2. காயஸம்ஸக்³க³ஸிக்கா²பத³வண்ணனா

269. தேன ஸமயேன பு³த்³தோ⁴ ப⁴க³வாதி காயஸம்ஸக்³க³ஸிக்கா²பத³ம். தத்ராயம் அனுத்தானபத³வண்ணனா – அரஞ்ஞே விஹரதீதி ந ஆவேணிகே அரஞ்ஞே, ஜேதவனவிஹாரஸ்ஸேவ பச்சந்தே ஏகபஸ்ஸே. மஜ்ஜே² க³ப்³போ⁴தி தஸ்ஸ ச விஹாரஸ்ஸ மஜ்ஜே² க³ப்³போ⁴ ஹோதி. ஸமந்தா பரியாகா³ரோதி ஸமந்தா பனஸ்ஸ மண்ட³லமாளபரிக்கே²போ ஹோதி. ஸோ கிர மஜ்ஜே² சதுரஸ்ஸம் க³ப்³ப⁴ம் கத்வா ப³ஹி மண்ட³லமாளபரிக்கே²பேன கதோ, யதா² ஸக்கா ஹோதி அந்தோயேவ ஆவிஞ்ச²ந்தேஹி விசரிதும்.

ஸுபஞ்ஞத்தந்தி ஸுட்ட² ட²பிதம், யதா² யதா² யஸ்மிம் யஸ்மிஞ்ச ஓகாஸே ட²பிதம் பாஸாதி³கம் ஹோதி லோகரஞ்ஜகம் ததா² ததா² தஸ்மிம் தஸ்மிம் ஓகாஸே ட²பிதம், வத்தஸீஸேன ஹி ஸோம் ஏககிச்சம்பி ந கரோதி. ஏகச்சே வாதபானே விவரந்தோதி யேஸு விவடேஸு அந்த⁴காரோ ஹோதி தானி விவரந்தோ யேஸு விவடேஸு ஆலோகோ ஹோதி தானி த²கேந்தோ.

ஏவம் வுத்தே ஸா ப்³ராஹ்மணீ தம் ப்³ராஹ்மணம் ஏதத³வோசாதி ஏவம் தேன ப்³ராஹ்மணேன பஸம்ஸித்வா வுத்தே ஸா ப்³ராஹ்மணீ ‘‘பஸன்னோ அயம் ப்³ராஹ்மணோ பப்³ப³ஜிதுகாமோ மஞ்ஞே’’தி ஸல்லக்கே²த்வா நிகூ³ஹிதப்³ப³ம்பி தம் அத்தனோ விப்பகாரம் பகாஸேந்தீ கேவலம் தஸ்ஸ ஸத்³தா⁴விகா⁴தாபேக்கா² ஹுத்வா ஏதம் ‘‘குதோ தஸ்ஸ உளாரத்ததா’’திஆதி³வசனமவோச. தத்த² உளாரோ அத்தா அஸ்ஸாதி உளாரத்தா, உளாரத்தனோ பா⁴வோ உட்டா²ரத்ததா. குலித்தீ²ஹீதிஆதீ³ஸு குலித்தி²யோ நாம க⁴ரஸ்ஸாமினியோ. குலதீ⁴தரோ நாம புரிஸந்தரக³தா குலதீ⁴தரோ. குலகுமாரியோ நாம அனிவிட்டா² வுச்சந்தி. குலஸுண்ஹா நாம பரகுலதோ ஆனீதா குலதா³ரகானம் வது⁴யோ.

270. ஓதிண்ணோதி யக்கா²தீ³ஹி விய ஸத்தா அந்தோ உப்பஜ்ஜந்தேன ராகே³ன ஓதிண்ணோ, கூபாதீ³னி விய ஸத்தா அஸமபேக்கி²த்வா ரஜனீயே டா²னே ரஜ்ஜந்தோ ஸயம் வா ராக³ம் ஓதிண்ணோ, யஸ்மா பன உப⁴யதா²பி ராக³ஸமங்கி³ஸ்ஸேவேதம் அதி⁴வசனம், தஸ்மா ‘‘ஓதிண்ணோ நாம ஸாரத்தோ அபேக்க²வா படிப³த்³த⁴சித்தோ’’தி ஏவமஸ்ஸ பத³பா⁴ஜனம் வுத்தம்.

தத்த² ஸாரத்தோதி காயஸம்ஸக்³க³ராகே³ன ஸுட்டு² ரத்தோ. அபேக்க²வாதி காயஸம்ஸக்³கா³பேக்கா²ய அபேக்க²வா. படிப³த்³த⁴சித்தோதி காயஸம்ஸக்³க³ராகே³னேவ தஸ்மிம் வத்து²ஸ்மிம் படிப³த்³த⁴சித்தோ. விபரிணதேனாதி பரிஸுத்³த⁴ப⁴வங்க³ஸந்ததிஸங்கா²தம் பகதிம் விஜஹித்வா அஞ்ஞதா² பவத்தேன, விரூபம் வா பரிணதேன விரூபம் பரிவத்தேன, யதா² பரிவத்தமானம் விரூபம் ஹோதி ஏவம் பரிவத்தித்வா டி²தேனாதி அதி⁴ப்பாயோ.

271. யஸ்மா பனேதம் ராகா³தீ³ஹி ஸம்பயோக³ம் நாதிவத்ததி, தஸ்மா ‘‘விபரிணதந்தி ரத்தம்பி சித்த’’ந்திஆதி³னா நயேனஸ்ஸ பத³பா⁴ஜனம் வத்வா அந்தே இதா⁴தி⁴ப்பேதமத்த²ம் த³ஸ்ஸேந்தோ ‘‘அபிச ரத்தம் சித்தம் இமஸ்மிம் அத்தே² அதி⁴ப்பேதம் விபரிணத’’ந்தி ஆஹ.

தத³ஹுஜாதாதி தம்தி³வஸம் ஜாதா ஜாதமத்தா அல்லமம்ஸபேஸிவண்ணா, ஏவரூபாயபி ஹி ஸத்³தி⁴ம் காயஸம்ஸக்³கே³ ஸங்கா⁴தி³ஸேஸோ, மேது²னவீதிக்கமே பாராஜிகம், ரஹோ நிஸஜ்ஜஸ்ஸாதே³ பாசித்தியஞ்ச ஹோதி. பகே³வாதி பட²மமேவ.

காயஸம்ஸக்³க³ம் ஸமாபஜ்ஜேய்யாதி ஹத்த²க்³க³ஹணாதி³காயஸம்பயோக³ம் காயமிஸ்ஸீபா⁴வம் ஸமாபஜ்ஜேய்ய, யஸ்மா பனேதம் ஸமாபஜ்ஜந்தஸ்ஸ யோ ஸோ காயஸம்ஸக்³கோ³ நாம ஸோ அத்த²தோ அஜ்ஜா²சாரோ ஹோதி, ராக³வஸேன அபி⁴ப⁴வித்வா ஸஞ்ஞமவேலம் ஆசாரோ, தஸ்மாஸ்ஸ ஸங்கே²பன அத்த²ம் த³ஸ்ஸேந்தோ ‘‘அஜ்ஜா²சாரோ வுச்சதீ’’தி பத³பா⁴ஜனமாஹ.

ஹத்த²க்³கா³ஹம் வாதிஆதி³பே⁴த³ம் பனஸ்ஸ வித்தா²ரேன அத்த²த³ஸ்ஸனம். தத்த² ஹத்தா²தீ³னம் விபா⁴க³த³ஸ்ஸனத்த²ம் ‘‘ஹத்தோ² நாம கப்பரம் உபாதா³யா’’திஆதி³மாஹ தத்த² கப்பரம் உபாதா³யாதி து³தியம். மஹாஸந்தி⁴ம் உபாதா³ய. அஞ்ஞத்த² பன மணிப³ந்த⁴தோ பட்டா²ய யாவ அக்³க³னகா² ஹத்தோ² இத⁴ ஸத்³தி⁴ம் அக்³க³பா³ஹாய கப்பரதோ பட்டா²ய அதி⁴ப்பேதோ.

ஸுத்³த⁴கேஸா வாதி ஸுத்தாதீ³ஹி அமிஸ்ஸா ஸுத்³தா⁴ கேஸாயேவ. வேணீதி தீஹி கேஸவட்டீஹி வினந்தி⁴த்வா கதகேஸகலாபஸ்ஸேதம் நாமம். ஸுத்தமிஸ்ஸாதி பஞ்சவண்ணேன ஸுத்தேன கேஸே மிஸ்ஸேத்வா கதா. மாலாமிஸ்ஸாதி வஸ்ஸிகபுப்பா²தீ³ஹி மிஸ்ஸேத்வா தீஹி கேஸவட்டீஹி வினந்தி⁴த்வா கதா, அவினத்³தோ⁴பி வா கேவலம் புப்ப²மிஸ்ஸகோ கேஸகலாபோ இத⁴ ‘‘வேணீ’’தி வேதி³தப்³போ³. ஹிரஞ்ஞமிஸ்ஸாதி கஹாபணமாலாய மிஸ்ஸேத்வா கதா. ஸுவண்ணமிஸ்ஸாதி ஸுவண்ணசீரகேஹி வா பாமங்கா³தீ³ஹி வா மிஸ்ஸேத்வா கதா. முத்தாமிஸ்ஸாதி முத்தாவலீஹி மிஸ்ஸேத்வா கதா. மணிமிஸ்ஸாதி ஸுத்தாரூள்ஹேஹி மணீஹி மிஸ்ஸேத்வா கதா. ஏதாஸு ஹி யம்கிஞ்சி வேணிம் க³ண்ஹந்தஸ்ஸ ஸங்கா⁴தி³ஸேஸோயேவ. ‘‘அஹம் மிஸ்ஸகவேணிம் அக்³க³ஹேஸி’’ந்தி வத³ந்தஸ்ஸ மோக்கோ² நத்தி². வேணிக்³க³ஹணேன சேத்த² கேஸாபி க³ஹிதாவ ஹோந்தி, தஸ்மா யோ ஏகம்பி கேஸம் க³ண்ஹாதி தஸ்ஸபி ஆபத்தியேவ.

ஹத்த²ஞ்ச வேணிஞ்ச ட²பேத்வாதி இத⁴ வுத்தலக்க²ணம் ஹத்த²ஞ்ச ஸப்³ப³ப்பகாரஞ்ச வேணிம் ட²பேத்வா அவஸேஸம் ஸரீரம் ‘‘அங்க³’’ந்தி வேதி³தப்³ப³ம். ஏவம் பரிச்சி²ன்னேஸு ஹத்தா²தீ³ஸு ஹத்த²ஸ்ஸ க³ஹணம் ஹத்த²க்³கா³ஹோ, வேணியா க³ஹணம் வேணிக்³கா³ஹோ, அவஸேஸஸஸரீரஸ்ஸ பராமஸனம் அஞ்ஞதரஸ்ஸ வா அஞ்ஞதரஸ்ஸ வா அங்க³ஸ்ஸ பராமஸனம், யோ தம் ஹத்த²க்³கா³ஹம் வா வேணிக்³கா³ஹம் வா அஞ்ஞதரஸ்ஸ வா அஞ்ஞதரஸ்ஸ வா அங்க³ஸ்ஸ பராமஸனம் ஸமாபஜ்ஜேய்ய, தஸ்ஸ ஸங்கா⁴தி³ஸேஸோ நாம ஆபத்தினிகாயோ ஹோதீதி. அயம் ஸிக்கா²பத³ஸ்ஸ அத்தோ².

272. யஸ்மா பன யோ ச ஹத்த²க்³கா³ஹோ யோ ச வேணிக்³கா³ஹோ யஞ்ச அவஸேஸஸ்ஸ அங்க³ஸ்ஸ பராமஸனம் தம் ஸப்³ப³ம்பி பே⁴த³தோ த்³வாத³ஸவித⁴ம் ஹோதி, தஸ்மா தம் பே⁴த³ம் த³ஸ்ஸேதும் ‘‘ஆமஸனா பராமஸனா’’திஆதி³னா நயேனஸ்ஸ பத³பா⁴ஜனம் வுத்தம். தத்த² யஞ்ச வுத்தம் ‘‘ஆமஸனா நாம ஆமட்ட²மத்தா’’தி யஞ்ச ‘‘சு²பனம் நாம பு²ட்ட²மத்த’’ந்தி, இமேஸம் அயம் விஸேஸோ – ஆமஸனாதி ஆமஜ்ஜனா பு²ட்டோ²காஸம் அனதிக்கமித்வாபி தத்தே²வ ஸங்க⁴ட்டனா. அயஞ்ஹி ‘‘ஆமட்ட²மத்தா’’தி வுச்சதி. சு²பனந்தி அஸங்க⁴ட்டேத்வா பு²ட்ட²மத்தம்.

யம்பி உம்மஸனாய ச உல்லங்க⁴னாய ச நித்³தே³ஸே ‘‘உத்³த⁴ம் உச்சாரணா’’தி ஏகமேவ பத³ம் வுத்தம். தத்ராபி அயம் விஸேஸோ – பட²மம் அத்தனோ காயஸ்ஸ இத்தி²யா காயே உத்³த⁴ம் பேஸனவஸேன வுத்தம், து³தியம் இத்தி²யா காயம் உக்கி²பனவஸேன, ஸேஸம் பாகடமேவ.

273. இதா³னி ய்வாயம் ஓதிண்ணோ விபரிணதேன சித்தேன காயஸம்ஸக்³க³ம் ஸமாபஜ்ஜதி, தஸ்ஸ ஏதேஸம் பதா³னம் வஸேன வித்தா²ரதோ ஆபத்திபே⁴த³ம் த³ஸ்ஸேந்தோ ‘‘இத்தீ² ச ஹோதி இத்தி²ஸஞ்ஞீ ஸாரத்தோ ச பி⁴க்கு² ச நம் இத்தி²யா காயேன காய’’ந்திஆதி³மாஹ. தத்த² பி⁴க்கு² ச நம் இத்தி²யா காயேன காயந்தி ஸோ ஸாரத்தோ ச இத்தி²ஸஞ்ஞீ ச பி⁴க்கு² அத்தனோ காயேன. நந்தி நிபாதமத்தம். அத² வா ஏதம் தஸ்ஸா இத்தி²யா ஹத்தா²தி³பே⁴த³ம் காயம். ஆமஸதி பராமஸதீதி ஏதேஸு சே ஏகேனாபி ஆகாரேன அஜ்ஜா²சரதி, ஆபத்தி ஸங்கா⁴தி³ஸேஸஸ்ஸ. தத்த² ஸகிம் ஆமஸதோ ஏகா ஆபத்தி, புனப்புனம் ஆமஸதோ பயோகே³ பயோகே³ ஸங்கா⁴தி³ஸேஸோ.

பராமஸந்தோபி ஸசே காயதோ அமோசேத்வாவ இதோ சிதோ ச அத்தனோ ஹத்த²ம் வா காயம் வா ஸஞ்சோபேதி ஹரதி பேஸேதி தி³வஸம்பி பராமஸதோ ஏகாவ ஆபத்தி. ஸசே காயதோ மோசேத்வா மோசேத்வா பராமஸதி பயோகே³ பயோகே³ ஆபத்தி.

ஓமஸந்தோபி ஸசே காயதோ அமோசேத்வாவ இத்தி²யா மத்த²கதோ பட்டா²ய யாவ பாத³பிட்டி²ம் ஓமஸதி ஏகாவ ஆபத்தி. ஸசே பன உத³ராதீ³ஸு தம் தம் டா²னம் பத்வா முஞ்சித்வா முஞ்சித்வா ஓமஸதி பயோகே³ பயோகே³ ஆபத்தி. உம்மஸனாயபி பாத³தோ பட்டா²ய யாவ ஸீஸம் உம்மஸந்தஸ்ஸ ஏஸேவ நயோ.

ஓலங்க⁴னாய மாதுகா³மம் கேஸேஸு க³ஹேத்வா நாமேத்வா சும்ப³னாதீ³ஸு யம் அஜ்ஜா²சாரம் இச்ச²தி தம் கத்வா முஞ்சதோ ஏகாவ ஆபத்தி. உட்டி²தம் புனப்புனம் நாமயதோ பயோகே³ பயோகே³ ஆபத்தி. உல்லங்க⁴னாயபி கேஸேஸு வா ஹத்தே²ஸு வா க³ஹேத்வா வுட்டா²பயதோ ஏஸேவ நயோ.

ஆகட்³ட⁴னாய அத்தனோ அபி⁴முக²ம் ஆகட்³ட⁴ந்தோ யாவ ந முஞ்சதி தாவ ஏகாவ ஆபத்தி. முஞ்சித்வா முஞ்சித்வா ஆகட்³ட⁴ந்தஸ்ஸ பயோகே³ பயோகே³ ஆபத்தி. பதிகட்³ட⁴னாயபி பரம்முக²ம் பிட்டி²யம் க³ஹேத்வா படிப்பணாமயதோ ஏஸேவ நயோ.

அபி⁴னிக்³க³ண்ஹனாய ஹத்தே² வா பா³ஹாய வா த³ள்ஹம் க³ஹேத்வா யோஜனம்பி க³ச்ச²தோ ஏகாவ ஆபத்தி. முஞ்சித்வா புனப்புனம் க³ண்ஹதோ பயோகே³ பயோகே³ ஆபத்தி. அமுஞ்சித்வா புனப்புனம் பு²ஸதோ ச ஆலிங்க³தோ ச பயோகே³ பயோகே³ ஆபத்தீதி மஹாஸுமத்தே²ரோ ஆஹ. மஹாபது³மத்தே²ரோ பனாஹ – ‘‘மூலக்³க³ஹணமேவ பமாணம், தஸ்மா யாவ ந முஞ்சதி தாவ ஏகா ஏவ ஆபத்தீ’’தி.

அபி⁴னிப்பீளனாய வத்தே²ன வா ஆப⁴ரணேன வா ஸத்³தி⁴ம் பீளயதோ அங்க³ம் அபு²ஸந்தஸ்ஸ து²ல்லச்சயம், பு²ஸந்தஸ்ஸ ஸங்கா⁴தி³ஸேஸோ, ஏகபயோகே³ன ஏகா ஆபத்தி, நானாபயோகே³ன நானா.

க³ஹணசு²பனேஸு அஞ்ஞம் கிஞ்சி விகாரம் அகரோந்தோபி க³ஹிதமத்தபு²ட்ட²மத்தேனாபி ஆபத்திம் ஆபஜ்ஜதி.

ஏவமேதேஸு ஆமஸனாதீ³ஸு ஏகேனாபி ஆகாரேன அஜ்ஜா²சாரதோ இத்தி²யா இத்தி²ஸஞ்ஞிஸ்ஸ ஸங்கா⁴தி³ஸேஸோ, வேமதிகஸ்ஸ து²ல்லச்சயம், பண்ட³கபுரிஸதிரச்சா²னக³தஸஞ்ஞிஸ்ஸாபி து²ல்லச்சயமேவ. பண்ட³கே பண்ட³கஸஞ்ஞிஸ்ஸ து²ல்லச்சயம், வேமதிகஸ்ஸ து³க்கடம். புரிஸதிரச்சா²னக³தஇத்தி²ஸஞ்ஞிஸ்ஸாபி து³க்கடமேவ. புரிஸே புரிஸஸஞ்ஞிஸ்ஸாபி வேமதிகஸ்ஸாபி இத்தி²பண்ட³கதிரச்சா²னக³தஸஞ்ஞிஸ்ஸாபி து³க்கடமேவ. திரச்சா²னக³தேபி ஸப்³பா³காரேன து³க்கடமேவாதி. இமா ஏகமூலகனயே வுத்தா ஆபத்தியோ ஸல்லக்கே²த்வா இமினாவ உபாயேன ‘‘த்³வே இத்தி²யோ த்³வின்னம் இத்தீ²ன’’ந்திஆதி³வஸேன வுத்தே து³மூலகனயேபி தி³கு³ணா ஆபத்தியோ வேதி³தப்³பா³. யதா² ச த்³வீஸு இத்தீ²ஸு த்³வே ஸங்கா⁴தி³ஸேஸா; ஏவம் ஸம்ப³ஹுலாஸு ஸம்ப³ஹுலா வேதி³தப்³பா³.

யோ ஹி ஏகதோ டி²தா ஸம்ப³ஹுலா இத்தி²யோ பா³ஹாஹி பரிக்கி²பித்வா க³ண்ஹாதி ஸோ யத்தகா இத்தி²யோ பு²ட்டா² தாஸம் க³ணனாய ஸங்கா⁴தி³ஸேஸே ஆபஜ்ஜதி, மஜ்ஜ²க³தானம் க³ணனாய து²ல்லச்சயே. தா ஹி தேன காயப்படிப³த்³தே⁴ன ஆமட்டா² ஹோந்தி. யோ பன ஸம்ப³ஹுலானம் அங்கு³லியோ வா கேஸே வா ஏகதோ கத்வா க³ண்ஹாதி, ஸோ அங்கு³லியோ ச கேஸே ச அக³ணேத்வா இத்தி²யோ க³ணேத்வா ஸங்கா⁴தி³ஸேஸேஹி காரேதப்³போ³. யாஸஞ்ச இத்தீ²னம் அங்கு³லியோ வா கேஸா வா மஜ்ஜ²க³தா ஹோந்தி, தாஸம் க³ணனாய து²ல்லச்சயே ஆபஜ்ஜதி. தா ஹி தேன காயப்படிப³த்³தே⁴ன ஆமட்டா² ஹோந்தி, ஸம்ப³ஹுலா பன இத்தி²யோ காயப்படிப³த்³தே⁴ஹி ரஜ்ஜுவத்தா²தீ³ஹி பரிக்கி²பித்வா க³ண்ஹந்தோ ஸப்³பா³ஸம்யேவ அந்தோபரிக்கே²பக³தானம் க³ணனாய து²ல்லச்சயே ஆபஜ்ஜதி. மஹாபச்சரியம் அபு²ட்டா²ஸு து³க்கடம் வுத்தம். தத்த² யஸ்மா பாளியம் காயப்படிப³த்³த⁴ப்படிப³த்³தே⁴ன ஆமஸனம் நாம நத்தி², தஸ்மா ஸப்³ப³ம்பி காயப்படிப³த்³த⁴ப்படிப³த்³த⁴ம் காயப்படிப³த்³தே⁴னேவ ஸங்க³ஹேத்வா மஹாஅட்ட²கதா²யஞ்ச குருந்தி³யஞ்ச வுத்தோ புரிமனயோயேவேத்த² யுத்ததரோ தி³ஸ்ஸதி.

யோ ஹி ஹத்தே²ன ஹத்த²ம் க³ஹேத்வா படிபாடியா டி²தாஸு இத்தீ²ஸு ஸமஸாராகோ³ ஏகம் ஹத்தே² க³ண்ஹாதி, ஸோ க³ஹிதித்தி²யா வஸேன ஏகம் ஸங்கா⁴தி³ஸேஸம் ஆபஜ்ஜதி, இதராஸம் க³ணனாய புரிமனயேனேவ து²ல்லச்சயே. ஸசே ஸோ தம் காயப்படிப³த்³தே⁴ வத்தே² வா புப்பே² வா க³ண்ஹாதி, ஸப்³பா³ஸம் க³ணனாய து²ல்லச்சயே ஆபஜ்ஜதி. யதே²வ ஹி ரஜ்ஜுவத்தா²தீ³ஹி பரிக்கி²பந்தேன ஸப்³பா³பி காயப்படிப³த்³தே⁴ன ஆமட்டா² ஹோந்தி, ததா² இதா⁴பி ஸப்³பா³பி காயப்படிப³த்³தே⁴ன ஆமட்டா² ஹோந்தி. ஸசே பன தா இத்தி²யோ அஞ்ஞமஞ்ஞம் வத்த²கோடியம் க³ஹேத்வா டி²தா ஹோந்தி, தத்ர சேஸோ புரிமனயேனேவ பட²மம் இத்தி²ம் ஹத்தே² க³ண்ஹாதி க³ஹிதாய வஸேன ஸங்கா⁴தி³ஸேஸம் ஆபஜ்ஜதி, இதராஸம் க³ணனாய து³க்கடானி. ஸப்³பா³ஸஞ்ஹி தாஸம் தேன புரிமனயேனேவ காயபடிப³த்³தே⁴ன காயப்படிப³த்³த⁴ம் ஆமட்ட²ம் ஹோதி. ஸசே பன ஸோபி தம் காயப்படிப³த்³தே⁴யேவ க³ண்ஹாதி தஸ்ஸா வஸேன து²ல்லச்சயம் ஆபஜ்ஜதி, இதராஸம் க³ணனாய அனந்தரனயேனேவ து³க்கடானி.

யோ பன க⁴னவத்த²னிவத்த²ம் இத்தி²ம் காயஸம்ஸக்³க³ராகே³ன வத்தே² க⁴ட்டேதி, து²ல்லச்சயம். விரளவத்த²னிவத்த²ம் க⁴ட்டேதி, தத்ர சே வத்த²ந்தரேஹி இத்தி²யா வா நிக்க²ந்தலோமானி பி⁴க்கு²ம் பி⁴க்கு²னோ வா பவிட்ட²லோமானி இத்தி²ம் பு²ஸந்தி, உபி⁴ன்னம் லோமானியேவ வா லோமானி பு²ஸந்தி, ஸங்கா⁴தி³ஸேஸோ. உபாதி³ன்னகேன ஹி கம்மஜரூபேன உபாதி³ன்னகம் வா அனுபாதி³ன்னகம் வா அனுபாதி³ன்னகேனபி கேனசி கேஸாதி³னா உபாதி³ன்னகம் வா அனுபாதி³ன்னகம் வா பு²ஸந்தோபி ஸங்கா⁴தி³ஸேஸம் ஆபஜ்ஜதியேவ.

தத்த² குருந்தி³யம் ‘‘லோமானி க³ணேத்வா ஸங்கா⁴தி³ஸேஸோ’’தி வுத்தம். மஹாஅட்ட²கதா²யம் பன ‘‘லோமானி க³ணேத்வா ஆபத்தியா ந காரேதப்³போ³, ஏகமேவ ஸங்கா⁴தி³ஸேஸம் ஆபஜ்ஜதி. ஸங்கி⁴கமஞ்சே பன அபச்சத்த²ரித்வா நிபன்னோ லோமானி க³ணேத்வா காரேதப்³போ³’’தி வுத்தம், ததே³வ யுத்தம். இத்தி²வஸேன ஹி அயம் ஆபத்தி, ந கோட்டா²ஸவஸேனாதி.

ஏத்தா²ஹ ‘‘யோ பன ‘காயப்படிப³த்³த⁴ம் க³ண்ஹிஸ்ஸாமீ’தி காயம் க³ண்ஹாதி, ‘காயம் க³ண்ஹிஸ்ஸாமீ’தி காயப்படிப³த்³த⁴ம் க³ண்ஹாதி, ஸோ கிம் ஆபஜ்ஜதீ’’தி. மஹாஸுமத்தே²ரோ தாவ ‘‘யதா²வத்து²கமேவா’’தி வத³தி. அயம் கிரஸ்ஸ லத்³தி⁴ –

‘‘வத்து² ஸஞ்ஞா ச ராகோ³ ச, ப²ஸ்ஸப்படிவிஜானனா;

யதா²னித்³தி³ட்ட²னித்³தே³ஸே, க³ருகம் தேன காரயே’’தி.

ஏத்த² ‘‘வத்தூ²’’தி இத்தீ². ‘‘ஸஞ்ஞா’’தி இத்தி²ஸஞ்ஞா. ‘‘ராகோ³’’தி காயஸம்ஸக்³க³ராகோ³. ‘‘ப²ஸ்ஸப்படிவிஜானனா’’தி காயஸம்ஸக்³க³ப²ஸ்ஸஜானனா. தஸ்மா யோ இத்தி²யா இத்தி²ஸஞ்ஞீ காயஸம்ஸக்³க³ராகே³ன ‘‘காயப்படிப³த்³த⁴ம் க³ஹேஸ்ஸாமீ’’தி பவத்தோபி காயம் பு²ஸதி, க³ருகம் ஸங்கா⁴தி³ஸேஸம்யேவ ஆபஜ்ஜதி. இதரோபி து²ல்லச்சயந்தி மஹாபது³மத்தே²ரோ பனாஹ –

‘‘ஸஞ்ஞாய விராகி³தம்ஹி, க³ஹணே ச விராகி³தே;

யதா²னித்³தி³ட்ட²னித்³தே³ஸே, க³ருகம் தத்த² ந தி³ஸ்ஸதீ’’தி.

அஸ்ஸாபாயம் லத்³தி⁴ இத்தி²யா இத்தி²ஸஞ்ஞினோ ஹி ஸங்கா⁴தி³ஸேஸோ வுத்தோ. இமினா ச இத்தி²ஸஞ்ஞா விராகி³தா காயப்படிப³த்³தே⁴ காயப்படிப³த்³த⁴ஸஞ்ஞா உப்பாதி³தா, தம் க³ண்ஹந்தஸ்ஸ பன து²ல்லச்சயம் வுத்தம். இமினா ச க³ஹணம்பி விராகி³தம் தம் அக்³க³ஹேத்வா இத்தீ² க³ஹிதா, தஸ்மா ஏத்த² இத்தி²ஸஞ்ஞாய அபா⁴வதோ ஸங்கா⁴தி³ஸேஸோ ந தி³ஸ்ஸதி, காயப்படிப³த்³த⁴ஸ்ஸ அக்³க³ஹிதத்தா து²ல்லச்சயம் ந தி³ஸ்ஸதி, காயஸம்ஸக்³க³ராகே³ன பு²ட்ட²த்தா பன து³க்கடம். காயஸம்ஸக்³க³ராகே³ன ஹி இமம் நாம வத்து²ம் பு²ஸதோ அனாபத்தீதி நத்தி², தஸ்மா து³க்கடமேவாதி.

இத³ஞ்ச பன வத்வா இத³ம் சதுக்கமாஹ. ‘‘ஸாரத்தம் க³ண்ஹிஸ்ஸாமீ’தி ஸாரத்தம் க³ண்ஹி ஸங்கா⁴தி³ஸேஸோ, ‘விரத்தம் க³ண்ஹிஸ்ஸாமீ’தி விரத்தம் க³ண்ஹி து³க்கடம், ‘ஸாரத்தம் க³ண்ஹிஸ்ஸாமீ’தி விரத்தம் க³ண்ஹி து³க்கடம், ‘விரத்தம் க³ண்ஹிஸ்ஸாமீ’தி ஸாரத்தம் க³ண்ஹி து³க்கடமேவா’’தி. கிஞ்சாபி ஏவமாஹ? அத² கோ² மஹாஸுமத்தே²ரவாதோ³யேவேத்த² ‘‘இத்தி² ச ஹோதி இத்தி²ஸஞ்ஞீ ஸாரத்தோ ச பி⁴க்கு² ச நம் இத்தி²யா காயேன காயப்படிப³த்³த⁴ம் ஆமஸதி பராமஸதி…பே… க³ண்ஹாதி சு²பதி ஆபத்தி து²ல்லச்சயஸ்ஸா’’தி இமாய பாளியா ‘‘யோ ஹி ஏகதோ டி²தா ஸம்ப³ஹுலா இத்தி²யோ பா³ஹாஹி பரிக்கி²பித்வா க³ண்ஹாதி, ஸோ யத்தகா இத்தி²யோ பு²ட்டா² தாஸம் க³ணனாய ஸங்கா⁴தி³ஸேஸே ஆபஜ்ஜதி, மஜ்ஜ²க³தானம் க³ணனாய து²ல்லச்சயே’’திஆதீ³ஹி அட்ட²கதா²வினிச்ச²யேஹி ச ஸமேதி. யதி³ ஹி ஸஞ்ஞாதி³விராகே³ன விராகி³தம் நாம ப⁴வேய்ய ‘‘பண்ட³கோ ச ஹோதி இத்தி²ஸஞ்ஞீ’’திஆதீ³ஸு விய ‘‘காயப்படிப³த்³த⁴ஞ்ச ஹோதி காயஸஞ்ஞீ சா’’திஆதி³னாபி நயேன பாளியம் விஸேஸம் வதே³ய்ய. யஸ்மா பன ஸோ ந வுத்தோ, தஸ்மா இத்தி²யா இத்தி²ஸஞ்ஞாய ஸதி இத்தி²ம் ஆமஸந்தஸ்ஸ ஸங்கா⁴தி³ஸேஸோ, காயப்படிப³த்³த⁴ம் ஆமஸந்தஸ்ஸ து²ல்லச்சயந்தி யதா²வத்து²கமேவ யுஜ்ஜதி.

மஹாபச்சரியம்பி சேதம் வுத்தம் – ‘‘நீலம் பாருபித்வா ஸயிதாய காளித்தி²யா காயம் க⁴ட்டேஸ்ஸாமீ’தி காயம் க⁴ட்டேதி, ஸங்கா⁴தி³ஸேஸோ; ‘காயம் க⁴ட்டேஸ்ஸாமீ’தி நீலம் க⁴ட்டேதி, து²ல்லச்சயம்; ‘நீலம் க⁴ட்டேஸ்ஸாமீ’தி காயம் க⁴ட்டேதி, ஸங்கா⁴தி³ஸேஸோ; ‘நீலம் க⁴ட்டேஸ்ஸாமீ’தி நீலம் க⁴ட்டேதி, து²ல்லச்சய’’ந்தி. யோபாயம் ‘‘இத்தீ² ச பண்ட³கோ சா’’திஆதி³னா நயேன வத்து²மிஸ்ஸகனயோ வுத்தோ, தஸ்மிம்பி வத்து² ஸஞ்ஞாவிமதிவஸேன வுத்தா ஆபத்தியோ பாளியம் அஸம்முய்ஹந்தேன வேதி³தப்³பா³.

காயேனகாயப்படிப³த்³த⁴வாரே பன இத்தி²யா இத்தி²ஸஞ்ஞிஸ்ஸ காயப்படிப³த்³த⁴ம் க³ண்ஹதோ து²ல்லச்சயம், ஸேஸே ஸப்³ப³த்த² து³க்கடம். காயப்படிப³த்³தே⁴னகாயவாரேபி ஏஸேவ நயோ. காயப்படிப³த்³தே⁴னகஆயப்படிப³த்³த⁴வாரே ச நிஸ்ஸக்³கி³யேனகாயவாராதீ³ஸு சஸ்ஸ ஸப்³ப³த்த² து³க்கடமேவ.

‘‘இத்தீ² ச ஹோதி இத்தி²ஸஞ்ஞீ ஸாரத்தோ ச இத்தீ² ச நம் பி⁴க்கு²ஸ்ஸ காயேன காய’’ந்திஆதி³வாரோ பன பி⁴க்கு²ம்ஹி மாதுகா³மஸ்ஸ ராக³வஸேன வுத்தோ. தத்த² இத்தீ² ச நம் பி⁴க்கு²ஸ்ஸ காயேன காயந்தி பி⁴க்கு²ம்ஹி ஸாரத்தா இத்தீ² தஸ்ஸ நிஸின்னோகாஸம் வா நிபன்னோகாஸம் வா க³ந்த்வா அத்தனோ காயேன தம் பி⁴க்கு²ஸ்ஸ காயம் ஆமஸதி…பே… சு²பதி. ஸேவனாதி⁴ப்பாயோ காயேன வாயமதி, ப²ஸ்ஸம் படிவிஜானாதீதி ஏவம் தாய ஆமட்டோ² வா சு²பிதோ வா ஸேவனாதி⁴ப்பாயோ ஹுத்வா ஸசே ப²ஸ்ஸப்படிவிஜானனத்த²ம் ஈஸகம்பி காயம் சாலேதி ப²ந்தே³தி, ஸங்கா⁴தி³ஸேஸம் ஆபஜ்ஜதி.

த்³வே இத்தி²யோதி ஏத்த² த்³வே ஸங்கா⁴தி³ஸேஸே ஆபஜ்ஜதி, இத்தி²யா ச பண்ட³கே ச ஸங்கா⁴தி³ஸேஸேன ஸஹ து³க்கடம். ஏதேன உபாயேன யாவ ‘‘நிஸ்ஸக்³கி³யேன நிஸ்ஸக்³கி³யம் ஆமஸதி, ஸேவனாதி⁴ப்பாயோ காயேன வாயமதி ந ச ப²ஸ்ஸம் படிவிஜானாதி, ஆபத்தி து³க்கடஸ்ஸா’’தி தாவ புரிமனயேனேவ ஆபத்திபே⁴தோ³ வேதி³தப்³போ³.

ஏத்த² ச காயேன வாயமதி ந ச ப²ஸ்ஸம் படிவிஜானாதீதி அத்தனா நிஸ்ஸட்ட²ம் புப்ப²ம் வா ப²லம் வா இத்தி²ம் அத்தனோ நிஸ்ஸக்³கி³யேன புப்பே²ன வா ப²லேன வா பஹரந்திம் தி³ஸ்வா காயேன விகாரம் கரோதி, அங்கு³லிம் வா சாலேதி, ப⁴முகம் வா உக்கி²பதி, அக்கி²ம் வா நிக²ணதி, அஞ்ஞம் வா ஏவரூபம் விகாரம் கரோதி, அயம் வுச்சதி ‘‘காயேன வாயமதி ந ச ப²ஸ்ஸம் படிவிஜானாதீ’’தி. அயம்பி காயேன வாயமிதத்தா து³க்கடம் ஆபஜ்ஜதி, த்³வீஸு இத்தீ²ஸு த்³வே, இத்தீ²பண்ட³கேஸுபி த்³வே ஏவ து³க்கடே ஆபஜ்ஜதி.

279. ஏவம் வத்து²வஸேன வித்தா²ரதோ ஆபத்திபே⁴த³ம் த³ஸ்ஸேத்வா இதா³னி லக்க²ணவஸேன ஸங்கே²பதோ ஆபத்திபே⁴த³ஞ்ச அனாபத்திபே⁴த³ஞ்ச த³ஸ்ஸேந்தோ ‘‘ஸேவனாதி⁴ப்பாயோ’’திஆதி³மாஹ. தத்த² புரிமனயே இத்தி²யா பு²ட்டோ² ஸமானோ ஸேவனாதி⁴ப்பாயோ காயேன வாயமதி, ப²ஸ்ஸம் படிவிஜானாதீதி திவங்க³ஸம்பத்தியா ஸங்கா⁴தி³ஸேஸோ. து³தியே நயே நிஸ்ஸக்³கி³யேன நிஸ்ஸக்³கி³யாமஸனே விய வாயமித்வா அசு²பனே விய ச ப²ஸ்ஸஸ்ஸ அப்படிவிஜானனதோ து³வங்க³ஸம்பத்தியா து³க்கடம். ததியே காயேன அவாயமதோ அனாபத்தி. யோ ஹி ஸேவனாதி⁴ப்பாயோபி நிச்சலேன காயேன கேவலம் ப²ஸ்ஸம் படிவிஜானாதி ஸாதி³யதி அனுபோ⁴தி, தஸ்ஸ சித்துப்பாத³மத்தே ஆபத்தியா அபா⁴வதோ அனாபத்தி. சதுத்தே² பன நிஸ்ஸக்³கி³யேன நிஸ்ஸக்³கி³யாமஸனே விய ப²ஸ்ஸப்படிவிஜானனாபி நத்தி², கேவலம் சித்துப்பாத³மத்தமேவ, தஸ்மா அனாபத்தி. மோக்கா²தி⁴ப்பாயஸ்ஸ ஸப்³பா³காரேஸு அனாபத்தியேவ.

ஏத்த² பன யோ இத்தி²யா க³ஹிதோ தம் அத்தனோ ஸரீரா மோசேதுகாமோ படிப்பணாமேதி வா பஹரதி வா அயம் காயேன வாயமதி ப²ஸ்ஸம் படிவிஜானாதி. யோ ஆக³ச்ச²ந்திம் தி³ஸ்வா ததோ முஞ்சிதுகாமோ உத்தாஸேத்வா பலாபேதி, அயம் காயேன வாயமதி ந ச ப²ஸ்ஸம் படிவிஜானாதி. யோ தாதி³ஸம் தீ³க⁴ஜாதிம் காயே ஆரூள்ஹம் தி³ஸ்வா ‘‘ஸணிகம் க³ச்ச²து க⁴ட்டியமானா அனத்தா²ய ஸம்வத்தேய்யா’’தி ந க⁴ட்டேதி, இத்தி²மேவ வா அங்க³ம் பு²ஸமானம் ஞத்வா ‘‘ஏஸா ‘அனத்தி²கோ அயம் மயா’தி ஸயமேவ பக்கமிஸ்ஸதீ’’தி அஜானந்தோ விய நிச்சலோ ஹோதி, ப³லவித்தி²யா வா கா³ள்ஹம் ஆலிங்கி³த்வா க³ஹிதோ த³ஹரபி⁴க்கு² பலாயிதுகாமோபி ஸுட்டு² க³ஹிதத்தா நிச்சலோ ஹோதி, அயம் ந ச காயேன வாயமதி, ப²ஸ்ஸம் படிவிஜானாதி. யோ பன ஆக³ச்ச²ந்திம் தி³ஸ்வா ‘‘ஆக³ச்ச²து தாவ ததோ நம் பஹரித்வா வா பணாமேத்வா வா பக்கமிஸ்ஸாமீ’’தி நிச்சலோ ஹோதி, அயம் மோக்கா²தி⁴ப்பாயோ ந ச காயேன வாயமதி, ந ச ப²ஸ்ஸம் படிவிஜானாதீதி வேதி³தப்³போ³.

280. அஸஞ்சிச்சாதி இமினா உபாயேன இமம் பு²ஸிஸ்ஸாமீதி அசேதேத்வா, ஏவஞ்ஹி அசேதேத்வா பத்தப்படிக்³க³ஹணாதீ³ஸு மாதுகா³மஸ்ஸ அங்கே³ பு²ட்டே²பி அனாபத்தி.

அஸதியாதி அஞ்ஞவிஹிதோ ஹோதி மாதுகா³மம் பு²ஸாமீதி ஸதி நத்தி², ஏவம் அஸதியா ஹத்த²பாத³பஸாரணாதி³காலே பு²ஸந்தஸ்ஸ அனாபத்தி.

அஜானந்தஸ்ஸாதி தா³ரகவேஸேன டி²தம் தா³ரிகம் ‘‘இத்தீ²’’தி அஜானந்தோ கேனசிதே³வ கரணீயேன பு²ஸதி, ஏவம் ‘‘இத்தீ²’’தி அஜானந்தஸ்ஸ பு²ஸதோ அனாபத்தி.

அஸாதி³யந்தஸ்ஸாதி காயஸம்ஸக்³க³ம் அஸாதி³யந்தஸ்ஸ, தஸ்ஸ பா³ஹாபரம்பராய நீதபி⁴க்கு²ஸ்ஸ விய அனாபத்தி. உம்மத்தகாத³யோ வுத்தனயாஏவ. இத⁴ பன உதா³யித்தே²ரோ ஆதி³கம்மிகோ, தஸ்ஸ அனாபத்தி ஆதி³கம்மிகஸ்ஸாதி.

பத³பா⁴ஜனீயவண்ணனா நிட்டி²தா.

ஸமுட்டா²னாதீ³ஸு இத³ம் ஸிக்கா²பத³ம் பட²மபாராஜிகஸமுட்டா²னம் காயசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், த்³விவேத³னம், ஸுக²மஜ்ஜ²த்தத்³வயேனாதி.

281. வினீதவத்தூ²ஸு – மாதுயா மாதுபேமேனாதி மாதுபேமேன மாதுயா காயம் ஆமஸி. ஏஸ நயோ தீ⁴துப⁴கி³னிவத்தூ²ஸு. தத்த² யஸ்மா மாதா வா ஹோது தீ⁴தா வா இத்தீ² நாம ஸப்³பா³பி ப்³ரஹ்மசரியஸ்ஸ பாரிபந்தி²காவ. தஸ்மா ‘‘அயம் மே மாதா அயம் தீ⁴தா அயம் மே ப⁴கி³னீ’’தி கே³ஹஸ்ஸிதபேமேன ஆமஸதோபி து³க்கடமேவ வுத்தம்.

இமம் பன ப⁴க³வதோ ஆணம் அனுஸ்ஸரந்தேன ஸசேபி நதீ³ஸோதேன வுய்ஹமானம் மாதரம் பஸ்ஸதி நேவ ஹத்தே²ன பராமஸிதப்³பா³. பண்டி³தேன பன பி⁴க்கு²னா நாவா வா ப²லகம் வா கத³லிக்க²ந்தோ⁴ வா தா³ருக்க²ந்தோ⁴ வா உபஸம்ஹரிதப்³போ³. தஸ்மிம் அஸதி காஸாவம்பி உபஸம்ஹரித்வா புரதோ ட²பேதப்³ப³ம், ‘‘ஏத்த² க³ண்ஹாஹீ’’தி பன ந வத்தப்³பா³. க³ஹிதே பரிக்கா²ரம் கட்³டா⁴மீதி கட்³ட⁴ந்தேன க³ந்தப்³ப³ம். ஸசே பா⁴யதி புரதோ புரதோ க³ந்த்வா ‘‘மா பா⁴யீ’’தி ஸமஸ்ஸாஸேதப்³பா³. ஸசே பா⁴யமானா புத்தஸ்ஸ ஸஹஸா க²ந்தே⁴ வா அபி⁴ருஹதி, ஹத்தே² வா க³ண்ஹாதி, ந ‘‘அபேஹி மஹல்லிகே’’தி நித்³து⁴னிதப்³பா³, த²லம் பாபேதப்³பா³. கத்³த³மே லக்³கா³யபி கூபே பதிதாயபி ஏஸேவ நயோ.

தத்ரபி ஹி யோத்தம் வா வத்த²ம் வா பக்கி²பித்வா ஹத்தே²ன க³ஹிதபா⁴வம் ஞத்வா உத்³த⁴ரிதப்³பா³, நத்வேவ ஆமஸிதப்³பா³. ந கேவலஞ்ச மாதுகா³மஸ்ஸ ஸரீரமேவ அனாமாஸம், நிவாஸனபாவுரணம்பி ஆப⁴ரணப⁴ண்ட³ம்பி திணண்டு³பகம் வா தாளபண்ணமுத்³தி³கம் வா உபாதா³ய அனாமாஸமேவ, தஞ்ச கோ² நிவாஸனபாருபனம் பிளந்த⁴னத்தா²ய ட²பிதமேவ. ஸசே பன நிவாஸனம் வா பாருபனம் வா பரிவத்தேத்வா சீவரத்தா²ய பாத³மூலே ட²பேதி வட்டதி. ஆப⁴ரணப⁴ண்டே³ஸு பன ஸீஸபஸாத⁴னகத³ந்தஸூசிஆதி³கப்பியப⁴ண்ட³ம் ‘‘இமம் ப⁴ந்தே தும்ஹாகம் க³ண்ஹதா²’’தி தி³ய்யமானம் ஸிபாடிகாஸூசிஆதி³உபகரணத்தா²ய க³ஹேதப்³ப³ம். ஸுவண்ணரஜதமுத்தாதி³மயம் பன அனாமாஸமேவ தீ³ய்யமானம்பி ந க³ஹேதப்³ப³ம். ந கேவலஞ்ச ஏதாஸம் ஸரீரூபக³மேவ அனாமாஸம், இத்தி²ஸண்டா²னேன கதம் கட்ட²ரூபம்பி த³ந்தரூபம்பி அயரூபம்பி லோஹரூபம்பி திபுரூபம்பி போத்த²கரூபம்பி ஸப்³ப³ரதனரூபம்பி அந்தமஸோ பிட்ட²மயரூபம்பி அனாமாஸமேவ. பரிபோ⁴க³த்தா²ய பன ‘‘இத³ம் தும்ஹாகம் ஹோதூ’’தி லபி⁴த்வா ட²பேத்வா ஸப்³ப³ரதனமயம் அவஸேஸம் பி⁴ந்தி³த்வா உபகரணாரஹம் உபகரணே பரிபோ⁴கா³ரஹம் பரிபோ⁴கே³ உபனேதும் வட்டதி.

யதா² ச இத்தி²ரூபகம்; ஏவம் ஸத்தவித⁴ம்பி த⁴ஞ்ஞம் அனாமாஸம். தஸ்மா கே²த்தமஜ்ஜே²ன க³ச்ச²தா தத்த²ஜாதகம்பி த⁴ஞ்ஞப²லம் ந ஆமஸந்தேன க³ந்தப்³ப³ம். ஸசே க⁴ரத்³வாரே வா அந்தராமக்³கே³ வா த⁴ஞ்ஞம் பஸாரிதம் ஹோதி பஸ்ஸேன ச மக்³கோ³ அத்தி² ந மத்³த³ந்தேன க³ந்தப்³ப³ம். க³மனமக்³கே³ அஸதி மக்³க³ம் அதி⁴ட்டா²ய க³ந்தப்³ப³ம். அந்தரக⁴ரே த⁴ஞ்ஞஸ்ஸ உபரி ஆஸனம் பஞ்ஞாபேத்வா தே³ந்தி நிஸீதி³தும் வட்டதி. கேசி ஆஸனஸாலாயம் த⁴ஞ்ஞம் ஆகிரந்தி, ஸசே ஸக்கா ஹோதி ஹராபேதும் ஹராபேதப்³ப³ம், நோ சே ஏகமந்தம் த⁴ஞ்ஞம் அமத்³த³ந்தேன பீட²கம் பஞ்ஞபேத்வா நிஸீதி³தப்³ப³ம். ஸசே ஓகாஸோ ந ஹோதி, மனுஸ்ஸா த⁴ஞ்ஞமஜ்ஜே²யேவ ஆஸனம் பஞ்ஞபேத்வா தே³ந்தி, நிஸீதி³தப்³ப³ம். தத்த²ஜாதகானி முக்³க³மாஸாதீ³னி அபரண்ணானிபி தாலபனஸாதீ³னி வா ப²லானி கீளந்தேன ந ஆமஸிதப்³பா³னி. மனுஸ்ஸேஹி ராஸிகதேஸுபி ஏஸேவ நயோ. அரஞ்ஞே பன ருக்க²தோ பதிதானி ப²லானி ‘‘அனுபஸம்பன்னானம் த³ஸ்ஸாமீ’’தி க³ண்ஹிதும் வட்டதி.

முத்தா, மணி, வேளுரியோ, ஸங்கோ², ஸிலா, பவாளம், ரஜதம், ஜாதரூபம், லோஹிதங்கோ, மஸாரக³ல்லந்தி இமேஸு த³ஸஸு ரதனேஸு முத்தா அதோ⁴தா அனிவித்³தா⁴ யதா²ஜாதாவ ஆமஸிதும் வட்டதி. ஸேஸா அனாமாஸாதி வத³ந்தி. மஹாபச்சரியம் பன ‘‘முத்தா தோ⁴தாபி அதோ⁴தாபி அனாமாஸா ப⁴ண்ட³மூலத்தா²ய ச ஸம்படிச்சி²தும் ந வட்டதி, குட்ட²ரோக³ஸ்ஸ பே⁴ஸஜ்ஜத்தா²ய பன வட்டதீ’’தி வுத்தம். அந்தமஸோ ஜாதிப²லிகம் உபாதா³ய ஸப்³போ³பி நீலபீதாதி³வண்ணபே⁴தோ³ மணி தோ⁴தவித்³த⁴வட்டிதோ அனாமாஸோ, யதா²ஜாதோ பன ஆகரமுத்தோ பத்தாதி³ப⁴ண்ட³மூலத்த²ம் ஸம்படிச்சி²தும் வட்டதீதி வுத்தோ. ஸோபி மஹாபச்சரியம் படிக்கி²த்தோ, பசித்வா கதோ காசமணியேவேகோ வட்டதீதி வுத்தோ. வேளுரியேபி மணிஸதி³ஸோவ வினிச்ச²யோ.

ஸங்கோ² த⁴மனஸங்கோ² ச தோ⁴தவித்³தோ⁴ ச ரதனமிஸ்ஸோ அனாமாஸோ. பானீயஸங்கோ² தோ⁴தோபி அதோ⁴தோபி ஆமாஸோவ ஸேஸஞ்ச அஞ்ஜனாதி³பே⁴ஸஜ்ஜத்தா²யபி ப⁴ண்ட³மூலத்தா²யபி ஸம்படிச்சி²தும் வட்டதி. ஸிலா தோ⁴தவித்³தா⁴ ரதனஸம்யுத்தா முக்³க³வண்ணாவ அனாமாஸா. ஸேஸா ஸத்த²கனிஸானாதி³அத்தா²ய க³ண்ஹிதும் வட்டதி. ஏத்த² ச ரதனஸம்யுத்தாதி ஸுவண்ணேன ஸத்³தி⁴ம் யோஜேத்வா பசித்வா கதாதி வத³ந்தி. பவாளம் தோ⁴தவித்³த⁴ம் அனாமாஸம். ஸேஸம் ஆமாஸம் ப⁴ண்ட³மூலத்த²ஞ்ச ஸம்படிச்சி²தும் வட்டதி. மஹாபச்சரியம் பன ‘‘தோ⁴தம்பி அதோ⁴தம்பி ஸப்³ப³ம் அனாமாஸம், ந ச ஸம்படிச்சி²தும் வட்டதீ’’தி வுத்தம்.

ரஜதம் ஜாதரூபஞ்ச கதப⁴ண்ட³ம்பி அகதப⁴ண்ட³ம்பி ஸப்³பே³ன ஸப்³ப³ம் பீ³ஜதோ பட்டா²ய அனாமாஸஞ்ச அஸம்படிச்சி²யஞ்ச, உத்தரராஜபுத்தோ கிர ஸுவண்ணசேதியம் காரேத்வா மஹாபது³மத்தே²ரஸ்ஸ பேஸேஸி. தே²ரோ ‘‘ந கப்பதீ’’தி படிக்கி²பி. சேதியக⁴ரே ஸுவண்ணபது³மஸுவண்ணபு³ப்³பு³ளகாதீ³னி ஹோந்தி, ஏதானிபி அனாமாஸானி. சேதியக⁴ரகோ³பகா பன ரூபியச²ட்³ட³கட்டா²னே டி²தா, தஸ்மா தேஸம் கேளாபயிதும் வட்டதீதி வுத்தம். குருந்தி³யம் பன தம் படிக்கி²த்தம். ஸுவண்ணசேதியே கசவரமேவ ஹரிதும் வட்டதீதி ஏத்தகமேவ அனுஞ்ஞாதம். ஆரகூடலோஹம்பி ஜாதரூபக³திகமேவ அனாமாஸந்தி ஸப்³ப³அட்ட²கதா²ஸு வுத்தம். ஸேனாஸனபரிபோ⁴கோ³ பன ஸப்³ப³கப்பியோ, தஸ்மா ஜாதரூபரஜதமயா ஸப்³பே³பி ஸேனாஸனபரிக்கா²ரா ஆமாஸா. பி⁴க்கூ²னம் த⁴ம்மவினயவண்ணனட்டா²னே ரதனமண்ட³பே கரோந்தி ப²லிகத்த²ம்பே⁴ ரதனதா³மபதிமண்டி³தே, தத்த² ஸப்³பூ³பகரணானி பி⁴க்கூ²னம் படிஜக்³கி³தும் வட்டதி.

லோஹிதங்கமஸாரக³ல்லா தோ⁴தவித்³தா⁴ அனாமாஸா, இதரே ஆமாஸா, ப⁴ண்ட³மூலத்தா²ய வட்டந்தீதி வுத்தா. மஹாபச்சரியம் பன ‘‘தோ⁴தாபி அதோ⁴தாபி ஸப்³ப³ஸோ அனாமாஸா ந ச ஸம்படிச்சி²தும் வட்டந்தீ’’தி வுத்தம்.

ஸப்³ப³ம் ஆவுத⁴ப⁴ண்ட³ம் அனாமாஸம், ப⁴ண்ட³மூலத்தா²ய தீ³ய்யமானம்பி ந ஸம்படிச்சி²தப்³ப³ம். ஸத்த²வணிஜ்ஜா நாம ந வட்டதி. ஸுத்³த⁴த⁴னுத³ண்டோ³பி த⁴னுஜியாபி பதோதோ³பி அங்குஸோபி அந்தமஸோ வாஸிப²ரஸுஆதீ³னிபி ஆவுத⁴ஸங்கே²பேன கதானி அனாமாஸானி. ஸசே கேனசி விஹாரே ஸத்தி வா தோமரோ வா ட²பிதோ ஹோதி, விஹாரம் ஜக்³க³ந்தேன ‘‘ஹரந்தூ’’தி ஸாமிகானம் பேஸேதப்³ப³ம். ஸசே ந ஹரந்தி, தம் அசாலேந்தேன விஹாரோ படிஜக்³கி³தப்³போ³. யுத்³த⁴பூ⁴மியம் பதிதம் அஸிம் வா ஸத்திம் வா தோமரம் வா தி³ஸ்வா பாஸாணேன வா கேனசி வா அஸிம் பி⁴ந்தி³த்வா ஸத்த²கத்தா²ய க³ஹேதும் வட்டதி, இதரானிபி வியோஜேத்வா கிஞ்சி ஸத்த²கத்தா²ய க³ஹேதும் வட்டதி கிஞ்சி கத்தரத³ண்டா³தி³அத்தா²ய. ‘‘இத³ம் க³ண்ஹதா²’’தி தீ³ய்யமானம் பன ‘‘வினாஸேத்வா கப்பியப⁴ண்ட³ம் கரிஸ்ஸாமீ’’தி ஸப்³ப³ம்பி ஸம்படிச்சி²தும் வட்டதி.

மச்ச²ஜாலபக்கி²ஜாலாதீ³னிபி ப²லகஜாலிகாதீ³னி ஸரபரித்தானானீபி ஸப்³பா³னி அனாமாஸானி. பரிபோ⁴க³த்தா²ய லப்³ப⁴மானேஸு பன ஜாலம் தாவ ‘‘ஆஸனஸ்ஸ வா சேதியஸ்ஸ வா உபரி ப³ந்தி⁴ஸ்ஸாமி, ச²த்தம் வா வேடே²ஸ்ஸாமீ’’தி க³ஹேதும் வட்டதி. ஸரபரித்தானம் ஸப்³ப³ம்பி ப⁴ண்ட³மூலத்தா²ய ஸம்படிச்சி²தும் வட்டதி. பரூபரோத⁴னிவாரணஞ்ஹி ஏதம் ந உபரோத⁴கரந்தி ப²லகம் த³ந்தகட்ட²பா⁴ஜனம் கரிஸ்ஸாமீதி க³ஹேதும் வட்டதி.

சம்மவினத்³தா⁴னி வீணாபே⁴ரிஆதீ³னி அனாமாஸானி. குருந்தி³யம் பன ‘‘பே⁴ரிஸங்கா⁴டோபி வீணாஸங்கா⁴டோபி துச்ச²போக்க²ரம்பி முக²வட்டியம் ஆரோபிதசம்மம்பி வீணாத³ண்ட³கோபி ஸப்³ப³ம் அனாமாஸ’’ந்தி வுத்தம். ஓனஹிதும் வா ஓனஹாபேதும் வா வாதே³தும் வா வாதா³பேதும் வா ந லப்³ப⁴தியேவ. சேதியங்க³ணே பூஜம் கத்வா மனுஸ்ஸேஹி ச²ட்³டி³தம் தி³ஸ்வாபி அசாலேத்வாவ அந்தரந்தரே ஸம்மஜ்ஜிதப்³ப³ம், கசவரச²ட்³ட³னகாலே பன கசவரனியாமேனேவ ஹரித்வா ஏகமந்தம் நிக்கி²பிதும் வட்டதீதி மஹாபச்சரியம் வுத்தம். ப⁴ண்ட³மூலத்தா²ய ஸம்படிச்சி²தும்பி வட்டதி. பரிபோ⁴க³த்தா²ய லப்³ப⁴மானேஸு பன வீணாதோ³ணிகஞ்ச பே⁴ரிபோக்க²ரஞ்ச த³ந்தகட்ட²பா⁴ஜனம் கரிஸ்ஸாம சம்மம் ஸத்த²ககோஸகந்தி ஏவம் தஸ்ஸ தஸ்ஸ பரிக்கா²ரஸ்ஸ உபகரணத்தா²ய க³ஹேத்வா ததா² ததா² காதும் வட்டதி.

புராணது³தியிகாவத்து² உத்தானமேவ. யக்கி²வத்து²ஸ்மிம் ஸசேபி பரனிம்மிதவஸவத்திதே³வியா காயஸம்ஸக்³க³ம் ஸமாபஜ்ஜதி து²ல்லச்சயமேவ. பண்ட³கவத்து² ச ஸுத்தித்தி²வத்து² ச பாகடமேவ. மதித்தி²வத்து²ஸ்மிம் பாராஜிகப்பஹோனககாலே து²ல்லச்சயம், ததோ பரம் து³க்கடம். திரச்சா²னக³தவத்து²ஸ்மிம் நாக³மாணவிகாயபி ஸுபண்ணமாணவிகாயபி கின்னரியாபி கா³வியாபி து³க்கடமேவ. தா³ருதீ⁴தலிகாவத்து²ஸ்மிம் ந கேவலம் தா³ருனா ஏவ, அந்தமஸோ சித்தகம்மலிகி²தேபி இத்தி²ரூபே து³க்கடமேவ.

282. ஸம்பீளனவத்து² உத்தானத்த²மேவ. ஸங்கமவத்து²ஸ்மிம் ஏகபதி³கஸங்கமோ வா ஹோது ஸகடமக்³க³ஸங்கமோ வா, சாலேஸ்ஸாமீதி பயோகே³ கதமத்தேவ சாலேது வா மா வா, து³க்கடம். மக்³க³வத்து² பாகடமேவ. ருக்க²வத்து²ஸ்மிம் ருக்கோ² மஹந்தோ வா ஹோது மஹாஜம்பு³ப்பமாணோ கு²த்³த³கோ வா, தம் சாலேதும் ஸக்கோது வா மா வா, பயோக³மத்தேன து³க்கடம். நாவாவத்து²ஸ்மிம்பி ஏஸேவ நயோ. ரஜ்ஜவத்து²ஸ்மிம் யம் ரஜ்ஜும் ஆவிஞ்ச²ந்தோ டா²னா சாலேதும் ஸக்கோதி, தத்த² து²ல்லச்சயம். யா மஹாரஜ்ஜு ஹோதி, ஈஸகம்பி டா²னா ந சலதி, தத்த² து³க்கடம். த³ண்டே³பி ஏஸேவ நயோ. பூ⁴மியம் பதிதமஹாருக்கோ²பி ஹி த³ண்ட³க்³க³ஹணேனேவ இத⁴ க³ஹிதோ. பத்தவத்து² பாகடமேவ. வந்த³னவத்து²ஸ்மிம் இத்தீ² பாதே³ ஸம்பா³ஹித்வா வந்தி³துகாமா வாரேதப்³பா³ பாதா³ வா படிச்சா²தே³தப்³பா³, நிச்சலேன வா ப⁴விதப்³ப³ம். நிச்சலஸ்ஸ ஹி சித்தேன ஸாதி³யதோபி அனாபத்தி. அவஸானே க³ஹணவத்து²பாகடமேவாதி.

காயஸம்ஸக்³க³ஸிக்கா²பத³வண்ணனா நிட்டி²தா.