ஏகுத்தரிகனயோ

ஏககவாரவண்ணனா

321. ஆபத்திகரா த⁴ம்மா ஜானிதப்³பா³திஆதி³ம்ஹி ஏகுத்தரிகனயே ஆபத்திகரா த⁴ம்மா நாம ச² ஆபத்திஸமுட்டா²னானி. ஏதேஸஞ்ஹி வஸேன புக்³க³லோ ஆபத்திம் ஆபஜ்ஜதி, தஸ்மா ‘‘ஆபத்திகரா’’தி வுத்தா. அனாபத்திகரா நாம ஸத்த ஸமதா². ஆபத்தி ஜானிதப்³பா³தி தஸ்மிம் தஸ்மிம் ஸிக்கா²பதே³ ச விப⁴ங்கே³ ச வுத்தா ஆபத்தி ஜானிதப்³பா³. அனாபத்தீதி ‘‘அனாபத்தி பி⁴க்கு² அஸாதி³யந்தஸ்ஸா’’திஆதி³னா நயேன அனாபத்தி ஜானிதப்³பா³. லஹுகாதி லஹுகேன வினயகம்மேன விஸுஜ்ஜ²னதோ பஞ்சவிதா⁴ ஆபத்தி. க³ருகாதி க³ருகேன வினயகம்மேன விஸுஜ்ஜ²னதோ ஸங்கா⁴தி³ஸேஸா ஆபத்தி. கேனசி ஆகாரேன அனாபத்திபா⁴வம் உபனேதும் அஸக்குணேய்யதோ பாராஜிகாபத்தி ச. ஸாவஸேஸாதி ட²பேத்வா பாராஜிகம் ஸேஸா. அனவஸேஸாதி பாராஜிகாபத்தி. த்³வே ஆபத்திக்க²ந்தா⁴ து³ட்டு²ல்லா; அவஸேஸா அது³ட்டு²ல்லா. ஸப்படிகம்மது³கம் ஸாவஸேஸது³கஸதி³ஸம். தே³ஸனாகா³மினிது³கம் லஹுகது³கஸங்க³ஹிதம்.

அந்தராயிகாதி ஸத்தபி ஆபத்தியோ ஸஞ்சிச்ச வீதிக்கந்தா ஸக்³க³ந்தராயஞ்சேவ மோக்க²ந்தராயஞ்ச கரோந்தீதி அந்தராயிகா. அஜானந்தேன வீதிக்கந்தா பன பண்ணத்திவஜ்ஜாபத்தி நேவ ஸக்³க³ந்தராயம் ந மோக்க²ந்தராயம் கரோதீதி அனந்தராயிகா. அந்தராயிகம் ஆபன்னஸ்ஸாபி தே³ஸனாகா³மினிம் தே³ஸேத்வா வுட்டா²னகா³மினிதோ வுட்டா²ய ஸுத்³தி⁴பத்தஸ்ஸ ஸாமணேரபூ⁴மியம் டி²தஸ்ஸ ச அவாரிதோ ஸக்³க³மோக்க²மக்³கோ³தி. ஸாவஜ்ஜபஞ்ஞத்தீதி லோகவஜ்ஜா. அனவஜ்ஜபஞ்ஞத்தீதி பண்ணத்திவஜ்ஜா. கிரியதோ ஸமுட்டி²தா நாம யம் கரோந்தோ ஆபஜ்ஜதி பாராஜிகாபத்தி விய. அகிரியதோதி யம் அகரோந்தோ ஆபஜ்ஜதி, சீவரஅனதி⁴ட்டா²னாபத்தி விய. கிரியாகிரியதோதி யம் கரோந்தோ ச அகரோந்தோ ச ஆபஜ்ஜதி, குடிகாராபத்தி விய.

புப்³பா³பத்தீதி பட²மம் ஆபன்னாபத்தி. அபராபத்தீதி பாரிவாஸிகாதீ³ஹி பச்சா² ஆபன்னாபத்தி. புப்³பா³பத்தீனம் அந்தராபத்தி நாம மூலவிஸுத்³தி⁴யா அந்தராபத்தி. அபராபத்தீனம் அந்தராபத்தி நாம அக்³க⁴விஸுத்³தி⁴யா அந்தராபத்தி. குருந்தி³யம் பன ‘‘புப்³பா³பத்தி நாம பட²மம் ஆபன்னா. அபராபத்தி நாம மானத்தாரஹகாலே ஆபன்னா. புப்³பா³பத்தீனம் அந்தராபத்தி நாம பரிவாஸே ஆபன்னா. அபராபத்தீனம் அந்தராபத்தி நாம மானத்தசாரே ஆபன்னா’’தி வுத்தம். இத³ம்பி ஏகேன பரியாயேன யுஜ்ஜதி.

தே³ஸிதா க³ணனூபகா³ நாம யா து⁴ரனிக்கே²பம் கத்வா புன ந ஆபஜ்ஜிஸ்ஸாமீதி தே³ஸிதா ஹோதி. அக³ணனூபகா³ நாம யா து⁴ரனிக்கே²பம் அகத்வா ஸஉஸ்ஸாஹேனேவ சித்தேன அபரிஸுத்³தே⁴ன தே³ஸிதா ஹோதி. அயஞ்ஹி தே³ஸிதாபி தே³ஸிதக³ணனம் ந உபேதி. அட்ட²மே வத்து²ஸ்மிம் பி⁴க்கு²னியா பாராஜிகமேவ ஹோதி. பஞ்ஞத்தி ஜானிதப்³பா³திஆதீ³ஸு நவஸு பதே³ஸு பட²மபாராஜிகபுச்சா²ய வுத்தனயேனேவ வினிச்ச²யோ வேதி³தப்³போ³.

து²ல்லவஜ்ஜாதி து²ல்லதோ³ஸே பஞ்ஞத்தா க³ருகாபத்தி. அது²ல்லவஜ்ஜாதி லஹுகாபத்தி. கி³ஹிபடிஸம்யுத்தாதி ஸுத⁴ம்மத்தே²ரஸ்ஸ ஆபத்தி, யா ச த⁴ம்மிகஸ்ஸ படிஸ்ஸவஸ்ஸ அஸச்சாபனே ஆபத்தி, அவஸேஸா ந கி³ஹிபடிஸம்யுத்தா. பஞ்சானந்தரியகம்மாபத்தி நியதா, ஸேஸா அனியதா. ஆதி³கரோதி ஸுதி³ன்னத்தே²ராதி³ ஆதி³கம்மிகோ. அனாதி³கரோதி மக்கடிஸமணாதி³ அனுபஞ்ஞத்திகாரகோ. அதி⁴ச்சாபத்திகோ நாம யோ கதா³சி கரஹசி ஆபத்திம் ஆபஜ்ஜதி. அபி⁴ண்ஹாபத்திகோ நாம யோ நிச்சம் ஆபஜ்ஜதி.

சோத³கோ நாம யோ வத்து²னா வா ஆபத்தியா வா பரம் சோதே³தி. யோ பன ஏவம் சோதி³தோ அயம் சுதி³தகோ நாம. பஞ்சத³ஸஸு த⁴ம்மேஸு அப்பதிட்ட²ஹித்வா அபூ⁴தேன வத்து²னா சோதே³ந்தோ அத⁴ம்மசோத³கோ நாம, தேன ததா² சோதி³தோ அத⁴ம்மசுதி³தகோ நாம. விபரியாயேன த⁴ம்மசோத³கசுதி³தகா வேதி³தப்³பா³. மிச்ச²த்தனியதேஹி வா ஸம்மத்தனியதேஹி வா த⁴ம்மேஹி ஸமன்னாக³தோ நியதோ, விபரீதோ அனியதோ.

ஸாவகா ப⁴ப்³பா³பத்திகா நாம, பு³த்³தா⁴ ச பச்சேகபு³த்³தா⁴ ச அப⁴ப்³பா³பத்திகா நாம. உக்கே²பனீயகம்மகதோ உக்கி²த்தகோ நாம, அவஸேஸசதுப்³பி³த⁴தஜ்ஜனீயாதி³கம்மகதோ அனுக்கி²த்தகோ நாம. அயஞ்ஹி உபோஸத²ம் வா பவாரணம் வா த⁴ம்மபரிபோ⁴க³ம் வா ஆமிஸபரிபோ⁴க³ம் வா ந கோபேதி. ‘‘மேத்தியம் பி⁴க்கு²னிம் நாஸேத², தூ³ஸகோ நாஸேதப்³போ³, கண்டகோ ஸமணுத்³தே³ஸோ நாஸேதப்³போ³’’தி ஏவம் லிங்க³த³ண்ட³கம்ம-ஸம்வாஸனாஸனாஹி நாஸிதப்³போ³ நாஸிதகோ நாம. ஸேஸா ஸப்³பே³ அனாஸிதகா. யேன ஸத்³தி⁴ம் உபோஸதா²தி³கோ ஸம்வாஸோ அத்தி², அயம் ஸமானஸம்வாஸகோ, இதரோ நானாஸம்வாஸகோ. ஸோ கம்மனானாஸம்வாஸகோ லத்³தி⁴னானாஸம்வாஸகோதி து³விதோ⁴ ஹோதி. ட²பனம் ஜானிதப்³ப³ந்தி ‘‘ஏகம் பி⁴க்க²வே அத⁴ம்மிகம் பாதிமோக்க²ட்ட²பன’’ந்திஆதி³னா நயேன வுத்தம் பாதிமோக்க²ட்ட²பனம் ஜானிதப்³ப³ந்தி அத்தோ².

ஏககவாரவண்ணனா நிட்டி²தா.

து³கவாரவண்ணனா

322. து³கேஸு ஸசித்தகா ஆபத்தி ஸஞ்ஞாவிமோக்கா², அசித்தகா நோஸஞ்ஞாவிமோக்கா². லத்³த⁴ஸமாபத்திகஸ்ஸ ஆபத்தி நாம பூ⁴தாரோசனாபத்தி, அலத்³த⁴ஸமாபத்திகஸ்ஸ ஆபத்தி நாம அபூ⁴தாரோசனாபத்தி. ஸத்³த⁴ம்மபடிஸஞ்ஞுத்தா நாம பத³ஸோத⁴ம்மாதி³கா, அஸத்³த⁴ம்மபடிஸஞ்ஞுத்தா நாம து³ட்டு²ல்லவாசாபத்தி. ஸபரிக்கா²ரபடிஸஞ்ஞுத்தா நாம நிஸ்ஸக்³கி³யவத்து²னோ அனிஸ்ஸஜ்ஜித்வா பரிபோ⁴கே³, பத்தசீவரானம் நித³ஹனே, கிலிட்ட²சீவரானம் அதோ⁴வனே, மலக்³க³ஹிதபத்தஸ்ஸ அபசனேதி ஏவம் அயுத்தபரிபோ⁴கே³ ஆபத்தி. பரபரிக்கா²ரபடிஸஞ்ஞுத்தா நாம ஸங்கி⁴கமஞ்சபீடா²தீ³னம் அஜ்ஜோ²காஸே ஸந்த²ரணஅனாபுச்சா²க³மனாதீ³ஸு ஆபஜ்ஜிதப்³பா³ ஆபத்தி. ஸபுக்³க³லபடிஸஞ்ஞுத்தா நாம ‘‘முது³பிட்டி²கஸ்ஸ லம்பி³ஸ்ஸ ஊருனா அங்க³ஜாதம் பீளேந்தஸ்ஸா’’திஆதி³னா நயேன வுத்தாபத்தி. பரபுக்³க³லபடிஸஞ்ஞுத்தா நாம மேது²னத⁴ம்மகாயஸம்ஸக்³க³பஹாரதா³னாதீ³ஸு வுத்தாபத்தி, ‘‘ஸிக²ரணீஸீ’’தி ஸச்சம் ப⁴ணந்தோ க³ருகம் ஆபஜ்ஜதி, ‘‘ஸம்பஜானமுஸாவாதே³ பாசித்திய’’ந்தி முஸா ப⁴ணந்தோ லஹுகம். அபூ⁴தாரோசனே முஸா ப⁴ணந்தோ க³ருகம். பூ⁴தாரோசனே ஸச்சம் ப⁴ணந்தோ லஹுகம்.

‘‘ஸங்க⁴கம்மம் வக்³க³ம் கரிஸ்ஸாமீ’’தி அந்தோஸீமாய ஏகமந்தே நிஸீத³ந்தோ பூ⁴மிக³தோ ஆபஜ்ஜதி நாம. ஸசே பன அங்கு³லிமத்தம்பி ஆகாஸே திட்டே²ய்ய, ந ஆபஜ்ஜேய்ய, தேன வுத்தம் ‘‘நோ வேஹாஸக³தோ’’தி. வேஹாஸகுடியா ஆஹச்சபாத³கம் மஞ்சம் வா பீட²ம் வா அபி⁴னிஸீத³ந்தோ வேஹாஸக³தோ ஆபஜ்ஜதி நாம. ஸசே பன தம் பூ⁴மியம் பஞ்ஞாபேத்வா நிபஜ்ஜேய்ய ந ஆபஜ்ஜேய்ய, தேன வுத்தம் – ‘‘நோ பூ⁴மிக³தோ’’தி. க³மியோ க³மியவத்தம் அபூரேத்வா க³ச்ச²ந்தோ நிக்க²மந்தோ ஆபஜ்ஜதி நாம, நோ பவிஸந்தோ. ஆக³ந்துகோ ஆக³ந்துகவத்தம் அபூரேத்வா ஸச²த்துபாஹனோ பவிஸந்தோ பவிஸந்தோ ஆபஜ்ஜதி நாம, நோ நிக்க²மந்தோ.

ஆதி³யந்தோ ஆபஜ்ஜதி நாம பி⁴க்கு²னீ அதிக³ம்பீ⁴ரம் உத³கஸுத்³தி⁴கம் ஆதி³யமானா; து³ப்³ப³ண்ணகரணம் அனாதி³யித்வா சீவரம் பரிபு⁴ஞ்ஜந்தோ பன அனாதி³யந்தோ ஆபஜ்ஜதி நாம. மூக³ப்³ப³தாதீ³னி தித்தி²யவத்தானி ஸமாதி³யந்தோ ஸமாதி³யந்தோ ஆபஜ்ஜதி நாம. பாரிவாஸிகாத³யோ பன தஜ்ஜனீயாதி³கம்மகதா வா அத்தனோ வத்தம் அஸமாதி³யந்தா ஆபஜ்ஜந்தி, தே ஸந்தா⁴ய வுத்தம் ‘‘அத்தா²பத்தி ந ஸமாதி³யந்தோ ஆபஜ்ஜதீ’’தி. அஞ்ஞாதிகாய பி⁴க்கு²னியா சீவரம் ஸிப்³ப³ந்தோ வேஜ்ஜகம்மப⁴ண்டா³கா³ரிககம்மசித்தகம்மாதீ³னி வா கரோந்தோ கரோந்தோ ஆபஜ்ஜதி நாம. உபஜ்ஜா²யவத்தாதீ³னி அகரோந்தோ அகரோந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரம் த³த³மானோ தே³ந்தோ ஆபஜ்ஜதி நாம. ஸத்³தி⁴விஹாரிகஅந்தேவாஸிகானம் சீவராதீ³னி அதே³ந்தோ அதே³ந்தோ ஆபஜ்ஜதி நாம. அஞ்ஞாதிகாய பி⁴க்கு²னியா சீவரம் க³ண்ஹந்தோ படிக்³க³ண்ஹந்தோ ஆபஜ்ஜதி நாம. ‘‘ந பி⁴க்க²வே ஓவாதோ³ ந க³ஹேதப்³போ³’’தி வசனதோ ஓவாத³ம் அக³ண்ஹந்தோ ந படிக்³க³ண்ஹந்தோ ஆபஜ்ஜதி நாம.

நிஸ்ஸக்³கி³யவத்து²ம் அனிஸ்ஸஜ்ஜித்வா பரிபு⁴ஞ்ஜந்தோ பரிபோ⁴கே³ன ஆபஜ்ஜதி நாம. பஞ்சாஹிகம் ஸங்கா⁴டிசாரம் அதிக்காமயமானா அபரிபோ⁴கே³ன ஆபஜ்ஜதி நாம. ஸஹகா³ரஸேய்யம் ரத்திம் ஆபஜ்ஜதி நாம, நோ தி³வா, த்³வாரம் அஸம்வரித்வா படிஸல்லீயந்தோ தி³வா ஆபஜ்ஜதி, நோ ரத்திம். ஏகரத்தசா²ரத்தஸத்தாஹத³ஸாஹமாஸாதிக்கமேஸு வுத்தஆபத்திம் ஆபஜ்ஜந்தோ அருணுக்³கே³ ஆபஜ்ஜதி நாம, பவாரேத்வா பு⁴ஞ்ஜந்தோ ந அருணுக்³கே³ ஆபஜ்ஜதி நாம.

பூ⁴தகா³மஞ்சேவ அங்க³ஜாதஞ்ச சி²ந்த³ந்தோ சி²ந்த³ந்தோ ஆபஜ்ஜதி நாம, கேஸே வா நகே² வா ந சி²ந்த³ந்தோ ந சி²ந்த³ந்தோ ஆபஜ்ஜதி நாம. ஆபத்திம் சா²தே³ந்தோ சா²தே³ந்தோ ஆபஜ்ஜதி நாம, ‘‘திணேன வா பண்ணேன வா படிச்சா²தே³த்வா ஆக³ந்தப்³ப³ம், நத்வேவ நக்³கே³ன ஆக³ந்தப்³ப³ம், யோ ஆக³ச்சே²ய்ய ஆபத்தி து³க்கடஸ்ஸா’’தி இமம் பன ஆபத்திம் ந சா²தே³ந்தோ ஆபஜ்ஜதி நாம. குஸசீராதீ³னி தா⁴ரேந்தோ தா⁴ரேந்தோ ஆபஜ்ஜதி நாம, ‘‘அயம் தே பி⁴க்கு² பத்தோ யாவ பே⁴த³னாய தா⁴ரேதப்³போ³’’தி இமம் ஆபத்திம் ந தா⁴ரேந்தோ ஆபஜ்ஜதி நாம.

‘‘அத்தனா வா அத்தானம் நானாஸம்வாஸகம் கரோதீ’’தி ஏகஸீமாயம் த்³வீஸு ஸங்கே⁴ஸு நிஸின்னேஸு ஏகஸ்மிம் பக்கே² நிஸீதி³த்வா பரபக்க²ஸ்ஸ லத்³தி⁴ம் க³ண்ஹந்தோ யஸ்மிம் பக்கே² நிஸின்னோ தேஸம் அத்தனாவ அத்தானம் நானாஸம்வாஸகம் கரோதி நாம. யேஸம் ஸந்திகே நிஸின்னோ தேஸம் க³ணபூரகோ ஹுத்வா கம்மம் கோபேதி, இதரேஸம் ஹத்த²பாஸம் அனாக³தத்தா. ஸமானஸம்வாஸகேபி ஏஸேவ நயோ. யேஸஞ்ஹி ஸோ லத்³தி⁴ம் ரோசேதி, தேஸம் ஸமானஸம்வாஸகோ ஹோதி, இதரேஸம் நானாஸம்வாஸகோ. ஸத்த ஆபத்தியோ ஸத்த ஆபத்திக்க²ந்தா⁴தி ஆபஜ்ஜிதப்³ப³தோ ஆபத்தியோ, ராஸட்டே²ன க²ந்தா⁴தி ஏவம் த்³வேயேவ நாமானி ஹோந்தீதி நாமவஸேன து³கம் த³ஸ்ஸிதம். கம்மேன வா ஸலாகக்³கா³ஹேன வாதி ஏத்த² உத்³தே³ஸோ சேவ கம்மஞ்ச ஏகம், வோஹாரோ சேவ அனுஸ்ஸாவனா ச ஸலாகக்³கா³ஹோ ச ஏகம், வோஹாரானுஸ்ஸாவனஸலாகக்³கா³ஹா புப்³ப³பா⁴கா³, கம்மஞ்சேவ உத்³தே³ஸோ ச பமாணம்.

அத்³தா⁴னஹீனோ நாம ஊனவீஸதிவஸ்ஸோ. அங்க³ஹீனோ நாம ஹத்த²ச்சி²ன்னாதி³பே⁴தோ³. வத்து²விபன்னோ நாம பண்ட³கோ திரச்சா²னக³தோ உப⁴தோப்³யஞ்ஜனகோ ச. அவஸேஸா தே²ய்யஸம்வாஸகாத³யோ அட்ட² அப⁴ப்³ப³புக்³க³லா கரணது³க்கடகா நாம. து³க்கடகிரியா து³க்கடகம்மா, இமஸ்மிம்யேவ அத்தபா⁴வே கதேன அத்தனோ கம்மேன அப⁴ப்³ப³ட்டா²னம் பத்தாதி அத்தோ². அபரிபூரோ நாம அபரிபுண்ணபத்தசீவரோ. நோ ச யாசதி நாம உபஸம்பத³ம் ந யாசதி. அலஜ்ஜிஸ்ஸ ச பா³லஸ்ஸ சாதி அலஜ்ஜீ ஸசேபி தேபிடகோ ஹோதி, பா³லோ ச ஸசேபி ஸட்டி²வஸ்ஸோ ஹோதி, உபோ⁴பி நிஸ்ஸாய ந வத்த²ப்³ப³ம். பா³லஸ்ஸ ச லஜ்ஜிஸ்ஸ சாதி ஏத்த² பா³லஸ்ஸ ‘‘த்வம் நிஸ்ஸயம் க³ண்ஹா’’தி ஆணாயபி நிஸ்ஸயோ தா³தப்³போ³, லஜ்ஜிஸ்ஸ பன யாசந்தஸ்ஸேவ. ஸாதிஸாரந்தி ஸதோ³ஸம்; யம் அஜ்ஜா²சரந்தோ ஆபத்திம் ஆபஜ்ஜதி.

காயேன படிக்கோஸனா நாம ஹத்த²விகாராதீ³ஹி படிக்கோஸனா. காயேன படிஜானாதீதி ஹத்த²விகாராதீ³ஹி படிஜானாதி. உபகா⁴திகா நாம உபகா⁴தா. ஸிக்கூ²பகா⁴திகா நாம ஸிக்கூ²பகா⁴தோ. போ⁴கூ³பகா⁴திகா நாம பரிபோ⁴கூ³பகா⁴தோ, தத்த² திஸ்ஸோ ஸிக்கா² அஸிக்க²தோ ஸிக்கூ²பகா⁴திகாதி வேதி³தப்³பா³. ஸங்கி⁴கம் வா புக்³க³லிகம் வா து³ப்பரிபோ⁴க³ம் பு⁴ஞ்ஜதோ போ⁴கூ³பகா⁴திகாதி வேதி³தப்³பா³. த்³வே வேனயிகாதி த்³வே அத்தா² வினயஸித்³தா⁴. பஞ்ஞத்தம் நாம ஸகலே வினயபிடகே கப்பியாகப்பியவஸேன பஞ்ஞத்தம். பஞ்ஞத்தானுலோமம் நாம சதூஸு மஹாபதே³ஸேஸு த³ட்ட²ப்³ப³ம். ஸேதுகா⁴தோதி பச்சயகா⁴தோ; யேன சித்தேன அகப்பியம் கரேய்ய, தஸ்ஸ சித்தஸ்ஸாபி அனுப்பாத³னந்தி அத்தோ². மத்தகாரிதாதி மத்தாய பமாணேன கரணம்; பமாணே டா²னந்தி அத்தோ². காயேன ஆபஜ்ஜதீதி காயத்³வாரிகம் காயேன ஆபஜ்ஜதி; வசீத்³வாரிகம் வாசாய. காயேன வுட்டா²தீதி திணவத்தா²ரகஸமதே² வினாபி தே³ஸனாய காயேனேவ வுட்டா²தி; தே³ஸேத்வா வுட்ட²ஹந்தோ பன வாசாய வுட்டா²தி. அப்³ப⁴ந்தரபரிபோ⁴கோ³ நாம அஜ்ஜோ²ஹரணபரிபோ⁴கோ³. பா³ஹிரபரிபோ⁴கோ³ நாம ஸீஸமக்க²னாதி³.

அனாக³தம் பா⁴ரம் வஹதீதி அதே²ரோவ ஸமானோ தே²ரேஹி வஹிதப்³ப³ம் பீ³ஜனகா³ஹத⁴ம்மஜ்ஜே²ஸனாதி³பா⁴ரம் வஹதி; தம் நித்த²ரிதும் வீரியம் ஆரப⁴தி. ஆக³தம் பா⁴ரம் ந வஹதீதி தே²ரோ தே²ரகிச்சம் ந கரோதி, ‘‘அனுஜானாமி பி⁴க்க²வே தே²ரேன பி⁴க்கு²னா ஸாமம் வா த⁴ம்மம் பா⁴ஸிதும், பரம் வா அஜ்ஜே²ஸிதும், அனுஜானாமி பி⁴க்க²வே தே²ராதே⁴ய்யம் பாதிமோக்க²’’ந்தி ஏவமாதி³ ஸப்³ப³ம் பரிஹாபேதீதி அத்தோ². ந குக்குச்சாயிதப்³ப³ம் குக்குச்சாயதீதி ந குக்குச்சாயிதப்³ப³ம் குக்குச்சாயித்வா கரோதி. குக்குச்சாயிதப்³ப³ம் ந குக்குச்சாயதீதி குக்குச்சாயிதப்³ப³ம் ந குக்குச்சாயித்வா கரோதி. ஏதேஸம் த்³வின்னம் தி³வா ச ரத்தோ ச ஆஸவா வட்³ட⁴ந்தீதி அத்தோ². அனந்தரது³கேபி வுத்தபடிபக்க²வஸேன அத்தோ² வேதி³தப்³போ³. ஸேஸம் தத்த² தத்த² வுத்தனயத்தா உத்தானமேவாதி.

து³கவாரவண்ணனா நிட்டி²தா.

திகவாரவண்ணனா

323. திகேஸு அத்தா²பத்தி திட்ட²ந்தே ப⁴க³வதி ஆபஜ்ஜதீதி அத்தி² ஆபத்தி, யம் திட்ட²ந்தே ப⁴க³வதி ஆபஜ்ஜதீதி அத்தோ². ஏஸேவ நயோ ஸப்³ப³த்த². தத்த² லோஹிதுப்பாதா³பத்திம் திட்ட²ந்தே ஆபஜ்ஜதி. ‘‘ஏதரஹி கோ² பனானந்த³, பி⁴க்கூ² அஞ்ஞமஞ்ஞம் ஆவுஸோவாதே³ன ஸமுதா³சரந்தி, ந வோ மமச்சயேன ஏவம் ஸமுதா³சரிதப்³ப³ம், நவகேன, ஆனந்த³, பி⁴க்கு²னா தே²ரோ பி⁴க்கூ² ‘ப⁴ந்தே’தி வா ‘ஆயஸ்மா’தி வா ஸமுதா³சரிதப்³போ³’’தி வசனதோ தே²ரம் ஆவுஸோவாதே³ன ஸமுதா³சரணபச்சயா ஆபத்திம் பரினிப்³பு³தே ப⁴க³வதி ஆபஜ்ஜதி, நோ திட்ட²ந்தே. இமா த்³வே ஆபத்தியோ ட²பேத்வா அவஸேஸா த⁴ரந்தேபி ப⁴க³வதி ஆபஜ்ஜதி, பரினிப்³பு³தேபி.

பவாரேத்வா அனதிரித்தம் பு⁴ஞ்ஜந்தோ ஆபத்திம் காலே ஆபஜ்ஜதி நோ விகாலே. விகாலபோ⁴ஜனாபத்திம் பன விகாலே ஆபஜ்ஜதி நோ காலே. அவஸேஸா காலே சேவ ஆபஜ்ஜதி விகாலே ச. ஸஹகா³ரஸேய்யம் ரத்திம் ஆபஜ்ஜதி, த்³வாரம் அஸம்வரித்வா படிஸல்லீயனம் தி³வா. ஸேஸா ரத்திஞ்சேவ தி³வா ச. ‘‘த³ஸவஸ்ஸோம்ஹி அதிரேகத³ஸவஸ்ஸோம்ஹீ’’தி பா³லோ அப்³யத்தோ பரிஸம் உபட்டா²பேந்தோ த³ஸவஸ்ஸோ ஆபஜ்ஜதி நோ ஊனத³ஸவஸ்ஸோ. ‘‘அஹம் பண்டி³தோ ப்³யத்தோ’’தி நவோ வா மஜ்ஜி²மோ வா பரிஸம் உபட்டா²பேந்தோ ஊனத³ஸவஸ்ஸோ ஆபஜ்ஜதி நோ த³ஸவஸ்ஸோ. ஸேஸா த³ஸவஸ்ஸோ சேவ ஆபஜ்ஜதி ஊனத³ஸவஸ்ஸோ ச. ‘‘பஞ்சவஸ்ஸோம்ஹீ’’தி பா³லோ அப்³யத்தோ அனிஸ்ஸாய வஸந்தோ பஞ்சவஸ்ஸோ ஆபஜ்ஜதி. ‘‘அஹம் பண்டி³தோ ப்³யத்தோ’’தி நவகோ அனிஸ்ஸாய வஸந்தோ ஊனபஞ்சவஸ்ஸோ ஆபஜ்ஜதி. ஸேஸம் பஞ்சவஸ்ஸோ சேவ ஆபஜ்ஜதி ஊனபஞ்சவஸ்ஸோ ச. அனுபஸம்பன்னம் பத³ஸோத⁴ம்மம் வாசேந்தோ, மாதுகா³மஸ்ஸ த⁴ம்மம் தே³ஸேந்தோ ஏவரூபம் ஆபத்திம் குஸலசித்தோ ஆபஜ்ஜதி, பாராஜிக-ஸுக்கவிஸ்ஸட்டி²-காயஸம்ஸக்³க³-து³ட்டு²ல்ல-அத்தகாமபாரிசரிய-து³ட்ட²தோ³ஸ-ஸங்க⁴பே⁴த³பஹாரதா³ன-தலஸத்திகாதி³பே⁴த³ம் அகுஸலசித்தோ ஆபஜ்ஜதி, அஸஞ்சிச்ச ஸஹகா³ரஸேய்யாதி³ம் அப்³யாகதசித்தோ ஆபஜ்ஜதி, யம் அரஹாவ ஆபஜ்ஜதி, ஸப்³ப³ம் அப்³யாகதசித்தோவ ஆபஜ்ஜதி, மேது²னத⁴ம்மாதி³பே⁴த³மாபத்திம் ஸுக²வேத³னாஸமங்கீ³ ஆபஜ்ஜதி, து³ட்ட²தோ³ஸாதி³பே⁴த³ம் து³க்க²வேத³னாஸமங்கீ³, யம் ஸுக²வேத³னாஸமங்கீ³ ஆபஜ்ஜதி, தம்யேவ மஜ்ஜ²த்தோ ஹுத்வா ஆபஜ்ஜந்தோ அது³க்க²மஸுக²வேத³னாஸமங்கீ³ ஆபஜ்ஜதி.

தயோ படிக்கே²பாதி பு³த்³த⁴ஸ்ஸ ப⁴க³வதோ தயோ படிக்கே²பா. சதூஸு பச்சயேஸு மஹிச்ச²தா அஸந்துட்டி²தா கிலேஸஸல்லேக²னபடிபத்தியா அகோ³பாயனா, இமே ஹி தயோ த⁴ம்மா பு³த்³தே⁴ன ப⁴க³வதா படிக்கி²த்தா. அப்பிச்ச²தாத³யோ பன தயோ பு³த்³தே⁴ன ப⁴க³வதா அனுஞ்ஞாதா, தேன வுத்தம் ‘‘தயோ அனுஞ்ஞாதா’’தி.

‘‘த³ஸவஸ்ஸோம்ஹீ’’தி பரிஸம் உபட்டா²பேந்தோ ‘‘பஞ்சவஸ்ஸோம்ஹீ’’தி நிஸ்ஸயம் அக³ண்ஹந்தோ பா³லோ ஆபஜ்ஜதி நோ பண்டி³தோ, ஊனத³ஸவஸ்ஸோ ‘‘ப்³யத்தோம்ஹீ’’தி ப³ஹுஸ்ஸுதத்தா பரிஸம் உபட்டா²பேந்தோ ஊனபஞ்சவஸ்ஸோ ச நிஸ்ஸயம் அக³ண்ஹந்தோ பண்டி³தோ ஆபஜ்ஜதி நோ பா³லோ; அவஸேஸம் பண்டி³தோ சேவ ஆபஜ்ஜதி பா³லோ ச. வஸ்ஸம் அனுபக³ச்ச²ந்தோ காளே ஆபஜ்ஜதி நோ ஜுண்ஹே; மஹாபவாரணாய அப்பவாரேந்தோ ஜுண்ஹே ஆபஜ்ஜதி நோ காளே; அவஸேஸம் காளே சேவ ஆபஜ்ஜதி ஜுண்ஹே ச. வஸ்ஸூபக³மனம் காளே கப்பதி நோ ஜுண்ஹே; மஹாபவாரணாய பவாரணா ஜுண்ஹே கப்பதி நோ காளே; ஸேஸம் அனுஞ்ஞாதகம் காளே சேவ கப்பதி ஜுண்ஹே ச.

கத்திகபுண்ணமாஸியா பச்சி²மே பாடிபத³தி³வஸே விகப்பேத்வா ட²பிதம் வஸ்ஸிகஸாடிகம் நிவாஸேந்தோ ஹேமந்தே ஆபஜ்ஜதி. குருந்தி³யம் பன ‘‘கத்திகபுண்ணமதி³வஸே அபச்சுத்³த⁴ரித்வா ஹேமந்தே ஆபஜ்ஜதீ’’தி வுத்தம், தம்பி ஸுவுத்தம். ‘‘சாதுமாஸம் அதி⁴ட்டா²தும் ததோ பரம் விகப்பேது’’ந்தி ஹி வுத்தம். அதிரேகமாஸே ஸேஸே கி³ம்ஹானே பரியேஸந்தோ அதிரேகட்³ட⁴மாஸே ஸேஸே கத்வா நிவாஸேந்தோ ச கி³ம்ஹே ஆபஜ்ஜதி நாம. ஸதியா வஸ்ஸிகஸாடிகாய நக்³கோ³ காயம் ஓவஸ்ஸாபேந்தோ வஸ்ஸே ஆபஜ்ஜதி நாம. பாரிஸுத்³தி⁴உபோஸத²ம் வா அதி⁴ட்டா²னுபோஸத²ம் வா கரோந்தோ ஸங்கோ⁴ ஆபஜ்ஜதி. ஸுத்துத்³தே³ஸஞ்ச அதி⁴ட்டா²னுபோஸத²ஞ்ச கரோந்தோ க³ணோ ஆபஜ்ஜதி. ஏககோ ஸுத்துத்³தே³ஸம் பாரிஸுத்³தி⁴உபோஸத²ஞ்ச கரோந்தோ புக்³க³லோ ஆபஜ்ஜதி. பவாரணாயபி ஏஸேவ நயோ.

ஸங்கு⁴போஸதோ² ச ஸங்க⁴பவாரணா ச ஸங்க⁴ஸ்ஸேவ கப்பதி. க³ணுபோஸதோ² ச க³ணபவாரணா ச க³ணஸ்ஸேவ கப்பதி. அதி⁴ட்டா²னுபோஸதோ² ச அதி⁴ட்டா²னபவாரணா ச புக்³க³லஸ்ஸேவ கப்பதி. ‘‘பாராஜிகம் ஆபன்னோம்ஹீ’’திஆதீ³னி ப⁴ணந்தோ வத்து²ம் சா²தே³தி ந ஆபத்திம், ‘‘மேது²னம் த⁴ம்மம் படிஸேவி’’ந்திஆதீ³னி ப⁴ணந்தோ ஆபத்திம் சா²தே³தி நோ வத்து²ம், யோ நேவ வத்து²ம் ந ஆபத்திம் ஆரோசேதி, அயம் வத்து²ஞ்சேவ சா²தே³தி ஆபத்திஞ்ச.

படிச்சா²தே³தீதி படிச்சா²தி³. ஜந்தாக⁴ரமேவ படிச்சா²தி³ ஜந்தாக⁴ரபடிச்சா²தி³. இதராஸுபி ஏஸேவ நயோ. த்³வாரம் பித³ஹித்வா அந்தோஜந்தாக⁴ரே டி²தேன பரிகம்மம் காதும் வட்டதி. உத³கே ஓதிண்ணேனாபி ஏததே³வ வட்டதி. உப⁴யத்த² கா²தி³தும் பு⁴ஞ்ஜிதும் வா ந வட்டதி. வத்த²படிச்சா²தி³ ஸப்³ப³கப்பியதாய படிச்ச²ன்னேன ஸப்³ப³ம் காதும் வட்டதி. வஹந்தீதி யந்தி நிய்யந்தி; நிந்த³ம் வா படிக்கோஸம் வா ந லப⁴ந்தி. சந்த³மண்ட³லம் அப்³பா⁴மஹிகாதூ⁴மரஜராஹுவிமுத்தம் விவடம்யேவ விரோசதி, ந தேஸு அஞ்ஞதரேன படிச்ச²ன்னம். ததா² ஸூரியமண்ட³லம், த⁴ம்மவினயோபி விவரித்வா விப⁴ஜித்வா தே³ஸியமானோவ விரோசதி நோ படிச்ச²ன்னோ.

அஞ்ஞேன பே⁴ஸஜ்ஜேன கரணீயேன அஞ்ஞம் விஞ்ஞாபேந்தோ கி³லானோ ஆபஜ்ஜதி, ந பே⁴ஸஜ்ஜேன கரணீயேன பே⁴ஸஜ்ஜம் விஞ்ஞாபேந்தோ அகி³லானோ ஆபஜ்ஜதி, அவஸேஸம் ஆபத்திம் கி³லானோ சேவ ஆபஜ்ஜதி அகி³லானோ ச.

அந்தோ ஆபஜ்ஜதி நோ ப³ஹீதி அனுபக²ஜ்ஜ ஸேய்யம் கப்பேந்தோ அந்தோ ஆபஜ்ஜதி நோ ப³ஹி, ப³ஹி ஆபஜ்ஜதி நோ அந்தோதி ஸங்கி⁴கம் மஞ்சாதி³ம் அஜ்ஜோ²காஸே ஸந்த²ரித்வா பக்கமந்தோ ப³ஹி ஆபஜ்ஜதி நோ அந்தோ, அவஸேஸம் பன அந்தோ சேவ ஆபஜ்ஜதி ப³ஹி ச. அந்தோஸீமாயாதி ஆக³ந்துகோ ஆக³ந்துகவத்தம் அத³ஸ்ஸேத்வா ஸச²த்துபாஹனோ விஹாரம் பவிஸந்தோ உபசாரஸீமம் ஓக்கந்தமத்தோவ ஆபஜ்ஜதி. ப³ஹிஸீமாயாதி க³மிகோ தா³ருப⁴ண்ட³படிஸாமனாதி³க³மிகவத்தம் அபூரேத்வா பக்கமந்தோ உபசாரஸீமம் அதிக்கந்தமத்தோவ ஆபஜ்ஜதி. அவஸேஸம் அந்தோஸீமாய சேவ ஆபஜ்ஜதி ப³ஹிஸீமாய ச. ஸதி வுட்³ட⁴தரே அனஜ்ஜி²ட்டோ² த⁴ம்மம் பா⁴ஸந்தோ ஸங்க⁴மஜ்ஜே² ஆபஜ்ஜதி நாம. க³ணமஜ்ஜே²பி புக்³க³லஸந்திகேபி ஏஸேவ நயோ. காயேன வுட்டா²தீதி திணவத்தா²ரகஸமதே²ன வுட்டா²தி. காயம் அசாலேத்வா வாசாய தே³ஸேந்தஸ்ஸ வாசாய வுட்டா²தி. வசீஸம்பயுத்தம் காயகிரியம் கத்வா தே³ஸேந்தஸ்ஸ காயேன வாசாய வுட்டா²தி நாம. ஸங்க⁴மஜ்ஜே² தே³ஸனாகா³மினீபி வுட்டா²னகா³மினீபி வுட்டா²தி. க³ணபுக்³க³லமஜ்ஜே² பன தே³ஸனாகா³மினீயேவ வுட்டா²தி.

ஆகா³ள்ஹாய சேதேய்யாதி ஆகா³ள்ஹாய த³ள்ஹபா⁴வாய சேதேய்ய; தஜ்ஜனீயகம்மாதி³கதஸ்ஸ வத்தம் ந பூரயதோ இச்ச²மானோ ஸங்கோ⁴ உக்கே²பனீயகம்மம் கரேய்யாதி அத்தோ². அலஜ்ஜீ ச ஹோதி பா³லோ ச அபகதத்தோ சாதி ஏத்த² பா³லோ ‘‘அயம் த⁴ம்மாத⁴ம்மம் ந ஜானாதி’’ அபகதத்தோ வா ‘‘ஆபத்தானாபத்திம் ந ஜானாதீ’’தி ந ஏத்தாவதா கம்மம் காதப்³ப³ம்; பா³லபா⁴வமூலகம் பன அபகதத்தபா⁴வமூலகஞ்ச ஆபத்திம் ஆபன்னஸ்ஸ கம்மம் காதப்³ப³ந்தி அத்தோ². அதி⁴ஸீலே ஸீலவிபன்னோ நாம த்³வே ஆபத்திக்க²ந்தே⁴ ஆபன்னோ; ஆசாரவிபன்னோ நாம பஞ்ச ஆபத்திக்க²ந்தே⁴ ஆபன்னோ; தி³ட்டி²விபன்னோ நாம அந்தக்³கா³ஹிகாய தி³ட்டி²யா ஸமன்னாக³தோ. தேஸம் ஆபத்திம் அபஸ்ஸந்தானம் அப்படிகரோந்தானம் தி³ட்டி²ஞ்ச அனிஸ்ஸஜ்ஜந்தானம்யேவ கம்மம் காதப்³ப³ம்.

காயிகோ த³வோ நாம பாஸகாதீ³ஹி ஜூதகீளனாதி³பே⁴தோ³ அனாசாரோ; வாசஸிகோ த³வோ நாம முகா²லம்ப³ரகரணாதி³பே⁴தோ³ அனாசாரோ; காயிகவாசஸிகோ நாம நச்சனகா³யனாதி³பே⁴தோ³ த்³வீஹிபி த்³வாரேஹி அனாசாரோ. காயிகோ அனாசாரோ நாம காயத்³வாரே பஞ்ஞத்தஸிக்கா²பத³வீதிக்கமோ; வாசஸிகோ அனாசாரோ நாம வசீத்³வாரே பஞ்ஞத்தஸிக்கா²பத³வீதிக்கமோ; காயிகவாசஸிகோ நாம த்³வாரத்³வயேபி பஞ்ஞத்தஸிக்கா²பத³வீதிக்கமோ. காயிகேன உபகா⁴திகேனாதி காயத்³வாரே பஞ்ஞத்தஸ்ஸ ஸிக்கா²பத³ஸ்ஸ அஸிக்க²னேன, யோ ஹி தம் ந ஸிக்க²தி, ஸோ நம் உபகா⁴தேதி, தஸ்மா தஸ்ஸ தம் அஸிக்க²னம் ‘‘காயிகம் உபகா⁴திக’’ந்தி வுச்சதி. ஸேஸபத³த்³வயேபி ஏஸேவ நயோ. காயிகேன மிச்சா²ஜீவேனாதி ஜங்க⁴பேஸனிகாதி³னா வா க³ண்ட³பா²லனாதி³னா வா வேஜ்ஜகம்மேன; வாசஸிகேனாதி ஸாஸனஉக்³க³ஹணஆரோசனாதி³னா; ததியபத³ம் உப⁴யஸம்பயோக³வஸேன வுத்தம்.

அலம் பி⁴க்கு² மா ப⁴ண்ட³னந்தி அலம் பி⁴க்கு² மா ப⁴ண்ட³னம் கரி, மா கலஹம், மா விவாத³ம் கரீதி அத்தோ². ந வோஹரிதப்³ப³ந்தி ந கிஞ்சி வத்தப்³ப³ம்; வத³தோபி ஹி தாதி³ஸஸ்ஸ வசனம் ந ஸோதப்³ப³ம் மஞ்ஞந்தி. ந கிஸ்மிஞ்சி பச்சேகட்டா²னேதி கிஸ்மிஞ்சி பீ³ஜனக்³கா³ஹாதி³கே ஏகஸ்மிம்பி ஜேட்ட²கட்டா²னே ந ட²பேதப்³போ³தி அத்தோ². ஓகாஸகம்மம் காரேந்தஸ்ஸாதி ‘‘கரோது ஆயஸ்மா ஓகாஸம், அஹம் தம் வத்துகாமோ’’தி ஏவம் ஓகாஸம் காரேந்தஸ்ஸ. நாலம் ஓகாஸகம்மம் காதுந்தி ‘‘கிம் த்வம் கரிஸ்ஸஸீ’’தி ஓகாஸோ ந காதப்³போ³. ஸவசனீயம் நாதா³தப்³ப³ந்தி வசனம் ந ஆதா³தப்³ப³ம், வசனம்பி ந ஸோதப்³ப³ம்; யத்த² க³ஹேத்வா க³ந்துகாமோ ஹோதி, ந தத்த² க³ந்தப்³ப³ந்தி அத்தோ².

தீஹங்கே³ஹி ஸமன்னாக³தஸ்ஸ பி⁴க்கு²னோ வினயோதி யம் ஸோ ஜானாதி, ஸோ தஸ்ஸ வினயோ நாம ஹோதி; ஸோ ந புச்சி²தப்³போ³தி அத்தோ². அனுயோகோ³ ந தா³தப்³போ³தி ‘‘இத³ம் கப்பதீ’’தி புச்ச²ந்தஸ்ஸ புச்சா²ய ஓகாஸோ ந தா³தப்³போ³, ‘‘அஞ்ஞம் புச்சா²’’தி வத்தப்³போ³. இதி ஸோ நேவ புச்சி²தப்³போ³ நாஸ்ஸ புச்சா² ஸோதப்³பா³தி அத்தோ². வினயோ ந ஸாகச்சா²தப்³போ³தி வினயபஞ்ஹோ ந ஸாகச்சி²தப்³போ³, கப்பியாகப்பியகதா² ந ஸம்ஸந்தே³தப்³பா³.

இத³மப்பஹாயாதி ஏதம் ப்³ரஹ்மசாரிபடிஞ்ஞாதாதி³கம் லத்³தி⁴ம் அவிஜஹித்வா. ஸுத்³த⁴ம் ப்³ரஹ்மசாரிந்தி கீ²ணாஸவம் பி⁴க்கு²ம். ‘‘பாதப்³யதம் ஆபஜ்ஜதீ’’தி பாதப்³யபா⁴வம் படிஸேவனம் ஆபஜ்ஜதி. ‘‘இத³மப்பஹாயா’’தி வசனதோ பன தம் ப்³ரஹ்மசாரிபடிஞ்ஞாதம் பஹாய கீ²ணாஸவம் ‘‘முஸா மயா ப⁴ணிதம், க²மத² மே’’தி க²மாபேத்வா ‘‘நத்தி² காமேஸு தோ³ஸோ’’தி லத்³தி⁴ம் விஜஹித்வா க³திவிஸோத⁴னம் கரேய்ய. அகுஸலமூலானீதி அகுஸலானி சேவ மூலானி ச, அகுஸலானம் வா மூலானி அகுஸலமூலானி. குஸலமூலேஸுபி ஏஸேவ நயோ. து³ட்டு² சரிதானி விரூபானி வா சரிதானி து³ச்சரிதானி. ஸுட்டு² சரிதானி ஸுந்த³ரானி வா சரிதானி ஸுசரிதானி. காயேன கரணபூ⁴தேன கதம் து³ச்சரிதம் காயது³ச்சரிதம். ஏஸ நயோ ஸப்³ப³த்த². ஸேஸம் தத்த² தத்த² வுத்தனயத்தா உத்தானமேவாதி.

திகவாரவண்ணனா நிட்டி²தா.

சதுக்கவாரவண்ணனா

324. சதுக்கேஸு ஸகவாசாய ஆபஜ்ஜதி பரவாசாய வுட்டா²தீதி வசீத்³வாரிகம் பத³ஸோத⁴ம்மாதி³பே⁴த³ம் ஆபத்திம் ஆபஜ்ஜித்வா திணவத்தா²ரகஸமத²ட்டா²னம் க³தோ பரஸ்ஸ கம்மவாசாய வுட்டா²தி. பரவாசாய ஆபஜ்ஜதி ஸகவாசாய வுட்டா²தீதி பாபிகாய தி³ட்டி²யா அப்படினிஸ்ஸக்³கே³ பரஸ்ஸ கம்மவாசாய ஆபஜ்ஜதி, புக்³க³லஸ்ஸ ஸந்திகே தே³ஸேந்தோ ஸகவாசாய வுட்டா²தி. ஸகவாசாய ஆபஜ்ஜதி ஸகவாசாய வுட்டா²தீதி வசீத்³வாரிகம் பத³ஸோத⁴ம்மாதி³பே⁴த³ம் ஆபத்திம் ஸகவாசாய ஆபஜ்ஜதி, தே³ஸேத்வா வுட்ட²ஹந்தோபி ஸகவாசாய வுட்டா²தி. பரவாசாய ஆபஜ்ஜதி பரவாசாய வுட்டா²தீதி யாவததியகம் ஸங்கா⁴தி³ஸேஸம் பரஸ்ஸ கம்மவாசாய ஆபஜ்ஜதி, வுட்ட²ஹந்தோபி பரஸ்ஸ பரிவாஸகம்மவாசாதீ³ஹி வுட்டா²தி. ததோ பரேஸு காயத்³வாரிகம் காயேன ஆபஜ்ஜதி, தே³ஸேந்தோ வாசாய வுட்டா²தி. வசீத்³வாரிகம் வாசாய ஆபஜ்ஜதி, திணவத்தா²ரகே காயேன வுட்டா²தி. காயத்³வாரிகம் காயேனஆபஜ்ஜதி, தமேவ திணவத்தா²ரகே காயேன வுட்டா²தி. வசீத்³வாரிகம் வாசாய ஆபஜ்ஜதி, தமேவ தே³ஸேந்தோ வாசாய வுட்டா²தி. ஸங்கி⁴கமஞ்சஸ்ஸ அத்தனோ பச்சத்த²ரணேன அனத்த²ரதோ காயஸம்பு²ஸனே லோமக³ணனாய ஆபஜ்ஜிதப்³பா³பத்திம் ஸஹகா³ரஸேய்யாபத்திஞ்ச பஸுத்தோ ஆபஜ்ஜதி, பபு³ஜ்ஜி²த்வா பன ஆபன்னபா⁴வம் ஞத்வா தே³ஸேந்தோ படிபு³த்³தோ⁴ வுட்டா²தி. ஜக்³க³ந்தோ ஆபஜ்ஜித்வா பன திணவத்தா²ரகஸமத²ட்டா²னே ஸயந்தோ படிபு³த்³தோ⁴ ஆபஜ்ஜதி பஸுத்தோ வுட்டா²தி நாம. பச்சி²மபத³த்³வயம்பி வுத்தானுஸாரேனேவ வேதி³தப்³ப³ம்.

அசித்தகாபத்திம் அசித்தகோ ஆபஜ்ஜதி நாம. பச்சா² தே³ஸேந்தோ ஸசித்தகோ வுட்டா²தி. ஸசித்தகாபத்திம் ஸசித்தகோ ஆபஜ்ஜதி நாம. திணவத்தா²ரகட்டா²னே ஸயந்தோ அசித்தகோ வுட்டா²தி. ஸேஸபத³த்³வயம்பி வுத்தானுஸாரேனேவ வேதி³தப்³ப³ம். யோ ஸபா⁴க³ம் ஆபத்திம் தே³ஸேதி, அயம் தே³ஸனாபச்சயா து³க்கடம் ஆபஜ்ஜந்தோ பாசித்தியாதீ³ஸு அஞ்ஞதரம் தே³ஸேதி, தஞ்ச தே³ஸேந்தோ து³க்கடம் ஆபஜ்ஜதி. தம் பன து³க்கடம் ஆபஜ்ஜந்தோ பாசித்தியாதி³தோ வுட்டா²தி. பாசித்தியாதி³தோ ச வுட்ட²ஹந்தோ தம் ஆபஜ்ஜதி. இதி ஏகஸ்ஸ புக்³க³லஸ்ஸ ஏகமேவ பயோக³ம் ஸந்தா⁴ய ‘‘ஆபத்திம் ஆபஜ்ஜந்தோ தே³ஸேதீ’’தி இத³ம் சதுக்கம் வுத்தந்தி வேதி³தப்³ப³ம்.

கம்மசதுக்கே பாபிகாய தி³ட்டி²யா அப்படினிஸ்ஸக்³கா³பத்திம் கம்மேன ஆபஜ்ஜதி, தே³ஸேந்தோ அகம்மேன வுட்டா²தி. விஸ்ஸட்டி²ஆதி³கம் அகம்மேன ஆபஜ்ஜதி, பரிவாஸாதி³னா கம்மேன வுட்டா²தி. ஸமனுபா⁴ஸனம் கம்மேனேவ ஆபஜ்ஜதி, கம்மேன வுட்டா²தி. ஸேஸம் அகம்மேன ஆபஜ்ஜதி,அகம்மேனவுட்டா²தி.

பரிக்கா²ரசதுக்கே பட²மோ ஸகபரிக்கா²ரோ, து³தியோ ஸங்கி⁴கோவ ததியோ சேதியஸந்தகோ, சதுத்தோ² கி³ஹிபரிக்கா²ரோ. ஸசே பன ஸோ பத்தசீவரனவகம்மபே⁴ஸஜ்ஜானம் அத்தா²ய ஆஹடோ ஹோதி, அவாபுரணம் தா³தும் அந்தோ ட²பாபேதுஞ்ச வட்டதி.

ஸம்முகா²சதுக்கே பாபிகாய தி³ட்டி²யா அப்படினிஸ்ஸக்³கா³பத்திம் ஸங்க⁴ஸ்ஸ ஸம்முகா² ஆபஜ்ஜதி, வுட்டா²னகாலே பன ஸங்கே⁴ன கிச்சம் நத்தீ²தி பரம்முகா² வுட்டா²தி. விஸ்ஸட்டி²ஆதி³கம் பரம்முகா² ஆபஜ்ஜதி, ஸங்க⁴ஸ்ஸ ஸம்முகா² வுட்டா²தி. ஸமனுபா⁴ஸனம் ஸங்க⁴ஸ்ஸ ஸம்முகா² ஏவ ஆபஜ்ஜதி, ஸம்முகா² வுட்டா²தி. ஸேஸம் ஸம்பஜானமுஸாவாதா³தி³பே⁴த³ம் பரம்முகா²வ ஆபஜ்ஜதி, பரம்முகா²வ வுட்டா²தி. அஜானந்தசதுக்கம் அசித்தகசதுக்கஸதி³ஸம்.

லிங்க³பாதுபா⁴வேனாதி ஸயிதஸ்ஸேவ பி⁴க்கு²ஸ்ஸ வா பி⁴க்கு²னியா வா லிங்க³பரிவத்தே ஜாதே ஸஹகா³ரஸேய்யாபத்தி ஹோதி இத³மேவ தம் படிச்ச வுத்தம். உபி⁴ன்னம்பி பன அஸாதா⁴ரணாபத்தி லிங்க³பாதுபா⁴வேன வுட்டா²தி. ஸஹபடிலாப⁴சதுக்கே யஸ்ஸ பி⁴க்கு²னோ லிங்க³ம் பரிவத்ததி, ஸோ ஸஹ லிங்க³படிலாபே⁴ன பட²மம் உப்பன்னவஸேன ஸேட்ட²பா⁴வேன ச புரிமம் புரிஸலிங்க³ம் ஜஹதி, பச்சி²மே இத்தி²லிங்கே³ பதிட்டா²தி, புரிஸகுத்தபுரிஸாகாராதி³வஸேன பவத்தா காயவசீவிஞ்ஞத்தியோ படிப்பஸ்ஸம்ப⁴ந்தி, பி⁴க்கூ²தி வா புரிஸோதி வா ஏவம் பவத்தா பண்ணத்தியோ நிருஜ்ஜ²ந்தி, யானி பி⁴க்கு²னீஹி அஸாதா⁴ரணானி ச²சத்தாலீஸ ஸிக்கா²பதா³னி தேஹி அனாபத்தியேவ ஹோதி. து³தியசதுக்கே பன யஸ்ஸா பி⁴க்கு²னியா லிங்க³ம் பரிவத்ததி, ஸா பச்சா²ஸமுப்பத்தியா வா ஹீனபா⁴வேன வா பச்சி²மந்தி ஸங்க்²யம் க³தம் இத்தி²லிங்க³ம் ஜஹதி, வுத்தப்பகாரேன புரிமந்தி ஸங்க்²யம் க³தே புரிஸலிங்கே³ பதிட்டா²தி. வுத்தவிபரீதா விஞ்ஞத்தியோ படிப்பஸ்ஸம்ப⁴ந்தி, பி⁴க்கு²னீதி வா இத்தீ²தி வா ஏவம் பவத்தா பண்ணத்தியோபி நிருஜ்ஜ²ந்தி, யானி பி⁴க்கூ²ஹி அஸாதா⁴ரணானி ஸதம் திம்ஸஞ்ச ஸிக்கா²பதா³னி, தேஹி அனாபத்தியேவ ஹோதி.

சத்தாரோ ஸாமுக்கம்ஸாதி சத்தாரோ மஹாபதே³ஸா, தே ஹி ப⁴க³வதா அனுப்பன்னே வத்து²ம்ஹி ஸயம் உக்கம்ஸித்வா உக்கி²பித்வா ட²பிதத்தா ‘‘ஸாமுக்கம்ஸா’’தி வுச்சந்தி. பரிபோ⁴கா³தி அஜ்ஜோ²ஹரணீயபரிபோ⁴கா³, உத³கம் பன அகாலிகத்தா அப்படிக்³க³ஹிதகம் வட்டதி. யாவகாலிகாதீ³னி அப்படிக்³க³ஹிதகானி அஜ்ஜோ²ஹரிதும் ந வட்டந்தி. சத்தாரி மஹாவிகடானி காலோதி³ஸ்ஸத்தா யதா²வுத்தே காலே வட்டந்தி. உபாஸகோ ஸீலவாதி பஞ்ச வா த³ஸ வா ஸீலானி கோ³பயமானோ.

ஆக³ந்துகாதி³சதுக்கே ஸச²த்துபாஹனோ ஸஸீஸம் பாருதோ விஹாரம் பவிஸந்தோ தத்த² விசரந்தோ ச ஆக³ந்துகோவ ஆபஜ்ஜதி, நோ ஆவாஸிகோ. ஆவாஸிகவத்தம் அகரோந்தோ பன ஆவாஸிகோ ஆபஜ்ஜதி, நோ ஆக³ந்துகோ. ஸேஸம் காயவசீத்³வாரிகம் ஆபத்திம் உபோ⁴பி ஆபஜ்ஜந்தி, அஸாதா⁴ரணம் ஆபத்திம் நேவ ஆக³ந்துகோ ஆபஜ்ஜதி, நோ ஆவாஸிகோ. க³மியசதுக்கேபி க³மியவத்தம் அபூரேத்வா க³ச்ச²ந்தோ க³மிகோ ஆபஜ்ஜதி, நோ ஆவாஸிகோ. ஆவாஸிகவத்தம் அகரோந்தோ பன ஆவாஸிகோ ஆபஜ்ஜதி, நோ க³மிகோ. ஸேஸம் உபோ⁴பி ஆபஜ்ஜந்தி, அஸாதா⁴ரணம் உபோ⁴பி நாபஜ்ஜந்தி. வத்து²னானத்ததாதி³சதுக்கே சதுன்னம் பாராஜிகானம் அஞ்ஞமஞ்ஞம் வத்து²னானத்ததாவ ஹோதி,நஆபத்தினானத்ததா. ஸப்³பா³பி ஹி ஸா பாராஜிகாபத்தியேவ. ஸங்கா⁴தி³ஸேஸாதீ³ஸுபி ஏஸேவ நயோ. பி⁴க்கு²ஸ்ஸ ச பி⁴க்கு²னியா ச அஞ்ஞமஞ்ஞம் காயஸம்ஸக்³கே³ பி⁴க்கு²ஸ்ஸ ஸங்கா⁴தி³ஸேஸோ பி⁴க்கு²னியா பாராஜிகந்தி ஏவம் ஆபத்தினானத்ததாவ ஹோதி, ந வத்து²னானத்ததா, உபி⁴ன்னம்பி ஹி காயஸம்ஸக்³கோ³வ வத்து². ததா² ‘‘லஸுணக்கா²த³னே பி⁴க்கு²னியா பாசித்தியம், பி⁴க்கு²ஸ்ஸ து³க்கட’’ந்தி ஏவமாதி³னாபேத்த² நயேன யோஜனா வேதி³தப்³பா³. சதுன்னம் பாராஜிகானம் தேரஸஹி ஸங்கா⁴தி³ஸேஸேஹி ஸத்³தி⁴ம் வத்து²னானத்ததா சேவ ஆபத்தினானத்ததா ச. ஏவம் ஸங்கா⁴தி³ஸேஸாதீ³னம் அனியதாதீ³ஹி. ஆதி³தோ பட்டா²ய சத்தாரி பாராஜிகானி ஏகதோ ஆபஜ்ஜந்தானம் பி⁴க்கு²பி⁴க்கு²னீனம் நேவ வத்து²னானத்ததா நோ ஆபத்தினானத்ததா. விஸும் ஆபஜ்ஜந்தேஸுபி ஸேஸா ஸாதா⁴ரணாபத்தியோ ஆபஜ்ஜந்தேஸுபி ஏஸேவ நயோ.

வத்து²ஸபா⁴கா³தி³சதுக்கே பி⁴க்கு²ஸ்ஸ ச பி⁴க்கு²னியா ச காயஸம்ஸக்³கே³ வத்து²ஸபா⁴க³தா, நோ ஆபத்திஸபா⁴க³தா, சதூஸு பாராஜிகேஸு ஆபத்திஸபா⁴க³தா, நோ வத்து²ஸபா⁴க³தா. ஏஸ நயோ ஸங்கா⁴தி³ஸேஸாதீ³ஸு. பி⁴க்கு²ஸ்ஸ ச பி⁴க்கு²னியா ச சதூஸு பாராஜிகேஸு வத்து²ஸபா⁴க³தா சேவ ஆபத்திஸபா⁴க³தா ச. ஏஸ நயோ ஸப்³பா³ஸு ஸாதா⁴ரணாபத்தீஸு. அஸாதா⁴ரணாபத்தியம் நேவ வத்து²ஸபா⁴க³தா நோ ஆபத்திஸபா⁴க³தா. யோ ஹி புரிமசதுக்கே பட²மோ பஞ்ஹோ, ஸோ இத⁴ து³தியோ; யோ ச தத்த² து³தியோ, ஸோ இத⁴ பட²மோ. ததியசதுத்தே²ஸு நானாகரணம் நத்தி².

உபஜ்ஜா²யசதுக்கே ஸத்³தி⁴விஹாரிகஸ்ஸ உபஜ்ஜா²யேன கத்தப்³ப³வத்தஸ்ஸ அகரணே ஆபத்திம் உபஜ்ஜா²யோ ஆபஜ்ஜதி, நோ ஸத்³தி⁴விஹாரிகோ உபஜ்ஜா²யஸ்ஸ கத்தப்³ப³வத்தம் அகரோந்தோ ஸத்³தி⁴விஹாரிகோ ஆபஜ்ஜதி, நோ உபஜ்ஜா²யோ; ஸேஸம் உபோ⁴பி ஆபஜ்ஜந்தி, அஸாதா⁴ரணம் உபோ⁴பி நாபஜ்ஜந்தி. ஆசரியசதுக்கேபி ஏஸேவ நயோ.

ஆதி³யந்தசதுக்கே பாத³ம் வா அதிரேகபாத³ம் வா ஸஹத்தா² ஆதி³யந்தோ க³ருகம் ஆபஜ்ஜதி, ஊனகபாத³ம் க³ண்ஹாஹீதி ஆணத்தியா அஞ்ஞம் பயோஜேந்தோ லஹுகம் ஆபஜ்ஜதி. ஏதேன நயேன ஸேஸபத³த்தயம் வேதி³தப்³ப³ம்.

அபி⁴வாத³னாரஹசதுக்கே பி⁴க்கு²னீனம் தாவ ப⁴த்தக்³கே³ நவமபி⁴க்கு²னிதோ பட்டா²ய உபஜ்ஜா²யாபி அபி⁴வாத³னாரஹா நோ பச்சுட்டா²னாரஹா. அவிஸேஸேன ச விப்பகதபோ⁴ஜனஸ்ஸ பி⁴க்கு²ஸ்ஸ யோ கோசி வுட்³ட⁴தரோ. ஸட்டி²வஸ்ஸஸ்ஸாபி பாரிவாஸிகஸ்ஸ ஸமீபக³தோ தத³ஹுபஸம்பன்னோபி பச்சுட்டா²னாரஹோ நோ அபி⁴வாத³னாரஹோ. அப்படிக்கி²த்தேஸு டா²னேஸு வுட்³டோ⁴ நவகஸ்ஸ அபி⁴வாத³னாரஹோ சேவ பச்சுட்டா²னாரஹோ ச. நவகோ பன வுட்³ட⁴ஸ்ஸ நேவ அபி⁴வாத³னாரஹோ ந பச்சுட்டா²னாரஹோ. ஆஸனாரஹசதுக்கஸ்ஸ பட²மபத³ம் புரிமசதுக்கே து³தியபதே³ன, து³தியபத³ஞ்ச பட²மபதே³ன அத்த²தோ ஸதி³ஸம்.

காலசதுக்கே பவாரேத்வா பு⁴ஞ்ஜந்தோ காலே ஆபஜ்ஜதி நோ விகாலே, விகாலபோ⁴ஜனாபத்திம் விகாலே ஆபஜ்ஜதி நோ காலே, ஸேஸம் காலே சேவ ஆபஜ்ஜதி விகாலே ச, அஸாதா⁴ரணம் நேவ காலே நோ விகாலே. படிக்³க³ஹிதசதுக்கே புரேப⁴த்தம் படிக்³க³ஹிதாமிஸம் காலே கப்பதி நோ விகாலே. பானகம் விகாலே கப்பதி, புனதி³வஸம்ஹி நோ காலே. ஸத்தாஹகாலிகம் யாவஜீவிகம் காலே சேவ கப்பதி விகாலே ச. அத்தனோ அத்தனோ காலாதீதம் யாவகாலிகாதி³த்தயம் அகப்பியமம்ஸம் உக்³க³ஹிதகமப்படிக்³க³ஹிதகஞ்ச நேவ காலே கப்பதி நோ விகாலே.

பச்சந்திமசதுக்கே ஸமுத்³தே³ ஸீமம் ப³ந்த⁴ந்தோ பச்சந்திமேஸு ஜனபதே³ஸு ஆபஜ்ஜதி, நோ மஜ்ஜி²மேஸு; பஞ்சவக்³கே³ன க³ணேன உபஸம்பாதே³ந்தோ கு³ணங்கு³ணூபாஹனம் து⁴வனஹானம் சம்மத்த²ரணானி ச மஜ்ஜி²மேஸு ஜனபதே³ஸு ஆபஜ்ஜதி நோ பச்சந்திமேஸு. இமானி சத்தாரி ‘‘இத⁴ ந கப்பந்தீ’’தி வத³ந்தோபி பச்சந்திமேஸு ஆபஜ்ஜதி, ‘‘இத⁴ கப்பந்தீ’’தி வத³ந்தோ பன மஜ்ஜி²மேஸு ஆபஜ்ஜதி. ஸேஸாபத்திம் உப⁴யத்த² ஆபஜ்ஜதி, அஸாதா⁴ரணம் ந கத்த²சி ஆபஜ்ஜதி. து³தியசதுக்கே பஞ்சவக்³கே³ன க³ணேன உபஸம்பதா³தி³ சதுப்³பி³த⁴ம்பி வத்து² பச்சந்திமேஸு ஜனபதே³ஸு கப்பதி. ‘‘இத³ம் கப்பதீ’’தி தீ³பேதும்பி தத்தே²வ கப்பதி நோ மஜ்ஜி²மேஸு. ‘‘இத³ம் ந கப்பதீ’’தி தீ³பேதும் பன மஜ்ஜி²மேஸு ஜனபதே³ஸு கப்பதி நோ பச்சந்திமேஸு. ஸேஸம் ‘‘அனுஜானாமி பி⁴க்க²வே பஞ்ச லோணானீ’’திஆதி³ அனுஞ்ஞாதகம் உப⁴யத்த² கப்பதி. யம் பன அகப்பியந்தி படிக்கி²த்தம், தம் உப⁴யத்தா²பி ந கப்பதி.

அந்தோஆதி³சதுக்கே அனுபக²ஜ்ஜ ஸேய்யாதி³ம் அந்தோ ஆபஜ்ஜதி நோ ப³ஹி, அஜ்ஜோ²காஸே ஸங்கி⁴கமஞ்சாதீ³னி நிக்கி²பித்வா பக்கமந்தோ ப³ஹி ஆபஜ்ஜதி நோ அந்தோ, ஸேஸம் அந்தோ சேவ ப³ஹி ச, அஸாதா⁴ரணம் நேவ அந்தோ ந ப³ஹி. அந்தோஸீமாதி³சதுக்கே ஆக³ந்துகோ வத்தம் அபூரேந்தோ அந்தோஸீமாய ஆபஜ்ஜதி, க³மியோ ப³ஹிஸீமாய முஸாவாதா³தி³ம் அந்தோஸீமாய ச ப³ஹிஸீமாய ச ஆபஜ்ஜதி,அஸாதா⁴ரணம் ந கத்த²சி. கா³மசதுக்கே அந்தரக⁴ரபடிஸம்யுத்தம் ஸேகி²யபஞ்ஞத்திம் கா³மே ஆபஜ்ஜதி நோ அரஞ்ஞே. பி⁴க்கு²னீ அருணம் உட்டா²பயமானா அரஞ்ஞே ஆபஜ்ஜதி நோ கா³மே. முஸாவாதா³தி³ம் கா³மே சேவ ஆபஜ்ஜதி அரஞ்ஞே ச, அஸாதா⁴ரணம் ந கத்த²சி.

சத்தாரோ புப்³ப³கிச்சாதி ‘‘ஸம்மஜ்ஜனீ பதீ³போ ச உத³கம் ஆஸனேன சா’’தி இத³ம் சதுப்³பி³த⁴ம் புப்³ப³கரணந்தி வுச்சதீதி வுத்தம். ‘‘ச²ந்த³பாரிஸுத்³தி⁴உதுக்கா²னம் பி⁴க்கு²க³ணனா ச ஓவாதோ³’’தி இமே பன ‘‘சத்தாரோ புப்³ப³கிச்சா’’தி வேதி³தப்³பா³. சத்தாரோ பத்தகல்லாதி உபோஸதோ² யாவதிகா ச பி⁴க்கூ² கம்மப்பத்தா தே ஆக³தா ஹோந்தி, ஸபா⁴கா³பத்தியோ ந விஜ்ஜந்தி, வஜ்ஜனீயா ச புக்³க³லா தஸ்மிம் ந ஹோந்தி, பத்தகல்லந்தி வுச்சதீதி. சத்தாரி அனஞ்ஞபாசித்தியானீதி ‘‘ஏததே³வ பச்சயம் கரித்வா அனஞ்ஞம் பாசித்திய’’ந்தி ஏவம் வுத்தானி அனுபக²ஜ்ஜஸேய்யாகப்பனஸிக்கா²பத³ம் ‘‘ஏஹாவுஸோ கா³மம் வா நிக³மம் வா’’தி ஸிக்கா²பத³ம், ஸஞ்சிச்ச குக்குச்சஉபத³ஹனம், உபஸ்ஸுதிதிட்ட²னந்தி இமானி சத்தாரி. சதஸ்ஸோ பி⁴க்கு²ஸம்முதியோதி ‘‘ஏகரத்தம்பி சே பி⁴க்கு² திசீவரேன விப்பவஸேய்ய அஞ்ஞத்ர பி⁴க்கு²ஸம்முதியா, அஞ்ஞம் நவம் ஸந்த²தம் காராபேய்ய அஞ்ஞத்ர பி⁴க்கு²ஸம்முதியா, ததோ சே உத்தரி விப்பவஸேய்ய அஞ்ஞத்ர பி⁴க்கு²ஸம்முதியா, து³ட்டு²ல்லம் ஆபத்திம் அனுபஸம்பன்னஸ்ஸ ஆரோசேய்ய அஞ்ஞத்ர பி⁴க்கு²ஸம்முதியா’’தி ஏவம் ஆக³தா தேரஸஹி ஸம்முதீஹி முத்தா ஸம்முதியோ. கி³லானசதுக்கே அஞ்ஞபே⁴ஸஜ்ஜேன கரணீயேன லோலதாய அஞ்ஞம் விஞ்ஞாபேந்தோ கி³லானோ ஆபஜ்ஜதி, அபே⁴ஸஜ்ஜகரணீயேன பே⁴ஸஜ்ஜம் விஞ்ஞாபேந்தோ அகி³லானோ ஆபஜ்ஜதி, முஸாவாதா³தி³ம் உபோ⁴பி ஆபஜ்ஜந்தி, அஸாதா⁴ரணம் உபோ⁴பி நாபஜ்ஜந்தி. ஸேஸம் ஸப்³ப³த்த² உத்தானமேவாதி.

சதுக்கவாரவண்ணனா நிட்டி²தா.

பஞ்சகவாரவண்ணனா

325. பஞ்சகேஸு பஞ்ச புக்³க³லா நியதாதி ஆனந்தரியானமேவேதம் க³ஹணம். பஞ்ச சே²த³னகா ஆபத்தியோ நாம பமாணாதிக்கந்தே மஞ்சபீடே² நிஸீத³னகண்டு³ப்படிச்சா²தி³வஸ்ஸிகஸாடிகாஸு ஸுக³தசீவரே ச வேதி³தப்³பா³. பஞ்சஹாகாரேஹீதி அலஜ்ஜிதா, அஞ்ஞாணதா, குக்குச்சப்பகததா, அகப்பியே கப்பியஸஞ்ஞிதா, கப்பியே அகப்பியஸஞ்ஞிதாதி இமேஹி பஞ்சஹி. பஞ்ச ஆபத்தியோ முஸாவாத³பச்சயாதி பாராஜிகது²ல்லச்சயது³க்கடஸங்கா⁴தி³ஸேஸபாசித்தியா. அனாமந்தசாரோதி ‘‘ஸந்தம் பி⁴க்கு²ம் அனாபுச்சா² புரேப⁴த்தம் பச்சா²ப⁴த்தம் குலேஸு சாரித்தம் ஆபஜ்ஜேய்யா’’தி இமஸ்ஸ ஆபுச்சி²த்வா சாரஸ்ஸ அபா⁴வோ. அனதி⁴ட்டா²னந்தி ‘‘க³ணபோ⁴ஜனே அஞ்ஞத்ர ஸமயா’’தி வுத்தம் ஸமயம் அதி⁴ட்ட²ஹித்வா போ⁴ஜனம் அதி⁴ட்டா²னம் நாம; ததா² அகரணம் அனதி⁴ட்டா²னம். அவிகப்பனா நாம யா பரம்பரபோ⁴ஜனே விகப்பனா வுத்தா, தஸ்ஸா அகரணம். இமானி ஹி பஞ்ச பிண்ட³பாதிகஸ்ஸ து⁴தங்கே³னேவ படிக்கி²த்தானி. உஸ்ஸங்கிதபரிஸங்கிதோதி யே பஸ்ஸந்தி, யே ஸுணந்தி, தேஹி உஸ்ஸங்கிதோ சேவ பரிஸங்கிதோ ச. அபி அகுப்பத⁴ம்மோ கீ²ணாஸவோபி ஸமானோ, தஸ்மா அகோ³சரா பரிஹரிதப்³பா³. ந ஹி ஏதேஸு ஸந்தி³ஸ்ஸமானோ அயஸதோ வா க³ரஹதோ வா முச்சதி. ஸோஸானிகந்தி ஸுஸானே பதிதகம். பாபணிகந்தி ஆபணத்³வாரே பதிதகம். தூ²பசீவரந்தி வம்மிகம் பரிக்கி²பித்வா ப³லிகம்மகதம். ஆபி⁴ஸேகிகந்தி நஹானட்டா²னே வா ரஞ்ஞோ அபி⁴ஸேகட்டா²னே வா ச²ட்³டி³தசீவரம். ப⁴தபடியாப⁴தந்தி ஸுஸானம் நேத்வா புன ஆனீதகம். பஞ்ச மஹாசோரா உத்தரிமனுஸ்ஸத⁴ம்மே வுத்தா.

பஞ்சாபத்தியோ காயதோ ஸமுட்ட²ந்தீதி பட²மேன ஆபத்திஸமுட்டா²னேன பஞ்ச ஆபத்தியோ ஆபஜ்ஜதி, ‘‘பி⁴க்கு² கப்பியஸஞ்ஞீ ஸஞ்ஞாசிகாய குடிம் கரோதீ’’தி ஏவம் அந்தரபேய்யாலே வுத்தாபத்தியோ. பஞ்ச ஆபத்தியோ காயதோ ச வாசதோ சாதி ததியேன ஆபத்திஸமுட்டா²னேன பஞ்ச ஆபத்தியோ ஆபஜ்ஜதி, ‘‘பி⁴க்கு² கப்பியஸஞ்ஞீ ஸம்வித³ஹித்வா குடிம் கரோதீ’’தி ஏவம் தத்தே²வ வுத்தா ஆபத்தியோ. தே³ஸனாகா³மினியோதி ட²பேத்வா பாராஜிகஞ்ச ஸங்கா⁴தி³ஸேஸஞ்ச அவஸேஸா.

பஞ்ச கம்மானீதி தஜ்ஜனீயனியஸ்ஸபப்³பா³ஜனீயபடிஸாரணீயானி சத்தாரி உக்கே²பனீயஞ்ச திவித⁴ம்பி ஏகந்தி பஞ்ச. யாவததியகே பஞ்சாதி உக்கி²த்தானுவத்திகாய பி⁴க்கு²னியா யாவததியம் ஸமனுபா⁴ஸனாய அப்படினிஸ்ஸஜ்ஜந்தியா பாராஜிகம் து²ல்லச்சயம் து³க்கடந்தி திஸ்ஸோ, பே⁴த³கானுவத்தகாதி³ஸமனுபா⁴ஸனாஸு ஸங்கா⁴தி³ஸேஸோ, பாபிகாய தி³ட்டி²யா அப்படினிஸ்ஸக்³கே³ பாசித்தியம். அதி³ன்னந்தி அஞ்ஞேன அதி³ன்னம். அவிதி³தந்தி படிக்³க³ண்ஹாமீதி சேதனாய அபா⁴வேன அவிதி³தம். அகப்பியந்தி பஞ்சஹி ஸமணகப்பேஹி அகப்பியகதம்; யம் வா பனஞ்ஞம்பி அகப்பியமம்ஸம் அகப்பியபோ⁴ஜனம். அகதாதிரித்தந்தி பவாரேத்வா அதிரித்தம் அகதம். ஸமஜ்ஜதா³னந்தி நடஸமஜ்ஜாதி³தா³னம். உஸப⁴தா³னந்தி கோ³க³ணஸ்ஸ அந்தரே உஸப⁴விஸ்ஸஜ்ஜனம். சித்தகம்மதா³னந்தி ஆவாஸம் காரேத்வா தத்த² சித்தகம்மம் காரேதும் வட்டதி. இத³ம் பன படிபா⁴னசித்தகம்மதா³னம் ஸந்தா⁴ய வுத்தம். இமானி ஹி பஞ்ச கிஞ்சாபி லோகஸ்ஸ புஞ்ஞஸம்மதானி, அத² கோ² அபுஞ்ஞானி அகுஸலானியேவ. உப்பன்னம் படிபா⁴னந்தி ஏத்த² படிபா⁴னந்தி கதே²துகம்யதா வுச்சதி. இமே பஞ்ச து³ப்படிவினோத³யாதி ந ஸுபடிவினோத³யா; உபாயேன பன காரணேன அனுரூபாஹி பச்சவேக்க²னாஅனுஸாஸனாதீ³ஹி ஸக்கா படிவினோதே³துந்தி அத்தோ².

ஸகசித்தம் பஸீத³தீதி ஏத்த² இமானி வத்தூ²னி – கடஅந்த⁴காரவாஸீ பு²ஸ்ஸதே³வத்தே²ரோ கிர சேதியங்க³ணம் ஸம்மஜ்ஜித்வா ஏகம்ஸம் உத்தராஸங்க³ம் கரித்வா ஸிந்து³வாரகுஸுமஸந்த²தமிவ ஸமவிப்பகிண்ணவாலிகம் சேதியங்க³ணம் ஓலோகேந்தோ பு³த்³தா⁴ரம்மணம் பீதிபாமோஜ்ஜம் உப்பாதே³த்வா அட்டா²ஸி. தஸ்மிம் க²ணே மாரோ பப்³ப³தபாதே³ நிப்³ப³த்தகாளமக்கடோ விய ஹுத்வா சேதியங்க³ணே கோ³மயம் விப்பகிரந்தோ க³தோ. தே²ரோ நாஸக்கி² அரஹத்தம் பாபுணிதும், ஸம்மஜ்ஜித்வா அக³மாஸி. து³தியதி³வஸேபி ஜரக்³க³வோ ஹுத்வா தாதி³ஸமேவ விப்பகாரம் அகாஸி. ததியதி³வஸே வங்கபாத³ம் மனுஸ்ஸத்தபா⁴வம் நிம்மினித்வா பாதே³ன பரிகஸந்தோ அக³மாஸி. தே²ரோ ‘‘ஏவரூபோ பீ³ப⁴ச்ச²புரிஸோ ஸமந்தா யோஜனப்பமாணேஸு கோ³சரகா³மேஸு நத்தி², ஸியா நு கோ² மாரோ’’தி சிந்தேத்வா ‘‘மாரோஸி த்வ’’ந்தி ஆஹ. ‘‘ஆம, ப⁴ந்தே, மாரோம்ஹி, ந தா³னி தே வஞ்சேதும் அஸக்கி²’’ந்தி. ‘‘தி³ட்ட²புப்³போ³ தயா ததா²க³தோ’’தி? ‘‘ஆம, தி³ட்ட²புப்³போ³’’தி. ‘‘மாரோ நாம மஹானுபா⁴வோ ஹோதி, இங்க⁴ தாவ பு³த்³த⁴ஸ்ஸ ப⁴க³வதோ அத்தபா⁴வஸதி³ஸம் அத்தபா⁴வம் நிம்மினாஹீ’’தி? ‘‘ந ஸக்கா, ப⁴ந்தே, தாதி³ஸம் ரூபம் நிம்மினிதும்; அபிச கோ² பன தம்ஸரிக்க²கம் பதிரூபகம் நிம்மினிஸ்ஸாமீ’’தி ஸகபா⁴வம் விஜஹித்வா பு³த்³த⁴ரூபஸதி³ஸேன அத்தபா⁴வேன அட்டா²ஸி. தே²ரோ மாரம் ஓலோகேத்வா ‘‘அயம் தாவ ஸராக³தோ³ஸமோஹோ ஏவம் ஸோப⁴தி, கத²ம் நு கோ² ப⁴க³வா ந ஸோப⁴தி ஸப்³ப³ஸோ வீதராக³தோ³ஸமோஹோ’’தி பு³த்³தா⁴ரம்மணம் பீதிம் படிலபி⁴த்வா விபஸ்ஸனம் வட்³டே⁴த்வா அரஹத்தம் பாபுணி. மாரோ ‘‘வஞ்சிதோம்ஹி தயா, ப⁴ந்தே’’தி ஆஹ. தே²ரோபி ‘‘கிம் அத்தி² ஜரமார, தாதி³ஸம் வஞ்சேது’’ந்தி ஆஹ. லோகந்தரவிஹாரேபி த³த்தோ நாம த³ஹரபி⁴க்கு² சேதியங்க³ணம் ஸம்மஜ்ஜித்வா ஓலோகேந்தோ ஓதா³தகஸிணம் படிலபி⁴. அட்ட² ஸமாபத்தியோ நிப்³ப³த்தேஸி. ததோ விபஸ்ஸனம் வட்³டே⁴த்வா ப²லத்தயம் ஸச்சா²காஸி.

பரசித்தம் பஸீத³தீதி ஏத்த² இமானி வத்தூ²னி – திஸ்ஸோ நாம த³ஹரபி⁴க்கு² ஜம்பு³கோலசேதியங்க³ணம் ஸம்மஜ்ஜித்வா ஸங்காரச²ட்³ட³னிம் ஹத்தே²ன க³ஹேத்வாவ அட்டா²ஸி. தஸ்மிம் க²ணே திஸ்ஸத³த்தத்தே²ரோ நாம நாவாதோ ஓருய்ஹ சேதியங்க³ணம் ஓலோகேந்தோ பா⁴விதசித்தேன ஸம்மட்ட²ட்டா²னந்தி ஞத்வா பஞ்ஹாஸஹஸ்ஸம் புச்சி², இதரோ ஸப்³ப³ம் விஸ்ஸஜ்ஜேஸி. அஞ்ஞதரஸ்மிம்பி விஹாரே தே²ரோ சேதியங்க³ணம் ஸம்மஜ்ஜித்வா வத்தம் பரிச்சி²ந்தி³. யோனகவிஸயதோ சேதியவந்த³கா சத்தாரோ தே²ரா ஆக³ந்த்வா சேதியங்க³ணம் தி³ஸ்வா அந்தோ அப்பவிஸித்வா த்³வாரேயேவ ட²த்வா ஏகோ தே²ரோ அட்ட² கப்பே அனுஸ்ஸரி, ஏகோ ஸோளஸ, ஏகோ வீஸதி, ஏகோ திம்ஸ கப்பே அனுஸ்ஸரி.

தே³வதா அத்தமனா ஹோந்தீதி ஏத்த² இத³ம் வத்து² – ஏகஸ்மிம் கிர விஹாரே ஏகோ பி⁴க்கு² சேதியங்க³ணஞ்ச போ³தி⁴யங்க³ணஞ்ச ஸம்மஜ்ஜித்வா நஹாயிதும் க³தோ. தே³வதா ‘‘இமஸ்ஸ விஹாரஸ்ஸ கதகாலதோ பட்டா²ய ஏவம் வத்தம் பூரேத்வா ஸம்மட்ட²புப்³போ³ பி⁴க்கு² நத்தீ²’’தி பஸன்னசித்தா புப்ப²ஹத்தா² அட்ட²ம்ஸு. தே²ரோ ஆக³ந்த்வா ‘‘கதரகா³மவாஸிகாத்தா²’’தி ஆஹ. ‘‘ப⁴ந்தே, இதே⁴வ வஸாம, இமஸ்ஸ விஹாரஸ்ஸ கதகாலதோ பட்டா²ய ஏவம் வத்தம் பூரேத்வா ஸம்மட்ட²புப்³போ³ பி⁴க்கு² நத்தீ²தி தும்ஹாகம், ப⁴ந்தே, வத்தே பஸீதி³த்வா புப்ப²ஹத்தா² டி²தாம்ஹா’’தி தே³வதா ஆஹம்ஸு.

பாஸாதி³கஸம்வத்தனிகந்தி ஏத்த² இத³ம் வத்து² – ஏகம் கிர அமச்சபுத்தம் அப⁴யத்தே²ரஞ்ச ஆரப்³ப⁴ அயம் கதா² உத³பாதி³ ‘‘கிம் நு கோ² அமச்சபுத்தோ பாஸாதி³கோ, அப⁴யத்தே²ரோதி உபோ⁴பி நே ஏகஸ்மிம் டா²னே ஓலோகேஸ்ஸாமா’’தி. ஞாதகா அமச்சபுத்தம் அலங்கரித்வா மஹாசேதியம் வந்தா³பேஸ்ஸாமாதி அக³மம்ஸு. தே²ரமாதாபி பாஸாதி³கம் சீவரம் காரேத்வா புத்தஸ்ஸ பஹிணி, ‘‘புத்தோ மே கேஸே சி²ந்தா³பேத்வா இமம் சீவரம் பாருபித்வா பி⁴க்கு²ஸங்க⁴பரிவுதோ மஹாசேதியம் வந்த³தூ’’தி. அமச்சபுத்தோ ஞாதிபரிவுதோ பாசீனத்³வாரேன சேதியங்க³ணம் ஆருள்ஹோ, அப⁴யத்தே²ரோ பி⁴க்கு²ஸங்க⁴பரிவுதோ த³க்கி²ணத்³வாரேன சேதியங்க³ணம் ஆருஹித்வா சேதியங்க³ணே தேன ஸத்³தி⁴ம் ஸமாக³ந்த்வா ஆஹ – ‘‘கிம் த்வம், ஆவுஸோ, மஹல்லகத்தே²ரஸ்ஸ ஸம்மட்ட²ட்டா²னே கசவரம் ச²ட்³டே³த்வா மயா ஸத்³தி⁴ம் யுக³க்³கா³ஹம் க³ண்ஹாஸீ’’தி. அதீதத்தபா⁴வே கிர அப⁴யத்தே²ரோ மஹல்லகத்தே²ரோ நாம ஹுத்வா கோ³சரகா³மே சேதியங்க³ணம் ஸம்மஜ்ஜி, அமச்சபுத்தோ மஹாஉபாஸகோ ஹுத்வா ஸம்மட்ட²ட்டா²னே கசவரம் க³ஹேத்வா ச²ட்³டே³ஸி.

ஸத்து²ஸாஸனம் கதம் ஹோதீதி இத³ம் ஸம்மஜ்ஜனவத்தம் நாம பு³த்³தே⁴ஹி வண்ணிதம், தஸ்மா தம் கரோந்தேன ஸத்து²ஸாஸனம் கதம் ஹோதி. தத்ரித³ம் வத்து² – ஆயஸ்மா கிர ஸாரிபுத்தோ ஹிமவந்தம் க³ந்த்வா ஏகஸ்மிம் பப்³பா⁴ரே அஸம்மஜ்ஜித்வாவ நிரோத⁴ம் ஸமாபஜ்ஜித்வா நிஸீதி³. ப⁴க³வா ஆவஜ்ஜந்தோ தே²ரஸ்ஸ அஸம்மஜ்ஜித்வா நிஸின்னபா⁴வம் ஞத்வா ஆகாஸேன க³ந்த்வா தே²ரஸ்ஸ புரதோ அஸம்மட்ட²ட்டா²னே பாதா³னி த³ஸ்ஸேத்வா பச்சாக³ஞ்சி². தே²ரோ ஸமாபத்திதோ வுட்டி²தோ ப⁴க³வதோ பாதா³னி தி³ஸ்வா ப³லவஹிரோத்தப்பம் பச்சுபட்டா²பேத்வா ஜண்ணுகேஹி பதிட்டா²ய ‘‘அஸம்மஜ்ஜித்வா நிஸின்னபா⁴வம் வத மே ஸத்தா² அஞ்ஞாஸி, ஸங்க⁴மஜ்ஜே² தா³னி சோத³னம் காரேஸ்ஸாமீ’’தி த³ஸப³லஸ்ஸ ஸந்திகம் க³ந்த்வா வந்தி³த்வா நிஸீதி³. ப⁴க³வா ‘‘குஹிம் க³தோஸி, ஸாரிபுத்தா’’தி வத்வா ‘‘ந பதிரூபம் தா³னி தே மய்ஹம் அனந்தரே டா²னே ட²த்வா விசரந்தஸ்ஸ அஸம்மஜ்ஜித்வா நிஸீதி³து’’ந்தி ஆஹ. ததோ பட்டா²ய தே²ரோ க³ண்டி²கபடிமுஞ்சனட்டா²னேபி திட்ட²ந்தோ பாதே³ன கசவரம் வியூஹித்வாவ திட்ட²தி.

அத்தனோ பா⁴ஸபரியந்தம் ந உக்³க³ண்ஹாதீதி ‘‘இமஸ்மிம் வத்து²ஸ்மிம் ஏத்தகம் ஸுத்தம் உபலப்³ப⁴தி, ஏத்தகோ வினிச்ச²யோ, ஏத்தகம் ஸுத்தஞ்ச வினிச்ச²யஞ்ச வக்கா²மீ’’தி ஏவம் அத்தனோ பா⁴ஸபரியந்தம் ந உக்³க³ண்ஹாதி. ‘‘அயம் சோத³கஸ்ஸ புரிமகதா², அயம் பச்சி²மகதா², அயம் சுதி³தகஸ்ஸ புரிமகதா², அயம் பச்சி²மகதா², ஏத்தகம் க³ய்ஹூபக³ம், ஏத்தகம் ந க³ய்ஹூபக³’’ந்தி ஏவம் அனுக்³க³ண்ஹந்தோ பன பரஸ்ஸ பா⁴ஸபரியந்தம் ந உக்³க³ண்ஹாதி நாம. ஆபத்திம் ந ஜானாதீதி பாராஜிகம் வா ஸங்கா⁴தி³ஸேஸம் வாதி ஸத்தன்னம் ஆபத்திக்க²ந்தா⁴னம் நானாகரணம் ந ஜானாதி. மூலந்தி த்³வே ஆபத்தியா மூலானி காயோ ச வாசா ச, தானி ந ஜானாதி. ஸமுத³யந்தி ச² ஆபத்திஸமுட்டா²னானி ஆபத்திஸமுத³யோ நாம, தானி ந ஜானாதி. பாராஜிகாதீ³னம் வத்து²ம் ந ஜானாதீதிபி வுத்தம் ஹோதி. நிரோத⁴ந்தி அயம் ஆபத்தி தே³ஸனாய நிருஜ்ஜ²தி, வூபஸம்மதி, அயம் வுட்டா²னேனாதி ஏவம் ஆபத்தினிரோத⁴ம் ந ஜானாதி. ஸத்த ஸமதே² அஜானந்தோ பன ஆபத்தினிரோத⁴கா³மினிபடிபத³ம் ந ஜானாதி.

அதி⁴கரணபஞ்சகே அதி⁴கரணம் நாம சத்தாரி அதி⁴கரணானி. அதி⁴கரணஸ்ஸ மூலம் நாம தேத்திம்ஸ மூலானி – விவாதா³தி⁴கரணஸ்ஸ த்³வாத³ஸ மூலானி, அனுவாதா³தி⁴கரணஸ்ஸ சுத்³த³ஸ, ஆபத்தாதி⁴கரணஸ்ஸ ச², கிச்சாதி⁴கரணஸ்ஸ ஏகம்; தானி பரதோ ஆவி ப⁴விஸ்ஸந்தி. அதி⁴கரணஸமுத³யோ நாம அதி⁴கரணஸமுட்டா²னம். விவாதா³தி⁴கரணம் அட்டா²ரஸ பே⁴த³கரவத்தூ²னி நிஸ்ஸாய உப்பஜ்ஜதி; அனுவாதா³தி⁴கரணம் சதஸ்ஸோ விபத்தியோ; ஆபத்தாதி⁴கரணம் ஸத்தாபத்திக்க²ந்தே⁴; கிச்சாதி⁴கரணம் சத்தாரி ஸங்க⁴கிச்சானீதி இமம் விபா⁴க³ம் ந ஜானாதீதி அத்தோ². அதி⁴கரணனிரோத⁴ம் ந ஜானாதீதி த⁴ம்மேன வினயேன ஸத்து²ஸாஸனேன மூலாமூலம் க³ந்த்வா வினிச்ச²யஸமத²ம் பாபேதும் ந ஸக்கோதி; ‘‘இத³ம் அதி⁴கரணம் த்³வீஹி, இத³ம் சதூஹி, இத³ம் தீஹி இத³ம் ஏகேன ஸமதே²ன ஸம்மதீ’’தி ஏவம் ஸத்த ஸமதே² அஜானந்தோ பன அதி⁴கரணனிரோத⁴கா³மினிபடிபத³ம் ந ஜானாதி நாம. வத்து²ம் ந ஜானாதீதி ‘‘இத³ம் பாராஜிகஸ்ஸ வத்து², இத³ம் ஸங்கா⁴தி³ஸேஸஸ்ஸா’’தி ஏவம் ஸத்தன்னம் ஆபத்திக்க²ந்தா⁴னம் வத்து²ம் ந ஜானாதி. நிதா³னந்தி ‘‘ஸத்தன்னம் நிதா³னானம் இத³ம் ஸிக்கா²பத³ம் ஏத்த² பஞ்ஞத்தம், இத³ம் ஏத்தா²’’தி ந ஜானாதி. பஞ்ஞத்திம் ந ஜானாதீதி தஸ்மிம் தஸ்மிம் ஸிக்கா²பதே³ பட²மபஞ்ஞத்திம் ந ஜானாதி. அனுபஞ்ஞத்திந்தி புனப்புனம் பஞ்ஞத்திம் ந ஜானாதி. அனுஸந்தி⁴வசனபத²ந்தி கதா²னுஸந்தி⁴-வினிச்ச²யானுஸந்தி⁴வஸேன வத்து²ம் ந ஜானாதி. ஞத்திம் ந ஜானாதீதி ஸப்³பே³ன ஸப்³ப³ம் ஞத்திம் ந ஜானாதி. ஞத்தியா கரணம் ந ஜானாதீதி ஞத்திகிச்சம் ந ஜானாதி, ஓஸாரணாதீ³ஸு நவஸு டா²னேஸு ஞத்திகம்மம் நாம ஹோதி, ஞத்திது³தியஞத்திசதுத்த²கம்மேஸு ஞத்தியா கம்மப்பத்தோ ஹுத்வா திட்ட²தீதி ந ஜானாதி. ந புப்³ப³குஸலோ ஹோதி ந அபரகுஸலோதி புப்³பே³ கதே²தப்³ப³ஞ்ச பச்சா² கதே²தப்³ப³ஞ்ச ந ஜானாதி, ஞத்தி நாம புப்³பே³ ட²பேதப்³பா³, பச்சா² ந ட²பேதப்³பா³திபி ந ஜானாதி. அகாலஞ்ஞூ ச ஹோதீதி காலம் ந ஜானாதி, அனஜ்ஜி²ட்டோ² அயாசிதோ பா⁴ஸதி, ஞத்திகாலம்பி ஞத்திகே²த்தம்பி ஞத்திஓகாஸம்பி ந ஜானாதி.

மந்த³த்தா மோமூஹத்தாதி கேவலம் அஞ்ஞாணேன மோமூஹபா⁴வேன து⁴தங்கே³ ஆனிஸம்ஸம் அஜானித்வா. பாபிச்சோ²தி தேன அரஞ்ஞவாஸேன பச்சயலாப⁴ம் பத்த²யமானோ. பவிவேகந்தி காயசித்தஉபதி⁴விவேகம். இத³மத்தி²தந்தி இமாய கல்யாணாய படிபத்தியா அத்தோ² ஏதஸ்ஸாதி இத³மத்தி², இத³மத்தி²னோ பா⁴வோ இத³மத்தி²தா; தம் இத³மத்தி²தம்யேவ நிஸ்ஸாய ந அஞ்ஞம் கிஞ்சி லோகாமிஸந்தி அத்தோ².

உபோஸத²ம் ந ஜானாதீதி நவவித⁴ம் உபோஸத²ம் ந ஜானாதி. உபோஸத²கம்மந்தி அத⁴ம்மேனவக்³கா³தி³பே⁴த³ம் சதுப்³பி³த⁴ம் உபோஸத²கம்மம் ந ஜானாதி. பாதிமோக்க²ந்தி த்³வே மாதிகா ந ஜானாதி. பாதிமோக்கு²த்³தே³ஸந்தி ஸப்³ப³ம்பி நவவித⁴ம் பாதிமோக்கு²த்³தே³ஸம் ந ஜானாதி. பவாரணந்தி நவவித⁴ம் பவாரணம் ந ஜானாதி. பவாரணாகம்மம் உபோஸத²கம்மஸதி³ஸமேவ.

அபாஸாதி³கபஞ்சகே – அபாஸாதி³கந்தி காயது³ச்சரிதாதி³ அகுஸலகம்மம் வுச்சதி. பாஸாதி³கந்தி காயஸுசரிதாதி³ குஸலகம்மம் வுச்சதி. அதிவேலந்தி வேலம் அதிக்கம்ம ப³ஹுதரம் காலம் குலேஸு அப்பம் விஹாரேதி அத்தோ². ஓதாரோதி கிலேஸானம் அந்தோ ஓதரணம். ஸம்கிலிட்ட²ந்தி து³ட்டு²ல்லாபத்திகாயஸம்ஸக்³கா³தி³பே⁴த³ம். விஸுத்³தி⁴பஞ்சகேபவாரணாக்³க³ஹணேன நவவிதா⁴பி பவாரணா வேதி³தப்³பா³. ஸேஸம் ஸப்³ப³த்த² உத்தானமேவாதி.

பஞ்சகவாரவண்ணனா நிட்டி²தா.

ச²க்கவாரவண்ணனா

326. ச²க்கேஸு – ச² ஸாமீசியோதி ‘‘ஸோ ச பி⁴க்கு² அனப்³பி⁴தோ, தே ச பி⁴க்கூ² கா³ரய்ஹா, அயம் தத்த² ஸாமீசி’’, ‘‘யுஞ்ஜந்தாயஸ்மந்தோ ஸகம், மா வோ ஸகம் வினஸ்ஸாதி அயம் தத்த² ஸாமீசி’’, ‘‘அயம் தே பி⁴க்கு² பத்தோ யாவ பே⁴த³னாய தா⁴ரேதப்³போ³தி அயம் தத்த² ஸாமீசி’’, ‘‘ததோ நீஹரித்வா பி⁴க்கூ²ஹி ஸத்³தி⁴ம் ஸம்விப⁴ஜிதப்³ப³ம், அயம் தத்த² ஸாமீசி’’, ‘‘அஞ்ஞாதப்³ப³ம் பரிபுச்சி²தப்³ப³ம் பரிபஞ்ஹிதப்³ப³ம், அயம் தத்த² ஸாமீசி’’, ‘‘யஸ்ஸ ப⁴விஸ்ஸதி ஸோ ஹரிஸ்ஸதீதி அயம் தத்த² ஸாமீசீ’’தி இமா பி⁴க்கு²பாதிமோக்கே²யேவ ச² ஸாமீசியோ. ச² சே²த³னகாதி பஞ்சகே வுத்தா பஞ்ச பி⁴க்கு²னீனம் உத³கஸாடிகாய ஸத்³தி⁴ம் ச². ச²ஹாகாரேஹீதி அலஜ்ஜிதா அஞ்ஞாணதா குக்குச்சபகததா அகப்பியே கப்பியஸஞ்ஞிதா கப்பியே அகப்பியஸஞ்ஞிதா ஸதிஸம்மோஸாதி. தத்த² ஏகரத்தசா²ரத்தஸத்தாஹாதிக்கமாதீ³ஸு ஆபத்திம் ஸதிஸம்மோஸேன ஆபஜ்ஜதி. ஸேஸம் வுத்தனயமேவ. ச² ஆனிஸம்ஸா வினயத⁴ரேதி பஞ்சகே வுத்தா பஞ்ச தஸ்ஸாதே⁴ய்யோ உபோஸதோ²தி இமினா ஸத்³தி⁴ம் ச².

ச² பரமானீதி ‘‘த³ஸாஹபரமம் அதிரேகசீவரம் தா⁴ரேதப்³ப³ம், மாஸபரமம் தேன பி⁴க்கு²னா தம் சீவரம் நிக்கி²பிதப்³ப³ம், ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³ம், ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம், நவம் பன பி⁴க்கு²னா ஸந்த²தம் காராபேத்வா ச²ப்³ப³ஸ்ஸானி தா⁴ரேதப்³ப³ம் ச²ப்³ப³ஸ்ஸபரமதா தா⁴ரேதப்³ப³ம், தியோஜனபரமம் ஸஹத்தா² தா⁴ரேதப்³பா³னி, த³ஸாஹபரமம் அதிரேகபத்தோ தா⁴ரேதப்³போ³, ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னி, சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³ம், சதுக்கம்ஸபரமம், அட்³ட⁴தேய்யகம்ஸபரமம், த்³வங்கு³லபப்³ப³பரமம் ஆதா³தப்³ப³ம், அட்ட²ங்கு³லபரமம் மஞ்சபடிபாத³கம், அட்ட²ங்கு³லபரமம் த³ந்தகட்ட²’’ந்தி இமானி சுத்³த³ஸ பரமானி. தத்த² பட²மானி ச² ஏகம் ச²க்கம், ததோ ஏகம் அபனேத்வா ஸேஸேஸு ஏகேகம் பக்கி²பித்வாதிஆதி³னா நயேன அஞ்ஞானிபி ச²க்கானி காதப்³பா³னி.

ச² ஆபத்தியோதி தீணி ச²க்கானி அந்தரபேய்யாலே வுத்தானி. ச² கம்மானீதி தஜ்ஜனீய-நியஸ்ஸ-பப்³பா³ஜனீய-படிஸாரணீயானி சத்தாரி, ஆபத்தியா அத³ஸ்ஸனே ச அப்படிகம்மே ச வுத்தத்³வயம்பி ஏகம், பாபிகாய தி³ட்டி²யா அப்படினிஸ்ஸக்³கே³ ஏகந்தி ச². நஹானேதி ஓரேனட்³ட⁴மாஸம் நஹானே; விப்பகதசீவராதி³ச²க்கத்³வயம் கதி²னக்க²ந்த⁴கே நித்³தி³ட்ட²ம். ஸேஸம் ஸப்³ப³த்த² உத்தானமேவாதி.

ச²க்கவாரவண்ணனா நிட்டி²தா.

ஸத்தகவாரவண்ணனா

327. ஸத்தகேஸு – ஸத்த ஸாமீசியோதி புப்³பே³ வுத்தேஸு ச²ஸு ‘‘ஸா ச பி⁴க்கு²னீ அனப்³பி⁴தா, தா ச பி⁴க்கு²னியோ கா³ரய்ஹா, அயம் தத்த² ஸாமீசீ’’தி இமம் பக்கி²பித்வா ஸத்த வேதி³தப்³பா³. ஸத்த அத⁴ம்மிகா படிஞ்ஞாதகரணாதி ‘‘பி⁴க்கு² பாராஜிகம் அஜ்ஜா²பன்னோ ஹோதி, பாராஜிகேன சோதி³யமானோ ‘ஸங்கா⁴தி³ஸேஸம் அஜ்ஜா²பன்னோம்ஹீ’தி படிஜானாதி, தம் ஸங்கோ⁴ ஸங்கா⁴தி³ஸேஸேன காரேதி, அத⁴ம்மிகம் படிஞ்ஞாதகரண’’ந்தி ஏவம் ஸமத²க்க²ந்த⁴கே நித்³தி³ட்டா². த⁴ம்மிகாபி தத்தே²வ நித்³தி³ட்டா². ஸத்தன்னம் அனாபத்தி ஸத்தாஹகரணீயேன க³ந்துந்தி வஸ்ஸூபனாயிகக்க²ந்த⁴கே வுத்தம். ஸத்தானிஸம்ஸா வினயத⁴ரேதி ‘‘தஸ்ஸாதே⁴ய்யோ உபோஸதோ² பவாரணா’’தி இமேஹி ஸத்³தி⁴ம் பஞ்சகே வுத்தா பஞ்ச ஸத்த ஹோந்தி. ஸத்த பரமானீதி ச²க்கே வுத்தானியேவ ஸத்தகவஸேன யோஜேதப்³பா³னி. கதசீவரந்திஆதீ³னி த்³வே ஸத்தகானி கதி²னக்க²ந்த⁴கே நித்³தி³ட்டா²னி.

பி⁴க்கு²ஸ்ஸ ந ஹோதி ஆபத்தி த³ட்ட²ப்³பா³, பி⁴க்கு²ஸ்ஸ ஹோதி ஆபத்தி த³ட்ட²ப்³பா³, பி⁴க்கு²ஸ்ஸ ஹோதி ஆபத்தி படிகாதப்³பா³தி இமானி தீணி ஸத்தகானி, த்³வே அத⁴ம்மிகானி, ஏகம் த⁴ம்மிகம்; தானி தீணிபி சம்பேய்யகே நித்³தி³ட்டா²னி. அஸத்³த⁴ம்மாதி அஸதம் த⁴ம்மா, அஸந்தோ வா த⁴ம்மா; அஸோப⁴னா ஹீனா லாமகாதி அத்தோ². ஸத்³த⁴ம்மாதி ஸதம் பு³த்³தா⁴தீ³னம் த⁴ம்மா; ஸந்தோ வா த⁴ம்மா ஸுந்த³ரா உத்தமாதி அத்தோ². ஸேஸம் ஸப்³ப³த்த² உத்தானமேவாதி.

ஸத்தகவாரவண்ணனா நிட்டி²தா.

அட்ட²கவாரவண்ணனா

328. அட்ட²கேஸு – அட்டா²னிஸம்ஸேதி ‘‘ந மயம் இமினா பி⁴க்கு²னா ஸத்³தி⁴ம் உபோஸத²ம் கரிஸ்ஸாம, வினா இமினா பி⁴க்கு²னா உபோஸத²ம் கரிஸ்ஸாம, ந மயம் இமினா பி⁴க்கு²னா ஸத்³தி⁴ம் பவாரேஸ்ஸாம, ஸங்க⁴கம்மம் கரிஸ்ஸாம, ஆஸனே நிஸீதி³ஸ்ஸாம, யாகு³பானே நிஸீதி³ஸ்ஸாம, ப⁴த்தக்³கே³ நிஸீதி³ஸ்ஸாம, ஏகச்ச²ன்னே வஸிஸ்ஸாம, யதா²வுட்³ட⁴ம் அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் கரிஸ்ஸாம, வினா இமினா பி⁴க்கு²னா கரிஸ்ஸாமா’’தி ஏவம் கோஸம்ப³கக்க²ந்த⁴கே வுத்தே ஆனிஸம்ஸே. து³தியஅட்ட²கேபி ஏஸேவ நயோ, தம்பி ஹி ஏவமேவ கோஸம்ப³கக்க²ந்த⁴கே வுத்தம்.

அட்ட² யாவததியகாதி பி⁴க்கூ²னம் தேரஸகே சத்தாரோ, பி⁴க்கு²னீனம் ஸத்தரஸகே பி⁴க்கூ²ஹி அஸாதா⁴ரணா சத்தாரோதி அட்ட². அட்ட²ஹாகாரேஹி குலானி தூ³ஸேதீதி குலானி தூ³ஸேதி புப்பே²ன வா ப²லேன வா சுண்ணேன வா மத்திகாய வா த³ந்தகட்டே²ன வா வேளுயா வா வேஜ்ஜிகாய வா ஜங்க⁴பேஸனிகேன வாதி இமேஹி அட்ட²ஹி. அட்ட² மாதிகா சீவரக்க²ந்த⁴கே, அபரா அட்ட² கதி²னக்க²ந்த⁴கே வுத்தா. அட்ட²ஹி அஸத்³த⁴ம்மேஹீதி லாபே⁴ன அலாபே⁴ன யஸேன அயஸேன ஸக்காரேன அஸக்காரேன பாபிச்ச²தாய பாபமித்ததாய. அட்ட² லோகத⁴ம்மா நாம லாபே⁴ ஸாராகோ³, அலாபே⁴ படிவிரோதோ⁴; ஏவம் யஸே அயஸே, பஸம்ஸாய நிந்தா³ய, ஸுகே² ஸாராகோ³, து³க்கே² படிவிரோதோ⁴தி. அட்ட²ங்கி³கோ முஸாவாதோ³தி ‘‘வினிதா⁴ய ஸஞ்ஞ’’ந்தி இமினா ஸத்³தி⁴ம் பாளியம் ஆக³தேஹி ஸத்தஹீதி அட்ட²ஹி அங்கே³ஹி அட்ட²ங்கி³கோ.

அட்ட² உபோஸத²ங்கா³னீதி –

‘‘பாணம் ந ஹனே ந சாதி³ன்னமாதி³யே,

முஸா ந பா⁴ஸே ந ச மஜ்ஜபோ ஸியா;

அப்³ரஹ்மசரியா விரமேய்ய மேது²னா,

ரத்திம் ந பு⁴ஞ்ஜேய்ய விகாலபோ⁴ஜனம்.

‘‘மாலம் ந தா⁴ரே ந ச க³ந்த⁴மாசரே,

மஞ்சே ச²மாயம்வ ஸயேத² ஸந்த²தே;

ஏதஞ்ஹி அட்ட²ங்கி³கமாஹுபோஸத²ம்,

பு³த்³தே⁴ன து³க்க²ந்தகு³னா பகாஸித’’ந்தி. (அ. நி. 3.71);

ஏவம் வுத்தானி அட்ட². அட்ட² தூ³தேய்யங்கா³னீதி ‘‘இத⁴, பி⁴க்க²வே, பி⁴க்கு² ஸோதா ச ஹோதி ஸாவேதா சா’’திஆதி³னா நயேன ஸங்க⁴பே⁴த³கே வுத்தானி. தித்தி²யவத்தானி மஹாக²ந்த⁴கே நித்³தி³ட்டா²னி. அனதிரித்தா ச அதிரித்தா ச பவாரணாஸிக்கா²பதே³ நித்³தி³ட்டா². அட்ட²ன்னம் பச்சுட்டா²தப்³ப³ந்தி ப⁴த்தக்³கே³ வுட்³ட⁴பி⁴க்கு²னீனம், ஆஸனம்பி தாஸம்யேவ தா³தப்³ப³ம். உபாஸிகாதி விஸாகா². அட்டா²னிஸம்ஸா வினயத⁴ரேதி பஞ்சகே வுத்தேஸு பஞ்சஸு ‘‘தஸ்ஸாதே⁴ய்யோ உபோஸதோ², பவாரணா, ஸங்க⁴கம்ம’’ந்தி இமே தயோ பக்கி²பித்வா அட்ட² வேதி³தப்³பா³. அட்ட² பரமானீதி புப்³பே³ வுத்தபரமானேவ அட்ட²கவஸேன யோஜேத்வா வேதி³தப்³பா³னி. அட்ட²ஸு த⁴ம்மேஸு ஸம்மா வத்திதப்³ப³ந்தி ‘‘ந பகதத்தஸ்ஸ பி⁴க்கு²னோ உபோஸதோ² ட²பேதப்³போ³, ந பவாரணா ட²பேதப்³பா³’’திஆதி³னா நயேன ஸமத²க்க²ந்த⁴கே நித்³தி³ட்டே²ஸு அட்ட²ஸு. ஸேஸம் ஸப்³ப³த்த² உத்தானமேவாதி.

அட்ட²கவாரவண்ணனா நிட்டி²தா.

நவகவாரவண்ணனா

329. நவகேஸு – நவ ஆகா⁴தவத்தூ²னீதி ‘‘அனத்த²ம் மே அசரீ’’திஆதீ³னி நவ. நவ ஆகா⁴தபடிவினயாதி ‘‘அனத்த²ம் மே அசரி, தம் குதேத்த² லப்³பா⁴தி ஆகா⁴தம் படிவினேதீ’’திஆதீ³னி நவ. நவ வினீதவத்தூ²னீதி நவஹி ஆகா⁴தவத்தூ²ஹி ஆரதி விரதி படிவிரதி ஸேதுகா⁴தோ. நவஹி ஸங்கோ⁴ பி⁴ஜ்ஜதீதி ‘‘நவன்னம் வா, உபாலி, அதிரேகனவன்னம் வா ஸங்க⁴ராஜி சேவ ஹோதி ஸங்க⁴பே⁴தோ³ சா’’தி. நவ பரமானீதி புப்³பே³ வுத்தபரமானேவ நவகவஸேன யோஜேத்வா வேதி³தப்³பா³னி. நவ தண்ஹாமூலகா நாம தண்ஹம் படிச்ச பரியேஸனா, பரியேஸனம் படிச்ச லாபோ⁴, லாப⁴ம் படிச்ச வினிச்ச²யோ, வினிச்ச²யம் படிச்ச ச²ந்த³ராகோ³, ச²ந்த³ராக³ம் படிச்ச அஜ்ஜோ²ஸானம், அஜ்ஜோ²ஸானம் படிச்ச பரிக்³க³ஹோ, பரிக்³க³ஹம் படிச்ச மச்ச²ரியம், மச்ச²ரியம் படிச்ச ஆரக்கா², ஆரக்கா²தி⁴கரணம் த³ண்டா³தா³னஸத்தா²தா³னகலஹவிக்³க³ஹவிவாத³துவம்துவம்பேஸுஞ்ஞமுஸாவாதா³. நவ வித⁴மானாதி ‘‘ஸேய்யஸ்ஸ ஸேய்யோஹமஸ்மீ’’திமானாத³யோ. நவ சீவரானீதி திசீவரந்தி வா வஸ்ஸிகஸாடிகாதி வாதிஆதி³னா நயேன வுத்தானி. ந விகப்பேதப்³பா³னீதி அதி⁴ட்டி²தகாலதோ பட்டா²ய ந விகப்பேதப்³பா³னி. நவ அத⁴ம்மிகானி தா³னானீதி ஸங்க⁴ஸ்ஸ பரிணதம் அஞ்ஞஸங்க⁴ஸ்ஸ வா சேதியஸ்ஸ வா புக்³க³லஸ்ஸ வா பரிணாமேதி, சேதியஸ்ஸ பரிணதம் அஞ்ஞசேதியஸ்ஸ வா ஸங்க⁴ஸ்ஸ வா புக்³க³லஸ்ஸ வா பரிணாமேதி, புக்³க³லஸ்ஸ பரிணதம் அஞ்ஞபுக்³க³லஸ்ஸ வா ஸங்க⁴ஸ்ஸ வா சேதியஸ்ஸ வா பரிணாமேதீதி ஏவம் வுத்தானி.

நவ படிக்³க³ஹபரிபோ⁴கா³தி ஏதேஸம்யேவ தா³னானம் படிக்³க³ஹா ச பரிபோ⁴கா³ ச. தீணி த⁴ம்மிகானி தா³னானீதி ஸங்க⁴ஸ்ஸ நின்னம் ஸங்க⁴ஸ்ஸேவ தே³தி, சேதியஸ்ஸ நின்னம் சேதியஸ்ஸேவ, புக்³க³லஸ்ஸ நின்னம் புக்³க³லஸ்ஸேவ தே³தீதி இமானி தீணி. படிக்³க³ஹபடிபோ⁴கா³பி தேஸம்யேவ படிக்³க³ஹா ச பரிபோ⁴கா³ ச. நவ அத⁴ம்மிகா ஸஞ்ஞத்தியோதி அத⁴ம்மவாதி³புக்³க³லோ, அத⁴ம்மவாதி³ஸம்ப³ஹுலா, அத⁴ம்மவாதி³ஸங்கோ⁴தி ஏவம் தீணி திகானி ஸமத²க்க²ந்த⁴கே நித்³தி³ட்டா²னி. த⁴ம்மிகா ஸஞ்ஞத்தியோபி த⁴ம்மவாதீ³ புக்³க³லோதிஆதி³னா நயேன தத்தே²வ நித்³தி³ட்டா². அத⁴ம்மகம்மே த்³வே நவகானி ஓவாத³வக்³க³ஸ்ஸ பட²மஸிக்கா²பத³னித்³தே³ஸே பாசித்தியவஸேன வுத்தானி. த⁴ம்மகம்மே த்³வே நவகானி தத்தே²வ து³க்கடவஸேன வுத்தானி. ஸேஸம் ஸப்³ப³த்த² உத்தானமேவாதி.

நவகவாரவண்ணனா நிட்டி²தா.

த³ஸகவாரவண்ணனா

330. த³ஸகேஸு – த³ஸ ஆகா⁴தவத்தூ²னீதி நவகேஸு வுத்தானி நவ ‘‘அட்டா²னே வா பன ஆகா⁴தோ ஜாயதீ’’தி இமினா ஸத்³தி⁴ம் த³ஸ ஹோந்தி. ஆகா⁴தபடிவினயாபி தத்த² வுத்தா நவ ‘‘அட்டா²னே வா பன ஆகா⁴தோ ஜாயதி, தம் குதேத்த² லப்³பா⁴தி ஆகா⁴தம் படிவினேதீ’’தி இமினா ஸத்³தி⁴ம் த³ஸ வேதி³தப்³பா³. த³ஸ வினீதவத்தூ²னீதி த³ஸஹி ஆகா⁴தவத்தூ²ஹி விரதிஸங்கா²தானி த³ஸ. த³ஸவத்து²கா மிச்சா²தி³ட்டீ²தி ‘‘நத்தி² தி³ன்ன’’ந்திஆதி³வஸேன வேதி³தப்³பா³, ‘‘அத்தி² தி³ன்ன’’ந்திஆதி³வஸேன ஸம்மாதி³ட்டி², ‘‘ஸஸ்ஸதோ லோகோ’’திஆதி³னா வஸேன பன அந்தக்³கா³ஹிகா தி³ட்டி² வேதி³தப்³பா³. த³ஸ மிச்ச²த்தாதி மிச்சா²தி³ட்டி²ஆத³யோ மிச்சா²விமுத்திபரியோஸானா, விபரீதா ஸம்மத்தா. ஸலாகக்³கா³ஹா ஸமத²க்க²ந்த⁴கே நித்³தி³ட்டா².

த³ஸஹங்கே³ஹி ஸமன்னாக³தோ பி⁴க்கு² உப்³பா³ஹிகாய ஸம்மன்னிதப்³போ³தி ‘‘ஸீலவா ஹோதீ’’திஆதி³னா நயேன ஸமத²க்க²ந்த⁴கே வுத்தேஹி த³ஸஹி. த³ஸ ஆதீ³னவா ராஜந்தேபுரப்பவேஸனே ராஜஸிக்கா²பதே³ நித்³தி³ட்டா². த³ஸ தா³னவத்தூ²னீதி அன்னம் பானம் வத்த²ம் யானம் மாலா க³ந்த⁴ம் விலேபனம் ஸேய்யாவஸத²ம் பதீ³பேய்யம். த³ஸ ரதனானீதி முத்தாமணிவேளுரியாதீ³னி. த³ஸ பம்ஸுகூலானீதி ஸோஸானிகம், பாபணிகம், உந்தூ³ரக்கா²யிதம், உபசிகக்கா²யிதம், அக்³கி³த³ட்³ட⁴ம், கோ³கா²யிதம், அஜிகக்கா²யிதம், தூ²பசீவரம், ஆபி⁴ஸேகியம், ப⁴தபடியாப⁴தந்தி ஏதேஸு உபஸம்பன்னேன உஸ்ஸுக்கம் காதப்³ப³ம். த³ஸ சீவரதா⁴ரணாதி ‘‘ஸப்³ப³னீலகானி சீவரானி தா⁴ரேந்தீ’’தி வுத்தவஸேன த³ஸாதி குருந்தி³யம் வுத்தம். மஹாஅட்ட²கதா²யம் பன ‘‘நவஸு கப்பியசீவரேஸு உத³கஸாடிகம் வா ஸங்கச்சிகம் வா பக்கி²பித்வா த³ஸா’’தி வுத்தம்.

அவந்த³னீயபுக்³க³லா ஸேனாஸனக்க²ந்த⁴கே நித்³தி³ட்டா². த³ஸ அக்கோஸவத்தூ²னி ஓமஸவாதே³ நித்³தி³ட்டா²னி. த³ஸ ஆகாரா பேஸுஞ்ஞஸிக்கா²பதே³ நித்³தி³ட்டா². த³ஸ ஸேனாஸனானீதி மஞ்சோ, பீட²ம், பி⁴ஸி, பி³ம்போ³ஹனம், சிமிலிகா, உத்தரத்த²ரணம், தட்டிகா, சம்மக²ண்டோ³, நிஸீத³னம், திணஸந்தா²ரோ, பண்ணஸந்தா²ரோதி. த³ஸ வரானி யாசிம்ஸூதி விஸாகா² அட்ட², ஸுத்³தோ⁴த³னமஹாராஜா ஏகம், ஜீவகோ ஏகம். யாகு³ஆனிஸம்ஸா ச அகப்பியமம்ஸானி ச பே⁴ஸஜ்ஜக்க²ந்த⁴கே நித்³தி³ட்டா²னி. ஸேஸம் ஸப்³ப³த்த² உத்தானமேவாதி.

த³ஸகவாரவண்ணனா நிட்டி²தா.

ஏகாத³ஸகவாரவண்ணனா

331. ஏகாத³ஸகேஸு – ஏகாத³ஸாதி பண்ட³காத³யோ ஏகாத³ஸ. ஏகாத³ஸ பாது³காதி த³ஸ ரதனமயா, ஏகா கட்ட²பாது³கா. திணபாது³கமுஞ்ஜபாது³கபப்³ப³ஜபாது³காத³யோ பன கட்ட²பாது³கஸங்க³ஹமேவ க³ச்ச²ந்தி. ஏகாத³ஸ பத்தாதி தம்ப³லோஹமயேன வா தா³ருமயேன வா ஸத்³தி⁴ம் த³ஸ ரதனமயா. ஏகாத³ஸ சீவரானீதி ஸப்³ப³னீலகாதீ³னி ஏகாத³ஸ. யாவததியகாதி உக்கி²த்தானுவத்திகா பி⁴க்கு²னீ, ஸங்கா⁴தி³ஸேஸா அட்ட², அரிட்டோ², சண்ட³காளீதி. ஏகாத³ஸ அந்தராயிகா நாம ‘‘நஸி அனிமித்தா’’தி ஆத³யோ. ஏகாத³ஸ சீவரானி அதி⁴ட்டா²தப்³பா³னீதி திசீவரம், வஸ்ஸிகஸாடிகா, நிஸீத³னம், பச்சத்த²ரணம், கண்டு³ப்படிச்சா²தி³, முக²புஞ்ச²னசோளம், பரிக்கா²ரசோளம், உத³கஸாடிகா, ஸங்கச்சிகாதி. ந விகப்பேதப்³பா³னீதி ஏதானேவ அதி⁴ட்டி²தகாலதோ பட்டா²ய ந விகப்பேதப்³பா³னி. க³ண்டி²கா ச விதா⁴ ச ஸுத்தமயேன ஸத்³தி⁴ம் ஏகாத³ஸ ஹோந்தி, தே ஸப்³பே³ கு²த்³த³கக்க²ந்த⁴கே நித்³தி³ட்டா². பத²வியோ பத²விஸிக்கா²பதே³ நித்³தி³ட்டா². நிஸ்ஸயபடிபஸ்ஸத்³தி⁴யோ உபஜ்ஜா²யம்ஹா பஞ்ச, ஆசரியம்ஹா ச²; ஏவம் ஏகாத³ஸ. அவந்தி³யபுக்³க³லா நக்³கே³ன ஸத்³தி⁴ம் ஏகாத³ஸ, தே ஸப்³பே³ ஸேனாஸனக்க²ந்த⁴கே நித்³தி³ட்டா². ஏகாத³ஸ பரமானி புப்³பே³ வுத்தேஸு சுத்³த³ஸஸு ஏகாத³ஸகவஸேன யோஜேத்வா வேதி³தப்³பா³னி. ஏகாத³ஸ வரானீதி மஹாபஜாபதியா யாசிதவரேன ஸத்³தி⁴ம் புப்³பே³ வுத்தானி த³ஸ. ஏகாத³ஸ ஸீமாதோ³ஸாதி ‘‘அதிகு²த்³த³கம் ஸீமம் ஸம்மன்னந்தீ’’திஆதி³னா நயேன கம்மவக்³கே³ ஆக³மிஸ்ஸந்தி.

அக்கோஸகபரிபா⁴ஸகே புக்³க³லே ஏகாத³ஸாதீ³னவா நாம ‘‘யோ ஸோ, பி⁴க்க²வே, பி⁴க்கு² அக்கோஸகோ பரிபா⁴ஸகோ அரியூபவாதீ³, ஸப்³ரஹ்மசாரீனம் அட்டா²னமேதம் அனவகாஸோ யம் ஸோ ஏகாத³ஸன்னம் ப்³யஸனானம் அஞ்ஞதரம் ப்³யஸனம் ந நிக³ச்சே²ய்ய. கதமேஸம் ஏகாத³ஸன்னம்? அனதி⁴க³தம் நாதி⁴க³ச்ச²தி, அதி⁴க³தா பரிஹாயதி, ஸத்³த⁴ம்மஸ்ஸ ந வோதா³யந்தி, ஸத்³த⁴ம்மேஸு வா அதி⁴மானிகோ ஹோதி, அனபி⁴ரதோ வா ப்³ரஹ்மசரியம் சரதி, அஞ்ஞதரம் வா ஸம்கிலிட்ட²ம் ஆபத்திம் ஆபஜ்ஜதி, ஸிக்க²ம் வா பச்சக்கா²ய ஹீனாயாவத்ததி, கா³ள்ஹம் வா ரோகா³தங்கம் பு²ஸதி, உம்மாத³ம் வா பாபுணாதி சித்தக்கே²பம் வா, ஸம்மூள்ஹோ காலம் கரோதி, காயஸ்ஸ பே⁴தா³ பரம்மரணா அபாயம் து³க்³க³திம் வினிபாதம் நிரயம் உபபஜ்ஜதீ’’தி (அ. நி. 11.6). ஏத்த² ச ஸத்³த⁴ம்மோதி பு³த்³த⁴வசனம் அதி⁴ப்பேதம்.

ஆஸேவிதாயாதி ஆதி³தோ பட்டா²ய ஸேவிதாய. பா⁴விதாயாதி நிப்பா²தி³தாய வட்³டி⁴தாய

வா. ப³ஹுலீகதாயாதி புனப்புனம் கதாய. யானீகதாயாதி ஸுயுத்தயானஸதி³ஸாய கதாய. வத்து²கதாயாதி யதா² பதிட்டா² ஹோதி; ஏவம் கதாய. அனுட்டி²தாயாதி அனு அனு பவத்திதாய; நிச்சாதி⁴ட்டி²தாயாதி அத்தோ². பரிசிதாயாதி ஸமந்ததோ சிதாய; ஸப்³ப³தி³ஸாஸு சிதாய ஆசிதாய பா⁴விதாய அபி⁴வட்³டி⁴தாயாதி அத்தோ². ஸுஸமாரத்³தா⁴யாதி ஸுட்டு² ஸமாரத்³தா⁴ய; வஸீபா⁴வம் உபனீதாயாதி அத்தோ². ந பாபகம் ஸுபினந்தி பாபகமேவ ந பஸ்ஸதி, ப⁴த்³ரகம் பன வுட்³டி⁴காரணபூ⁴தம் பஸ்ஸதி. தே³வதா ரக்க²ந்தீதி ஆரக்க²தே³வதா த⁴ம்மிகம் ரக்க²ம் பச்சுபட்டா²பேந்தி. துவடம் சித்தம் ஸமாதி⁴யதீதி கி²ப்பம் சித்தம் ஸமாதி⁴யதி. உத்தரி அப்படிவிஜ்ஜ²ந்தோதி மேத்தாஜா²னதோ உத்தரிம் அரஹத்தம் அஸச்சி²கரோந்தோ ஸேகோ² வா புது²ஜ்ஜனோ வா ஹுத்வா காலம் கரோந்தோ ப்³ரஹ்மலோகூபகோ³ ஹோதி. ஸேஸம் ஸப்³ப³த்த² உத்தானமேவாதி.

ஏகாத³ஸகவாரவண்ணனா பரியோஸானா

ஏகுத்தரிகவண்ணனா நிட்டி²தா.