5. சித்தாகா³ரவக்³கோ³

1. பட²மஸிக்கா²பத³வண்ணனா

978. சித்தாகா³ரவக்³க³ஸ்ஸ பட²மஸிக்கா²பதே³ – ராஜாகா³ரந்தி ரஞ்ஞோ கீளனக⁴ரம். சித்தாகா³ரந்தி கீளனசித்தஸாலம். ஆராமந்தி கீளனஉபவனம். உய்யானந்தி கீளனுய்யானம். போக்க²ரணீந்தி கீளனபோக்க²ரணிம். தஸ்மாயேவ பத³பா⁴ஜனே ‘‘யத்த² கத்த²சி ரஞ்ஞோ கீளிது’’ந்திஆதி³ வுத்தம். த³ஸ்ஸனாய க³ச்ச²தி ஆபத்தி து³க்கடஸ்ஸாதி ஏத்த² பத³வாரக³ணனாய து³க்கடம். யத்த² டி²தா பஸ்ஸதீதி ஏத்த² பன ஸசே ஏகஸ்மிம்யேவ டா²னே டி²தா பத³ம் அனுத்³த⁴ரமானா பஞ்சபி பஸ்ஸதி, ஏகமேவ பாசித்தியம். தம் தம் தி³ஸாபா⁴க³ம் ஓலோகேத்வா பஸ்ஸந்தியா பன பாடேக்கா ஆபத்தியோ. பி⁴க்கு²ஸ்ஸ பன ஸப்³ப³த்த² து³க்கடம்.

981. ஆராமே டி²தாதி அஜ்ஜா²ராமே ராஜாகா³ராதீ³னி கரோந்தி, தானி பஸ்ஸந்தியா அனாபத்தி. க³ச்ச²ந்தீ வா ஆக³ச்ச²ந்தீ வாதி பிண்ட³பாதாதீ³னம் அத்தா²ய க³ச்ச²ந்தியா மக்³கோ³ ஹோதி, தானி பஸ்ஸதி, அனாபத்தி. ஸதி கரணீயே க³ந்த்வாதி ரஞ்ஞோ ஸந்திகம் கேனசி கரணீயேன க³ந்த்வா பஸ்ஸதி, அனாபத்தி. ஆபதா³ஸூதி கேனசி உபத்³து³தா பவிஸித்வா பஸ்ஸதி, அனாபத்தி. ஸேஸம் உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், லோகவஜ்ஜம், காயகம்மம், அகுஸலசித்தம், திவேத³னந்தி.

பட²மஸிக்கா²பத³ம்.

2. து³தியஸிக்கா²பத³வண்ணனா

982. து³தியே – அபி⁴னிஸீத³னாபி⁴னிபஜ்ஜனேஸு பயோக³க³ணனாய ஆபத்தியோ வேதி³தப்³பா³. ஸேஸம் உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

து³தியஸிக்கா²பத³ம்.

3. ததியஸிக்கா²பத³வண்ணனா

988. ததியே – உஜ்ஜவுஜ்ஜவேதி யத்தகம் ஹத்தே²ன அஞ்சி²தம் ஹோதி, தஸ்மிம் தக்கம்ஹி வேடி²தே ஏகா ஆபத்தி. கந்தனதோ பன புப்³பே³ கப்பாஸவிசினனம் ஆதி³ம் கத்வா ஸப்³ப³பயோகே³ஸு ஹத்த²வாரக³ணனாய து³க்கடம்.

989. கந்திதஸுத்தந்தி த³ஸிகஸுத்தாதி³ம் ஸங்கா⁴டேத்வா கந்ததி, து³க்கந்திதம் வா படிகந்ததி. ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ததியஸிக்கா²பத³ம்.

4. சதுத்த²ஸிக்கா²பத³வண்ணனா

992. சதுத்தே² – யாகு³ம் வாதிஆதீ³ஸு தண்டு³லகோட்டனம் ஆதி³ம் கத்வா ஸப்³பே³ஸு புப்³ப³பயோகே³ஸு பயோக³க³ணனாய து³க்கடம். யாகு³ப⁴த்தேஸு பா⁴ஜனக³ணனாய, கா²த³னீயாதீ³ஸு ரூபக³ணனாய பாசித்தியானி.

993. யாகு³பானேதி மனுஸ்ஸேஹி ஸங்க⁴ஸ்ஸத்தா²ய கரியமானே யாகு³பானே வா ஸங்க⁴ப⁴த்தே வா தேஸம் ஸஹாயிகபா⁴வேன யம்கிஞ்சி பசந்தியா அனாபத்தி. சேதியபூஜாய ஸஹாயிகா ஹுத்வா க³ந்தா⁴தீ³னி பூஜேதி, வட்டதி. அத்தனோ வேய்யாவச்சகரஸ்ஸாதி ஸசேபி மாதாபிதரோ ஆக³ச்ச²ந்தி, யம்கிஞ்சி பீ³ஜனிம் வா ஸம்முஞ்ஜனித³ண்ட³கம் வா காராபேத்வா வேய்யாவச்சகரட்டா²னே ட²பேத்வாவ யம்கிஞ்சி பசிதும் வட்டதி. ஸேஸம் உத்தானமேவ. ஸமுட்டா²னாதீ³னி ததியஸதி³ஸானேவாதி.

சதுத்த²ஸிக்கா²பத³ம்.

5. பஞ்சமஸிக்கா²பத³வண்ணனா

996. பஞ்சமே – அஸதி அந்தராயேதி த³ஸவிதே⁴ அந்தராயே அஸதி. து⁴ரம் நிக்கி²பித்வா பச்சா² வினிச்சி²னந்தீ ஆபத்திம் ஆபஜ்ஜித்வாவ வினிச்சி²னாதி.

998. பரியேஸித்வா ந லப⁴தீதி ஸஹாயிகா பி⁴க்கு²னியோ ந லப⁴தி. ஸேஸம் உத்தானமேவ. து⁴ரனிக்கே²பஸமுட்டா²னம் – அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம் து³க்க²வேத³னந்தி.

பஞ்சமஸிக்கா²பத³ம்.

6. ச²ட்ட²ஸிக்கா²பத³வண்ணனா

999. ச²ட்டே² – ஸப்³ப³ம் நக்³க³வக்³கே³ ஆகா³ரிகஸிக்கா²பதே³ வுத்தனயேனேவ வேதி³தப்³ப³ம். அயம் பன விஸேஸோ, தம் ச²ஸமுட்டா²னம். இத³ம் ‘‘ஸஹத்தா²’’தி வுத்தத்தா ஏளகலோமஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ச²ட்ட²ஸிக்கா²பத³ம்.

7. ஸத்தமஸிக்கா²பத³வண்ணனா

1007. ஸத்தமே – புன பரியாயேனாதி புனவாரே. ஆபதா³ஸூதி மஹக்³க⁴சீவரம் ஸரீரதோ மோசேத்வா ஸுபடிஸாமிதம்பி சோரா ஹரந்தி, ஏவரூபாஸு ஆபதா³ஸு அனிஸ்ஸஜ்ஜித்வா நிவாஸேந்தியா அனாபத்தி. ஸேஸம் உத்தானமேவாதி.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம் காயகம்மம், வசீகம்மம், திசித்தம், திவேத³னந்தி.

ஸத்தமஸிக்கா²பத³ம்.

8. அட்ட²மஸிக்கா²பத³வண்ணனா

1008. அட்ட²மே – அனிஸ்ஸஜ்ஜித்வாதி ரக்க²ணத்தா²ய அத³த்வா; ‘‘இமம் ஜக்³கே³ய்யாஸீ’’தி ஏவம் அனாபுச்சி²த்வாதி அத்தோ².

1012. பரியேஸித்வா ந லப⁴தீதி படிஜக்³கி³கம் ந லப⁴தி. கி³லானாயாதி வசீபே⁴த³ம் காதும் அஸமத்தா²ய. ஆபதா³ஸூதி ரட்டே² பி⁴ஜ்ஜந்தே ஆவாஸே ச²ட்³டே³த்வா க³ச்ச²ந்தி, ஏவரூபாஸு ஆபதா³ஸு அனாபத்தி. ஸேஸம் உத்தானமேவ. ஸமுட்டா²னாதீ³னி அனந்தரஸிக்கா²பத³ஸதி³ஸானேவாதி.

அட்ட²மஸிக்கா²பத³ம்.

9. நவமஸிக்கா²பத³வண்ணனா

1015-6. நவமே – பா³ஹிரகம் அனத்த²ஸம்ஹிதந்தி ஹத்தி²அஸ்ஸரத²த⁴னுத²ருஸிப்பஆத²ப்³ப³ணகீ²லனவஸீகரணஸோஸாபனமந்தாக³த³ப்பயோகா³தி³பே⁴த³ம் பரூபகா⁴தகரம். பரித்தந்தி யக்க²பரித்தனாக³மண்ட³லாதி³பே⁴த³ம் ஸப்³ப³ம்பி வட்டதி. ஸேஸம் உத்தானமேவ.

பத³ஸோத⁴ம்மஸமுட்டா²னம் – வாசதோ வாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம், திவேத³னந்தி.

நவமஸிக்கா²பத³ம்.

10. த³ஸமஸிக்கா²பத³வண்ணனா

1018. த³ஸமே வாசேய்யாதி பத³ம் விஸேஸோ, ஸேஸம் நவமே வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹீதி.

த³ஸமஸிக்கா²பத³ம்.

சித்தாகா³ரவக்³கோ³ பஞ்சமோ.