்³ப³ம், தம் நிதா³னவண்ணனாயமேவ வுத்தம். இமினா நயேன து³தியபாராஜிகாதி³புச்சா²விஸ்ஸஜ்ஜனேஸுபி வினிச்ச²யோ வேதி³தப்³போ³தி.

மஹாவிப⁴ங்கே³ பஞ்ஞத்திவாரவண்ணனா நிட்டி²தா.

கதாபத்திவாராதி³வண்ணனா

157. இதோ பரம் ‘‘மேது²னம் த⁴ம்மம் படிஸேவந்தோ கதி ஆபத்தியோ ஆபஜ்ஜதீ’’தி ஆதி³ப்பபே⁴தோ³ கதாபத்திவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ சதுன்னம் விபத்தீனம் கதி விபத்தியோ ப⁴ஜந்தீ’’தி ஆதி³ப்பபே⁴தோ³ விபத்திவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ஸத்தன்னம் ஆபத்திக்க²ந்தா⁴னம் கதிஹி ஆபத்திக்க²ந்தே⁴ஹி ஸங்க³ஹிதா’’தி ஆதி³ப்பபே⁴தோ³ ஸங்க³ஹவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ச²ன்னம் ஆபத்திஸமுட்டா²னானம் கதிஹி ஸமுட்டா²னேஹி ஸமுட்ட²ஹந்தீ’’தி ஆதி³ப்பபே⁴தோ³ ஸமுட்டா²னவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ சதுன்னம் அதி⁴கரணானம் கதமம் அதி⁴கரண’’ந்தி ஆதி³ப்பபே⁴தோ³ அதி⁴கரணவாரோ, ‘‘மேது²னம் த⁴ம்மம் படிஸேவந்தஸ்ஸ ஆபத்தியோ ஸத்தன்னம் ஸமதா²னம் கதிஹி ஸமதே²ஹி ஸம்மந்தீ’’தி ஆதி³ப்பபே⁴தோ³ ஸமத²வாரோ, தத³னந்தரோ ஸமுச்சயவாரோ சாதி இமே ஸத்த வாரா உத்தானத்தா² ஏவ.

188. ததோ பரம் ‘‘மேது²னம் த⁴ம்மம் படிஸேவனபச்சயா பாராஜிகம் கத்த² பஞ்ஞத்த’’ந்திஆதி³னா நயேன புன பச்சயவஸேன ஏகோ பஞ்ஞத்திவாரோ, தஸ்ஸ வஸேன புரிமஸதி³ஸா ஏவ கதாபத்திவாராத³யோ ஸத்த வாராதி ஏவம் அபரேபி அட்ட² வாரா வுத்தா, தேபி உத்தானத்தா² ஏவ. இதி இமே அட்ட², புரிமா அட்டா²தி மஹாவிப⁴ங்கே³ ஸோளஸ வாரா த³ஸ்ஸிதா. ததோ பரம் தேனேவ நயேன பி⁴க்கு²னிவிப⁴ங்கே³பி ஸோளஸ வாரா ஆக³தாதி ஏவமிமே உப⁴தோவிப⁴ங்கே³ த்³வத்திம்ஸ வாரா பாளினயேனேவ வேதி³தப்³பா³. ந ஹேத்த² கிஞ்சி புப்³பே³ அவினிச்சி²தம் நாம அத்தி².

மஹாவிப⁴ங்கே³ ச பி⁴க்கு²னிவிப⁴ங்கே³ ச

ஸோளஸமஹாவாரவண்ணனா நிட்டி²தா.

ஸமுட்டா²னஸீஸவண்ணனா

257. தத³னந்தராய பன ஸமுட்டா²னகதா²ய அனத்தா இதி நிச்ச²யாதி அனத்தா இதி நிச்சி²தா. ஸபா⁴க³த⁴ம்மானந்தி அனிச்சாகாராதீ³ஹி ஸபா⁴கா³னம் ஸங்க²தத⁴ம்மானம். நாமமத்தம் ந நாயதீதி நாமமத்தம்பி ந பஞ்ஞாயதி. து³க்க²ஹானிந்தி து³க்க²கா⁴தனம். க²ந்த⁴கா யா ச மாதிகாதி க²ந்த⁴கா யா ச மாதிகாதி அத்தோ². அயமேவ வா பாடோ². ஸமுட்டா²னம் நியதோ கதந்தி ஸமுட்டா²னம் நியதோகதம் நியதகதம்; நியதஸமுட்டா²னந்தி அத்தோ². ஏதேன பூ⁴தாரோசனசோரிவுட்டா²பனஅனனுஞ்ஞாதஸிக்கா²பத³த்தயஸ்ஸ ஸங்க³ஹோ பச்சேதப்³போ³. ஏதானேவ ஹி தீணி ஸிக்கா²பதா³னி நியதஸமுட்டா²னானி, அஞ்ஞேஹி ஸத்³தி⁴ம் அஸம்பி⁴ன்னஸமுட்டா²னானி.

ஸம்பே⁴த³ம் நிதா³னஞ்சஞ்ஞந்தி அஞ்ஞம்பி ஸம்பே⁴த³ஞ்ச நிதா³னஞ்ச. தத்த² ஸம்பே⁴த³வசனேன ஸமுட்டா²னஸம்பே⁴த³ஸ்ஸ க³ஹணம் பச்சேதப்³ப³ம், தானி ஹி தீணி ஸிக்கா²பதா³னி ட²பேத்வா ஸேஸானி ஸம்பி⁴ன்னஸமுட்டா²னானி. நிதா³னவசனேன ஸிக்கா²பதா³னம் பஞ்ஞத்திதே³ஸஸங்கா²தம் நிதா³னம் பச்சேதப்³ப³ம். ஸுத்தே தி³ஸ்ஸந்தி உபரீதி ஸிக்கா²பதா³னம் ஸமுட்டா²னனியமோ ஸம்பே⁴தோ³ நிதா³னந்தி இமானி தீணி ஸுத்தம்ஹி ஏவ தி³ஸ்ஸந்தி; பஞ்ஞாயந்தீதி அத்தோ². தத்த² ‘‘ஏகேன ஸமுட்டா²னேன ஸமுட்டா²தி, காயதோ ச சித்ததோ சா’’திஆதி³ம்ஹி தாவ புரிமனயே ஸமுட்டா²னனியமோ ச ஸம்பே⁴தோ³ ச தி³ஸ்ஸந்தி. இதரம் பன நிதா³னம் நாம –

‘‘வேஸாலியா ராஜக³ஹே, ஸாவத்தி²யா ச ஆளவீ;

கோஸம்பி³யா ச ஸக்கேஸு, ப⁴க்³கே³ஸு சேவ பஞ்ஞத்தா’’தி.

ஏவம் உபரி தி³ஸ்ஸதி, பரதோ ஆக³தே ஸுத்தே தி³ஸ்ஸதீதி வேதி³தப்³ப³ம்.

‘‘விப⁴ங்கே³ த்³வீஸூ’’தி கா³தா²ய அயமத்தோ² – யம் ஸிக்கா²பத³ம் த்³வீஸு விப⁴ங்கே³ஸு பஞ்ஞத்தம் உபோஸத²தி³வஸே பி⁴க்கூ² ச பி⁴க்கு²னியோ ச உத்³தி³ஸந்தி, தஸ்ஸ யதா²ஞாயம் ஸமுட்டா²னம் பவக்கா²மி, தம் மே ஸுணாதா²தி.

ஸஞ்சரித்தானுபா⁴ஸனஞ்சாதி ஸஞ்சரித்தஞ்ச ஸமனுபா⁴ஸனஞ்ச. அதிரேகஞ்ச சீவரந்தி அதிரேகசீவரம்; கதி²னந்தி அத்தோ². லோமானி பத³ஸோத⁴ம்மோதி ஏளகலோமானி ச பத³ஸோத⁴ம்மோ ச. பூ⁴தம் ஸம்விதா⁴னேன சாதி பூ⁴தாரோசனஞ்ச ஸம்வித³ஹித்வா அத்³தா⁴னப்படிபஜ்ஜனஞ்ச. தே²ய்யதே³ஸனா சோரிம் சாதி தே²ய்யஸத்தோ² ச ச²த்தபாணிஸ்ஸ அகி³லானஸ்ஸ த⁴ம்மதே³ஸனா ச சோரிவுட்டா²பனஞ்ச. அனனுஞ்ஞாதாய தேரஸாதி மாதாபிதுஸாமிகேஹி அனனுஞ்ஞாதாய ஸத்³தி⁴ம் இமானி தேரஸ ஸமுட்டா²னானி ஹோந்தி. ஸதி³ஸா இத⁴ தி³ஸ்ஸரேதி இத⁴ உப⁴தோவிப⁴ங்கே³ ஏதேஸு தேரஸஸு ஸமுட்டா²னஸீஸேஸு ஏகேகஸ்மிம் அஞ்ஞானிபி ஸதி³ஸானி ஸமுட்டா²னானி தி³ஸ்ஸந்தி.

பட²மபாராஜிகஸமுட்டா²னவண்ணனா

258. இதா³னி தானி த³ஸ்ஸேதும் ‘‘மேது²னம் ஸுக்கஸம்ஸக்³கோ³’’திஆதி³ வுத்தம். தத்த² மேது²னந்தி இத³ம் தாவ பட²மபாராஜிகம் நாம ஏகம் ஸமுட்டா²னஸீஸம், ஸேஸானி தேன ஸதி³ஸானி. தத்த² ஸுக்கஸம்ஸக்³கோ³தி ஸுக்கவிஸ்ஸட்டி² சேவ காயஸம்ஸக்³கோ³ ச. அனியதா பட²மிகாதி பட²மம் அனியதஸிக்கா²பத³ம். புப்³பூ³பபரிபாசிதாதி ‘‘ஜானம் புப்³பூ³பக³தம் பி⁴க்கு²’’ந்தி ஸிக்கா²பத³ஞ்ச பி⁴க்கு²னிபரிபாசிதபிண்ட³பாதஸிக்கா²பத³ஞ்ச. ரஹோ பி⁴க்கு²னியா ஸஹாதி பி⁴க்கு²னியா ஸத்³தி⁴ம் ரஹோ நிஸஜ்ஜஸிக்கா²பத³ஞ்ச.

ஸபோ⁴ஜனே ரஹோ த்³வே சாதி ஸபோ⁴ஜனே குலே அனுபக²ஜ்ஜனிஸஜ்ஜஸிக்கா²பத³ஞ்ச த்³வே ரஹோனிஸஜ்ஜஸிக்கா²பதா³னி ச. அங்கு³லி உத³கே ஹஸந்தி அங்கு³லிபதோத³கஞ்ச உத³கே ஹஸத⁴ம்மஸிக்கா²பத³ஞ்ச. பஹாரே உக்³கி³ரே சேவாதி பஹாரதா³னஸிக்கா²பத³ஞ்ச தலஸத்திகஉக்³கி³ரணஸிக்கா²பத³ஞ்ச. தேபஞ்ஞாஸா ச ஸேகி²யாதி பரிமண்ட³லனிவாஸனாதீ³னி கு²த்³த³கவண்ணனாவஸானே வுத்தானி தேபஞ்ஞாஸ ஸேகி²யஸிக்கா²பதா³னி ச.

அத⁴க்க²கா³மாவஸ்ஸுதாதி பி⁴க்கு²னீனம் அத⁴க்க²கஸிக்கா²பத³ஞ்ச கா³மந்தரக³மனம் அவஸ்ஸுதா அவஸ்ஸுதஸ்ஸ ஹத்த²தோ கா²த³னீயபோ⁴ஜனீயக்³க³ஹணஸிக்கா²பத³ஞ்ச. தலமட்ட²ஞ்ச ஸுத்³தி⁴காதி தலகா⁴தகம் ஜதுமட்ட²ம் உத³கஸுத்³தி⁴காதி³யனஞ்ச. வஸ்ஸம்வுட்டா² ச ஓவாத³ந்தி வஸ்ஸம்வுட்டா² ச²ப்பஞ்சயோஜனானி ஸிக்கா²பத³ஞ்ச ஓவாதா³ய அக³மனஸிக்கா²பத³ஞ்ச. நானுப³ந்தே⁴ பவத்தினிந்தி யா பன பி⁴க்கு²னீ வுட்டா²பிதம் பவத்தினிம் த்³வே வஸ்ஸானி நானுப³ந்தே⁴ய்யாதி வுத்தஸிக்கா²பத³ம்.

இமே ஸிக்கா²தி இமா ஸிக்கா²யோ; லிங்க³விபரியாயோ கதோ. காயமானஸிகா கதாதி காயசித்தஸமுட்டா²னா கதா.

து³தியபாராஜிகஸமுட்டா²னவண்ணனா

259. அதி³ன்னந்தி இத³ம் தாவ அதி³ன்னாதா³னந்தி வா து³தியபாராஜிகந்தி வா ஏகம் ஸமுட்டா²னஸீஸம், ஸேஸானி தேன ஸதி³ஸானி. தத்த² விக்³க³ஹுத்தரீதி மனுஸ்ஸவிக்³க³ஹஉத்தரிமனுஸ்ஸத⁴ம்மஸிக்கா²பதா³னி. து³ட்டு²ல்லா அத்தகாமினந்தி து³ட்டு²ல்லவாசாஅத்தகாமபாரிசரியஸிக்கா²பதா³னி. அமூலா அஞ்ஞபா⁴கி³யாதி த்³வே து³ட்ட²தோ³ஸஸிக்கா²பதா³னி. அனியதா து³தியிகாதி து³தியம் அனியதஸிக்கா²பத³ம்.

அச்சி²ந்தே³ பரிணாமனேதி ஸாமம் சீவரம் த³த்வா அச்சி²ந்த³னஞ்ச ஸங்கி⁴கலாப⁴ஸ்ஸ அத்தனோ பரிணாமனஞ்ச. முஸா ஓமஸபேஸுணாதி முஸாவாதோ³ ச ஓமஸவாதோ³ ச பி⁴க்கு²பேஸுஞ்ஞஞ்ச. து³ட்டு²ல்லா பத²வீக²ணேதி து³ட்டு²ல்லாபத்திஆரோசனஞ்ச பத²வீக²ணஞ்ச. பூ⁴தம் அஞ்ஞாய உஜ்ஜா²பேதி பூ⁴தகா³மஅஞ்ஞவாத³கஉஜ்ஜா²பனகஸிக்கா²பதா³னி.

நிக்கட்³ட⁴னம் ஸிஞ்சனஞ்சாதி விஹாரதோ நிக்கட்³ட⁴னஞ்ச உத³கேன திணாதி³ஸிஞ்சனஞ்ச. ஆமிஸஹேது பு⁴த்தாவீதி ‘‘ஆமிஸஹேது பி⁴க்கு²னியோ ஓவத³ந்தீ’’தி ஸிக்கா²பத³ஞ்ச, பு⁴த்தாவிம் அனதிரித்தேன கா²த³னீயாதி³னா பவாரணாஸிக்கா²பத³ஞ்ச. ஏஹி அனாத³ரி பி⁴ம்ஸாதி ‘‘ஏஹாவுஸோ கா³மம் வா’’தி ஸிக்கா²பத³ஞ்ச, அனாத³ரியஞ்ச பி⁴க்கு²பி⁴ம்ஸாபனகஞ்ச. அபனிதே⁴ ச ஜீவிதந்தி பத்தாதீ³னம் அபனிதா⁴னஸிக்கா²பத³ஞ்ச, ஸஞ்சிச்ச பாணம் ஜீவிதாவோரோபனஞ்ச.

ஜானம் ஸப்பாணகம் கம்மந்தி ஜானம் ஸப்பாணகஉத³கஸிக்கா²பத³ஞ்ச புனகம்மாய உக்கோடனஞ்ச. ஊனஸம்வாஸனாஸனாதி ஊனவீஸதிவஸ்ஸஸிக்கா²பத³ஞ்ச உக்கி²த்தகேன ஸத்³தி⁴ம் ஸம்வாஸஸிக்கா²பத³ஞ்ச நாஸிதகஸாமணேரஸம்போ⁴க³ஸிக்கா²பத³ஞ்ச. ஸஹத⁴ம்மிகம் விலேகா²தி ஸஹத⁴ம்மிகம் வுச்சமானஸிக்கா²பத³ஞ்ச, விலேகா²ய ஸம்வத்தந்தீதி ஆக³தஸிக்கா²பத³ஞ்ச. மோஹோ அமூலகேன சாதி மோஹனகே பாசித்தியஸிக்கா²பத³ஞ்ச, அமூலகேன ஸங்கா⁴தி³ஸேஸேன அனுத்³த⁴ம்ஸனஸிக்கா²பத³ஞ்ச.

குக்குச்சம் த⁴ம்மிகம் சீவரம் த³த்வாதி குக்குச்சஉபத³ஹனஞ்ச, த⁴ம்மிகானம் கம்மானம் ச²ந்த³ம் த³த்வா கீ²யனஞ்ச, சீவரம் த³த்வா கீ²யனஞ்ச. பரிணாமேய்ய புக்³க³லேதி ஸங்கி⁴கம் லாப⁴ம் புக்³க³லஸ்ஸ பரிணாமனஸிக்கா²பத³ம். கிம் தே அகாலம் அச்சி²ந்தே³தி ‘‘கிம் தே அய்யே ஏஸோ புரிஸபுக்³க³லோ கரிஸ்ஸதீ’’தி ஆக³தஸிக்கா²பத³ஞ்ச, ‘‘அகாலசீவரம் காலசீவர’’ந்தி அதி⁴ட்ட²ஹித்வா பா⁴ஜனஸிக்கா²பத³ஞ்ச, பி⁴க்கு²னியா ஸத்³தி⁴ம் சீவரம் பரிவத்தேத்வா அச்சி²ந்த³னஸிக்கா²பத³ஞ்ச. து³க்³க³ஹீ நிரயேன சாதி து³க்³க³ஹிதேன து³ப்பதா⁴ரிதேன பரம் உஜ்ஜா²பனஸிக்கா²பத³ஞ்ச, நிரயேன வா ப்³ரஹ்மசரியேன வா அபி⁴ஸபனஸிக்கா²பத³ஞ்ச.

க³ணம் விப⁴ங்க³ து³ப்³ப³லந்தி ‘‘க³ணஸ்ஸ சீவரலாப⁴ம் அந்தராயம் கரேய்யா’’தி ச ‘‘த⁴ம்மிகம் சீவரவிப⁴ங்க³ம் படிபா³ஹேய்யா’’தி ச ‘‘து³ப்³ப³லசீவரபச்சாஸாய சீவரகாலஸமயம் அதிக்காமேய்யா’’தி ச வுத்தஸிக்கா²பதா³னி. கதி²னா பா²ஸு பஸ்ஸயந்தி ‘‘த⁴ம்மிகம் கதி²னுத்³தா⁴ரம் படிபா³ஹேய்ய, பி⁴க்கு²னியா ஸஞ்சிச்ச அபா²ஸும் கரேய்ய, பி⁴க்கு²னியா உபஸ்ஸயம் த³த்வா குபிதா அனத்தமனா நிக்கட்³டே⁴ய்ய வா’’தி வுத்தஸிக்கா²பதா³னி. அக்கோஸசண்டீ³ மச்ச²ரீதி ‘‘பி⁴க்கு²ம் அக்கோஸேய்ய வா பரிபா⁴ஸேய்ய வா, சண்டி³கதா க³ணம் பரிபா⁴ஸேய்ய, குலே மச்ச²ரினீ அஸ்ஸா’’தி வுத்தஸிக்கா²பதா³னி. க³ப்³பி⁴னிஞ்ச பாயந்தியாதி ‘‘க³ப்³பி⁴னிம் வுட்டா²பேய்ய, பாயந்திம் வுட்டா²பேய்யா’’தி வுத்தஸிக்கா²பதா³னி.

த்³வேவஸ்ஸம் ஸிக்கா² ஸங்கே⁴னாதி ‘‘த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் ஸிக்க²மானம் வுட்டா²பேய்ய, ஸிக்கி²தஸிக்க²ம் ஸிக்க²மானம் ஸங்கே⁴ன அஸம்மதம் வுட்டா²பேய்யா’’தி வுத்தஸிக்கா²பதா³னி. தயோ சேவ கி³ஹீக³தாதி ஊனத்³வாத³ஸவஸ்ஸம் கி³ஹிக³தம், பரிபுண்ணத்³வாத³ஸவஸ்ஸம் கி³ஹிக³தம் ‘‘த்³வே வஸ்ஸானி ச²ஸு த⁴ம்மேஸு அஸிக்கி²தஸிக்க²ம் த்³வே வஸ்ஸானி ஸிக்கி²தஸிக்க²ம் ஸங்கே⁴ன அஸம்மத’’ந்தி வுத்தஸிக்கா²பதா³னி. குமாரிபூ⁴தா திஸ்ஸோதி ‘‘ஊனவீஸதிவஸ்ஸம் குமாரிபூ⁴த’’ந்திஆதி³னா நயேன வுத்தா திஸ்ஸோ. ஊனத்³வாத³ஸஸம்மதாதி ‘‘ஊனத்³வாத³ஸவஸ்ஸா வுட்டா²பேய்ய, பரிபுண்ணத்³வாத³ஸவஸ்ஸா ஸங்கே⁴ன அஸம்மதா வுட்டா²பேய்யா’’தி வுத்தஸிக்கா²பத³த்³வயம்.

அலம் தாவ ஸோகாவாஸந்தி ‘‘அலம் தாவ தே அய்யே வுட்டா²பிதேனா’’தி ச, ‘‘சண்டி³ம் ஸோகாவாஸம் ஸிக்க²மானம் வுட்டா²பேய்யா’’தி ச வுத்தஸிக்கா²பத³த்³வயம். ச²ந்தா³ அனுவஸ்ஸா ச த்³வேதி ‘‘பாரிவாஸிகச²ந்த³தா³னேன ஸிக்க²மானம் வுட்டா²பேய்ய, அனுவஸ்ஸம் வுட்டா²பேய்ய, ஏகம் வஸ்ஸம் த்³வே வுட்டா²பேய்யா’’தி வுத்தஸிக்கா²பத³த்தயம். ஸமுட்டா²னா திகா கதாதி திகஸமுட்டா²னா கதா.

ஸஞ்சரித்தஸமுட்டா²னவண்ணனா

260. ஸஞ்சரீ குடி விஹாரோதி ஸஞ்சரித்தம் ஸஞ்ஞாசிகாய குடிகரணம் மஹல்லகவிஹாரகரணஞ்ச. தோ⁴வனஞ்ச படிக்³க³ஹோதி அஞ்ஞாதிகாய பி⁴க்கு²னியா புராணசீவரதோ⁴வாபனஞ்ச சீவரபடிக்³க³ஹணஞ்ச. விஞ்ஞத்துத்தரி அபி⁴ஹட்டு²ந்தி அஞ்ஞாதகம் க³ஹபதிம் சீவரவிஞ்ஞாபனம் ததுத்தரிஸாதி³யனஸிக்கா²பத³ஞ்ச. உபி⁴ன்னம் தூ³தகேன சாதி ‘‘சீவரசேதாபன்னம் உபக்க²டம் ஹோதீ’’தி ஆக³தஸிக்கா²பத³த்³வயஞ்ச தூ³தேன சீவரசேதாபன்னபஹிதஸிக்கா²பத³ஞ்ச.

கோஸியா ஸுத்³த⁴த்³வேபா⁴கா³, ச²ப்³ப³ஸ்ஸானி நிஸீத³னந்தி ‘‘கோஸியமிஸ்ஸகம் ஸந்த²த’’ந்திஆதீ³னி பஞ்ச ஸிக்கா²பதா³னி. ரிஞ்சந்தி ரூபிகா சேவாதி விப⁴ங்கே³ ‘‘ரிஞ்சந்தி உத்³தே³ஸ’’ந்தி ஆக³தம் ஏளகலோமதோ⁴வாபனம் ரூபியப்படிக்³க³ஹணஸிக்கா²பத³ஞ்ச. உபோ⁴ நானப்பகாரகாதி ரூபியஸம்வோஹாரகயவிக்கயஸிக்கா²பத³த்³வயம்.

ஊனப³ந்த⁴னவஸ்ஸிகாதி ஊனபஞ்சப³ந்த⁴னபத்தஸிக்கா²பத³ஞ்ச வஸ்ஸிகஸாடிகஸிக்கா²பத³ஞ்ச. ஸுத்தம் விகப்பனேன சாதி ஸுத்தம் விஞ்ஞாபேத்வா சீவரவாயாபனஞ்ச தந்தவாயே உபஸங்கமித்வா சீவரே விகப்பாபஜ்ஜனஞ்ச. த்³வாரதா³னஸிப்³பா³னி சாதி யாவ த்³வாரகோஸா அக்³க³ளட்ட²பனாய, ‘‘அஞ்ஞாதிகாய பி⁴க்கு²னியா சீவரம் த³தே³ய்ய, சீவரம் ஸிப்³பே³ய்யா’’தி வுத்தஸிக்கா²பத³த்தயம். பூவபச்சயஜோதி சாதி பூவேஹி வா மந்தே²ஹி வா அபி⁴ஹட்டு²ம் பவாரணாஸிக்கா²பத³ம் சாதுமாஸபச்சயப்பவாரணாஜோதிஸமாத³ஹனஸிக்கா²பதா³னி ச.

ரதனம் ஸூசி மஞ்சோ ச, தூலம் நிஸீத³னகண்டு³ ச, வஸ்ஸிகா ச ஸுக³தேனாதி ரதனஸிக்கா²பத³ஞ்சேவ ஸூசிக⁴ரஸிக்கா²பதா³தீ³னி ச ஸத்த ஸிக்கா²பதா³னி. விஞ்ஞத்தி அஞ்ஞம் சேதாபனா, த்³வே ஸங்கி⁴கா மஹாஜனிகா, த்³வே புக்³க³லலஹுகா க³ரூதி ‘‘யா பன பி⁴க்கு²னீ அஞ்ஞம் விஞ்ஞாபேத்வா அஞ்ஞம் விஞ்ஞாபேய்யா’’திஆதீ³னி நவ ஸிக்கா²பதா³னி. த்³வே விகா⁴ஸா ஸாடிகா சாதி ‘‘உச்சாரம் வா பஸ்ஸாவம் வா ஸங்காரம் வா விகா⁴ஸம் வா திரோகுட்டே வா திரோபாகாரே வா ச²ட்³டே³ய்ய வா ச²ட்³டா³பேய்ய வா, ஹரிதே ச²ட்³டே³ய்ய வா ச²ட்³டா³பேய்ய வா’’தி ஏவம் வுத்தானி த்³வே விகா⁴ஸஸிக்கா²பதா³னி ச உத³கஸாடிகாஸிக்கா²பத³ஞ்ச. ஸமணசீவரேன சாதி ‘‘ஸமணசீவரம் த³தே³ய்யா’’தி இத³மேதம் ஸந்தா⁴ய வுத்தம்.

ஸமனுபா⁴ஸனாஸமுட்டா²னவண்ணனா

261. பே⁴தா³னுவத்தது³ப்³ப³சதூ³ஸது³ட்டு²ல்லதி³ட்டி² சாதி ஸங்க⁴பே⁴தா³னுவத்தகது³ப்³ப³சகுலதூ³ஸகது³ட்டு²ல்லப்படிச்சா²த³னதி³ட்டி²அப்படினிஸ்ஸஜ்ஜனஸிக்கா²பதா³னி. ச²ந்த³ம் உஜ்ஜக்³கி⁴கா த்³வே சாதி ச²ந்த³ம் அத³த்வா க³மனஸிக்கா²பத³ம் உஜ்ஜக்³கி⁴காய அந்தரக⁴ரே க³மனனிஸீத³னஸிக்கா²பத³த்³வயஞ்ச. த்³வே ச ஸத்³தா³தி ‘‘அப்பஸத்³தோ³ அந்தரக⁴ரே க³மிஸ்ஸாமி, நிஸீதி³ஸ்ஸாமீ’’தி ஸிக்கா²பத³த்³வயஞ்ச. ந ப்³யாஹரேதி ‘‘ந ஸகப³ளேன முகே²ன ப்³யாஹரிஸ்ஸாமீ’’தி ஸிக்கா²பத³ம்.

ச²மா நீசாஸனே டா²னம், பச்ச²தோ உப்பதே²ன சாதி ச²மாயம் நிஸீதி³த்வா, நீசே ஆஸனே நிஸீதி³த்வா; டி²தேன நிஸின்னஸ்ஸ, பச்ச²தோ க³ச்ச²ந்தேன புரதோ க³ச்ச²ந்தஸ்ஸ, உப்பதே²ன க³ச்ச²ந்தேன பதே²ன க³ச்ச²ந்தஸ்ஸ த⁴ம்மதே³ஸனாஸிக்கா²பதா³னி. வஜ்ஜானுவத்திக³ஹணாதி வஜ்ஜப்படிச்சா²த³ன, உக்கி²த்தானுவத்தக, ஹத்த²க்³க³ஹணாதி³ஸங்கா²தானி தீணி பாராஜிகானி. ஓஸாரே பச்சாசிக்க²னாதி ‘‘அனபலோகேத்வா காரகஸங்க⁴ம் அனஞ்ஞாய க³ணஸ்ஸ ச²ந்த³ம் ஓஸாரேய்யா’’தி ச ‘‘பு³த்³த⁴ம் பச்சக்கா²மீ’’தி ச வுத்தஸிக்கா²பத³த்³வயம்.

கிஸ்மிம் ஸம்ஸட்டா² த்³வே வதீ⁴தி ‘‘கிஸ்மிஞ்சிதே³வ அதி⁴கரணே பச்சாகதா’’தி ச ‘‘பி⁴க்கு²னியோ பனேவ ஸம்ஸட்டா² விஹரந்தீ’’தி ச ‘‘யா பன பி⁴க்கு²னீ ஏவம் வதே³ய்ய ஸம்ஸட்டா²வ அய்யே தும்ஹே விஹரதா²’’தி ச ‘‘அத்தானம் வதி⁴த்வா வதி⁴த்வா ரோதே³ய்யா’’தி ச வுத்தஸிக்கா²பதா³னி. விஸிப்³பே³ து³க்கி²தாய சாதி ‘‘பி⁴க்கு²னியா சீவரம் விஸிப்³பே³த்வா வா விஸிப்³பா³பேத்வா வா’’தி ச ‘‘து³க்கி²தம் ஸஹஜீவினி’’ந்தி ச வுத்தஸிக்கா²பத³த்³வயம். புன ஸம்ஸட்டா² ந வூபஸமேதி ‘‘ஸம்ஸட்டா² விஹரேய்ய க³ஹபதினா வா க³ஹபதிபுத்தேன வா’’தி ஏவம் புன வுத்தஸம்ஸட்ட²ஸிக்கா²பத³ஞ்ச ‘‘ஏஹய்யே, இமம் அதி⁴கரணம் வூபஸமேஹீ’’தி வுச்சமானா, ‘‘ஸாதூ⁴’’தி படிஸ்ஸுணித்வா ‘‘ஸா பச்சா² அனந்தராயிகினீ நேவ வூபஸம்மேய்யா’’தி வுத்தஸிக்கா²பத³ஞ்ச. ஆராமஞ்ச பவாரணாதி ‘‘ஜானம் ஸபி⁴க்கு²கம் ஆராமம் அனாபுச்சா² பவிஸேய்யா’’தி ச ‘‘உப⁴தோஸங்கே⁴ தீஹி டா²னேஹி ந பவாரேய்யா’’தி ச வுத்தஸிக்கா²பத³த்³வயம்.

அன்வத்³த⁴ம் ஸஹஜீவினிம் த்³வேதி ‘‘அன்வத்³த⁴மாஸம் பி⁴க்கு²னியா பி⁴க்கு²ஸங்க⁴தோ த்³வே த⁴ம்மா பச்சாஸீஸிதப்³பா³’’தி வுத்தஸிக்கா²பத³ஞ்ச, ‘‘ஸஹஜீவினிம் வுட்டா²பேத்வா த்³வே வஸ்ஸானி நேவ அனுக்³க³ண்ஹேய்ய, ஸஹஜீவினிம் வுட்டா²பேத்வா நேவ வூபகாஸேய்யா’’தி வுத்தஸிக்கா²பத³த்³வயஞ்ச. சீவரம் அனுப³ந்த⁴னாதி ‘‘ஸசே மே த்வம், அய்யே, சீவரம் த³ஸ்ஸஸி, ஏவாஹம் தம் வுட்டா²பேஸ்ஸாமீ’’தி ச ‘‘ஸசே மம் த்வம், அய்யே, த்³வே வஸ்ஸானி அனுப³ந்தி⁴ஸ்ஸஸி, ஏவாஹம் தம் வுட்டா²பேஸ்ஸாமீ’’தி ச வுத்தஸிக்கா²பத³த்³வயம்.

கதி²னஸமுட்டா²னவண்ணனா

262. உப்³ப⁴தம் கதி²னம் தீணீதி ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வுத்தானி ஆதி³தோவ தீணி ஸிக்கா²பதா³னி. பட²மம் பத்தபே⁴ஸஜ்ஜந்தி ‘‘த³ஸாஹபரமம் அதிரேகபத்தோ’’தி வுத்தம் பட²மபத்தஸிக்கா²பத³ஞ்ச ‘‘படிஸாயனீயானி பே⁴ஸஜ்ஜானீ’’தி வுத்தஸிக்கா²பத³ஞ்ச. அச்சேகஞ்சாபி ஸாஸங்கந்தி அச்சேகசீவரஸிக்கா²பத³ஞ்ச தத³னந்தரமேவ ஸாஸங்கஸிக்கா²பத³ஞ்ச. பக்கமந்தேன வா து³வேதி ‘‘தம் பக்கமந்தோ நேவ உத்³த⁴ரேய்யா’’தி பூ⁴தகா³மவக்³கே³ வுத்தஸிக்கா²பத³த்³வயம்.

உபஸ்ஸயம் பரம்பராதி ‘‘பி⁴க்கு²னுபஸ்ஸயம் க³ந்த்வா பி⁴க்கு²னியோ ஓவதே³ய்யா’’தி ச ‘‘பரம்பரபோ⁴ஜனே பாசித்திய’’ந்தி ச வுத்தஸிக்கா²பத³த்³வயம். அனதிரித்தம் நிமந்தனாதி ‘‘அனதிரித்தம் கா²த³னீயம் வா போ⁴ஜனீயம் வா’’தி ச ‘‘நிமந்திதோ ஸப⁴த்தோ ஸமானோ’’தி ச வுத்தஸிக்கா²பத³த்³வயம். விகப்பம் ரஞ்ஞோ விகாலேதி ‘‘ஸாமம் சீவரம் விகப்பேத்வா’’தி ச ‘‘ரஞ்ஞோ க²த்தியஸ்ஸா’’தி ச ‘‘விகாலே கா³மம் பவிஸேய்யா’’தி ச வுத்தஸிக்கா²பத³த்தயம். வோஸாஸாரஞ்ஞகேன சாதி ‘‘வோஸாஸமானரூபா டி²தா’’தி ச ‘‘ததா²ரூபேஸு ஆரஞ்ஞகேஸு ஸேனாஸனேஸு புப்³பே³ அப்படிஸம்விதி³த’’ந்தி ச வுத்தஸிக்கா²பத³த்³வயம்.

உஸ்ஸயா ஸன்னிசயஞ்சாதி ‘‘உஸ்ஸயவாதி³கா’’தி ச ‘‘பத்தஸன்னிசயம் கரேய்யா’’தி ச வுத்தஸிக்கா²பத³த்³வயம். புரே பச்சா² விகாலே சாதி ‘‘யா பன பி⁴க்கு²னீ புரேப⁴த்தம் குலானி உபஸங்கமித்வா’’தி ச, ‘‘பச்சா²ப⁴த்தம் குலானி உபஸங்கமித்வா’’தி ச, ‘‘விகாலே குலானி உபஸங்கமித்வா’’தி ச வுத்தஸிக்கா²பத³த்தயம். பஞ்சாஹிகா ஸங்கமனீதி ‘‘பஞ்சாஹிகா ஸங்கா⁴டிசாரம் அதிக்கமேய்யா’’தி ச ‘‘சீவரஸங்கமனீயம் தா⁴ரேய்யா’’தி ச வுத்தஸிக்கா²பத³த்³வயம். த்³வேபி ஆவஸதே²ன சாதி ‘‘ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜேய்ய, ஆவஸத²ம் அனிஸ்ஸஜ்ஜித்வா சாரிகம் பக்கமேய்யா’’தி ச ஏவம் ஆவஸதே²ன ஸத்³தி⁴ம் வுத்தஸிக்கா²பதா³னி ச த்³வே.

பஸாகே² ஆஸனே சேவாதி ‘‘பஸாகே² ஜாதம் க³ண்ட³ம் வா’’தி ச ‘‘பி⁴க்கு²ஸ்ஸ புரதோ அனாபுச்சா² ஆஸனே நிஸீதே³ய்யா’’தி ச வுத்தஸிக்கா²பத³த்³வயம்.

ஏளகலோமஸமுட்டா²னவண்ணனா

263. ஏளகலோமா த்³வே ஸேய்யாதி ஏளகலோமஸிக்கா²பத³ஞ்சேவ த்³வே ச ஸஹஸேய்யஸிக்கா²பதா³னி. ஆஹச்ச பிண்ட³போ⁴ஜனந்தி ஆஹச்சபாத³கஸிக்கா²பத³ஞ்ச ஆவஸத²பிண்ட³போ⁴ஜனஸிக்கா²பத³ஞ்ச. க³ணவிகாலஸன்னிதீ⁴தி க³ணபோ⁴ஜனவிகாலபோ⁴ஜனஸன்னிதி⁴காரகஸிக்கா²பத³த்தயம். த³ந்தபோனேன சேலகாதி த³ந்தபோனஸிக்கா²பத³ஞ்ச அசேலகஸிக்கா²பத³ஞ்ச. உய்யுத்தம் ஸேனம் உய்யோதீ⁴தி ‘‘உய்யுத்தம் ஸேனம் த³ஸ்ஸனாய க³ச்சே²ய்ய, ஸேனாய வஸேய்ய, உய்யோதி⁴கம் வா…பே… அனீகத³ஸ்ஸனம் வா க³ச்சே²ய்யா’’தி வுத்தஸிக்கா²பத³த்தயம். ஸுரா ஓரேன ந்ஹாயனாதி ஸுராபானஸிக்கா²பத³ஞ்ச ஓரேனத்³த⁴மாஸனஹானஸிக்கா²பத³ஞ்ச. து³ப்³ப³ண்ணே த்³வே தே³ஸனிகாதி ‘‘திண்ணம் து³ப்³ப³ண்ணகரணான’’ந்தி வுத்தஸிக்கா²பத³ஞ்ச வுத்தாவஸேஸபாடிதே³ஸனீயத்³வயஞ்ச. லஸுணுபதிட்டே² நச்சனாதி லஸுணஸிக்கா²பத³ம், ‘‘பி⁴க்கு²ஸ்ஸ பு⁴ஞ்ஜந்தஸ்ஸ பானீயேன வா விதூ⁴பனேன வா உபதிட்டே²ய்யா’’தி வுத்தஸிக்கா²பத³ம், ‘‘நச்சம் வா கீ³தம் வா வாதி³தம் வா த³ஸ்ஸனாய க³ச்சே²ய்யா’’தி வுத்தஸிக்கா²பத³ஞ்ச. இதோ பரம் பாளிம் விரஜ்ஜி²த்வா லிக²ந்தி. யதா² பன அத்த²ம் வண்ணயிஸ்ஸாம; ஏவமேத்த² அனுக்கமோ வேதி³தப்³போ³.

ந்ஹானமத்த²ரணம் ஸேய்யாதி ‘‘நக்³கா³ நஹாயேய்ய, ஏகத்த²ரணபாவுரணா துவட்டேய்யும், ஏகமஞ்சே துவட்டேய்யு’’ந்தி வுத்தஸிக்கா²பத³த்தயம். அந்தோரட்டே² ததா² ப³ஹீதி ‘‘அந்தோரட்டே² ஸாஸங்கஸம்மதே, திரோரட்டே² ஸாஸங்கஸம்மதே’’தி வுத்தஸிக்கா²பத³த்³வயம். அந்தோவஸ்ஸம் சித்தாகா³ரந்தி ‘‘அந்தோவஸ்ஸம் சாரிகம் பக்கமேய்ய, ராஜாகா³ரம் வா சித்தாகா³ரம் வா…பே… போக்க²ரணிம் வா த³ஸ்ஸனாய க³ச்சே²ய்யா’’தி ச வுத்தஸிக்கா²பத³த்³வயம். ஆஸந்தி³ம் ஸுத்தகந்தனாதி ‘‘ஆஸந்தி³ம் வா பல்லங்கம் வா பரிபு⁴ஞ்ஜேய்ய, ஸுத்தம் கந்தேய்யா’’தி வுத்தஸிக்கா²பத³த்³வயம்.

வேய்யாவச்சம் ஸஹத்தா² சாதி ‘‘கி³ஹிவேய்யாவச்சம் கரேய்ய, அகா³ரிகஸ்ஸ வா பரிப்³பா³ஜகஸ்ஸ வா பரிப்³பா³ஜிகாய வா ஸஹத்தா² கா²த³னீயம் வா போ⁴ஜனீயம் வா த³தே³ய்யா’’தி வுத்தஸிக்கா²பத³த்³வயம். அபி⁴க்கு²காவாஸேன சாதி ‘‘அபி⁴க்கு²கே ஆவாஸே வஸ்ஸம் வஸேய்யா’’தி இத³மேதம் ஸந்தா⁴ய வுத்தம். ச²த்தம் யானஞ்ச ஸங்கா⁴ணிந்தி ‘‘ச²த்துபாஹனம் தா⁴ரேய்ய, யானேன யாயேய்ய, ஸங்கா⁴ணிம் தா⁴ரேய்யா’’தி வுத்தஸிக்கா²பத³த்தயம். அலங்காரக³ந்த⁴வாஸிதந்தி ‘‘இத்தா²லங்காரம் தா⁴ரேய்ய, க³ந்த⁴சுண்ணகேன நஹாயேய்ய, வாஸிதகேன பிஞ்ஞாகேன நஹாயேய்யா’’தி வுத்தஸிக்கா²பத³த்தயம். பி⁴க்கு²னீதிஆதி³னா ‘‘பி⁴க்கு²னியா உம்மத்³தா³பேய்யா’’திஆதீ³னி சத்தாரி ஸிக்கா²பதா³னி வுத்தானி. அஸங்கச்சிகா ஆபத்தீதி ‘‘அஸங்கச்சிகா கா³மம் பவிஸேய்ய பாசித்திய’’ந்தி ஏவம் வுத்தஆபத்தி ச. சத்தாரீஸா சதுத்தரீதி ஏதானி ஸப்³பா³னிபி சதுசத்தாலீஸ ஸிக்கா²பதா³னி வுத்தானி.

காயேன ந வாசாசித்தேன, காயசித்தேன ந வாசதோதி காயேன சேவ காயசித்தேன ச ஸமுட்ட²ஹந்தி; ந வாசாசித்தேன ந வாசதோதி அத்தோ². த்³விஸமுட்டா²னிகா ஸப்³பே³, ஸமா ஏளகலோமிகாதி இத³ம் உத்தானத்த²மேவ.

பத³ஸோத⁴ம்மஸமுட்டா²னவண்ணனா

264. பத³ஞ்ஞத்ர அஸம்மதாதி ‘‘பத³ஸோ த⁴ம்மம், மாதுகா³மஸ்ஸ உத்தரிச²ப்பஞ்சவாசாஹி த⁴ம்மம் தே³ஸேய்ய, அஞ்ஞத்ர விஞ்ஞுனா புரிஸவிக்³க³ஹேன, அஸம்மதோ பி⁴க்கு²னியோ ஓவதே³ய்யா’’தி வுத்தஸிக்கா²பத³த்தயம். ததா² அத்த²ங்க³தேன சாதி ‘‘அத்த²ங்க³தே ஸூரியே ஓவதே³ய்யா’’தி இத³மேதம் ஸந்தா⁴ய வுத்தம். திரச்சா²னவிஜ்ஜா த்³வேதி ‘‘திரச்சா²னவிஜ்ஜம் பரியாபுணேய்ய, வாசேய்யா’’தி ஏவம் வுத்தஸிக்கா²பத³த்³வயம். அனோகாஸோ ச புச்ச²னாதி ‘‘அனோகாஸகதம் பி⁴க்கு²ம் பஞ்ஹம் புச்சே²ய்யா’’தி இத³மேதம் ஸந்தா⁴ய வுத்தம்.

அத்³தா⁴னஸமுட்டா²னவண்ணனா

265. அத்³தா⁴னனாவம் பணீதந்தி ‘‘பி⁴க்கு²னியா ஸத்³தி⁴ம் ஸம்விதா⁴ய ஏகத்³தா⁴னமக்³க³ம் படிபஜ்ஜேய்ய, ஏகம் நாவம் அபி⁴ருஹேய்ய, பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜேய்யா’’தி வுத்தஸிக்கா²பத³த்தயம். மாதுகா³மேன ஸம்ஹரேதி மாதுகா³மேன ஸத்³தி⁴ம் ஸம்விதா⁴ய க³மனஞ்ச ‘‘ஸம்பா³தே⁴ லோமம் ஸம்ஹராபேய்யா’’தி வுத்தஸிக்கா²பத³ஞ்ச. த⁴ஞ்ஞம் நிமந்திதா சேவாதி ‘‘த⁴ஞ்ஞம் விஞ்ஞாபேத்வா வா’’தி ச ‘‘நிமந்திதா வா பவாரிதா வா கா²த³னீயம் வா போ⁴ஜனீயம் வா கா²தே³ய்ய வா பு⁴ஞ்ஜேய்ய வா’’தி வுத்தஸிக்கா²பத³ஞ்ச. அட்ட² சாதி பி⁴க்கு²னீனம் வுத்தா அட்ட² பாடிதே³ஸனீயா வா.

தே²ய்யஸத்த²ஸமுட்டா²னவண்ணனா

266. தே²ய்யஸத்த²ம் உபஸ்ஸுதீதி தே²ய்யஸத்தே²ன ஸத்³தி⁴ம் ஸம்விதா⁴ய ஏகத்³தா⁴னமக்³க³க³மனஞ்ச உபஸ்ஸுதிதிட்ட²னஞ்ச. ஸூபவிஞ்ஞாபனேன சாதி இத³ம் ஸூபோத³னவிஞ்ஞத்திம் ஸந்தா⁴ய வுத்தம். ரத்திச²ன்னஞ்ச ஓகாஸந்தி ‘‘ரத்தந்த⁴காரே அப்பதீ³பே, படிச்ச²ன்னே ஓகாஸே, அஜ்ஜோ²காஸே புரிஸேன ஸத்³தி⁴’’ந்தி ஏவம் வுத்தஸிக்கா²பத³த்தயம். ப்³யூஹேன ஸத்தமாதி இத³ம் தத³னந்தரமேவ ‘‘ரதி²காய வா ப்³யூஹே வா ஸிங்கா⁴டகே வா புரிஸேன ஸத்³தி⁴’’ந்தி ஆக³தஸிக்கா²பத³ம் ஸந்தா⁴ய வுத்தம்.

த⁴ம்மதே³ஸனாஸமுட்டா²னவண்ணனா

267. த⁴ம்மதே³ஸனாஸமுட்டா²னானி ஏகாத³ஸ உத்தானானேவ. ஏவம் தாவ ஸம்பி⁴ன்னஸமுட்டா²னம் வேதி³தப்³ப³ம். நியதஸமுட்டா²னம் பன திவித⁴ம், தம் ஏகேகஸ்ஸேவ ஸிக்கா²பத³ஸ்ஸ ஹோதி, தம் விஸும்யேவ த³ஸ்ஸேதும் ‘‘பூ⁴தம் காயேன ஜாயதீ’’திஆதி³ வுத்தம், தம் உத்தானமேவ. நேத்தித⁴ம்மானுலோமிகந்தி வினயபாளித⁴ம்மஸ்ஸ அனுலோமந்தி.

ஸமுட்டா²னஸீஸவண்ணனா நிட்டி²தா.

அந்தரபேய்யாலம்

கதிபுச்சா²வாரவண்ணனா

271. இதா³னி ஆபத்திஆதி³கோட்டா²ஸேஸு கோஸல்லஜனனத்த²ம் ‘‘கதி ஆபத்தியோ’’திஆதி³னா நயேன மாதிகம் ட²பேத்வா நித்³தே³ஸப்படினித்³தே³ஸவஸேன விப⁴ங்கோ³ வுத்தோ.

தத்த² கதி ஆபத்தியோதி மாதிகாய ச விப⁴ங்கே³ ச ஆக³தாபத்திபுச்சா². ஏஸ நயோ து³தியபதே³பி. கேவலஞ்ஹேத்த² ஆபத்தியோ ஏவ ராஸிவஸேன க²ந்தா⁴தி வுத்தா. வினீதவத்தூ²னீதி தாஸம் ஆபத்தீனம் வினயபுச்சா²; ‘‘வினீதம் வினயோ வூபஸமோ’’தி இத³ஞ்ஹி அத்த²தோ ஏகம், வினீதானியேவ வினீதவத்தூ²னீதி அயமேத்த² பத³த்தோ². இதா³னி யேஸு ஸதி ஆபத்தியோ ஹோந்தி, அஸதி ந ஹோந்தி, தே த³ஸ்ஸேதும் ‘‘கதி அகா³ரவா’’தி புச்சா²த்³வயம். வினீதவத்தூ²னீதி அயம் பன தேஸம் அகா³ரவானம் வினயபுச்சா². யஸ்மா பன தா ஆபத்தியோ விபத்திம் ஆபத்தா நாம நத்தி², தஸ்மா ‘‘கதி விபத்தியோ’’தி அயம் ஆபத்தீனம் விபத்திபா⁴வபுச்சா². கதி ஆபத்திஸமுட்டா²னானீதி தாஸம்யேவ ஆபத்தீனம் ஸமுட்டா²னபுச்சா². விவாத³மூலானி அனுவாத³மூலானீதி இமா ‘‘விவாதா³தி⁴கரணம் அனுவாதா³தி⁴கரண’’ந்தி ஆக³தானம் விவாதா³னுவாதா³னம் மூலபுச்சா². ஸாரணீயா த⁴ம்மாதி விவாதா³னுவாத³மூலானம் அபா⁴வகரத⁴ம்மபுச்சா². பே⁴த³கரவத்தூ²னீதி அயம் ‘‘பே⁴த³னஸம்வத்தனிகம் வா அதி⁴கரண’’ந்திஆதீ³ஸு வுத்தபே⁴த³கரணபுச்சா². அதி⁴கரணானீதி பே⁴த³கரவத்தூ²ஸு ஸதி உப்பஜ்ஜனத⁴ம்மபுச்சா². ஸமதா²தி தேஸம்யேவ வூபஸமனத⁴ம்மபுச்சா². பஞ்ச ஆபத்தியோதி மாதிகாய ஆக³தவஸேன வுத்தா. ஸத்தாதி விப⁴ங்கே³ ஆக³தவஸேன.

ஆரகா ஏதேஹி ரமதீதி ஆரதி; பு⁴ஸா வா ரதி ஆரதி. வினா ஏதேஹி ரமதீதி விரதி. பச்சேகம் பச்சேகம் விரமதீதி படிவிரதி. வேரம் மணதி வினாஸேதீதி வேரமணீ. ந ஏதாய ஏதே ஆபத்திக்க²ந்தா⁴ கரீயந்தீதி அகிரியா. யம் ஏதாய அஸதி ஆபத்திக்க²ந்த⁴கரணம் உப்பஜ்ஜேய்ய, தஸ்ஸ படிபக்க²தோ அகரணம். ஆபத்திக்க²ந்த⁴அஜ்ஜா²பத்தியா படிபக்க²தோ அனஜ்ஜா²பத்தி. வேலனதோ வேலா; சலயனதோ வினாஸனதோதி அத்தோ². நிய்யானம் ஸினோதி ப³ந்த⁴தி நிவாரேதீதி ஸேது. ஆபத்திக்க²ந்தா⁴னமேதம் அதி⁴வசனம். ஸோ ஸேது ஏதாய பஞ்ஞத்தியா ஹஞ்ஞதீதி ஸேதுகா⁴தோ. ஸேஸவினீதவத்து²னித்³தே³ஸேஸுபி ஏஸேவ நயோ.

பு³த்³தே⁴ அகா³ரவாதீ³ஸு யோ பு³த்³தே⁴ த⁴ரமானே உபட்டா²னம் ந க³ச்ச²தி, பரினிப்³பு³தே சேதியட்டா²னம் போ³தி⁴ட்டா²னம் ந க³ச்ச²தி, சேதியம் வா போ³தி⁴ம் வா ந வந்த³தி, சேதியங்க³ணே ஸச²த்தோ ஸஉபாஹனோ சரதி, நத்தே²தஸ்ஸ பு³த்³தே⁴ கா³ரவோதி வேதி³தப்³போ³. யோ பன ஸக்கோந்தோயேவ த⁴ம்மஸ்ஸவனம் ந க³ச்ச²தி, ஸரப⁴ஞ்ஞம் ந ப⁴ணதி, த⁴ம்மகத²ம் ந கதே²தி, த⁴ம்மஸ்ஸவனக்³க³ம் பி⁴ந்தி³த்வா க³ச்ச²தி, விக்கி²த்தோ வா அனாத³ரோ வா நிஸீத³தி, நத்தே²தஸ்ஸ த⁴ம்மே கா³ரவோ. யோ தே²ரனவமஜ்ஜி²மேஸு சித்தீகாரம் ந பச்சுபட்டா²பேதி, உபோஸதா²கா³ரவிதக்கமாளகாதீ³ஸு காயப்பாக³ப்³பி⁴யம் த³ஸ்ஸேதி, யதா²வுட்³ட⁴ம் ந வந்த³தி, நத்தே²தஸ்ஸ ஸங்கே⁴ கா³ரவோ. திஸ்ஸோ ஸிக்கா² ஸமாதா³ய அஸிக்க²மானோயேவ பன ஸிக்கா²ய அகா³ரவோதி வேதி³தப்³போ³. பமாதே³ ச ஸதிவிப்பவாஸே திட்ட²மானோயேவ அப்பமாத³லக்க²ணம் அப்³ரூஹயமானோ அப்பமாதே³ அகா³ரவோதி வேதி³தப்³போ³. ததா² ஆமிஸப்படிஸந்தா²ரம் த⁴ம்மப்படிஸந்தா²ரந்தி இமம் து³வித⁴ம் படிஸந்தா²ரம் அகரோந்தோயேவ படிஸந்தா²ரே அகா³ரவோதி வேதி³தப்³போ³. கா³ரவனித்³தே³ஸே வுத்தவிபரியாயேன அத்தோ² வேதி³தப்³போ³.

272. விவாத³மூலனித்³தே³ஸே ‘‘ஸத்த²ரிபி அகா³ரவோ’’திஆதீ³னம் பு³த்³தே⁴ அகா³ரவாதீ³ஸு வுத்தனயேனேவ அத்தோ² வேதி³தப்³போ³. அப்பதிஸ்ஸோதி அனீசவுத்தி; ந ஸத்தா²ரம் ஜேட்ட²கம் கத்வா விஹரதி. அஜ்ஜ²த்தம் வாதி அத்தனோ ஸந்தானே வா அத்தனோ பக்கே² வா; ஸகாய பரிஸாயாதி அத்தோ². ப³ஹித்³தா⁴ வாதி பரஸந்தானே வா பரபக்கே² வா. தத்ர தும்ஹேதி தஸ்மிம் அஜ்ஜ²த்தப³ஹித்³தா⁴பே⁴தே³ ஸபரஸந்தானே வா ஸபரபரிஸாய வா. பஹானாய வாயமேய்யாதா²தி மேத்தாபா⁴வனாதீ³ஹி நயேஹி பஹானத்த²ம் வாயமேய்யாத²; மேத்தாபா⁴வனாதி³னயேன ஹி தம் அஜ்ஜ²த்தம்பி ப³ஹித்³தா⁴பி பஹீயதி. அனவஸ்ஸவாயாதி அப்பவத்திபா⁴வாய.

ஸந்தி³ட்டி²பராமாஸீதி ஸகமேவ தி³ட்டி²ம் பராமஸதி; யம் அத்தனா தி³ட்டி²க³தம் க³ஹிதம், இத³மேவ ஸச்சந்தி க³ண்ஹாதி. ஆதா⁴னக்³கா³ஹீதி த³ள்ஹக்³கா³ஹீ.

273. அனுவாத³மூலனித்³தே³ஸோ கிஞ்சாபி விவாத³மூலனித்³தே³ஸேனேவ ஸமானோ, அத² கோ² அட்டா²ரஸ பே⁴த³கரவத்தூ²னி நிஸ்ஸாய விவத³ந்தானம் கோதூ⁴பனாஹாத³யோ விவாத³மூலானி. ததா² விவத³ந்தா பன ஸீலவிபத்திஆதீ³ஸு அஞ்ஞதரவிபத்திம் ஆபஜ்ஜித்வா ‘‘அஸுகோ பி⁴க்கு² அஸுகம் நாம விபத்திம் ஆபன்னோ’’தி வா, ‘‘பாராஜிகம் ஆபன்னோஸி, ஸங்கா⁴தி³ஸேஸம் ஆபன்னோஸீ’’தி வா அனுவத³ந்தி. ஏவம் அனுவத³ந்தானம் கோதூ⁴பனாஹாத³யோ அனுவாத³மூலானீதி அயமேத்த² விஸேஸோ.

274. ஸாரணீயத⁴ம்மனித்³தே³ஸே மேத்தசித்தேன கதம் காயகம்மம் மேத்தம் காயகம்மம் நாம. ஆவி சேவ ரஹோ சாதி ஸம்முகா² ச பரம்முகா² ச. தத்த² நவகானம் சீவரகம்மாதீ³ஸு ஸஹாயபா⁴வக³மனம் ஸம்முகா² மேத்தம் காயகம்மம் நாம. தே²ரானம் பன பாத³தோ⁴வனபீ³ஜனவாததா³னாதி³பே⁴த³ம்பி ஸப்³ப³ம் ஸாமீசிகம்மம் ஸம்முகா² மேத்தம் காயகம்மம் நாம. உப⁴யேஹிபி து³ன்னிக்கி²த்தானம் தா³ருப⁴ண்டா³தீ³னம் தேஸு அவமஞ்ஞம் அகத்வா அத்தனா து³ன்னிக்கி²த்தானம் விய படிஸாமனம் பரம்முகா² மேத்தம் காயகம்மம் நாம. அயம்பி த⁴ம்மோ ஸாரணீயோதி அயம் மேத்தாகாயகம்மஸங்கா²தோ த⁴ம்மோ ஸரிதப்³போ³ ஸதிஜனகோ; யோ நம் கரோதி, தம் புக்³க³லம்; யேஸம் கதோ ஹோதி, தே பஸன்னசித்தா ‘‘அஹோ ஸப்புரிஸோ’’தி அனுஸ்ஸரந்தீதி அதி⁴ப்பாயோ. பியகரணோதி தம் புக்³க³லம் ஸப்³ரஹ்மசாரீனம் பியம் கரோதி. க³ருகரணோதி தம் புக்³க³லம் ஸப்³ரஹ்மசாரீனம் க³ரும் கரோதி. ஸங்க³ஹாயாதிஆதீ³ஸு ஸப்³ரஹ்மசாரீஹி ஸங்க³ஹேதப்³ப³பா⁴வாய. தேஹி ஸத்³தி⁴ம் அவிவாதா³ய ஸமக்³க³பா⁴வாய ஏகீபா⁴வாய ச ஸம்வத்ததி.

மேத்தம் வசீகம்மந்திஆதீ³ஸு தே³வத்தே²ரோ திஸ்ஸத்தே²ரோதி ஏவம் பக்³க³ய்ஹ வசனம் ஸம்முகா² மேத்தம் வசீகம்மம் நாம. விஹாரே அஸந்தே பன தம் படிபுச்ச²ந்தஸ்ஸ ‘‘குஹிம் அம்ஹாகம் தே³வத்தே²ரோ, குஹிம் அம்ஹாகம் திஸ்ஸத்தே²ரோ, கதா³ நு கோ² ஆக³மிஸ்ஸதீ’’தி ஏவம் மமாயனவசனம் பரம்முகா² மேத்தம் வசீகம்மம் நாம. மேத்தாஸினேஹஸினித்³தா⁴னி பன நயனானி உம்மீலேத்வா பஸன்னேன முகே²ன ஓலோகனம் ஸம்முகா² மேத்தம் மனோகம்மம் நாம. ‘‘தே³வத்தே²ரோ திஸ்ஸத்தே²ரோ அரோகோ³ ஹோது, அப்பாபா³தோ⁴’’தி ஸமன்னாஹரணம் பரம்முகா² மேத்தம் மனோகம்மம் நாம.

அப்படிவிப⁴த்தபோ⁴கீ³தி நேவ ஆமிஸம் படிவிப⁴ஜித்வா பு⁴ஞ்ஜதி, ந புக்³க³லம். யோ ஹி ‘‘ஏத்தகம் பரேஸம் த³ஸ்ஸாமி, ஏத்தகம் அத்தனா பு⁴ஞ்ஜிஸ்ஸாமி, ஏத்தகம் வா அஸுகஸ்ஸ ச அஸுகஸ்ஸ ச த³ஸ்ஸாமி, ஏத்தகம் அத்தனா பு⁴ஞ்ஜிஸ்ஸாமீ’’தி விப⁴ஜித்வா பு⁴ஞ்ஜதி, அயம் படிவிப⁴த்தபோ⁴கீ³ நாம. அயம் பன ஏவம் அகத்வா ஆப⁴தம் பிண்ட³பாதம் தே²ராஸனதோ பட்டா²ய த³த்வா க³ஹிதாவஸேஸம் பு⁴ஞ்ஜதி. ‘‘ஸீலவந்தேஹீ’’தி வசனதோ து³ஸ்ஸீலஸ்ஸ அதா³தும்பி வட்டதி, ஸாரணீயத⁴ம்மபூரகேன பன ஸப்³பே³ஸம் தா³தப்³ப³மேவாதி வுத்தம். கி³லான-கி³லானுபட்டா²க-ஆக³ந்துக-க³மிகசீவரகம்மாதி³பஸுதானம் விசேய்ய தா³தும்பி வட்டதி. ந ஹி ஏதே விசினித்வா தே³ந்தேன புக்³க³லவிபா⁴கோ³ கதோ ஹோதி, ஈதி³ஸானஞ்ஹி கிச்ச²லாப⁴த்தா விஸேஸோ காதப்³போ³யேவாதி அயம் கரோதி.

அக²ண்டா³னீதிஆதீ³ஸு யஸ்ஸ ஸத்தஸு ஆபத்திக்க²ந்தே⁴ஸு ஆதி³ம்ஹி வா அந்தே வா ஸிக்கா²பத³ம் பி⁴ன்னம் ஹோதி, தஸ்ஸ ஸீலம் பரியந்தே சி²ன்னஸாடகோ விய க²ண்ட³ம் நாம. யஸ்ஸ பன வேமஜ்ஜே² பி⁴ன்னம், தஸ்ஸ மஜ்ஜே² சி²த்³த³ஸாடகோ விய சி²த்³த³ம் நாம ஹோதி. யஸ்ஸ படிபாடியா த்³வே தீணி பி⁴ன்னானி, தஸ்ஸ பிட்டி²யம் வா குச்சி²யம் வா உட்டி²தேன விஸபா⁴க³வண்ணேன காளரத்தாதீ³னம் அஞ்ஞதரஸரீரவண்ணா கா³வீ விய ஸப³லம் நாம ஹோதி. யஸ்ஸ அந்தரந்தரா பி⁴ன்னானி, தஸ்ஸ அந்தரந்தரா விஸபா⁴க³வண்ணபி³ந்து³விசித்ரா கா³வீ விய கம்மாஸம் நாம ஹோதி. யஸ்ஸ பன ஸப்³பே³ன ஸப்³ப³ம் அபி⁴ன்னானி ஸீலானி, தஸ்ஸ தானி ஸீலானி அக²ண்டா³னி அச்சி²த்³தா³னி அஸப³லானி அகம்மாஸானி நாம ஹோந்தி. தானி பனேதானி பு⁴ஜிஸ்ஸபா⁴வகரணதோ பு⁴ஜிஸ்ஸானி. விஞ்ஞூஹி பஸத்த²த்தா விஞ்ஞுப்பஸத்தா²னி. தண்ஹாதி³ட்டீ²ஹி அபராமட்ட²த்தா அபராமட்டா²னி. உபசாரஸமாதி⁴ம் அப்பனாஸமாதி⁴ம் வா ஸம்வத்தயந்தீதி ஸமாதி⁴ஸம்வத்தனிகானீதி வுச்சந்தி. ஸீலஸாமஞ்ஞக³தோ விஹரதீதி தேஸு தேஸு தி³ஸாபா⁴கே³ஸு விஹரந்தேஹி கல்யாணஸீலேஹி பி⁴க்கூ²ஹி ஸத்³தி⁴ம் ஸமானபா⁴வூபக³தஸீலோ விஹரதி.

யாயம் தி³ட்டீ²தி மக்³க³ஸம்பயுத்தா ஸம்மாதி³ட்டி². அரியாதி நித்³தோ³ஸா. நிய்யாதீதி நிய்யானிகா. தக்கரஸ்ஸாதி யோ ததா²காரீ ஹோதி, தஸ்ஸ. து³க்க²க்க²யாயாதி ஸப்³ப³து³க்க²ஸ்ஸ க²யத்த²ம். ஸேஸம் யாவ ஸமத²பே⁴த³பரியோஸானா உத்தானத்த²மேவ.

கதிபுச்சா²வாரவண்ணனா நிட்டி²தா.

க²ந்த⁴கபுச்சா²வாரோ

புச்சா²விஸ்ஸஜ்ஜனாவண்ணனா

320. உபஸம்பத³ம் புச்சி²ஸ்ஸந்தி உபஸம்பத³க்க²ந்த⁴கம் புச்சி²ஸ்ஸம். ஸனிதா³னம் ஸனித்³தே³ஸந்தி நிதா³னேன ச நித்³தே³ஸேன ச ஸத்³தி⁴ம் புச்சி²ஸ்ஸாமி. ஸமுக்கட்ட²பதா³னம் கதி ஆபத்தியோதி யானி தத்த² ஸமுக்கட்டா²னி உத்தமானி பதா³னி வுத்தானி, தேஸம் ஸமுக்கட்ட²பதா³னம் உத்தமபதா³னம் ஸங்கே²பதோ கதி ஆபத்தியோ ஹோந்தீதி. யேன யேன ஹி பதே³ன யா யா ஆபத்தி பஞ்ஞத்தா, ஸா ஸா தஸ்ஸ தஸ்ஸ பத³ஸ்ஸ ஆபத்தீதி வுச்சதி. தேன வுத்தம் ‘‘ஸமுக்கட்ட²பதா³னம் கதி ஆபத்தியோ’’தி. த்³வே ஆபத்தியோதி ஊனவீஸதிவஸ்ஸம் உபஸம்பாதே³ந்தஸ்ஸ பாசித்தியம், ஸேஸேஸு ஸப்³ப³பதே³ஸு து³க்கடம்.

திஸ்ஸோதி ‘‘நஸ்ஸந்தேதே வினஸ்ஸந்தேதே, கோ தேஹி அத்தோ²’’தி பே⁴த³புரேக்கா²ரானம் உபோஸத²கரணே து²ல்லச்சயம், உக்கி²த்தகேன ஸத்³தி⁴ம் உபோஸத²கரணே பாசித்தியம், ஸேஸேஸு து³க்கடந்தி ஏவம் உபோஸத²க்க²ந்த⁴கே திஸ்ஸோ ஆபத்தியோ. ஏகாதி வஸ்ஸூபனாயிகக்க²ந்த⁴கே ஏகா து³க்கடாபத்தியேவ.

திஸ்ஸோதி பே⁴த³புரேக்கா²ரஸ்ஸ பவாரயதோ து²ல்லச்சயம், உக்கி²த்தகேன ஸத்³தி⁴ம் பாசித்தியம், ஸேஸேஸு து³க்கடந்தி ஏவம் பவாரணாக்க²ந்த⁴கேபி திஸ்ஸோ ஆபத்தியோ.

திஸ்ஸோதி வச்ச²தரிம் உக்³க³ஹேத்வா மாரேந்தானம் பாசித்தியம், ரத்தேன சித்தேன அங்க³ஜாதசு²பனே து²ல்லச்சயம், ஸேஸேஸு து³க்கடந்தி ஏவம் சம்மஸம்யுத்தேபி திஸ்ஸோ ஆபத்தியோ. பே⁴ஸஜ்ஜக்க²ந்த⁴கேபி ஸமந்தா த்³வங்கு³லே து²ல்லச்சயம், போ⁴ஜ்ஜயாகு³யா பாசித்தியம், ஸேஸேஸு து³க்கடந்தி ஏவம் திஸ்ஸோ ஆபத்தியோ.

கதி²னம் கேவலம் பஞ்ஞத்திமேவ, நத்தி² தத்த² ஆபத்தி. சீவரஸம்யுத்தே குஸசீரவாகசீரேஸு து²ல்லச்சயம், அதிரேகசீவரே நிஸ்ஸக்³கி³யம், ஸேஸேஸு து³க்கடந்தி இமா திஸ்ஸோ ஆபத்தியோ.

சம்பேய்யகே ஏகா து³க்கடாபத்தியேவ. கோஸம்ப³க-கம்மக்க²ந்த⁴க-பாரிவாஸிகஸமுச்சயக்க²ந்த⁴கேஸுபி ஏகா து³க்கடாபத்தியேவ.

ஸமத²க்க²ந்த⁴கே ச²ந்த³தா³யகோ கி²ய்யதி, கி²ய்யனகம் பாசித்தியம், ஸேஸேஸு து³க்கடந்தி இமா த்³வே ஆபத்தியோ. கு²த்³த³கவத்து²கே அத்தனோ அங்க³ஜாதம் சி²ந்த³தி, து²ல்லச்சயம், ரோமட்டே² பாசித்தியம், ஸேஸேஸு து³க்கடந்தி இமா திஸ்ஸோ ஆபத்தியோ. ஸேனாஸனக்க²ந்த⁴கே க³ருப⁴ண்ட³விஸ்ஸஜ்ஜனே து²ல்லச்சயம், ஸங்கி⁴கா விஹாரா நிக்கட்³ட⁴னே பாசித்தியம், ஸேஸேஸு து³க்கடந்தி இமா திஸ்ஸோ ஆபத்தியோ.

ஸங்க⁴பே⁴தே³பே⁴த³கானுவத்தகானம் து²ல்லச்சயம், க³ணபோ⁴ஜனே பாசித்தியந்தி இமா த்³வே ஆபத்தியோ. ஸமாசாரம் புச்சி²ஸ்ஸந்தி வுத்தே வத்தக்க²ந்த⁴கே ஏகா து³க்கடாபத்தியேவ. ஸா ஸப்³ப³வத்தேஸு அனாத³ரியேன ஹோதி. ததா² பாதிமோக்க²ட்ட²பனே. பி⁴க்கு²னிக்க²ந்த⁴கே அப்பவாரணாய பாசித்தியம், ஸேஸேஸு து³க்கடந்தி த்³வே ஆபத்தியோ. பஞ்சஸதிகஸத்தஸதிகேஸு கேவலம் த⁴ம்மோ ஸங்க³ஹம் ஆரோபிதோ, நத்தி² தத்த² ஆபத்தீதி.

க²ந்த⁴கபுச்சா²வாரவண்ணனா நிட்டி²தா.

ஏகுத்தரிகனயோ

ஏககவாரவண்ணனா

321. ஆபத்திகரா த⁴ம்மா ஜானிதப்³பா³திஆதி³ம்ஹி ஏகுத்தரிகனயே ஆபத்திகரா த⁴ம்மா நாம ச² ஆபத்திஸமுட்டா²னானி. ஏதேஸஞ்ஹி வஸேன புக்³க³லோ ஆபத்திம் ஆபஜ்ஜதி, தஸ்மா ‘‘ஆபத்திகரா’’தி வுத்தா. அனாபத்திகரா நாம ஸத்த ஸமதா². ஆபத்தி ஜானிதப்³பா³தி தஸ்மிம் தஸ்மிம் ஸிக்கா²பதே³ ச விப⁴ங்கே³ ச வுத்தா ஆபத்தி ஜானிதப்³பா³. அனாபத்தீதி ‘‘அனாபத்தி பி⁴க்கு² அஸாதி³யந்தஸ்ஸா’’திஆதி³னா நயேன அனாபத்தி ஜானிதப்³பா³. லஹுகாதி லஹுகேன வினயகம்மேன விஸுஜ்ஜ²னதோ பஞ்சவிதா⁴ ஆபத்தி. க³ருகாதி க³ருகேன வினயகம்மேன விஸுஜ்ஜ²னதோ ஸங்கா⁴தி³ஸேஸா ஆபத்தி. கேனசி ஆகாரேன அனாபத்திபா⁴வம் உபனேதும் அஸக்குணேய்யதோ பாராஜிகாபத்தி ச. ஸாவஸேஸாதி ட²பேத்வா பாராஜிகம் ஸேஸா. அனவஸேஸாதி பாராஜிகாபத்தி. த்³வே ஆபத்திக்க²ந்தா⁴ து³ட்டு²ல்லா; அவஸேஸா அது³ட்டு²ல்லா. ஸப்படிகம்மது³கம் ஸாவஸேஸது³கஸதி³ஸம். தே³ஸனாகா³மினிது³கம் லஹுகது³கஸங்க³ஹிதம்.

அந்தராயிகாதி ஸத்தபி ஆபத்தியோ ஸஞ்சிச்ச வீதிக்கந்தா ஸக்³க³ந்தராயஞ்சேவ மோக்க²ந்தராயஞ்ச கரோந்தீதி அந்தராயிகா. அஜானந்தேன வீதிக்கந்தா பன பண்ணத்திவஜ்ஜாபத்தி நேவ ஸக்³க³ந்தராயம் ந மோக்க²ந்தராயம் கரோதீதி அனந்தராயிகா. அந்தராயிகம் ஆபன்னஸ்ஸாபி தே³ஸனாகா³மினிம் தே³ஸேத்வா வுட்டா²னகா³மினிதோ வுட்டா²ய ஸுத்³தி⁴பத்தஸ்ஸ ஸாமணேரபூ⁴மியம் டி²தஸ்ஸ ச அவாரிதோ ஸக்³க³மோக்க²மக்³கோ³தி. ஸாவஜ்ஜபஞ்ஞத்தீதி லோகவஜ்ஜா. அனவஜ்ஜபஞ்ஞத்தீதி பண்ணத்திவஜ்ஜா. கிரியதோ ஸமுட்டி²தா நாம யம் கரோந்தோ ஆபஜ்ஜதி பாராஜிகாபத்தி விய. அகிரியதோதி யம் அகரோந்தோ ஆபஜ்ஜதி, சீவரஅனதி⁴ட்டா²னாபத்தி விய. கிரியாகிரியதோதி யம் கரோந்தோ ச அகரோந்தோ ச ஆபஜ்ஜதி, குடிகாராபத்தி விய.

புப்³பா³பத்தீதி பட²மம் ஆபன்னாபத்தி. அபராபத்தீதி பாரிவாஸிகாதீ³ஹி பச்சா² ஆபன்னாபத்தி. புப்³பா³பத்தீனம் அந்தராபத்தி நாம மூலவிஸுத்³தி⁴யா அந்தராபத்தி. அபராபத்தீனம் அந்தராபத்தி நாம அக்³க⁴விஸுத்³தி⁴யா அந்தராபத்தி. குருந்தி³யம் பன ‘‘புப்³பா³பத்தி நாம பட²மம் ஆபன்னா. அபராபத்தி நாம மானத்தாரஹகாலே ஆபன்னா. புப்³பா³பத்தீனம் அந்தராபத்தி நாம பரிவாஸே ஆபன்னா. அபராபத்தீனம் அந்தராபத்தி நாம மானத்தசாரே ஆபன்னா’’தி வுத்தம். இத³ம்பி ஏகேன பரியாயேன யுஜ்ஜதி.

தே³ஸிதா க³ணனூபகா³ நாம யா து⁴ரனிக்கே²பம் கத்வா புன ந ஆபஜ்ஜிஸ்ஸாமீதி தே³ஸிதா ஹோதி. அக³ணனூபகா³ நாம யா து⁴ரனிக்கே²பம் அகத்வா ஸஉஸ்ஸாஹேனேவ சித்தேன அபரிஸுத்³தே⁴ன தே³ஸிதா ஹோதி. அயஞ்ஹி தே³ஸிதாபி தே³ஸிதக³ணனம் ந உபேதி. அட்ட²மே வத்து²ஸ்மிம் பி⁴க்கு²னியா பாராஜிகமேவ ஹோதி. பஞ்ஞத்தி ஜானிதப்³பா³திஆதீ³ஸு நவஸு பதே³ஸு பட²மபாராஜிகபுச்சா²ய வுத்தனயேனேவ வினிச்ச²யோ வேதி³தப்³போ³.

து²ல்லவஜ்ஜாதி து²ல்லதோ³ஸே பஞ்ஞத்தா க³ருகாபத்தி. அது²ல்லவஜ்ஜாதி லஹுகாபத்தி. கி³ஹிபடிஸம்யுத்தாதி ஸுத⁴ம்மத்தே²ரஸ்ஸ ஆபத்தி, யா ச த⁴ம்மிகஸ்ஸ படிஸ்ஸவஸ்ஸ அஸச்சாபனே ஆபத்தி, அவஸேஸா ந கி³ஹிபடிஸம்யுத்தா. பஞ்சானந்தரியகம்மாபத்தி நியதா, ஸேஸா அனியதா. ஆதி³கரோதி ஸுதி³ன்னத்தே²ராதி³ ஆதி³கம்மிகோ. அனாதி³கரோதி மக்கடிஸமணாதி³ அனுபஞ்ஞத்திகாரகோ. அதி⁴ச்சாபத்திகோ நாம யோ கதா³சி கரஹசி ஆபத்திம் ஆபஜ்ஜதி. அபி⁴ண்ஹாபத்திகோ நாம யோ நிச்சம் ஆபஜ்ஜதி.

சோத³கோ நாம யோ வத்து²னா வா ஆபத்தியா வா பரம் சோதே³தி. யோ பன ஏவம் சோதி³தோ அயம் சுதி³தகோ நாம. பஞ்சத³ஸஸு த⁴ம்மேஸு அப்பதிட்ட²ஹித்வா அபூ⁴தேன வத்து²னா சோதே³ந்தோ அத⁴ம்மசோத³கோ நாம, தேன ததா² சோதி³தோ அத⁴ம்மசுதி³தகோ நாம. விபரியாயேன த⁴ம்மசோத³கசுதி³தகா வேதி³தப்³பா³. மிச்ச²த்தனியதேஹி வா ஸம்மத்தனியதேஹி வா த⁴ம்மேஹி ஸமன்னாக³தோ நியதோ, விபரீதோ அனியதோ.

ஸாவகா ப⁴ப்³பா³பத்திகா நாம, பு³த்³தா⁴ ச பச்சேகபு³த்³தா⁴ ச அப⁴ப்³பா³பத்திகா நாம. உக்கே²பனீயகம்மகதோ உக்கி²த்தகோ நாம, அவஸேஸசதுப்³பி³த⁴தஜ்ஜனீயாதி³கம்மகதோ அனுக்கி²த்தகோ நாம. அயஞ்ஹி உபோஸத²ம் வா பவாரணம் வா த⁴ம்மபரிபோ⁴க³ம் வா ஆமிஸபரிபோ⁴க³ம் வா ந கோபேதி. ‘‘மேத்தியம் பி⁴க்கு²னிம் நாஸேத², தூ³ஸகோ நாஸேதப்³போ³, கண்டகோ ஸமணுத்³தே³ஸோ நாஸேதப்³போ³’’தி ஏவம் லிங்க³த³ண்ட³கம்ம-ஸம்வாஸனாஸனாஹி நாஸிதப்³போ³ நாஸிதகோ நாம. ஸேஸா ஸப்³பே³ அனாஸிதகா. யேன ஸத்³தி⁴ம் உபோஸதா²தி³கோ ஸம்வாஸோ அத்தி², அயம் ஸமானஸம்வாஸகோ, இதரோ நானாஸம்வாஸகோ. ஸோ கம்மனானாஸம்வாஸகோ லத்³தி⁴னானாஸம்வாஸகோதி து³விதோ⁴ ஹோதி. ட²பனம் ஜானிதப்³ப³ந்தி ‘‘ஏகம் பி⁴க்க²வே அத⁴ம்மிகம் பாதிமோக்க²ட்ட²பன’’ந்திஆதி³னா நயேன வுத்தம் பாதிமோக்க²ட்ட²பனம் ஜானிதப்³ப³ந்தி அத்தோ².

ஏககவாரவண்ணனா நிட்டி²தா.

து³கவாரவண்ணனா

322. து³கேஸு ஸசித்தகா ஆபத்தி ஸஞ்ஞாவிமோக்கா², அசித்தகா நோஸஞ்ஞாவிமோக்கா². லத்³த⁴ஸமாபத்திகஸ்ஸ ஆபத்தி நாம பூ⁴தாரோசனாபத்தி, அலத்³த⁴ஸமாபத்திகஸ்ஸ ஆபத்தி நாம அபூ⁴தாரோசனாபத்தி. ஸத்³த⁴ம்மபடிஸஞ்ஞுத்தா நாம பத³ஸோத⁴ம்மாதி³கா, அஸத்³த⁴ம்மபடிஸஞ்ஞுத்தா நாம து³ட்டு²ல்லவாசாபத்தி. ஸபரிக்கா²ரபடிஸஞ்ஞுத்தா நாம நிஸ்ஸக்³கி³யவத்து²னோ அனிஸ்ஸஜ்ஜித்வா பரிபோ⁴கே³, பத்தசீவரானம் நித³ஹனே, கிலிட்ட²சீவரானம் அதோ⁴வனே, மலக்³க³ஹிதபத்தஸ்ஸ அபசனேதி ஏவம் அயுத்தபரிபோ⁴கே³ ஆபத்தி. பரபரிக்கா²ரபடிஸஞ்ஞுத்தா நாம ஸங்கி⁴கமஞ்சபீடா²தீ³னம் அஜ்ஜோ²காஸே ஸந்த²ரணஅனாபுச்சா²க³மனாதீ³ஸு ஆபஜ்ஜிதப்³பா³ ஆபத்தி. ஸபுக்³க³லபடிஸஞ்ஞுத்தா நாம ‘‘முது³பிட்டி²கஸ்ஸ லம்பி³ஸ்ஸ ஊருனா அங்க³ஜாதம் பீளேந்தஸ்ஸா’’திஆதி³னா நயேன வுத்தாபத்தி. பரபுக்³க³லபடிஸஞ்ஞுத்தா நாம மேது²னத⁴ம்மகாயஸம்ஸக்³க³பஹாரதா³னாதீ³ஸு வுத்தாபத்தி, ‘‘ஸிக²ரணீஸீ’’தி ஸச்சம் ப⁴ணந்தோ க³ருகம் ஆபஜ்ஜதி, ‘‘ஸம்பஜானமுஸாவாதே³ பாசித்திய’’ந்தி முஸா ப⁴ணந்தோ லஹுகம். அபூ⁴தாரோசனே முஸா ப⁴ணந்தோ க³ருகம். பூ⁴தாரோசனே ஸச்சம் ப⁴ணந்தோ லஹுகம்.

‘‘ஸங்க⁴கம்மம் வக்³க³ம் கரிஸ்ஸாமீ’’தி அந்தோஸீமாய ஏகமந்தே நிஸீத³ந்தோ பூ⁴மிக³தோ ஆபஜ்ஜதி நாம. ஸசே பன அங்கு³லிமத்தம்பி ஆகாஸே திட்டே²ய்ய, ந ஆபஜ்ஜேய்ய, தேன வுத்தம் ‘‘நோ வேஹாஸக³தோ’’தி. வேஹாஸகுடியா ஆஹச்சபாத³கம் மஞ்சம் வா பீட²ம் வா அபி⁴னிஸீத³ந்தோ வேஹாஸக³தோ ஆபஜ்ஜதி நாம. ஸசே பன தம் பூ⁴மியம் பஞ்ஞாபேத்வா நிபஜ்ஜேய்ய ந ஆபஜ்ஜேய்ய, தேன வுத்தம் – ‘‘நோ பூ⁴மிக³தோ’’தி. க³மியோ க³மியவத்தம் அபூரேத்வா க³ச்ச²ந்தோ நிக்க²மந்தோ ஆபஜ்ஜதி நாம, நோ பவிஸந்தோ. ஆக³ந்துகோ ஆக³ந்துகவத்தம் அபூரேத்வா ஸச²த்துபாஹனோ பவிஸந்தோ பவிஸந்தோ ஆபஜ்ஜதி நாம, நோ நிக்க²மந்தோ.

ஆதி³யந்தோ ஆபஜ்ஜதி நாம பி⁴க்கு²னீ அதிக³ம்பீ⁴ரம் உத³கஸுத்³தி⁴கம் ஆதி³யமானா; து³ப்³ப³ண்ணகரணம் அனாதி³யித்வா சீவரம் பரிபு⁴ஞ்ஜந்தோ பன அனாதி³யந்தோ ஆபஜ்ஜதி நாம. மூக³ப்³ப³தாதீ³னி தித்தி²யவத்தானி ஸமாதி³யந்தோ ஸமாதி³யந்தோ ஆபஜ்ஜதி நாம. பாரிவாஸிகாத³யோ பன தஜ்ஜனீயாதி³கம்மகதா வா அத்தனோ வத்தம் அஸமாதி³யந்தா ஆபஜ்ஜந்தி, தே ஸந்தா⁴ய வுத்தம் ‘‘அத்தா²பத்தி ந ஸமாதி³யந்தோ ஆபஜ்ஜதீ’’தி. அஞ்ஞாதிகாய பி⁴க்கு²னியா சீவரம் ஸிப்³ப³ந்தோ வேஜ்ஜகம்மப⁴ண்டா³கா³ரிககம்மசித்தகம்மாதீ³னி வா கரோந்தோ கரோந்தோ ஆபஜ்ஜதி நாம. உபஜ்ஜா²யவத்தாதீ³னி அகரோந்தோ அகரோந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரம் த³த³மானோ தே³ந்தோ ஆபஜ்ஜதி நாம. ஸத்³தி⁴விஹாரிகஅந்தேவாஸிகானம் சீவராதீ³னி அதே³ந்தோ அதே³ந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரம் க³ண்ஹந்தோ படிக்³க³ண்ஹந்தோ ஆபஜ்ஜதி நாம. ‘‘ந பி⁴க்க²வே ஓவாதோ³ ந க³ஹேதப்³போ³’’தி வசனதோ ஓவாத³ம் அக³ண்ஹந்தோ ந படிக்³க³ண்ஹந்தோ ஆபஜ்ஜதி நாம.

நிஸ்ஸக்³கி³யவத்து²ம் அனிஸ்ஸஜ்ஜித்வா பரிபு⁴ஞ்ஜந்தோ பரிபோ⁴கே³ன ஆபஜ்ஜதி நாம. பஞ்சாஹிகம் ஸங்கா⁴டிசாரம் அதிக்காமயமானா அபரிபோ⁴கே³ன ஆபஜ்ஜதி நாம. ஸஹகா³ரஸேய்யம் ரத்திம் ஆபஜ்ஜதி நாம, நோ தி³வா, த்³வாரம் அஸம்வரித்வா படிஸல்லீயந்தோ தி³வா ஆபஜ்ஜதி, நோ ரத்திம். ஏகரத்தசா²ரத்தஸத்தாஹத³ஸாஹமாஸாதிக்கமேஸு வுத்தஆபத்திம் ஆபஜ்ஜந்தோ அருணுக்³கே³ ஆபஜ்ஜதி நாம, பவாரேத்வா பு⁴ஞ்ஜந்தோ ந அருணுக்³கே³ ஆபஜ்ஜதி நாம.

பூ⁴தகா³மஞ்சேவ அங்க³ஜாதஞ்ச சி²ந்த³ந்தோ சி²ந்த³ந்தோ ஆபஜ்ஜதி நாம, கேஸே வா நகே² வா ந சி²ந்த³ந்தோ ந சி²ந்த³ந்தோ ஆபஜ்ஜதி நாம. ஆபத்திம் சா²தே³ந்தோ சா²தே³ந்தோ ஆபஜ்ஜதி நாம, ‘‘திணேன வா பண்ணேன வா படிச்சா²தே³த்வா ஆக³ந்தப்³ப³ம், நத்வேவ நக்³கே³ன ஆக³ந்தப்³ப³ம், யோ ஆக³ச்சே²ய்ய ஆபத்தி து³க்கடஸ்ஸா’’தி இமம் பன ஆபத்திம் ந சா²தே³ந்தோ ஆபஜ்ஜதி நாம. குஸசீராதீ³னி தா⁴ரேந்தோ தா⁴ரேந்தோ ஆபஜ்ஜதி நாம, ‘‘அயம் தே பி⁴க்கு² பத்தோ யாவ பே⁴த³னாய தா⁴ரேதப்³போ³’’தி இமம் ஆபத்திம் ந தா⁴ரேந்தோ ஆபஜ்ஜதி நாம.

‘‘அத்தனா வா அத்தானம் நானாஸம்வாஸகம் கரோதீ’’தி ஏகஸீமாயம் த்³வீஸு ஸங்கே⁴ஸு நிஸின்னேஸு ஏகஸ்மிம் பக்கே² நிஸீதி³த்வா பரபக்க²ஸ்ஸ லத்³தி⁴ம் க³ண்ஹந்தோ யஸ்மிம் பக்கே² நிஸின்னோ தேஸம் அத்தனாவ அத்தானம் நானாஸம்வாஸகம் கரோதி நாம. யேஸம் ஸந்திகே நிஸின்னோ தேஸம் க³ணபூரகோ ஹுத்வா கம்மம் கோபேதி, இதரேஸம் ஹத்த²பாஸம் அனாக³தத்தா. ஸமானஸம்வாஸகேபி ஏஸேவ நயோ. யேஸஞ்ஹி ஸோ லத்³தி⁴ம் ரோசேதி, தேஸம் ஸமானஸம்வாஸகோ ஹோதி, இதரேஸம் நானாஸம்வாஸகோ. ஸத்த ஆபத்தியோ ஸத்த ஆபத்திக்க²ந்தா⁴தி ஆபஜ்ஜிதப்³ப³தோ ஆபத்தியோ, ராஸட்டே²ன க²ந்தா⁴தி ஏவம் த்³வேயேவ நாமானி ஹோந்தீதி நாமவஸேன து³கம் த³ஸ்ஸிதம். கம்மேன வா ஸலாகக்³கா³ஹேன வாதி ஏத்த² உத்³தே³ஸோ சேவ கம்மஞ்ச ஏகம், வோஹாரோ சேவ அனுஸ்ஸாவனா ச ஸலாகக்³கா³ஹோ ச ஏகம், வோஹாரானுஸ்ஸாவனஸலாகக்³கா³ஹா புப்³ப³பா⁴கா³, கம்மஞ்சேவ உத்³தே³ஸோ ச பமாணம்.

அத்³தா⁴னஹீனோ நாம ஊனவீஸதிவஸ்ஸோ. அங்க³ஹீனோ நாம ஹத்த²ச்சி²ன்னாதி³பே⁴தோ³. வத்து²விபன்னோ நாம பண்ட³கோ திரச்சா²னக³தோ உப⁴தோப்³யஞ்ஜனகோ ச. அவஸேஸா தே²ய்யஸம்வாஸகாத³யோ அட்ட² அப⁴ப்³ப³புக்³க³லா கரணது³க்கடகா நாம. து³க்கடகிரியா து³க்கடகம்மா, இமஸ்மிம்யேவ அத்தபா⁴வே கதேன அத்தனோ கம்மேன அப⁴ப்³ப³ட்டா²னம் பத்தாதி அத்தோ². அபரிபூரோ நாம அபரிபுண்ணபத்தசீவரோ. நோ ச யாசதி நாம உபஸம்பத³ம் ந யாசதி. அலஜ்ஜிஸ்ஸ ச பா³லஸ்ஸ சாதி அலஜ்ஜீ ஸசேபி தேபிடகோ ஹோதி, பா³லோ ச ஸசேபி ஸட்டி²வஸ்ஸோ ஹோதி, உபோ⁴பி நிஸ்ஸாய ந வத்த²ப்³ப³ம். பா³லஸ்ஸ ச லஜ்ஜிஸ்ஸ சாதி ஏத்த² பா³லஸ்ஸ ‘‘த்வம் நிஸ்ஸயம் க³ண்ஹா’’தி ஆணாயபி நிஸ்ஸயோ தா³தப்³போ³, லஜ்ஜிஸ்ஸ பன யாசந்தஸ்ஸேவ. ஸாதிஸாரந்தி ஸதோ³ஸம்; யம் அஜ்ஜா²சரந்தோ ஆபத்திம் ஆபஜ்ஜதி.

காயேன படிக்கோஸனா நாம ஹத்த²விகாராதீ³ஹி படிக்கோஸனா. காயேன படிஜானாதீதி ஹத்த²விகாராதீ³ஹி படிஜானாதி. உபகா⁴திகா நாம உபகா⁴தா. ஸிக்கூ²பகா⁴திகா நாம ஸிக்கூ²பகா⁴தோ. போ⁴கூ³பகா⁴திகா நாம பரிபோ⁴கூ³பகா⁴தோ, தத்த² திஸ்ஸோ ஸிக்கா² அஸிக்க²தோ ஸிக்கூ²பகா⁴திகாதி வேதி³தப்³பா³. ஸங்கி⁴கம் வா புக்³க³லிகம் வா து³ப்பரிபோ⁴க³ம் பு⁴ஞ்ஜதோ போ⁴கூ³பகா⁴திகாதி வேதி³தப்³பா³. த்³வே வேனயிகாதி த்³வே அத்தா² வினயஸித்³தா⁴. பஞ்ஞத்தம் நாம ஸகலே வினயபிடகே கப்பியாகப்பியவஸேன பஞ்ஞத்தம். பஞ்ஞத்தானுலோமம் நாம சதூஸு மஹாபதே³ஸேஸு த³ட்ட²ப்³ப³ம். ஸேதுகா⁴தோதி பச்சயகா⁴தோ; யேன சித்தேன அகப்பியம் கரேய்ய, தஸ்ஸ சித்தஸ்ஸாபி அனுப்பாத³னந்தி அத்தோ². மத்தகாரிதாதி மத்தாய பமாணேன கரணம்; பமாணே டா²னந்தி அத்தோ². காயேன ஆபஜ்ஜதீதி காயத்³வாரிகம் காயேன ஆபஜ்ஜதி; வசீத்³வாரிகம் வாசாய. காயேன வுட்டா²தீதி திணவத்தா²ரகஸமதே² வினாபி தே³ஸனாய காயேனேவ வுட்டா²தி; தே³ஸேத்வா வுட்ட²ஹந்தோ பன வாசாய வுட்டா²தி. அப்³ப⁴ந்தரபரிபோ⁴கோ³ நாம அஜ்ஜோ²ஹரணபரிபோ⁴கோ³. பா³ஹிரபரிபோ⁴கோ³ நாம ஸீஸமக்க²னாதி³.

அனாக³தம் பா⁴ரம் வஹதீதி அதே²ரோவ ஸமானோ தே²ரேஹி வஹிதப்³ப³ம் பீ³ஜனகா³ஹத⁴ம்மஜ்ஜே²ஸனாதி³பா⁴ரம் வஹதி; தம் நித்த²ரிதும் வீரியம் ஆரப⁴தி. ஆக³தம் பா⁴ரம் ந வஹதீதி தே²ரோ தே²ரகிச்சம் ந கரோதி, ‘‘அனுஜானாமி பி⁴க்க²வே தே²ரேன பி⁴க்கு²னா ஸாமம் வா த⁴ம்மம் பா⁴ஸிதும், பரம் வா அஜ்ஜே²ஸிதும், அனுஜானாமி பி⁴க்க²வே தே²ராதே⁴ய்யம் பாதிமோக்க²’’ந்தி ஏவமாதி³ ஸப்³ப³ம் பரிஹாபேதீதி அத்தோ². ந குக்குச்சாயிதப்³ப³ம் குக்குச்சாயதீதி ந குக்குச்சாயிதப்³ப³ம் குக்குச்சாயித்வா கரோதி. குக்குச்சாயிதப்³ப³ம் ந குக்குச்சாயதீதி குக்குச்சாயிதப்³ப³ம் ந குக்குச்சாயித்வா கரோதி. ஏதேஸம் த்³வின்னம் தி³வா ச ரத்தோ ச ஆஸவா வட்³ட⁴ந்தீதி அத்தோ². அனந்தரது³கேபி வுத்தபடிபக்க²வஸேன அத்தோ² வேதி³தப்³போ³. ஸேஸம் தத்த² தத்த² வுத்தனயத்தா உத்தானமேவாதி.

து³கவாரவண்ணனா நிட்டி²தா.

திகவாரவண்ணனா

323. திகேஸு அத்தா²பத்தி திட்ட²ந்தே ப⁴க³வதி ஆபஜ்ஜதீதி அத்தி² ஆபத்தி, யம் திட்ட²ந்தே ப⁴க³வதி ஆபஜ்ஜதீதி அத்தோ². ஏஸேவ நயோ ஸப்³ப³த்த². தத்த² லோஹிதுப்பாதா³பத்திம் திட்ட²ந்தே ஆபஜ்ஜதி. ‘‘ஏதரஹி கோ² பனானந்த³, பி⁴க்கூ² அஞ்ஞமஞ்ஞம் ஆவுஸோவாதே³ன ஸமுதா³சரந்தி, ந வோ மமச்சயேன ஏவம் ஸமுதா³சரிதப்³ப³ம், நவகேன, ஆனந்த³, பி⁴க்கு²னா தே²ரோ பி⁴க்கூ² ‘ப⁴ந்தே’தி வா ‘ஆயஸ்மா’தி வா ஸமுதா³சரிதப்³போ³’’தி வசனதோ தே²ரம் ஆவுஸோவாதே³ன ஸமுதா³சரணபச்சயா ஆபத்திம் பரினிப்³பு³தே ப⁴க³வதி ஆபஜ்ஜதி, நோ திட்ட²ந்தே. இமா த்³வே ஆபத்தியோ ட²பேத்வா அவஸேஸா த⁴ரந்தேபி ப⁴க³வதி ஆபஜ்ஜதி, பரினிப்³பு³தேபி.

பவாரேத்வா அனதிரித்தம் பு⁴ஞ்ஜந்தோ ஆபத்திம் காலே ஆபஜ்ஜதி நோ விகாலே. விகாலபோ⁴ஜனாபத்திம் பன விகாலே ஆபஜ்ஜதி நோ காலே. அவஸேஸா காலே சேவ ஆபஜ்ஜதி விகாலே ச. ஸஹகா³ரஸேய்யம் ரத்திம் ஆபஜ்ஜதி, த்³வாரம் அஸம்வரித்வா படிஸல்லீயனம் தி³வா. ஸேஸா ரத்திஞ்சேவ தி³வா ச. ‘‘த³ஸவஸ்ஸோம்ஹி அதிரேகத³ஸவஸ்ஸோம்ஹீ’’தி பா³லோ அப்³யத்தோ பரிஸம் உபட்டா²பேந்தோ த³ஸவஸ்ஸோ ஆபஜ்ஜதி நோ ஊனத³ஸவஸ்ஸோ. ‘‘அஹம் பண்டி³தோ ப்³யத்தோ’’தி நவோ வா மஜ்ஜி²மோ வா பரிஸம் உபட்டா²பேந்தோ ஊனத³ஸவஸ்ஸோ ஆபஜ்ஜதி நோ த³ஸவஸ்ஸோ. ஸேஸா த³ஸவஸ்ஸோ சேவ ஆபஜ்ஜதி ஊனத³ஸவஸ்ஸோ ச. ‘‘பஞ்சவஸ்ஸோம்ஹீ’’தி பா³லோ அப்³யத்தோ அனிஸ்ஸாய வஸந்தோ பஞ்சவஸ்ஸோ ஆபஜ்ஜதி. ‘‘அஹம் பண்டி³தோ ப்³யத்தோ’’தி நவகோ அனிஸ்ஸாய வஸந்தோ ஊனபஞ்சவஸ்ஸோ ஆபஜ்ஜதி. ஸேஸம் பஞ்சவஸ்ஸோ சேவ ஆபஜ்ஜதி ஊனபஞ்சவஸ்ஸோ ச. அனுபஸம்பன்னம் பத³ஸோத⁴ம்மம் வாசேந்தோ, மாதுகா³மஸ்ஸ த⁴ம்மம் தே³ஸேந்தோ ஏவரூபம் ஆபத்திம் குஸலசித்தோ ஆபஜ்ஜதி, பாராஜிக-ஸுக்கவிஸ்ஸட்டி²-காயஸம்ஸக்³க³-து³ட்டு²ல்ல-அத்தகாமபாரிசரிய-து³ட்ட²தோ³ஸ-ஸங்க⁴பே⁴த³பஹாரதா³ன-தலஸத்திகாதி³பே⁴த³ம் அகுஸலசித்தோ ஆபஜ்ஜதி, அஸஞ்சிச்ச ஸஹகா³ரஸேய்யாதி³ம் அப்³யாகதசித்தோ ஆபஜ்ஜதி, யம் அரஹாவ ஆபஜ்ஜதி, ஸப்³ப³ம் அப்³யாகதசித்தோவ ஆபஜ்ஜதி, மேது²னத⁴ம்மாதி³பே⁴த³மாபத்திம் ஸுக²வேத³னாஸமங்கீ³ ஆபஜ்ஜதி, து³ட்ட²தோ³ஸாதி³பே⁴த³ம் து³க்க²வேத³னாஸமங்கீ³, யம் ஸுக²வேத³னாஸமங்கீ³ ஆபஜ்ஜதி, தம்யேவ மஜ்ஜ²த்தோ ஹுத்வா ஆபஜ்ஜந்தோ அது³க்க²மஸுக²வேத³னாஸமங்கீ³ ஆபஜ்ஜதி.

தயோ படிக்கே²பாதி பு³த்³த⁴ஸ்ஸ ப⁴க³வதோ தயோ படிக்கே²பா. சதூஸு பச்சயேஸு மஹிச்ச²தா அஸந்துட்டி²தா கிலேஸஸல்லேக²னபடிபத்தியா அகோ³பாயனா, இமே ஹி தயோ த⁴ம்மா பு³த்³தே⁴ன ப⁴க³வதா படிக்கி²த்தா. அப்பிச்ச²தாத³யோ பன தயோ பு³த்³தே⁴ன ப⁴க³வதா அனுஞ்ஞாதா, தேன வுத்தம் ‘‘தயோ அனுஞ்ஞாதா’’தி.

‘‘த³ஸவஸ்ஸோம்ஹீ’’தி பரிஸம் உபட்டா²பேந்தோ ‘‘பஞ்சவஸ்ஸோம்ஹீ’’தி நிஸ்ஸயம் அக³ண்ஹந்தோ பா³லோ ஆபஜ்ஜதி நோ பண்டி³தோ, ஊனத³ஸவஸ்ஸோ ‘‘ப்³யத்தோம்ஹீ’’தி ப³ஹுஸ்ஸுதத்தா பரிஸம் உபட்டா²பேந்தோ ஊனபஞ்சவஸ்ஸோ ச நிஸ்ஸயம் அக³ண்ஹந்தோ பண்டி³தோ ஆபஜ்ஜதி நோ பா³லோ; அவஸேஸம் பண்டி³தோ சேவ ஆபஜ்ஜதி பா³லோ ச. வஸ்ஸம் அனுபக³ச்ச²ந்தோ காளே ஆபஜ்ஜதி நோ ஜுண்ஹே; மஹாபவாரணாய அப்பவாரேந்தோ ஜுண்ஹே ஆபஜ்ஜதி நோ காளே; அவஸேஸம் காளே சேவ ஆபஜ்ஜதி ஜுண்ஹே ச. வஸ்ஸூபக³மனம் காளே கப்பதி நோ ஜுண்ஹே; மஹாபவாரணாய பவாரணா ஜுண்ஹே கப்பதி நோ காளே; ஸேஸம் அனுஞ்ஞாதகம் காளே சேவ கப்பதி ஜுண்ஹே ச.

கத்திகபுண்ணமாஸியா பச்சி²மே பாடிபத³தி³வஸே விகப்பேத்வா ட²பிதம் வஸ்ஸிகஸாடிகம் நிவாஸேந்தோ ஹேமந்தே ஆபஜ்ஜதி. குருந்தி³யம் பன ‘‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’’தி வுத்தம், தம்பி ஸுவுத்தம். ‘‘சாதுமாஸம் அதி⁴ட்டா²தும் ததோ பரம் விகப்பேது’’ந்தி ஹி வுத்தம். அதிரேகமாஸே ஸேஸே கி³ம்ஹானே பரியேஸந்தோ அதிரேகட்³ட⁴மாஸே ஸேஸே கத்வா நிவாஸேந்தோ ச கி³ம்ஹே ஆபஜ்ஜதி நாம. ஸதியா வஸ்ஸிகஸாடிகாய நக்³கோ³ காயம் ஓவஸ்ஸாபேந்தோ வஸ்ஸே ஆபஜ்ஜதி நாம. பாரிஸுத்³தி⁴உபோஸத²ம் வா அதி⁴ட்டா²னுபோஸத²ம் வா கரோந்தோ ஸங்கோ⁴ ஆபஜ்ஜதி. ஸுத்துத்³தே³ஸஞ்ச அதி⁴ட்டா²னுபோஸத²ஞ்ச கரோந்தோ க³ணோ ஆபஜ்ஜதி. ஏககோ ஸுத்துத்³தே³ஸம் பாரிஸுத்³தி⁴உபோஸத²ஞ்ச கரோந்தோ புக்³க³லோ ஆபஜ்ஜதி. பவாரணாயபி ஏஸேவ நயோ.

ஸங்கு⁴போஸதோ² ச ஸங்க⁴பவாரணா ச ஸங்க⁴ஸ்ஸேவ கப்பதி. க³ணுபோஸதோ² ச க³ணபவாரணா ச க³ணஸ்ஸேவ கப்பதி. அதி⁴ட்டா²னுபோஸதோ² ச அதி⁴ட்டா²னபவாரணா ச புக்³க³லஸ்ஸேவ கப்பதி. ‘‘பாராஜிகம் ஆபன்னோம்ஹீ’’திஆதீ³னி ப⁴ணந்தோ வத்து²ம் சா²தே³தி ந ஆபத்திம், ‘‘மேது²னம் த⁴ம்மம் படிஸேவி’’ந்திஆதீ³னி ப⁴ணந்தோ ஆபத்திம் சா²தே³தி நோ வத்து²ம், யோ நேவ வத்து²ம் ந ஆபத்திம் ஆரோசேதி, அயம் வத்து²ஞ்சேவ சா²தே³தி ஆபத்திஞ்ச.

படிச்சா²தே³தீதி படிச்சா²தி³. ஜந்தாக⁴ரமேவ படிச்சா²தி³ ஜந்தாக⁴ரபடிச்சா²தி³. இதராஸுபி ஏஸேவ நயோ. த்³வாரம் பித³ஹித்வா அந்தோஜந்தாக⁴ரே டி²தேன பரிகம்மம் காதும் வட்டதி. உத³கே ஓதிண்ணேனாபி ஏததே³வ வட்டதி. உப⁴யத்த² கா²தி³தும் பு⁴ஞ்ஜிதும் வா ந வட்டதி. வத்த²படிச்சா²தி³ ஸப்³ப³கப்பியதாய படிச்ச²ன்னேன ஸப்³ப³ம் காதும் வட்டதி. வஹந்தீதி யந்தி நிய்யந்தி; நிந்த³ம் வா படிக்கோஸம் வா ந லப⁴ந்தி. சந்த³மண்ட³லம் அப்³பா⁴மஹிகாதூ⁴மரஜராஹுவிமுத்தம் விவடம்யேவ விரோசதி, ந தேஸு அஞ்ஞதரேன படிச்ச²ன்னம். ததா² ஸூரியமண்ட³லம், த⁴ம்மவினயோபி விவரித்வா விப⁴ஜித்வா தே³ஸியமானோவ விரோசதி நோ படிச்ச²ன்னோ.

அஞ்ஞேன பே⁴ஸஜ்ஜேன கரணீயேன அஞ்ஞம் விஞ்ஞாபேந்தோ கி³லானோ ஆபஜ்ஜதி, ந பே⁴ஸஜ்ஜேன கரணீயேன பே⁴ஸஜ்ஜம் விஞ்ஞாபேந்தோ அகி³லானோ ஆபஜ்ஜதி, அவஸேஸம் ஆபத்திம் கி³லானோ சேவ ஆபஜ்ஜதி அகி³லானோ ச.

அந்தோ ஆபஜ்ஜதி நோ ப³ஹீதி அனுபக²ஜ்ஜ ஸேய்யம் கப்பேந்தோ அந்தோ ஆபஜ்ஜதி நோ ப³ஹி, ப³ஹி ஆபஜ்ஜதி நோ அந்தோதி ஸங்கி⁴கம் மஞ்சாதி³ம் அஜ்ஜோ²காஸே ஸந்த²ரித்வா பக்கமந்தோ ப³ஹி ஆபஜ்ஜதி நோ அந்தோ, அவஸேஸம் பன அந்தோ சேவ ஆபஜ்ஜதி ப³ஹி ச. அந்தோஸீமாயாதி ஆக³ந்துகோ ஆக³ந்துகவத்தம் அத³ஸ்ஸேத்வா ஸச²த்துபாஹனோ விஹாரம் பவிஸந்தோ உபசாரஸீமம் ஓக்கந்தமத்தோவ ஆபஜ்ஜதி. ப³ஹிஸீமாயாதி க³மிகோ தா³ருப⁴ண்ட³படிஸாமனாதி³க³மிகவத்தம் அபூரேத்வா பக்கமந்தோ உபசாரஸீமம் அதிக்கந்தமத்தோவ ஆபஜ்ஜதி. அவஸேஸம் அந்தோஸீமாய சேவ ஆபஜ்ஜதி ப³ஹிஸீமாய ச. ஸதி வுட்³ட⁴தரே அனஜ்ஜி²ட்டோ² த⁴ம்மம் பா⁴ஸந்தோ ஸங்க⁴மஜ்ஜே² ஆபஜ்ஜதி நாம. க³ணமஜ்ஜே²பி புக்³க³லஸந்திகேபி ஏஸேவ நயோ. காயேன வுட்டா²தீதி திணவத்தா²ரகஸமதே²ன வுட்டா²தி. காயம் அசாலேத்வா வாசாய தே³ஸேந்தஸ்ஸ வாசாய வுட்டா²தி. வசீஸம்பயுத்தம் காயகிரியம் கத்வா தே³ஸேந்தஸ்ஸ காயேன வாசாய வுட்டா²தி நாம. ஸங்க⁴மஜ்ஜே² தே³ஸனாகா³மினீபி வுட்டா²னகா³மினீபி வுட்டா²தி. க³ணபுக்³க³லமஜ்ஜே² பன தே³ஸனாகா³மினீயேவ வுட்டா²தி.

ஆகா³ள்ஹாய சேதேய்யாதி ஆகா³ள்ஹாய த³ள்ஹபா⁴வாய சேதேய்ய; தஜ்ஜனீயகம்மாதி³கதஸ்ஸ வத்தம் ந பூரயதோ இச்ச²மானோ ஸங்கோ⁴ உக்கே²பனீயகம்மம் கரேய்யாதி அத்தோ². அலஜ்ஜீ ச ஹோதி பா³லோ ச அபகதத்தோ சாதி ஏத்த² பா³லோ ‘‘அயம் த⁴ம்மாத⁴ம்மம் ந ஜானாதி’’ அபகதத்தோ வா ‘‘ஆபத்தானாபத்திம் ந ஜானாதீ’’தி ந ஏத்தாவதா கம்மம் காதப்³ப³ம்; பா³லபா⁴வமூலகம் பன அபகதத்தபா⁴வமூலகஞ்ச ஆபத்திம் ஆபன்னஸ்ஸ கம்மம் காதப்³ப³ந்தி அத்தோ². அதி⁴ஸீலே ஸீலவிபன்னோ நாம த்³வே ஆபத்திக்க²ந்தே⁴ ஆபன்னோ; ஆசாரவிபன்னோ நாம பஞ்ச ஆபத்திக்க²ந்தே⁴ ஆபன்னோ; தி³ட்டி²விபன்னோ நாம அந்தக்³கா³ஹிகாய தி³ட்டி²யா ஸமன்னாக³தோ. தேஸம் ஆபத்திம் அபஸ்ஸந்தானம் அப்படிகரோந்தானம் தி³ட்டி²ஞ்ச அனிஸ்ஸஜ்ஜந்தானம்யேவ கம்மம் காதப்³ப³ம்.

காயிகோ த³வோ நாம பாஸகாதீ³ஹி ஜூதகீளனாதி³பே⁴தோ³ அனாசாரோ; வாசஸிகோ த³வோ நாம முகா²லம்ப³ரகரணாதி³பே⁴தோ³ அனாசாரோ; காயிகவாசஸிகோ நாம நச்சனகா³யனாதி³பே⁴தோ³ த்³வீஹிபி த்³வாரேஹி அனாசாரோ. காயிகோ அனாசாரோ நாம காயத்³வாரே பஞ்ஞத்தஸிக்கா²பத³வீதிக்கமோ; வாசஸிகோ அனாசாரோ நாம வசீத்³வாரே பஞ்ஞத்தஸிக்கா²பத³வீதிக்கமோ; காயிகவாசஸிகோ நாம த்³வாரத்³வயேபி பஞ்ஞத்தஸிக்கா²பத³வீதிக்கமோ. காயிகேன உபகா⁴திகேனாதி காயத்³வாரே பஞ்ஞத்தஸ்ஸ ஸிக்கா²பத³ஸ்ஸ அஸிக்க²னேன, யோ ஹி தம் ந ஸிக்க²தி, ஸோ நம் உபகா⁴தேதி, தஸ்மா தஸ்ஸ தம் அஸிக்க²னம் ‘‘காயிகம் உபகா⁴திக’’ந்தி வுச்சதி. ஸேஸபத³த்³வயேபி ஏஸேவ நயோ. காயிகேன மிச்சா²ஜீவேனாதி ஜங்க⁴பேஸனிகாதி³னா வா க³ண்ட³பா²லனாதி³னா வா வேஜ்ஜகம்மேன; வாசஸிகேனாதி ஸாஸனஉக்³க³ஹணஆரோசனாதி³னா; ததியபத³ம் உப⁴யஸம்பயோக³வஸேன வுத்தம்.

அலம் பி⁴க்கு² மா ப⁴ண்ட³னந்தி அலம் பி⁴க்கு² மா ப⁴ண்ட³னம் கரி, மா கலஹம், மா விவாத³ம் கரீதி அத்தோ². ந வோஹரிதப்³ப³ந்தி ந கிஞ்சி வத்தப்³ப³ம்; வத³தோபி ஹி தாதி³ஸஸ்ஸ வசனம் ந ஸோதப்³ப³ம் மஞ்ஞந்தி. ந கிஸ்மிஞ்சி பச்சேகட்டா²னேதி கிஸ்மிஞ்சி பீ³ஜனக்³கா³ஹாதி³கே ஏகஸ்மிம்பி ஜேட்ட²கட்டா²னே ந ட²பேதப்³போ³தி அத்தோ². ஓகாஸகம்மம் காரேந்தஸ்ஸாதி ‘‘கரோது ஆயஸ்மா ஓகாஸம், அஹம் தம் வத்துகாமோ’’தி ஏவம் ஓகாஸம் காரேந்தஸ்ஸ. நாலம் ஓகாஸகம்மம் காதுந்தி ‘‘கிம் த்வம் கரிஸ்ஸஸீ’’தி ஓகாஸோ ந காதப்³போ³. ஸவசனீயம் நாதா³தப்³ப³ந்தி வசனம் ந ஆதா³தப்³ப³ம், வசனம்பி ந ஸோதப்³ப³ம்; யத்த² க³ஹேத்வா க³ந்துகாமோ ஹோதி, ந தத்த² க³ந்தப்³ப³ந்தி அத்தோ².

தீஹங்கே³ஹி ஸமன்னாக³தஸ்ஸ பி⁴க்கு²னோ வினயோதி யம் ஸோ ஜானாதி, ஸோ தஸ்ஸ வினயோ நாம ஹோதி; ஸோ ந புச்சி²தப்³போ³தி அத்தோ². அனுயோகோ³ ந தா³தப்³போ³தி ‘‘இத³ம் கப்பதீ’’தி புச்ச²ந்தஸ்ஸ புச்சா²ய ஓகாஸோ ந தா³தப்³போ³, ‘‘அஞ்ஞம் புச்சா²’’தி வத்தப்³போ³. இதி ஸோ நேவ புச்சி²தப்³போ³ நாஸ்ஸ புச்சா² ஸோதப்³பா³தி அத்தோ². வினயோ ந ஸாகச்சா²தப்³போ³தி வினயபஞ்ஹோ ந ஸாகச்சி²தப்³போ³, கப்பியாகப்பியகதா² ந ஸம்ஸந்தே³தப்³பா³.

இத³மப்பஹாயாதி ஏதம் ப்³ரஹ்மசாரிபடிஞ்ஞாதாதி³கம் லத்³தி⁴ம் அவிஜஹித்வா. ஸுத்³த⁴ம் ப்³ரஹ்மசாரிந்தி கீ²ணாஸவம் பி⁴க்கு²ம். ‘‘பாதப்³யதம் ஆபஜ்ஜதீ’’தி பாதப்³யபா⁴வம் படிஸேவனம் ஆபஜ்ஜதி. ‘‘இத³மப்பஹாயா’’தி வசனதோ பன தம் ப்³ரஹ்மசாரிபடிஞ்ஞாதம் பஹாய கீ²ணாஸவம் ‘‘முஸா மயா ப⁴ணிதம், க²மத² மே’’தி க²மாபேத்வா ‘‘நத்தி² காமேஸு தோ³ஸோ’’தி லத்³தி⁴ம் விஜஹித்வா க³திவிஸோத⁴னம் கரேய்ய. அகுஸலமூலானீதி அகுஸலானி சேவ மூலானி ச, அகுஸலானம் வா மூலானி அகுஸலமூலானி. குஸலமூலேஸுபி ஏஸேவ நயோ. து³ட்டு² சரிதானி விரூபானி வா சரிதானி து³ச்சரிதானி. ஸுட்டு² சரிதானி ஸுந்த³ரானி வா சரிதானி ஸுசரிதானி. காயேன கரணபூ⁴தேன கதம் து³ச்சரிதம் காயது³ச்சரிதம். ஏஸ நயோ ஸப்³ப³த்த². ஸேஸம் தத்த² தத்த² வுத்தனயத்தா உத்தானமேவாதி.

திகவாரவண்ணனா நிட்டி²தா.

சதுக்கவாரவண்ணனா

324. சதுக்கேஸு ஸகவாசாய ஆபஜ்ஜதி பரவாசாய வுட்டா²தீதி வசீத்³வாரிகம் பத³ஸோத⁴ம்மாதி³பே⁴த³ம் ஆபத்திம் ஆபஜ்ஜித்வா திணவத்தா²ரகஸமத²ட்டா²னம் க³தோ பரஸ்ஸ கம்மவாசாய வுட்டா²தி. பரவாசாய ஆபஜ்ஜதி ஸகவாசாய வுட்டா²தீதி பாபிகாய தி³ட்டி²யா அப்படினிஸ்ஸக்³கே³ பரஸ்ஸ கம்மவாசாய ஆபஜ்ஜதி, புக்³க³லஸ்ஸ ஸந்திகே தே³ஸேந்தோ ஸகவாசாய வுட்டா²தி. ஸகவாசாய ஆபஜ்ஜதி ஸகவாசாய வுட்டா²தீதி வசீத்³வாரிகம் பத³ஸோத⁴ம்மாதி³பே⁴த³ம் ஆபத்திம் ஸகவாசாய ஆபஜ்ஜதி, தே³ஸேத்வா வுட்ட²ஹந்தோபி ஸகவாசாய வுட்டா²தி. பரவாசாய ஆபஜ்ஜதி பரவாசாய வுட்டா²தீதி யாவததியகம் ஸங்கா⁴தி³ஸேஸம் பரஸ்ஸ கம்மவாசாய ஆபஜ்ஜதி, வுட்ட²ஹந்தோபி பரஸ்ஸ பரிவாஸகம்மவாசாதீ³ஹி வுட்டா²தி. ததோ பரேஸு காயத்³வாரிகம் காயேன ஆபஜ்ஜதி, தே³ஸேந்தோ வாசாய வுட்டா²தி. வசீத்³வாரிகம் வாசாய ஆபஜ்ஜதி, திணவத்தா²ரகே காயேன வுட்டா²தி. காயத்³வாரிகம் காயேனஆபஜ்ஜதி, தமேவ திணவத்தா²ரகே காயேன வுட்டா²தி. வசீத்³வாரிகம் வாசாய ஆபஜ்ஜதி, தமேவ தே³ஸேந்தோ வாசாய வுட்டா²தி. ஸங்கி⁴கமஞ்சஸ்ஸ அத்தனோ பச்சத்த²ரணேன அனத்த²ரதோ காயஸம்பு²ஸனே லோமக³ணனாய ஆபஜ்ஜிதப்³பா³பத்திம் ஸஹகா³ரஸேய்யாபத்திஞ்ச பஸுத்தோ ஆபஜ்ஜதி, பபு³ஜ்ஜி²த்வா பன ஆபன்னபா⁴வம் ஞத்வா தே³ஸேந்தோ படிபு³த்³தோ⁴ வுட்டா²தி. ஜக்³க³ந்தோ ஆபஜ்ஜித்வா பன திணவத்தா²ரகஸமத²ட்டா²னே ஸயந்தோ படிபு³த்³தோ⁴ ஆபஜ்ஜதி பஸுத்தோ வுட்டா²தி நாம. பச்சி²மபத³த்³வயம்பி வுத்தானுஸாரேனேவ வேதி³தப்³ப³ம்.

அசித்தகாபத்திம் அசித்தகோ ஆபஜ்ஜதி நாம. பச்சா² தே³ஸேந்தோ ஸசித்தகோ வுட்டா²தி. ஸசித்தகாபத்திம் ஸசித்தகோ ஆபஜ்ஜதி நாம. திணவத்தா²ரகட்டா²னே ஸயந்தோ அசித்தகோ வுட்டா²தி. ஸேஸபத³த்³வயம்பி வுத்தானுஸாரேனேவ வேதி³தப்³ப³ம். யோ ஸபா⁴க³ம் ஆபத்திம் தே³ஸேதி, அயம் தே³ஸனாபச்சயா து³க்கடம் ஆபஜ்ஜந்தோ பாசித்தியாதீ³ஸு அஞ்ஞதரம் தே³ஸேதி, தஞ்ச தே³ஸேந்தோ து³க்கடம் ஆபஜ்ஜதி. தம் பன து³க்கடம் ஆபஜ்ஜந்தோ பாசித்தியாதி³தோ வுட்டா²தி. பாசித்தியாதி³தோ ச வுட்ட²ஹந்தோ தம் ஆபஜ்ஜதி. இதி ஏகஸ்ஸ புக்³க³லஸ்ஸ ஏகமேவ பயோக³ம் ஸந்தா⁴ய ‘‘ஆபத்திம் ஆபஜ்ஜந்தோ தே³ஸேதீ’’தி இத³ம் சதுக்கம் வுத்தந்தி வேதி³தப்³ப³ம்.

கம்மசதுக்கே பாபிகாய தி³ட்டி²யா அப்படினிஸ்ஸக்³கா³பத்திம் கம்மேன ஆபஜ்ஜதி, தே³ஸேந்தோ அகம்மேன வுட்டா²தி. விஸ்ஸட்டி²ஆதி³கம் அகம்மேன ஆபஜ்ஜதி, பரிவாஸாதி³னா கம்மேன வுட்டா²தி. ஸமனுபா⁴ஸனம் கம்மேனேவ ஆபஜ்ஜதி, கம்மேன வுட்டா²தி. ஸேஸம் அகம்மேன ஆபஜ்ஜதி,அகம்மேனவுட்டா²தி.

பரிக்கா²ரசதுக்கே பட²மோ ஸகபரிக்கா²ரோ, து³தியோ ஸங்கி⁴கோவ ததியோ சேதியஸந்தகோ, சதுத்தோ² கி³ஹிபரிக்கா²ரோ. ஸசே பன ஸோ பத்தசீவரனவகம்மபே⁴ஸஜ்ஜானம் அத்தா²ய ஆஹடோ ஹோதி, அவாபுரணம் தா³தும் அந்தோ ட²பாபேதுஞ்ச வட்டதி.

ஸம்முகா²சதுக்கே பாபிகாய தி³ட்டி²யா அப்படினிஸ்ஸக்³கா³பத்திம் ஸங்க⁴ஸ்ஸ ஸம்முகா² ஆபஜ்ஜதி, வுட்டா²னகாலே பன ஸங்கே⁴ன கிச்சம் நத்தீ²தி பரம்முகா² வுட்டா²தி. விஸ்ஸட்டி²ஆதி³கம் பரம்முகா² ஆபஜ்ஜதி, ஸங்க⁴ஸ்ஸ ஸம்முகா² வுட்டா²தி. ஸமனுபா⁴ஸனம் ஸங்க⁴ஸ்ஸ ஸம்முகா² ஏவ ஆபஜ்ஜதி, ஸம்முகா² வுட்டா²தி. ஸேஸம் ஸம்பஜானமுஸாவாதா³தி³பே⁴த³ம் பரம்முகா²வ ஆபஜ்ஜதி, பரம்முகா²வ வுட்டா²தி. அஜானந்தசதுக்கம் அசித்தகசதுக்கஸதி³ஸம்.

லிங்க³பாதுபா⁴வேனாதி ஸயிதஸ்ஸேவ பி⁴க்கு²ஸ்ஸ வா பி⁴க்கு²னியா வா லிங்க³பரிவத்தே ஜாதே ஸஹகா³ரஸேய்யாபத்தி ஹோதி இத³மேவ தம் படிச்ச வுத்தம். உபி⁴ன்னம்பி பன அஸாதா⁴ரணாபத்தி லிங்க³பாதுபா⁴வேன வுட்டா²தி. ஸஹபடிலாப⁴சதுக்கே யஸ்ஸ பி⁴க்கு²னோ லிங்க³ம் பரிவத்ததி, ஸோ ஸஹ லிங்க³படிலாபே⁴ன பட²மம் உப்பன்னவஸேன ஸேட்ட²பா⁴வேன ச புரிமம் புரிஸலிங்க³ம் ஜஹதி, பச்சி²மே இத்தி²லிங்கே³ பதிட்டா²தி, புரிஸகுத்தபுரிஸாகாராதி³வஸேன பவத்தா காயவசீவிஞ்ஞத்தியோ படிப்பஸ்ஸம்ப⁴ந்தி, பி⁴க்கூ²தி வா புரிஸோதி வா ஏவம் பவத்தா பண்ணத்தியோ நிருஜ்ஜ²ந்தி, யானி பி⁴க்கு²னீஹி அஸாதா⁴ரணானி ச²சத்தாலீஸ ஸிக்கா²பதா³னி தேஹி அனாபத்தியேவ ஹோதி. து³தியசதுக்கே பன யஸ்ஸா பி⁴க்கு²னியா லிங்க³ம் பரிவத்ததி, ஸா பச்சா²ஸமுப்பத்தியா வா ஹீனபா⁴வேன வா பச்சி²மந்தி ஸங்க்²யம் க³தம் இத்தி²லிங்க³ம் ஜஹதி, வுத்தப்பகாரேன புரிமந்தி ஸங்க்²யம் க³தே புரிஸலிங்கே³ பதிட்டா²தி. வுத்தவிபரீதா விஞ்ஞத்தியோ படிப்பஸ்ஸம்ப⁴ந்தி, பி⁴க்கு²னீதி வா இத்தீ²தி வா ஏவம் பவத்தா பண்ணத்தியோபி நிருஜ்ஜ²ந்தி, யானி பி⁴க்கூ²ஹி அஸாதா⁴ரணானி ஸதம் திம்ஸஞ்ச ஸிக்கா²பதா³னி, தேஹி அனாபத்தியேவ ஹோதி.

சத்தாரோ ஸாமுக்கம்ஸாதி சத்தாரோ மஹாபதே³ஸா, தே ஹி ப⁴க³வதா அனுப்பன்னே வத்து²ம்ஹி ஸயம் உக்கம்ஸித்வா உக்கி²பித்வா ட²பிதத்தா ‘‘ஸாமுக்கம்ஸா’’தி வுச்சந்தி. பரிபோ⁴கா³தி அஜ்ஜோ²ஹரணீயபரிபோ⁴கா³, உத³கம் பன அகாலிகத்தா அப்படிக்³க³ஹிதகம் வட்டதி. யாவகாலிகாதீ³னி அப்படிக்³க³ஹிதகானி அஜ்ஜோ²ஹரிதும் ந வட்டந்தி. சத்தாரி மஹாவிகடானி காலோதி³ஸ்ஸத்தா யதா²வுத்தே காலே வட்டந்தி. உபாஸகோ ஸீலவாதி பஞ்ச வா த³ஸ வா ஸீலானி கோ³பயமானோ.

ஆக³ந்துகாதி³சதுக்கே ஸச²த்துபாஹனோ ஸஸீஸம் பாருதோ விஹாரம் பவிஸந்தோ தத்த² விசரந்தோ ச ஆக³ந்துகோவ ஆபஜ்ஜதி, நோ ஆவாஸிகோ. ஆவாஸிகவத்தம் அகரோந்தோ பன ஆவாஸிகோ ஆபஜ்ஜதி, நோ ஆக³ந்துகோ. ஸேஸம் காயவசீத்³வாரிகம் ஆபத்திம் உபோ⁴பி ஆபஜ்ஜந்தி, அஸாதா⁴ரணம் ஆபத்திம் நேவ ஆக³ந்துகோ ஆபஜ்ஜதி, நோ ஆவாஸிகோ. க³மியசதுக்கேபி க³மியவத்தம் அபூரேத்வா க³ச்ச²ந்தோ க³மிகோ ஆபஜ்ஜதி, நோ ஆவாஸிகோ. ஆவாஸிகவத்தம் அகரோந்தோ பன ஆவாஸிகோ ஆபஜ்ஜதி, நோ க³மிகோ. ஸேஸம் உபோ⁴பி ஆபஜ்ஜந்தி, அஸாதா⁴ரணம் உபோ⁴பி நாபஜ்ஜந்தி. வத்து²னானத்ததாதி³சதுக்கே சதுன்னம் பாராஜிகானம் அஞ்ஞமஞ்ஞம் வத்து²னானத்ததாவ ஹோதி,நஆபத்தினானத்ததா. ஸப்³பா³பி ஹி ஸா பாராஜிகாபத்தியேவ. ஸங்கா⁴தி³ஸேஸாதீ³ஸுபி ஏஸேவ நயோ. பி⁴க்கு²ஸ்ஸ ச பி⁴க்கு²னியா ச அஞ்ஞமஞ்ஞம் காயஸம்ஸக்³கே³ பி⁴க்கு²ஸ்ஸ ஸங்கா⁴தி³ஸேஸோ பி⁴க்கு²னியா பாராஜிகந்தி ஏவம் ஆபத்தினானத்ததாவ ஹோதி, ந வத்து²னானத்ததா, உபி⁴ன்னம்பி ஹி காயஸம்ஸக்³கோ³வ வத்து². ததா² ‘‘லஸுணக்கா²த³னே பி⁴க்கு²னியா பாசித்தியம், பி⁴க்கு²ஸ்ஸ து³க்கட’’ந்தி ஏவமாதி³னாபேத்த² நயேன யோஜனா வேதி³தப்³பா³. சதுன்னம் பாராஜிகானம் தேரஸஹி ஸங்கா⁴தி³ஸேஸேஹி ஸத்³தி⁴ம் வத்து²னானத்ததா சேவ ஆபத்தினானத்ததா ச. ஏவம் ஸங்கா⁴தி³ஸேஸாதீ³னம் அனியதாதீ³ஹி. ஆதி³தோ பட்டா²ய சத்தாரி பாராஜிகானி ஏகதோ ஆபஜ்ஜந்தானம் பி⁴க்கு²பி⁴க்கு²னீனம் நேவ வத்து²னானத்ததா நோ ஆபத்தினானத்ததா. விஸும் ஆபஜ்ஜந்தேஸுபி ஸேஸா ஸாதா⁴ரணாபத்தியோ ஆபஜ்ஜந்தேஸுபி ஏஸேவ நயோ.

வத்து²ஸபா⁴கா³தி³சதுக்கே பி⁴க்கு²ஸ்ஸ ச பி⁴க்கு²னியா ச காயஸம்ஸக்³கே³ வத்து²ஸபா⁴க³தா, நோ ஆபத்திஸபா⁴க³தா, சதூஸு பாராஜிகேஸு ஆபத்திஸபா⁴க³தா, நோ வத்து²ஸபா⁴க³தா. ஏஸ நயோ ஸங்கா⁴தி³ஸேஸாதீ³ஸு. பி⁴க்கு²ஸ்ஸ ச பி⁴க்கு²னியா ச சதூஸு பாராஜிகேஸு வத்து²ஸபா⁴க³தா சேவ ஆபத்திஸபா⁴க³தா ச. ஏஸ நயோ ஸப்³பா³ஸு ஸாதா⁴ரணாபத்தீஸு. அஸாதா⁴ரணாபத்தியம் நேவ வத்து²ஸபா⁴க³தா நோ ஆபத்திஸபா⁴க³தா. யோ ஹி புரிமசதுக்கே பட²மோ பஞ்ஹோ, ஸோ இத⁴ து³தியோ; யோ ச தத்த² து³தியோ, ஸோ இத⁴ பட²மோ. ததியசதுத்தே²ஸு நானாகரணம் நத்தி².

உபஜ்ஜா²யசதுக்கே ஸத்³தி⁴விஹாரிகஸ்ஸ உபஜ்ஜா²யேன கத்தப்³ப³வத்தஸ்ஸ அகரணே ஆபத்திம் உபஜ்ஜா²யோ ஆபஜ்ஜதி, நோ ஸத்³தி⁴விஹாரிகோ உபஜ்ஜா²யஸ்ஸ கத்தப்³ப³வத்தம் அகரோந்தோ ஸத்³தி⁴விஹாரிகோ ஆபஜ்ஜதி, நோ உபஜ்ஜா²யோ; ஸேஸம் உபோ⁴பி ஆபஜ்ஜந்தி, அஸாதா⁴ரணம் உபோ⁴பி நாபஜ்ஜந்தி. ஆசரியசதுக்கேபி ஏஸேவ நயோ.

ஆதி³யந்தசதுக்கே பாத³ம் வா அதிரேகபாத³ம் வா ஸஹத்தா² ஆதி³யந்தோ க³ருகம் ஆபஜ்ஜதி, ஊனகபாத³ம் க³ண்ஹாஹீதி ஆணத்தியா அஞ்ஞம் பயோஜேந்தோ லஹுகம் ஆபஜ்ஜதி. ஏதேன நயேன ஸேஸபத³த்தயம் வேதி³தப்³ப³ம்.

அபி⁴வாத³னாரஹசதுக்கே பி⁴க்கு²னீனம் தாவ ப⁴த்தக்³கே³ நவமபி⁴க்கு²னிதோ பட்டா²ய உபஜ்ஜா²யாபி அபி⁴வாத³னாரஹா நோ பச்சுட்டா²னாரஹா. அவிஸேஸேன ச விப்பகதபோ⁴ஜனஸ்ஸ பி⁴க்கு²ஸ்ஸ யோ கோசி வுட்³ட⁴தரோ. ஸட்டி²வஸ்ஸஸ்ஸாபி பாரிவாஸிகஸ்ஸ ஸமீபக³தோ தத³ஹுபஸம்பன்னோபி பச்சுட்டா²னாரஹோ நோ அபி⁴வாத³னாரஹோ. அப்படிக்கி²த்தேஸு டா²னேஸு வுட்³டோ⁴ நவகஸ்ஸ அபி⁴வாத³னாரஹோ சேவ பச்சுட்டா²னாரஹோ ச. நவகோ பன வுட்³ட⁴ஸ்ஸ நேவ அபி⁴வாத³னாரஹோ ந பச்சுட்டா²னாரஹோ. ஆஸனாரஹசதுக்கஸ்ஸ பட²மபத³ம் புரிமசதுக்கே து³தியபதே³ன, து³தியபத³ஞ்ச பட²மபதே³ன அத்த²தோ ஸதி³ஸம்.

காலசதுக்கே பவாரேத்வா பு⁴ஞ்ஜந்தோ காலே ஆபஜ்ஜதி நோ விகாலே, விகாலபோ⁴ஜனாபத்திம் விகாலே ஆபஜ்ஜதி நோ காலே, ஸேஸம் காலே சேவ ஆபஜ்ஜதி விகாலே ச, அஸாதா⁴ரணம் நேவ காலே நோ விகாலே. படிக்³க³ஹிதசதுக்கே புரேப⁴த்தம் படிக்³க³ஹிதாமிஸம் காலே கப்பதி நோ விகாலே. பானகம் விகாலே கப்பதி, புனதி³வஸம்ஹி நோ காலே. ஸத்தாஹகாலிகம் யாவஜீவிகம் காலே சேவ கப்பதி விகாலே ச. அத்தனோ அத்தனோ காலாதீதம் யாவகாலிகாதி³த்தயம் அகப்பியமம்ஸம் உக்³க³ஹிதகமப்படிக்³க³ஹிதகஞ்ச நேவ காலே கப்பதி நோ விகாலே.