3. நிஸ்ஸக்³கி³யகண்ட³ம் (பி⁴க்கு²னீவிப⁴ங்க³வண்ணனா)

பட²மனிஸ்ஸக்³கி³யபாசித்தியஸிக்கா²பத³வண்ணனா

திம்ஸ நிஸ்ஸக்³கி³யா த⁴ம்மா, பி⁴க்கு²னீனம் பகாஸிதா;

யே தேஸம் தா³னி ப⁴வதி, அயம் ஸம்வண்ணனாக்கமோ.

733. ஆமத்திகாபணந்தி அமத்தானி வுச்சந்தி பா⁴ஜனானி; தானி யே விக்கிணந்தி, தே வுச்சந்தி ஆமத்திகா; தேஸம் ஆபணோ ஆமத்திகாபணோ; தம் வா பஸாரேஸ்ஸந்தீதி அத்தோ².

734. பத்தஸன்னிசயம் கரேய்யாதி பத்தஸன்னிதி⁴ம் கரேய்ய; ஏகாஹம் அனதி⁴ட்ட²ஹித்வா வா அவிகப்பேத்வா வா பத்தம் ட²பேய்யாதி அத்தோ². ஸேஸம் மஹாவிப⁴ங்கே³ வுத்தனயேனேவ வேதி³தப்³ப³ம். அயமேவ ஹி விஸேஸோ – தத்த² த³ஸாஹம் பரிஹாரோ, இத⁴ ஏகாஹம்பி நத்தி². ஸேஸம் தாதி³ஸமேவ.

இத³ம்பி கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, அகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மஸிக்கா²பத³ம்.

து³தியனிஸ்ஸக்³கி³யபாசித்தியஸிக்கா²பத³வண்ணனா

738. து³தியே – து³ச்சோளாதி விரூபசோளா; ஜிண்ணசோளாதி அத்தோ². அபய்யாஹீதி அபி அய்யாஹி.

740. ஆதி³ஸ்ஸ தி³ன்னந்தி ஸம்பத்தா பா⁴ஜேந்தூதி வத்வாபி இத³ம் க³ணஸ்ஸ இத³ம் தும்ஹாகம் த³ம்மீதி வத்வா வா தா³துகம்யதாய பாத³மூலே ட²பேத்வா வா தி³ன்னம்பி ஆதி³ஸ்ஸ தி³ன்னம் நாம ஹோதி. ஏதம் ஸப்³ப³ம்பி அகாலசீவரம். அய்யாய த³ம்மீதி ஏவம் படிலத்³த⁴ம் பன யதா²தா³னேயேவ உபனேதப்³ப³ம். ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

து³தியஸிக்கா²பத³ம்.

ததியனிஸ்ஸக்³கி³யபாசித்தியஸிக்கா²பத³வண்ணனா

743-5. ததியே – ஹந்தா³தி க³ண்ஹ. ஸயம் அச்சி²ந்த³தீதி ஏகம் த³த்வா ஏகம் அச்சி²ந்த³ந்தியா ஏகம் நிஸ்ஸக்³கி³யம், ப³ஹூஸு ப³ஹூனி. ஸசே ஸம்ஹரித்வா ட²பிதானி ஏகதோ அச்சி²ந்த³தி, வத்து²க³ணனாய ஆபத்தியோ. ப³ந்தி⁴த்வா ட²பிதேஸு பன ஏகாவ ஆபத்தி. ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ததியஸிக்கா²பத³ம்.

சதுத்த²னிஸ்ஸக்³கி³யபாசித்தியஸிக்கா²பத³வண்ணனா

748. சதுத்தே² – கயேனாதி மூலேன. ந மே ஆவுஸோ ஸப்பினா அத்தோ²; தேலேன மே அத்தோ²தி இத³ம் கிர ஸா ஆஹடஸப்பிம் த³த்வா தேலம்பி ஆஹரிஸ்ஸதீதி மஞ்ஞமானா ஆஹ. விஞ்ஞாபேத்வாதி ஜானாபேத்வா; இத³ம் நாம ஆஹராதி யாசித்வா வா.

752. தஞ்ஞேவ விஞ்ஞாபேதீதி யம் பட²மம் விஞ்ஞத்தம் தம் தோ²கம் நப்பஹோதி, தஸ்மா புன தஞ்ஞேவ விஞ்ஞாபேதீதி அத்தோ². அஞ்ஞஞ்ச விஞ்ஞாபேதீதி ஸசே பட²மம் ஸப்பிவிஞ்ஞத்தம், யமகம் பசிதப்³ப³ந்தி ச வேஜ்ஜேன வுத்தத்தா தேலேன அத்தோ² ஹோதி, ததோ தேலேனாபி மே அத்தோ²தி ஏவம் அஞ்ஞஞ்ச விஞ்ஞாபேதி. ஆனிஸம்ஸம் த³ஸ்ஸேத்வாதி ஸசே கஹாபணஸ்ஸ ஸப்பி ஆப⁴தம் ஹோதி, இமினா மூலேன தி³கு³ணம் தேலம் லப்³ப⁴தி, தேனாபி ச இத³ம் கிச்சம் நிப்ப²ஜ்ஜதி, தஸ்மா தேலம் ஆஹராதி ஏவம் ஆனிஸம்ஸம் த³ஸ்ஸேத்வா விஞ்ஞாபேதீதி. ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சதுத்த²ஸிக்கா²பத³ம்.

பஞ்சமனிஸ்ஸக்³கி³யபாசித்தியஸிக்கா²பத³வண்ணனா

753. பஞ்சமே – ந மே ஸிக்க²மானேதி இத³ம் கிர ஸா குலதீ⁴தா ‘‘அயம் அத்³தா⁴ ஏவம் வுத்தா இத³ம் தேலம் ட²பேத்வா ஸப்பிம்பி மே அத்தனோ குலக⁴ரா ஆஹரிஸ்ஸதீ’’தி மஞ்ஞமானா ஆஹ. சேதாபேத்வாதி ஜானாபேத்வா இச்சேவ அத்தோ². ஸேஸம் ஸப்³ப³த்த² சதுத்த²ஸதி³ஸமேவாதி.

பஞ்சமஸிக்கா²பத³ம்.

ச²ட்ட²னிஸ்ஸக்³கி³யபாசித்தியஸிக்கா²பத³வண்ணனா

758. ச²ட்டே² – ச²ந்த³கந்தி ‘‘இத³ம் நாம த⁴ம்மகிச்சம் கரிஸ்ஸாம, யம் ஸக்கோத²; தம் தே³தா²’’தி ஏவம் பரேஸம் ச²ந்த³ஞ்ச ருசிஞ்ச உப்பாதே³த்வா க³ஹிதபரிக்கா²ரஸ்ஸேதம் அதி⁴வசனம். அஞ்ஞத³த்தி²கேனாதி அஞ்ஞஸ்ஸத்தா²ய தி³ன்னேன. அஞ்ஞுத்³தி³ஸிகேனாதி அஞ்ஞம் உத்³தி³ஸித்வா தி³ன்னேன. ஸங்கி⁴கேனாதி ஸங்க⁴ஸ்ஸ பரிச்சத்தேன.

762. ஸேஸகம் உபனேதீதி யத³த்தா²ய தி³ன்னோ, தம் சேதாபேத்வா அவஸேஸம் அஞ்ஞஸ்ஸத்தா²ய உபனேதி. ஸாமிகே அபலோகேத்வாதி ‘‘தும்ஹேஹி சீவரத்தா²ய தி³ன்னோ, அம்ஹாகஞ்ச சீவரம் அத்தி², தேலாதீ³ஹி பன அத்தோ²’’தி ஏவம் ஆபுச்சி²த்வா உபனேதி. ஆபதா³ஸூதி ததா²ரூபேஸு உபத்³த³வேஸு; பி⁴க்கு²னியோ விஹாரம் ச²ட்³டே³த்வா பக்கமந்தி, ஏவரூபாஸு ஆபதா³ஸு யம் வா தம் வா சேதாபேதும் வட்டதி. ஸேஸம் உத்தானமேவ.

ச²ஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ச²ட்ட²ஸிக்கா²பத³ம்.

ஸத்தமனிஸ்ஸக்³கி³யபாசித்தியஸிக்கா²பத³வண்ணனா

764. ஸத்தமே – ஸஞ்ஞாசிகேனாதி ஸயம் யாசிதகேன. ஏததே³வேத்த² நானாகரணம். ஸேஸம் ச²ட்ட²ஸதி³ஸமேவாதி.

ஸத்தமஸிக்கா²பத³ம்.

அட்ட²மனிஸ்ஸக்³கி³யபாசித்தியஸிக்கா²பத³வண்ணனா

769. அட்ட²மே – மஹாஜனிகேனாதி க³ணஸ்ஸ பரிச்சத்தேன. ஏததே³வேத்த² நானாகரணம்.

அட்ட²மஸிக்கா²பத³ம்.

நவமனிஸ்ஸக்³கி³யபாசித்தியஸிக்கா²பத³வண்ணனா

774. நவமஸிக்கா²பதே³ – ஸஞ்ஞாசிகேனாதி இத³ம் பத³ம் இதோ அதி⁴கதரம்.

நவமஸிக்கா²பத³ம்.

த³ஸமனிஸ்ஸக்³கி³யபாசித்தியஸிக்கா²பத³வண்ணனா

778. த³ஸமே – பரிவேணம் உந்த்³ரியதீதி பரிவேணம் வினஸ்ஸதி; பரிபததீதி அத்தோ². இத³ஞ்ச பத³ம் புக்³க³லிகேன ஸஞ்ஞாசிகேனாதி இத³ஞ்ச ஏத்தகமேவ நானாகரணம். ஸேஸம் புப்³ப³ஸதி³ஸமேவாதி.

த³ஸமஸிக்கா²பத³ம்.

ஏகாத³ஸமனிஸ்ஸக்³கி³யபாசித்தியஸிக்கா²பத³வண்ணனா

784. ஏகாத³ஸமே – க³ருபாவுரணந்தி ஸீதகாலே பாவுரணம். சதுக்கம்ஸபரமந்தி ஏத்த² கம்ஸோ நாம சதுக்கஹாபணிகோ ஹோதி; தஸ்மா பத³பா⁴ஜனே ‘‘ஸோளஸகஹாபணக்³க⁴னக’’ந்தி வுத்தம்.

ஏகாத³ஸமஸிக்கா²பத³ம்.

த்³வாத³ஸமனிஸ்ஸக்³கி³யபாசித்தியஸிக்கா²பத³வண்ணனா

789. த்³வாத³ஸமே – லஹுபாவுரணந்தி உண்ஹகாலே பாவுரணம். ஸேஸம் ஸிக்கா²பத³த்³வயேபி உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

த்³வாத³ஸமஸிக்கா²பத³ம்.

உத்³தி³ட்டா² கோ² அய்யாயோ திம்ஸ நிஸ்ஸக்³கி³யா பாசித்தியா த⁴ம்மாதி ஏத்த² மஹாவிப⁴ங்கே³ சீவரவக்³க³தோ தோ⁴வனஞ்ச படிக்³க³ஹணஞ்சாதி த்³வே ஸிக்கா²பதா³னி அபனேத்வா அகாலசீவரம் காலசீவரந்தி அதி⁴ட்ட²ஹித்வா பா⁴ஜிதஸிக்கா²பதே³ன ச பரிவத்தேத்வா அச்சி²ன்னசீவரேன ச பட²மவக்³கோ³ பூரேதப்³போ³. புன ஏளகலோமவக்³க³ஸ்ஸ ஆதி³தோ ஸத்த ஸிக்கா²பதா³னி அபனேத்வா ஸத்த அஞ்ஞத³த்தி²கானி பக்கி²பித்வா து³தியவக்³கோ³ பூரேதப்³போ³. ததியவக்³க³தோ பட²மபத்தம் வஸ்ஸிகஸாடிகம் ஆரஞ்ஞகஸிக்கா²பத³ந்தி இமானி தீணி அபனேத்வா பத்தஸன்னிசயக³ருபாவுரணலஹுபாவுரணஸிக்கா²பதே³ஹி ததியவக்³கோ³ பூரேதப்³போ³. இதி பி⁴க்கு²னீனம் த்³வாத³ஸ ஸிக்கா²பதா³னி ஏகதோபஞ்ஞத்தானி, அட்டா²ரஸ உப⁴தோபஞ்ஞத்தானீதி ஏவம் ஸப்³பே³பி பாதிமோக்கு²த்³தே³ஸமக்³கே³ன ‘‘உத்³தி³ட்டா² கோ² அய்யாயோ திம்ஸ நிஸ்ஸக்³கி³யா பாசித்தியா த⁴ம்மா’’தி ஏவமேத்த² அத்தோ² த³ட்ட²ப்³போ³. ஸேஸம் வுத்தனயமேவாதி.

ஸமந்தபாஸாதி³காய வினயஸம்வண்ணனாய பி⁴க்கு²னீவிப⁴ங்கே³

திம்ஸகவண்ணனா நிட்டி²தா.

நிஸ்ஸக்³கி³யகண்ட³ம் நிட்டி²தம்.