அபரது³தியகா³தா²ஸங்க³ணிகம்

(1) காயிகாதி³ஆபத்திவண்ணனா

474. ‘‘கதி ஆபத்தியோ காயிகா’’திஆதி³கா³தா²னம் விஸ்ஸஜ்ஜனே ச² ஆபத்தியோ காயிகாதி அந்தரபேய்யாலே சதுத்தே²ன ஆபத்திஸமுட்டா²னேன ச² ஆபத்தியோ ஆபஜ்ஜதி, ‘‘பி⁴க்கு² மேது²னம் த⁴ம்மம் படிஸேவதி, ஆபத்தி பாராஜிகஸ்ஸா’’திஆதி³னா நயேன வுத்தாபத்தியோ. காயத்³வாரே ஸமுட்டி²தத்தா ஹி ஏதா காயிகாதி வுச்சந்தி. ச² வாசஸிகாதி தஸ்மிம்யேவ அந்தரபேய்யாலே பஞ்சமேன ஆபத்திஸமுட்டா²னேன ச² ஆபத்தியோ ஆபஜ்ஜதி, ‘‘பி⁴க்கு² பாபிச்சோ² இச்சா²பகதோ’’திஆதி³னா நயேன வுத்தாபத்தியோ. சா²தே³ந்தஸ்ஸ திஸ்ஸோதி வஜ்ஜபடிச்சா²தி³காய பி⁴க்கு²னியா பாராஜிகம், பி⁴க்கு²ஸ்ஸ ஸங்கா⁴தி³ஸேஸபடிச்சா²த³னே பாசித்தியம், அத்தனோ து³ட்டு²ல்லாபத்திபடிச்சா²த³னே து³க்கடம். பஞ்ச ஸம்ஸக்³க³பச்சயாதி பி⁴க்கு²னியா காயஸம்ஸக்³கே³ பாராஜிகம், பி⁴க்கு²னோ ஸங்கா⁴தி³ஸேஸோ, காயேன காயபடிப³த்³தே⁴ து²ல்லச்சயம், நிஸ்ஸக்³கி³யேன காயபடிப³த்³தே⁴ து³க்கடம், அங்கு³லிபதோத³கே பாசித்தியந்தி இமா காயஸம்ஸக்³க³பச்சயா பஞ்சாபத்தியோ.

அருணுக்³கே³ திஸ்ஸோதி ஏகரத்தசா²ரத்தஸத்தாஹத³ஸாஹமாஸாதிக்கமவஸேன நிஸ்ஸக்³கி³யம் பாசித்தியம், பி⁴க்கு²னியா ரத்திவிப்பவாஸே ஸங்கா⁴தி³ஸேஸோ, ‘‘பட²மம்பி யாமம் சா²தே³தி, து³தியம்பி ததியம்பி யாமம் சா²தே³தி, உத்³த⁴ஸ்தே அருணே ச²ன்னா ஹோதி ஆபத்தி, யோ சா²தே³தி ஸோ து³க்கடம் தே³ஸாபேதப்³போ³’’தி இமா அருணுக்³கே³ திஸ்ஸோ ஆபத்தியோ ஆபஜ்ஜதி. த்³வே யாவததியகாதி ஏகாத³ஸ யாவததியகா நாம, பஞ்ஞத்திவஸேன பன த்³வே ஹோந்தி பி⁴க்கூ²னம் யாவததியகா பி⁴க்கு²னீனம் யாவததியகாதி. ஏகேத்த² அட்ட²வத்து²காதி பி⁴க்கு²னீனம்யேவ ஏகா ஏத்த² இமஸ்மிம் ஸாஸனே அட்ட²வத்து²கா நாம. ஏகேன ஸப்³ப³ஸங்க³ஹோதி ‘‘யஸ்ஸ ஸியா ஆபத்தி, ஸோ ஆவிகரேய்யா’’தி இமினா ஏகேன நிதா³னுத்³தே³ஸேன ஸப்³ப³ஸிக்கா²பதா³னஞ்ச ஸப்³ப³பாதிமோக்கு²த்³தே³ஸானஞ்ச ஸங்க³ஹோ ஹோதி.

வினயஸ்ஸ த்³வே மூலானீதி காயோ சேவ வாசா ச. க³ருகா த்³வே வுத்தாதி பாராஜிகஸங்கா⁴தி³ஸேஸா. த்³வே து³ட்டு²ல்லச்சா²த³னாதி வஜ்ஜபடிச்சா²தி³காய பாராஜிகம் ஸங்கா⁴தி³ஸேஸம் படிச்சா²த³கஸ்ஸ பாசித்தியந்தி இமா த்³வே து³ட்டு²ல்லச்சா²த³னாபத்தியோ நாம.

கா³மந்தரே சதஸ்ஸோதி ‘‘பி⁴க்கு² பி⁴க்கு²னியா ஸத்³தி⁴ம் ஸம்வித³ஹதி, து³க்கடம்; அஞ்ஞஸ்ஸ கா³மஸ்ஸ உபசாரம் ஓக்கமதி, பாசித்தியம்; பி⁴க்கு²னியா கா³மந்தரம் க³ச்ச²ந்தியா பரிக்கி²த்தே கா³மே பட²மபாதே³ து²ல்லச்சயம், து³தியபாதே³ ஸங்கா⁴தி³ஸேஸோ; அபரிக்கி²த்தஸ்ஸ பட²மபாதே³ உபசாரோக்கமனே து²ல்லச்சயம், து³தியபாதே³ ஸங்கா⁴தி³ஸேஸோ’’தி இமா கா³மந்தரே து³க்கடபாசித்தியது²ல்லச்சயஸங்க⁴ஆதி³ஸேஸவஸேன சதஸ்ஸோ ஆபத்தியோ. சதஸ்ஸோ நதி³பாரபச்சயாதி ‘‘பி⁴க்கு² பி⁴க்கு²னியா ஸத்³தி⁴ம் ஸம்வித³ஹதி, து³க்கடம்; நாவம் அபி⁴ருஹதி, பாசித்தியம்; பி⁴க்கு²னியா நதி³பாரம் க³ச்ச²ந்தியா உத்தரணகாலே பட²மபாதே³ து²ல்லச்சயம், து³தியபாதே³ ஸங்கா⁴தி³ஸேஸோ’’தி இமா சதஸ்ஸோ. ஏகமம்ஸே து²ல்லச்சயந்தி மனுஸ்ஸமம்ஸே. நவமம்ஸேஸு து³க்கடந்தி ஸேஸஅகப்பியமம்ஸேஸு.

த்³வே வாசஸிகா ரத்திந்தி பி⁴க்கு²னீ ரத்தந்த⁴காரே அப்பதீ³பே புரிஸேன ஸத்³தி⁴ம் ஹத்த²பாஸே டி²தா ஸல்லபதி, பாசித்தியம்; ஹத்த²பாஸம் விஜஹித்வா டி²தா ஸல்லபதி, து³க்கடம். த்³வே வாசஸிகா தி³வாதி பி⁴க்கு²னீ தி³வா படிச்ச²ன்னே ஓகாஸே புரிஸேன ஸத்³தி⁴ம் ஹத்த²பாஸே டி²தா ஸல்லபதி, பாசித்தியம்; ஹத்த²பாஸம் விஜஹித்வா ஸல்லபதி, து³க்கடம். த³த³மானஸ்ஸ திஸ்ஸோதி மரணாதி⁴ப்பாயோ மனுஸ்ஸஸ்ஸ விஸம் தே³தி, ஸோ சே தேன மரதி, பாராஜிகம்; யக்க²பேதானம் தே³தி, தே சே மரந்தி, து²ல்லச்சயம்; திரச்சா²னக³தஸ்ஸ தே³தி, ஸோ சே மரதி, பாசித்தியம்; அஞ்ஞாதிகாய பி⁴க்கு²னியா சீவரதா³னே பாசித்தியந்தி ஏவம் த³த³மானஸ்ஸ திஸ்ஸோ ஆபத்தியோ. சத்தாரோ ச படிக்³க³ஹேதி ஹத்த²க்³கா³ஹ-வேணிக்³கா³ஹேஸு ஸங்கா⁴தி³ஸேஸோ, முகே²ன அங்க³ஜாதக்³க³ஹணே பாராஜிகம், அஞ்ஞாதிகாய பி⁴க்கு²னியா சீவரபடிக்³க³ஹணே நிஸ்ஸக்³கி³யம் பாசித்தியம், அவஸ்ஸுதாய அவஸ்ஸுதஸ்ஸ ஹத்த²தோ கா²த³னீயம் போ⁴ஜனீயம் படிக்³க³ண்ஹந்தியா து²ல்லச்சயம்; ஏவம் படிக்³க³ஹே சத்தாரோ ஆபத்திக்க²ந்தா⁴ ஹோந்தி.

(2) தே³ஸனாகா³மினியாதி³வண்ணனா

475. பஞ்ச தே³ஸனாகா³மினியோதி லஹுகா பஞ்ச. ச² ஸப்படிகம்மாதி பாராஜிகம் ட²பேத்வா அவஸேஸா. ஏகேத்த² அப்படிகம்மாதி ஏகா பாராஜிகாபத்தி.

வினயக³ருகா த்³வே வுத்தாதி பாராஜிகஞ்சேவ ஸங்கா⁴தி³ஸேஸஞ்ச. காயவாசஸிகானி சாதி ஸப்³பா³னேவ ஸிக்கா²பதா³னி காயவாசஸிகானி, மனோத்³வாரே பஞ்ஞத்தம் ஏகஸிக்கா²பத³ம்பி நத்தி². ஏகோ விகாலே த⁴ஞ்ஞரஸோதி லோணஸோவீரகம். அயமேவ ஹி ஏகோ த⁴ஞ்ஞரஸோ விகாலே வட்டதி. ஏகா ஞத்திசதுத்தே²ன ஸம்முதீதி பி⁴க்கு²னோவாத³கஸம்முதி. அயமேவ ஹி ஏகா ஞத்திசதுத்த²கம்மேன ஸம்முதி அனுஞ்ஞாதா.

பாராஜிகா காயிகா த்³வேதி பி⁴க்கூ²னம் மேது²னபாராஜிகம் பி⁴க்கு²னீனஞ்ச காயஸம்ஸக்³க³பாராஜிகம். த்³வே ஸம்வாஸபூ⁴மியோதி அத்தனா வா அத்தானம் ஸமானஸம்வாஸகம் கரோதி, ஸமக்³கோ³ வா ஸங்கோ⁴ உக்கி²த்தம் ஓஸாரேதி. குருந்தி³யம் பன ‘‘ஸமானஸம்வாஸகபூ⁴மி ச நானாஸம்வாஸகபூ⁴மி சா’’தி ஏவம் த்³வே ஸம்வாஸபூ⁴மியோ வுத்தா. த்³வின்னம் ரத்திச்சே²தோ³தி பாரிவாஸிகஸ்ஸ ச மானத்தசாரிகஸ்ஸ ச பஞ்ஞத்தா. த்³வங்கு³லா து³வேதி த்³வே த்³வங்கு³லபஞ்ஞத்தியோ, ‘‘த்³வங்கு³லபப்³ப³பரமம் ஆதா³தப்³ப³’’ந்தி அயமேகா, ‘‘த்³வங்கு³லம் வா த்³வேமாஸம் வா’’தி அயமேகா.

த்³வே அத்தானம் வதி⁴த்வானாதி பி⁴க்கு²னீ அத்தானம் வதி⁴த்வா த்³வே ஆபத்தியோ ஆபஜ்ஜதி; வத⁴தி ரோத³தி, ஆபத்தி பாசித்தியஸ்ஸ; வத⁴தி ந ரோத³தி, ஆபத்தி து³க்கடஸ்ஸ. த்³வீஹி ஸங்கோ⁴ பி⁴ஜ்ஜதீதி கம்மேன ச ஸலாகக்³கா³ஹேன ச. த்³வேத்த² பட²மாபத்திகாதி ஏத்த² ஸகலேபி வினயே த்³வே பட²மாபத்திகா உபி⁴ன்னம் பஞ்ஞத்திவஸேன. இதரதா² பன நவ பி⁴க்கூ²னம் நவ பி⁴க்கு²னீனந்தி அட்டா²ரஸ ஹோந்தி. ஞத்தியா கரணா து³வேதி த்³வே ஞத்திகிச்சானி – கம்மஞ்ச கம்மபாத³கா ச. நவஸு டா²னேஸு கம்மம் ஹோதி, த்³வீஸு கம்மபாத³பா⁴வேன திட்ட²தி.

பாணாதிபாதே திஸ்ஸோதி ‘‘அனோதி³ஸ்ஸ ஓபாதம் க²ணதி, ஸசே மனுஸ்ஸோ மரதி, பாராஜிகம்; யக்க²பேதானம் மரணே து²ல்லச்சயம்; திரச்சா²னக³தஸ்ஸ மரணே பாசித்திய’’ந்தி இமா திஸ்ஸோ ஹோந்தி. வாசா பாராஜிகா தயோதி வஜ்ஜபடிச்சா²தி³காய உக்கி²த்தானுவத்திகாய அட்ட²வத்து²காயாதி. குருந்தி³யம் பன ‘‘ஆணத்தியா அதி³ன்னாதா³னே, மனுஸ்ஸமரணே, உத்தரிமனுஸ்ஸத⁴ம்மஉல்லபனே சா’’தி ஏவம் தயோ வுத்தா. ஓபா⁴ஸனா தயோதி வச்சமக்³க³ம் பஸ்ஸாவமக்³க³ம் ஆதி³ஸ்ஸ வண்ணாவண்ணபா⁴ஸனே ஸங்கா⁴தி³ஸேஸோ, வச்சமக்³க³ம் பஸ்ஸாவமக்³க³ம் ட²பேத்வா அத⁴க்க²கம் உப்³ப⁴ஜாணுமண்ட³லம் ஆதி³ஸ்ஸ வண்ணாவண்ணப⁴ணனே து²ல்லச்சயம், உப்³ப⁴க்க²கம் அதோ⁴ஜாணுமண்ட³லம் ஆதி³ஸ்ஸ வண்ணாவண்ணப⁴ணனே து³க்கடம். ஸஞ்சரித்தேன வா தயோதி படிக்³க³ண்ஹாதி வீமம்ஸதி பச்சாஹரதி, ஆபத்தி ஸங்கா⁴தி³ஸேஸஸ்ஸ; படிக்³க³ண்ஹாதி வீமம்ஸதி ந பச்சாஹரதி, ஆபத்தி து²ல்லச்சயஸ்ஸ; படிக்³க³ண்ஹாதி ந வீமம்ஸதி ந பச்சாஹரதி, ஆபத்தி து³க்கடஸ்ஸாதி இமே ஸஞ்சரித்தேன காரணபூ⁴தேன தயோ ஆபத்திக்க²ந்தா⁴ ஹோந்தி.

தயோ புக்³க³லா ந உபஸம்பாதே³தப்³பா³தி அத்³தா⁴னஹீனோ அங்க³ஹீனோ வத்து²விபன்னோ ச தேஸம் நானாகரணம் வுத்தமேவ. அபிசேத்த² யோ பத்தசீவரேன அபரிபூரோ, பரிபூரோ ச ந யாசதி, இமேபி அங்க³ஹீனேனேவ ஸங்க³ஹிதா. மாதுகா⁴தகாத³யோ ச கரணது³க்கடகா பண்ட³கஉப⁴தோப்³யஞ்ஜனகதிரச்சா²னக³தஸங்கா²தேன வத்து²விபன்னேனேவ ஸங்க³ஹிதாதி வேதி³தப்³பா³. ஏஸ நயோ குருந்தி³யம் வுத்தோ. தயோ கம்மானம் ஸங்க³ஹாதி ஞத்திகப்பனா, விப்பகதபச்சத்தம், அதீதகரணந்தி. தத்த² ‘‘த³தே³ய்ய கரேய்யா’’திஆதி³பே⁴தா³ ஞத்திகப்பனா; ‘‘தே³தி கரோதீ’’திஆதி³பே⁴த³ம் விப்பகதபச்சத்தம்; ‘‘தி³ன்னம் கத’’ந்திஆதி³பே⁴த³ம் அதீதகரணம் நாமாதி இமேஹி தீஹி கம்மானி ஸங்க³ய்ஹந்தி. அபரேஹிபி தீஹி கம்மானி ஸங்க³ய்ஹந்தி – வத்து²னா, ஞத்தியா, அனுஸ்ஸாவனாயாதி. வத்து²ஸம்பன்னஞ்ஹி ஞத்திஸம்பன்னம் அனுஸ்ஸாவனஸம்பன்னஞ்ச கம்மம் நாம ஹோதி, தேன வுத்தம் ‘‘தயோ கம்மானம் ஸங்க³ஹா’’தி. நாஸிதகா தயோ நாம மேத்தியம் பி⁴க்கு²னிம் நாஸேத², தூ³ஸகோ நாஸேதப்³போ³, த³ஸஹங்கே³ஹி ஸமன்னாக³தோ ஸாமணேரோ நாஸேதப்³போ³, கண்டகம் ஸமணுத்³தே³ஸம் நாஸேதா²தி ஏவம் லிங்க³ஸம்வாஸத³ண்ட³கம்மனாஸனாவஸேன தயோ நாஸிதகா வேதி³தப்³பா³. திண்ணன்னம் ஏகவாசிகாதி ‘‘அனுஜானாமி பி⁴க்க²வே த்³வே தயோ ஏகானுஸ்ஸாவனே காது’’ந்தி வசனதோ திண்ணம் ஜனானம் ஏகுபஜ்ஜா²யேன நானாசரியேன ஏகானுஸ்ஸாவனா வட்டதி.

அதி³ன்னாதா³னே திஸ்ஸோதி பாதே³ வா அதிரேகபாதே³ வா பாராஜிகம், அதிரேகமாஸகே து²ல்லச்சயம், மாஸகே வா ஊனமாஸகே வா து³க்கடம். சதஸ்ஸோ மேது²னபச்சயாதி அக்க²யிதே பாராஜிகம், யேபு⁴ய்யேன க²யிதே து²ல்லச்சயம், விவடகதே முகே² து³க்கடம், ஜதுமட்ட²கே பாசித்தியம். சி²ந்த³ந்தஸ்ஸ திஸ்ஸோதி வனப்பதிம் சி²ந்த³ந்தஸ்ஸ பாராஜிகம், பூ⁴தகா³மே பாசித்தியம், அங்க³ஜாதே து²ல்லச்சயம். பஞ்ச ச²ட்³டி³தபச்சயாதி அனோதி³ஸ்ஸ விஸம் ச²ட்³டே³தி, ஸசே தேன மனுஸ்ஸோ மரதி, பாராஜிகம்; யக்க²பேதேஸு து²ல்லச்சயம்; திரச்சா²னக³தே பாசித்தியம்; விஸ்ஸட்டி²ச²ட்³ட³னே ஸங்கா⁴தி³ஸேஸோ; ஸேகி²யேஸு ஹரிதே உச்சாரபஸ்ஸாவச²ட்³ட³னே து³க்கடம் – இமா ச²ட்³டி³தபச்சயா பஞ்சாபத்தியோ ஹோந்தி.

பாசித்தியேன து³க்கடா கதாதி பி⁴க்கு²னோவாத³கவக்³க³ஸ்மிம் த³ஸஸு ஸிக்கா²பதே³ஸு பாசித்தியேன ஸத்³தி⁴ம் து³க்கடா கதா ஏவாதி அத்தோ². சதுரேத்த² நவகா வுத்தாதி பட²மஸிக்கா²பத³ம்ஹியேவ அத⁴ம்மகம்மே த்³வே, த⁴ம்மகம்மே த்³வேதி ஏவம் சத்தாரோ நவகா வுத்தாதி அத்தோ². த்³வின்னம் சீவரேன சாதி பி⁴க்கூ²னம் ஸந்திகே உபஸம்பன்னாய சீவரம் தே³ந்தஸ்ஸ பாசித்தியம், பி⁴க்கு²னீனம் ஸந்திகே உபஸம்பன்னாய தே³ந்தஸ்ஸ து³க்கடந்தி ஏவம் த்³வின்னம் பி⁴க்கு²னீனம் சீவரம் தே³ந்தஸ்ஸ சீவரேன காரணபூ⁴தேன ஆபத்தி ஹோதீதி அத்தோ².

அட்ட² பாடிதே³ஸனீயாதி பாளியம் ஆக³தா ஏவ. பு⁴ஞ்ஜந்தாமகத⁴ஞ்ஞேன பாசித்தியேன து³க்கடா கதாதி ஆமகத⁴ஞ்ஞம் விஞ்ஞாபேத்வா பு⁴ஞ்ஜந்தியா பாசித்தியேன ஸத்³தி⁴ம் து³க்கடா கதாயேவ.

க³ச்ச²ந்தஸ்ஸ சதஸ்ஸோதி பி⁴க்கு²னியா வா மாதுகா³மேன வா ஸத்³தி⁴ம் ஸம்விதா⁴ய க³ச்ச²ந்தஸ்ஸ து³க்கடம், கா³மூபசாரோக்கமனே பாசித்தியம், யா பி⁴க்கு²னீ ஏகா கா³மந்தரம் க³ச்ச²தி, தஸ்ஸா கா³மூபசாரம் ஓக்கமந்தியா பட²மபாதே³ து²ல்லச்சயம், து³தியபாதே³ ஸங்கா⁴தி³ஸேஸோதி க³ச்ச²ந்தஸ்ஸ இமா சதஸ்ஸோ ஆபத்தியோ ஹோந்தி. டி²தஸ்ஸ சாபி தத்தகாதி டி²தஸ்ஸபி சதஸ்ஸோ ஏவாதி அத்தோ². கத²ம்? பி⁴க்கு²னீ அந்த⁴காரே வா படிச்ச²ன்னே வா ஓகாஸே மித்தஸந்த²வவஸேன புரிஸஸ்ஸ ஹத்த²பாஸே திட்ட²தி, பாசித்தியம்; ஹத்த²பாஸம் விஜஹித்வா திட்ட²தி, து³க்கடம்; அருணுக்³க³மனகாலே து³தியிகாய ஹத்த²பாஸம் விஜஹந்தீ திட்ட²தி, து²ல்லச்சயம்; விஜஹித்வா திட்ட²தி, ஸங்கா⁴தி³ஸேஸோதி நிஸின்னஸ்ஸ சதஸ்ஸோ ஆபத்தியோ. நிபன்னஸ்ஸாபி தத்தகாதி ஸசேபி ஹி ஸா நிஸீத³தி வா நிபஜ்ஜதி வா, ஏதாயேவ சதஸ்ஸோ ஆபத்தியோ ஆபஜ்ஜதி.

(3) பாசித்தியவண்ணனா

476. பஞ்ச பாசித்தியானீதி பஞ்ச பே⁴ஸஜ்ஜானி படிக்³க³ஹேத்வா நானாபா⁴ஜனேஸு வா ஏகபா⁴ஜனே வா அமிஸ்ஸேத்வா ட²பிதானி ஹோந்தி, ஸத்தாஹாதிக்கமே ஸோ பி⁴க்கு² பஞ்ச பாசித்தியானி ஸப்³பா³னி நானாவத்து²கானி ஏகக்க²ணே ஆபஜ்ஜதி, ‘‘இமம் பட²மம் ஆபன்னோ, இமம் பச்சா²’’தி ந வத்தப்³போ³.

நவ பாசித்தியானீதி யோ பி⁴க்கு² நவ பணீதபோ⁴ஜனானி விஞ்ஞாபேத்வா தேஹி ஸத்³தி⁴ம் ஏகதோ ஏகம் கப³ளம் ஓமத்³தி³த்வா முகே² பக்கி²பித்வா பரக³ளம் அதிக்காமேதி, அயம் நவ பாசித்தியானி ஸப்³பா³னி நானாவத்து²கானி ஏகக்க²ணே ஆபஜ்ஜதி ‘‘இமம் பட²மம் ஆபன்னோ, இமம் பச்சா²’’தி ந வத்தப்³போ³. ஏகவாசாய தே³ஸேய்யாதி ‘‘அஹம், ப⁴ந்தே, பஞ்ச பே⁴ஸஜ்ஜானி படிக்³க³ஹேத்வா ஸத்தாஹம் அதிக்காமேத்வா பஞ்ச ஆபத்தியோ ஆபன்னோ, தா தும்ஹமூலே படிதே³ஸேமீ’’தி ஏவம் ஏகவாசாய தே³ஸேய்ய, தே³ஸிதாவ ஹோந்தி, த்³வீஹி தீஹி வாசாஹி கிச்சம் நாம நத்தி². து³தியவிஸ்ஸஜ்ஜனேபி ‘‘அஹம், ப⁴ந்தே, நவ பணீதபோ⁴ஜனானி விஞ்ஞாபேத்வா பு⁴ஞ்ஜித்வா நவ ஆபத்தியோ ஆபன்னோ, தா தும்ஹமூலே படிதே³ஸேமீ’’தி வத்தப்³ப³ம்.

வத்து²ம் கித்தேத்வா தே³ஸேய்யாதி ‘‘அஹம், ப⁴ந்தே, பஞ்ச பே⁴ஸஜ்ஜானி படிக்³க³ஹேத்வா ஸத்தாஹம் அதிக்காமேஸிம், யதா²வத்து²கம் தம் தும்ஹமூலே படிதே³ஸேமீ’’தி ஏவம் வத்து²ம் கித்தேத்வா தே³ஸேய்ய, தே³ஸிதாவ ஹோந்தி ஆபத்தியோ, ஆபத்தியா நாமக்³க³ஹணேன கிச்சம் நத்தி². து³தியவிஸ்ஸஜ்ஜனேபி ‘‘அஹம், ப⁴ந்தே, நவ பணீதபோ⁴ஜனானி விஞ்ஞாபேத்வா பு⁴த்தோ, யதா²வத்து²கம் தம் தும்ஹமூலே படிதே³ஸேமீ’’தி வத்தப்³ப³ம்.

யாவததியகே திஸ்ஸோதி உக்கி²த்தானுவத்திகாய பாராஜிகம் பே⁴த³கானுவத்தகானம் கோகாலிகாதீ³னம் ஸங்கா⁴தி³ஸேஸம், பாபிகாய தி³ட்டி²யா அப்படினிஸ்ஸக்³கே³ சண்ட³காளிகாய ச பி⁴க்கு²னியா பாசித்தியந்தி இமா யாவததியகா திஸ்ஸோ ஆபத்தியோ. ச² வோஹாரபச்சயாதி பயுத்தவாசாபச்சயா ச² ஆபத்தியோ ஆபஜ்ஜதீதி அத்தோ². கத²ம்? ஆஜீவஹேது ஆஜீவகாரணா பாபிச்சோ² இச்சா²பகதோ அஸந்தம் அபூ⁴தம் உத்தரிமனுஸ்ஸத⁴ம்மம் உல்லபதி, ஆபத்தி பாராஜிகஸ்ஸ. ஆஜீவஹேது ஆஜீவகாரணா ஸஞ்சரித்தம் ஸமாபஜ்ஜதி, ஆபத்தி ஸங்கா⁴தி³ஸேஸஸ்ஸ. ஆஜீவஹேது ஆஜீவகாரணா யோ தே விஹாரே வஸதி ஸோ அரஹாதி வத³தி, ஆபத்தி து²ல்லச்சயஸ்ஸ. ஆஜீவஹேது ஆஜீவகாரணா பி⁴க்கு² பணீதபோ⁴ஜனானி அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாசித்தியஸ்ஸ. ஆஜீவஹேது ஆஜீவகாரணா பி⁴க்கு²னீ பணீதபோ⁴ஜனானி அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி பாடிதே³ஸனீயஸ்ஸ. ஆஜீவஹேது ஆஜீவகாரணா ஸூபம் வா ஓத³னம் வா அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜதி, ஆபத்தி து³க்கடஸ்ஸாதி.

கா²த³ந்தஸ்ஸ திஸ்ஸோதி மனுஸ்ஸமம்ஸே து²ல்லச்சயம், அவஸேஸேஸு அகப்பியமம்ஸேஸு து³க்கடம், பி⁴க்கு²னியா லஸுணே பாசித்தியம். பஞ்ச போ⁴ஜனபச்சயாதி அவஸ்ஸுதா அவஸ்ஸுதஸ்ஸ புரிஸஸ்ஸ ஹத்த²தோ போ⁴ஜனம் க³ஹேத்வா தத்தே²வ மனுஸ்ஸமம்ஸம் லஸுணம் அத்தனோ அத்தா²ய விஞ்ஞாபேத்வா க³ஹிதபணீதபோ⁴ஜனானி அவஸேஸஞ்ச அகப்பியமம்ஸம் பக்கி²பித்வா வோமிஸ்ஸகம் ஓமத்³தி³த்வா அஜ்ஜோ²ஹரமானா ஸங்கா⁴தி³ஸேஸம், து²ல்லச்சயம், பாசித்தியம், பாடிதே³ஸனீயம், து³க்கடந்தி இமா பஞ்ச ஆபத்தியோ போ⁴ஜனபச்சயா ஆபஜ்ஜதி.

பஞ்ச டா²னானீதி ‘‘உக்கி²த்தானுவத்திகாய பி⁴க்கு²னியா யாவததியம் ஸமனுபா⁴ஸனாய அப்படினிஸ்ஸஜ்ஜந்தியா ஞத்தியா து³க்கடம், த்³வீஹி கம்மவாசாஹி து²ல்லச்சயம், கம்மவாசாபரியோஸானே ஆபத்தி பாராஜிகஸ்ஸ, ஸங்க⁴பே⁴தா³ய பரக்கமனாதீ³ஸு ஸங்கா⁴தி³ஸேஸோ, பாபிகாய தி³ட்டி²யா அப்படினிஸ்ஸக்³கே³ பாசித்திய’’ந்தி ஏவம் ஸப்³பா³ யாவததியகா பஞ்ச டா²னானி க³ச்ச²ந்தி. பஞ்சன்னஞ்சேவ ஆபத்தீதி ஆபத்தி நாம பஞ்சன்னம் ஸஹத⁴ம்மிகானம் ஹோதி, தத்த² த்³வின்னம் நிப்பரியாயேன ஆபத்தியேவ, ஸிக்கா²மானஸாமணேரிஸாமணேரானம் பன அகப்பியத்தா ந வட்டதி. இமினா பரியாயேன தேஸம் ஆபத்தி ந தே³ஸாபேதப்³பா³, த³ண்ட³கம்மம் பன தேஸம் காதப்³ப³ம். பஞ்சன்னம் அதி⁴கரணேன சாதி அதி⁴கரணஞ்ச பஞ்சன்னமேவாதி அத்தோ². ஏதேஸம்யேவ ஹி பஞ்சன்னம் பத்தசீவராதீ³னம் அத்தா²ய வினிச்ச²யவோஹாரோ அதி⁴கரணந்தி வுச்சதி, கி³ஹீனம் பன அட்³ட³கம்மம் நாம ஹோதி.

பஞ்சன்னம் வினிச்ச²யோ ஹோதீதி பஞ்சன்னம் ஸஹத⁴ம்மிகானம்யேவ வினிச்ச²யோ நாம ஹோதி. பஞ்சன்னம் வூபஸமேன சாதி ஏதேஸம்யேவ பஞ்சன்னம் அதி⁴கரணம் வினிச்சி²தம் வூபஸந்தம் நாம ஹோதீதி அத்தோ². பஞ்சன்னஞ்சேவ அனாபத்தீதி ஏதேஸம்யேவ பஞ்சன்னம் அனாபத்தி நாம ஹோதீதி அத்தோ². தீஹி டா²னேஹி ஸோப⁴தீதி ஸங்கா⁴தீ³ஹி தீஹி காரணேஹி ஸோப⁴தி. கதவீதிக்கமோ ஹி புக்³க³லோ ஸப்படிகம்மம் ஆபத்திம் ஸங்க⁴மஜ்ஜே² க³ணமஜ்ஜே² புக்³க³லஸந்திகே வா படிகரித்வா அப்³பு⁴ண்ஹஸீலோ பாகதிகோ ஹோதி, தஸ்மா தீஹி டா²னேஹி ஸோப⁴தீதி வுச்சதி.

த்³வே காயிகா ரத்திந்தி பி⁴க்கு²னீ ரத்தந்த⁴காரே புரிஸஸ்ஸ ஹத்த²பாஸே டா²னனிஸஜ்ஜஸயனானி கப்பயமானா பாசித்தியம், ஹத்த²பாஸம் விஜஹித்வா டா²னாதீ³னி கப்பயமானா து³க்கடந்தி த்³வே காயத்³வாரஸம்ப⁴வா ஆபத்தியோ ரத்திம் ஆபஜ்ஜதி. த்³வே காயிகா தி³வாதி ஏதேனேவ உபாயேன தி³வா படிச்ச²ன்னே ஓகாஸே த்³வே ஆபத்தியோ ஆபஜ்ஜதி. நிஜ்ஜா²யந்தஸ்ஸ ஏகா ஆபத்தீதி ‘‘ந ச, பி⁴க்க²வே, ஸாரத்தேன மாதுகா³மஸ்ஸ அங்க³ஜாதம் உபனிஜ்ஜா²யிதப்³ப³ம். யோ உபனிஜ்ஜா²யேய்ய, ஆபத்தி து³க்கடஸ்ஸா’’தி (பாரா. 266) நிஜ்ஜா²யந்தஸ்ஸ அயமேகா ஆபத்தி. ஏகா பிண்ட³பாதபச்சயாதி ‘‘ந ச, பி⁴க்க²வே, பி⁴க்கா²தா³யிகாய முக²ம் ஓலோகேதப்³ப³’’ந்தி (சூளவ. 366) ஏத்த² து³க்கடாபத்தி, அந்தமஸோ யாகு³ம் வா ப்³யஞ்ஜனம் வா தே³ந்தஸ்ஸ ஸாமணேரஸ்ஸாபி ஹி முக²ம் உல்லோகயதோ து³க்கடமேவ. குருந்தி³யம் பன ‘‘ஏகா பிண்ட³பாதபச்சயாதி பி⁴க்கு²னிபரிபாசிதம் பிண்ட³பாதம் பு⁴ஞ்ஜந்தஸ்ஸ பாசித்திய’’ந்தி வுத்தம்.

அட்டா²னிஸம்ஸே ஸம்பஸ்ஸந்தி கோஸம்ப³கக்க²ந்த⁴கே வுத்தானிஸம்ஸே. உக்கி²த்தகா தயோ வுத்தாதி ஆபத்தியா அத³ஸ்ஸனே அப்படிகம்மே பாபிகாய ச தி³ட்டி²யா அப்படினிஸ்ஸக்³கே³தி. தேசத்தாலீஸ ஸம்மாவத்தனாதி தேஸம்யேவ உக்கி²த்தகானம் ஏத்தகேஸு வத்தேஸு வத்தனா.

பஞ்சடா²னே முஸாவாதோ³தி பாராஜிகஸங்கா⁴தி³ஸேஸது²ல்லச்சயபாசித்தியது³க்கடஸங்கா²தே பஞ்சட்டா²னே முஸாவாதோ³ க³ச்ச²தி. சுத்³த³ஸ பரமந்தி வுச்சதீதி த³ஸாஹபரமாதி³னயேன ஹேட்டா² வுத்தம். த்³வாத³ஸ பாடிதே³ஸனீயாதி பி⁴க்கூ²னம் சத்தாரி பி⁴க்கு²னீனம் அட்ட². சதுன்னம் தே³ஸனாய சாதி சதுன்னம் அச்சயதே³ஸனாயாதி அத்தோ². கதமா பன ஸாதி? தே³வத³த்தேன பயோஜிதானம் அபி⁴மாரானம் அச்சயதே³ஸனா, அனுருத்³த⁴த்தே²ரஸ்ஸ உபட்டா²யிகாய அச்சயதே³ஸனா, வட்³ட⁴ஸ்ஸ லிச்ச²வினோ அச்சயதே³ஸனா, வாஸப⁴கா³மியத்தே²ரஸ்ஸ உக்கே²பனீயகம்மம் கத்வா ஆக³தானம் பி⁴க்கூ²னம் அச்சயதே³ஸனாதி அயம் சதுன்னம் அச்சயதே³ஸனா நாம.

அட்ட²ங்கி³கோ முஸாவாதோ³தி ‘‘புப்³பே³வஸ்ஸ ஹோதி முஸா ப⁴ணிஸ்ஸ’’ந்தி ஆதி³ம் கத்வா ‘‘வினிதா⁴ய ஸஞ்ஞ’’ந்தி பரியோஸானேஹி (பாசி. 4-5; பரி. 459) அட்ட²ஹி அங்கே³ஹி அட்ட²ங்கி³கோ. உபோஸத²ங்கா³னிபி பாணம் ந ஹனேதிஆதி³னா நயேன வுத்தானேவ. அட்ட² தூ³தேய்யங்கா³னீதி ‘‘இத⁴, பி⁴க்க²வே, பி⁴க்கு² ஸோதா ச ஹோதி ஸாவேதா சா’’திஆதி³னா (சூளவ. 347) நயேன ஸங்க⁴பே⁴த³கே வுத்தானி. அட்ட² தித்தி²யவத்தானி மஹாக²ந்த⁴கே வுத்தானி.

அட்ட²வாசிகா உபஸம்பதா³தி பி⁴க்கு²னீனம் உபஸம்பத³ம் ஸந்தா⁴ய வுத்தம். அட்ட²ன்னம் பச்சுட்டா²தப்³ப³ந்தி ப⁴த்தக்³கே³ அட்ட²ன்னம் பி⁴க்கு²னீனம் இதராஹி பச்சுட்டா²ய ஆஸனம் தா³தப்³ப³ம். பி⁴க்கு²னோவாத³கோ அட்ட²ஹீதி அட்ட²ஹங்கே³ஹி ஸமன்னாக³தோ பி⁴க்கு² பி⁴க்கு²னோவாத³கோ ஸம்மன்னிதப்³போ³.

ஏகஸ்ஸ சே²ஜ்ஜந்தி கா³தா²ய நவஸு ஜனேஸு யோ ஸலாகம் கா³ஹேத்வா ஸங்க⁴ம் பி⁴ந்த³தி, தஸ்ஸேவ சே²ஜ்ஜம் ஹோதி, தே³வத³த்தோ விய பாராஜிகம் ஆபஜ்ஜதி. பே⁴த³கானுவத்தகானம் சதுன்னம் து²ல்லச்சயம் கோகாலிகாதீ³னம் விய, த⁴ம்மவாதீ³னம் சதுன்னம் அனாபத்தி. இமா பன ஆபத்தியோ ச அனாபத்தியோ ச ஸப்³பே³ஸம் ஏகவத்து²கா ஸங்க⁴பே⁴த³வத்து²கா ஏவ.

நவ ஆகா⁴தவத்தூ²னீதி கா³தா²ய நவஹீதி நவஹி பி⁴க்கூ²ஹி ஸங்கோ⁴ பி⁴ஜ்ஜதி. ஞத்தியா கரணா நவாதி ஞத்தியா காதப்³பா³னி கம்மானி நவாதி அத்தோ². ஸேஸம் உத்தானமேவ.

(4) அவந்த³னீயபுக்³க³லாதி³வண்ணனா

477. த³ஸ புக்³க³லா நாபி⁴வாதே³தப்³பா³தி ஸேனாஸனக்க²ந்த⁴கே வுத்தா த³ஸ ஜனா. அஞ்ஜலி ஸாமீசேன சாதி ஸாமீசிகம்மேன ஸத்³தி⁴ம் அஞ்ஜலி ச தேஸம் ந காதப்³போ³, நேவ பானீயாபுச்ச²னதாலவண்டக்³க³ஹணாதி³ க²ந்த⁴கவத்தம் தேஸம் த³ஸ்ஸேதப்³ப³ம், ந அஞ்ஜலி பக்³க³ண்ஹிதப்³போ³தி அத்தோ². த³ஸன்னம் து³க்கடந்தி தேஸம்யேவ த³ஸன்னம் ஏவம் கரோந்தஸ்ஸ து³க்கடம் ஹோதி. த³ஸ சீவரதா⁴ரணாதி த³ஸ தி³வஸானி அதிரேகசீவரஸ்ஸ தா⁴ரணா அனுஞ்ஞாதாதி அத்தோ².

பஞ்சன்னம் வஸ்ஸம்வுட்டா²னம், தா³தப்³ப³ம் இத⁴ சீவரந்தி பஞ்சன்னம் ஸஹத⁴ம்மிகானம் ஸம்முகா²வ தா³தப்³ப³ம். ஸத்தன்னம் ஸந்தேதி தி³ஸாபக்கந்தஉம்மத்தககி²த்தசித்தவேத³னாட்டானம் திண்ணஞ்ச உக்கி²த்தகானந்தி இமேஸம் ஸத்தன்னம் ஸந்தே பதிரூபே கா³ஹகே பரம்முகா²பி தா³தப்³ப³ம். ஸோளஸன்னம் ந தா³தப்³ப³ந்தி ஸேஸானம் சீவரக்க²ந்த⁴கே வுத்தானம் பண்ட³காதீ³னம் ஸோளஸன்னம் ந தா³தப்³ப³ம்.

கதிஸதம் ரத்திஸதம், ஆபத்தியோ சா²த³யித்வானாதி கதிஸதம் ஆபத்தியோ ரத்திஸதம் சா²த³யித்வான. த³ஸஸதம் ரத்திஸதம், ஆபத்தியோ சா²த³யித்வானாதி த³ஸஸதம் ஆபத்தியோ ரத்திஸதம் சா²த³யித்வான. அயஞ்ஹேத்த² ஸங்கே²பத்தோ² – யோ தி³வஸே ஸதம் ஸதம் ஸங்கா⁴தி³ஸேஸாபத்தியோ ஆபஜ்ஜித்வா த³ஸ த³ஸ தி³வஸே படிச்சா²தே³தி, தேன ரத்திஸதம் ஆபத்திஸஹஸ்ஸம் படிச்சா²தி³தம் ஹோதி, ஸோ ஸப்³பா³வ தா ஆபத்தியோ த³ஸாஹபடிச்ச²ன்னாதி பரிவாஸம் யாசித்வா த³ஸ ரத்தியோ வஸித்வான முச்சேய்ய பாரிவாஸிகோதி.

த்³வாத³ஸ கம்மதோ³ஸா வுத்தாதி அபலோகனகம்மம் அத⁴ம்மேனவக்³க³ம், அத⁴ம்மேனஸமக்³க³ம், த⁴ம்மேனவக்³க³ம், ததா² ஞத்திகம்மஞத்திது³தியகம்மஞத்திசதுத்த²கம்மானிபீதி ஏவம் ஏகேகஸ்மிம் கம்மே தயோ தயோ கத்வா த்³வாத³ஸ கம்மதோ³ஸா வுத்தா.

சதஸ்ஸோ கம்மஸம்பத்தியோதி அபலோகனகம்மம் த⁴ம்மேனஸமக்³க³ம், ததா² ஸேஸானிபீதி ஏவம் சதஸ்ஸோ கம்மஸம்பத்தியோ வுத்தா.

ச² கம்மானீதி அத⁴ம்மேனவக்³க³கம்மம், அத⁴ம்மேனஸமக்³க³கம்மம், த⁴ம்மபதிரூபகேனவக்³க³கம்மம், த⁴ம்மபதிரூபகேனஸமக்³க³கம்மம், த⁴ம்மேனவக்³க³கம்மம், த⁴ம்மேனஸமக்³க³கம்மந்தி ஏவம் ச² கம்மானி வுத்தானி. ஏகேத்த² த⁴ம்மிகா கதாதி ஏகம் த⁴ம்மேன ஸமக்³க³கம்மமேவேத்த² த⁴ம்மிகம் கதந்தி அத்தோ². து³தியகா³தா²விஸ்ஸஜ்ஜனேபி ஏததே³வ த⁴ம்மிகம்.

யம் தே³ஸிதாதி யானி தே³ஸிதானி வுத்தானி பகாஸிதானி. அனந்தஜினேனாதிஆதீ³ஸு பரியந்தபரிச்சே²த³பா⁴வரஹிதத்தா அனந்தம் வுச்சதி நிப்³பா³னம், தம் ப⁴க³வதா ரஞ்ஞா ஸபத்தக³ணம் அபி⁴மத்³தி³த்வா ரஜ்ஜம் விய கிலேஸக³ணம் அபி⁴மத்³தி³த்வா ஜிதம் விஜிதம் அதி⁴க³தம் ஸம்பத்தம், தஸ்மா ப⁴க³வா ‘‘அனந்தஜினோ’’தி வுச்சதி. ஸ்வேவ இட்டா²னிட்டே²ஸு நிப்³பி³காரதாய தாதி³, விக்க²ம்ப⁴னதத³ங்க³ஸமுச்சே²த³படிபஸ்ஸத்³தி⁴னிஸ்ஸரணவிவேகஸங்கா²தம் விவேகபஞ்சகம் அத்³த³ஸாதி விவேகத³ஸ்ஸீ; தேன அனந்தஜினேன தாதி³னா விவேகத³ஸ்ஸினா யானி ஆபத்திக்க²ந்தா⁴னி தே³ஸிதானி வுத்தானி. ஏகேத்த² ஸம்மதி வினா ஸமதே²ஹீதி அயமேத்த² பத³ஸம்ப³ந்தோ⁴, யானி ஸத்தா²ரா ஸத்த ஆபத்திக்க²ந்தா⁴னி தே³ஸிதானி, தத்த² ஏகாபி ஆபத்தி வினா ஸமதே²ஹி ந ஸம்மதி, அத² கோ² ச² ஸமதா² சத்தாரி அதி⁴கரணானீதி ஸப்³பே³பிமே த⁴ம்மா ஸம்முகா²வினயேன ஸம்மந்தி, ஸமாயோக³ம் க³ச்ச²ந்தி. ஏத்த² பன ஏகோ ஸம்முகா²வினயோவ வினா ஸமதே²ஹி ஸம்மதி, ஸமத²பா⁴வம் க³ச்ச²தி. ந ஹி தஸ்ஸ அஞ்ஞேன ஸமதே²ன வினா அனிப்ப²த்தி நாம அத்தி². தேன வுத்தம் – ‘‘ஏகேத்த² ஸம்மதி வினா ஸமதே²ஹீ’’தி. இமினா தாவ அதி⁴ப்பாயேன அட்ட²கதா²ஸு அத்தோ² வுத்தோ. மயம் பன ‘‘வினா’’தி நிபாதஸ்ஸ படிஸேத⁴னமத்தமத்த²ம் க³ஹேத்வா ‘‘ஏகேத்த² ஸம்மதி வினா ஸமதே²ஹீ’’தி ஏதேஸு ஸத்தஸு ஆபத்திக்க²ந்தே⁴ஸு ஏகோ பாராஜிகாபத்திக்க²ந்தோ⁴ வினா ஸமதே²ஹி ஸம்மதீதி ஏதமத்த²ம் ரோசேய்யாம. வுத்தம்பி சேதம் ‘‘யா ஸா ஆபத்தி அனவஸேஸா, ஸா ஆபத்தி ந கதமேன அதி⁴கரணேன கதமம்ஹி டா²னே ந கதமேன ஸமதே²ன ஸம்மதீ’’தி.

ச²ஊனதி³யட்³ட⁴ஸதாதி ‘‘இத⁴, உபாலி, பி⁴க்கு² அத⁴ம்மம் த⁴ம்மோதி தீ³பேதி, தஸ்மிம் அத⁴ம்மதி³ட்டி² பே⁴தே³ அத⁴ம்மதி³ட்டி², தஸ்மிம் அத⁴ம்மதி³ட்டி² பே⁴தே³ த⁴ம்மதி³ட்டி², தஸ்மிம் அத⁴ம்மதி³ட்டி² பே⁴தே³ வேமதிகோ, தஸ்மிம் த⁴ம்மதி³ட்டி² பே⁴தே³ அத⁴ம்மதி³ட்டி², தஸ்மிம் த⁴ம்மதி³ட்டி² பே⁴தே³ வேமதிகோ, தஸ்மிம் வேமதிகோ பே⁴தே³ அத⁴ம்மதி³ட்டி², தஸ்மிம் வேமதிகோ பே⁴தே³ த⁴ம்மதி³ட்டி², தஸ்மிம் வேமதிகோ பே⁴தே³ வேமதிகோ’’தி ஏவம் யானி அட்டா²ரஸன்னம் பே⁴த³கரவத்தூ²னம் வஸேன அட்டா²ரஸ அட்ட²கானி ஸங்க⁴பே⁴த³கக்க²ந்த⁴கே வுத்தானி, தேஸம் வஸேன ச²ஊனதி³யட்³ட⁴ஸதம் ஆபாயிகா வேதி³தப்³பா³.

அட்டா²ரஸ அனாபாயிகாதி ‘‘இத⁴, உபாலி, பி⁴க்கு² அத⁴ம்மம் த⁴ம்மோதி தீ³பேதி, தஸ்மிம் த⁴ம்மதி³ட்டி² பே⁴தே³ த⁴ம்மதி³ட்டி² அவினிதா⁴ய தி³ட்டி²ம் அவினிதா⁴ய க²ந்திம் அவினிதா⁴ய ருசிம் அவினிதா⁴ய பா⁴வம் அனுஸ்ஸாவேதி, ஸலாகம் கா³ஹேதி ‘அயம் த⁴ம்மோ, அயம் வினயோ, இத³ம் ஸத்து²ஸாஸனம், இமம் க³ண்ஹத², இமம் ரோசேதா²’தி, அயம்பி கோ², உபாலி, ஸங்க⁴பே⁴த³கோ ந ஆபாயிகோ ந நேரயிகோ ந கப்பட்டோ² ந அதேகிச்சோ²’’தி ஏவம் ஏகேகஸ்மிம் வத்து²ஸ்மிம் ஏகேகம் கத்வா ஸங்க⁴பே⁴த³கக்க²ந்த⁴காவஸானே வுத்தா அட்டா²ரஸ ஜனா. அட்டா²ரஸ அட்ட²கா ச²ஊனதி³யட்³ட⁴ஸதவிஸ்ஸஜ்ஜனே வுத்தாயேவ.

(5) ஸோளஸகம்மாதி³வண்ணனா

478. கதி கம்மானீதிஆதீ³னம் ஸப்³ப³கா³தா²னம் விஸ்ஸஜ்ஜனம் உத்தானமேவாதி.

அபரது³தியகா³தா²ஸங்க³ணிகவண்ணனா நிட்டி²தா.