4. காணமாதாஸிக்கா²பத³வண்ணனா

230. சதுத்த²ஸிக்கா²பதே³ – காணமாதாதி காணாய மாதா. ஸா கிரஸ்ஸா தீ⁴தா அபி⁴ரூபா அஹோஸி, யே யே தம் பஸ்ஸந்தி, தே தே ராகே³ன காணா ஹோந்தி, ராக³ந்தா⁴ ஹோந்தீதி அத்தோ². தஸ்மா பரேஸம் காணபா⁴வகரணதோ ‘‘காணா’’தி விஸ்ஸுதா அஹோஸி. தஸ்ஸா வஸேன மாதாபிஸ்ஸா ‘‘காணமாதா’’தி பாகடா ஜாதா. ஆக³தந்தி ஆக³மனம். கிஸ்மிம் வியாதி கீதி³ஸம் விய; லஜ்ஜனகம் விய ஹோதீதி அதி⁴ப்பாயோ. ரித்தஹத்த²ம் க³ந்துந்தி ரித்தா ஹத்தா² அஸ்மிம் க³மனே ததி³த³ம் ரித்தஹத்த²ம், தம் ரித்தஹத்த²ம் க³மனம் க³ந்தும் லஜ்ஜனகம் விய ஹோதீதி வுத்தம் ஹோதி. பரிக்க²யம் அக³மாஸீதி உபாஸிகா அரியஸாவிகா பி⁴க்கூ² தி³ஸ்வா ஸந்தம் அதா³தும் ந ஸக்கோதி, தஸ்மா தாவ தா³பேஸி, யாவ ஸப்³ப³ம் பரிக்க²யம் அக³மாஸி. த⁴ம்மியா கதா²யாதி ஏத்த² காணாபி மாது அத்தா²ய தே³ஸியமானம் த⁴ம்மம் ஸுணந்தீ தே³ஸனாபரியோஸானே ஸோதாபன்னா அஹோஸி. உட்டா²யாஸனா பக்காமீதி ஆஸனதோ உட்ட²ஹித்வா க³தோ. ஸோபி புரிஸோ ‘‘ஸத்தா² கிர காணமாதாய நிவேஸனம் அக³மாஸீ’’தி ஸுத்வா காணம் ஆனேத்வா பகதிட்டா²னேயேவ ட²பேஸி.

231. இமஸ்மிம் பன வத்து²ஸ்மிம் உப்பன்னமத்தே அப்பஞ்ஞத்தேயேவ ஸிக்கா²பதே³ பாதே²ய்யவத்து² உத³பாதி³, தஸ்மா அனந்தரமேவ சேதம் த³ஸ்ஸேதும் ‘‘தேன கோ² பன ஸமயேனா’’திஆதி³ வுத்தம். ஸோபி ச உபாஸகோ அரியஸாவகத்தா ஸப்³ப³மேவ தா³பேஸி. தேன வுத்தம் – ‘‘பரிக்க²யம் அக³மாஸீ’’தி.

233. யம்கிஞ்சி பஹேணகத்தா²யாதி பண்ணாகாரத்தா²ய படியத்தம் யம்கிஞ்சி அதிரஸகமோத³கஸக்க²லிகாதி³ ஸப்³ப³ம் இத⁴ பூவோத்வேவ ஸங்க்²யம் க³ச்ச²தி. யம்கிஞ்சி பாதே²ய்யத்தா²யாதி மக்³க³ம் க³ச்ச²ந்தானம் அந்தராமக்³க³த்தா²ய படியத்தம் யம்கிஞ்சி ப³த்³த⁴ஸத்துஅப³த்³த⁴ஸத்துதிலதண்டு³லாதி³ ஸப்³ப³ம் இத⁴ மந்தோ²த்வேவ ஸங்க்²யம் க³ச்ச²தி. ததோ சே உத்தரிந்தி ஸசேபி ததியம் பத்தம் தூ²பீகதம் க³ண்ஹாதி, பூவக³ணனாய பாசித்தியம்.

த்³வத்திபத்தபூரே படிக்³க³ஹேத்வாதி முக²வட்டியா ஹேட்டி²மலேகா²ய ஸமபூரே பத்தே க³ஹேத்வா. அமுத்ர மயா த்³வத்திபத்தபூராதி ஏத்த² ஸசே த்³வே க³ஹிதா, ‘‘அத்ர மயா த்³வே பத்தபூரா படிக்³க³ஹிதா, த்வம் ஏகம் க³ண்ஹேய்யாஸீ’’தி வத்தப்³ப³ம். தேனாபி அஞ்ஞம் பஸ்ஸித்வா ‘‘பட²மம் ஆக³தேன த்³வே பத்தபூரா க³ஹிதா, மயா ஏகோ, மா த்வம் க³ண்ஹீ’’தி வத்தப்³ப³ம். யேன பட²மம் ஏகோ க³ஹிதோ, தஸ்ஸாபி பரம்பராரோசனே ஏஸேவ நயோ. யேன பன ஸயமேவ தயோ க³ஹிதா, தேன அஞ்ஞம் தி³ஸ்வா ‘‘மா கோ² ஏத்த² படிக்³க³ண்ஹி’’ ச்சேவ வத்தப்³ப³ம். படிக்கமனம் நீஹரித்வாதி ஆஸனஸாலம் ஹரித்வா, ஆஸனஸாலம் க³ச்ச²ந்தேன ச ச²ட்³டி³தஸாலா ந க³ந்தப்³பா³. யத்த² மஹா பி⁴க்கு²ஸங்கோ⁴ நிஸீத³தி, தத்த² க³ந்தப்³ப³ம். மஹாபச்சரியம் பன வுத்தம் ‘‘யா லத்³த⁴ட்டா²னதோ ஆஸன்னா ஆஸனஸாலா, தத்த² க³ந்தப்³ப³ம். அத்தனோ ‘ஸந்தி³ட்டா²னம் வா ஸம்ப⁴த்தானம் வா ஏகனிகாயிகானம் வா த³ஸ்ஸாமீ’தி அஞ்ஞத்த² க³ந்தும் ந லப்³ப⁴தி. ஸசே பனஸ்ஸ நிப³த்³த⁴னிஸீத³னட்டா²னம் ஹோதி, தூ³ரம்பி க³ந்தும் வட்டதீ’’தி.

ஸம்விப⁴ஜிதப்³ப³ந்தி ஸசே தயோ பத்தபூரா க³ஹிதா, ஏகம் அத்தனோ ட²பேத்வா த்³வே பி⁴க்கு²ஸங்க⁴ஸ்ஸ தா³தப்³பா³. ஸச்சே த்³வே க³ஹிதா, ஏகம் அத்தனோ ட²பேத்வா ஏகோ ஸங்க⁴ஸ்ஸ தா³தப்³போ³, யதா²மித்தம் பன தா³தும் ந லப்³ப⁴தி. யேன ஏகோ க³ஹிதோ, ந தேன கிஞ்சி அகாமா தா³தப்³ப³ம், யதா²ருசி காதப்³ப³ம்.

235. க³மனே படிப்பஸ்ஸத்³தே⁴தி அந்தராமக்³கே³ உபத்³த³வம் வா தி³ஸ்வா அனத்தி²கதாய வா ‘‘மயம் இதா³னி ந பேஸிஸ்ஸாம, ந க³மிஸ்ஸாமா’’தி ஏவம் க³மனே படிப்பஸ்ஸத்³தே⁴ உபச்சி²ன்னே. ஞாதகானம் பவாரிதானந்தி ஏதேஸம் ப³ஹும்பி தே³ந்தானம் படிக்³க³ண்ஹந்தஸ்ஸ அனாபத்தி. அட்ட²கதா²ஸு பன ‘‘தேஸம்பி பாதே²ய்யபஹேணகத்தா²ய படியத்ததோ பமாணமேவ வட்டதீ’’தி வுத்தம். ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

காணமாதாஸிக்கா²பத³ம் சதுத்த²ம்.