2. து³தியபாராஜிகம்

து³தியம் அது³தியேன, யம் ஜினேன பகாஸிதம்;

பாராஜிகம் தஸ்ஸ தா³னி, பத்தோ ஸம்வண்ணனாக்கமோ.

யஸ்மா தஸ்மா ஸுவிஞ்ஞேய்யம், யம் புப்³பே³ ச பகாஸிதம்;

தம் ஸப்³ப³ம் வஜ்ஜயித்வான, ஹோதி ஸம்வண்ணனா அயம்.

த⁴னியவத்து²வண்ணனா

84. தேன ஸமயேன பு³த்³தோ⁴ ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தேதி தத்த² ராஜக³ஹேதி ஏவம்னாமகே நக³ரே, தஞ்ஹி மந்தா⁴து-மஹாகோ³விந்தா³தீ³ஹி பரிக்³க³ஹிதத்தா ‘‘ராஜக³ஹ’’ந்தி வுச்சதி. அஞ்ஞேபேத்த² பகாரே வண்ணயந்தி. கிம் தேஹி! நாமமேதம் தஸ்ஸ நக³ரஸ்ஸ. தம் பனேதம் பு³த்³த⁴காலே ச சக்கவத்திகாலே ச நக³ரம் ஹோதி. ஸேஸகாலே ஸுஞ்ஞம் ஹோதி யக்க²பரிக்³க³ஹிதம், தேஸம் வஸந்தவனம் ஹுத்வா திட்ட²தி. ஏவம் கோ³சரகா³மம் த³ஸ்ஸேத்வா நிவாஸனட்டா²னமாஹ – கி³ஜ்ஜ²கூடே பப்³ப³தேதி. ஸோ ச கி³ஜ்ஜா² தஸ்ஸ கூடேஸு வஸிம்ஸு, கி³ஜ்ஜ²ஸதி³ஸானி வா தஸ்ஸ கூடானி; தஸ்மா கி³ஜ்ஜ²கூடோதி வுச்சதீதி வேதி³தப்³போ³.

ஸம்ப³ஹுலாதி வினயபரியாயேன தயோ ஜனா ஸம்ப³ஹுலாதி வுச்சந்தி, ததோ பரம் ஸங்கோ⁴. ஸுத்தந்தபரியாயேன தயோ தயோ ஏவ, ததோ பட்டா²ய ஸம்ப³ஹுலா. இத⁴ பன தே ஸுத்தந்தபரியாயேன ஸம்ப³ஹுலாதி வேதி³தப்³பா³. ஸந்தி³ட்டா²தி நாதிவிஸ்ஸாஸிகா ந த³ள்ஹமித்தா; தத்த² தத்த² ஸங்க³ம்ம தி³ட்ட²த்தா ஹி தே ஸந்தி³ட்டா²தி வுச்சந்தி. ஸம்ப⁴த்தாதி அதிவிஸ்ஸாஸிகா த³ள்ஹமித்தா; தே ஹி ஸுட்டு² ப⁴த்தா ப⁴ஜமானா ஏகஸம்போ⁴க³பரிபோ⁴கா³தி கத்வா ‘‘ஸம்ப⁴த்தா’’தி வுச்சந்தி. இஸிகி³லிபஸ்ஸேதி இஸிகி³லி நாம பப்³ப³தோ, தஸ்ஸ பஸ்ஸே. புப்³பே³ கிர பஞ்சஸதமத்தா பச்சேகபு³த்³தா⁴ காஸிகோஸலாதீ³ஸு ஜனபதே³ஸு பிண்டா³ய சரித்வா பச்சா²ப⁴த்தம் தஸ்மிம் பப்³ப³தே ஸன்னிபதித்வா ஸமாபத்தியா வீதினாமேந்தி. மனுஸ்ஸா தே பவிஸந்தேவ பஸ்ஸந்தி ந நிக்க²மந்தே. ததோ ஆஹம்ஸு – ‘‘அயம் பப்³ப³தோ இமே இஸயோ கி³லதீ’’தி. தது³பாதா³ய தஸ்ஸ ‘‘இஸிகி³லி’’த்வேவ ஸமஞ்ஞா உத³பாதி³, தஸ்ஸ பஸ்ஸே பப்³ப³தபாதே³.

திணகுடியோ கரித்வாதி திணச்ச²த³னா ஸத்³வாரப³ந்தா⁴ குடியோ கத்வா. வஸ்ஸம் உபக³ச்ச²ந்தேன ஹி நாலகபடிபத³ம் படிபன்னேனாபி பஞ்சன்னம் ச²த³னானம் அஞ்ஞதரேன ச²ன்னேயேவ ஸத்³வாரப³ந்தே⁴ ஸேனாஸனே உபக³ந்தப்³ப³ம். வுத்தஞ்ஹேதம் – ‘‘ந, பி⁴க்க²வே, அஸேனாஸனிகேன வஸ்ஸம் உபக³ந்தப்³ப³ம். யோ உபக³ச்சே²ய்ய, ஆபத்தி து³க்கடஸ்ஸா’’தி (மஹாவ. 204). தஸ்மா வஸ்ஸகாலே ஸசே ஸேனாஸனம் லப⁴தி, இச்சேதம் குஸலம்; நோ சே லப⁴தி, ஹத்த²கம்மம் பரியேஸித்வாபி காதப்³ப³ம். ஹத்த²கம்மம் அலப⁴ந்தேன ஸாமம்பி காதப்³ப³ம். ந த்வேவ அஸேனாஸனிகேன வஸ்ஸம் உபக³ந்தப்³ப³ம். அயமனுத⁴ம்மதா. தஸ்மா தே பி⁴க்கூ² திணகுடியோ கரித்வா ரத்திட்டா²னதி³வாட்டா²னாதீ³னி பரிச்சி²ந்தி³த்வா கதிகவத்தானி ச க²ந்த⁴கவத்தானி ச அதி⁴ட்டா²ய தீஸு ஸிக்கா²ஸு ஸிக்க²மானா வஸ்ஸம் உபக³ச்சி²ம்ஸு.

ஆயஸ்மாபி த⁴னியோதி ந கேவலம் தே தே²ராவ இமஸ்ஸ ஸிக்கா²பத³ஸ்ஸ ஆதி³கம்மிகோ ஆயஸ்மா த⁴னியோபி. கும்ப⁴காரபுத்தோதி கும்ப⁴காரஸ்ஸ புத்தோ; தஸ்ஸ ஹி நாமம் த⁴னியோ, பிதா கும்ப⁴காரோ, தேன வுத்தம் – ‘‘த⁴னியோ கும்ப⁴காரபுத்தோ’’தி. வஸ்ஸம் உபக³ச்சீ²தி தேஹி தே²ரேஹி ஸத்³தி⁴ம் ஏகட்டா²னேயேவ திணகுடிகம் கரித்வா வஸ்ஸம் உபக³ச்சி². வஸ்ஸம்வுத்தா²தி புரிமிகாய உபக³தா மஹாபவாரணாய பவாரிதா பாடிபத³தி³வஸதோ பட்டா²ய ‘‘வுத்த²வஸ்ஸா’’தி வுச்சந்தி. ஏவம் வஸ்ஸம்வுத்தா² ஹுத்வா.

திணகுடியோ பி⁴ந்தி³த்வாதி ந த³ண்ட³முக்³க³ராதீ³ஹி சுண்ணவிசுண்ணம் கத்வா, வத்தஸீஸேன பன திணஞ்ச தா³ருவல்லி-ஆதீ³னி ச ஓரோபேத்வாதி அத்தோ². யேன ஹி விஹாரபச்சந்தே குடி கதா ஹோதி, தேன ஸசே ஆவாஸிகா பி⁴க்கூ² ஹோந்தி, தே ஆபுச்சி²தப்³பா³. ‘‘ஸசே இமம் குடிம் படிஜக்³கி³த்வா கோசி வஸிதும் உஸ்ஸஹதி, தஸ்ஸ தே³தா²’’தி வத்வா பக்கமிதப்³ப³ம். யேன அரஞ்ஞே வா கதா ஹோதி, படிஜக்³க³னகம் வா ந லப⁴தி, தேன ‘‘அஞ்ஞேஸம்பி பரிபோ⁴க³ம் ப⁴விஸ்ஸதீ’’தி படிஸாமேத்வா க³ந்தப்³ப³ம். தே பன பி⁴க்கூ² அரஞ்ஞே குடியோ கத்வா படிஜக்³க³னகம் அலப⁴ந்தா திணஞ்ச கட்ட²ஞ்ச படிஸாமேத்வா ஸங்கோ³பேத்வாதி அத்தோ². யதா² ச ட²பிதம் தம் உபசிகாஹி ந க²ஜ்ஜதி, அனோவஸ்ஸகஞ்ச ஹோதி, ததா² ட²பேத்வா ‘‘இத³ம் டா²னம் ஆக³ந்த்வா வஸிதுகாமானம் ஸப்³ரஹ்மசாரீனம் உபகாராய ப⁴விஸ்ஸதீ’’தி க³மியவத்தம் பூரேத்வா.

ஜனபத³சாரிகம் பக்கமிம்ஸூதி அத்தனோ அத்தனோ சித்தானுகூலம் ஜனபத³ம் அக³மம்ஸு. ஆயஸ்மா பன த⁴னியோ கும்ப⁴காரபுத்தோ தத்தே²வ வஸ்ஸம் வஸீதிஆதி³ உத்தானத்த²மேவ. யாவததியகந்தி யாவததியவாரம். அனவயோதி அனுஅவயோ, ஸந்தி⁴வஸேன உகாரலோபோ. அனு அனு அவயோ, யம் யம் கும்ப⁴காரேஹி கத்தப்³ப³ம் நாம அத்தி², ஸப்³ப³த்த² அனூனோ பரிபுண்ணஸிப்போதி அத்தோ². ஸகேதி அத்தனோ ஸந்தகே. ஆசரியகேதி ஆசரியகம்மே. கும்ப⁴காரகம்மேதி கும்ப⁴காரானம் கம்மே; கும்ப⁴காரேஹி கத்தப்³ப³கம்மேதி அத்தோ². ஏதேன ஸகம் ஆசரியகம் ஸரூபதோ த³ஸ்ஸிதம் ஹோதி. பரியோதா³தஸிப்போதி பரிஸுத்³த⁴ஸிப்போ. அனவயத்தேபி ஸதி அஞ்ஞேஹி அஸதி³ஸஸிப்போதி வுத்தம் ஹோதி.

ஸப்³ப³மத்திகாமயந்தி பிட்ட²ஸங்கா⁴டககவாடஸூசிக⁴டிகவாதபானகவாடமத்தம் ட²பேத்வா அவஸேஸம் பி⁴த்திச²த³னிட்ட²கத²ம்பா⁴தி³பே⁴த³ம் ஸப்³ப³ம் கே³ஹஸம்பா⁴ரம் மத்திகாமயமேவ கத்வாதி அத்தோ². திணஞ்ச கட்ட²ஞ்ச கோ³மயஞ்ச ஸங்கட்³டி⁴த்வா தம் குடிகம் பசீதி தம் ஸப்³ப³மத்திகாமயம் கத்வா பாணிகாய க⁴ம்ஸித்வா ஸுக்கா²பேத்வா தேலதம்ப³மத்திகாய பரிமஜ்ஜித்வா அந்தோ ச ப³ஹி ச திணாதீ³ஹி பூரேத்வா யதா² பக்கா ஸுபக்கா ஹோதி, ஏவம் பசி. ஏவம் பக்கா ச பன ஸா அஹோஸி குடிகா. அபி⁴ரூபாதி ஸுரூபா. பாஸாதி³காதி பஸாத³ஜனிகா. லோஹிதிகாதி லோஹிதவண்ணா. கிங்கணிகஸத்³தோ³தி கிங்கணிகஜாலஸ்ஸ ஸத்³தோ³. யதா² கிர நானாரதனேஹி கதஸ்ஸ கிங்கணிகஜாலஸ்ஸ ஸத்³தோ³ ஹோதி, ஏவம் தஸ்ஸா குடிகாய வாதபானந்தரிகாதீ³ஹி பவிட்டே²ன வாதேன ஸமாஹதாய ஸத்³தோ³ அஹோஸி. ஏதேனஸ்ஸா அந்தோ ச ப³ஹி ச ஸுபக்கபா⁴வோ த³ஸ்ஸிதோ ஹோதி. மஹாஅட்ட²கதா²யம் பன ‘‘கிங்கணிகா’’தி கம்ஸபா⁴ஜனம், தஸ்மா யதா² அபி⁴ஹதஸ்ஸ கம்ஸபா⁴ஜனஸ்ஸ ஸத்³தோ³, ஏவமஸ்ஸா வாதப்பஹதாய ஸத்³தோ³ அஹோஸீ’’தி வுத்தம்.

85. கிம் ஏதம், பி⁴க்க²வேதி ஏத்த² ஜானந்தோவ ப⁴க³வா கதா²ஸமுட்டா²பனத்த²ம் புச்சி². ப⁴க³வதோ ஏதமத்த²ம் ஆரோசேஸுந்தி ஸப்³ப³மத்திகாமயாய குடிகாய கரணபா⁴வம் ஆதி³தோ பட்டா²ய ப⁴க³வதோ ஆரோசேஸும். கத²ஞ்ஹி நாம ஸோ, பி⁴க்க²வே…பே… குடிகம் கரிஸ்ஸதீதி இத³ம் அதீதத்தே² அனாக³தவசனம்; அகாஸீதி வுத்தம் ஹோதி. தஸ்ஸ லக்க²ணம் ஸத்³த³ஸத்த²தோ பரியேஸிதப்³ப³ம். ந ஹி நாம, பி⁴க்க²வே, தஸ்ஸ மோக⁴புரிஸஸ்ஸ பாணேஸு அனுத்³த³யா அனுகம்பா அவிஹேஸா ப⁴விஸ்ஸதீதி ஏத்த² அனுத்³த³யாதி அனுரக்க²ணா; ஏதேன மேத்தாபுப்³ப³பா⁴க³ம் த³ஸ்ஸேதி. அனுகம்பாதி பரது³க்கே²ன சித்தகம்பனா. அவிஹேஸாதி அவிஹிம்ஸனா; ஏதேஹி கருணாபுப்³ப³பா⁴க³ம் த³ஸ்ஸேதி. இத³ம் வுத்தம் ஹோதி – ‘‘பி⁴க்க²வே, தஸ்ஸ மோக⁴புரிஸஸ்ஸ பத²வீக²ணனசிக்க²ல்லமத்³த³னஅக்³கி³தா³னேஸு ப³ஹூ கு²த்³தா³னுகு²த்³த³கே பாணே ப்³யாபா³தே⁴ந்தஸ்ஸ வினாஸேந்தஸ்ஸ தேஸு பாணேஸு மேத்தாகருணானம் புப்³ப³பா⁴க³மத்தாபி அனுத்³த³யா அனுகம்பா அவிஹேஸா ந ஹி நாம ப⁴விஸ்ஸதி அப்பமத்தகாபி நாம ந ப⁴விஸ்ஸதீ’’தி. மா பச்சி²மா ஜனதா பாணேஸு பாதப்³யதம் ஆபஜ்ஜீதி பச்சி²மோ ஜனஸமூஹோ பாணேஸு பாதப்³யபா⁴வம் மா ஆபஜ்ஜி. ‘‘பு³த்³த⁴காலேபி பி⁴க்கூ²ஹி ஏவம் கதம், ஈதி³ஸேஸு டா²னேஸு பாணாதிபாதம் கரோந்தானம் நத்தி² தோ³ஸோ’’தி மஞ்ஞித்வா இமஸ்ஸ தி³ட்டா²னுக³திம் ஆபஜ்ஜமானா பச்சி²மா ஜனதா மா பாணேஸு பாதப்³யே க⁴ம்ஸிதப்³பே³ ஏவம் மஞ்ஞீதி வுத்தம் ஹோதி.

ஏவம் த⁴னியம் க³ரஹித்வா ந ச, பி⁴க்க²வே, ஸப்³ப³மத்திகாமயா குடிகா காதப்³பா³தி ஆயதிம் தாதி³ஸாய குடிகாய கரணம் படிக்கி²பி; படிக்கி²பித்வா ச ‘‘யோ கரேய்ய ஆபத்தி து³க்கடஸ்ஸா’’தி ஸப்³ப³மத்திகாமயகுடிகாகரணே ஆபத்திம் ட²பேஸி. தஸ்மா யோபி பத²வீக²ணனாதி³னா பாணேஸு பாதப்³யதம் அனாபஜ்ஜந்தோ தாதி³ஸம் குடிகம் கரோதி, ஸோபி து³க்கடம் ஆபஜ்ஜதி. பத²வீக²ணனாதீ³ஹி பன பாணேஸு பாதப்³யதம் ஆபஜ்ஜந்தோ யம் யம் வத்து²ம் வீதிக்கமதி, தத்த² தத்த² வுத்தமேவ ஆபத்திம் ஆபஜ்ஜதி. த⁴னியத்தே²ரஸ்ஸ ஆதி³கம்மிகத்தா அனாபத்தி. ஸேஸானம் ஸிக்கா²பத³ம் அதிக்கமித்வா கரோந்தானம்பி கதம் லபி⁴த்வா தத்த² வஸந்தானம்பி து³க்கடமேவ. த³ப்³ப³ஸம்பா⁴ரமிஸ்ஸகா பன யதா² வா ததா² வா மிஸ்ஸா ஹோது, வட்டதி. ஸுத்³த⁴மத்திகாமயாவ ந வட்டதி. ஸாபி இட்ட²காஹி கி³ஞ்ஜகாவஸத²ஸங்கே²பேன கதா வட்டதி. ஏவம் ப⁴ந்தேதி கோ²…பே… தம் குடிம் பி⁴ந்தி³ம்ஸூதி ப⁴க³வதோ வசனம் ஸம்படிச்சி²த்வா கட்டே²ஹி ச பாஸாணேஹி ச தம் குடிகம் விகிரந்தா பி⁴ந்தி³ம்ஸு.

அத² கோ² ஆயஸ்மா த⁴னியோதிஆதி³ம்ஹி அயம் ஸங்கே²பத்தோ² – த⁴னியோ ஏகபஸ்ஸே தி³வாவிஹாரம் நிஸின்னோ தேன ஸத்³தே³ன ஆக³ந்த்வா தே பி⁴க்கூ² ‘‘கிஸ்ஸ மே தும்ஹே, ஆவுஸோ, குடிம் பி⁴ந்த³தா²’’தி புச்சி²த்வா ‘‘ப⁴க³வா பே⁴தா³பேதீ’’தி ஸுத்வா ஸுப்³ப³சதாய ஸம்படிச்சி².

கஸ்மா பன ப⁴க³வா இமினா அதிமஹந்தேன உஸ்ஸாஹேன அத்தனோ வஸனத்த²ம் கதம் குடிகம் பே⁴தா³பேஸி, நனு ஏதஸ்ஸேத்த² வயகம்மம்பி அத்தீ²தி? கிஞ்சாபி அத்தி², அத² கோ² நம் ப⁴க³வா அகப்பியாதி பி⁴ந்தா³பேஸி, தித்தி²யத⁴ஜோதி பி⁴ந்தா³பேஸி. அயமேத்த² வினிச்ச²யோ. அட்ட²கதா²யம் பன அஞ்ஞானிபி காரணானி வுத்தானி – ஸத்தானுத்³த³யாய, பத்தசீவரகு³த்தத்தா²ய, ஸேனாஸனபா³ஹுல்லபஅஸேத⁴னாயாதிஆதீ³னி. தஸ்மா இதா³னிபி யோ பி⁴க்கு² ப³ஹுஸ்ஸுதோ வினயஞ்ஞூ அஞ்ஞம் பி⁴க்கு²ம் அகப்பியம் பரிக்கா²ரம் க³ஹேத்வா விசரந்தம் தி³ஸ்வா தம் சி²ந்தா³பேய்ய வா பி⁴ந்தா³பேய்ய வா அனுபவஜ்ஜோ, ஸோ நேவ சோதே³தப்³போ³ ந ஸாரேதப்³போ³; ந தம் லப்³பா⁴ வத்தும் ‘‘மம பரிக்கா²ரோ தயா நாஸிதோ, தம் மே தே³ஹீ’’தி.

பாளிமுத்தகவினிச்ச²யோ

தத்ராயம் பாளிமுத்தகோ கப்பியாகப்பியபரிக்கா²ரவினிச்ச²யோ – கேசி தாலபண்ணச்ச²த்தம் அந்தோ வா ப³ஹி வா பஞ்சவண்ணேன ஸுத்தேன ஸிப்³ப³ந்தா வண்ணமட்ட²ம் கரோந்தி, தம் ந வட்டதி. ஏகவண்ணேன பன நீலேன வா பீதகேன வா யேன கேனசி ஸுத்தேன அந்தோ வா ப³ஹி வா ஸிப்³பி³தும் ச²த்தத³ண்ட³க்³கா³ஹகம் ஸலாகபஞ்ஜரம் வா வினந்தி⁴தும் வட்டதி. தஞ்ச கோ² தி²ரகரணத்த²ம், ந வண்ணமட்ட²த்தா²ய. ச²த்தபண்ணகேஸு மகரத³ந்தகம் வா அட்³ட⁴சந்த³கம் வா சி²ந்தி³தும் ந வட்டதி. ச²த்தத³ண்டே³ கே³ஹத²ம்பே⁴ஸு விய க⁴டகோ வா வாளரூபகம் வா ந வட்டதி. ஸசேபி ஸப்³ப³த்த² ஆரக்³கே³ன லேகா² தி³ன்னா ஹோதி, ஸாபி ந வட்டதி. க⁴டகம்பி வாளரூபம்பி பி⁴ந்தி³த்வா தா⁴ரேதப்³ப³ம். லேகா²பி க⁴ம்ஸித்வா வா அபனேதப்³பா³, ஸுத்தகேன வா த³ண்டோ³ வேடே²தப்³போ³. த³ண்ட³பு³ந்தே³ பன அஹிச்ச²த்தகஸண்டா²னம் வட்டதி. வாதப்பஹாரேன அசலனத்த²ம் ச²த்தமண்ட³லிகம் ரஜ்ஜுகேஹி கா³ஹேத்வா த³ண்டே³ ப³ந்த⁴ந்தி, தஸ்மிம் ப³ந்த⁴னட்டா²னே வலயமிவ உக்கிரித்வா லேக²ம் ட²பேந்தி, ஸா வட்டதி.

சீவரமண்ட³னத்தா²ய நானாஸுத்தகேஹி ஸதபதீ³ஸதி³ஸம் ஸிப்³ப³ந்தா ஆக³ந்துகபட்டம் ட²பேந்தி, அஞ்ஞம்பி யம்கிஞ்சி ஸூசிகம்மவிகாரம் கரோந்தி, பட்டமுகே² வா பரியந்தே வா வேணிம் வா ஸங்க²லிகம் வா, ஏவமாதி³ ஸப்³ப³ம் ந வட்டதி, பகதிஸூசிகம்மமேவ வட்டதி. க³ண்டி²கபட்டகஞ்ச பாஸகபட்டஞ்ச அட்ட²கோணம்பி ஸோளஸகோணம்பி கரோந்தி, தத்த² அக்³கி⁴யக³யமுக்³க³ராதீ³னி த³ஸ்ஸேந்தி, கக்கடக்கீ²னி உக்கிரந்தி, ஸப்³ப³ம் ந வட்டதி, சதுகோணமேவ வட்டதி. கோணஸுத்தபிளகா ச சீவரே ரத்தே து³விஞ்ஞேய்யரூபா வட்டந்தி. கஞ்ஜிகபிட்ட²க²லிஆதீ³ஸு சீவரம் பக்கி²பிதும் ந வட்டதி. சீவரகம்மகாலே பன ஹத்த²மலஸூசிமலாதீ³னம் தோ⁴வனத்த²ம் கிலிட்ட²காலே ச தோ⁴வனத்த²ம் வட்டதி. க³ந்த⁴ம் வா லாக²ம் வா தேலம் வா ரஜனே பக்கி²பிதும் ந வட்டதி.

சீவரம் ரஜித்வா ஸங்கே²ன வா மணினா வா யேன கேனசி ந க⁴ட்டேதப்³ப³ம். பூ⁴மியம் ஜாணுகானி நிஹந்த்வா ஹத்தே²ஹி க³ஹேத்வா தோ³ணியம்பி ந க⁴ம்ஸிதப்³ப³ம். தோ³ணியம் வா ப²லகே வா ட²பேத்வா அந்தே கா³ஹாபேத்வா ஹத்தே²ஹி பஹரிதும் பன வட்டதி; தம்பி முட்டி²னா ந காதப்³ப³ம். போராணகத்தே²ரா பன தோ³ணியம்பி ந ட²பேஸும். ஏகோ க³ஹேத்வா திட்ட²தி; அபரோ ஹத்தே² கத்வா ஹத்தே²ன பஹரதி. சீவரஸ்ஸ கண்ணஸுத்தகம் ந வட்டதி, ரஜிதகாலே சி²ந்தி³தப்³ப³ம். யம் பன ‘‘அனுஜானாமி, பி⁴க்க²வே, கண்ணஸுத்தக’’ந்தி (மஹாவ. 344) ஏவம் அனுஞ்ஞாதம், தம் அனுவாதே பாஸகம் கத்வா ப³ந்தி⁴தப்³ப³ம் ரஜனகாலே லக்³க³னத்தா²ய. க³ண்டி²கேபி ஸோபா⁴கரணத்த²ம் லேகா² வா பிளகா வா ந வட்டதி, நாஸேத்வா பரிபு⁴ஞ்ஜிதப்³ப³ம்.

பத்தே வா தா²லகே வா ஆரக்³கே³ன லேக²ம் கரோந்தி, அந்தோ வா ப³ஹி வா ந வட்டதி. பத்தம் ப⁴மம் ஆரோபேத்வா மஜ்ஜித்வா பசந்தி – ‘‘மணிவண்ணம் கரிஸ்ஸாமா’’தி, ந வட்டதி; தேலவண்ணோ பன வட்டதி. பத்தமண்ட³லே பி⁴த்திகம்மம் ந வட்டதி, மகரத³ந்தகம் பன வட்டதி.

த⁴மகரணச²த்தகஸ்ஸ உபரி வா ஹேட்டா² வா த⁴மகரணகுச்சி²யம் வா லேகா² ந வட்டதி, ச²த்தமுக²வட்டியம் பனஸ்ஸ லேகா² வட்டதி.

காயப³ந்த⁴னஸ்ஸ ஸோப⁴னத்த²ம் தஹிம் தஹிம் தி³கு³ணம் ஸுத்தம் கோட்டேந்தி, கக்கடச்சீ²னி உட்ட²பேந்தி, ந வட்டதி. உபோ⁴ஸு பன அந்தேஸு த³ஸாமுக²ஸ்ஸ தி²ரபா⁴வாய தி³கு³ணம் கோட்டேதும் வட்டதி. த³ஸாமுகே² பன க⁴டகம் வா மகரமுக²ம் வா தே³ட்³டு³ப⁴ஸீஸம் வா யம்கிஞ்சி விகாரரூபம் காதும் ந வட்டதி. தத்த² தத்த² அச்சீ²னி த³ஸ்ஸேத்வா மாலாகம்மலதாகம்மாதீ³னி வா கத்வா கோட்டிதகாயப³ந்த⁴னம்பி ந வட்டதி. உஜுகமேவ பன மச்ச²கண்டகம் வா க²ஜ்ஜுரிபத்தகம் வா மட்ட²பட்டிகம் வா கத்வா கோட்டிதும் வட்டதி. காயப³ந்த⁴னஸ்ஸ த³ஸா ஏகா வட்டதி, த்³வே தீணி சத்தாரிபி வட்டந்தி; ததோ பரம் ந வட்டந்தி. ரஜ்ஜுககாயப³ந்த⁴னம் ஏகமேவ வட்டதி. பாமங்க³ஸண்டா²னம் பன ஏகம்பி ந வட்டதி. த³ஸா பன பாமங்க³ஸண்டா²னாபி வட்டதி. ப³ஹுரஜ்ஜுகே ஏகதோ கத்வா ஏகேன நிரந்தரம் வேடே²த்வா கதம் ப³ஹுரஜ்ஜுகந்தி ந வத்தப்³ப³ம், தம் வட்டதி.

காயப³ந்த⁴னவிதே⁴ அட்ட²மங்க³லாதி³கம் யம்கிஞ்சி விகாரரூபம் ந வட்டதி, பரிச்சே²த³லேகா²மத்தம் வட்டதி. வித⁴கஸ்ஸ உபோ⁴ஸு அந்தேஸு தி²ரகரணத்தா²ய க⁴டகம் கரோந்தி, அயம்பி வட்டதி.

அஞ்ஜனியம் இத்தி²புரிஸசதுப்பத³ஸகுணரூபம் வா மாலாகம்ம-லதாகம்மமகரத³ந்தக-கோ³முத்தகஅட்³ட⁴சந்த³காதி³பே⁴த³ம் வா விகாரரூபம் ந வட்டதி. க⁴ம்ஸித்வா வா சி²ந்தி³த்வா வா யதா² வா ந பஞ்ஞாயதி, ததா² ஸுத்தேன வேடே²த்வா வளஞ்ஜேதப்³பா³. உஜுகமேவ பன சதுரம்ஸா வா அட்ட²ம்ஸா வா ஸோளஸம்ஸா வா அஞ்ஜனீ வட்டதி. ஹேட்ட²தோ பிஸ்ஸா த்³வே வா திஸ்ஸோ வா வட்டலேகா²யோ வட்டந்தி. கீ³வாயம்பிஸ்ஸா பிதா⁴னகப³ந்த⁴னத்த²ம் ஏகா வட்டலேகா² வட்டதி.

அஞ்ஜனிஸலாகாயபி வண்ணமட்ட²கம்மம் ந வட்டதி. அஞ்ஜனித்த²விகாயம்பி யம்கிஞ்சி நானாவண்ணேன ஸுத்தேன வண்ணமட்ட²கம்மம் ந வட்டதி. ஏஸேவ நயோ குஞ்சிகாகோஸகேபி. குஞ்சிகாய வண்ணமட்ட²கம்மம் ந வட்டதி, ததா² ஸிபாடிகாயம். ஏகவண்ணஸுத்தேன பனேத்த² யேன கேனசி ஸிப்³பி³தும் வட்டதி.

ஆரகண்டகேபி வட்டமணிகம் வா அஞ்ஞம் வா வண்ணமட்ட²ம் ந வட்டதி. கீ³வாயம் பன பரிச்சே²த³லேகா² வட்டதி. பிப்ப²லிகேபி மணிகம் வா பிளகம் வா யம்கிஞ்சி உட்ட²பேதும் ந வட்டதி. த³ண்ட³கே பன பரிச்சே²த³லேகா² வட்டதி. நக²ச்சே²த³னம் வலிதகம்யேவ கரோந்தி, தஸ்மா தம் வட்டதி. உத்தராரணியம் வா அத⁴ராரணியம் வா அரணித⁴னுகே வா உபரிபேல்லனத³ண்ட³கே வா மாலாகம்மாதி³கம் யம்கிஞ்சி வண்ணமட்ட²ம் ந வட்டதி, பேல்லனத³ண்ட³கஸ்ஸ பன வேமஜ்ஜே² மண்ட³லம் ஹோதி, தத்த² பரிச்சே²த³லேகா²மத்தம் வட்டதி. ஸூசிஸண்டா³ஸம் கரோந்தி, யேன ஸூசிம் ட³ம்ஸாபேத்வா க⁴ம்ஸந்தி, தத்த² மகரமுகா²தி³கம் யம்கிஞ்சி வண்ணமட்ட²ம் ந வட்டதி, ஸூசிட³ம்ஸனத்த²ம் பன முக²மத்தம் ஹோதி, தம் வட்டதி.

த³ந்தகட்ட²ச்சே²த³னவாஸியம்பி யம்கிஞ்சி வண்ணமட்ட²ம் ந வட்டதி, உஜுகமேவ கப்பியலோஹேன உபோ⁴ஸு வா பஸ்ஸேஸு சதுரம்ஸம் வா அட்ட²ம்ஸம் வா ப³ந்தி⁴தும் வட்டதி. கத்தரத³ண்டே³பி யம்கிஞ்சி வண்ணமட்ட²ம் ந வட்டதி, ஹேட்டா² ஏகா வா த்³வே வா வட்டலேகா² உபரி அஹிச்ச²த்தகமகுளமத்தஞ்ச வட்டதி.

தேலபா⁴ஜனேஸு விஸாணே வா நாளியம் வா அலாபு³கே வா ஆமண்ட³ஸாரகே வா ட²பேத்வா இத்தி²ரூபம் புரிஸரூபஞ்ச அவஸேஸம் ஸப்³ப³ம்பி வண்ணமட்ட²கம்மம் வட்டதி.

மஞ்சபீடே² பி⁴ஸிபி³ம்போ³ஹனே பூ⁴மத்த²ரணே பாத³புஞ்ச²னே சங்கமனபி⁴ஸியா ஸம்முஞ்ஜனியம் கசவரச²ட்³ட³னகே ரஜனதோ³ணிகாய பானீயஉளுங்கே பானீயக⁴டே பாத³கத²லிகாய ப²லகபீட²கே வலயாதா⁴ரகே த³ண்டா³தா⁴ரகேபத்தபிதா⁴னே தாலவண்டே வீஜனேதி – ஏதேஸு ஸப்³ப³ம் மாலாகம்மாதி³வண்ணமட்ட²கம்மம் வட்டதி. ஸேனாஸனே பன த்³வாரகவாடவாதபானகவாடாதீ³ஸு ஸப்³ப³ரதனமயம்பி வண்ணமட்ட²கம்மம் வட்டதி.

ஸேனாஸனே கிஞ்சி படிஸேதே⁴தப்³ப³ம் நத்தி², அஞ்ஞத்ர விருத்³த⁴ஸேனாஸனா. விருத்³த⁴ஸேனாஸனம் நாம அஞ்ஞேஸம் ஸீமாய ராஜவல்லபே⁴ஹி கதஸேனாஸனம் வுச்சதி, தஸ்மா யே தாதி³ஸம் ஸேனாஸனம் கரோந்தி, தே வத்தப்³பா³ – ‘‘மா அம்ஹாகம் ஸீமாய ஸேனாஸனம் கரோதா²’’தி. அனாதி³யித்வா கரோந்தியேவ, புனபி வத்தப்³பா³ – ‘‘மா ஏவம் அகத்த², மா அம்ஹாகம் உபோஸத²பவாரணானம் அந்தராயமகத்த², மா ஸாமக்³கி³ம் பி⁴ந்தி³த்த², தும்ஹாகம் ஸேனாஸனம் கதம்பி கதட்டா²னே ந ட²ஸ்ஸதீ’’தி. ஸசே ப³லக்காரேன கரோந்தியேவ, யதா³ தேஸம் லஜ்ஜிபரிஸா உஸ்ஸன்னா ஹோதி, ஸக்கா ச ஹோதி லத்³து⁴ம் த⁴ம்மிகோ வினிச்ச²யோ, ததா³ தேஸம் பேஸேதப்³ப³ம் – ‘‘தும்ஹாகம் ஆவாஸம் ஹரதா²’’தி. ஸசே யாவ ததியம் பேஸிதே ஹரந்தி, ஸாது⁴; நோ சே ஹரந்தி, ட²பேத்வா போ³தி⁴ஞ்ச சேதியஞ்ச அவஸேஸஸேனாஸனானி பி⁴ந்தி³தப்³பா³னி, நோ ச கோ² அபரிபோ⁴க³ம் கரோந்தேஹி, படிபாடியா பன ச²த³ன-கோ³பானஸீ-இட்ட²காதீ³னி அபனேத்வா தேஸம் பேஸேதப்³ப³ம் – ‘‘தும்ஹாகம் த³ப்³ப³ஸம்பா⁴ரே ஹரதா²’’தி. ஸசே ஹரந்தி, ஸாது⁴; நோ சே ஹரந்தி, அத² தேஸு த³ப்³ப³ஸம்பா⁴ரேஸு ஹிமவஸ்ஸவாதாதபாதீ³ஹி பூதிபூ⁴தேஸு வா சோரேஹி வா ஹடேஸு அக்³கி³னா வா த³ட்³டே⁴ஸு ஸீமஸாமிகா பி⁴க்கூ² அனுபவஜ்ஜா, ந லப்³பா⁴ சோதே³தும் ‘‘தும்ஹேஹி அம்ஹாகம் த³ப்³ப³ஸம்பா⁴ரா நாஸிதா’’தி வா ‘‘தும்ஹாகம் கீ³வா’’தி வா. யம் பன ஸீமஸாமிகேஹி பி⁴க்கூ²ஹி கதம், தம் ஸுகதமேவ ஹோதீதி.

பாளிமுத்தகவினிச்ச²யோ நிட்டி²தோ.

86. ஏவம் பி⁴ன்னாய பன குடிகாய த⁴னியஸ்ஸ பரிவிதக்கஞ்ச புன குடிகரணத்தா²ய உஸ்ஸாஹஞ்ச த³ஸ்ஸேதும் ‘‘அத² கோ² ஆயஸ்மதோ’’திஆதி³ வுத்தம். தத்த² தா³ருக³ஹே க³ணகோதி ரஞ்ஞோ தா³ருப⁴ண்டா³கா³ரே தா³ருகோ³பகோ. தே³வக³ஹதா³ரூனீதி தே³வேன க³ஹிததா³ரூனி. ராஜபடிக்³க³ஹிதபூ⁴தானி தா³ரூனீதி அத்தோ². நக³ரபடிஸங்கா²ரிகானீதி நக³ரஸ்ஸ படிஸங்கா²ரூபகரணானி. ஆபத³த்தா²ய நிக்கி²த்தானீதி அக்³கி³தா³ஹேன வா புராணபா⁴வேன வா படிராஜூபருந்த⁴னாதி³னா வா கோ³புரட்டாலகராஜந்தேபுரஹத்தி²ஸாலாதீ³னம் விபத்தி ஆபதா³தி வுச்சதி. தத³த்த²ம் நிக்கி²த்தானீதி வுத்தம் ஹோதி. க²ண்டா³க²ண்டி³கம் சே²தா³பேத்வாதி அத்தனோ குடியா பமாணம் ஸல்லக்கே²த்வா கிஞ்சி அக்³கே³ கிஞ்சி மஜ்ஜே² கிஞ்சி மூலே க²ண்டா³க²ண்ட³ம் கரோந்தோ சே²தா³பேஸி.

87. வஸ்ஸகாரோதி தஸ்ஸ ப்³ராஹ்மணஸ்ஸ நாமம். மக³த⁴மஹாமத்தோதி மக³த⁴ரட்டே² மஹாமத்தோ, மஹதியா இஸ்ஸரியமத்தாய ஸமன்னாக³தோ, மக³த⁴ரஞ்ஞோ வா மஹாமத்தோ; மஹாஅமச்சோதி வுத்தம் ஹோதி. அனுஸஞ்ஞாயமானோதி தத்த² தத்த² க³ந்த்வா பச்சவேக்க²மானோ. ப⁴ணேதி இஸ்ஸரானம் நீசட்டா²னிகபுரிஸாலபனம். ப³ந்த⁴ம் ஆணாபேஸீதி ப்³ராஹ்மணோ பகதியாபி தஸ்மிம் இஸ்ஸாபகதோவ. ஸோ ரஞ்ஞோ ‘‘ஆணாபேஹீ’’தி வசனம் ஸுத்வா யஸ்மா ‘‘பக்கோஸாபேஹீ’’தி ரஞ்ஞோ ந வுத்தம், தஸ்மா ‘‘நம் ஹத்தே²ஸு ச பாதே³ஸு ச ப³ந்த⁴ம் கத்வா ஆணாபேஸ்ஸாமீ’’தி ப³ந்த⁴ம் ஆணாபேஸி. அத்³த³ஸ கோ² ஆயஸ்மா த⁴னியோதி கத²ம் அத்³த³ஸ? ஸோ கிர அத்தனா லேஸேன தா³ரூனம் ஹடபா⁴வம் ஞத்வா ‘‘நிஸ்ஸம்ஸயம் ஏஸ தா³ரூனம் காரணா ராஜகுலதோ வத⁴ம் வா ப³ந்த⁴ம் வா பாபுணிஸ்ஸதி, ததா³ நம் அஹமேவ மோசேஸ்ஸாமீ’’தி நிச்சகாலம் தஸ்ஸ பவத்திம் ஸுணந்தோயேவ விசரதி. தஸ்மா தக²ணஞ்ஞேவ க³ந்த்வா அத்³த³ஸ. தேன வுத்தம் – ‘‘அத்³த³ஸ கோ² ஆயஸ்மா த⁴னியோ’’தி. தா³ரூனம் கிச்சாதி தா³ரூனம் காரணா. புராஹம் ஹஞ்ஞாமீதி அஹம் புரா ஹஞ்ஞாமி; யாவ அஹம் ந ஹஞ்ஞாமி, தாவ த்வம் ஏய்யாஸீதி அத்தோ².

88. இங்க⁴, ப⁴ந்தே, ஸராபேஹீதி ஏத்த² இங்கா⁴தி சோத³னத்தே² நிபாதோ. பட²மாபி⁴ஸித்தோதி அபி⁴ஸித்தோ ஹுத்வா பட²மம். ஏவரூபிம் வாசம் பா⁴ஸிதாதி ‘‘தி³ன்னஞ்ஞேவ ஸமணப்³ராஹ்மணானம் திணகட்டோ²த³கம் பரிபு⁴ஞ்ஜந்தூ’’தி இமம் ஏவரூபிம் வாசம் அபி⁴ஸித்தோ ஹுத்வா பட²மமேவ யம் த்வம் அபா⁴ஸி, தம் ஸயமேவ பா⁴ஸித்வா இதா³னி ஸரஸி, ந ஸரஸீதி வுத்தம் ஹோதி. ராஜானோ கிர அபி⁴ஸித்தமத்தாயேவ த⁴ம்மபே⁴ரிம் சராபேந்தி – ‘‘தி³ன்னஞ்ஞேவ ஸமணப்³ராஹ்மணானம் திணகட்டோ²த³கம் பரிபு⁴ஞ்ஜந்தூ’’தி தம் ஸந்தா⁴ய ஏஸ வத³தி. தேஸம் மயா ஸந்தா⁴ய பா⁴ஸிதந்தி தேஸம் அப்பமத்தகேபி குக்குச்சாயந்தானம் ஸமிதபா³ஹிதபாபானம் ஸமணப்³ராஹ்மணானம் திணகட்டோ²த³கஹரணம் ஸந்தா⁴ய மயா ஏதம் பா⁴ஸிதம்; ந தும்ஹாதி³ஸானந்தி அதி⁴ப்பாயோ. தஞ்ச கோ² அரஞ்ஞே அபரிக்³க³ஹிதந்தி தஞ்ச திணகட்டோ²த³கம் யம் அரஞ்ஞே அபரிக்³க³ஹிதம் ஹோதி; ஏதம் ஸந்தா⁴ய மயா பா⁴ஸிதந்தி தீ³பேதி.

லோமேன த்வம் முத்தோஸீதி ஏத்த² லோமமிவ லோமம், கிம் பன தம்? பப்³ப³ஜ்ஜாலிங்க³ம். கிம் வுத்தம் ஹோதி? யதா² நாம து⁴த்தா ‘‘மம்ஸம் கா²தி³ஸ்ஸாமா’’தி மஹக்³க⁴லோமம் ஏளகம் க³ண்ஹேய்யும். தமேனம் அஞ்ஞோ விஞ்ஞுபுரிஸோ தி³ஸ்வா ‘‘இமஸ்ஸ ஏளகஸ்ஸ மம்ஸம் கஹாபணமத்தம் அக்³க⁴தி. லோமானி பன லோமவாரே லோமவாரே அனேகே கஹாபணே அக்³க⁴ந்தீ’’தி த்³வே அலோமகே ஏளகே த³த்வா க³ண்ஹேய்ய. ஏவம் ஸோ ஏளகோ விஞ்ஞுபுரிஸமாக³ம்ம லோமேன முச்சேய்ய. ஏவமேவ த்வம் இமஸ்ஸ கம்மஸ்ஸ கதத்தா வத⁴ப³ந்த⁴னாரஹோ. யஸ்மா பன அரஹத்³த⁴ஜோ ஸப்³பி⁴ அவஜ்ஜ²ரூபோ, த்வஞ்ச ஸாஸனே பப்³ப³ஜிதத்தா யம் பப்³ப³ஜ்ஜாலிங்க³பூ⁴தம் அரஹத்³த⁴ஜம் தா⁴ரேஸி. தஸ்மா த்வம் இமினா பப்³ப³ஜ்ஜாலிங்க³லோமேன ஏளகோ விய விஞ்ஞுபுரிஸமாக³ம்ம முத்தோஸீதி.

மனுஸ்ஸா உஜ்ஜா²யந்தீதி ரஞ்ஞோ பரிஸதி பா⁴ஸமானஸ்ஸ ஸம்முகா² ச பரம்முகா² ச ஸுத்வா தத்த² தத்த² மனுஸ்ஸா உஜ்ஜா²யந்தி, அவஜ்ஜா²யந்தி, அவஜானந்தா தம் ஜா²யந்தி ஓலோகேந்தி லாமகதோ வா சிந்தேந்தீதி அத்தோ². கி²ய்யந்தீதி தஸ்ஸ அவண்ணம் கதே²ந்தி பகாஸேந்தி. விபாசேந்தீதி வித்தா²ரிகம் கரோந்தி, ஸப்³ப³த்த² பத்த²ரந்தி; அயஞ்ச அத்தோ² ஸத்³த³ஸத்தா²னுஸாரேன வேதி³தப்³போ³. அயம் பனேத்த² யோஜனா – ‘‘அலஜ்ஜினோ இமே ஸமணா ஸக்யபுத்தியா’’திஆதீ³னி சிந்தேந்தா உஜ்ஜா²யந்தி. ‘‘நத்தி² இமேஸம் ஸாமஞ்ஞ’’ந்திஆதீ³னி ப⁴ணந்தா கி²ய்யந்தி. ‘‘அபக³தா இமே ஸாமஞ்ஞா’’திஆதீ³னி தத்த² தத்த² வித்தா²ரேந்தா விபாசேந்தீதி. ஏதேன நயேன இமேஸம் பதா³னம் இதோ பரம்பி தத்த² தத்த² ஆக³தபதா³னுரூபேன யோஜனா வேதி³தப்³பா³. ப்³ரஹ்மசாரினோதி ஸேட்ட²சாரினோ. ஸாமஞ்ஞந்தி ஸமணபா⁴வோ. ப்³ரஹ்மஞ்ஞந்தி ஸேட்ட²பா⁴வோ. ஸேஸம் உத்தானத்த²மேவ.

ரஞ்ஞோ தா³ரூனீதிஆதி³ம்ஹி ‘‘அதி³ன்னம் ஆதி³யிஸ்ஸதீ’’தி அயம் உஜ்ஜா²யனத்தோ². யம் பனேதம் அதி³ன்னம் ஆதி³யி, தம் த³ஸ்ஸேதும் ‘‘ரஞ்ஞோ தா³ரூனீ’’தி வுத்தம். இதி வசனபே⁴தே³ அஸம்முய்ஹந்தேஹி அத்தோ² வேதி³தப்³போ³. புராணவோஹாரிகோ மஹாமத்தோதி பி⁴க்கு²பா⁴வதோ புராணே கி³ஹிகாலே வினிச்ச²யவோஹாரே நியுத்தத்தா ‘‘வோஹாரிகோ’’தி ஸங்க²ம் க³தோ மஹாஅமச்சோ.

அத² கோ² ப⁴க³வா தம் பி⁴க்கு²ம் ஏதத³வோசாதி ப⁴க³வா ஸாமம்யேவ லோகவோஹாரம்பி ஜானாதி, அதீதபு³த்³தா⁴னம் பஞ்ஞத்திம்பி ஜானாதி – ‘‘புப்³பே³பி பு³த்³தா⁴ ஏத்தகேன பாராஜிகம் பஞ்ஞபேந்தி, ஏத்தகேன து²ல்லச்சயம், ஏத்தகேன து³க்கட’’ந்தி. ஏவம் ஸந்தேபி ஸசே அஞ்ஞேஹி லோகவோஹாரவிஞ்ஞூஹி ஸத்³தி⁴ம் அஸம்ஸந்தி³த்வா பாத³மத்தேன பாராஜிகம் பஞ்ஞபேய்ய, தேனஸ்ஸ ஸியும் வத்தாரோ ‘‘ஸீலஸம்வரோ நாம ஏகபி⁴க்கு²ஸ்ஸபி அப்பமேய்யோ அஸங்க்²யேய்யோ மஹாபத²வீ-ஸமுத்³த³-ஆகாஸானி விய அதிவித்தி²ண்ணோ, கத²ஞ்ஹி நாம ப⁴க³வா பாத³மத்தகேன நாஸேஸீ’’தி! ததோ ததா²க³தஸ்ஸ ஞாணப³லம் அஜானந்தா ஸிக்கா²பத³ம் கோபேய்யும், பஞ்ஞத்தம்பி ஸிக்கா²பத³ம் யதா²டா²னே ந திட்டே²ய்ய. லோகவோஹாரவிஞ்ஞூஹி பன ஸத்³தி⁴ம் ஸம்ஸந்தி³த்வா பஞ்ஞத்தே ஸோ உபவாதோ³ ந ஹோதி. அஞ்ஞத³த்து² ஏவம் வத்தாரோ ஹோந்தி – ‘‘இமேஹி நாம அகா³ரிகாபி பாத³மத்தேன சோரம் ஹனந்திபி ப³ந்த⁴ந்திபி பப்³பா³ஜேந்திபி. கஸ்மா ப⁴க³வா பப்³ப³ஜிதம் ந நாஸேஸ்ஸதி; யேன பரஸந்தகம் திணஸலாகமத்தம்பி ந க³ஹேதப்³ப³’’ந்தி! ததா²க³தஸ்ஸ ச ஞாணப³லம் ஜானிஸ்ஸந்தி. பஞ்ஞத்தம்பி ச ஸிக்கா²பத³ம் அகுப்பம் ப⁴விஸ்ஸதி, யதா²டா²னே ட²ஸ்ஸதி. தஸ்மா லோகவோஹாரவிஞ்ஞூஹி ஸத்³தி⁴ம் ஸம்ஸந்தி³த்வா பஞ்ஞபேதுகாமோ ஸப்³பா³வந்தம் பரிஸம் அனுவிலோகேந்தோ அத² கோ² ப⁴க³வா அவிதூ³ரே நிஸின்னம் தி³ஸ்வா தம் பி⁴க்கு²ம் ஏதத³வோச ‘‘கித்தகேன கோ² பி⁴க்கு² ராஜா மாக³தோ⁴ ஸேனியோ பி³ம்பி³ஸாரோ சோரம் க³ஹேத்வா ஹனதி வா ப³ந்த⁴தி வா பப்³பா³ஜேதி வா’’தி.

தத்த² மாக³தோ⁴தி மக³தா⁴னம் இஸ்ஸரோ. ஸேனியோதி ஸேனாய ஸம்பன்னோ. பி³ம்பி³ஸாரோதி தஸ்ஸ நாமம். பப்³பா³ஜேதி வாதி ரட்ட²தோ நிக்கா²மேதி. ஸேஸமேத்த² உத்தானத்த²மேவ. பஞ்சமாஸகோ பாதோ³தி ததா³ ராஜக³ஹே வீஸதிமாஸகோ கஹாபணோ ஹோதி, தஸ்மா பஞ்சமாஸகோ பாதோ³. ஏதேன லக்க²ணேன ஸப்³ப³ஜனபதே³ஸு கஹாபணஸ்ஸ சதுத்தோ² பா⁴கோ³ ‘‘பாதோ³’’தி வேதி³தப்³போ³. ஸோ ச கோ² போராணஸ்ஸ நீலகஹாபணஸ்ஸ வஸேன, ந இதரேஸம் ருத்³ரதா³மகாதீ³னம். தேன ஹி பாதே³ன அதீதபு³த்³தா⁴பி பாராஜிகம் பஞ்ஞபேஸும், அனாக³தாபி பஞ்ஞபேஸ்ஸந்தி. ஸப்³ப³பு³த்³தா⁴னஞ்ஹி பாராஜிகவத்து²ம்ஹி வா பாராஜிகே வா நானத்தம் நத்தி². இமானேவ சத்தாரி பாராஜிகவத்தூ²னி. இமானேவ சத்தாரி பாராஜிகானி. இதோ ஊனம் வா அதிரேகம் வா நத்தி². தஸ்மா ப⁴க³வாபி த⁴னியம் விக³ரஹித்வா பாதே³னேவ து³தியபாராஜிகம் பஞ்ஞபேந்தோ ‘‘யோ பன பி⁴க்கு² அதி³ன்னம் தே²ய்யஸங்கா²த’’ந்திஆதி³மாஹ.

ஏவம் மூலச்சே²ஜ்ஜவஸேன த³ள்ஹம் கத்வா து³தியபாராஜிகே பஞ்ஞத்தே அபரம்பி அனுபஞ்ஞத்தத்தா²ய ரஜகப⁴ண்டி³கவத்து² உத³பாதி³, தஸ்ஸுப்பத்திதீ³பனத்த²மேதம் வுத்தம் – ‘‘ஏவஞ்சித³ம் ப⁴க³வதா பி⁴க்கூ²னம் ஸிக்கா²பத³ம் பஞ்ஞத்தம் ஹோதீ’’தி. தஸ்ஸத்தோ² ச அனுபஞ்ஞத்திஸம்ப³ந்தோ⁴ ச பட²மபாராஜிகவண்ணனாயம் வுத்தனயேனேவ வேதி³தப்³போ³. யதா² ச இத⁴, ஏவம் இதோ பரேஸு ஸப்³ப³ஸிக்கா²பதே³ஸு. யம் யம் புப்³பே³ வுத்தம், தம் தம் ஸப்³ப³ம் வஜ்ஜேத்வா உபரூபரி அபுப்³ப³மேவ வண்ணயிஸ்ஸாம. யதி³ ஹி யம் யம் வுத்தனயம், தம் தம் புனபி வண்ணயிஸ்ஸாம, கதா³ வண்ணனாய அந்தம் க³மிஸ்ஸாம! தஸ்மா யம் யம் புப்³பே³ வுத்தம், தம் தம் ஸப்³ப³ம் ஸாது⁴கம் உபஸல்லக்கே²த்வா தத்த² தத்த² அத்தோ² ச யோஜனா ச வேதி³தப்³பா³. அபுப்³ப³ம் பன யம்கிஞ்சி அனுத்தானத்த²ம், தம் ஸப்³ப³ம் மயமேவ வண்ணயிஸ்ஸாம.

த⁴னியவத்து²வண்ணனா நிட்டி²தா.

90. ரஜகத்த²ரணம் க³ந்த்வாதி ரஜகதித்த²ம் க³ந்த்வா; தஞ்ஹி யஸ்மா தத்த² ரஜகா வத்தா²னி அத்த²ரந்தி, தஸ்மா ரஜகத்த²ரணந்தி வுச்சதி. ரஜகப⁴ண்டி³கந்தி ரஜகானம் ப⁴ண்டி³கம்; ரஜகா ஸாயன்ஹஸமயே நக³ரம் பவிஸந்தா ப³ஹூனி வத்தா²னி ஏகேகம் ப⁴ண்டி³கம் ப³ந்த⁴ந்தி. ததோ ஏகம் ப⁴ண்டி³கம் தேஸம் பமாதே³ன அபஸ்ஸந்தானம் அவஹரித்வா தே²னேத்வாதி அத்தோ².

பத³பா⁴ஜனீயவண்ணனா

92. கா³மோனாமாதி ஏவமாதி³ ‘‘கா³மா வா அரஞ்ஞா வா’’தி ஏத்த² வுத்தஸ்ஸ கா³மஸ்ஸ ச அரஞ்ஞஸ்ஸ ச பபே⁴த³த³ஸ்ஸனத்த²ம் வுத்தம். தத்த² யஸ்மிம் கா³மே ஏகா ஏவ குடி, ஏகம் கே³ஹம் ஸேய்யதா²பி மலயஜனபதே³; அயம் ஏககுடிகோ கா³மோ நாம. ஏதேன நயேன அபரேபி வேதி³தப்³பா³. அமனுஸ்ஸோனாம யோ ஸப்³ப³ஸோ வா மனுஸ்ஸானம் அபா⁴வேன யக்க²பரிக்³க³ஹபூ⁴தோ; யதோ வா மனுஸ்ஸா கேனசி காரணேன புனபி ஆக³ந்துகாமா ஏவ அபக்கந்தா. பரிக்கி²த்தோனாம இட்ட²கபாகாரம் ஆதி³ம் கத்வா அந்தமஸோ கண்டகஸாகா²ஹிபி பரிக்கி²த்தோ. கோ³னிஸாதி³னிவிட்டோ²னாம வீதி²ஸன்னிவேஸாதி³வஸேன அனிவிஸித்வா யதா² கா³வோ தத்த² தத்த² த்³வே தயோ நிஸீத³ந்தி, ஏவம் தத்த² தத்த² த்³வே தீணி க⁴ரானி கத்வா நிவிட்டோ². ஸத்தோ²தி ஜங்க⁴ஸத்த²ஸகடஸத்தா²தீ³ஸு யோ கோசி. இமஸ்மிஞ்ச ஸிக்கா²பதே³ நிக³மோபி நக³ரம்பி கா³மக்³க³ஹணேனேவ க³ஹிதந்தி வேதி³தப்³ப³ம்.

கா³மூபசாரோதிஆதி³ அரஞ்ஞபரிச்சே²த³த³ஸ்ஸனத்த²ம் வுத்தம். இந்த³கீ²லே டி²தஸ்ஸாதி யஸ்ஸ கா³மஸ்ஸ அனுராத⁴புரஸ்ஸேவ த்³வே இந்த³கீ²லா, தஸ்ஸ அப்³ப⁴ந்தரிமே இந்த³கீ²லே டி²தஸ்ஸ; தஸ்ஸ ஹி பா³ஹிரோ இந்த³கீ²லோ ஆபி⁴த⁴ம்மிகனயேன அரஞ்ஞஸங்கே²பம் க³ச்ச²தி. யஸ்ஸ பன ஏகோ, தஸ்ஸ கா³மத்³வாரபா³ஹானம் வேமஜ்ஜே² டி²தஸ்ஸ. யத்ராபி ஹி இந்த³கீ²லோ நத்தி², தத்ர கா³மத்³வாரபா³ஹானம் வேமஜ்ஜ²மேவ ‘‘இந்த³கீ²லோ’’தி வுச்சதி. தேன வுத்தம் – ‘‘கா³மத்³வாரபா³ஹானம் வேமஜ்ஜே² டி²தஸ்ஸா’’தி. மஜ்ஜி²மஸ்ஸாதி தா²மமஜ்ஜி²மஸ்ஸ, நோ பமாணமஜ்ஜி²மஸ்ஸ, நேவ அப்பதா²மஸ்ஸ, ந மஹாதா²மஸ்ஸ; மஜ்ஜி²மதா²மஸ்ஸாதி வுத்தம் ஹோதி. லேட்³டு³பாதோதி யதா² மாதுகா³மோ காகே உட்³டா³பேந்தோ உஜுகமேவ ஹத்த²ம் உக்கி²பித்வா லேட்³டு³ம் கி²பதி, யதா² ச உத³குக்கே²பே உத³கம் கி²பந்தி, ஏவம் அகி²பித்வா யதா² தருணமனுஸ்ஸா அத்தனோ ப³லம் த³ஸ்ஸேந்தா பா³ஹம் பஸாரேத்வா லேட்³டு³ம் கி²பந்தி, ஏவம் கி²த்தஸ்ஸ லேட்³டு³ஸ்ஸ பதனட்டா²னம். பதிதோ பன லுடி²த்வா யத்த² க³ச்ச²தி, தம் ந க³ஹேதப்³ப³ம்.

அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோதி ஏத்த² பன நிப்³ப³கோஸஸ்ஸ உத³கபாதட்டா²னே டி²தஸ்ஸ மஜ்ஜி²மஸ்ஸ புரிஸஸ்ஸ ஸுப்பபாதோ வா முஸலபாதோ வா க⁴ரூபசாரோ நாம. தஸ்மிம் க⁴ரூபசாரே டி²தஸ்ஸ லேட்³டு³பாதோ கா³மூபசாரோதி குருந்த³ட்ட²கதா²யம் வுத்தம். மஹாபச்சரியம்பி தாதி³ஸமேவ. மஹாஅட்ட²கதா²யம் பன ‘‘க⁴ரம் நாம, க⁴ரூபசாரோ நாம, கா³மோ நாம, கா³மூபசாரோ நாமா’’தி மாதிகம் ட²பேத்வா நிப்³ப³கோஸஸ்ஸ உத³கபாதட்டா²னப்³ப⁴ந்தரம் க⁴ரம் நாம. யம் பன த்³வாரே டி²தோ மாதுகா³மோ பா⁴ஜனதோ⁴வனஉத³கம் ச²ட்³டே³தி, தஸ்ஸ பதனட்டா²னஞ்ச மாதுகா³மேனேவ அந்தோகே³ஹே டி²தேன பகதியா ப³ஹி கி²த்தஸ்ஸ ஸுப்பஸ்ஸ வா ஸம்முஞ்ஜனியா வா பதனட்டா²னஞ்ச, க⁴ரஸ்ஸ புரதோ த்³வீஸு கோணேஸு ஸம்ப³ந்தி⁴த்வா மஜ்ஜே² ருக்க²ஸூசித்³வாரம் ட²பேத்வா கோ³ரூபானம் பவேஸனனிவாரணத்த²ம் கதபரிக்கே²போ ச அயம் ஸப்³போ³பி க⁴ரூபசாரோ நாம. தஸ்மிம் க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதப்³ப⁴ந்தரம் கா³மோ நாம. ததோ அஞ்ஞஸ்ஸ லேட்³டு³பாதஸ்ஸ அப்³ப⁴ந்தரம் கா³மூபசாரோ நாமாதி வுத்தம். இத³மேத்த² பமாணம். யதா² சேத்த², ஏவம் ஸப்³ப³த்த² யோ யோ அட்ட²கதா²வாதோ³ வா தே²ரவாதோ³ வா பச்சா² வுச்சதி ஸோ பமாணதோ த³ட்ட²ப்³போ³.

யஞ்சேதம் மஹாஅட்ட²கதா²யம் வுத்தம், தம் பாளியா விருத்³த⁴மிவ தி³ஸ்ஸதி. பாளியஞ்ஹி – ‘‘க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி ஏத்தகமேவ வுத்தம். அட்ட²கதா²யம் பன தம் லேட்³டு³பாதம் கா³மஸங்கே²பம் கத்வா ததோ பரம் கா³மூபசாரோ வுத்தோதி? வுச்சதே – ஸச்சமேவ பாளியம் வுத்தம், அதி⁴ப்பாயோ பனேத்த² வேதி³தப்³போ³. ஸோ ச அட்ட²கதா²சரியானமேவ விதி³தோ. தஸ்மா யதா² ‘‘க⁴ரூபசாரே டி²தஸ்ஸா’’தி ஏத்த² க⁴ரூபசாரலக்க²ணம் பாளியம் அவுத்தம்பி அட்ட²கதா²யம் வுத்தவஸேன க³ஹிதம். ஏவம் ஸேஸம்பி க³ஹேதப்³ப³ம்.

தத்ராயம் நயோ – இத⁴ கா³மோ நாம து³விதோ⁴ ஹோதி – பரிக்கி²த்தோ ச அபரிக்கி²த்தோ ச. தத்ர பரிக்கி²த்தஸ்ஸ பரிக்கே²போயேவ பரிச்சே²தோ³. தஸ்மா தஸ்ஸ விஸும் பரிச்சே²த³ம் அவத்வா ‘‘கா³மூபசாரோ நாம பரிக்கி²த்தஸ்ஸ கா³மஸ்ஸ இந்த³கீ²லே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி பாளியம் வுத்தம். அபரிக்கி²த்தஸ்ஸ பன கா³மஸ்ஸ கா³மபரிச்சே²தோ³ வத்தப்³போ³. தஸ்மா தஸ்ஸ கா³மபரிச்சே²த³த³ஸ்ஸனத்த²ம் ‘‘அபரிக்கி²த்தஸ்ஸ கா³மஸ்ஸ க⁴ரூபசாரே டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி வுத்தம். கா³மபரிச்சே²தே³ ச த³ஸ்ஸிதே கா³மூபசாரலக்க²ணம் புப்³பே³ வுத்தனயேனேவ ஸக்கா ஞாதுந்தி புன ‘‘தத்த² டி²தஸ்ஸ மஜ்ஜி²மஸ்ஸ புரிஸஸ்ஸ லேட்³டு³பாதோ’’தி ந வுத்தம். யோ பன க⁴ரூபசாரே டி²தஸ்ஸ லேட்³டு³பாதம்யேவ ‘‘கா³மூபசாரோ’’தி வத³தி, தஸ்ஸ க⁴ரூபசாரோ கா³மோதி ஆபஜ்ஜதி. ததோ க⁴ரம், க⁴ரூபசாரோ, கா³மோ, கா³மூபசாரோதி ஏஸ விபா⁴கோ³ ஸங்கரீயதி. அஸங்கரதோ சேத்த² வினிச்ச²யோ வேதி³தப்³போ³ விகாலே கா³மப்பவேஸனாதீ³ஸு. தஸ்மா பாளிஞ்ச அட்ட²கத²ஞ்ச ஸம்ஸந்தி³த்வா வுத்தனயேனேவேத்த² கா³மோ ச கா³மூபசாரோ ச வேதி³தப்³போ³. யோபி ச கா³மோ புப்³பே³ மஹா ஹுத்வா பச்சா² குலேஸு நட்டே²ஸு அப்பகோ ஹோதி, ஸோ க⁴ரூபசாரதோ லேட்³டு³பாதேனேவ பரிச்சி²ந்தி³தப்³போ³. புரிமபரிச்சே²தோ³ பனஸ்ஸ பரிக்கி²த்தஸ்ஸாபி அபரிக்கி²த்தஸ்ஸாபி அப்பமாணமேவாதி.

அரஞ்ஞம் நாம ட²பேத்வா கா³மஞ்ச கா³மூபசாரஞ்சாதி இமம் யதா²வுத்தலக்க²ணம் கா³மஞ்ச கா³மூபசாரஞ்ச ட²பேத்வா இமஸ்மிம் அதி³ன்னாதா³னஸிக்கா²பதே³ அவஸேஸம் ‘‘அரஞ்ஞம்’’ நாமாதி வேதி³தப்³ப³ம். அபி⁴த⁴ம்மே பன ‘‘அரஞ்ஞந்தி நிக்க²மித்வா ப³ஹி இந்த³கீ²லா ஸப்³ப³மேதம் அரஞ்ஞ’’ந்தி (விப⁴. 529) வுத்தம். ஆரஞ்ஞகஸிக்கா²பதே³ ‘‘ஆரஞ்ஞகம் நாம ஸேனாஸனம் பஞ்சத⁴னுஸதிகம் பச்சி²ம’’ந்தி (பாரா. 654) வுத்தம். தம் இந்த³கீ²லதோ பட்டா²ய ஆரோபிதேன ஆசரியத⁴னுனா பஞ்சத⁴னுஸதப்பமாணந்தி வேதி³தப்³ப³ம். ஏவம் ப⁴க³வதா ‘‘கா³மா வா அரஞ்ஞா வா’’தி ஏதஸ்ஸ அத்த²ம் விப⁴ஜந்தேன ‘‘க⁴ரம், க⁴ரூபசாரோ, கா³மோ, கா³மூபசாரோ அரஞ்ஞ’’ந்தி பாபபி⁴க்கூ²னம் லேஸோகாஸனிஸேத⁴னத்த²ம் பஞ்ச கோட்டா²ஸா த³ஸ்ஸிதா. தஸ்மா க⁴ரே வா க⁴ரூபசாரே வா கா³மே வா கா³மூபசாரே வா அரஞ்ஞே வா பாத³க்³க⁴னகதோ பட்டா²ய ஸஸ்ஸாமிகம் ப⁴ண்ட³ம் அவஹரந்தஸ்ஸ பாராஜிகமேவாதி வேதி³தப்³ப³ம்.

இதா³னி ‘‘அதி³ன்னம் தே²ய்யஸங்கா²தம் ஆதி³யேய்யா’’திஆதீ³னம் அத்த²த³ஸ்ஸனத்த²ம் ‘‘அதி³ன்னம் நாமா’’திஆதி³மாஹ. தத்த² அதி³ன்னந்தி த³ந்தபோனஸிக்கா²பதே³ அத்தனோ ஸந்தகம்பி அப்படிக்³க³ஹிதகம் கப்பியம் அஜ்ஜோ²ஹரணீயம் வுச்சதி. இத⁴ பன யம்கிஞ்சி பரபரிக்³க³ஹிதம் ஸஸ்ஸாமிகம் ப⁴ண்ட³ம், ததே³தம் தேஹி ஸாமிகேஹி காயேன வா வாசாய வா ந தி³ன்னந்தி அதி³ன்னம். அத்தனோ ஹத்த²தோ வா யதா²டி²தட்டா²னதோ வா ந நிஸ்ஸட்ட²ந்தி அனிஸ்ஸட்ட²ம். யதா²டா²னே டி²தம்பி அனபேக்க²தாய ந பரிச்சத்தந்தி அபரிச்சத்தம். ஆரக்க²ஸம்விதா⁴னேன ரக்கி²தத்தா ரக்கி²தம். மஞ்ஜூஸாதீ³ஸு பக்கி²பித்வா கோ³பிதத்தா கோ³பிதம். ‘‘மம இத³’’ந்தி தண்ஹாமமத்தேன மமாயிதத்தா மமாயிதம். தாஹி அபரிச்சாக³ரக்க²ணகோ³பனாஹி தேஹி ப⁴ண்ட³ஸாமிகேஹி பரேஹி பரிக்³க³ஹிதந்தி பரபரிக்³க³ஹிதம். ஏதம் அதி³ன்னம் நாம.

தே²ய்யஸங்கா²தந்தி ஏத்த² தே²னோதி சோரோ, தே²னஸ்ஸ பா⁴வோ தே²ய்யம்; அவஹரணசித்தஸ்ஸேதம் அதி⁴வசனம். ‘‘ஸங்கா², ஸங்கா²த’’ந்தி அத்த²தோ ஏகம்; கோட்டா²ஸஸ்ஸேதம் அதி⁴வசனம், ‘‘ஸஞ்ஞானிதா³னா ஹி பபஞ்சஸங்கா²’’திஆதீ³ஸு (ஸு. நி. 880) விய. தே²ய்யஞ்ச தம் ஸங்கா²தஞ்சாதி தே²ய்யஸங்கா²தம், தே²ய்யசித்தஸங்கா²தோ ஏகோ சித்தகோட்டா²ஸோதி அத்தோ². கரணத்தே² சேதம் பச்சத்தவசனம், தஸ்மா தே²ய்யஸங்கா²தேனாதி அத்த²தோ த³ட்ட²ப்³ப³ம். யோ ச தே²ய்யஸங்கா²தேன ஆதி³யதி, ஸோ யஸ்மா தே²ய்யசித்தோ ஹோதி, தஸ்மா ப்³யஞ்ஜனம் அனாதி³யித்வா அத்த²மேவ த³ஸ்ஸேதும் தே²ய்யசித்தோ அவஹரணசித்தோதி ஏவமஸ்ஸ பத³பா⁴ஜனம் வுத்தந்தி வேதி³தப்³ப³ம்.

ஆதி³யேய்ய , ஹரேய்ய, அவஹரேய்ய, இரியாபத²ம் விகோபேய்ய, டா²னா சாவேய்ய, ஸங்கேதம் வீதினாமேய்யாதி ஏத்த² பன பட²மபத³ம் அபி⁴யோக³வஸேன வுத்தம், து³தியபத³ம் அஞ்ஞேஸம் ப⁴ண்ட³ம் ஹரந்தஸ்ஸ க³ச்ச²தோ வஸேன, ததியபத³ம் உபனிக்கி²த்தப⁴ண்ட³வஸேன, சதுத்த²ம் ஸவிஞ்ஞாணகவஸேன, பஞ்சமம் த²லே நிக்கி²த்தாதி³வஸேன, ச²ட்ட²ம் பரிகப்பவஸேன வா ஸுங்ககா⁴தவஸேன வா வுத்தந்தி வேதி³தப்³ப³ம். யோஜனா பனேத்த² ஏகப⁴ண்ட³வஸேனபி நானாப⁴ண்ட³வஸேனபி ஹோதி. ஏகப⁴ண்ட³வஸேன ச ஸவிஞ்ஞாணகேனேவ லப்³ப⁴தி, நானாப⁴ண்ட³வஸேன ஸவிஞ்ஞாணகாவிஞ்ஞாணகமிஸ்ஸகேன.

தத்த² நானாப⁴ண்ட³வஸேன தாவ ஏவம் வேதி³தப்³ப³ம் – ஆதி³யேய்யாதி ஆராமம் அபி⁴யுஞ்ஜதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹம் ப⁴விஸ்ஸதீ’’தி து⁴ரம் நிக்கி²பதி, ஆபத்தி பாராஜிகஸ்ஸ.

ஹரேய்யாதி அஞ்ஞஸ்ஸ ப⁴ண்ட³ம் ஹரந்தோ ஸீஸே பா⁴ரம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. க²ந்த⁴ம் ஓரோபேதி, ஆபத்தி பாராஜிகஸ்ஸ.

அவஹரேய்யாதி உபனிக்கி²த்தம் ப⁴ண்ட³ம் ‘‘தே³ஹி மே ப⁴ண்ட³’’ந்தி வுச்சமானோ ‘‘நாஹம் க³ண்ஹாமீ’’தி ப⁴ணதி, ஆபத்தி து³க்கடஸ்ஸ. ஸாமிகஸ்ஸ விமதிம் உப்பாதே³தி, ஆபத்தி து²ல்லச்சயஸ்ஸ. ஸாமிகோ ‘‘ந மய்ஹம் த³ஸ்ஸதீ’’தி து⁴ரம் நிக்கி²பதி, ஆபத்தி பாராஜிகஸ்ஸ.

இரியாபத²ம்விகோபேய்யாதி ‘‘ஸஹப⁴ண்ட³ஹாரகம் நேஸ்ஸாமீ’’தி பட²மம் பாத³ம் ஸங்காமேதி, ஆபத்தி து²ல்லச்சயஸ்ஸ. து³தியம் பாத³ம் ஸங்காமேதி, ஆபத்தி பாராஜிகஸ்ஸ.

டா²னா சாவேய்யாதி த²லட்ட²ம் ப⁴ண்ட³ம் தே²ய்யசித்தோ ஆமஸதி, ஆபத்தி து³க்கடஸ்ஸ. ப²ந்தா³பேதி, ஆபத்தி து²ல்லச்சயஸ்ஸ. டா²னா சாவேதி, ஆபத்தி பாராஜிகஸ்ஸ.

ஸங்கேதம் வீதினாமேய்யாதி பரிகப்பிதட்டா²னம் பட²மம் பாத³ம் அதிக்காமேதி, ஆபத்தி து²ல்லச்சயஸ்ஸ. து³தியம் பாத³ம் அதிக்காமேதி, ஆபத்தி பாராஜிகஸ்ஸ. அத² வா பட²மம் பாத³ம் ஸுங்ககா⁴தம் அதிக்காமேதி, ஆபத்தி து²ல்லச்சயஸ்ஸ. து³தியம் பாத³ம் அதிக்காமேதி, ஆபத்தி பாராஜிகஸ்ஸாதி – அயமேத்த² நானாப⁴ண்ட³வஸேன யோஜனா.

ஏகப⁴ண்ட³வஸேன பன ஸஸ்ஸாமிகம் தா³ஸம் வா திரச்சா²னம் வா யதா²வுத்தேன அபி⁴யோகா³தி³னா நயேன ஆதி³யதி வா ஹரதி வா அவஹரதி வா இரியாபத²ம் வா விகோபேதி, டா²னா வா சாவேதி, பரிச்சே²த³ம் வா அதிக்காமேதி – அயமேத்த² ஏகப⁴ண்ட³வஸேன யோஜனா.

பஞ்சவீஸதிஅவஹாரகதா²

அபிச இமானி ச² பதா³னி வண்ணேந்தேன பஞ்ச பஞ்சகே ஸமோதா⁴னேத்வா பஞ்சவீஸதி அவஹாரா த³ஸ்ஸேதப்³பா³. ஏவம் வண்ணயதா ஹி இத³ம் அதி³ன்னாதா³னபாராஜிகம் ஸுவண்ணிதம் ஹோதி. இமஸ்மிஞ்ச டா²னே ஸப்³ப³அட்ட²கதா² ஆகுலா லுளிதா து³விஞ்ஞேய்யவினிச்ச²யா. ததா² ஹி ஸப்³ப³அட்ட²கதா²ஸு யானி தானி பாளியம் ‘‘பஞ்சஹாகாரேஹி அதி³ன்னம் ஆதி³யந்தஸ்ஸ ஆபத்தி பாராஜிகஸ்ஸ, பரபரிக்³க³ஹிதஞ்ச ஹோதீ’’திஆதி³னா நயேன அவஹாரங்கா³னி வுத்தானி, தானிபி க³ஹேத்வா கத்த²சி ஏகம் பஞ்சகம் த³ஸ்ஸிதம், கத்த²சி ‘‘ச²ஹாகாரேஹீ’’தி ஆக³தேஹி ஸத்³தி⁴ம் த்³வே பஞ்சகானி த³ஸ்ஸிதானி. ஏதானி ச பஞ்சகானி ந ஹோந்தி. யத்த² ஹி ஏகேகேன பதே³ன அவஹாரோ ஸிஜ்ஜ²தி, தம் பஞ்சகம் நாம வுச்சதி. ஏத்த² பன ஸப்³பே³ஹிபி பதே³ஹி ஏகோயேவ அவஹாரோ. யானி ச தத்த² லப்³ப⁴மானானியேவ பஞ்சகானி த³ஸ்ஸிதானி, தேஸம்பி ந ஸப்³பே³ஸம் அத்தோ² பகாஸிதோ. ஏவமிமஸ்மிம் டா²னே ஸப்³ப³அட்ட²கதா² ஆகுலா லுளிதா து³விஞ்ஞேய்யவினிச்ச²யா. தஸ்மா பஞ்ச பஞ்சகேஸமோதா⁴னேத்வா த³ஸ்ஸியமானா இமே பஞ்சவீஸதி அவஹாரா ஸாது⁴கம் ஸல்லக்கே²தப்³பா³.

பஞ்ச பஞ்சகானி நாம – நானாப⁴ண்ட³பஞ்சகம், ஏகப⁴ண்ட³பஞ்சகம், ஸாஹத்தி²கபஞ்சகம், புப்³ப³பயோக³பஞ்சகம், தே²ய்யாவஹாரபஞ்சகந்தி. தத்த² நானாப⁴ண்ட³பஞ்சகஞ்ச ஏகப⁴ண்ட³பஞ்சகஞ்ச ‘‘ஆதி³யேய்ய, ஹரேய்ய, அவஹரேய்ய, இரியாபத²ம் விகோபேய்ய, டா²னா சாவேய்யா’’தி இமேஸம் பதா³னம் வஸேன லப்³ப⁴ந்தி. தானி புப்³பே³ யோஜேத்வா த³ஸ்ஸிதனயேனேவ வேதி³தப்³பா³னி. யம் பனேதம் ‘‘ஸங்கேதம் வீதினாமேய்யா’’தி ச²ட்ட²ம் பத³ம், தம் பரிகப்பாவஹாரஸ்ஸ ச நிஸ்ஸக்³கி³யாவஹாரஸ்ஸ ச ஸாதா⁴ரணம். தஸ்மா தம் ததியபஞ்சமேஸு பஞ்சகேஸு லப்³ப⁴மானபத³வஸேன யோஜேதப்³ப³ம். வுத்தம் நானாப⁴ண்ட³பஞ்சகஞ்ச ஏகப⁴ண்ட³பஞ்சகஞ்ச.

கதமம் ஸாஹத்தி²கபஞ்சகம்? பஞ்ச அவஹாரா – ஸாஹத்தி²கோ, ஆணத்திகோ, நிஸ்ஸக்³கி³யோ, அத்த²ஸாத⁴கோ, து⁴ரனிக்கே²போதி. தத்த² ஸாஹத்தி²கோ நாம பரஸ்ஸ ப⁴ண்ட³ம் ஸஹத்தா² அவஹரதி. ஆணத்திகோ நாம ‘‘அஸுகஸ்ஸ ப⁴ண்ட³ம் அவஹரா’’தி அஞ்ஞம் ஆணாபேதி. நிஸ்ஸக்³கி³யோ நாம அந்தோஸுங்ககா⁴தே டி²தோ ப³ஹிஸுங்ககா⁴தம் பாதேதி, ஆபத்தி பாராஜிகஸ்ஸாதி, இமினா ச ஸத்³தி⁴ம் ‘‘ஸங்கேதம் வீதினாமேய்யா’’தி இத³ம் பத³யோஜனம் லப⁴தி. அத்த²ஸாத⁴கோ நாம ‘‘அஸுகம் நாம ப⁴ண்ட³ம் யதா³ ஸக்கோஸி, ததா³ அவஹரா’’தி ஆணாபேதி. தத்த² ஸசே பரோ அனந்தராயிகோ ஹுத்வா தம் அவஹரதி, ஆணாபகோ ஆணத்திக்க²ணேயேவ பாராஜிகோ ஹோதி, அவஹாரகோ பன அவஹடகாலே. அயம் அத்த²ஸாத⁴கோ. து⁴ரனிக்கே²போ பன உபனிக்கி²த்தப⁴ண்ட³வஸேன வேதி³தப்³போ³. இத³ம் ஸாஹத்தி²கபஞ்சகம்.

கதமம் புப்³ப³பயோக³பஞ்சகம்? அபரேபி பஞ்ச அவஹாரா – புப்³ப³பயோகோ³, ஸஹபயோகோ³, ஸம்விதா³வஹாரோ, ஸங்கேதகம்மம், நிமித்தகம்மந்தி. தத்த² ஆணத்திவஸேன புப்³ப³பயோகோ³ வேதி³தப்³போ³. டா²னா சாவனவஸேன ஸஹபயோகோ³. இதரே பன தயோ பாளியம் (பாரா. 118-120) ஆக³தனயேனேவ வேதி³தப்³பா³தி. இத³ம் புப்³ப³பயோக³பஞ்சகம்.

கதமம் தே²ய்யாவஹாரபஞ்சகம்? அபரேபி பஞ்ச அவஹாரா – தே²ய்யாவஹாரோ, பஸய்ஹாவஹாரோ, பரிகப்பாவஹாரோ, படிச்ச²ன்னாவஹாரோ, குஸாவஹாரோதி. தே பஞ்சபி ‘‘அஞ்ஞதரோ பி⁴க்கு² ஸங்க⁴ஸ்ஸ சீவரே பா⁴ஜியமானே தே²ய்யசித்தோ குஸம் ஸங்காமேத்வா சீவரம் அக்³க³ஹேஸீ’’தி (பாரா. 138) ஏதஸ்மிம் குஸஸங்காமனவத்து²ஸ்மிம் வண்ணயிஸ்ஸாம. இத³ம் தே²ய்யாவஹாரபஞ்சகம். ஏவமிமானி பஞ்ச பஞ்சகானி ஸமோதா⁴னேத்வா இமே பஞ்சவீஸதி அவஹாரா வேதி³தப்³பா³.

இமேஸு ச பன பஞ்சஸு பஞ்சகேஸு குஸலேன வினயத⁴ரேன ஓதிண்ணம் வத்து²ம் ஸஹஸா அவினிச்சி²னித்வாவ பஞ்ச டா²னானி ஓலோகேதப்³பா³னி. யானி ஸந்தா⁴ய போராணா ஆஹு –

‘‘வத்து²ம் காலஞ்ச தே³ஸஞ்ச, அக்³க⁴ம் பரிபோ⁴க³பஞ்சமம்;

துலயித்வா பஞ்ச டா²னானி, தா⁴ரேய்யத்த²ம் விசக்க²ணோ’’தி.

தத்த² வத்து²ந்தி ப⁴ண்ட³ம்; அவஹாரகேன ஹி ‘‘மயா இத³ம் நாம அவஹட’’ந்தி வுத்தேபி ஆபத்திம் அனாரோபேத்வாவ தம் ப⁴ண்ட³ம் ஸஸ்ஸாமிகம் வா அஸ்ஸாமிகம் வாதி உபபரிக்கி²தப்³ப³ம். ஸஸ்ஸாமிகேபி ஸாமிகானம் ஸாலயபா⁴வோ வா நிராலயபா⁴வோ வா உபபரிக்கி²தப்³போ³. ஸசே தேஸம் ஸாலயகாலே அவஹடம், ப⁴ண்ட³ம் அக்³கா⁴பேத்வா ஆபத்தி காதப்³பா³. ஸசே நிராலயகாலே, ந பாராஜிகேன காரேதப்³போ³. ப⁴ண்ட³ஸாமிகேஸு பன ப⁴ண்ட³ம் ஆஹராபேந்தேஸு ப⁴ண்ட³ம் தா³தப்³ப³ம். அயமேத்த² ஸாமீசி.

இமஸ்ஸ பனத்த²ஸ்ஸ தீ³பனத்த²மித³ம் வத்து² – பா⁴தியராஜகாலே கிர மஹாசேதியபூஜாய த³க்கி²ணதி³ஸதோ ஏகோ பி⁴க்கு² ஸத்தஹத்த²ம் பண்டு³காஸாவம் அம்ஸே கரித்வா சேதியங்க³ணம் பாவிஸி; தங்க²ணமேவ ச ராஜாபி சேதியவந்த³னத்த²ம் ஆக³தோ. தத்த² உஸ்ஸாரணாய வத்தமானாய மஹாஜனஸம்மத்³தோ³ அஹோஸி. அத² ஸோ பி⁴க்கு² ஜனஸம்மத்³த³பீளிதோ அம்ஸதோ பதந்தம் காஸாவம் அதி³ஸ்வாவ நிக்க²ந்தோ; நிக்க²மித்வா ச காஸாவம் அபஸ்ஸந்தோ ‘‘கோ ஈதி³ஸே ஜனஸம்மத்³தே³ காஸாவம் லச்ச²தி, ந தா³னி தம் மய்ஹ’’ந்தி து⁴ரனிக்கே²பம் கத்வா க³தோ. அத²ஞ்ஞோ பி⁴க்கு² பச்சா² ஆக³ச்ச²ந்தோ தம் காஸாவம் தி³ஸ்வா தே²ய்யசித்தேன க³ஹேத்வா புன விப்படிஸாரீ ஹுத்வா ‘‘அஸ்ஸமணோ தா³னிம்ஹி, விப்³ப⁴மிஸ்ஸாமீ’’தி சித்தே உப்பன்னேபி ‘‘வினயத⁴ரே புச்சி²த்வா ஞஸ்ஸாமீ’’தி சிந்தேஸி.

தேன ச ஸமயேன சூளஸுமனத்தே²ரோ நாம ஸப்³ப³பரியத்தித⁴ரோ வினயாசரியபாமோக்கோ² மஹாவிஹாரே படிவஸதி. ஸோ பி⁴க்கு² தே²ரம் உபஸங்கமித்வா வந்தி³த்வா ஓகாஸம் காரேத்வா அத்தனோ குக்குச்சம் புச்சி². தே²ரோ தேன ப⁴ட்டே² ஜனகாயே பச்சா² ஆக³ந்த்வா க³ஹிதபா⁴வம் ஞத்வா ‘‘அத்தி² தா³னி ஏத்த² ஓகாஸோ’’தி சிந்தேத்வா ஆஹ – ‘‘ஸசே காஸாவஸாமிகம் பி⁴க்கு²ம் ஆனேய்யாஸி, ஸக்கா ப⁴வேய்ய தவ பதிட்டா² காது’’ந்தி. ‘‘கதா²ஹம், ப⁴ந்தே, தம் த³க்கி²ஸ்ஸாமீ’’தி? ‘‘தஹிம் தஹிம் க³ந்த்வா ஓலோகேஹீ’’தி. ஸோ பஞ்சபி மஹாவிஹாரே ஓலோகேத்வா நேவ அத்³த³க்கி². ததோ நம் தே²ரோ புச்சி² – ‘‘கதராய தி³ஸாய ப³ஹூ பி⁴க்கூ² ஆக³ச்ச²ந்தீ’’தி? ‘‘த³க்கி²ணதி³ஸாய, ப⁴ந்தே’’தி. ‘‘தேன ஹி காஸாவம் தீ³க⁴தோ ச திரியஞ்ச மினித்வா ட²பேஹி. ட²பேத்வா த³க்கி²ணதி³ஸாய விஹாரபடிபாடியா விசினித்வா தம் பி⁴க்கு²ம் ஆனேஹீ’’தி. ஸோ ததா² கத்வா தம் பி⁴க்கு²ம் தி³ஸ்வா தே²ரஸ்ஸ ஸந்திகம் ஆனேஸி. தே²ரோ புச்சி² – ‘‘தவேத³ம் காஸாவ’’ந்தி? ‘‘ஆம, ப⁴ந்தே’’தி. ‘‘குஹிம் தே பாதித’’ந்தி? ஸோ ஸப்³ப³ம் ஆசிக்கி². தே²ரோ பன தேன கதம் து⁴ரனிக்கே²பம் ஸுத்வா இதரம் புச்சி² – ‘‘தயா இத³ம் குஹிம் தி³ஸ்வா க³ஹித’’ந்தி? ஸோபி ஸப்³ப³ம் ஆரோசேஸி. ததோ நம் தே²ரோ ஆஹ – ‘‘ஸசே தே ஸுத்³த⁴சித்தேன க³ஹிதம் அப⁴விஸ்ஸ, அனாபத்தியேவ தே அஸ்ஸ. தே²ய்யசித்தேன பன க³ஹிதத்தா து³க்கடம் ஆபன்னோஸி. தம் தே³ஸேத்வா அனாபத்திகோ ஹோஹி. இத³ஞ்ச காஸாவம் அத்தனோ ஸந்தகம் கத்வா ஏதஸ்ஸேவ பி⁴க்கு²னோ தே³ஹீ’’தி. ஸோ பி⁴க்கு² அமதேனேவ அபி⁴ஸித்தோ பரமஸ்ஸாஸப்பத்தோ அஹோஸீதி. ஏவம் வத்து² ஓலோகேதப்³ப³ம்.

காலோதி அவஹாரகாலோ. ததே³வ ஹி ப⁴ண்ட³ம் கதா³சி ஸமக்³க⁴ம் ஹோதி, கதா³சி மஹக்³க⁴ம். தஸ்மா தம் ப⁴ண்ட³ம் யஸ்மிம் காலே அவஹடம், தஸ்மிம்யேவ காலே யோ தஸ்ஸ அக்³கோ⁴ ஹோதி, தேன அக்³கே⁴ன ஆபத்தி காரேதப்³பா³. ஏவம் காலோ ஓலோகேதப்³போ³.

தே³ஸோதி அவஹாரதே³ஸோ. தஞ்ஹி ப⁴ண்ட³ம் யஸ்மிம் தே³ஸே அவஹடம், தஸ்மிம்யேவ தே³ஸே யோ தஸ்ஸ அக்³கோ⁴ ஹோதி, தேன அக்³கே⁴ன ஆபத்தி காரேதப்³பா³. ப⁴ண்டு³ட்டா²னதே³ஸே ஹி ப⁴ண்ட³ம் ஸமக்³க⁴ம் ஹோதி, அஞ்ஞத்த² மஹக்³க⁴ம்.

இமஸ்ஸாபி ச அத்த²ஸ்ஸ தீ³பனத்த²மித³ம் வத்து² – அந்தரஸமுத்³தே³ கிர ஏகோ பி⁴க்கு² ஸுஸண்டா²னம் நாளிகேரம் லபி⁴த்வா ப⁴மம் ஆரோபேத்வா ஸங்க²தா²லகஸதி³ஸம் மனோரமம் பானீயதா²லகம் கத்வா தத்தே²வ ட²பேத்வா சேதியகி³ரிம் அக³மாஸி. அத²ஞ்ஞோ பி⁴க்கு² அந்தரஸமுத்³த³ம் க³ந்த்வா தஸ்மிம் விஹாரே படிவஸந்தோ தம் தா²லகம் தி³ஸ்வா தே²ய்யசித்தேன க³ஹேத்வா சேதியகி³ரிமேவ ஆக³தோ. தஸ்ஸ தத்த² யாகு³ம் பிவந்தஸ்ஸ தம் தா²லகம் தி³ஸ்வா தா²லகஸாமிகோ பி⁴க்கு² ஆஹ – ‘‘குதோ தே இத³ம் லத்³த⁴’’ந்தி? ‘‘அந்தரஸமுத்³த³தோ மே ஆனீத’’ந்தி. ஸோ தம் ‘‘நேதம் தவ ஸந்தகம், தே²ய்யாய தே க³ஹித’’ந்தி ஸங்க⁴மஜ்ஜ²ம் ஆகட்³டி⁴. தத்த² ச வினிச்ச²யம் அலபி⁴த்வா மஹாவிஹாரம் அக³மிம்ஸு. தத்த² பே⁴ரிம் பஹராபேத்வா மஹாசேதியஸமீபே ஸன்னிபாதம் கத்வா வினிச்ச²யம் ஆரபி⁴ம்ஸு. வினயத⁴ரத்தே²ரா அவஹாரம் ஸஞ்ஞாபேஸும்.

தஸ்மிஞ்ச ஸன்னிபாதே ஆபி⁴த⁴ம்மிககோ³த³த்தத்தே²ரோ நாம வினயகுஸலோ ஹோதி. ஸோ ஏவமாஹ – ‘‘இமினா இத³ம் தா²லகம் குஹிம் அவஹட’’ந்தி? ‘‘அந்தரஸமுத்³தே³ அவஹட’’ந்தி. ‘‘தத்ரித³ம் கிம் அக்³க⁴தீ’’தி? ‘‘ந கிஞ்சி அக்³க⁴தி. தத்ர ஹி நாளிகேரம் பி⁴ந்தி³த்வா மிஞ்ஜம் கா²தி³த்வா கபாலம் ச²ட்³டே³ந்தி, தா³ருஅத்த²ம் பன ப²ரதீ’’தி. ‘‘இமஸ்ஸ பி⁴க்கு²னோ ஏத்த² ஹத்த²கம்மம் கிம் அக்³க⁴தீ’’தி? ‘‘மாஸகம் வா ஊனமாஸகம் வா’’தி. ‘‘அத்தி² பன கத்த²சி ஸம்மாஸம்பு³த்³தே⁴ன மாஸகேன வா ஊனமாஸகேன வா பாராஜிகம் பஞ்ஞத்த’’ந்தி. ஏவம் வுத்தே ‘‘ஸாது⁴! ஸாது⁴! ஸுகதி²தம் ஸுவினிச்சி²த’’ந்தி ஏகஸாது⁴காரோ அஹோஸி. தேன ச ஸமயேன பா⁴தியராஜாபி சேதியவந்த³னத்த²ம் நக³ரதோ நிக்க²மந்தோ தம் ஸத்³த³ம் ஸுத்வா ‘‘கிம் இத³’’ந்தி புச்சி²த்வா ஸப்³ப³ம் படிபாடியா ஸுத்வா நக³ரே பே⁴ரிம் சராபேஸி – ‘‘மயி ஸந்தே பி⁴க்கூ²னம்பி பி⁴க்கூ²னீனம்பி கி³ஹீனம்பி அதி⁴கரணம் ஆபி⁴த⁴ம்மிககோ³த³த்தத்தே²ரேன வினிச்சி²தம் ஸுவினிச்சி²தம், தஸ்ஸ வினிச்ச²யே அதிட்ட²மானம் ராஜாணாய ட²பேமீ’’தி. ஏவம் தே³ஸோ ஓலோகேதப்³போ³.

அக்³கோ⁴தி ப⁴ண்ட³க்³கோ⁴. நவப⁴ண்ட³ஸ்ஸ ஹி யோ அக்³கோ⁴ ஹோதி, ஸோ பச்சா² பரிஹாயதி; யதா² நவதோ⁴தோ பத்தோ அட்ட² வா த³ஸ வா அக்³க⁴தி, ஸோ பச்சா² பி⁴ன்னோ வா சி²த்³தோ³ வா ஆணிக³ண்டி²காஹதோ வா அப்பக்³கோ⁴ ஹோதி தஸ்மா ந ஸப்³ப³தா³ ப⁴ண்ட³ம் பகதிஅக்³கே⁴னேவ காதப்³ப³ந்தி. ஏவம் அக்³கோ⁴ ஓலோகேதப்³போ³.

பரிபோ⁴கோ³தி ப⁴ண்ட³பரிபோ⁴கோ³. பரிபோ⁴கே³னாபி ஹி வாஸிஆதி³ப⁴ண்ட³ஸ்ஸ அக்³கோ⁴ பரிஹாயதி. தஸ்மா ஏவம் உபபரிக்கி²தப்³ப³ம், ஸசே கோசி கஸ்ஸசி பாத³க்³க⁴னகம் வாஸிம் ஹரதி, தத்ர வாஸிஸாமிகோ புச்சி²தப்³போ³ – ‘‘தயா அயம் வாஸி கித்தகேன கீதா’’தி? ‘‘பாதே³ன, ப⁴ந்தே’’தி. ‘‘கிம் பன தே கிணித்வாவ ட²பிதா, உதா³ஹு தம் வளஞ்ஜேஸீ’’தி? ஸசே வத³தி ‘‘ஏகதி³வஸம் மே த³ந்தகட்ட²ம் வா ரஜனச²ல்லிம் வா பத்தபசனகதா³ரும் வா சி²ன்னம், க⁴ம்ஸித்வா வா நிஸிதா’’தி. அத²ஸ்ஸா போராணோ அக்³கோ⁴ ப⁴ட்டோ²தி வேதி³தப்³போ³. யதா² ச வாஸியா ஏவம் அஞ்ஜனியா வா அஞ்ஜனிஸலாகாய வா குஞ்சிகாய வா பலாலேன வா து²ஸேஹி வா இட்ட²கசுண்ணேன வா ஏகவாரம் க⁴ம்ஸித்வா தோ⁴வனமத்தேனாபி அக்³கோ⁴ ப⁴ஸ்ஸதி. திபுமண்ட³லஸ்ஸ மகரத³ந்தச்சே²த³னேனாபி பரிமஜ்ஜிதமத்தேனாபி, உத³கஸாடிகாய ஸகிம் நிவாஸனபாருபனேனாபி பரிபோ⁴க³ஸீஸேன அம்ஸே வா ஸீஸே வா ட²பனமத்தேனாபி, தண்டு³லாதீ³னம் பப்போ²டனேனாபி ததோ ஏகம் வா த்³வே வா அபனயனேனாபி, அந்தமஸோ ஏகம் பாஸாணஸக்க²ரம் உத்³த⁴ரித்வா ச²ட்³டி³தமத்தேனாபி, ஸப்பிதேலாதீ³னம் பா⁴ஜனந்தரபஅவத்தனேனாபி, அந்தமஸோ ததோ மக்கி²கம் வா கிபில்லிகம் வா உத்³த⁴ரித்வா ச²ட்³டி³தமத்தேனாபி, கு³ளபிண்ட³கஸ்ஸ மது⁴ரபா⁴வஜானனத்த²ம் நகே²ன விஜ்ஜி²த்வா அணுமத்தம் க³ஹிதமத்தேனாபி அக்³கோ⁴ ப⁴ஸ்ஸதி. தஸ்மா யம்கிஞ்சி பாத³க்³க⁴னகம் வுத்தனயேனேவ ஸாமிகேஹி பரிபோ⁴கே³ன ஊனம் கதம் ஹோதி, ந தம் அவஹடோ பி⁴க்கு² பாராஜிகேன காதப்³போ³. ஏவம் பரிபோ⁴கோ³ ஓலோகேதப்³போ³. ஏவம் இமானி துலயித்வா பஞ்ச டா²னானி தா⁴ரேய்யத்த²ம் விசக்க²ணோ, ஆபத்திம் வா அனாபத்திம் வா க³ருகம் வா லஹுகம் வா ஆபத்திம் யதா²டா²னே ட²பேய்யாதி.

நிட்டி²தோ ‘‘ஆதி³யேய்ய…பே… ஸங்கேதம் வீதினாமேய்யா’’தி.

இமேஸம் பதா³னம் வினிச்ச²யோ.

இதா³னி யதி³த³ம் ‘‘யதா²ரூபே அதி³ன்னாதா³னே’’திஆதீ³னி விப⁴ஜந்தேன ‘‘யதா²ரூபம் நாமா’’திஆதி³ வுத்தம். தத்த² யதா²ரூபந்தி யதா²ஜாதிகம். தம் பன யஸ்மா பாத³தோ பட்டா²ய ஹோதி, தஸ்மா ‘‘பாத³ம் வா பாதா³ரஹம் வா அதிரேகபாத³ம் வா’’தி ஆஹ. தத்த² பாதே³ன கஹாபணஸ்ஸ சதுத்த²பா⁴க³ம் அகப்பியப⁴ண்ட³மேவ த³ஸ்ஸேதி. பாதா³ரஹேன பாத³க்³க⁴னகம் கப்பியப⁴ண்ட³ம். அதிரேகபாதே³ன உப⁴யம்பி. ஏத்தாவதா ஸப்³பா³காரேன து³தியபாராஜிகப்பஹோனகவத்து² த³ஸ்ஸிதம் ஹோதி.

பத²ப்³யா ராஜாதி ஸகலபத²வியா ராஜா தீ³பசக்கவத்தீ அஸோகஸதி³ஸோ, யோ வா பனஞ்ஞோபி ஏகதீ³பே ராஜா, ஸீஹளராஜஸதி³ஸோ. பதே³ஸராஜாதி ஏகதீ³பஸ்ஸ பதே³ஸிஸ்ஸரோ, பி³ம்பி³ஸார-பஸேனதி³-ஆத³யோ விய. மண்ட³லிகா நாம யே தீ³பபதே³ஸேபி ஏகமேகம் மண்ட³லம் பு⁴ஞ்ஜந்தி. அந்தரபோ⁴கி³கா நாம த்³வின்னம் ராஜூனம் அந்தரா கதிபயகா³மஸாமிகா. அக்க²த³ஸ்ஸாதி த⁴ம்மவினிச்ச²னகா, தே த⁴ம்மஸபா⁴யம் நிஸீதி³த்வா அபராதா⁴னுரூபம் சோரானம் ஹத்த²பாத³ச்சே²ஜ்ஜாதி³ம் அனுஸாஸந்தி. யே பன டா²னந்தரப்பத்தா அமச்சா வா ராஜகுமாரா வா கதாபராதா⁴ ஹோந்தி, தே ரஞ்ஞோ ஆரோசேந்தி, க³ருகம் டா²னம் ஸயம் ந வினிச்சி²னந்தி. மஹாமத்தாதி டா²னந்தரப்பத்தா மஹாஅமச்சா; தேபி தத்த² தத்த² கா³மே வா நிக³மே வா நிஸீதி³த்வா ராஜகிச்சம் கரோந்தி. யே வா பனாதி அஞ்ஞேபி யே ராஜகுலனிஸ்ஸிதா வா ஸகிஸ்ஸரியனிஸ்ஸிதா வா ஹுத்வா சே²ஜ்ஜபே⁴ஜ்ஜம் அனுஸாஸந்தி, ஸப்³பே³பி தே இமஸ்மிம் அத்தே² ‘‘ராஜானோ’’தி த³ஸ்ஸேதி.

ஹனேய்யுந்தி போதே²ய்யுஞ்சேவ சி²ந்தே³ய்யுஞ்ச. பப்³பா³ஜேய்யுந்தி நீஹரேய்யும். சோரோஸீதி ஏவமாதீ³னி ச வத்வா பரிபா⁴ஸேய்யும்; தேனேவாஹ – ‘‘பரிபா⁴ஸோ ஏஸோ’’தி. புரிமம் உபாதா³யாதி மேது²னம் த⁴ம்மம் படிஸேவித்வா பாராஜிகம் ஆபத்திம் ஆபன்னம் புக்³க³லம் உபாதா³ய. ஸேஸம் புப்³பே³ வுத்தனயத்தா உத்தானபத³த்த²த்தா ச பாகடமேவாதி.

93. ஏவம் உத்³தி³ட்ட²ஸிக்கா²பத³ம் பதா³னுக்கமேன விப⁴ஜித்வா இதா³னி யம் தம் ஆதி³யேய்யாதிஆதீ³ஹி ச²ஹி பதே³ஹி ஸங்கே²பதோ ஆதா³னம் த³ஸ்ஸேத்வா ஸங்கே²பதோஏவ ‘‘பாத³ம் வா பாதா³ரஹம் வா அதிரேகபாத³ம் வா’’தி ஆதா³தப்³ப³ப⁴ண்ட³ம் த³ஸ்ஸிதம், தம் யத்த² யத்த² டி²தம், யதா² யதா² ஆதா³னம் க³ச்ச²தி, அனாக³தே பாபபி⁴க்கூ²னம் லேஸோகாஸனிருந்த⁴னத்த²ம் ததா² ததா² வித்தா²ரதோ த³ஸ்ஸேதும் ‘‘பூ⁴மட்ட²ம் த²லட்ட²’’ந்திஆதி³னா நயேன மாதிகம் ட²பேத்வா ‘‘பூ⁴மட்ட²ம் நாம ப⁴ண்ட³ம் பூ⁴மியம் நிக்கி²த்தம் ஹோதீ’’திஆதி³னா நயேன தஸ்ஸ விப⁴ங்க³ம் ஆஹ.

பஞ்சவீஸதிஅவஹாரகதா² நிட்டி²தா.

பூ⁴மட்ட²கதா²

94. தத்ராயம் அனுத்தானபத³வண்ணனாய ஸத்³தி⁴ம் வினிச்ச²யகதா². நிகா²தந்தி பூ⁴மியம் க²ணித்வா ட²பிதம். படிச்ச²ன்னந்தி பம்ஸுஇட்ட²காதீ³ஹி படிச்ச²ன்னம். பூ⁴மட்ட²ம் ப⁴ண்ட³ம்…பே… க³ச்ச²தி வா, ஆபத்தி து³க்கடஸ்ஸாதி தம் ஏவம் நிக²ணித்வா வா படிச்சா²தே³த்வா வா ட²பிதத்தா பூ⁴மியம் டி²தம் ப⁴ண்ட³ம் யோ பி⁴க்கு² கேனசிதே³வ உபாயேன ஞத்வா ‘‘ஆஹரிஸ்ஸாமீ’’தி தே²ய்யசித்தோ ஹுத்வா ரத்திபா⁴கே³ உட்டா²ய க³ச்ச²தி, ஸோ ப⁴ண்ட³ட்டா²னம் அப்பத்வாபி ஸப்³ப³காயவசீவிகாரேஸு து³க்கடம் ஆபஜ்ஜதி. கத²ம்? ஸோ ஹி தஸ்ஸ ஆஹரணத்தா²ய உட்ட²ஹந்தோ யம் யம் அங்க³பச்சங்க³ம் ப²ந்தா³பேதி, ஸப்³ப³த்த² து³க்கடமேவ. நிவாஸனபாருபனம் ஸண்ட²பேதி, ஹத்த²வாரே ஹத்த²வாரே து³க்கடம். ‘‘மஹந்தம் நிதா⁴னம் ந ஸக்கா ஏகேன ஆஹரிதும், து³தியம் பரியேஸிஸ்ஸாமீ’’தி கஸ்ஸசி ஸஹாயஸ்ஸ ஸந்திகம் க³ந்துகாமோ த்³வாரம் விவரதி, பத³வாரே ச ஹத்த²வாரே ச து³க்கடம். த்³வாரபித³ஹனே பன அஞ்ஞஸ்மிம் வா க³மனஸ்ஸ அனுபகாரே அனாபத்தி. தஸ்ஸ நிபன்னோகாஸம் க³ந்த்வா ‘‘இத்த²ன்னாமா’’தி பக்கோஸதி, தமத்த²ம் ஆரோசேத்வா ‘‘ஏஹி க³ச்சா²மா’’தி வத³தி, வாசாய வாசாய து³க்கடம். ஸோ தஸ்ஸ வசனேன உட்ட²ஹதி, தஸ்ஸாபி து³க்கடம். உட்ட²ஹித்வா தஸ்ஸ ஸந்திகம் க³ந்துகாமோ நிவாஸனபாருபனம் ஸண்ட²பேதி, த்³வாரம் விவரித்வா தஸ்ஸ ஸமீபம் க³ச்ச²தி, ஹத்த²வாரபத³வாரேஸு ஸப்³ப³த்த² து³க்கடம். ஸோ தம் புச்ச²தி ‘‘அஸுகோ ச அஸுகோ ச குஹிம், அஸுகஞ்ச அஸுகஞ்ச பக்கோஸாஹீ’’தி, வாசாய வாசாய து³க்கடம். ஸப்³பே³ ஸமாக³தே தி³ஸ்வா ‘‘மயா அஸுகஸ்மிம் நாம டா²னே ஏவரூபோ நிதி⁴ உபலத்³தோ⁴, க³ச்சா²ம தம் க³ஹேத்வா புஞ்ஞானி ச கரிஸ்ஸாம, ஸுக²ஞ்ச ஜீவிஸ்ஸாமா’’தி வத³தி, வாசாய வாசாய து³க்கடமேவ.

ஏவம் லத்³த⁴ஸஹாயோ குதா³லம் பரியேஸதி. ஸசே பனஸ்ஸ அத்தனோ குதா³லோ அத்தி², ‘‘தம் ஆஹரிஸ்ஸாமீ’’தி க³ச்ச²ந்தோ ச க³ண்ஹந்தோ ச ஆஹரந்தோ ச ஸப்³ப³த்த² ஹத்த²வாரபத³வாரேஸு து³க்கடம் ஆபஜ்ஜதி. ஸசே நத்தி², அஞ்ஞம் பி⁴க்கு²ம் வா க³ஹட்ட²ம் வா க³ந்த்வா யாசதி, யாசந்தோ ச ஸசே ‘‘குதா³லம் மே தே³ஹி, குதா³லேன மே அத்தோ², கிஞ்சி காதப்³ப³மத்தி², தம் கத்வா பச்சாஹரிஸ்ஸாமீ’’தி முஸா அப⁴ணந்தோ யாசதி, வாசாய வாசாய து³க்கடம். ஸசே ‘‘மாதிகா ஸோதே⁴தப்³பா³ அத்தி², விஹாரே பூ⁴மிகம்மம் காதப்³ப³ம் அத்தீ²’’தி முஸாபி ப⁴ணதி, யம் யம் வசனம் முஸா, தத்த² தத்த² பாசித்தியம். மஹாஅட்ட²கதா²யம் பன ஸச்சேபி அலிகேபி து³க்கடமேவ வுத்தம், தம் பமாத³லிகி²தந்தி வேதி³தப்³ப³ம். ந ஹி அதி³ன்னாதா³னஸ்ஸ புப்³ப³பயோகே³ பாசித்தியட்டா²னே து³க்கடம் நாம அத்தி². ஸசே பன குதா³லஸ்ஸ த³ண்டோ³ நத்தி², ‘‘த³ண்ட³ம் கரிஸ்ஸாமீ’’தி வாஸிம் வா ப²ரஸும் வா நிஸேதி, தத³த்தா²ய க³ச்ச²தி, க³ந்த்வா ஸுக்க²கட்ட²ம் சி²ந்த³தி தச்ச²தி ஆகோடேதி, ஸப்³ப³த்த² ஹத்த²வாரபத³வாரேஸு து³க்கடம். அல்லருக்க²ம் சி²ந்த³தி, பாசித்தியம். ததோ பரம் ஸப்³ப³பயோகே³ஸு து³க்கடம். ஸங்கே²பட்ட²கதா²யம் பன மஹாபச்சரியஞ்ச தத்த² ஜாதககட்ட²லதாசே²த³னத்த²ம் வாஸிப²ரஸும் பரியேஸந்தானம்பி து³க்கடம் வுத்தம். ஸசே பன தேஸம் ஏவம் ஹோதி ‘‘வாஸிப²ரஸுகுதா³லே யாசந்தா ஆஸங்கிதா ப⁴விஸ்ஸாம, லோஹம் ஸமுட்டா²பேத்வா கரோமா’’தி. ததோ அரஞ்ஞம் க³ந்த்வா லோஹபீ³ஜத்த²ம் பத²விம் க²ணந்தி, அகப்பியபத²விம் க²ணந்தானம் து³க்கடேஹி ஸத்³தி⁴ம் பாசித்தியானீதி மஹாபச்சரியம் வுத்தம். யதா² ச இத⁴, ஏவம் ஸப்³ப³த்த² பாசித்தியட்டா²னே து³க்கடா ந முச்சதி. கப்பியபத²விம் க²ணந்தானம் து³க்கடானியேவ. பீ³ஜம் பன க³ஹேத்வா ததோ பரம் ஸப்³ப³கிரியாஸு பயோகே³ பயோகே³ து³க்கடம்.

பிடகபரியேஸனேபி ஹத்த²வாரபத³வாரேஸு வுத்தனயேனேவ து³க்கடம். முஸாவாதே³ பாசித்தியம். பிடகம் காதுகாமதாய வல்லிச்சே²த³னே பாசித்தியந்தி ஸப்³ப³ம் புரிமனயேனேவ வேதி³தப்³ப³ம். க³ச்ச²தி வா ஆபத்தி து³க்கடஸ்ஸாதி ஏவம் பரியிட்ட²ஸஹாயகுதா³லபிடகோ நிதி⁴ட்டா²னம் க³ச்ச²தி, பத³வாரே பத³வாரே து³க்கடம். ஸசே பன க³ச்ச²ந்தோ ‘‘இமம் நிதி⁴ம் லத்³தா⁴ பு³த்³த⁴பூஜம் வா த⁴ம்மபூஜம் வா ஸங்க⁴ப⁴த்தம் வா கரிஸ்ஸாமீ’’தி குஸலம் உப்பாதே³தி, குஸலசித்தேன க³மனே அனாபத்தி. கஸ்மா? ‘‘தே²ய்யசித்தோ து³தியம் வா…பே… க³ச்ச²தி வா, ஆபத்தி து³க்கடஸ்ஸா’’தி வுத்தத்தா. யதா² ச இத⁴, ஏவம் ஸப்³ப³த்த² அதே²ய்யசித்தஸ்ஸ அனாபத்தி. மக்³க³தோ ஓக்கம்ம நிதா⁴னட்டா²னம் க³மனத்தா²ய மக்³க³ம் கரோந்தோ பூ⁴தகா³மம் சி²ந்த³தி, பாசித்தியம். ஸுக்க²கட்ட²ம் சி²ந்த³தி, து³க்கடம்.

தத்த²ஜாதகந்தி சிரனிஹிதாய கும்பி⁴யா உபரி ஜாதகம். கட்ட²ம் வா லதம் வாதி ந கேவலம் கட்ட²லதமேவ, யம்கிஞ்சி அல்லம் வா ஸுக்க²ம் வா திணருக்க²லதாதி³ம் சி²ந்த³ந்தஸ்ஸ ஸஹபயோக³த்தா து³க்கடமேவ ஹோதி.

அட்ட²வித⁴ம் ஹேதம் து³க்கடம் நாம இமஸ்மிம் டா²னே ஸமோதா⁴னேத்வா தே²ரேஹி த³ஸ்ஸிதம் – புப்³ப³பயோக³து³க்கடம், ஸஹபயோக³து³க்கடம், அனாமாஸது³க்கடம், து³ருபசிண்ணது³க்கடம், வினயது³க்கடம், ஞாதது³க்கடம், ஞத்திது³க்கடம், படிஸ்ஸவது³க்கடந்தி. தத்த² ‘‘தே²ய்யசித்தோ து³தியம் வா குதா³லம் வா பிடகம் வா பரியேஸதி க³ச்ச²தி வா, ஆபத்தி து³க்கடஸ்ஸா’’தி இத³ம் புப்³ப³பயோக³து³க்கடம் நாம. ஏத்த² ஹி து³க்கடட்டா²னே து³க்கடம், பாசித்தியட்டா²னே பாசித்தியமேவ ஹோதி. ‘‘தத்த²ஜாதகம் கட்ட²ம் வா லதம் வா சி²ந்த³தி, ஆபத்தி து³க்கடஸ்ஸா’’தி இத³ம் ஸஹபயோக³து³க்கடம் நாம. ஏத்த² பன பாசித்தியவத்து² ச து³க்கடவத்து² ச து³க்கடட்டா²னேயேவ திட்ட²தி. கஸ்மா? அவஹாரஸ்ஸ ஸஹபயோக³த்தாதி. யம் பன த³ஸவித⁴ம் ரதனம், ஸத்தவித⁴ம் த⁴ஞ்ஞம், ஸப்³ப³ஞ்ச ஆவுத⁴ப⁴ண்டா³தி³ம் ஆமஸந்தஸ்ஸ து³க்கடம் வுத்தம், இத³ம் அனாமாஸது³க்கடம் நாம. யம் கத³லினாளிகேராதீ³னம் தத்த²ஜாதகப²லானி ஆமஸந்தஸ்ஸ து³க்கடம் வுத்தம், இத³ம் து³ருபசிண்ணது³க்கடம் நாம. யம் பன பிண்டா³ய சரந்தஸ்ஸ பத்தே ரஜே பதிதே பத்தம் அப்படிக்³க³ஹேத்வா அதோ⁴வித்வா வா தத்த² பி⁴க்க²ம் க³ண்ஹந்தஸ்ஸ து³க்கடம் வுத்தம், இத³ம் வினயது³க்கடம் நாம. ‘‘ஸுத்வா ந வத³ந்தி, ஆபத்தி து³க்கடஸ்ஸா’’தி (பாரா. 419) இத³ம் ஞாதது³க்கடம் நாம. யம் ஏகாத³ஸஸு ஸமனுபா⁴ஸனாஸு ‘‘ஞத்தியா து³க்கட’’ந்தி (பாரா. 414) வுத்தம், இத³ம் ஞத்திது³க்கடம் நாம. ‘‘தஸ்ஸ, பி⁴க்க²வே, பி⁴க்கு²னோ புரிமிகா ச ந பஞ்ஞாயதி, படிஸ்ஸவே ச ஆபத்தி து³க்கடஸ்ஸா’’தி (மஹாவ. 207) இத³ம் படிஸ்ஸவது³க்கடம் நாம. இத³ம் பன ஸஹபயோக³து³க்கடம். தேன வுத்தம் – ‘‘யம்கிஞ்சி அல்லம் வா ஸுக்க²ம் வா திணருக்க²லதாதி³ம் சி²ந்த³ந்தஸ்ஸ ஸஹபயோக³த்தா து³க்கடமேவ ஹோதீ’’தி.

ஸசே பனஸ்ஸ தத்த²ஜாதகே திணருக்க²லதாதி³ம்ஹி சி²ன்னேபி லஜ்ஜித⁴ம்மோ ஓக்கமதி, ஸம்வரோ உப்பஜ்ஜதி, சே²த³னபச்சயா து³க்கடம் தே³ஸேத்வா முச்சதி. அத² து⁴ரனிக்கே²பம் அகத்வா ஸஉஸ்ஸாஹோவ பம்ஸும் க²ணதி, சே²த³னது³க்கடம் படிப்பஸ்ஸம்ப⁴தி, க²ணனது³க்கடே பதிட்டா²தி. அகப்பியபத²விம் க²ணந்தோபி ஹி இத⁴ ஸஹபயோக³த்தா து³க்கடமேவ ஆபஜ்ஜதி. ஸசே பனஸ்ஸ ஸப்³ப³தி³ஸாஸு க²ணித்வா கும்பி⁴மூலம் பத்தஸ்ஸாபி லஜ்ஜித⁴ம்மோ ஓக்கமதி, க²ணனபச்சயா து³க்கடம் தே³ஸேத்வா முச்சதி.

ப்³யூஹதி வாதி அத² பன ஸஉஸ்ஸாஹோவ பம்ஸும் வியூஹதி, ஏகபஸ்ஸே ராஸிம் கரோதி, க²ணனது³க்கடம் படிப்பஸ்ஸம்ப⁴தி, வியூஹனது³க்கடே பதிட்டா²தி. தஞ்ச பம்ஸும் தத்த² தத்த² புஞ்ஜம் கரோந்தோ பயோகே³ பயோகே³ து³க்கடம் ஆபஜ்ஜதி. ஸசே பன ராஸிம் கத்வாபி து⁴ரனிக்கே²பம் கரோதி, லஜ்ஜித⁴ம்மம் ஆபஜ்ஜதி, வியூஹனது³க்கடம் தே³ஸேத்வா முச்சதி. உத்³த⁴ரதி வாதி அத² பன ஸஉஸ்ஸாஹோவ பம்ஸும் உத்³த⁴ரித்வா ப³ஹி பாதேதி, வியூஹனது³க்கடம் படிப்பஸ்ஸம்ப⁴தி, உத்³த⁴ரணது³க்கடே பதிட்டா²தி. பம்ஸும் பன குதா³லேன வா ஹத்தே²ஹி வா பச்சி²யா வா தஹிம் தஹிம் பாதேந்தோ பயோகே³ பயோகே³ து³க்கடம் ஆபஜ்ஜதி. ஸசே பன ஸப்³ப³ம் பம்ஸும் நீஹரித்வா கும்பி⁴ம் த²லட்ட²ம் கத்வாபி லஜ்ஜித⁴ம்மம் ஆபஜ்ஜதி, உத்³த⁴ரணது³க்கடம் தே³ஸேத்வா முச்சதி. அத² பன ஸஉஸ்ஸாஹோவ கும்பி⁴ம் ஆமஸதி, உத்³த⁴ரணது³க்கடம் படிப்பஸ்ஸம்ப⁴தி, ஆமஸனது³க்கடே பதிட்டா²தி. ஆமஸித்வாபி ச லஜ்ஜித⁴ம்மம் ஆபஜ்ஜந்தோ ஆமஸனது³க்கடம் தே³ஸேத்வா முச்சதி. அத² ஸஉஸ்ஸாஹோவ கும்பி⁴ம் ப²ந்தா³பேதி, ஆமஸனது³க்கடம் படிப்பஸ்ஸம்ப⁴தி, ‘‘ப²ந்தா³பேதி, ஆபத்தி து²ல்லச்சயஸ்ஸா’’தி வுத்தது²ல்லச்சயே பதிட்டா²தி.

தத்ராயம் து³க்கடது²ல்லச்சயானம் த்³வின்னம்பி வசனத்தோ² – பட²மம் தாவேத்த² து³ட்டு² கதம் ஸத்தா²ரா வுத்தகிச்சம் விராதே⁴த்வா கதந்தி து³க்கடம். அத² வா து³ட்ட²ம் கதம், விரூபா ஸா கிரியா பி⁴க்கு²கிரியானம் மஜ்ஜே² ந ஸோப⁴தீதி ஏவம்பி து³க்கடம். வுத்தஞ்சேதம் –

‘‘து³க்கடம் இதி யம் வுத்தம், தம் ஸுணோஹி யதா²தத²ம்;

அபரத்³த⁴ம் விரத்³த⁴ஞ்ச, க²லிதம் யஞ்ச து³க்கடம்.

‘‘யம் மனுஸ்ஸோ கரே பாபம், ஆவி வா யதி³ வா ரஹோ;

து³க்கடந்தி பவேதே³ந்தி, தேனேதம் இதி வுச்சதீ’’தி. (பரி. 339);

இதரம் பன தூ²லத்தா, அச்சயத்தா ச து²ல்லச்சயம். ‘‘ஸம்பராயே ச து³க்³க³தி’’ (ஸம். நி. 1.49), ‘‘யம் ஹோதி கடுகப்ப²ல’’ந்திஆதீ³ஸு (த⁴. ப. 66; நேத்தி. 91) விய சேத்த² ஸம்யோக³பா⁴வோ வேதி³தப்³போ³. ஏகஸ்ஸ ஸந்திகே தே³ஸேதப்³பே³ஸு ஹி அச்சயேஸு தேன ஸமோ தூ²லோ அச்சயோ நத்தி². தஸ்மா வுத்தம் ‘‘தூ²லத்தா அச்சயத்தா ச து²ல்லச்சய’’ந்தி. வுத்தஞ்சேதம் –

‘‘து²ல்லச்சயந்தி யம் வுத்தம், தம் ஸுணோஹி யதா²தத²ம்;

ஏகஸ்ஸ மூலே யோ தே³ஸேதி, யோ ச தம் படிக்³க³ண்ஹதி;

அச்சயோ தேன ஸமோ நத்தி², தேனேதம் இதி வுச்சதீ’’தி. (பரி. 339);

ப²ந்தா³பேந்தஸ்ஸ ச பயோகே³ பயோகே³ து²ல்லச்சயம். ப²ந்தா³பேத்வாபி ச லஜ்ஜித⁴ம்மம் ஓக்கந்தோ து²ல்லச்சயம் தே³ஸேத்வா முச்சதி. ஸஹபயோக³தோ பட்டா²யேவ சேத்த² புரிமா புரிமா ஆபத்தி படிப்பஸ்ஸம்ப⁴தி. ஸஹபயோக³ம் பன அகத்வா லஜ்ஜித⁴ம்மம் ஓக்கந்தேன யா புப்³ப³பயோகே³ து³க்கடபாசித்தியா ஆபன்னா, ஸப்³பா³ தா தே³ஸேதப்³பா³. ஸஹபயோகே³ ச தத்த²ஜாதகச்சே²த³னே ப³ஹுகானிபி து³க்கடானி பம்ஸுக²ணனம் பத்வா படிப்பஸ்ஸம்ப⁴ந்தி. ஏகம் க²ணனது³க்கடமேவ ஹோதி. க²ணனே ப³ஹுகானிபி வியூஹனம், வியூஹனே ப³ஹுகானிபி உத்³த⁴ரணம், உத்³த⁴ரணே ப³ஹுகானிபி ஆமஸனம், ஆமஸனே ப³ஹுகானிபி ப²ந்தா³பனம் பத்வா படிப்பஸ்ஸம்ப⁴ந்தி. பம்ஸுக²ணனாதீ³ஸு ச லஜ்ஜித⁴ம்மே உப்பன்னே ப³ஹுகாபி ஆபத்தியோ ஹோந்து, ஏகமேவ தே³ஸேத்வா முச்சதீதி குருந்த³ட்ட²கதா²யம் வுத்தம். புரிமாபத்திபடிப்பஸ்ஸத்³தி⁴ ச நாமேஸா ‘‘ஞத்தியா து³க்கடம், த்³வீஹி கம்மவாசாஹி து²ல்லச்சயா படிப்பஸ்ஸம்ப⁴ந்தீ’’தி (பாரா. 414) ஏவம் அனுஸாவனாஸுத்தேஸுயேவ ஆக³தா. இத⁴ பன து³தியபாராஜிகே அட்ட²கதா²சரியப்பமாணேன க³ஹேதப்³பா³தி.

டா²னாசாவேதி, ஆபத்தி பாராஜிகஸ்ஸாதி யோ பன ப²ந்தா³பேத்வாபி லஜ்ஜித⁴ம்மம் அனோக்கமித்வாவ தம் கும்பி⁴ம் டா²னதோ அந்தமஸோ கேஸக்³க³மத்தம்பி சாவேதி, பாராஜிகமேவ ஆபஜ்ஜதீதி அத்தோ². டா²னா சாவனஞ்சேத்த² ச²ஹி ஆகாரேஹி வேதி³தப்³ப³ம். கத²ம்? கும்பி⁴ம் முக²வட்டியம் க³ஹேத்வா அத்தனோ அபி⁴முக²ம் ஆகட்³ட⁴ந்தோ இமினா அந்தேன பு²ட்டோ²காஸம் கேஸக்³க³மத்தம்பி பாரிமந்தேன அதிக்காமேதி, பாராஜிகம். ததே²வ க³ஹேத்வா பரதோ பேல்லேந்தோ பாரிமந்தேன பு²ட்டோ²காஸம் கேஸக்³க³மத்தம்பி இமினா அந்தேன அதிக்காமேதி, பாராஜிகம். வாமதோ வா த³க்கி²ணதோ வா அபனாமேந்தோ வாமந்தேன பு²ட்டோ²காஸம் கேஸக்³க³மத்தம்பி த³க்கி²ணந்தேன அதிக்காமேதி, பாராஜிகம். த³க்கி²ணந்தேன வா பு²ட்டோ²காஸம் கேஸக்³க³மத்தம்பி வாமந்தேன அதிக்காமேதி, பாராஜிகம். உத்³த⁴ம் உக்கி²பந்தோ கேஸக்³க³மத்தம்பி பூ⁴மிதோ மோசேதி, பாராஜிகம். க²ணித்வா ஹேட்ட²தோ ஓஸீதே³ந்தோ பு³ந்தே³ன பு²ட்டோ²காஸம் கேஸக்³க³மத்தம்பி முக²வட்டியா அதிக்காமேதி, பாராஜிகந்தி ஏவம் ஏகட்டா²னே டி²தாய கும்பி⁴யா. யதி³ பன கும்பி⁴முக²வட்டியா பாஸம் கத்வா லோஹகா²ணும் வா க²தி³ரஸாராதி³கா²ணும் வா பத²வியம் ஆகோடேத்வா தத்த² ஸங்க²லிகாய ப³ந்தி⁴த்வா ட²பேந்தி, ஏகிஸ்ஸா தி³ஸாய ஏகாய ஸங்க²லிகாய ப³த்³தா⁴ய த்³வே டா²னானி லப்³ப⁴ந்தி, த்³வீஸு தீஸு சதூஸு தி³ஸாஸு சதூஹி ஸங்க²லிகாஹி ப³த்³தா⁴ய பஞ்ச டா²னானி லப்³ப⁴ந்தி.

தத்த² ஏககா²ணுகே ப³த்³த⁴கும்பி⁴யா பட²மம் கா²ணுகம் வா உத்³த⁴ரதி, ஸங்க²லிகம் வா சி²ந்த³தி, து²ல்லச்சயம். ததோ கும்பி⁴ம் யதா²வுத்தனயேன கேஸக்³க³மத்தம்பி டா²னா சாவேதி, பாராஜிகம். அத² பட²மம் கும்பி⁴ம் உத்³த⁴ரதி, து²ல்லச்சயம். ததோ கா²ணுகம் கேஸக்³க³மத்தம்பி டா²னா சாவேதி, ஸங்க²லிகம் வா சி²ந்த³தி, பாராஜிகம். ஏதேன உபாயேன த்³வீஸு தீஸு சதூஸு கா²ணுகேஸு ப³த்³த⁴கும்பி⁴யாபி பச்சி²மே டா²னாசாவனே பாராஜிகம். ஸேஸேஸு து²ல்லச்சயம் வேதி³தப்³ப³ம்.

ஸசே கா²ணு நத்தி², ஸங்க²லிகாய அக்³கே³ வலயம் கத்வா தத்த²ஜாதகே மூலே பவேஸிதம் ஹோதி, பட²மம் கும்பி⁴ம் உத்³த⁴ரித்வா பச்சா² மூலம் சே²த்வா வலயம் நீஹரதி, பாராஜிகம். அத² மூலம் அச்சே²த்வா வலயம் இதோ சிதோ ச ஸாரேதி, ரக்க²தி. ஸசே பன மூலதோ அனீஹரித்வாபி ஹத்தே²ன க³ஹேத்வா ஆகாஸக³தம் கரோதி, பாராஜிகம். அயமேத்த² விஸேஸோ. ஸேஸம் வுத்தனயமேவ.

கேசி பன நிமித்தத்தா²ய கும்பி⁴மத்த²கே நிக்³ரோத⁴ருக்கா²தீ³னி ரோபேந்தி, மூலானி கும்பி⁴ம் வினந்தி⁴த்வா டி²தானி ஹோந்தி, ‘‘மூலானி சி²ந்தி³த்வா கும்பி⁴ம் க³ஹேஸ்ஸாமீ’’தி சி²ந்த³ந்தஸ்ஸ பயோகே³ பயோகே³ து³க்கடம். சி²ந்தி³த்வா ஓகாஸம் கத்வா கும்பி⁴ம் கேஸக்³க³மத்தம்பி டா²னா சாவேதி, பாராஜிகம். மூலானி சி²ந்த³தோவ லுடி²த்வா கும்பீ⁴ நின்னட்டா²னம் க³தா, ரக்க²தி தாவ. க³தட்டா²னதோ உத்³த⁴ரதி, பாராஜிகம். ஸசே சி²ன்னேஸு மூலேஸு ஏகமூலமத்தேன கும்பீ⁴ திட்ட²தி, ஸோ ச தம் ‘‘இமஸ்மிம் மூலே சி²ன்னே பதிஸ்ஸதீ’’தி சி²ந்த³தி, சி²ன்னமத்தே பாராஜிகம். ஸசே பன ஏகமூலேனேவ பாஸே ப³த்³த⁴ஸூகரோ விய டி²தா ஹோதி, அஞ்ஞம் கிஞ்சி லக்³க³னகம் நத்தி², தஸ்மிம்பி மூலே சி²ன்னமத்தே பாராஜிகம். ஸசே கும்பி⁴மத்த²கே மஹாபாஸாணோ ட²பிதோ ஹோதி, தம் த³ண்டே³ன உக்கி²பித்வா அபனேதுகாமோ கும்பி⁴மத்த²கே ஜாதருக்க²ம் சி²ந்த³தி, து³க்கடம். தஸ்ஸா ஸமீபே ஜாதகம் சே²த்வா ஆஹரதி, அதத்த²ஜாதகத்தா தம் சி²ந்த³தோ பாசித்தியம்.

அத்தனோ பா⁴ஜனந்தி ஸசே பன கும்பி⁴ம் உத்³த⁴ரிதும் அஸக்கோந்தோ கும்பி⁴க³தப⁴ண்ட³க்³க³ஹணத்த²ம் அத்தனோ பா⁴ஜனம் பவேஸேத்வா அந்தோகும்பி⁴யம் பஞ்சமாஸகம் வா அதிரேகபஞ்சமாஸகம் வா அக்³க⁴னகம் தே²ய்யசித்தோ ஆமஸதி, ஆபத்தி து³க்கடஸ்ஸ. பரிச்சே²தோ³ சேத்த² பாராஜிகனியமனத்த²ம் வுத்தோ. தே²ய்யசித்தேன பன ஊனபஞ்சமாஸகம்பி ஆமஸந்தோ து³க்கடம் ஆபஜ்ஜதியேவ.

ப²ந்தா³பேதீதி ஏத்த² யாவ ஏகாப³த்³த⁴ம் கத்வா அத்தனோ பா⁴ஜனம் பவேஸேதி, தாவ ப²ந்தா³பேதீதி வுச்சதி. அபி ச இதோ சிதோ ச அபப்³யூஹந்தோபி ப²ந்தா³பேதியேவ, ஸோ து²ல்லச்சயம் ஆபஜ்ஜதி. யதா³ பன ஏகாப³த்³த⁴பா⁴வோ சி²ன்னோ, கும்பி⁴க³தம் கும்பி⁴யமேவ, பா⁴ஜனக³தம்பி பா⁴ஜனேயேவ ஹோதி, ததா³ அத்தனோ பா⁴ஜனக³தம் நாம ஹோதி. ஏவம் கத்வா கும்பி⁴தோ அனீஹதேபி ச பா⁴ஜனே பாராஜிகம் ஆபஜ்ஜதி.

முட்டி²ம் வா சி²ந்த³தீதி ஏத்த² யதா² அங்கு³லந்தரேஹி நிக்க²ந்தகஹாபணா கும்பி⁴க³தே கஹாபணே ந ஸம்பு²ஸந்தி, ஏவம் முட்டி²ம் கரோந்தோ முட்டி²ம் சி²ந்த³தி நாம; ஸோபி பாராஜிகம் ஆபஜ்ஜதி.

ஸுத்தாரூள்ஹந்தி ஸுத்தே ஆரூள்ஹம்; ஸுத்தேன ஆவுதஸ்ஸாபி ஸுத்தமயஸ்ஸாபி ஏதம் அதி⁴வசனம். பாமங்கா³தீ³னிஹி ஸோவண்ணமயானிபி ஹோந்தி ரூபியமயானிபி ஸுத்தமயானிபி, முத்தாவலிஆத³யோபி ஏத்தே²வ ஸங்க³ஹம் க³தா. வேட²னந்தி ஸீஸவேட²னபடோ வுச்சதி. ஏதேஸு யம்கிஞ்சி தே²ய்யசித்தோ ஆமஸதி, து³க்கடம். ப²ந்தா³பேதி, து²ல்லச்சயம். பாமங்கா³தீ³னி கோடியம் க³ஹேத்வா ஆகாஸட்ட²ம் அகரோந்தோ உச்சாரேதி, து²ல்லச்சயம்.

க⁴ம்ஸந்தோ நீஹரதீதி ஏத்த² பன பரிபுண்ணாய கும்பி⁴யா உபரி ஸமதித்திகம் கும்பி⁴ம் கத்வா ட²பிதம் வா ஏகம் கோடிம் பு³ந்தே³ ஏகம் கோடிம் முக²வட்டியம் கத்வா ட²பிதம் வா க⁴ம்ஸந்தஸ்ஸ நீஹரதோ து²ல்லச்சயம். கும்பி⁴முகா² மோசேந்தஸ்ஸ பாராஜிகம். யம் பன உபட்³ட⁴கும்பி⁴யம் வா ரித்தகும்பி⁴யம் வா ட²பிதம், தஸ்ஸ அத்தனோ பு²ட்டோ²காஸோவ டா²னம், ந ஸகலா கும்பீ⁴, தஸ்மா தம் க⁴ம்ஸந்தஸ்ஸாபி நீஹரதோ பதிட்டி²தோகாஸதோ கேஸக்³க³மத்தே முத்தே பாராஜிகமேவ. கும்பி⁴யா பன பரிபுண்ணாய வா ஊனாய வா உஜுகமேவ உத்³த⁴ரந்தஸ்ஸ ஹேட்டி²மகோடியா பதிட்டி²தோகாஸா முத்தமத்தேவ பாராஜிகம். அந்தோகும்பி⁴யம் ட²பிதம் யம்கிஞ்சி பாராஜிகப்பஹோனகம் ப⁴ண்ட³ம் ஸகலகும்பி⁴யம் சாரேந்தஸ்ஸ, பாமங்கா³தி³ஞ்ச க⁴ம்ஸித்வா நீஹரந்தஸ்ஸ யாவ முக²வட்டிம் நாதிக்கமதி, தாவ து²ல்லச்சயமேவ. தஸ்ஸ ஹி ஸப்³பா³பி கும்பீ⁴ டா²னந்தி ஸங்கே²பமஹாபச்சரியாதீ³ஸு வுத்தம். மஹாஅட்ட²கதா²யம் பன ‘‘ட²பிதட்டா²னமேவ டா²னம், ந ஸகலா கும்பீ⁴. தஸ்மா யதா²டி²தட்டா²னதோ கேஸக்³க³மத்தம்பி மோசேந்தஸ்ஸ பாராஜிகமேவா’’தி வுத்தம், தம் பமாணம். இதரம் பன ஆகாஸக³தம் அகரோந்தஸ்ஸ சீவரவம்ஸே ட²பிதசீவரவேட²னகனயேன வுத்தம், தம் ந க³ஹேதப்³ப³ம். வினயவினிச்ச²யே ஹி ஆக³தே க³ருகே டா²தப்³ப³ம், ஏஸா வினயத⁴ம்மதா. அபிச ‘‘அத்தனோ பா⁴ஜனக³தம் வா கரோதி, முட்டி²ம் வா சி²ந்த³தீ’’தி வசனதோ பேதம் வேதி³தப்³ப³ம். யதா² அந்தோகும்பி⁴யம் டி²தஸ்ஸ ந ஸப்³பா³ கும்பீ⁴ டா²னந்தி.

ஸப்பிஆதீ³ஸு யம்கிஞ்சி பிவதோ ஏகபயோகே³ன பீதமத்தே பாராஜிகந்தி மஹாஅட்ட²கதா²யம் வுத்தம். மஹாபச்சரியாதீ³ஸு பன அயம் விபா⁴கோ³ த³ஸ்ஸிதோ – ‘‘முக²ம் அனபனேத்வா ஆகட்³ட⁴ந்தஸ்ஸ பிவதோ ஸசே பரக³லக³தம் பாத³ம் ந அக்³க⁴தி, முக²க³தேன ஸத்³தி⁴ம் அக்³க⁴தி, ரக்க²தி தாவ. கண்டே²ன பன பரிச்சி²ன்னகாலேயேவ பாராஜிகம் ஹோதி. ஸசேபி ஓட்டே²ஹி பரிச்சி²ந்த³ந்தோ ஓட்டே² பித³ஹதி, பாராஜிகமேவ. உப்பலத³ண்ட³வேளுனாளினளனாளிஆதீ³ஹி பிவந்தஸ்ஸாபி ஸசே பரக³லக³தமேவ பாத³ம் அக்³க⁴தி, பாராஜிகம். ஸசே ஸஹ முக²க³தேன அக்³க⁴தி, ந தாவ பாராஜிகம் ஹோதி. உப்பலத³ண்டா³தி³க³தேன ஸத்³தி⁴ம் ஏகாப³த்³த⁴பா⁴வம் கோபேத்வா ஓட்டே²ஹி பரிச்சி²ன்னமத்தே பாராஜிகம். ஸசே உப்பலத³ண்டா³தி³க³தேன ஸத்³தி⁴ம் அக்³க⁴தி, உப்பலத³ண்டா³தீ³னம் பு³ந்தே³ அங்கு³லியாபி பிஹிதமத்தே பாராஜிகம். பாத³க்³க⁴னகே பரக³லம் அப்பவிட்டே² உப்பலத³ண்டா³தீ³ஸு ச முகே² ச அதிரேகபாதா³ரஹம்பி ஏகாப³த்³த⁴ம் ஹுத்வா திட்ட²தி, ரக்க²தியேவா’’தி. தம் ஸப்³ப³ம்பி யஸ்மா ‘‘அத்தனோ பா⁴ஜனக³தம் வா கரோதி, முட்டி²ம் வா சி²ந்த³தீ’’தி இமம் நயம் ப⁴ஜதி, தஸ்மா ஸுத³ஸ்ஸிதமேவ. ஏஸ தாவ ஏகாப³த்³தே⁴ நயோ.

ஸசே பன ஹத்தே²ன வா பத்தேன வா தா²லகாதி³னா வா கேனசி பா⁴ஜனேன க³ஹேத்வா பிவதி, யம்ஹி பயோகே³ பாத³க்³க⁴னகம் பூரேதி, தம்ஹி க³தே பாராஜிகம். அத² மஹக்³க⁴ம் ஹோதி, ஸிப்பிகாயபி ஏகபயோகே³னேவ பாத³க்³க⁴னகம் க³ஹேதும் ஸக்கா ஹோதி, ஏகுத்³தா⁴ரேயேவ பாராஜிகம். பா⁴ஜனம் பன நிமுஜ்ஜாபேத்வா க³ண்ஹந்தஸ்ஸ யாவ ஏகாப³த்³த⁴ம் ஹோதி, தாவ ரக்க²தி. முக²வட்டிபரிச்சே²தே³ன வா உத்³தா⁴ரேன வா பாராஜிகம். யதா³ பன ஸப்பிம் வா தேலம் வா அச்ச²ம் தேலஸதி³ஸமேவ மது⁴பா²ணிதம் வா கும்பி⁴ம் ஆவிஞ்சே²த்வா அத்தனோ பா⁴ஜனே பவேஸேதி, ததா³ தேஸம் அச்ச²தாய ஏகாப³த்³த⁴தா நத்தீ²தி பாத³க்³க⁴னகே முக²வட்டிதோ க³ளிதமத்தே பாராஜிகம்.

பசித்வா ட²பிதம் பன மது⁴பா²ணிதம் ஸிலேஸோ விய சிக்கனம் ஆகட்³ட⁴னவிகட்³ட⁴னயோக்³க³ம் ஹோதி, உப்பன்னே குக்குச்சே ஏகாப³த்³த⁴மேவ ஹுத்வா படினீஹரிதும் ஸக்கோதி, ஏதம் முக²வட்டியா நிக்க²மித்வா பா⁴ஜனே பவிட்ட²ம்பி பா³ஹிரேன ஸத்³தி⁴ம் ஏகாப³த்³த⁴த்தா ரக்க²தி, முக²வட்டிதோ சி²ன்னமத்தே பன பாராஜிகம். யோபி தே²ய்யசித்தேன பரஸ்ஸ கும்பி⁴யா பாத³க்³க⁴னகம் ஸப்பிம் வா தேலம் வா அவஸ்ஸபிவனகம் யம்கிஞ்சி து³கூலஸாடகம் வா சம்மக²ண்டா³தீ³னம் வா அஞ்ஞதரம் பக்கி²பதி, ஹத்த²தோ முத்தமத்தே பாராஜிகம்.

ரித்தகும்பி⁴யா ‘‘இதா³னி தேலம் ஆகிரிஸ்ஸந்தீ’’தி ஞத்வா யம்கிஞ்சி ப⁴ண்ட³ம் தே²ய்யசித்தோ பக்கி²பதி, தம் சே தத்த² தேலே ஆகிண்ணே பஞ்சமாஸகஅக்³க⁴னகம் பிவதி, பீதமத்தே பாராஜிகந்தி மஹாஅட்ட²கதா²யம் வுத்தம். தம் பன தத்தே²வ ஸுக்க²தளாகே ஸுக்க²மாதிகாய உஜுகரணவினிச்ச²யேன விருஜ்ஜ²தி, அவஹாரலக்க²ணஞ்சேத்த² ந பஞ்ஞாயதி, தஸ்மா ந க³ஹேதப்³ப³ம். மஹாபச்சரியாதீ³ஸு பன தஸ்ஸ உத்³தா⁴ரே பாராஜிகம் வுத்தம், தம் யுத்தம்.

பரஸ்ஸ ரித்தகும்பி⁴யா ஸங்கோ³பனத்தா²ய ப⁴ண்ட³ம் ட²பேத்வா தத்த² தேலே ஆகிண்ணே ‘‘ஸசே அயம் ஜானிஸ்ஸதி, மம் பலிபு³ஜ்ஜி²ஸ்ஸதீ’’தி பீ⁴தோ பாத³க்³க⁴னகம் தேலம் பீதம் ப⁴ண்ட³ம் தே²ய்யசித்தேன உத்³த⁴ரதி, பாராஜிகம். ஸுத்³த⁴சித்தேன உத்³த⁴ரதி, பரே ஆஹராபேந்தே ப⁴ண்ட³தே³ய்யம். ப⁴ண்ட³தே³ய்யம் நாம யம் பரஸ்ஸ நட்ட²ம், தஸ்ஸ மூலம் வா ததே³வ வா ப⁴ண்ட³ம் தா³தப்³ப³ந்தி அத்தோ². நோ சே தே³தி, ஸாமிகஸ்ஸ து⁴ரனிக்கே²பே பாராஜிகம். ஸசே பரஸ்ஸ கும்பி⁴யா அஞ்ஞோ ஸப்பிம் வா தேலம் வா ஆகிரதி, தத்ர சாயம் தே²ய்யசித்தேன தேலபிவனகம் ப⁴ண்ட³ம் பக்கி²பதி, வுத்தனயேனேவ பாராஜிகம். அத்தனோ ரித்தகும்பி⁴யா பரஸ்ஸ ஸப்பிம் வா தேலம் வா ஆகிரணபா⁴வம் ஞத்வா தே²ய்யசித்தேன ப⁴ண்ட³ம் நிக்கி²பதி, புப்³பே³ வுத்தனயேனேவ உத்³தா⁴ரே பாராஜிகம். ஸுத்³த⁴சித்தோ நிக்கி²பித்வா பச்சா² தே²ய்யசித்தேன உத்³த⁴ரதி, பாராஜிகமேவ. ஸுத்³த⁴சித்தோவ உத்³த⁴ரதி, நேவ அவஹாரோ, ந கீ³வா; மஹாபச்சரியம் பன அனாபத்திமத்தமேவ வுத்தம். ‘‘‘கிஸ்ஸ மம கும்பி⁴யம் தேலம் ஆகிரஸீ’தி குபிதோ அத்தனோ ப⁴ண்ட³ம் உத்³த⁴ரித்வா ச²ட்³டே³தி, நோ ப⁴ண்ட³தே³ய்ய’’ந்தி குருந்தி³யம் வுத்தம். தே²ய்யசித்தேன முக²வட்டியம் க³ஹேத்வா கும்பி⁴ம் ஆவிஞ்ச²தி தேலம் க³ளேதுகாமோ, பாத³க்³க⁴னகே க³ளிதே பாராஜிகம். தே²ய்யசித்தேனேவ ஜஜ்ஜரம் கரோதி ‘‘ஸவித்வா க³மிஸ்ஸதீ’’தி பாத³க்³க⁴னகே ஸவித்வா க³தே பாராஜிகம். தே²ய்யசித்தேனேவ சி²த்³த³ம் கரோதி ஓமட்ட²ம் வா உம்மட்ட²ம் வா வேமட்ட²ம் வா, இத³ம் பன ஸம்மோஹட்டா²னம்; தஸ்மா ஸுட்டு² ஸல்லேக்கே²தப்³ப³ம். அயஞ்ஹேத்த² வினிச்ச²யோ – ஓமட்ட²ம் நாம அதோ⁴முக²சி²த்³த³ம்; உம்மட்ட²ம் நாம உத்³த⁴ம்முக²சி²த்³த³ம்; வேமட்ட²ம் நாம உளுங்கஸ்ஸேவ உஜுக³தசி²த்³த³ம். தத்ர ஓமட்ட²ஸ்ஸ ப³ஹி பட்டா²ய கதஸ்ஸ அப்³ப⁴ந்தரந்ததோ பாத³க்³க⁴னகே தேலே க³ளிதே ப³ஹி அனிக்க²ந்தேபி பாராஜிகம். கஸ்மா? யஸ்மா ததோ க³ளிதமத்தமேவ ப³ஹிக³தம் நாம ஹோதி, ந கும்பி⁴க³தஸங்க்²யம் லப⁴தி. அந்தோ பட்டா²ய கதஸ்ஸ பா³ஹிரந்ததோ பாத³க்³க⁴னகே க³ளிதே பாராஜிகம். உம்மட்ட²ஸ்ஸ யதா² ததா² வா கதஸ்ஸ பா³ஹிரந்ததோ பாத³க்³க⁴னகே க³ளிதே பாராஜிகம். தஞ்ஹி யாவ பா³ஹிரந்ததோ ந க³ளதி, தாவ கும்பி⁴க³தமேவ ஹோதி. ‘‘வேமட்ட²ஸ்ஸ ச கபாலமஜ்ஜ²தோ க³ளிதவஸேன காரேதப்³போ³’’தி அட்ட²கதா²ஸு வுத்தம். தம் பன அந்தோ ச ப³ஹி ச பட்டா²ய மஜ்ஜே² ட²பேத்வா கதசி²த்³தே³ தளாகஸ்ஸ ச மரியாத³பே⁴தே³ன ஸமேதி. அந்தோ பட்டா²ய கதே பன பா³ஹிரந்தேன, ப³ஹி பட்டா²ய கதே அப்³ப⁴ந்தரந்தேன காரேதப்³போ³தி இத³மேத்த² யுத்தம். யோ பன ‘‘வட்டித்வா க³ச்சி²ஸ்ஸதீ’’தி தே²ய்யசித்தேன கும்பி⁴யா ஆதா⁴ரகம் வா உபத்த²ம்ப⁴னலேட்³டு³கே வா அபனேதி, வட்டித்வா க³தாய பாராஜிகம். தேலாகிரணபா⁴வம் பன ஞத்வா ரித்தகும்பி⁴யா ஜஜ்ஜரபா⁴வே வா சி²த்³தே³ஸு வா கதேஸு பச்சா² நிக்க²ந்ததேலப்பமாணேன ப⁴ண்ட³தே³ய்யம் ஹோதி. அட்ட²கதா²ஸு பன கத்த²சி பாராஜிகந்திபி லிகி²தம், தம் பமாத³லிகி²தம்.

பரிபுண்ணாய கும்பி⁴யா உபரி கத²லம் வா பாஸாணம் வா ‘‘பதித்வா பி⁴ந்தி³ஸ்ஸதி, ததோ தேலம் பக்³க⁴ரிஸ்ஸதீ’’தி தே²ய்யசித்தேன து³ப்³ப³ந்த⁴ம் வா கரோதி, து³ட்ட²பிதம் வா ட²பேதி, அவஸ்ஸபதனகம் ததா² கரோந்தஸ்ஸ கதமத்தே பாராஜிகம். ரித்தகும்பி⁴யா உபரி கரோதி, தம் பச்சா² புண்ணகாலே பதித்வா பி⁴ந்த³தி, ப⁴ண்ட³தே³ய்யம். ஈதி³ஸேஸு ஹி டா²னேஸு ப⁴ண்ட³ஸ்ஸ நத்தி²காலே கதபயோக³த்தா ஆதி³தோவ பாராஜிகம் ந ஹோதி. ப⁴ண்ட³வினாஸத்³வாரஸ்ஸ பன கதத்தா ப⁴ண்ட³தே³ய்யம் ஹோதி. ஆஹராபேந்தேஸு அத³த³தோ ஸாமிகானம் து⁴ரனிக்கே²பேன பாராஜிகம்.

தே²ய்யசித்தேன மாதிகம் உஜுகம் கரோதி ‘‘வட்டித்வா வா க³மிஸ்ஸதி, வேலம் வா உத்தராபேஸ்ஸதீ’’தி; வட்டித்வா வா க³ச்ச²து, வேலம் வா உத்தரது, உஜுகரணகாலே பாராஜிகம். ஈதி³ஸா ஹி பயோகா³ புப்³ப³பயோகா³வஹாரே ஸங்க³ஹம் க³ச்ச²ந்தி. ஸுக்க²மாதிகாய உஜுகதாய பச்சா² உத³கே ஆக³தே வட்டித்வா வா க³ச்ச²து, வேலம் வா உத்தரது, ப⁴ண்ட³தே³ய்யம். கஸ்மா? டா²னா சாவனபயோக³ஸ்ஸ அபா⁴வா. தஸ்ஸ லக்க²ணம் நாவட்டே² ஆவி ப⁴விஸ்ஸதி.

தத்தே²வ பி⁴ந்த³தி வாதிஆதீ³ஸு அட்ட²கதா²யம் தாவ வுத்தம் – ‘‘பி⁴ந்த³தி வாதி முக்³க³ரேன போதே²த்வா பி⁴ந்த³தி. ச²ட்³டே³தி வாதி உத³கம் வா வாலிகம் வா ஆகிரித்வா உத்தராபேதி. ஜா²பேதி வாதி தா³ரூனி ஆஹரித்வா ஜா²பேதி. அபரிபோ⁴க³ம் வா கரோதீதி அகா²தி³தப்³ப³ம் வா அபாதப்³ப³ம் வா கரோதி; உச்சாரம் வா பஸ்ஸாவம் வா விஸம் வா உச்சி²ட்ட²ம் வா குணபம் வா பாதேஸி, ஆபத்தி து³க்கடஸ்ஸாதி டா²னாசாவனஸ்ஸ நத்தி²தாய து³க்கடம், பு³த்³த⁴விஸயோ நாமேஸோ. கிஞ்சாபி து³க்கடம், ஆஹராபேந்தே பன ப⁴ண்ட³தே³ய்ய’’ந்தி. தத்த² புரிமத்³வயம் ந ஸமேதி. தஞ்ஹி கும்பி⁴ஜஜ்ஜரகரணேன ச மாதிகாஉஜுகரணேன ச ஸத்³தி⁴ம் ஏகலக்க²ணம். பச்சி²மம் பன த்³வயம் டா²னா அசாவேந்தேனாபி ஸக்கா காதும். தஸ்மா ஏத்த² ஏவம் வினிச்ச²யம் வத³ந்தி – ‘‘அட்ட²கதா²யம் கிர ‘டா²னா சாவனஸ்ஸ நத்தி²தாய து³க்கட’ந்தி இத³ம் பச்சி²மத்³வயம் ஸந்தா⁴ய வுத்தம். டா²னா சாவனம் அகரோந்தோயேவ ஹி தே²ய்யசித்தேன வா வினாஸேதுகாமதாய வா ஜா²பேய்யபி, அபரிபோ⁴க³ம்பி கரேய்ய. புரிமத்³வயே பன வுத்தனயேன பி⁴ந்த³ந்தஸ்ஸ வா ச²ட்³டே³ந்தஸ்ஸ வா டா²னா சாவனம் அத்தி², தஸ்மா ததா² கரோந்தஸ்ஸ வினாஸேதுகாமதாய ப⁴ண்ட³தே³ய்யம், தே²ய்யசித்தேன பாராஜிக’’ந்தி. பாளியம் ‘‘து³க்கட’’ந்தி வுத்தத்தா அயுத்தந்தி சே? ந; அஞ்ஞதா² க³ஹேதப்³ப³த்த²தோ. பாளியஞ்ஹி தே²ய்யசித்தபக்கே² ‘‘பி⁴ந்த³தி வாதி உத³கேன ஸம்பி⁴ந்த³தி, ச²ட்³டே³தி வாதி தத்த² வமதி வா பஸ்ஸாவம் வா ச²ட்³டே³தீ’’தி ஏவமேகே வத³ந்தி.

அயம் பனேத்த² ஸாரோ – வினீதவத்து²ம்ஹி திணஜ்ஜா²பகோ விய டா²னா அசாவேதுகாமோவ கேவலம் பி⁴ந்த³தி, பி⁴ன்னத்தா பன தேலாதீ³னி நிக்க²மந்தி, யம் வா பனேத்த² பத்தி²ன்னம், தம் ஏகாப³த்³த⁴மேவ திட்ட²தி. அச²ட்³டே³துகாமோயேவ ச கேவலம் தத்த² உத³கவாலிகாதீ³னி ஆகிரதி, ஆகிண்ணத்தா பன தேலம் ச²ட்³டீ³யதி. தஸ்மா வோஹாரவஸேன ‘‘பி⁴ந்த³தி வா ச²ட்³டே³தி வா’’தி வுச்சதீதி. ஏவமேதேஸம் பதா³னம் அத்தோ² க³ஹேதப்³போ³. நாஸேதுகாமதாபக்கே² பன இதரதா²பி யுஜ்ஜதி. ஏவஞ்ஹி கதி²யமானே பாளி ச அட்ட²கதா² ச புப்³பா³பரேன ஸம்ஸந்தி³த்வா கதி²தா ஹோந்தி. ஏத்தாவதாபி ச ஸந்தோஸம் அகத்வா ஆசரியே பயிருபாஸித்வா வினிச்ச²யோ வேதி³தப்³போ³தி.

பூ⁴மட்ட²கதா² நிட்டி²தா.

த²லட்ட²கதா²

95. த²லட்டே² த²லே நிக்கி²த்தந்தி பூ⁴மிதலே வா பாஸாணதலபப்³ப³ததலாதீ³ஸு வா யத்த² கத்த²சி படிச்ச²ன்னே வா அப்படிச்ச²ன்னே வா ட²பிதம் த²லட்ட²ந்தி வேதி³தப்³ப³ம். தம் ஸசே ராஸிகதம் ஹோதி, அந்தோகும்பி⁴யம் பா⁴ஜனக³தகரணமுட்டி²ச்சே²த³னவினிச்ச²யேன வினிச்சி²னிதப்³ப³ம். ஸசே ஏகாப³த்³த⁴ம் ஸிலேஸனிய்யாஸாதி³ பக்கமது⁴பா²ணிதவினிச்ச²யேன வினிச்சி²னிதப்³ப³ம். ஸசே க³ருகம் ஹோதி பா⁴ரப³த்³த⁴ம் லோஹபிண்டி³-கு³ளபிண்டி³-தேலமது⁴க⁴டாதி³ வா, கும்பி⁴யம் டா²னாசாவனவினிச்ச²யேன வினிச்சி²னிதப்³ப³ம். ஸங்க²லிகப³த்³த⁴ஸ்ஸ ச டா²னபே⁴தோ³ ஸல்லக்கே²தப்³போ³. பத்த²ரித்வா ட²பிதம் பன பாவாரத்த²ரணஸாடகாதி³ம் உஜுகம் க³ஹேத்வா ஆகட்³ட⁴தி, பாரிமந்தே ஓரிமந்தேன பு²ட்டோ²காஸம் அதிக்கந்தே பாராஜிகம். ஏவம் ஸப்³ப³தி³ஸாஸு ஸல்லக்கே²தப்³ப³ம். வேடே²த்வா உத்³த⁴ரதி, கேஸக்³க³மத்தம் ஆகாஸக³தம் கரோந்தஸ்ஸ பாராஜிகம். ஸேஸம் வுத்தனயமேவாதி.

த²லட்ட²கதா² நிட்டி²தா.

ஆகாஸட்ட²கதா²

96. ஆகாஸட்டே² மோரஸ்ஸ ச²ஹி ஆகாரேஹி டா²னபரிச்சே²தோ³ வேதி³தப்³போ³ – புரதோ முக²துண்ட³கேன, பச்ச²தோ கலாபக்³கே³ன, உப⁴யபஸ்ஸேஸு பக்க²பரியந்தேஹி, அதோ⁴ பாத³னக²ஸிகா²ய, உத்³த⁴ம் ஸிக²க்³கே³னாதி. பி⁴க்கு² ‘‘ஸஸ்ஸாமிகம் ஆகாஸட்ட²ம் மோரம் க³ஹேஸ்ஸாமீ’’தி புரதோ வா திட்ட²தி, ஹத்த²ம் வா பஸாரேதி, மோரோ ஆகாஸேயேவ பக்கே² சாரேதி, வாதம் கா³ஹாபேத்வா க³மனம் உபச்சி²ந்தி³த்வா திட்ட²தி. தஸ்ஸ பி⁴க்கு²னோ து³க்கடம். தம் அப²ந்தே³ந்தோ ஹத்தே²ன ஆமஸதி, து³க்கடமேவ. டா²னா அசாவேந்தோ ப²ந்தா³பேதி, து²ல்லச்சயம். ஹத்தே²ன பன க³ஹேத்வா வா அக்³க³ஹேத்வா வா முக²துண்ட³கேன பு²ட்டோ²காஸம் கலாபக்³க³ம், கலாபக்³கே³ன வா பு²ட்டோ²காஸம் முக²துண்ட³கம் அதிக்காமேதி, பாராஜிகம். ததா² வாமபக்க²பரியந்தேன பு²ட்டோ²காஸம் த³க்கி²ணபக்க²பரியந்தம், த³க்கி²ணபக்க²பரியந்தேன வா பு²ட்டோ²காஸம் வாமபக்க²பரியந்தம் அதிக்காமேதி, பாராஜிகம். ததா² பாத³னக²ஸிகா²ய பு²ட்டோ²காஸம் ஸிக²க்³க³ம், ஸிக²க்³கே³ன வா பு²ட்டோ²காஸம் பாத³னக²ஸிக²ம் அதிக்காமேதி, பாராஜிகம்.

ஆகாஸேன க³ச்ச²ந்தோ மோரோ ஸீஸாதீ³ஸு யஸ்மிம் அங்கே³ நிலீயதி, தம் தஸ்ஸ டா²னம். தஸ்மா தம் ஹத்தே² நிலீனம் இதோ சிதோ ச கரோந்தோபி ப²ந்தா³பேதியேவ, யதி³ பன இதரேன ஹத்தே²ன க³ஹேத்வா டா²னா சாவேதி, பாராஜிகம். இதரம் ஹத்த²ம் உபனேதி, மோரோ ஸயமேவ உட்³டே³த்வா தத்த² நிலீயதி, அனாபத்தி. அங்கே³ நிலீனபா⁴வம் ஞத்வா தே²ய்யசித்தேன ஏகம் பத³வாரம் க³ச்ச²தி, து²ல்லச்சயம். து³தியே பாராஜிகம்.

பூ⁴மியம் டி²தமோரோ த்³வின்னம் வா பாதா³னம் கலாபஸ்ஸ ச வஸேன தீணி டா²னானி லப⁴தி. தம் உக்கி²பந்தஸ்ஸ யாவ ஏகம்பி டா²னம் பத²விம் பு²ஸதி, தாவ து²ல்லச்சயம். கேஸக்³க³மத்தம்பி பத²வியா மோசிதமத்தே பாராஜிகம். பஞ்ஜரே டி²தம் ஸஹ பஞ்ஜரேன உத்³த⁴ரதி, பாராஜிகம். யதி³ பன பாத³ம் ந அக்³க⁴தி, ஸப்³ப³த்த² அக்³க⁴வஸேன காதப்³ப³ம். அந்தோவத்து²ம்ஹி சரந்தம் மோரம் தே²ய்யசித்தேன பத³ஸா ப³ஹிவத்து²ம் நீஹரந்தோ த்³வாரபரிச்சே²த³ம் அதிக்காமேதி, பாராஜிகம். வஜே டி²தப³லீப³த்³த³ஸ்ஸ ஹி வஜோ விய அந்தோவத்து² தஸ்ஸ டா²னம். ஹத்தே²ன பன க³ஹேத்வா அந்தோவத்து²ஸ்மிம்பி ஆகாஸக³தம் கரோந்தஸ்ஸ பாராஜிகமேவ. அந்தோகா³மே சரந்தம்பி கா³மபரிக்கே²பம் அதிக்காமேந்தஸ்ஸ பாராஜிகம். ஸயமேவ நிக்க²மித்வா கா³மூபசாரே வா வத்தூ²பசாரே வா சரந்தம் பன தே²ய்யசித்தோ கட்டே²ன வா கத²லாய வா உத்ராஸேத்வா அடவிமுக²ம் கரோதி, மோரோ உட்³டே³த்வா அந்தோகா³மே வா அந்தோவத்து²ம்ஹி வா ச²த³னபிட்டே² வா நிலீயதி, ரக்க²தி. ஸசே பன அடவிமுகே² உட்³டே³தி வா க³ச்ச²தி வா ‘‘அடவிம் பவேஸேத்வா க³ஹேஸ்ஸாமீ’’தி பரிகப்பே அஸதி பத²விதோ கேஸக்³க³மத்தம்பி உட்³டி³தமத்தே வா து³தியபத³வாரே வா பாராஜிகம். கஸ்மா? யஸ்மா கா³மதோ நிக்க²ந்தஸ்ஸ டி²தட்டா²னமேவ டா²னம் ஹோதி. கபிஞ்ஜராதீ³ஸுபி அயமேவ வினிச்ச²யோ.

ஸாடகம் வாதி வாதவேகு³க்கி²த்தம் பத²விதலே பத்த²ரித்வா ட²பிதமிவ ஆகாஸேன க³ச்ச²ந்தம் க²லிப³த்³த⁴ம் ஸாடகம் அபி⁴முகா²க³தம் ஹத்தே²ன ஏகஸ்மிம் அந்தே க³ண்ஹாதி, இதோ சிதோ ச டா²னம் அவிகோபேந்தோயேவ க³மனுபச்சே²தே³ து³க்கடம். டா²னாசாவனம் அகரோந்தோ சாலேதி, ப²ந்தா³பனே து²ல்லச்சயம். டா²னா சாவேதி, பாராஜிகம். டா²னபரிச்சே²தோ³ சஸ்ஸ மோரஸ்ஸேவ ச²ஹி ஆகாரேஹி வேதி³தப்³போ³.

அப³த்³த⁴ஸாடகோ பன ஏகஸ்மிம் அந்தே க³ஹிதமத்தேவ து³தியேனந்தேன பதித்வா பூ⁴மியம் பதிட்டா²தி, தஸ்ஸ த்³வே டா²னானி ஹோந்தி – ஹத்தோ² சேவ பூ⁴மி ச. தம் யதா²க³ஹிதமேவ பட²மம் க³ஹிதோகாஸப்பதே³ஸதோ சாலேதி, து²ல்லச்சயம். பச்சா² பூ⁴மிதோ து³தியஹத்தே²ன வா பாதே³ன வா உக்கி²பதி, பாராஜிகம். பட²மம் வா பூ⁴மிதோ உத்³த⁴ரதி, து²ல்லச்சயம். பச்சா² க³ஹிதோகாஸப்பதே³ஸதோ சாவேதி, பாராஜிகம். க³ஹணம் வா அமுஞ்சந்தோ உஜுகமேவ ஹத்த²ம் ஓனாமேத்வா பூ⁴மிக³தம் கத்வா தேனேவ ஹத்தே²ன உக்கி²பதி, பாராஜிகம். வேட²னேபி அயமேவ வினிச்ச²யோ.

ஹிரஞ்ஞம் வா ஸுவண்ணம் வா சி²ஜ்ஜமானந்தி மனுஸ்ஸானம் அலங்கரோந்தானம் கீ³வேய்யகாதி³பிளந்த⁴னம் வா ஸுவண்ணஸலாகம் சி²ந்த³ந்தானம் ஸுவண்ணகாரானம் ஸுவண்ணக²ண்ட³ம் வா சி²ஜ்ஜமானம் பததி, தஞ்சே பி⁴க்கு² ஆகாஸேன ஆக³ச்ச²ந்தம் தே²ய்யசித்தோ ஹத்தே²ன க³ண்ஹாதி, க³ஹணமேவ டா²னம். க³ஹிதப்பதே³ஸதோ ஹத்த²ம் அபனேதி, பாராஜிகம். சீவரே பதிதம் ஹத்தே²ன உக்கி²பதி, பாராஜிகம். அனுத்³த⁴ரித்வாவ யாதி, து³தியே பத³வாரே பாராஜிகம். பத்தே பதிதேபி ஏஸேவ நயோ. ஸீஸே வா முகே² வா பாதே³ வா பதிட்டி²தம் ஹத்தே²ன க³ண்ஹாதி, பாராஜிகம். அக்³க³ஹேத்வாவ யாதி, து³தியே பத³வாரே பாராஜிகம். யத்த² கத்த²சி பததி, தஸ்ஸ பதிதோகாஸோவ டா²னம், ந ஸப்³ப³ம் அங்க³பச்சங்க³ம் பத்தசீவரம் வாதி.

ஆகாஸட்ட²கதா² நிட்டி²தா.

வேஹாஸட்ட²கதா²

97. வேஹாஸட்டே² மஞ்சபீடா²தீ³ஸு ட²பிதம் ப⁴ண்ட³ம் ஆமாஸம் வா ஹோது அனாமாஸம் வா, தே²ய்யசித்தேன ஆமஸந்தஸ்ஸ து³க்கடம். மஞ்சபீடே²ஸு ட²பிதப⁴ண்டே³ஸு பனேத்த² த²லட்டே² வுத்தனயேன வினிச்ச²யோ வேதி³தப்³போ³. அயம் பன விஸேஸோ – ஸசே க²லியா ப³த்³த⁴ஸாடகோ மஞ்சே வா பீடே² வா பத்த²டோ மஜ்ஜே²ன மஞ்சதலம் ந பு²ஸதி, மஞ்சபாதே³வ பு²ஸதி, தேஸம் வஸேன டா²னம் வேதி³தப்³ப³ம். பாதா³னம் உபரி பு²ட்டோ²காஸமேவ ஹி அதிக்கமிதமத்தேன தத்த² பாராஜிகம் ஹோதி. ஸஹ மஞ்சபீடே²ஹி ஹரந்தஸ்ஸ பன மஞ்சபீட²பாதா³னம் பதிட்டி²தோகாஸவஸேன டா²னம் வேதி³தப்³ப³ம்.

சீவரவம்ஸே வாதி சீவரட²பனத்தா²ய ப³ந்தி⁴த்வா ட²பிதே வம்ஸே வா கட்ட²த³ண்ட³கே வா. தத்த² ஸம்ஹரித்வா பாரதோ அந்தம் ஓரதோ போ⁴க³ம் கத்வா ட²பிதசீவரஸ்ஸ பதிட்டி²தோகாஸேன பு²ட்டோ²காஸோவ டா²னம், ந ஸப்³போ³ சீவரவம்ஸோ. தஸ்மா தே²ய்யசித்தேன தம் போ⁴கே³ க³ஹேத்வா ஆகட்³ட⁴ந்தஸ்ஸ பாரதோ வம்ஸே பதிட்டி²தோகாஸம் ஓரதோ சீவரேன வம்ஸஸ்ஸ பு²ட்ட²ப்பதே³ஸம் அதிக்காமேந்தஸ்ஸ ஏகத்³வங்கு³லமத்தாகட்³ட⁴னேனேவ பாராஜிகம். அந்தே க³ஹேத்வா ஆகட்³ட⁴ந்தஸ்ஸாபி ஏஸேவ நயோ. தத்தே²வ பன சீவரவம்ஸே வாமதோ வா த³க்கி²ணதோ வா ஸாரேந்தஸ்ஸ வாமந்தேன த³க்கி²ணந்தட்டா²னம் த³க்கி²ணந்தேன வா வாமந்தட்டா²னம் அதிக்கந்தமத்தே த³ஸத்³வாத³ஸங்கு³லமத்தஸாரணேனேவ பாராஜிகம். உத்³த⁴ம் உக்கி²பந்தஸ்ஸ கேஸக்³க³மத்துக்கி²பனேன பாராஜிகம். சீவரவம்ஸம் பு²ஸந்தம் வா அபு²ஸந்தம் வா ரஜ்ஜுகேன ப³ந்தி⁴த்வா ட²பிதசீவரம் மோசேந்தஸ்ஸ து²ல்லச்சயம், முத்தே பாராஜிகம். முத்தமத்தமேவ ஹி தம் ‘‘டா²னா சுத’’ந்தி ஸங்க்²யம் க³ச்ச²தி. வம்ஸே வேடே²த்வா ட²பிதம் நிப்³பே³டே²ந்தஸ்ஸ து²ல்லச்சயம், நிப்³பே³டி²தமத்தே பாராஜிகம். வலயம் கத்வா ட²பிதே வலயம் சி²ந்த³தி வா மோசேதி வா ஏகம் வா வம்ஸகோடிம் மோசேத்வா நீஹரதி, து²ல்லச்சயம். சி²ன்னமத்தே முத்தமத்தே நீஹடமத்தே ச பாராஜிகம். ததா² அகத்வாவ சீவரவம்ஸே இதோ சிதோ ச ஸாரேதி, ரக்க²தி தாவ. வலயஸ்ஸ ஹி ஸப்³போ³பி சீவரவம்ஸோ டா²னம். கஸ்மா? தத்த² ஸம்ஸரணத⁴ம்மதாய. யதா³ பன நம் ஹத்தே²ன க³ஹேத்வா ஆகாஸக³தம் கரோதி, பாராஜிகம். பஸாரேத்வா ட²பிதஸ்ஸ பதிட்டி²தோகாஸேன பு²ட்டோ²காஸோவ டா²னம். தத்த² ஸம்ஹரித்வா ட²பிதே வுத்தனயேன வினிச்ச²யோ வேதி³தப்³போ³. யம் பன ஏகேனந்தேன பூ⁴மிம் பு²ஸித்வா டி²தம் ஹோதி, தஸ்ஸ சீவரவம்ஸே ச பூ⁴மியஞ்ச பதிட்டி²தோகாஸவஸேன த்³வே டா²னானி. தத்த² பூ⁴மியம் ஏகேனந்தேன பதிட்டி²தே அப³த்³த⁴ஸாடகே வுத்தனயேனேவ வினிச்ச²யோ வேதி³தப்³போ³. சீவரரஜ்ஜுயாபி அயமேவ வினிச்ச²யோ.

அங்குஸகே லக்³கே³த்வா ட²பிதப⁴ண்ட³ம் பன பே⁴ஸஜ்ஜக⁴டோ வா பே⁴ஸஜ்ஜத்த²விகா வா ஸசே பி⁴த்திம் வா பூ⁴மிம் வா அபு²ஸித்வா ட²பிதம் லக்³க³னகம் க⁴ம்ஸந்தஸ்ஸ நீஹரதோ அங்குஸகோடிதோ நிக்க²ந்தமத்தே பாராஜிகம். லக்³க³னகம் ப³த்³த⁴ம் ஹோதி, பு³ந்தே³ன உக்கி²பித்வா ஆகாஸக³தம் கரோந்தஸ்ஸ அங்குஸகோடிதோ அனிக்க²ந்தேபி பாராஜிகம். பி⁴த்தினிஸ்ஸிதம் ஹோதி, பட²மம் அங்குஸகோடிதோ நீஹரதி, து²ல்லச்சயம். பச்சா² பி⁴த்திம் மோசேதி, பாராஜிகம். பட²மம் பி⁴த்திம் மோசேத்வா பச்சா² அங்குஸதோ நீஹரந்தஸ்ஸாபி ஏஸேவ நயோ. ஸசே பன பா⁴ரியம் ப⁴ண்ட³ம் நீஹரிதும் அஸக்கோந்தோ ஸயம் பி⁴த்தினிஸ்ஸிதம் கத்வா அங்குஸதோ நீஹரதி, புன பி⁴த்திம் அமோசேத்வாபி அங்குஸதோ நீஹடமத்தேயேவ பாராஜிகம். அத்தனா கதட்டா²னஞ்ஹி டா²னம் ந ஹோதி. பூ⁴மிம் பு²ஸித்வா டி²தஸ்ஸ பன த்³வே ஏவ டா²னானி. தத்த² வுத்தோயேவ வினிச்ச²யோ. யம் பன ஸிக்காய பக்கி²பித்வா லக்³கி³தம் ஹோதி, தம் ஸிக்காதோ நீஹரந்தஸ்ஸாபி ஸஹ ஸிக்காய அங்குஸதோ நீஹரந்தஸ்ஸாபி பாராஜிகம். பி⁴த்திபூ⁴மிஸன்னிஸ்ஸிதவஸேன சேத்த² டா²னபே⁴தோ³பி வேதி³தப்³போ³.

பி⁴த்திகீ²லோதி உஜுகம் கத்வா பி⁴த்தியம் ஆகோடிதோ வா தத்த²ஜாதகோ ஏவ வா; நாக³த³ந்தோ பன வங்கோ ஆகோடிதோ ஏவ. தேஸு லக்³கே³த்வா ட²பிதம் அங்குஸகே வுத்தனயேனேவ வினிச்சி²னிதப்³ப³ம். த்³வீஸு தீஸு பன படிபாடியா டி²தேஸு ஆரோபேத்வா ட²பிதம் குந்தம் வா பி⁴ந்தி³வாலம் வா அக்³கே³ வா பு³ந்தே³ வா க³ஹேத்வா ஆகட்³ட⁴தி, ஏகமேகஸ்ஸ பு²ட்டோ²காஸமத்தே அதிக்கந்தே பாராஜிகம். பு²ட்டோ²காஸமத்தமேவ ஹி தேஸம் டா²னம் ஹோதி, ந ஸப்³பே³ கீ²லா வா நாக³த³ந்தா வா. பி⁴த்திஅபி⁴முகோ² ட²த்வா மஜ்ஜே² க³ஹேத்வா ஆகட்³ட⁴தி, ஓரிமந்தேன பு²ட்டோ²காஸம் பாரிமந்தேன அதிக்கந்தமத்தே பாராஜிகம். பரதோ பேல்லேந்தஸ்ஸாபி ஏஸேவ நயோ. ஹத்தே²ன க³ஹேத்வா உஜுகம் உக்கி²பந்தோ கேஸக்³க³மத்தம்பி ஆகாஸக³தம் கரோதி, பாராஜிகம். பி⁴த்திம் நிஸ்ஸாய ட²பிதம் பி⁴த்திம் க⁴ம்ஸந்தோ ஆகட்³ட⁴தி, அக்³கே³ன பு²ட்டோ²காஸம் பு³ந்த³ம், பு³ந்தே³ன வா பு²ட்டோ²காஸம் அக்³க³ம் அதிக்காமேந்தஸ்ஸ பாராஜிகம். பி⁴த்திஅபி⁴முகோ² ட²த்வா ஆகட்³ட⁴ந்தோ ஏகேனந்தேன பு²ட்டோ²காஸம் அபரந்தம் அதிக்காமேதி, பாராஜிகம். உஜுகம் உக்கி²பந்தோ கேஸக்³க³மத்தம் ஆகாஸக³தம் கரோதி, பாராஜிகம்.

ருக்கே² வா லக்³கி³தந்தி தாலருக்கா²தீ³ஸு ஆரோபேத்வா லக்³கி³தே அங்குஸகாதீ³ஸு வுத்தனயேன வினிச்ச²யோ வேதி³தப்³போ³. தத்த²ஜாதகம் பன தாலபிண்டி³ம் சாலேந்தஸ்ஸ து²ல்லச்சயம். யஸ்மிம் ப²லே பாராஜிகவத்து² பூரதி, தஸ்மிம் ப³ந்த⁴னா முத்தமத்தே பாராஜிகம். பிண்டி³ம் சி²ந்த³தி, பாராஜிகம். அக்³கே³ன பண்ணந்தரம் ஆரோபேத்வா ட²பிதா த்³வே டா²னானி லப⁴தி – ட²பிதட்டா²னஞ்ச வண்டட்டா²னஞ்ச; தத்த² வுத்தனயேன வினிச்ச²யோ வேதி³தப்³போ³. யோ பன ‘‘சி²ன்னமத்தா பதமானா ஸத்³த³ம் கரேய்யா’’தி ப⁴யேன ஸயம் அக்³கே³ன பண்ணந்தரம் ஆரோபேத்வா சி²ந்த³தி, சி²ன்னமத்தே பாராஜிகம். அத்தனா கதட்டா²னஞ்ஹி டா²னம் ந ஹோதி. ஏதேன உபாயேன ஸப்³ப³ருக்கா²னம் புப்ப²ப²லேஸு வினிச்ச²யோ வேதி³தப்³போ³.

பத்தாதா⁴ரகேபீதி ஏத்த² ருக்கா²தா⁴ரகோ வா ஹோது வலயாதா⁴ரகோ வா த³ண்டா³தா⁴ரகோ வா யம்கிஞ்சி பத்தட்ட²பனகம் பச்சி²காபி ஹோது பத்தாதா⁴ரகோ த்வேவ ஸங்க்²யம் க³ச்ச²தி. தத்த² ட²பிதபத்தஸ்ஸ பத்தேன பு²ட்டோ²காஸோ ஏவ டா²னம். தத்த² ருக்கா²தா⁴ரகே பஞ்சஹாகாரேஹி டா²னபரிச்சே²தோ³ ஹோதி. தத்த² டி²தம் பத்தம் முக²வட்டியம் க³ஹேத்வா சதூஸு தி³ஸாஸு யதோ குதோசி கட்³ட⁴ந்தோ ஏகேனந்தேன பு²ட்டோ²காஸம் அபரந்தம் அதிக்காமேதி, பாராஜிகம். உத்³த⁴ம் கேஸக்³க³மத்தம் உக்கி²பதோ பாராஜிகம். ஸஹாதா⁴ரகேன ஹரந்தஸ்ஸாபி ஏஸேவ நயோதி.

வேஹாஸட்ட²கதா² நிட்டி²தா.

உத³கட்ட²கதா²

98. உத³கட்டே² – உத³கே நிக்கி²த்தம் ஹோதீதி ராஜப⁴யாதி³பீ⁴தேஹி உத³கேன அவினஸ்ஸனத⁴ம்மேஸு தம்ப³லோஹபா⁴ஜனாதீ³ஸு ஸுப்படிச்ச²ன்னம் கத்வா போக்க²ரணீஆதீ³ஸு அஸந்த³னகே உத³கே நிக்கி²த்தம். தஸ்ஸ பதிட்டி²தோகாஸோயேவ டா²னம், ந ஸப்³ப³ம் உத³கம். க³ச்ச²தி வா ஆபத்தி து³க்கடஸ்ஸாதி அக³ம்பீ⁴ரே உத³கே பத³ஸா க³ச்ச²ந்தஸ்ஸ பத³வாரே பத³வாரே து³க்கடம். க³ம்பீ⁴ரே ஹத்தே²ஹி வா பாதே³ஹி வா பயோக³ம் கரோந்தஸ்ஸ ஹத்த²வாரேஹி வா பத³வாரேஹி வா பயோகே³ பயோகே³ து³க்கடம். ஏஸேவ நயோ கும்பி⁴க³ஹணத்த²ம் நிமுஜ்ஜனும்முஜ்ஜனேஸு. ஸசே பன அந்தரா கிஞ்சி உத³கஸப்பம் வா வாளமச்ச²ம் வா தி³ஸ்வா பீ⁴தோ பலாயதி, அனாபத்தி. ஆமஸனாதீ³ஸு பூ⁴மிக³தாய கும்பி⁴யா வுத்தனயேனேவ வினிச்ச²யோ வேதி³தப்³போ³. அயம் பன விஸேஸோ – தத்த² பூ⁴மிம் க²ணித்வா கட்³ட⁴தி, இத⁴ கத்³த³மே ஓஸாரேதி. ஏவம் ச²ஹாகாரேஹி டா²னபரிச்சே²தோ³ ஹோதி.

உப்பலாதீ³ஸு யஸ்மிம் புப்பே² வத்து²ம் பூரேதி, தஸ்மிம் சி²ன்னமத்தே பாராஜிகம். உப்பலஜாதிகானஞ்சேத்த² யாவ ஏகஸ்மிம்பி பஸ்ஸே வாகோ ந சி²ஜ்ஜதி, தாவ ரக்க²தி. பது³மஜாதிகானம் பன த³ண்டே³ சி²ன்னே அப்³ப⁴ந்தரே ஸுத்தம் அச்சி²ன்னம்பி ந ரக்க²தி. ஸாமிகேஹி சி²ந்தி³த்வா ட²பிதானி உப்பலாதீ³னி ஹோந்தி, யம் வத்து²ம் பூரேதி, தஸ்மிம் உத்³த⁴டே பாராஜிகம். ஹத்த²கப³த்³தா⁴னி ஹோந்தி, யஸ்மிம் ஹத்த²கே வத்து² பூரதி, தஸ்மிம் உத்³த⁴டே பாராஜிகம். பா⁴ரப³த்³தா⁴னி ஹோந்தி, தம் பா⁴ரம் ச²ன்னம் ஆகாரானம் யேன கேனசி ஆகாரேன டா²னா சாவேந்தஸ்ஸ பூ⁴மட்ட²கும்பி⁴யம் வுத்தனயேன பாராஜிகம். தீ³க⁴னாளானி உப்பலாதீ³னி ஹோந்தி, புப்பே²ஸு வா நாளேஸு வா வேணிம் கத்வா உத³கபிட்டே² ரஜ்ஜுகேஸு திணானி ஸந்த²ரித்வா ட²பேந்தி வா ப³ந்த⁴ந்தி வா, தேஸம் தீ³க⁴தோ புப்ப²க்³கே³ன ச நாளந்தேன ச திரியம் பரியந்தேஹி ஹேட்டா² பதிட்டி²தோகாஸேன உத்³த⁴ம் உபரி டி²தஸ்ஸ பிட்டி²யாதி ச²ஹாகாரேஹி டா²னா சாவனபரிச்சே²தோ³ வேதி³தப்³போ³.

யோபி உத³கபிட்டி²யம் ட²பிதபுப்ப²கலாபம் உத³கம் சாலேத்வா வீசிம் உட்டா²பேத்வா கேஸக்³க³மத்தம்பி யதா²டி²தட்டா²னதோ சாவேதி, பாராஜிகம். அத² பன பரிகப்பேதி ‘‘ஏத்த² க³தம் க³ஹேஸ்ஸாமீ’’தி, ரக்க²தி தாவ; க³தட்டா²னே பன உத்³த⁴ரதோ பாராஜிகம். உத³கதோ அச்சுக்³க³தஸ்ஸ புப்ப²ஸ்ஸ ஸகலமுத³கம் டா²னம், தம் உப்பாடேத்வா உஜுகம் உத்³த⁴ரந்தஸ்ஸ நாளந்தே கேஸக்³க³மத்தம் உத³கதோ அதிக்கந்தே பாராஜிகம். புப்பே² க³ஹேத்வா அபனாமேத்வா ஆகட்³ட⁴ந்தோ உப்பாடேதி, ந உத³கம் டா²னம், உப்பாடிதமத்தே பாராஜிகம். கலாபப³த்³தா⁴னி புப்பா²னி உத³கட்டா²னே வா ருக்கே² வா க³ச்சே² வா ப³ந்தி⁴த்வா ட²பேந்தி, ப³ந்த⁴னம் அமோசேத்வா இதோ சிதோ ச கரோந்தஸ்ஸ து²ல்லச்சயம், ப³ந்த⁴னே முத்தமத்தே பாராஜிகம். பட²மம் ப³ந்த⁴னம் மோசேத்வா பச்சா² ஹரதி, ஏத்த² ச²ஹாகாரேஹி டா²னபரிச்சே²தோ³தி இத³ம் உப⁴யம் மஹாபச்சரியாதீ³ஸு வுத்தம். பது³மினியம் புப்பா²னி ஸஹ பது³மினிம்யா க³ண்ஹிதுகாமஸ்ஸ புப்ப²னாளேஹி ச பத்தனாளேஹி ச பு²ட்ட²உத³கவஸேன உத்³த⁴ஞ்சேவ திரியஞ்ச டா²னபரிச்சே²தோ³ வேதி³தப்³போ³. தம் பனஸ்ஸ பது³மினிம் அனுப்பாடேத்வா புப்பா²னி வா பத்தானி வா அத்தனோ அபி⁴முக²ம் ஆகட்³ட⁴ந்தஸ்ஸ து²ல்லச்சயம். உப்பாடிதமத்தே பாராஜிகம்.

புப்ப²பத்தனாளே டா²னதோ அசாவேத்வாபி பட²மம் பது³மினிம் உப்பாடேந்தஸ்ஸ து²ல்லச்சயம். பச்சா² புப்ப²பத்தனாளேஸு டா²னா சாவிதேஸு பாராஜிகம். உப்பாடிதாய பது³மினியா புப்ப²ம் க³ண்ஹந்தோ பன ப⁴ண்ட³ம் அக்³கா⁴பேத்வா காரேதப்³போ³. ப³ஹி ட²பிதே ராஸிகதகலாபப³த்³த⁴பா⁴ரப³த்³த⁴புப்பே²பி ஏஸேவ நயோ. பி⁴ஸம் வா முளாலம் வா யேன வத்து² பூரதி, தம் உப்பாடேந்தஸ்ஸ பாராஜிகம். கத்³த³மே பு²ட்டோ²காஸவஸேன சேத்த² டா²னம் பரிச்சி²ந்தி³தப்³ப³ம். தானி உப்பாடேந்தஸ்ஸ ஸுகு²மம்பி மூலம் அச்சி²ன்னம் ஹோதி, ரக்க²தி தாவ. பி⁴ஸபப்³பே³ ஜாதம் பத்தம் வா புப்ப²ம் வா ஹோதி, தம்பி ரக்க²தீதி மஹாஅட்ட²கதா²யமேவ வுத்தம். பி⁴ஸக³ண்டி²ம்ஹி பன கண்டகோ ஹோதி யோப்³ப³னப்பத்தானம் முக²பிளகா விய, அயம் அதீ³க⁴த்தா ந ரக்க²தி. ஸேஸம் உப்பலாதீ³ஸு வுத்தனயமேவ.

மச்ச²கச்ச²பானம் ஸஸ்ஸாமிகானம் வாபிஆதீ³ஸு ஸகலமுத³கம் டா²னம். தஸ்மா யோ படிஜக்³க³னட்டா²னே ஸஸ்ஸாமிகம் மச்ச²ம் ப³ளிஸேன வா ஜாலேன வா குமனேன வா ஹத்தே²ன வா க³ண்ஹாதி, தஸ்ஸ யேன மச்சே²ன வத்து² பூரதி, தஸ்மிம் கேஸக்³க³மத்தம்பி உத³கதோ உத்³த⁴டமத்தே பாராஜிகம். கோசி மச்சோ² க³ய்ஹமானோ இதோ சிதோ ச தா⁴வதி, ஆகாஸம் வா உப்பததி, தீரே வா பததி, ஆகாஸே வா டி²தம் தீரே வா பதிதம் க³ண்ஹதோபி பாராஜிகமேவ. கச்ச²பம்பி ப³ஹி கோ³சரத்த²ம் க³தம் க³ண்ஹதோ ஏஸேவ நயோ. உத³கட்ட²ம் பன உத³கா மோசயதோ பாராஜிகம்.

தேஸு தேஸு பன ஜனபதே³ஸு ஸப்³ப³ஸாதா⁴ரணஸ்ஸ மஹாதளாகஸ்ஸ நித்³த⁴மனதும்ப³ம் நிஸ்ஸாய ஸப்³ப³ஸாதா⁴ரணமேவ குன்னதீ³ஸதி³ஸம் உத³கவாஹகம் க²ணந்தி. ததோ கு²த்³த³கமாதிகாயோ நீஹரித்வா மாதிகாகோடியம் அத்தனோ அத்தனோ வளஞ்ஜனத்தா²ய ஆவாடே க²ணந்தி. தேஸம் பன யதா³ உத³கேன அத்தோ² ஹோதி, ததா³ ஆவாடே கு²த்³த³கமாதிகாயோ உத³கவாஹகஞ்ச ஸோதே⁴த்வா நித்³த⁴மனதும்ப³ம் உக்³கா⁴டேந்தி. ததோ உத³கேன ஸத்³தி⁴ம் மச்சா² நிக்க²மித்வா அனுபுப்³பே³ன ஆவாடே பத்வா வஸந்தி. தத்த² தளாகே ச உத³கவாஹகேஸு ச மச்சே² க³ண்ஹந்தே ந வாரேந்தி. கு²த்³த³காஸு பன அத்தனோ அத்தனோ மாதிகாஸு உத³கஆவாடேஸு ச பவிட்ட²மச்சே² க³ண்ஹிதும் ந தே³ந்தி, வாரேந்தி; தத்த² யோ தளாகே வா நித்³த⁴மனதும்பே³ வா உத³கவாஹகே வா மச்சே² க³ண்ஹாதி, அவஹாரேன ஸோ ந காரேதப்³போ³. கு²த்³த³கமாதிகாஸு பன ஆவாடேஸு வா பவிட்ட²ம் க³ண்ஹந்தோ க³ஹிதஸ்ஸ அக்³க⁴வஸேன காரேதப்³போ³. ஸசே ததோ க³ய்ஹமானோ மச்சோ² ஆகாஸே வா உப்பததி, தீரே வா பததி, தம் ஆகாஸட்ட²ம் வா தீரட்ட²ம் வா உத³கவினிமுத்தம் க³ண்ஹதோ அவஹாரோ நத்தி². கஸ்மா? யஸ்மா அத்தனோ பரிக்³க³ஹட்டா²னே டி²தஸ்ஸேவ தே ஸாமிகா. ஏவரூபா ஹி தத்த² கதிகா. கச்ச²பேபி ஏஸேவ நயோ.

ஸசே பன மச்சோ² க³ய்ஹமானோ ஆவாடதோ கு²த்³த³கமாதிகம் ஆருஹதி, தத்த² நம் க³ண்ஹதோபி அவஹாரோயேவ. கு²த்³த³கமாதிகாதோ பன உத³கவாஹகம், ததோ ச தளாகம் ஆரூள்ஹம் க³ண்ஹதோ அவஹாரோ நத்தி². யோ ஆவாடதோ ப⁴த்தஸித்தே²ஹி பலோபே⁴த்வா மாதிகம் ஆரோபேத்வா க³ண்ஹாதி, அவஹாரோவ. ததோ பன பலோபே⁴த்வா உத³கவாஹகம் ஆரோபேத்வா க³ண்ஹந்தஸ்ஸ அவஹாரோ நத்தி². கேசி பன குதோசிதே³வ ஸப்³ப³ஸாதா⁴ரணட்டா²னதோ மச்சே² ஆனேத்வா பச்சி²மவத்து²பா⁴கே³ உத³காவாடே கி²பித்வா போஸேத்வா தி³வஸே தி³வஸே த்³வே தீணி உத்தரிப⁴ங்க³த்தா²ய மாரேந்தி. ஏவரூபம் மச்ச²ம் உத³கே வா ஆகாஸே வா தீரே வா யத்த² கத்த²சி டி²தம் க³ண்ஹதோ அவஹாரோ ஏவ. கச்ச²பேபி ஏஸேவ நயோ.