கதி²னபே⁴த³ம்

கதி²னஅத்த²தாதி³வண்ணனா

403. கதி²னே – அட்ட² மாதிகாதி க²ந்த⁴கே வுத்தா பக்கமனந்திகாதி³கா அட்ட². பலிபோ³தா⁴னிஸம்ஸாபி புப்³பே³ வுத்தா ஏவ.

404. பயோக³ஸ்ஸாதி சீவரதோ⁴வனாதி³னோ ஸத்தவித⁴ஸ்ஸ புப்³ப³கரணஸ்ஸத்தா²ய யோ உத³காஹரணாதி³கோ பயோகோ³ கயிரதி, தஸ்ஸ பயோக³ஸ்ஸ. கதமே த⁴ம்மா அனந்தரபச்சயேன பச்சயோதி அனாக³தவஸேன அனந்தரா ஹுத்வா கதமே த⁴ம்மா பச்சயா ஹோந்தீதி அத்தோ². ஸமனந்தரபச்சயேனாதி ஸுட்டு² அனந்தரபச்சயேன, அனந்தரபச்சயமேவ ஆஸன்னதரம் கத்வா புச்ச²தி. நிஸ்ஸயபச்சயேனாதி உப்பஜ்ஜமானஸ்ஸ பயோக³ஸ்ஸ நிஸ்ஸயம் ஆதா⁴ரபா⁴வம் உபக³தா விய ஹுத்வா கதமே த⁴ம்மா பச்சயா ஹோந்தீதி அத்தோ². உபனிஸ்ஸயபச்சயேனாதி உபேதேன நிஸ்ஸயபச்சயேன; நிஸ்ஸயபச்சயமேவ உபக³ததரம் கத்வா புச்ச²தி. புரேஜாதபச்சயேனாதி இமினா பட²மம் உப்பன்னஸ்ஸ பச்சயபா⁴வம் புச்ச²தி. பச்சா²ஜாதபச்சயேனாதி இமினா பச்சா² உப்பஜ்ஜனகஸ்ஸ பச்சயபா⁴வம் புச்ச²தி. ஸஹஜாதபச்சயேனாதி இமினா அபுப்³ப³ம் அசரிமம் உப்பஜ்ஜமானானம் பச்சயபா⁴வம் புச்ச²தி. புப்³ப³கரணஸ்ஸாதி தோ⁴வனாதி³னோ புப்³ப³கரணஸ்ஸ. பச்சுத்³தா⁴ரஸ்ஸாதி புராணஸங்கா⁴டிஆதீ³னம் பச்சுத்³த⁴ரணஸ்ஸ. அதி⁴ட்டா²னஸ்ஸாதி கதி²னசீவராதி⁴ட்டா²னஸ்ஸ. அத்தா²ரஸ்ஸாதி கதி²னத்தா²ரஸ்ஸ. மாதிகானஞ்ச பலிபோ³தா⁴னஞ்சாதி அட்ட²ன்னம் மாதிகானம் த்³வின்னஞ்ச பலிபோ³தா⁴னம். வத்து²ஸ்ஸாதி ஸங்கா⁴டிஆதி³னோ கதி²னவத்து²ஸ்ஸ; ஸேஸம் வுத்தனயமேவ.

ஏவம் யஞ்ச லப்³ப⁴தி யஞ்ச ந லப்³ப⁴தி, ஸப்³ப³ம் புச்சி²த்வா இதா³னி யம் யஸ்ஸ லப்³ப⁴தி, ததே³வ த³ஸ்ஸேந்தோ புப்³ப³கரணம் பயோக³ஸ்ஸாதிஆதி³னா நயேன விஸ்ஸஜ்ஜனமாஹ. தஸ்ஸத்தோ² – யம் வுத்தம் ‘‘பயோக³ஸ்ஸ கதமே த⁴ம்மா’’திஆதி³, தத்த² வுச்சதே, புப்³ப³கரணம் பயோக³ஸ்ஸ அனந்தரபச்சயேன பச்சயோ, ஸமனந்தரனிஸ்ஸயஉபனிஸ்ஸயபச்சயேன பச்சயோ. பயோக³ஸ்ஸ ஹி ஸத்தவித⁴ம்பி புப்³ப³கரணம் யஸ்மா தேன பயோகே³ன நிப்பா²தே³தப்³ப³ஸ்ஸ புப்³ப³கரணஸ்ஸத்தா²ய ஸோ பயோகோ³ கயிரதி, தஸ்மா இமேஹி சதூஹி பச்சயேஹி பச்சயோ ஹோதி. புரேஜாதபச்சயே பனேஸ உத்³தி³ட்ட²த⁴ம்மேஸு ஏகத⁴ம்மம்பி ந லப⁴தி, அஞ்ஞத³த்து² புப்³ப³கரணஸ்ஸ ஸயம் புரேஜாதபச்சயோ ஹோதி, பயோகே³ ஸதி புப்³ப³கரணஸ்ஸ நிப்ப²ஜ்ஜனதோ. தேன வுத்தம் – ‘‘பயோகோ³ புப்³ப³கரணஸ்ஸ புரேஜாதபச்சயேன பச்சயோ’’தி. பச்சா²ஜாதபச்சயம் பன லப⁴தி, தேன வுத்தம் – ‘‘புப்³ப³கரணம் பயோக³ஸ்ஸ பச்சா²ஜாதபச்சயேன பச்சயோ’’தி. பச்சா² உப்பஜ்ஜனகஸ்ஸ ஹி புப்³ப³கரணஸ்ஸ அத்தா²ய ஸோ பயோகோ³ கயிரதி. ஸஹஜாதபச்சயம் பன மாதிகாபலிபோ³தா⁴னிஸம்ஸஸங்கா²தே பன்னரஸ த⁴ம்மே ட²பேத்வா அஞ்ஞோ பயோகா³தீ³ஸு ஏகோபி த⁴ம்மோ ந லப⁴தி, தே ஏவ ஹி பன்னரஸ த⁴ம்மா ஸஹ கதி²னத்தா²ரேன ஏகதோ நிப்ப²ஜ்ஜந்தீதி அஞ்ஞமஞ்ஞம் ஸஹஜாதபச்சயா ஹோந்தி. தேன வுத்தம் – ‘‘பன்னரஸ த⁴ம்மா ஸஹஜாதபச்சயேன பச்சயோ’’தி. ஏதேனுபாயேன ஸப்³ப³பத³விஸ்ஸஜ்ஜனானி வேதி³தப்³பா³னி.

புப்³ப³கரணனிதா³னாதி³விபா⁴க³வண்ணனா

405. புப்³ப³கரணம் கிம்னிதா³னந்திஆதி³புச்சா²விஸ்ஸஜ்ஜனம் உத்தானமேவ.

406-7. ‘‘பயோகோ³ கிம்னிதா³னோ’’திஆதீ³ஸு புச்சா²த்³வயவிஸ்ஸஜ்ஜனேஸு ஹேதுனிதா³னோ பச்சயனிதா³னோதி ஏத்த² ச² சீவரானி ஹேது சேவ பச்சயோ சாதி வேதி³தப்³பா³னி. புப்³ப³பயோகா³தீ³னஞ்ஹி ஸப்³பே³ஸம் தானியேவ ஹேது, தானி பச்சயோ. ந ஹி ச²ப்³பி³தே⁴ சீவரே அஸதி பயோகோ³ அத்தி², ந புப்³ப³கரணாதீ³னி, தஸ்மா ‘‘பயோகோ³ ஹேதுனிதா³னோ’’திஆதி³ வுத்தம்.

408. ஸங்க³ஹவாரே – வசீபே⁴தே³னாதி ‘‘இமாய ஸங்கா⁴டியா, இமினா உத்தராஸங்கே³ன, இமினா அந்தரவாஸகேன கதி²னம் அத்த²ராமீ’’தி ஏதேன வசீபே⁴தே³ன. கதிமூலாதி³புச்சா²விஸ்ஸஜ்ஜனே – கிரியா மஜ்ஜே²தி பச்சுத்³தா⁴ரோ சேவ அதி⁴ட்டா²னஞ்ச.

411. வத்து²விபன்னம் ஹோதீதி அகப்பியது³ஸ்ஸம் ஹோதி. காலவிபன்னம் நாம அஜ்ஜ தா³யகேஹி தி³ன்னம் ஸ்வே ஸங்கோ⁴ கதி²னத்தா²ரகஸ்ஸ தே³தி. கரணவிபன்னம் நாம தத³ஹேவ சி²ந்தி³த்வா அகதம்.

கதி²னாதி³ஜானிதப்³ப³விபா⁴க³வண்ணனா

412. கதி²னம் ஜானிதப்³ப³ந்திஆதி³புச்சா²ய விஸ்ஸஜ்ஜனே – தேஸஞ்ஞேவ த⁴ம்மானந்தி யேஸு ரூபாதி³த⁴ம்மேஸு ஸதி கதி²னம் நாம ஹோதி, தேஸம் ஸமோதா⁴னம் மிஸ்ஸீபா⁴வோ. நாமம் நாமகம்மந்திஆதி³னா பன ‘‘கதி²ன’’ந்தி இத³ம் ப³ஹூஸு த⁴ம்மேஸு நாமமத்தம், ந பரமத்த²தோ ஏகோ த⁴ம்மோ அத்தீ²தி த³ஸ்ஸேதி.

சதுவீஸதியா ஆகாரேஹீதி ‘‘ந உல்லிகி²தமத்தேனா’’திஆதீ³ஹி புப்³பே³ வுத்தகாரணேஹி. ஸத்தரஸஹி ஆகாரேஹீதி ‘‘அஹதேன அத்த²தம் ஹோதி கதி²ன’’ந்திஆதீ³ஹி புப்³பே³ வுத்தகாரணேஹி. நிமித்தகம்மாதீ³ஸு யம் வத்தப்³ப³ம் ஸப்³ப³ம் கதி²னக்க²ந்த⁴கவண்ணனாயம் வுத்தம்.

416. ஏகுப்பாதா³ ஏகனிரோதா⁴தி உப்பஜ்ஜமானாபி ஏகதோ உப்பஜ்ஜந்தி, நிருஜ்ஜ²மானாபி ஏகதோ நிருஜ்ஜ²ந்தி. ஏகுப்பாதா³ நானானிரோதா⁴தி உப்பஜ்ஜமானா ஏகதோ உப்பஜ்ஜந்தி, நிருஜ்ஜ²மானா நானா நிருஜ்ஜ²ந்தி. கிம் வுத்தம் ஹோதி? ஸப்³பே³பி அத்தா²ரேன ஸத்³தி⁴ம் ஏகதோ உப்பஜ்ஜந்தி, அத்தா²ரே ஹி ஸதி உத்³தா⁴ரோ நாம. நிருஜ்ஜ²மானா பனேத்த² புரிமா த்³வே அத்தா²ரேன ஸத்³தி⁴ம் ஏகதோ நிருஜ்ஜ²ந்தி, உத்³தா⁴ரபா⁴வம் பாபுணந்தி. அத்தா²ரஸ்ஸ ஹி நிரோதோ⁴ ஏதேஸஞ்ச உத்³தா⁴ரபா⁴வோ ஏகக்க²ணே ஹோதி, இதரே நானா நிருஜ்ஜ²ந்தி. தேஸு உத்³தா⁴ரபா⁴வம் பத்தேஸுபி அத்தா²ரோ திட்ட²தியேவ. ஸேஸம் ஸப்³ப³த்த² உத்தானமேவாதி.

ஸமந்தபாஸாதி³காய வினயஸம்வண்ணனாய

கதி²னபே⁴த³வண்ணனா நிட்டி²தா.

பஞ்ஞத்திவக்³க³வண்ணனா நிட்டி²தா.