க²ந்த⁴கபுச்சா²வாரோ

புச்சா²விஸ்ஸஜ்ஜனாவண்ணனா

320. உபஸம்பத³ம் புச்சி²ஸ்ஸந்தி உபஸம்பத³க்க²ந்த⁴கம் புச்சி²ஸ்ஸம். ஸனிதா³னம் ஸனித்³தே³ஸந்தி நிதா³னேன ச நித்³தே³ஸேன ச ஸத்³தி⁴ம் புச்சி²ஸ்ஸாமி. ஸமுக்கட்ட²பதா³னம் கதி ஆபத்தியோதி யானி தத்த² ஸமுக்கட்டா²னி உத்தமானி பதா³னி வுத்தானி, தேஸம் ஸமுக்கட்ட²பதா³னம் உத்தமபதா³னம் ஸங்கே²பதோ கதி ஆபத்தியோ ஹோந்தீதி. யேன யேன ஹி பதே³ன யா யா ஆபத்தி பஞ்ஞத்தா, ஸா ஸா தஸ்ஸ தஸ்ஸ பத³ஸ்ஸ ஆபத்தீதி வுச்சதி. தேன வுத்தம் ‘‘ஸமுக்கட்ட²பதா³னம் கதி ஆபத்தியோ’’தி. த்³வே ஆபத்தியோதி ஊனவீஸதிவஸ்ஸம் உபஸம்பாதே³ந்தஸ்ஸ பாசித்தியம், ஸேஸேஸு ஸப்³ப³பதே³ஸு து³க்கடம்.

திஸ்ஸோதி ‘‘நஸ்ஸந்தேதே வினஸ்ஸந்தேதே, கோ தேஹி அத்தோ²’’தி பே⁴த³புரேக்கா²ரானம் உபோஸத²கரணே து²ல்லச்சயம், உக்கி²த்தகேன ஸத்³தி⁴ம் உபோஸத²கரணே பாசித்தியம், ஸேஸேஸு து³க்கடந்தி ஏவம் உபோஸத²க்க²ந்த⁴கே திஸ்ஸோ ஆபத்தியோ. ஏகாதி வஸ்ஸூபனாயிகக்க²ந்த⁴கே ஏகா து³க்கடாபத்தியேவ.

திஸ்ஸோதி பே⁴த³புரேக்கா²ரஸ்ஸ பவாரயதோ து²ல்லச்சயம், உக்கி²த்தகேன ஸத்³தி⁴ம் பாசித்தியம், ஸேஸேஸு து³க்கடந்தி ஏவம் பவாரணாக்க²ந்த⁴கேபி திஸ்ஸோ ஆபத்தியோ.

திஸ்ஸோதி வச்ச²தரிம் உக்³க³ஹேத்வா மாரேந்தானம் பாசித்தியம், ரத்தேன சித்தேன அங்க³ஜாதசு²பனே து²ல்லச்சயம், ஸேஸேஸு து³க்கடந்தி ஏவம் சம்மஸம்யுத்தேபி திஸ்ஸோ ஆபத்தியோ. பே⁴ஸஜ்ஜக்க²ந்த⁴கேபி ஸமந்தா த்³வங்கு³லே து²ல்லச்சயம், போ⁴ஜ்ஜயாகு³யா பாசித்தியம், ஸேஸேஸு து³க்கடந்தி ஏவம் திஸ்ஸோ ஆபத்தியோ.

கதி²னம் கேவலம் பஞ்ஞத்திமேவ, நத்தி² தத்த² ஆபத்தி. சீவரஸம்யுத்தே குஸசீரவாகசீரேஸு து²ல்லச்சயம், அதிரேகசீவரே நிஸ்ஸக்³கி³யம், ஸேஸேஸு து³க்கடந்தி இமா திஸ்ஸோ ஆபத்தியோ.

சம்பேய்யகே ஏகா து³க்கடாபத்தியேவ. கோஸம்ப³க-கம்மக்க²ந்த⁴க-பாரிவாஸிகஸமுச்சயக்க²ந்த⁴கேஸுபி ஏகா து³க்கடாபத்தியேவ.

ஸமத²க்க²ந்த⁴கே ச²ந்த³தா³யகோ கி²ய்யதி, கி²ய்யனகம் பாசித்தியம், ஸேஸேஸு து³க்கடந்தி இமா த்³வே ஆபத்தியோ. கு²த்³த³கவத்து²கே அத்தனோ அங்க³ஜாதம் சி²ந்த³தி, து²ல்லச்சயம், ரோமட்டே² பாசித்தியம், ஸேஸேஸு து³க்கடந்தி இமா திஸ்ஸோ ஆபத்தியோ. ஸேனாஸனக்க²ந்த⁴கே க³ருப⁴ண்ட³விஸ்ஸஜ்ஜனே து²ல்லச்சயம், ஸங்கி⁴கா விஹாரா நிக்கட்³ட⁴னே பாசித்தியம், ஸேஸேஸு து³க்கடந்தி இமா திஸ்ஸோ ஆபத்தியோ.

ஸங்க⁴பே⁴தே³பே⁴த³கானுவத்தகானம் து²ல்லச்சயம், க³ணபோ⁴ஜனே பாசித்தியந்தி இமா த்³வே ஆபத்தியோ. ஸமாசாரம் புச்சி²ஸ்ஸந்தி வுத்தே வத்தக்க²ந்த⁴கே ஏகா து³க்கடாபத்தியேவ. ஸா ஸப்³ப³வத்தேஸு அனாத³ரியேன ஹோதி. ததா² பாதிமோக்க²ட்ட²பனே. பி⁴க்கு²னிக்க²ந்த⁴கே அப்பவாரணாய பாசித்தியம், ஸேஸேஸு து³க்கடந்தி த்³வே ஆபத்தியோ. பஞ்சஸதிகஸத்தஸதிகேஸு கேவலம் த⁴ம்மோ ஸங்க³ஹம் ஆரோபிதோ, நத்தி² தத்த² ஆபத்தீதி.

க²ந்த⁴கபுச்சா²வாரவண்ணனா நிட்டி²தா.