ஸேத³மோசனகா³தா²

(1) அவிப்பவாஸபஞ்ஹாவண்ணனா

479. ஸேத³மோசனகா³தா²ஸு அஸம்வாஸோதி உபோஸத²பவாரணாதி³னா ஸம்வாஸேன அஸம்வாஸோ. ஸம்போ⁴கோ³ ஏகச்சோ தஹிம் ந லப்³ப⁴தீதி அகப்பியஸம்போ⁴கோ³ ந லப்³ப⁴தி, நஹாபனபோ⁴ஜனாதி³படிஜக்³க³னம் பன மாதராயேவ காதும் லப்³ப⁴தி. அவிப்பவாஸேன அனாபத்தீதி ஸஹகா³ரஸேய்யாய அனாபத்தி. பஞ்ஹா மேஸா குஸலேஹி சிந்திதாதி ஏஸா பஞ்ஹா குஸலேஹி பண்டி³தேஹி சிந்திதா. அஸ்ஸா விஸ்ஸஜ்ஜனம் தா³ரகமாதுயா பி⁴க்கு²னியா வேதி³தப்³ப³ம், தஸ்ஸா ஹி புத்தம் ஸந்தா⁴யேதம் வுத்தந்தி.

அவிஸ்ஸஜ்ஜிதகா³தா² க³ருப⁴ண்ட³ம் ஸந்தா⁴ய வுத்தா, அத்தோ² பனஸ்ஸா க³ருப⁴ண்ட³வினிச்ச²யே வுத்தோயேவ.

த³ஸ புக்³க³லே ந வதா³மீதி ஸேனாஸனக்க²ந்த⁴கே வுத்தே த³ஸ புக்³க³லே ந வதா³மி. ஏகாத³ஸ விவஜ்ஜியாதி யே மஹாக²ந்த⁴கே ஏகாத³ஸ விவஜ்ஜனீயபுக்³க³லா வுத்தா, தேபி ந வதா³மி. அயம் பஞ்ஹா நக்³க³ம் பி⁴க்கு²ம் ஸந்தா⁴ய வுத்தா.

கத²ம் நு ஸிக்கா²ய அஸாதா⁴ரணோதி பஞ்ஹா நஹாபிதபுப்³ப³கம் பி⁴க்கு²ம் ஸந்தா⁴ய வுத்தா. அயஞ்ஹி கு²ரப⁴ண்ட³ம் பரிஹரிதும் ந லப⁴தி, அஞ்ஞே லப⁴ந்தி; தஸ்மா ஸிக்கா²ய அஸாதா⁴ரணோ.

தம் புக்³க³லம் கதமம் வத³ந்தி பு³த்³தா⁴தி அயம் பஞ்ஹா நிம்மிதபு³த்³த⁴ம் ஸந்தா⁴ய வுத்தா.

அதோ⁴னாபி⁴ம் விவஜ்ஜியாதி அதோ⁴னாபி⁴ம் விவஜ்ஜேத்வா. அயம் பஞ்ஹா யம் தம் அஸீஸகம் கப³ந்த⁴ம், யஸ்ஸ உரே அக்கீ²னி சேவ முக²ஞ்ச ஹோதி, தம் ஸந்தா⁴ய வுத்தா.

பி⁴க்கு² ஸஞ்ஞாசிகாய குடிந்தி அயம் பஞ்ஹா திணச்சா²த³னம் குடிம் ஸந்தா⁴ய வுத்தா. து³தியபஞ்ஹா ஸப்³ப³மத்திகாமயம் குடிம் ஸந்தா⁴ய வுத்தா.

ஆபஜ்ஜேய்ய க³ருகம் சே²ஜ்ஜவத்து²ந்தி அயம் பஞ்ஹா வஜ்ஜபடிச்சா²தி³கம் பி⁴க்கு²னிம் ஸந்தா⁴ய வுத்தா. து³தியபஞ்ஹா பண்ட³காத³யோ அப⁴ப்³ப³புக்³க³லே ஸந்தா⁴ய வுத்தா. ஏகாத³ஸபி ஹி தே கி³ஹிபா⁴வேயேவ பாராஜிகம் பத்தா.

வாசாதி வாசாய அனாலபந்தோ. கி³ரம் நோ ச பரே ப⁴ணேய்யாதி ‘‘இதி இமே ஸோஸ்ஸந்தீ’’தி பரபுக்³க³லே ஸந்தா⁴ய ஸத்³த³ம்பி ந நிச்சா²ரேய்ய. அயம் பஞ்ஹா ‘‘ஸந்திம் ஆபத்திம் நாவிகரேய்ய, ஸம்பஜானமுஸாவாத³ஸ்ஸ ஹோதீ’’தி இமம் முஸாவாத³ம் ஸந்தா⁴ய வுத்தா. தஸ்ஸ ஹி பி⁴க்கு²னோ அத⁴ம்மிகாய படிஞ்ஞாய துண்ஹீபூ⁴தஸ்ஸ நிஸின்னஸ்ஸ மனோத்³வாரே ஆபத்தி நாம நத்தி². யஸ்மா பன ஆவிகாதப்³ப³ம் ந ஆவிகரோதி, தேனஸ்ஸ வசீத்³வாரே அகிரியதோ அயம் ஆபத்தி ஸமுட்டா²தீதி வேதி³தப்³பா³.

ஸங்கா⁴தி³ஸேஸா சதுரோதி அயம் பஞ்ஹா அருணுக்³கே³ கா³மந்தரபரியாபன்னம் நதி³பாரம் ஓக்கந்தபி⁴க்கு²னிம் ஸந்தா⁴ய வுத்தா, ஸா ஹி ஸககா³மதோ பச்சூஸஸமயே நிக்க²மித்வா அருணுக்³க³மனகாலே வுத்தப்பகாரம் நதி³பாரம் ஓக்கந்தமத்தாவ ரத்திவிப்பவாஸகா³மந்தரனதி³பாரக³ணம்ஹாஓஹீயனலக்க²ணேன ஏகப்பஹாரேனேவ சதுரோ ஸங்கா⁴தி³ஸேஸே ஆபஜ்ஜதி.

ஸியா ஆபத்தியோ நானாதி அயம் பஞ்ஹா ஏகதோஉபஸம்பன்னா த்³வே பி⁴க்கு²னியோ ஸந்தா⁴ய வுத்தா. தாஸு ஹி பி⁴க்கூ²னம் ஸந்திகே ஏகதோஉபஸம்பன்னாய ஹத்த²தோ க³ண்ஹந்தஸ்ஸ பாசித்தியம், பி⁴க்கு²னீனம் ஸந்திகே ஏகதோஉபஸம்பன்னாய ஹத்த²தோ க³ண்ஹந்தஸ்ஸ து³க்கடம்.

சதுரோ ஜனா ஸம்விதா⁴யாதி ஆசரியோ ச தயோ ச அந்தேவாஸிகா ச²மாஸகம் ப⁴ண்ட³ம் அவஹரிம்ஸு, ஆசரியஸ்ஸ ஸாஹத்தி²கா தயோ மாஸகா, ஆணத்தியாபி தயோவ தஸ்மா து²ல்லச்சயம் ஆபஜ்ஜதி, இதரேஸம் ஸாஹத்தி²கோ ஏகேகோ, ஆணத்திகா பஞ்சாதி தஸ்மா பாராஜிகம் ஆபஜ்ஜிம்ஸு. அயமேத்த² ஸங்கே²போ. வித்தா²ரோ பன அதி³ன்னாதா³னபாராஜிகே ஸம்விதா³வஹாரவண்ணனாயம் வுத்தோ.

(2) பாராஜிகாதி³பஞ்ஹாவண்ணனா

480. சி²த்³த³ம் தஸ்மிம் க⁴ரே நத்தீ²தி அயம் பஞ்ஹா து³ஸ்ஸகுடிஆதீ³னி ஸந்த²தபேய்யாலஞ்ச ஸந்தா⁴ய வுத்தா.

தேலம் மது⁴ம் பா²ணிதந்தி கா³தா² லிங்க³பரிவத்தம் ஸந்தா⁴ய வுத்தா.

நிஸ்ஸக்³கி³யேனாதி கா³தா² பரிணாமனம் ஸந்தா⁴ய வுத்தா. யோ ஹி ஸங்க⁴ஸ்ஸ பரிணதலாப⁴தோ ஏகம் சீவரம் அத்தனோ, ஏகம் அஞ்ஞஸ்ஸாதி த்³வே சீவரானி ‘‘ஏகம் மய்ஹம், ஏகம் தஸ்ஸ தே³ஹீ’’தி ஏகபயஓகே³ன பரிணாமேதி, ஸோ நிஸ்ஸக்³கி³யபாசித்தியஞ்சேவ ஸுத்³தி⁴கபாசித்தியஞ்ச ஏகதோ ஆபஜ்ஜதி.

கம்மஞ்ச தம் குப்பேய்ய வக்³க³பச்சயாதி அயம் பஞ்ஹா த்³வாத³ஸயோஜனபமாணேஸு பா³ராணஸிஆதீ³ஸு நக³ரேஸு கா³மஸீமம் ஸந்தா⁴ய வுத்தா.

பத³வீதிஹாரமத்தேனாதி கா³தா² ஸஞ்சரித்தம் ஸந்தா⁴ய வுத்தா, அத்தோ²பி சஸ்ஸா ஸஞ்சரித்தவண்ணனாயமேவ வுத்தோ.

ஸப்³பா³னி தானி நிஸ்ஸக்³கி³யானீதி அயம் பஞ்ஹா அஞ்ஞாதிகாய பி⁴க்கு²னியா தோ⁴வாபனம் ஸந்தா⁴ய வுத்தா. ஸசே ஹி திண்ணம்பி சீவரானம் காகஊஹத³னம் வா கத்³த³மமக்கி²தம் வா கண்ணம் க³ஹேத்வா பி⁴க்கு²னீ உத³கேன தோ⁴வதி, பி⁴க்கு²ஸ்ஸ காயக³தானேவ நிஸ்ஸக்³கி³யானி ஹோந்தி.

ஸரணக³மனம்பி ந தஸ்ஸ அத்தீ²தி ஸரணக³மனஉபஸம்பதா³பி நத்தி². அயம் பன பஞ்ஹா மஹாபஜாபதியா உபஸம்பத³ம் ஸந்தா⁴ய வுத்தா.

ஹனேய்ய அனரியம் மந்தோ³தி தஞ்ஹி இத்தி²ம் வா புரிஸம் வா அனரியம் ஹனேய்ய. அயம் பஞ்ஹா லிங்க³பரிவத்தேன இத்தி²பூ⁴தம் பிதரம் புரிஸபூ⁴தஞ்ச மாதரம் ஸந்தா⁴ய வுத்தா.

ந தேனானந்தரம் பு²ஸேதி அயம் பஞ்ஹா மிக³ஸிங்க³தாபஸஸீஹகுமாராதீ³னம் விய திரச்சா²னமாதாபிதரோ ஸந்தா⁴ய வுத்தா.

அசோத³யித்வாதி கா³தா² தூ³தேனுபஸம்பத³ம் ஸந்தா⁴ய வுத்தா. சோத³யித்வாதி கா³தா² பண்ட³காதீ³னம் உபஸம்பத³ம் ஸந்தா⁴ய வுத்தா. குருந்தி³யம் பன ‘‘பட²மகா³தா² அட்ட² அஸம்முகா²கம்மானி, து³தியா அனாபத்திகஸ்ஸ கம்மம் ஸந்தா⁴ய வுத்தா’’தி ஆக³தம்.

சி²ந்த³ந்தஸ்ஸ ஆபத்தீதி வனப்பதிம் சி²ந்த³ந்தஸ்ஸ பாராஜிகம், திணலதாதி³ம் சி²ந்த³ந்தஸ்ஸ பாசித்தியம், அங்க³ஜாதம் சி²ந்த³ந்தஸ்ஸ து²ல்லச்சயம். சி²ந்த³ந்தஸ்ஸ அனாபத்தீதி கேஸே ச நகே² ச சி²ந்த³ந்தஸ்ஸ அனாபத்தி. சா²தே³ந்தஸ்ஸ ஆபத்தீதி அத்தனோ ஆபத்திம் சா²தே³ந்தஸ்ஸ அஞ்ஞேஸம் வா ஆபத்திம். சா²தே³ந்தஸ்ஸ அனாபத்தீதி கே³ஹாதீ³னி சா²தே³ந்தஸ்ஸ அனாபத்தி.

ஸச்சம் ப⁴ணந்தோதி கா³தா²ய ‘‘ஸிக²ரணீஸி உப⁴தோப்³யஞ்ஜனாஸீ’’தி ஸச்சம் ப⁴ணந்தோ க³ருகம் ஆபஜ்ஜதி, ஸம்பஜானமுஸாவாதே³ பன முஸா பா⁴ஸதோ லஹுகாபத்தி ஹோதி, அபூ⁴தாரோசனே முஸா ப⁴ணந்தோ க³ருகம் ஆபஜ்ஜதி, பூ⁴தாரோசனே ஸச்சம் பா⁴ஸதோ லஹுகாபத்தி ஹோதீதி.

(3) பாசித்தியாதி³பஞ்ஹாவண்ணனா

481. அதி⁴ட்டி²தந்தி கா³தா² நிஸ்ஸக்³கி³யசீவரம் அனிஸ்ஸஜ்ஜித்வா பரிபு⁴ஞ்ஜந்தம் ஸந்தா⁴ய வுத்தா.

அத்த²ங்க³தே ஸூரியேதி கா³தா² ரோமந்த²கம் ஸந்தா⁴ய வுத்தா.

ந ரத்தசித்தோதி கா³தா²ய அயமத்தோ² – ரத்தசித்தோ மேது²னத⁴ம்மபாராஜிகம் ஆபஜ்ஜதி. தே²ய்யசித்தோ அதி³ன்னாதா³னபாராஜிகம், பரம் மரணாய சேதேந்தோ மனுஸ்ஸவிக்³க³ஹபாராஜிகம், ஸங்க⁴பே⁴த³கோ பன ந ரத்தசித்தோ ந ச பன தே²ய்யசித்தோ ந சாபி ஸோ பரம் மரணாய சேதயி, ஸலாகம் பனஸ்ஸ தே³ந்தஸ்ஸ ஹோதி சே²ஜ்ஜம், பாராஜிகம் ஹோதி, ஸலாகம் படிக்³க³ண்ஹந்தஸ்ஸ பே⁴த³கானுவத்தகஸ்ஸ து²ல்லச்சயம்.

க³ச்சே²ய்ய அட்³ட⁴யோஜனந்தி அயம் பஞ்ஹா ஸுப்பதிட்டி²தனிக்³ரோத⁴ஸதி³ஸம் ஏககுலஸ்ஸ ருக்க²மூலம் ஸந்தா⁴ய வுத்தா.

காயிகானீதி அயம் கா³தா² ஸம்ப³ஹுலானம் இத்தீ²னம் கேஸே வா அங்கு³லியோ வா ஏகதோ க³ண்ஹந்தம் ஸந்தா⁴ய வுத்தா.

வாசஸிகானீதி அயம் கா³தா² ‘‘ஸப்³பா³ தும்ஹே ஸிக²ரணியோ’’திஆதி³னா நயேன து³ட்டு²ல்லபா⁴ணிம் ஸந்தா⁴ய வுத்தா.

திஸ்ஸித்தி²யோ மேது²னம் தம் ந ஸேவேதி திஸ்ஸோ இத்தி²யோ வுத்தா, தாஸுபி யம் தம் மேது²னம் நாம, தம் ந ஸேவதி. தயோ புரிஸேதி தயோ புரிஸேபி உபக³ந்த்வா மேது²னம் ந ஸேவதி. தயோ அனரியபண்ட³கேதி உப⁴தோப்³யஞ்ஜனஸங்கா²தே தயோ அனரியே தயோ ச பண்ட³கேதி இமேபி ச² ஜனே உபக³ந்த்வா மேது²னம் ந ஸேவதி. ந சாசரே மேது²னம் ப்³யஞ்ஜனஸ்மிந்தி அனுலோமபாராஜிகவஸேனபி மேது²னம் நாசரதி. சே²ஜ்ஜம் ஸியா மேது²னத⁴ம்மபச்சயாதி ஸியா மேது²னத⁴ம்மபச்சயா பாராஜிகந்தி. அயம் பஞ்ஹா அட்ட²வத்து²கம் ஸந்தா⁴ய வுத்தா, தஸ்ஸா ஹி மேது²னத⁴ம்மஸ்ஸ புப்³ப³பா⁴க³ம் காயஸம்ஸக்³க³ம் ஆபஜ்ஜிதும் வாயமந்தியா மேது²னத⁴ம்மபச்சயா சே²ஜ்ஜம் ஹோதி.

மாதரம் சீவரந்தி அயம் கா³தா² பிட்டி²ஸமயே வஸ்ஸிகஸாடிகத்த²ம் ஸதுப்பாத³கரணம் ஸந்தா⁴ய வுத்தா. வினிச்ச²யோ பனஸ்ஸா வஸ்ஸிகஸாடிகஸிக்கா²பத³வண்ணனாயமேவ வுத்தோ.

குத்³தோ⁴ ஆராத⁴கோ ஹோதீதி கா³தா² தித்தி²யவத்தம் ஸந்தா⁴ய வுத்தா. தித்தி²யோ ஹி வத்தம் பூரயமானோ தித்தி²யானம் வண்ணே ப⁴ஞ்ஞமானே குத்³தோ⁴ ஆராத⁴கோ ஹோதி, வத்து²த்தயஸ்ஸ வண்ணே ப⁴ஞ்ஞமானே குத்³தோ⁴ கா³ரய்ஹோ ஹோதீதி தத்தே²வஸ்ஸா வித்தா²ரோ வுத்தோ. து³தியகா³தா²பி தமேவ ஸந்தா⁴ய வுத்தா.

ஸங்கா⁴தி³ஸேஸந்திஆதி³ கா³தா² யா பி⁴க்கு²னீ அவஸ்ஸுதாவ அவஸ்ஸுதஸ்ஸ புரிஸஸ்ஸ ஹத்த²தோ பிண்ட³பாதம் க³ஹேத்வா மனுஸ்ஸமம்ஸலஸுணபணீதபோ⁴ஜனஸேஸஅகப்பியமம்ஸேஹி ஸத்³தி⁴ம் ஓமத்³தி³த்வா அஜ்ஜோ²ஹரதி, தம் ஸந்தா⁴ய வுத்தா.

ஏகோ உபஸம்பன்னோ ஏகோ அனுபஸம்பன்னோதி கா³தா² ஆகாஸக³தம் ஸந்தா⁴ய வுத்தா. ஸசே ஹி த்³வீஸு ஸாமணேரேஸு ஏகோ இத்³தி⁴யா கேஸக்³க³மத்தம்பி பத²விம் முஞ்சித்வா நிஸின்னோ ஹோதி, ஸோ அனுபஸம்பன்னோ நாம ஹோதி. ஸங்கே⁴னாபி ஆகாஸே நிஸீதி³த்வா பூ⁴மிக³தஸ்ஸ கம்மம் ந காதப்³ப³ம். ஸசே கரோதி, குப்பதி.

அகப்பகதந்தி கா³தா² அச்சி²ன்னசீவரகம் பி⁴க்கு²ம் ஸந்தா⁴ய வுத்தா. தஸ்மிம்யேவ சஸ்ஸா ஸிக்கா²பதே³ வித்தா²ரேன வினிச்ச²யோபி வுத்தோ.

ந தே³தி ந படிக்³க³ண்ஹாதீதி நாபி உய்யோஜிகா தே³தி, ந உய்யோஜிதா தஸ்ஸா ஹத்த²தோ க³ண்ஹாதி. படிக்³க³ஹோ தேன ந விஜ்ஜதீதி தேனேவ காரணேன உய்யோஜிகாய ஹத்த²தோ உய்யோஜிதாய படிக்³க³ஹோ ந விஜ்ஜதி. ஆபஜ்ஜதி க³ருகந்தி ஏவம் ஸந்தேபி அவஸ்ஸுதஸ்ஸ ஹத்த²தோ பிண்ட³பாதக்³க³ஹணே உய்யோஜேந்தீ ஸங்கா⁴தி³ஸேஸாபத்திம் ஆபஜ்ஜதி. தஞ்ச பரிபோ⁴க³பச்சயாதி தஞ்ச பன ஆபத்திம் ஆபஜ்ஜமானா தஸ்ஸா உய்யோஜிதாய பரிபோ⁴க³பச்சயா ஆபஜ்ஜதி. தஸ்ஸா ஹி போ⁴ஜனபரியோஸானே உய்யோஜிகாய ஸங்கா⁴தி³ஸேஸோ ஹோதீதி. து³தியகா³தா² தஸ்ஸாயேவ உத³கத³ந்தபோனக்³க³ஹணே உய்யோஜனம் ஸந்தா⁴ய வுத்தா.

ந பி⁴க்கு²னீ நோ ச பு²ஸேய்ய வஜ்ஜந்தி ஸத்தரஸகேஸு ஹி அஞ்ஞதரம் ஆபத்திம் ஆபஜ்ஜித்வா அனாத³ரியேன சா²த³யமானாபி பி⁴க்கு²னீ சா²த³னபச்சயா வஜ்ஜம் ந பு²ஸதி, அஞ்ஞம் நவம் ஆபத்திம் நாபஜ்ஜதி, படிச்ச²ன்னாய வா அப்படிச்ச²ன்னாய வா ஆபத்தியா பக்க²மானத்தமேவ லப⁴தி. அயம் பன பி⁴க்கு²னீபி ந ஹோதி, ஸாவஸேஸஞ்ச க³ருகம் ஆபஜ்ஜித்வா சா²தே³த்வா வஜ்ஜம் ந பு²ஸதி. பஞ்ஹா மேஸா குஸலேஹி சிந்திதாதி அயம் கிர பஞ்ஹா உக்கி²த்தகபி⁴க்கு²ம் ஸந்தா⁴ய வுத்தா. தேன ஹி ஸத்³தி⁴ம் வினயகம்மம் நத்தி², தஸ்மா ஸோ ஸங்கா⁴தி³ஸேஸம் ஆபஜ்ஜித்வா சா²தே³ந்தோ வஜ்ஜம் ந பு²ஸதீதி.

ஸேத³மோசனகா³தா²வண்ணனா நிட்டி²தா.