ஆபத்திஸமுட்டா²னவண்ணனா

470. அசித்தகோ ஆபஜ்ஜதீதிஆதீ³ஸு ஸஹஸேய்யாதி³பண்ணத்திவஜ்ஜம் அஸஞ்சிச்ச ஆபஜ்ஜந்தோ அசித்தகோ ஆபஜ்ஜதி, தே³ஸேந்தோ ஸசித்தகோ வுட்டா²தி. யம்கிஞ்சி ஸஞ்சிச்ச ஆபஜ்ஜந்தோ ஸசித்தகோ ஆபஜ்ஜதி, திணவத்தா²ரகேன வுட்ட²ஹந்தோ அசித்தகோ வுட்டா²தி. புப்³பே³ வுத்தமேவ திணவத்தா²ரகேன வுட்ட²ஹந்தோ அசித்தகோ ஆபஜ்ஜதி, அசித்தகோ வுட்டா²தி. இதரம் தே³ஸேந்தோ ஸசித்தகோ ஆபஜ்ஜதி, ஸசித்தகோ வுட்டா²தி. ‘‘த⁴ம்மதா³னம் கரோமீ’’தி பத³ஸோத⁴ம்மாதீ³னி கரோந்தோ குஸலசித்தோ ஆபஜ்ஜதி, ‘‘பு³த்³தா⁴னம் அனுஸாஸனிம் கரோமீ’’தி உத³க்³க³சித்தோ தே³ஸேந்தோ குஸலசித்தோ வுட்டா²தி. தோ³மனஸ்ஸிகோ ஹுத்வா தே³ஸேந்தோ அகுஸலசித்தோ வுட்டா²தி, திணவத்தா²ரகேன நித்³தா³க³தோவ வுட்ட²ஹந்தோ அப்³யாகதசித்தோ வுட்டா²தி. பி⁴ம்ஸாபனாதீ³னி கத்வா ‘‘பு³த்³தா⁴னம் ஸாஸனம் கரோமீ’’தி ஸோமனஸ்ஸிகோ தே³ஸேந்தோ அகுஸலசித்தோ ஆபஜ்ஜதி, குஸலசித்தோ வுட்டா²தி. தோ³மனஸ்ஸிகோவ தே³ஸேந்தோ அகுஸலசித்தோ வுட்டா²தி, வுத்தனயேனேவ திணவத்தா²ரகேன வுட்ட²ஹந்தோ அப்³யாகதசித்தோ வுட்டா²தி. நித்³தோ³க்கந்தஸமயே ஸஹகா³ரஸேய்யம் ஆபஜ்ஜந்தோ அப்³யாகதசித்தோ ஆபஜ்ஜதி, வுத்தனயேனேவ பனேத்த² ‘‘குஸலசித்தோ வுட்டா²தீ’’திஆதி³ வேதி³தப்³ப³ம்.

பட²மம் பாராஜிகம் கதிஹி ஸமுட்டா²னேஹீதிஆதி³ புப்³பே³ வுத்தனயத்தா உத்தானமேவ.

473. சத்தாரோ பாராஜிகா கதிஹி ஸமுட்டா²னேஹீதிஆதீ³ஸு உக்கட்ட²பரிச்சே²த³தோ யம் யம் ஸமுட்டா²னம் யஸ்ஸ யஸ்ஸ லப்³ப⁴தி, தம் ஸப்³ப³ம் வுத்தமேவ ஹோதி.

ஆபத்திஸமுட்டா²னவண்ணனா நிட்டி²தா.