4. போ⁴ஜனவக்³கோ³

1. ஆவஸத²பிண்ட³ஸிக்கா²பத³வண்ணனா

203. போ⁴ஜனவக்³க³ஸ்ஸ பட²மஸிக்கா²பதே³ – ஆவஸத²பிண்டோ³தி ஆவஸதே² பிண்டோ³. ஸமந்தா பரிக்கி²த்தம் அத்³தி⁴ககி³லானக³ப்³பி⁴னிபப்³ப³ஜிதானம் யதா²னுரூபம் பஞ்ஞத்தமஞ்சபீட²ம் அனேகக³ப்³ப⁴பமுக²பரிச்சே²த³ம் ஆவஸத²ம் கத்வா தத்த² புஞ்ஞகாமதாய பிண்டோ³ பஞ்ஞத்தோ ஹோதி, யாகு³ப⁴த்தபே⁴ஸஜ்ஜாதி³ ஸப்³ப³ம் தேஸம் தேஸம் தா³னத்தா²ய ட²பிதம் ஹோதீதி அத்தோ². ஹிய்யோபீதி ஸ்வேபி. அபஸக்கந்தீதி அபக³ச்ச²ந்தி. மனுஸ்ஸா உஜ்ஜா²யந்தீதி தித்தி²யே அபஸ்ஸந்தா ‘‘தித்தி²யா குஹிம் க³தா’’‘‘இமே பஸ்ஸித்வா பக்கந்தா’’தி ஸுத்வா உஜ்ஜா²யந்தி. குக்குச்சாயந்தோதி குக்குச்சம் கரோந்தோ, அகப்பியஸஞ்ஞம் உப்பாதே³ந்தோதி அத்தோ².

206. ஸக்கோதி தம்ஹா ஆவஸதா² பக்கமிதுந்தி அத்³த⁴யோஜனம் வா யோஜனம் வா க³ந்தும் ஸக்கோதி. ந ஸக்கோதீதி ஏத்தகமேவ ந ஸக்கோதி. அனோதி³ஸ்ஸாதி இமேஸம்யேவ வா ஏத்தகானம்யேவ வாதி ஏகம் பாஸண்ட³ம் அனுத்³தி³ஸித்வா ஸப்³பே³ஸம் பஞ்ஞத்தோ ஹோதி. யாவத³த்தோ²தி போ⁴ஜனம்பி ஏத்தகந்தி அபரிச்சி²ந்தி³த்வா யாவத³த்தோ² பஞ்ஞத்தோ ஹோதி. ஸகிம் பு⁴ஞ்ஜிதப்³ப³ந்தி ஏகதி³வஸம் பு⁴ஞ்ஜிதப்³ப³ம், து³தியதி³வஸதோ பட்டா²ய படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாசித்தியம்.

அயம் பனேத்த² வினிச்ச²யோ – ஏககுலேன வா நானாகுலேஹி வா ஏகதோ ஹுத்வா ஏகஸ்மிம் டா²னே வா நானாடா²னேஸு வா ‘‘அஜ்ஜ ஏகஸ்மிம்; ஸ்வே ஏகஸ்மி’’ந்தி ஏவம் அனியமிதட்டா²னே வா பஞ்ஞத்தம் ஏகஸ்மிம் டா²னே ஏகதி³வஸம் பு⁴ஞ்ஜித்வா து³தியதி³வஸே தஸ்மிம் டா²னே அஞ்ஞஸ்மிம் வா பு⁴ஞ்ஜிதும் ந வட்டதி. நானாகுலேஹி பன நானாடா²னேஸு பஞ்ஞத்தம் ஏகஸ்மிம் டா²னே ஏகதி³வஸம் பு⁴ஞ்ஜித்வா து³தியதி³வஸே அஞ்ஞத்த² பு⁴ஞ்ஜிதும் வட்டதி. படிபாடிம் பன கே²பேத்வா புன ஆதி³தோ பட்டா²ய பு⁴ஞ்ஜிதும் ந வட்டதீதி மஹாபச்சரியம் வுத்தம். ஏகபூக³னானாபூக³ஏககா³மனானாகா³மேஸுபி ஏஸேவ நயோ. யோபி ஏககுலஸ்ஸ வா நானாகுலானம் வா ஏகதோ பஞ்ஞத்தோ தண்டு³லாதீ³னம் அபா⁴வேன அந்தரந்தரா சி²ஜ்ஜதி, ஸோபி ந பு⁴ஞ்ஜிதப்³போ³. ஸசே பன ‘‘ந ஸக்கோம தா³து’’ந்தி உபச்சி²ந்தி³த்வா புன கல்யாணசித்தே உப்பன்னே தா³தும் ஆரப⁴ந்தி, ஏதம் புன ஏகதி³வஸம் பு⁴ஞ்ஜிதும் வட்டதீதி மஹாபச்சரியம் வுத்தம்.

208. அனாபத்தி கி³லானஸ்ஸாதி கி³லானஸ்ஸ அனுவஸித்வா பு⁴ஞ்ஜந்தஸ்ஸ அனாபத்தி. க³ச்ச²ந்தோ வாதி யோ க³ச்ச²ந்தோ அந்தராமக்³கே³ ஏகதி³வஸம் க³தட்டா²னே ச ஏகதி³வஸம் பு⁴ஞ்ஜதி, தஸ்ஸாபி அனாபத்தி. ஆக³ச்ச²ந்தேபி ஏஸேவ நயோ. க³ந்த்வா பச்சாக³ச்ச²ந்தோபி அந்தராமக்³கே³ ஏகதி³வஸம் ஆக³தட்டா²னே ச ஏகதி³வஸம் பு⁴ஞ்ஜிதும் லப⁴தி. க³ச்சி²ஸ்ஸாமீதி பு⁴ஞ்ஜித்வா நிக்க²ந்தஸ்ஸ நதீ³ வா பூரதி சோராதி³ப⁴யம் வா ஹோதி, ஸோ நிவத்தித்வா கே²மபா⁴வம் ஞத்வா க³ச்ச²ந்தோ புன ஏகதி³வஸம் பு⁴ஞ்ஜிதும் லப⁴தீதி ஸப்³ப³மித³ம் மஹாபச்சரியாதீ³ஸு வுத்தம். ஓதி³ஸ்ஸ பஞ்ஞத்தோ ஹோதீதி பி⁴க்கூ²னம்யேவ அத்தா²ய உத்³தி³ஸித்வா பஞ்ஞத்தோ ஹோதி. ந யாவத³த்தோ²தி யாவத³த்த²ம் பஞ்ஞத்தோ ந ஹோதி, தோ²கம் தோ²கம் லப்³ப⁴தி, தாதி³ஸம் நிச்சம்பி பு⁴ஞ்ஜிதும் வட்டதி. பஞ்ச போ⁴ஜனானி ட²பேத்வா ஸப்³ப³த்தா²தி யாகு³க²ஜ்ஜகப²லாப²லாதி³பே⁴தே³ ஸப்³ப³த்த² அனாபத்தி. யாகு³ஆதீ³னி ஹி நிச்சம்பி பு⁴ஞ்ஜிதும் வட்டதி. ஸேஸம் உத்தானமேவ. ஏளகலோமஸமுட்டா²னம் – காயதோ ச காயசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம் திசித்தம், திவேத³னந்தி.

ஆவஸத²பிண்ட³ஸிக்கா²பத³ம் பட²மம்.

2. க³ணபோ⁴ஜனஸிக்கா²பத³வண்ணனா

209. து³தியஸிக்கா²பதே³ – பரிஹீனலாப⁴ஸக்காரோதி ஸோ கிர அஜாதஸத்துனா ராஜானம் மாராபேத்வாபி அபி⁴மாரே யோஜேத்வாபி ருஹிருப்பாத³ம் கத்வாபி கு³ள்ஹபடிச்ச²ன்னோ அஹோஸி. யதா³ பன தி³வாயேவ த⁴னபாலகம் பயோஜேஸி, ததா³ பாகடோ ஜாதோ. ‘‘கத²ம் தே³வத³த்தோ ஹத்தி²ம் பயோஜேஸீ’’தி பரிகதா²ய உப்பன்னாய ‘‘ந கேவலம் ஹத்தி²ம் பயோஜேஸி, ராஜானம்பி மாராபேஸி, அபி⁴மாரேபி பேஸேஸி, ஸிலம்பி பவிஜ்ஜி², பாபோ தே³வத³த்தோ’’தி பாகடோ அஹோஸி. ‘‘கேன ஸத்³தி⁴ம் இத³ம் கம்மமகாஸீ’’தி ச வுத்தே ‘‘ரஞ்ஞா அஜாதஸத்துனா’’தி ஆஹம்ஸு. ததோ நாக³ரா ‘‘கத²ஞ்ஹி நாம ராஜா ஏவரூபம் சோரம் ஸாஸனகண்டகம் க³ஹேத்வா விசரிஸ்ஸதீ’’தி உட்ட²ஹிம்ஸு. ராஜா நக³ரஸங்கோ²ப⁴ம் ஞத்வா தே³வத³த்தம் நீஹரி. ததோ பட்டா²ய சஸ்ஸ பஞ்சதா²லிபாகஸதானி உபச்சி²ந்தி³, உபட்டா²னம்பிஸ்ஸ ந அக³மாஸி, அஞ்ஞேபிஸ்ஸ மனுஸ்ஸா ந கிஞ்சி தா³தப்³ப³ம் வா காதப்³ப³ம் வா மஞ்ஞிம்ஸு. தேன வுத்தம் – ‘‘பரிஹீனலாப⁴ஸக்காரோ’’தி. குலேஸு விஞ்ஞாபேத்வா விஞ்ஞாபேத்வா பு⁴ஞ்ஜதீதி ‘‘மா மே க³ணோ பி⁴ஜ்ஜீ’’தி பரிஸம் போஸேந்தோ ‘‘த்வம் ஏகஸ்ஸ பி⁴க்கு²னோ ப⁴த்தம் தே³ஹி, த்வம் த்³வின்ன’’ந்தி ஏவம் விஞ்ஞாபேத்வா ஸபரிஸோ குலேஸு பு⁴ஞ்ஜதி.

211. சீவரம் பரித்தம் உப்பஜ்ஜதீதி ப⁴த்தம் அக³ண்ஹந்தானம் சீவரம் ந தே³ந்தி, தஸ்மா பரித்தம் உப்பஜ்ஜதி.

212. சீவரகாரகே பி⁴க்கூ² ப⁴த்தேன நிமந்தேந்தீதி கா³மே பிண்டா³ய சரித்வா சிரேன சீவரம் நிட்டா²பேந்தே தி³ஸ்வா ‘‘ஏவம் லஹும் நிட்டா²பேத்வா சீவரம் பரிபு⁴ஞ்ஜிஸ்ஸந்தீ’’தி புஞ்ஞகாமதாய நிமந்தேந்தி.

215. நானாவேரஜ்ஜகேதி நானாவிதே⁴ஹி அஞ்ஞரஜ்ஜேஹி ஆக³தே. ‘‘நானாவிரஜ்ஜகே’’திபி பாடோ², அயமேவத்தோ².

217-8. க³ணபோ⁴ஜனேதி க³ணஸ்ஸ போ⁴ஜனே. இத⁴ ச க³ணோ நாம சத்தாரோ பி⁴க்கூ² ஆதி³ம் கத்வா ததுத்தரிம் பி⁴க்கூ² அதி⁴ப்பேதா, தேனேவ ஸப்³ப³ந்திமம் பரிச்சே²த³ம் த³ஸ்ஸேந்தோ ஆஹ ‘‘யத்த² சத்தாரோ பி⁴க்கூ²…பே… ஏதம் க³ணபோ⁴ஜனம் நாமா’’தி. தம் பனேதம் க³ணபோ⁴ஜனம் த்³வீஹாகாரேஹி பஸவதி நிமந்தனதோ வா விஞ்ஞத்திதோ வா. கத²ம் நிமந்தனதோ பஸவதி? சத்தாரோ பி⁴க்கூ² உபஸங்கமித்வா ‘‘தும்ஹே, ப⁴ந்தே, ஓத³னேன நிமந்தேமி, ஓத³னம் மே க³ண்ஹத² ஆகங்க²த² ஓலோகேத² அதி⁴வாஸேத² படிமானேதா²’’தி ஏவம் யேன கேனசி வேவசனேன வா பா⁴ஸந்தரேன வா பஞ்சன்னம் போ⁴ஜனானம் நாமம் க³ஹேத்வா நிமந்தேதி. ஏவம் ஏகதோ நிமந்திதா பரிச்சி²ன்னகாலவஸேன அஜ்ஜதனாய வா ஸ்வாதனாய வா ஏகதோ க³ச்ச²ந்தி, ஏகதோ க³ண்ஹந்தி, ஏகதோ பு⁴ஞ்ஜந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. ஏகதோ நிமந்திதா ஏகதோ வா நானதோ வா க³ச்ச²ந்தி, ஏகதோ க³ண்ஹந்தி, நானதோ பு⁴ஞ்ஜந்தி, ஆபத்தியேவ. படிக்³க³ஹணமேவ ஹி ஏத்த² பமாணம். ஏகதோ நிமந்திதா ஏகதோ வா நானதோ வா க³ச்ச²ந்தி, நானதோ க³ண்ஹந்தி, ஏகதோ வா நானதோ வா பு⁴ஞ்ஜந்தி, அனாபத்தி. சத்தாரி பரிவேணானி வா விஹாரே வா க³ந்த்வா நானதோ நிமந்திதா ஏகட்டா²னே டி²தேஸுயேவ வா ஏகோ புத்தேன ஏகோ பிதராதி ஏவம்பி நானதோ நிமந்திதா ஏகதோ வா நானதோ வா க³ச்ச²ந்து, ஏகதோ வா நானதோ வா பு⁴ஞ்ஜந்து, ஸசே ஏகதோ க³ண்ஹந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. ஏவம் தாவ நிமந்தனதோ பஸவதி.

கத²ம் விஞ்ஞத்திதோ? சத்தாரோ பி⁴க்கூ² ஏகதோ டி²தா வா நிஸின்னா வா உபாஸகம் தி³ஸ்வா ‘‘அம்ஹாகம் சதுன்னம்பி ப⁴த்தம் தே³ஹீ’’தி வா விஞ்ஞாபேய்யும், பாடேக்கம் வா பஸ்ஸித்வா ‘‘மய்ஹம் தே³ஹி, மய்ஹம் தே³ஹீ’’தி ஏவம் ஏகதோ வா நானதோ வா விஞ்ஞாபேத்வா ஏகதோ வா க³ச்ச²ந்து நானதோ வா, ப⁴த்தம் க³ஹேத்வாபி ஏகதோ வா பு⁴ஞ்ஜந்து நானதோ வா, ஸசே ஏகதோ க³ண்ஹந்தி, க³ணபோ⁴ஜனம் ஹோதி, ஸப்³பே³ஸம் ஆபத்தி. ஏவம் விஞ்ஞத்திதோ பஸவதி.

பாதா³பி ப²லிதாதி யதா² மஹாசம்மஸ்ஸ பரதோ மம்ஸம் தி³ஸ்ஸதி; ஏவம் பா²லிதா, வாலிகாய வா ஸக்க²ராய வா பஹடமத்தே து³க்க²ம் உப்பாதே³ந்தி, ந ஸக்கா ஹோதி அந்தோகா³மே பிண்டா³ய சரிதும். ஈதி³ஸே கே³லஞ்ஞே கி³லானஸமயோதி பு⁴ஞ்ஜிதப்³ப³ம், ந லேஸகப்பியம் காதப்³ப³ம்.

சீவரே கயிரமானேதி யதா³ ஸாடகஞ்ச ஸுத்தஞ்ச லபி⁴த்வா சீவரம் கரோந்தி ததா³; விஸுஞ்ஹி சீவரகாரஸமயோ நாம நத்தி². தஸ்மா யோ தத்த² சீவரே கத்தப்³ப³ம் யம்கிஞ்சி கம்மம் கரோதி, மஹாபச்சரியஞ்ஹி ‘‘அந்தமஸோ ஸூசிவேத⁴னகோ’’திபி வுத்தம், தேன சீவரகாரஸமயோதி பு⁴ஞ்ஜிதப்³ப³ம். குருந்தி³யம் பன வித்தா²ரேனேவ வுத்தம். யோ சீவரம் விசாரேதி, சி²ந்த³தி, மோக⁴ஸுத்தம் ட²பேதி, ஆக³ந்துகபட்டம் ட²பேதி, பச்சாக³தம் ஸிப்³ப³தி, ஆக³ந்துகபட்டம் ப³ந்த⁴தி, அனுவாதம் சி²ந்த³தி க⁴ட்டேதி ஆரோபேதி, தத்த² பச்சாக³தம் ஸிப்³ப³தி, ஸுத்தம் கரோதி வலேதி, பிப்ப²லிகம் நிஸேதி, பரிவத்தனம் கரோதி, ஸப்³போ³பி சீவரம் கரோதியேவாதி வுச்சதி. யோ பன ஸமீபே நிஸின்னோ ஜாதகம் வா த⁴ம்மபத³ம் வா கதே²தி, அயம் ந சீவரகாரகோ. ஏதம் ட²பேத்வா ஸேஸானம் க³ணபோ⁴ஜனே அனாபத்தீதி.

அத்³த⁴யோஜனந்தி ஏத்தகம்பி அத்³தா⁴னம் க³ந்துகாமேன. யோ பன தூ³ரம் க³ந்துகாமோ, தத்த² வத்தப்³ப³மேவ நத்தி². க³ச்ச²ந்தேனாதி அத்³தா⁴னம் க³ச்ச²ந்தேன, அத்³த⁴யோஜனப்³ப⁴ந்தரே கா³வுதேபி பு⁴ஞ்ஜிதும் வட்டதி. க³தேன பு⁴ஞ்ஜிதப்³ப³ந்தி க³தேன ஏகதி³வஸம் பு⁴ஞ்ஜிதப்³ப³ம். நாவாபி⁴ருஹனேபி ஏஸேவ நயோ. அயம் பன விஸேஸோ – அபி⁴ருள்ஹேன இச்சி²தட்டா²னம் க³ந்த்வாபி யாவ ந ஓரோஹதி தாவ பு⁴ஞ்ஜிதப்³ப³ந்தி மஹாபச்சரியம் வுத்தம். சதுத்தே² ஆக³தேதி அயம் அந்திமபரிச்சே²தோ³, சதுத்தே²பி ஆக³தே யத்த² ந யாபேந்தி; ஸோ மஹாஸமயோ. யத்த² பன ஸதம் வா ஸஹஸ்ஸம் வா ஸன்னிபதந்தி, தத்த² வத்தப்³ப³மேவ நத்தி². தஸ்மா தாதி³ஸே காலே ‘‘மஹாஸமயோ’’தி அதி⁴ட்ட²ஹித்வா பு⁴ஞ்ஜிதப்³ப³ம். யோ கோசி பரிப்³பா³ஜகஸமாபன்னோதி ஸஹத⁴ம்மிகேஸு வா தித்தி²யேஸு வா அஞ்ஞதரோ, ஏதேஸஞ்ஹி யேன கேனசி கதே ப⁴த்தே ‘‘ஸமணப⁴த்தஸமயோ’’தி பு⁴ஞ்ஜிதப்³ப³ம்.

220. அனாபத்தி ஸமயேதி ஸத்தஸு ஸமயேஸு அஞ்ஞதரஸ்மிம் அனாபத்தி. த்³வே தயோ ஏகதோதி யேபி அகப்பியனிமந்தனம் ஸாதி³யித்வா த்³வே வா தயோ வா ஏகதோ க³ஹேத்வா பு⁴ஞ்ஜந்தி, தேஸம்பி அனாபத்தி.

தத்த² அனிமந்திதசதுத்த²ம், பிண்ட³பாதிகசதுத்த²ம், அனுபஸம்பன்னசதுத்த²ம், பத்தசதுத்த²ம், கி³லானசதுத்த²ந்தி பஞ்சன்னம் சதுக்கானம் வஸேன வினிச்ச²யோ வேதி³தப்³போ³. கத²ம்? இதே⁴கச்சோ சத்தாரோ பி⁴க்கூ² ‘‘ப⁴த்தம் க³ண்ஹதா²’’தி நிமந்தேதி. தேஸு தயோ க³தா, ஏகோ ந க³தோ. உபாஸகோ ‘‘ஏகோ ப⁴ந்தே தே²ரோ குஹி’’ந்தி புச்ச²தி. நாக³தோ உபாஸகாதி. ஸோ அஞ்ஞம் தங்க²ணப்பத்தம் கஞ்சி ‘‘ஏஹி ப⁴ந்தே’’தி பவேஸேத்வா சதுன்னம்பி ப⁴த்தம் தே³தி, ஸப்³பே³ஸம் அனாபத்தி. கஸ்மா? க³ணபூரகஸ்ஸ அனிமந்திதத்தா. தயோ ஏவ ஹி தத்த² நிமந்திதா க³ண்ஹிம்ஸு, தேஹி க³ணோ ந பூரதி, க³ணபூரகோ ச அனிமந்திதோ, தேன க³ணோ பி⁴ஜ்ஜதீதி இத³ம் அனிமந்திதசதுத்த²ம்.

பிண்ட³பாதிகசதுத்தே² – நிமந்தனகாலே ஏகோ பிண்ட³பாதிகோ ஹோதி, ஸோ நாதி⁴வாஸேதி. க³மனவேலாய பன ‘‘ஏஹி ப⁴ந்தே’’தி வுத்தே அனதி⁴வாஸிதத்தா அனாக³ச்ச²ந்தம்பி ‘‘ஏத² பி⁴க்க²ம் லச்ச²தா²’’தி க³ஹேத்வா க³ச்ச²ந்தி, ஸோ தம் க³ணம் பி⁴ந்த³தி. தஸ்மா ஸப்³பே³ஸம் அனாபத்தி.

அனுபஸம்பன்னசதுத்தே² – ஸாமணேரேன ஸத்³தி⁴ம் நிமந்திதா ஹோந்தி, ஸோபி க³ணம் பி⁴ந்த³தி.

பத்தசதுத்தே² – ஏகோ ஸயம் அக³ந்த்வா பத்தம் பேஸேதி; ஏவம்பி க³ணோ பி⁴ஜ்ஜதி. தஸ்மா ஸப்³பே³ஸம் அனாபத்தி.

கி³லானசதுத்தே² – கி³லானேன ஸத்³தி⁴ம் நிமந்திதா ஹோந்தி, தத்த² கி³லானஸ்ஸேவ அனாபத்தி, இதரேஸம் பன க³ணபூரகோ ஹோதி. ந ஹி கி³லானேன க³ணோ பி⁴ஜ்ஜதி. தஸ்மா தேஸம் ஆபத்தியேவ. மஹாபச்சரியம் பன அவிஸேஸேன வுத்தம்.

ஸமயலத்³த⁴கோ ஸயமேவ முச்சதி, ஸேஸானம் க³ணபூரகத்தா ஆபத்திகரோ ஹோதி. தஸ்மா சீவரதா³னஸமயலத்³த⁴காதீ³னம்பி வஸேன சதுக்கானி வேதி³தப்³பா³னி. ஸசே பன அதி⁴வாஸேத்வா க³தேஸுபி சதூஸு ஜனேஸு ஏகோ பண்டி³தோ பி⁴க்கு² ‘‘அஹம் தும்ஹாகம் க³ணம் பி⁴ந்தி³ஸ்ஸாமி, நிமந்தனம் ஸாதி³யதா²’’தி வத்வா யாகு³க²ஜ்ஜகாவஸானே ப⁴த்தத்தா²ய பத்தம் க³ண்ஹந்தானம் அத³த்வா ‘‘இமே தாவ பி⁴க்கூ² போ⁴ஜேத்வா விஸ்ஸஜ்ஜேத², அஹம் பச்சா² அனுமோத³னம் கத்வா க³மிஸ்ஸாமீ’’தி நிஸின்னோ. தேஸு பு⁴த்வா க³தேஸு ‘‘தே³த² ப⁴ந்தே பத்த’’ந்தி உபாஸகேன பத்தம் க³ஹேத்வா ப⁴த்தே தி³ன்னே பு⁴ஞ்ஜித்வா அனுமோத³னம் கத்வா க³ச்ச²தி, ஸப்³பே³ஸம் அனாபத்தி. பஞ்சன்னஞ்ஹி போ⁴ஜனானம்யேவ வஸேன க³ணபோ⁴ஜனே விஸங்கேதம் நத்தி². ஓத³னேன நிமந்திதா கும்மாஸம் க³ண்ஹந்தாபி ஆபத்திம் ஆபஜ்ஜந்தி. தானி ச தேஹி ஏகதோ ந க³ஹிதானி. யாகு³ஆதீ³ஸு பன விஸங்கேதம் ஹோதி, தானி தேஹி ஏகதோ க³ஹிதானீதி. ஏவம் ஏகோ பண்டி³தோ அஞ்ஞேஸம்பி அனாபத்திம் கரோதி.

தஸ்மா ஸசே கோசி ஸங்க⁴ப⁴த்தம் கத்துகாமேன நிமந்தனத்தா²ய பேஸிதோ விஹாரம் ஆக³ம்ம ‘‘ப⁴ந்தே, ஸ்வே அம்ஹாகம் க⁴ரே பி⁴க்க²ம் க³ண்ஹதா²’’தி அவத்வா ‘‘ப⁴த்தம் க³ண்ஹதா²’’தி வா ‘‘ஸங்க⁴ப⁴த்தம் க³ண்ஹதா²’’தி வா ‘‘ஸங்கோ⁴ ப⁴த்தம் க³ண்ஹாதூ’’தி வா வத³தி, ப⁴த்துத்³தே³ஸகேன பண்டி³தேன ப⁴விதப்³ப³ம், நேமந்தனிகா க³ணபோ⁴ஜனதோ பிண்ட³பாதிகா ச து⁴தங்க³பே⁴த³தோ மோசேதப்³பா³. கத²ம்? ஏவம் தாவ வத்தப்³ப³ம் – ‘‘ஸ்வே ந ஸக்கா உபாஸகா’’தி. ‘‘புனதி³வஸே, ப⁴ந்தே’’தி. ‘‘புனதி³வஸேபி ந ஸக்கா’’தி. ஏவம் யாவ அத்³த⁴மாஸம்பி ஹரித்வா புன வத்தப்³போ³ – ‘‘த்வம் கிம் அவசா’’தி? ஸசே புனபி ‘‘ஸங்க⁴ப⁴த்தம் க³ண்ஹதா²’’தி வத³தி, ததோ ‘‘இமம் தாவ உபாஸக புப்ப²ம் கப்பியம் கரோஹி, இமம் திண’’ந்தி ஏவம் விக்கே²பம் கத்வா புன ‘‘கிம் கத²யித்தா²’’தி புச்சி²தப்³போ³. ஸசே புனபி ததே²வ வத³தி, ‘‘ஆவுஸோ, த்வம் பிண்ட³பாதிகே வா மஹாதே²ரே வா ந லச்ச²ஸி, ஸாமணேரே லச்ச²ஸீ’’தி வத்தப்³போ³. ‘‘நனு, ப⁴ந்தே அஸுகஸ்மிஞ்ச அஸுகஸ்மிஞ்ச கா³மே ப⁴த³ந்தே போ⁴ஜேஸும், அஹம் கஸ்மா ந லபா⁴மீ’’தி ச வுத்தே ‘‘தே நிமந்தேதும் ஜானந்தி, த்வம் ந ஜானாஸீ’’தி. தே கத²ம் நிமந்தேஸும் ப⁴ந்தேதி? தே ஏவமாஹம்ஸு – ‘‘அம்ஹாகம், ப⁴ந்தே, பி⁴க்க²ம் க³ண்ஹதா²’’தி. ஸசே ஸோபி ததே²வ வத³தி, வட்டதி. அத² புனபி ‘‘ப⁴த்தம் க³ண்ஹதா²’’தி வத³தி, ‘‘ந தா³னி த்வம், ஆவுஸோ, ப³ஹூ பி⁴க்கூ² லச்ச²ஸி, தயோ ஏவ லச்ச²ஸீ’’தி வத்தப்³போ³. ‘‘நனு, ப⁴ந்தே, அஸுகஸ்மிஞ்ச அஸுகஸ்மிஞ்ச கா³மே ஸகலம் பி⁴க்கு²ஸங்க⁴ம் போ⁴ஜேஸும், அஹம் கஸ்மா ந லபா⁴மீ’’தி? ‘‘த்வம் நிமந்தேதும் ந ஜானாஸீ’’தி. ‘‘தே கத²ம் நிமந்தேஸு’’ந்தி? தே ‘‘பி⁴க்க²ம் க³ண்ஹதா²’’தி ஆஹம்ஸூதி. ஸசே ஸோபி ‘‘பி⁴க்க²ம் க³ண்ஹதா²’’தி வத³தி, வட்டதி. அத² புனபி ‘‘ப⁴த்தமேவா’’தி வத³தி, ததோ வத்தப்³போ³ – ‘‘க³ச்ச² த்வம், நத்த²ம்ஹாகம் தவ ப⁴த்தேனத்தோ², நிப³த்³த⁴கோ³சரோ ஏஸ அம்ஹாகம், மயமேத்த² பிண்டா³ய சரிஸ்ஸாமா’’தி. தம் ‘‘சரத², ப⁴ந்தே’’தி வத்வா ஆக³தம் புச்ச²ந்தி – ‘‘கிம் போ⁴ லத்³தா⁴ பி⁴க்கூ²’’தி. ‘‘கிம் ஏதேன ப³ஹு ஏத்த² வத்தப்³ப³ம், ‘தே²ரா ஸ்வே பிண்டா³ய சரிஸ்ஸாமா’தி ஆஹம்ஸு. மா தா³னி தும்ஹே பமஜ்ஜித்தா²’’தி. து³தியதி³வஸே சேதியவத்தம் கத்வா டி²தா பி⁴க்கூ² ஸங்க⁴த்தே²ரேன வத்தப்³பா³ – ‘‘ஆவுஸோ, து⁴ரகா³மே ஸங்க⁴ப⁴த்தம் அபண்டி³தமனுஸ்ஸோ பன அக³மாஸி, க³ச்சா²ம து⁴ரகா³மே பிண்டா³ய சரிஸ்ஸாமா’’தி. பி⁴க்கூ²ஹி தே²ரஸ்ஸ வசனம் காதப்³ப³ம், ந து³ப்³ப³சேஹி ப⁴விதப்³ப³ம், கா³மத்³வாரே அட்ட²த்வாவ பிண்டா³ய சரிதப்³ப³ம். தேஸு பத்தானி க³ஹேத்வா நிஸீதா³பேத்வா போ⁴ஜேந்தேஸு பு⁴ஞ்ஜிதப்³ப³ம். ஸசே ஆஸனஸாலாய ப⁴த்தம் ட²பேத்வா ரதி²காஸு ஆஹிண்ட³ந்தா ஆரோசேந்தி – ‘‘ஆஸனஸாலாய, ப⁴ந்தே, ப⁴த்தம் க³ண்ஹதா²’’தி ந வட்டதி.

அத² பன ப⁴த்தம் ஆதா³ய தத்த² தத்த² க³ந்த்வா ‘‘ப⁴த்தம் க³ண்ஹதா²’’தி வத³ந்தி, படிகச்சேவ வா விஹாரம் அபி⁴ஹரித்வா பதிரூபே டா²னே ட²பேத்வா ஆக³தாக³தானம் தே³ந்தி, அயம் அபி⁴ஹடபி⁴க்கா² நாம வட்டதி. ஸசே பன ப⁴த்தஸாலாய தா³னம் ஸஜ்ஜேத்வா தம் தம் பரிவேணம் பஹிணந்தி ‘‘ப⁴த்தஸாலாய ப⁴த்தம் க³ண்ஹதா²’’தி, ந வட்டதி. யே பன மனுஸ்ஸா பிண்ட³சாரிகே பி⁴க்கூ² தி³ஸ்வா ஆஸனஸாலம் ஸம்மஜ்ஜித்வா தத்த² நிஸீதா³பேத்வா போ⁴ஜேந்தி, ந தே படிக்கி²பிதப்³பா³. யே பன கா³மே பி⁴க்க²ம் அலபி⁴த்வா கா³மதோ நிக்க²மந்தே பி⁴க்கூ² தி³ஸ்வா ‘‘ப⁴ந்தே ப⁴த்தம் க³ண்ஹதா²’’தி வத³ந்தி, தே படிக்கி²பிதப்³பா³, ந வா நிவத்திதப்³ப³ம். ஸசே ‘‘நிவத்தத², ப⁴ந்தே, ப⁴த்தம் க³ண்ஹதா²’’தி வத³ந்தி, ‘‘நிவத்ததா²’’தி வுத்தபதே³ நிவத்திதும் வட்டதி. ‘‘நிவத்தத² ப⁴ந்தே, க⁴ரே ப⁴த்தம் கதம், கா³மே ப⁴த்தம் கத’’ந்தி வத³ந்தி, கே³ஹே ச கா³மே ச ப⁴த்தம் நாம யஸ்ஸ கஸ்ஸசி ஹோதீதி நிவத்திதும் வட்டதி. ‘‘நிவத்தத², ப⁴த்தம் க³ண்ஹதா²’’தி ஸம்ப³ந்த⁴ம் கத்வா வத³ந்தி, நிவத்திதும் ந வட்டதி. ஆஸனஸாலதோ பிண்டா³ய சரிதும் நிக்க²மந்தே தி³ஸ்வா ‘‘நிஸீத³த² ப⁴ந்தே ப⁴த்தம் க³ண்ஹதா²’’தி வுத்தேபி ஏஸேவ நயோ. நிச்சப⁴த்தந்தி து⁴வப⁴த்தம் வுச்சதி. ‘‘நிச்சப⁴த்தம் க³ண்ஹதா²’’தி வத³ந்தி, ப³ஹூனம்பி ஏகதோ க³ஹேதும் வட்டதி. ஸலாகப⁴த்தாதீ³ஸுபி ஏஸேவ நயோ. ஸேஸமேத்த² உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

க³ணபோ⁴ஜனஸிக்கா²பத³ம் து³தியம்.

3. பரம்பரபோ⁴ஜனஸிக்கா²பத³வண்ணனா

221. ததியஸிக்கா²பதே³ – ந கோ² இத³ம் ஓரகம் ப⁴விஸ்ஸதி, யத²யிமே மனுஸ்ஸா ஸக்கச்சம் ப⁴த்தம் கரோந்தீதி, யேன நியாமேன இமே மனுஸ்ஸா ஸக்கச்சம் ப⁴த்தம் கரோந்தி, தேன ஞாயதி – ‘‘இத³ம் ஸாஸனம் இத³ம் வா பு³த்³த⁴ப்பமுகே² ஸங்கே⁴ தா³னம் ந கோ² ஓரகம் ப⁴விஸ்ஸதி, பரித்தம் லாமகம் நேவ ப⁴விஸ்ஸதீ’’தி. கிரபதிகோதி ஏத்த² ‘‘கிரோ’’தி தஸ்ஸ குலபுத்தஸ்ஸ நாமம்; அதி⁴பச்சட்டே²ன பன ‘‘கிரபதிகோ’’தி வுச்சதி. ஸோ கிர இஸ்ஸரோ அதி⁴பதி மாஸஉதுஸம்வச்ச²ரனியாமேன வேதனம் த³த்வா கம்மகாரகே கம்மம் காரேதி. ப³த³ரா படியத்தாதி உபசாரவஸேன வத³தி. ப³த³ரமிஸ்ஸேனாதி ப³த³ரஸாளவேன.

222. உஸ்ஸூரே ஆஹரியித்தா²தி அதிதி³வா ஆஹரியித்த².

226. மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீதி அயம் ப⁴த்தவிகப்பனா நாம ஸம்முகா²பி பரம்முகா²பி வட்டதி. ஸம்முகா² தி³ஸ்வா ‘‘துய்ஹம் விகப்பேமீ’’தி வத்வா பு⁴ஞ்ஜிதப்³ப³ம், அதி³ஸ்வா பஞ்சஸு ஸஹத⁴ம்மிகேஸு ‘‘இத்த²ன்னாமஸ்ஸ விகப்பேமீ’’தி வத்வா பு⁴ஞ்ஜிதப்³ப³ம். மஹாபச்சரியாதீ³ஸு பன பரம்முகா²விகப்பனாவ வுத்தா. ஸா சாயம் யஸ்மா வினயகம்மேன ஸங்க³ஹிதா, தஸ்மா ப⁴க³வதோ விகப்பேதும் ந வட்டதி. ப⁴க³வதி ஹி க³ந்த⁴குடியம் நிஸின்னேபி ஸங்க⁴மஜ்ஜே² நிஸின்னேபி ஸங்கே⁴ன க³ணப்பஹோனகே பி⁴க்கூ² க³ஹேத்வா தம் தம் கம்மம் கதம் ஸுகதமேவ ஹோதி, ப⁴க³வா நேவ கம்மம் கோபேதி; ந ஸம்பாதே³தி. ந கோபேதி த⁴ம்மிஸ்ஸரத்தா, ந ஸம்பாதே³தி அக³ணபூரகத்தா.

229. த்³வே தயோ நிமந்தனே ஏகதோ பு⁴ஞ்ஜதீதி த்³வே தீணி நிமந்தனானி ஏகபத்தே பக்கி²பித்வா மிஸ்ஸேத்வா ஏகம் கத்வா பு⁴ஞ்ஜதீதி அத்தோ². த்³வே தீணி குலானி நிமந்தேத்வா ஏகஸ்மிம் டா²னே நிஸீதா³பேத்வா இதோ சிதோ ச ஆஹரித்வா ப⁴த்தம் ஆகிரந்தி, ஸூபப்³யஞ்ஜனம் ஆகிரந்தி, ஏகமிஸ்ஸகம் ஹோதி, ஏத்த² அனாபத்தீதி மஹாபச்சரியம் வுத்தம். ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தி. ஹத்த²ம் பன அந்தோ பவேஸேத்வா பட²மனிமந்தனதோ ஏகம்பி கப³ளம் உத்³த⁴ரித்வா பு⁴த்தகாலதோ பட்டா²ய யதா² ததா² வா பு⁴ஞ்ஜந்தஸ்ஸ அனாபத்தி. ஸசேபி தத்த² கீ²ரம் வா ரஸம் வா ஆகிரந்தி, யேன அஜ்ஜோ²த்த²தம் ப⁴த்தம் ஏகரஸம் ஹோதி, கோடிதோ பட்டா²ய பு⁴ஞ்ஜந்தஸ்ஸ அனாபத்தீதி மஹாபச்சரியம் வுத்தம். மஹாஅட்ட²கதா²யம் பன வுத்தம் – ‘‘கீ²ரப⁴த்தம் வா ரஸப⁴த்தம் வா லபி⁴த்வா நிஸின்னஸ்ஸ தத்தே²வ அஞ்ஞேபி கீ²ரப⁴த்தம் வா ரஸப⁴த்தம் வா ஆகிரந்தி, கீ²ரம் வா ரஸம் வா பிவதோ அனாபத்தி. பு⁴ஞ்ஜந்தேன பன பட²மம் லத்³த⁴மம்ஸக²ண்ட³ம் வா ப⁴த்தபிண்ட³ம் வா முகே² பக்கி²பித்வா கோடிதோ பட்டா²ய பு⁴ஞ்ஜிதும் வட்டதி. ஸப்பிபாயாஸேபி ஏஸேவ நயோ’’தி.

மஹாஉபாஸகோ பி⁴க்கு²ம் நிமந்தேதி, தஸ்ஸ குலம் உபக³தஸ்ஸ உபாஸகோபி தஸ்ஸ புத்ததா³ரபா⁴திகப⁴கி³னிஆத³யோபி அத்தனோ அத்தனோ கோட்டா²ஸம் ஆஹரித்வா பத்தே பக்கி²பந்தி, உபாஸகேன பட²மம் தி³ன்னம் அபு⁴ஞ்ஜித்வா பச்சா² லத்³த⁴ம் பு⁴ஞ்ஜந்தஸ்ஸ ‘‘அனாபத்தீ’’தி மஹாஅட்ட²கதா²யம் வுத்தம். குருந்த³ட்ட²கதா²யம் பன வட்டதீதி வுத்தம். மஹாபச்சரியம் ‘‘ஸசே பாடேக்கம் பசந்தி, அத்தனோ அத்தனோ பக்கப⁴த்ததோ ஆஹரித்வா தே³ந்தி, தத்த² பச்சா² ஆஹடம் பட²மம் பு⁴ஞ்ஜந்தஸ்ஸ பாசித்தியம். யதி³ பன ஸப்³பே³ஸம் ஏகோவ பாகோ ஹோதி, பரம்பரபோ⁴ஜனம் ந ஹோதீ’’தி வுத்தம். மஹாஉபாஸகோ நிமந்தேத்வா நிஸீதா³பேதி, அஞ்ஞோ மனுஸ்ஸோ பத்தம் க³ண்ஹாதி, ந தா³தப்³ப³ம். கிம் ப⁴ந்தே ந தே³தா²தி? நனு உபாஸக தயா நிமந்திதம்ஹாதி! ஹோது ப⁴ந்தே, லத்³த⁴ம் லத்³த⁴ம் பு⁴ஞ்ஜதா²தி வத³தி, பு⁴ஞ்ஜிதும் வட்டதி. அஞ்ஞேன ஆஹரித்வா ப⁴த்தே தி³ன்னே ஆபுச்சி²த்வாபி பு⁴ஞ்ஜிதும் வட்டதீதி குருந்தி³யம் வுத்தம்.

அனுமோத³னம் கத்வா க³ச்ச²ந்தம் த⁴ம்மம் ஸோதுகாமா ‘‘ஸ்வேபி ப⁴ந்தே ஆக³ச்சே²ய்யாதா²’’தி ஸப்³பே³ நிமந்தேந்தி, புனதி³வஸே ஆக³ந்த்வா லத்³த⁴ம் லத்³த⁴ம் பு⁴ஞ்ஜிதும் வட்டதி. கஸ்மா? ஸப்³பே³ஹி நிமந்திதத்தா. ஏகோ பி⁴க்கு² பிண்டா³ய சரந்தோ ப⁴த்தம் லப⁴தி, தமஞ்ஞோ உபாஸகோ நிமந்தேத்வா க⁴ரே நிஸீதா³பேதி, ந ச தாவ ப⁴த்தம் ஸம்பஜ்ஜதி. ஸசே ஸோ பி⁴க்கு² பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தி. அபு⁴த்வா நிஸின்னே ‘‘கிம் ப⁴ந்தே ந பு⁴ஞ்ஜஸீ’’தி வுத்தே ‘‘தயா நிமந்திதத்தா’’தி வத்வா லத்³த⁴ம் லத்³த⁴ம் பு⁴ஞ்ஜத² ப⁴ந்தே’’தி வுத்தோ பு⁴ஞ்ஜதி, வட்டதி.

ஸகலேன கா³மேனாதி ஸகலேன கா³மேன ஏகதோ ஹுத்வா நிமந்திதஸ்ஸேவ யத்த² கத்த²சி பு⁴ஞ்ஜதோ அனாபத்தி. பூகே³பி ஏஸேவ நயோ. நிமந்தியமானோ பி⁴க்க²ம் க³ஹேஸ்ஸாமீதி ப⁴ணதீதி ‘‘ப⁴த்தம் க³ண்ஹா’’தி நிமந்தியமானோ ‘‘ந மய்ஹம் தவ ப⁴த்தேனத்தோ², பி⁴க்க²ம் க³ண்ஹிஸ்ஸாமீ’’தி வத³தி. ஏத்த² பன மஹாபது³மத்தே²ரோ ஆஹ – ‘‘ஏவம் வத³ந்தோ இமஸ்மிம் ஸிக்கா²பதே³ அனிமந்தனம் காதும் ஸக்கோதி, பு⁴ஞ்ஜனத்தா²ய பன ஓகாஸோ கதோ ஹோதீதி நேவ க³ணபோ⁴ஜனதோ ந சாரித்ததோ முச்சதீ’’தி. மஹாஸுமத்தே²ரோ ஆஹ – ‘‘யத³க்³கே³ன அனிமந்தனம் காதும் ஸக்கோதி, தத³க்³கே³ன நேவ க³ணபோ⁴ஜனம் ந சாரித்தம் ஹோதீ’’தி. ஸேஸம் உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம் ஏத்த² ஹி போ⁴ஜனம் கிரியா, அவிகப்பனம் அகிரியா, நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பரம்பரபோ⁴ஜனஸிக்கா²பத³ம் ததியம்.

4. காணமாதாஸிக்கா²பத³வண்ணனா

230. சதுத்த²ஸிக்கா²பதே³ – காணமாதாதி காணாய மாதா. ஸா கிரஸ்ஸா தீ⁴தா அபி⁴ரூபா அஹோஸி, யே யே தம் பஸ்ஸந்தி, தே தே ராகே³ன காணா ஹோந்தி, ராக³ந்தா⁴ ஹோந்தீதி அத்தோ². தஸ்மா பரேஸம் காணபா⁴வகரணதோ ‘‘காணா’’தி விஸ்ஸுதா அஹோஸி. தஸ்ஸா வஸேன மாதாபிஸ்ஸா ‘‘காணமாதா’’தி பாகடா ஜாதா. ஆக³தந்தி ஆக³மனம். கிஸ்மிம் வியாதி கீதி³ஸம் விய; லஜ்ஜனகம் விய ஹோதீதி அதி⁴ப்பாயோ. ரித்தஹத்த²ம் க³ந்துந்தி ரித்தா ஹத்தா² அஸ்மிம் க³மனே ததி³த³ம் ரித்தஹத்த²ம், தம் ரித்தஹத்த²ம் க³மனம் க³ந்தும் லஜ்ஜனகம் விய ஹோதீதி வுத்தம் ஹோதி. பரிக்க²யம் அக³மாஸீதி உபாஸிகா அரியஸாவிகா பி⁴க்கூ² தி³ஸ்வா ஸந்தம் அதா³தும் ந ஸக்கோதி, தஸ்மா தாவ தா³பேஸி, யாவ ஸப்³ப³ம் பரிக்க²யம் அக³மாஸி. த⁴ம்மியா கதா²யாதி ஏத்த² காணாபி மாது அத்தா²ய தே³ஸியமானம் த⁴ம்மம் ஸுணந்தீ தே³ஸனாபரியோஸானே ஸோதாபன்னா அஹோஸி. உட்டா²யாஸனா பக்காமீதி ஆஸனதோ உட்ட²ஹித்வா க³தோ. ஸோபி புரிஸோ ‘‘ஸத்தா² கிர காணமாதாய நிவேஸனம் அக³மாஸீ’’தி ஸுத்வா காணம் ஆனேத்வா பகதிட்டா²னேயேவ ட²பேஸி.

231. இமஸ்மிம் பன வத்து²ஸ்மிம் உப்பன்னமத்தே அப்பஞ்ஞத்தேயேவ ஸிக்கா²பதே³ பாதே²ய்யவத்து² உத³பாதி³, தஸ்மா அனந்தரமேவ சேதம் த³ஸ்ஸேதும் ‘‘தேன கோ² பன ஸமயேனா’’திஆதி³ வுத்தம். ஸோபி ச உபாஸகோ அரியஸாவகத்தா ஸப்³ப³மேவ தா³பேஸி. தேன வுத்தம் – ‘‘பரிக்க²யம் அக³மாஸீ’’தி.

233. யம்கிஞ்சி பஹேணகத்தா²யாதி பண்ணாகாரத்தா²ய படியத்தம் யம்கிஞ்சி அதிரஸகமோத³கஸக்க²லிகாதி³ ஸப்³ப³ம் இத⁴ பூவோத்வேவ ஸங்க்²யம் க³ச்ச²தி. யம்கிஞ்சி பாதே²ய்யத்தா²யாதி மக்³க³ம் க³ச்ச²ந்தானம் அந்தராமக்³க³த்தா²ய படியத்தம் யம்கிஞ்சி ப³த்³த⁴ஸத்துஅப³த்³த⁴ஸத்துதிலதண்டு³லாதி³ ஸப்³ப³ம் இத⁴ மந்தோ²த்வேவ ஸங்க்²யம் க³ச்ச²தி. ததோ சே உத்தரிந்தி ஸசேபி ததியம் பத்தம் தூ²பீகதம் க³ண்ஹாதி, பூவக³ணனாய பாசித்தியம்.

த்³வத்திபத்தபூரே படிக்³க³ஹேத்வாதி முக²வட்டியா ஹேட்டி²மலேகா²ய ஸமபூரே பத்தே க³ஹேத்வா. அமுத்ர மயா த்³வத்திபத்தபூராதி ஏத்த² ஸசே த்³வே க³ஹிதா, ‘‘அத்ர மயா த்³வே பத்தபூரா படிக்³க³ஹிதா, த்வம் ஏகம் க³ண்ஹேய்யாஸீ’’தி வத்தப்³ப³ம். தேனாபி அஞ்ஞம் பஸ்ஸித்வா ‘‘பட²மம் ஆக³தேன த்³வே பத்தபூரா க³ஹிதா, மயா ஏகோ, மா த்வம் க³ண்ஹீ’’தி வத்தப்³ப³ம். யேன பட²மம் ஏகோ க³ஹிதோ, தஸ்ஸாபி பரம்பராரோசனே ஏஸேவ நயோ. யேன பன ஸயமேவ தயோ க³ஹிதா, தேன அஞ்ஞம் தி³ஸ்வா ‘‘மா கோ² ஏத்த² படிக்³க³ண்ஹி’’ ச்சேவ வத்தப்³ப³ம். படிக்கமனம் நீஹரித்வாதி ஆஸனஸாலம் ஹரித்வா, ஆஸனஸாலம் க³ச்ச²ந்தேன ச ச²ட்³டி³தஸாலா ந க³ந்தப்³பா³. யத்த² மஹா பி⁴க்கு²ஸங்கோ⁴ நிஸீத³தி, தத்த² க³ந்தப்³ப³ம். மஹாபச்சரியம் பன வுத்தம் ‘‘யா லத்³த⁴ட்டா²னதோ ஆஸன்னா ஆஸனஸாலா, தத்த² க³ந்தப்³ப³ம். அத்தனோ ‘ஸந்தி³ட்டா²னம் வா ஸம்ப⁴த்தானம் வா ஏகனிகாயிகானம் வா த³ஸ்ஸாமீ’தி அஞ்ஞத்த² க³ந்தும் ந லப்³ப⁴தி. ஸசே பனஸ்ஸ நிப³த்³த⁴னிஸீத³னட்டா²னம் ஹோதி, தூ³ரம்பி க³ந்தும் வட்டதீ’’தி.

ஸம்விப⁴ஜிதப்³ப³ந்தி ஸசே தயோ பத்தபூரா க³ஹிதா, ஏகம் அத்தனோ ட²பேத்வா த்³வே பி⁴க்கு²ஸங்க⁴ஸ்ஸ தா³தப்³பா³. ஸச்சே த்³வே க³ஹிதா, ஏகம் அத்தனோ ட²பேத்வா ஏகோ ஸங்க⁴ஸ்ஸ தா³தப்³போ³, யதா²மித்தம் பன தா³தும் ந லப்³ப⁴தி. யேன ஏகோ க³ஹிதோ, ந தேன கிஞ்சி அகாமா தா³தப்³ப³ம், யதா²ருசி காதப்³ப³ம்.

235. க³மனே படிப்பஸ்ஸத்³தே⁴தி அந்தராமக்³கே³ உபத்³த³வம் வா தி³ஸ்வா அனத்தி²கதாய வா ‘‘மயம் இதா³னி ந பேஸிஸ்ஸாம, ந க³மிஸ்ஸாமா’’தி ஏவம் க³மனே படிப்பஸ்ஸத்³தே⁴ உபச்சி²ன்னே. ஞாதகானம் பவாரிதானந்தி ஏதேஸம் ப³ஹும்பி தே³ந்தானம் படிக்³க³ண்ஹந்தஸ்ஸ அனாபத்தி. அட்ட²கதா²ஸு பன ‘‘தேஸம்பி பாதே²ய்யபஹேணகத்தா²ய படியத்ததோ பமாணமேவ வட்டதீ’’தி வுத்தம். ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

காணமாதாஸிக்கா²பத³ம் சதுத்த²ம்.

5. பட²மபவாரணஸிக்கா²பத³வண்ணனா

236. பஞ்சமஸிக்கா²பதே³ – பி⁴க்கூ² பு⁴த்தாவீ பவாரிதாதி ப்³ராஹ்மணேன ‘‘க³ண்ஹத², ப⁴ந்தே, யாவ இச்ச²தா²’’தி ஏவம் யாவத³த்த²பவாரணாய, ஸயஞ்ச ‘‘அலம், ஆவுஸோ, தோ²கம் தோ²கம் தே³ஹீ’’தி ஏவம் படிக்கே²பபவாரணாய பவாரிதா. படிவிஸ்ஸகேதி ஸாமந்தக⁴ரவாஸிகே.

237. காகோரவஸத்³த³ந்தி காகானம் ஓரவஸத்³த³ம்; ஸன்னிபதித்வா விரவந்தானம் ஸத்³த³ம். அலமேதம் ஸப்³ப³ந்தி ஏத்த² திகாரம் அவத்வாவ ‘‘அலமேதம் ஸப்³ப³ம்’’ ஏத்தகம் வத்தும் வட்டதி.

238-9. பு⁴த்தாவீதி பு⁴த்தவா. தத்த² ச யஸ்மா யேன ஏகம்பி ஸித்த²ம் ஸங்கா²தி³த்வா வா அஸங்கா²தி³த்வா வா அஜ்ஜோ²ஹரிதம் ஹோதி, ஸோ ‘‘பு⁴த்தாவீ’’தி ஸங்க்²யம் க³ச்ச²தி, தேனஸ்ஸ பத³பா⁴ஜனே ‘‘பு⁴த்தாவீ நாம பஞ்சன்னம் போ⁴ஜனான’’ந்திஆதி³ வுத்தம். பவாரிதோதி கதபவாரணோ, கதபடிக்கே²போ. ஸோபி ச யஸ்மா ந படிக்கே²பமத்தேன, அத² கோ² பஞ்சங்க³வஸேன, தேனஸ்ஸ பத³பா⁴ஜனே ‘‘பவாரிதோ நாம அஸனம் பஞ்ஞாயதீ’’திஆதி³ வுத்தம். தத்த² யஸ்மா ‘‘அஸனம் பஞ்ஞாயதீ’’தி இமினா விப்பகதபோ⁴ஜனோ, ‘‘பவாரிதோ’’தி வுத்தோ. யோ ச விப்பகதபோ⁴ஜனோ, தேன கிஞ்சி பு⁴த்தம், கிஞ்சி அபு⁴த்தம், யஞ்ச பு⁴த்தம்; தம் ஸந்தா⁴ய ‘‘பு⁴த்தாவீ’’திபி ஸங்க்²யம் க³ச்ச²தி, தஸ்மா பு⁴த்தாவீவசனேன விஸும் கஞ்சி அத்த²ஸித்³தி⁴ம் ந பஸ்ஸாம. ‘‘தி³ரத்ததிரத்தம், ச²ப்பஞ்சவாசாஹீ’’திஆதீ³ஸு (பாசி. 61-62) பன தி³ரத்தாதி³வசனம் விய பவாரிதபத³ஸ்ஸ பரிவாரகபா⁴வேன ப்³யஞ்ஜனஸிலிட்ட²தாய சேதம் வுத்தந்தி வேதி³தப்³ப³ம்.

அஸனம் பஞ்ஞாயதீதிஆதீ³ஸு விப்பகதபோ⁴ஜனம் தி³ஸ்ஸதி, பு⁴ஞ்ஜமானோ சேஸோ புக்³க³லோ ஹோதீதி அத்தோ². போ⁴ஜனம் பஞ்ஞாயதீதி பவாரணப்பஹோனகபோ⁴ஜனம் தி³ஸ்ஸதி. ஓத³னாதீ³னம் சே அஞ்ஞதரம் படிக்கி²பிதப்³ப³ம் போ⁴ஜனம் ஹோதீதி அத்தோ². ஹத்த²பாஸே டி²தோதி பவாரணப்பஹோனகம் போ⁴ஜனம் க³ண்ஹித்வா தா³யகோ அட்³ட⁴தேய்யஹத்த²ப்பமாணே ஓகாஸே ஹோதீதி அத்தோ². அபி⁴ஹரதீதி ஸோ சே தா³யகோ தஸ்ஸ தம் ப⁴த்தம் காயேன அபி⁴ஹரதீதி அத்தோ². படிக்கே²போ பஞ்ஞாயதீதி படிக்கே²போ தி³ஸ்ஸதி; தஞ்சே அபி⁴ஹடம் ஸோ பி⁴க்கு² காயேன வா வாசாய வா படிக்கி²பதீதி அத்தோ². ஏவம் பஞ்சன்னம் அங்கா³னம் வஸேன பவாரிதோ நாம ஹோதீதி. வுத்தம்பி சேதம் –

‘‘பஞ்சஹி உபாலி ஆகாரேஹி பவாரணா பஞ்ஞாயதி – அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ, அபி⁴ஹரதி, படிக்கே²போ பஞ்ஞாயதீ’’தி (பரி. 428).

தத்ராயம் வினிச்ச²யோ – ‘‘அஸன’’ந்திஆதீ³ஸு தாவ யஞ்ச அஸ்னாதி யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பதி, தம் ‘‘ஓத³னோ, கும்மாஸோ, ஸத்து, மச்சோ², மம்ஸ’’ந்தி இமேஸம் அஞ்ஞதரமேவ வேதி³தப்³ப³ம். தத்த² ஓத³னோ நாம – ஸாலி, வீஹி, யவோ, கோ³து⁴மோ, கங்கு³, வரகோ, குத்³ரூஸகோதி ஸத்தன்னம் த⁴ஞ்ஞானம் தண்டு³லேஹி நிப்³ப³த்தோ. தத்த² ‘‘ஸாலீ’’தி அந்தமஸோ நீவாரம் உபாதா³ய ஸப்³பா³பி ஸாலிஜாதி. ‘‘வீஹீ’’தி ஸப்³பா³பி வீஹிஜாதி. ‘‘யவகோ³து⁴மேஸு’’ பே⁴தோ³ நத்தி². ‘‘கங்கூ³’’தி ஸேதரத்தகாளபே⁴தா³ ஸப்³பா³பி கங்கு³ஜாதி. ‘‘வரகோ’’தி அந்தமஸோ வரகசோரகம் உபாதா³ய ஸப்³பா³ ஸேதவண்ணா வரகஜாதி. ‘‘குத்³ரூஸகோ’’தி காளகோ த்³ரவோ சேவ ஸாமாகாதி³பே⁴தா³ ச ஸப்³பா³பி திணத⁴ஞ்ஞஜாதி.

நீவாரவரகசோரகா சேத்த² ‘‘த⁴ஞ்ஞானுலோமா’’தி வத³ந்தி. த⁴ஞ்ஞானி வா ஹோந்து த⁴ஞ்ஞானுலோமானி வா, ஏதேஸம் வுத்தப்பபே⁴தா³னம் ஸத்தன்னம் த⁴ஞ்ஞானம் தண்டு³லே க³ஹேத்வா ‘‘ப⁴த்தம் பசிஸ்ஸாமா’’தி வா ‘‘யாகு³ம் பசிஸ்ஸாமா’’தி வா ‘‘அம்பி³லபாயாஸாதீ³ஸு அஞ்ஞதரம் பசிஸ்ஸாமா’’தி வா யம்கிஞ்சி ஸந்தா⁴ய பசந்து, ஸசே உண்ஹம் ஸீதலம் வா பு⁴ஞ்ஜந்தானம் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, ஓத³னஸங்க³ஹமேவ க³ச்ச²தி, பவாரணம் ஜனேதி. ஸசே ஓதி⁴ ந பஞ்ஞாயதி, யாகு³ஸங்க³ஹம் க³ச்ச²தி, பவாரணம் ந ஜனேதி.

யோபி பாயாஸோ வா பண்ணப²லகளீரமிஸ்ஸகா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஹோதி, ஆவஜ்ஜித்வா பிவிதும் ஸக்கா, ஹத்தே²ன க³ஹிதோகாஸேபி ஓதி⁴ம் ந த³ஸ்ஸேதி, பவாரணம் ந ஜனேதி. ஸசே பன உஸுமாய விக³தாய ஸீதலீபூ⁴தா க⁴னபா⁴வம் க³ச்ச²தி, ஓதி⁴ம் த³ஸ்ஸேதி, புன பவாரணம் ஜனேதி. புப்³பே³ தனுபா⁴வோ ந ரக்க²தி. ஸசேபி த³தி⁴தக்காதீ³னி ஆரோபேத்வா ப³ஹுபண்ணப²லகளீரே பக்கி²பித்வா முட்டி²மத்தாபி தண்டு³லா பக்கி²த்தா ஹோந்தி, போ⁴ஜனகாலே சே ஓதி⁴ பஞ்ஞாயதி, பவாரணம் ஜனேதி. அயாகு³கே நிமந்தனே ‘‘யாகு³ம் த³ஸ்ஸாமா’’தி ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி தே³ந்தி. கிஞ்சாபி தனுகா ஹோந்தி, பவாரணம் ஜனேதியேவ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி. யாகு³ஸங்க³ஹம் க³தேபி தஸ்மிம் வா அஞ்ஞஸ்மிம் வா யத்த² மச்ச²மம்ஸம் பக்கி²பந்தி, ஸசே ஸாஸபமத்தம்பி மச்ச²மம்ஸக²ண்ட³ம் வா ந்ஹாரு வா பஞ்ஞாயதி, பவாரணம் ஜனேதி.

ஸுத்³த⁴ரஸகோ பன ரஸகயாகு³ வா ந ஜனேதி. ட²பேத்வா வுத்தத⁴ஞ்ஞானம் தண்டு³லே அஞ்ஞேஹி வேணுதண்டு³லாதீ³ஹி வா கந்த³மூலப²லேஹி வா யேஹி கேஹிசி கதம் ப⁴த்தம்பி பவாரணம் ந ஜனேதி, பகே³வ க⁴னயாகு³. ஸசே பனேத்த² மச்ச²மம்ஸம் பக்கி²பந்தி, ஜனேதி. மஹாபச்சரியம் ‘‘புப்ப²அத்தா²ய ப⁴த்தம்பி பவாரணம் ஜனேதீ’’தி வுத்தம். புப்பி²அத்தா²ய ப⁴த்தம் நாம புப்பி²க²ஜ்ஜகத்தா²ய குதி²ததூத³கே பக்கி²பித்வா ஸேதி³ததண்டு³லா வுச்சந்தி. ஸசே பன தே தண்டு³லே ஸுக்கா²பேத்வா கா²த³ந்தி, வட்டதி; நேவ ஸத்துஸங்க்²யம் ந ப⁴த்தஸங்க்²யம் க³ச்ச²ந்தி. புன தேஹி கதப⁴த்தம் பவாரேதியேவ. தே தண்டு³லே ஸப்பிதேலாதீ³ஸு வா பசந்தி, பூவம் வா கரோந்தி, ந பவாரேந்தி. புது²கா வா தாஹி கதஸத்துப⁴த்தாதீ³னி வா ந பவாரேந்தி.

கும்மாஸோ நாம யவேஹி கதகும்மாஸோ. அஞ்ஞேஹி பன முக்³கா³தீ³ஹி கதகும்மாஸோ பவாரணம் ந ஜனேதி. ஸத்து நாம ஸாலிவீஹியவேஹி கதஸத்து. கங்கு³வரககுத்³ரூஸகஸீஸானிபி ப⁴ஜ்ஜித்வா ஈஸகம் கோட்டேத்வா து²ஸே பலாபேத்வா புன த³ள்ஹம் கோட்டேத்வா சுண்ணம் கரோந்தி. ஸசேபி தம் அல்லத்தா ஏகாப³த்³த⁴ம் ஹோதி, ஸத்துஸங்க³ஹமேவ க³ச்ச²தி. க²ரபாகப⁴ஜ்ஜிதானம் வீஹீனம் தண்டு³லே கோட்டேத்வா தே³ந்தி, தம்பி சுண்ணம் ஸத்துஸங்க³ஹமேவ க³ச்ச²தி. ஸமபாகப⁴ஜ்ஜிதானம் பன வீஹீனம் வா வீஹிபலாபானம் வா தண்டு³லா ப⁴ஜ்ஜிததண்டு³லா ஏவ வா ந பவாரேந்தி. தேஸம் பன தண்டு³லாதீ³னம் சுண்ணம் பவாரேதி. க²ரபாகப⁴ஜ்ஜிதானம் வீஹீனம் குண்ட³கம்பி பவாரேதி. ஸமபாகப⁴ஜ்ஜிதானம் பன ஆதபஸுக்கா²னம் வா குண்ட³கம் ந பவாரேதி. லாஜா வா தேஹி கதப⁴த்தஸத்துஆதீ³னி வா ந பவாரேந்தி. ப⁴ஜ்ஜிதபிட்ட²ம் வா யம்கிஞ்சி ஸுத்³த⁴க²ஜ்ஜகம் வா ந பவாரேதி. மச்ச²மம்ஸபூரிதக²ஜ்ஜகம் பன ஸத்துமோத³கோ வா பவாரேதி. மச்சோ² மம்ஸஞ்ச பாகடமேவ. அயம் பன விஸேஸோ – ஸசேபி யாகு³ம் பிவந்தஸ்ஸ யாகு³ஸித்த²மத்தானேவ த்³வே மச்ச²க²ண்டா³னி வா மம்ஸக²ண்டா³னி வா ஏகபா⁴ஜனே வா நானாபா⁴ஜனே வா தே³ந்தி, தானி சே அகா²த³ந்தோ அஞ்ஞம் யம்கிஞ்சி பவாரணப்பஹோனகம் படிக்கி²பதி, ந பவாரேதி. ததோ ஏகம் கா²தி³தம், ஏகம் ஹத்தே² வா பத்தே வா ஹோதி, ஸோ சே அஞ்ஞம் படிக்கி²பதி, பவாரேதி. த்³வேபி கா²தி³தானி ஹோந்தி, முகே² ஸாஸபமத்தம்பி அவஸிட்ட²ம் நத்தி², ஸசேபி அஞ்ஞம் படிக்கி²பதி, ந பவாரேதி.

கப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கப்பியமம்ஸம் கா²த³ந்தோ அகப்பியமம்ஸம் படிக்கி²பதி, ந பவாரேதி. கஸ்மா? அவத்து²தாய. யஞ்ஹி பி⁴க்கு²னோ கா²தி³தும் வட்டதி, தம்யேவ படிக்கி²பதோ பவாரணா ஹோதி. இத³ம் பன ஜானந்தோ அகப்பியத்தா படிக்கி²பதி, அஜானந்தோபி படிக்கி²பிதப்³ப³ட்டா²னே டி²தமேவ படிக்கி²பதி நாம, தஸ்மா ந பவாரேதி. ஸசே பன அகப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கஸ்மா? வத்து²தாய. யஞ்ஹி தேன படிக்கி²த்தம், தம் பவாரணாய வத்து². யம் பன கா²த³தி, தம் கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹதி, தஸ்மா பவாரேதி. அகப்பியமம்ஸம் கா²த³ந்தோ அகப்பியமம்ஸம் படிக்கி²பதி, புரிமனயேனேவ ந பவாரேதி. கப்பியமம்ஸம் வா அகப்பியமம்ஸம் வா கா²த³ந்தோ பஞ்சன்னம் போ⁴ஜனானம் யம்கிஞ்சி கப்பியபோ⁴ஜனம் படிக்கி²பதி, பவாரேதி. குலதூ³ஸகவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தம் பு³த்³த⁴படிகுட்ட²ம் அனேஸனாய உப்பன்னம் அகப்பியபோ⁴ஜனம் படிக்கி²பதி, ந பவாரேதி. கப்பியபோ⁴ஜனம் வா அகப்பியபோ⁴ஜனம் வா பு⁴ஞ்ஜந்தோபி கப்பியபோ⁴ஜனம் படிக்கி²பதி, பவாரேதி. அகப்பியபோ⁴ஜனம் படிக்கி²பதி, ந பவாரேதீதி ஸப்³ப³த்த² வுத்தனயேனேவ காரணம் வேதி³தப்³ப³ம்.

ஏவம் ‘‘அஸன’’ந்திஆதீ³ஸு யஞ்ச அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பந்தோ பவாரணம் ஆபஜ்ஜதி, தம் ஞத்வா இதா³னி யதா² ஆபஜ்ஜதி, தஸ்ஸ ஜானனத்த²ம் அயம் வினிச்ச²யோ – ‘‘‘அஸனம் போ⁴ஜன’ந்தி ஏத்த² தாவ யேன ஏகஸித்த²ம்பி அஜ்ஜோ²ஹடம் ஹோதி, ஸோ ஸசே பத்தமுக²ஹத்தா²னம் யத்த² கத்த²சி பஞ்சஸு போ⁴ஜனேஸு ஏகஸ்மிம்பி ஸதி அஞ்ஞம் பஞ்சஸு போ⁴ஜனேஸு ஏகம்பி படிக்கி²பதி, பவாரேதி. கத்த²சி போ⁴ஜனம் நத்தி², ஆமிஸக³ந்த⁴மத்தம் பஞ்ஞாயதி, ந பவாரேதி. முகே² ச ஹத்தே² ச போ⁴ஜனம் நத்தி², பத்தே அத்தி², தஸ்மிம் பன ஆஸனே ந பு⁴ஞ்ஜிதுகாமோ, விஹாரம் பவிஸித்வா பு⁴ஞ்ஜிதுகாமோ, அஞ்ஞஸ்ஸ வா தா³துகாமோ, தஸ்மிம் சே அந்தரே போ⁴ஜனம் படிக்கி²பதி, ந பவாரேதி. கஸ்மா? விப்பகதபோ⁴ஜனபா⁴வஸ்ஸ உபச்சி²ன்னத்தா. யோபி அஞ்ஞத்ர க³ந்த்வா பு⁴ஞ்ஜிதுகாமோ முகே² ப⁴த்தம் கி³லித்வா ஸேஸம் ஆதா³ய க³ச்ச²ந்தோ அந்தராமக்³கே³ அஞ்ஞம் போ⁴ஜனம் படிக்கி²பதி, தஸ்ஸாபி பவாரணா ந ஹோதீ’’தி மஹாபச்சரியம் வுத்தம். யதா² ச பத்தே; ஏவம் ஹத்தே²பி. முகே²பி வா விஜ்ஜமானபோ⁴ஜனம் ஸசே அனஜ்ஜோ²ஹரிதுகாமோ ஹோதி, தஸ்மிஞ்ச க²ணே அஞ்ஞம் படிக்கி²பதி, ந பவாரேதி. ஏகஸ்மிஞ்ஹி பதே³ வுத்தலக்க²ணம் ஸப்³ப³த்த² வேதி³தப்³ப³ம் ஹோதி. அபிச குருந்தி³யம் ஏஸ நயோ த³ஸ்ஸிதோயேவ. வுத்தஞ்ஹி தத்த² ‘‘முகே² ப⁴த்தம் கி³லிதம், ஹத்தே² ப⁴த்தம் விகா⁴ஸாத³ஸ்ஸ தா³துகாமோ, பத்தே ப⁴த்தம் பி⁴க்கு²ஸ்ஸ தா³துகாமோ, ஸசே தஸ்மிம் க²ணே படிக்கி²பதி, ந பவாரேதீ’’தி. ஹத்த²பாஸே டி²தோதி ஏத்த² பன ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய, தா³யகஸ்ஸ நிஸின்னஸ்ஸ வா டி²தஸ்ஸ வா நிபன்னஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா அட்³ட⁴தேய்யஹத்தோ² ‘‘ஹத்த²பாஸோ’’தி வேதி³தப்³போ³. தஸ்மிம் ட²த்வா அபி⁴ஹடம் படிக்கி²பந்தஸ்ஸேவ பவாரணா ஹோதி, ந ததோ பரம்.

அபி⁴ஹரதீதி ஹத்த²பாஸப்³ப⁴ந்தரே டி²தோ க³ஹணத்த²ம் உபனாமேதி. ஸசே பன அனந்தரனிஸின்னோபி பி⁴க்கு² ஹத்தே² வா ஊரூஸு வா ஆதா⁴ரகே வா டி²தபத்தம் அனபி⁴ஹரித்வாவ ‘‘ப⁴த்தம் க³ண்ஹா’’தி வத³தி, தம் படிக்கி²பதோ பவாரணா நத்தி². ப⁴த்தபச்சி²ம் ஆனேத்வா புரதோ பூ⁴மியம் ட²பேத்வா ‘‘க³ண்ஹாஹீ’’தி வுத்தேபி ஏஸேவ நயோ. ஈஸகம் பன உத்³த⁴ரித்வா வா அபனாமேத்வா வா ‘‘க³ண்ஹதா²’’தி வுத்தே படிக்கி²பதோ பவாரணா ஹோதி. தே²ராஸனே நிஸின்னோ தே²ரோ தூ³ரே நிஸின்னஸ்ஸ த³ஹரபி⁴க்கு²ஸ்ஸ பத்தம் பேஸேத்வா ‘‘இதோ ஓத³னம் க³ண்ஹாஹீ’’தி வத³தி, க³ண்ஹித்வா பன க³தோ துண்ஹீ திட்ட²தி, த³ஹரோ ‘‘அலம் மய்ஹ’’ந்தி படிக்கி²பதி, ந பவாரேதி. கஸ்மா? தே²ரஸ்ஸ தூ³ரபா⁴வதோ தூ³தஸ்ஸ ச அனபி⁴ஹரணதோதி. ஸசே பன க³ஹேத்வா ஆக³தோ பி⁴க்கு² ‘‘இத³ம் ப⁴த்தம் க³ண்ஹா’’தி வத³தி, தம் படிக்கி²பதோ பவாரணா ஹோதி.

பரிவேஸனாய ஏகோ ஏகேன ஹத்தே²ன ஓத³னபச்சி²ம் ஏகேன கடச்சு²ம் க³ஹேத்வா பி⁴க்கூ² பரிவிஸதி, தத்ர சே அஞ்ஞோ ஆக³ந்த்வா ‘‘அஹம் பச்சி²ம் தா⁴ரேஸ்ஸாமி, த்வம் ஓத³னம் தே³ஹீ’’தி வத்வா க³ஹிதமத்தகமேவ கரோதி, பரிவேஸகோ ஏவ பன தம் தா⁴ரேதி, தஸ்மா ஸா அபி⁴ஹடாவ ஹோதி. ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதி. ஸசே பன பரிவிஸகேன பு²ட்ட²மத்தாவ ஹோதி, இதரோவ நம் தா⁴ரேதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ந ஹோதி. கடச்சு²னா உத்³த⁴டப⁴த்தே பன ஹோதி. கடச்சு²அபி⁴ஹாரோயேவ ஹி தஸ்ஸ அபி⁴ஹாரோ. த்³வின்னம் ஸமபா⁴ரேபி படிக்கி²பந்தோ பவாரேதியேவாதி மஹாபச்சரியம் வுத்தம். அனந்தரஸ்ஸ பி⁴க்கு²னோ ப⁴த்தே தி³ய்யமானே இதரோ பத்தம் ஹத்தே²ஹி பித³ஹதி, பவாரணா நத்தி². கஸ்மா? அஞ்ஞஸ்ஸ அபி⁴ஹடே படிக்கி²த்தத்தா.

படிக்கே²போ பஞ்ஞாயதீதி ஏத்த² வாசாய அபி⁴ஹடம் படிக்கி²பதோ பவாரணா நத்தி². காயேன அபி⁴ஹடம் பன காயேன வா வாசாய வா படிக்கி²பந்தஸ்ஸ பவாரணா ஹோதீதி வேதி³தப்³போ³.

தத்த² காயேன படிக்கே²போ நாம அங்கு³லிம் வா ஹத்த²ம் வா மச்சி²கபீ³ஜனிம் வா சீவரகண்ணம் வா சாலேதி, ப⁴முகாய வா ஆகாரம் கரோதி, குத்³தோ⁴ வா ஓலோகேதி, வாசாய படிக்கே²போ நாம ‘‘அல’’ந்தி வா, ‘‘ந க³ண்ஹாமீ’’தி வா, ‘‘மா ஆகிரா’’தி வா, ‘‘அபக³ச்சா²’’தி வா வத³தி; ஏவம் யேன கேனசி ஆகாரேன காயேன வா வாசாய வா படிக்கி²த்தே பவாரணா ஹோதி.

ஏகோ அபி⁴ஹடே ப⁴த்தே பவாரணாய பீ⁴தோ ஹத்த² அபனேத்வா புனப்புனம் பத்தே ஓத³னம் ஆகிரந்தம் ‘‘ஆகிர ஆகிர கோட்டேத்வா பூரேஹீ’’தி வத³தி, ஏத்த² கத²ந்தி? மஹாஸுமத்தே²ரோ தாவ ‘‘அனாகிரணத்தா²ய வுத்தத்தா பவாரணா ஹோதீ’’தி ஆஹ. மஹாபது³மத்தே²ரோ பன ‘‘‘ஆகிர பூரேஹீ’தி வத³ந்தஸ்ஸ நாம ‘கஸ்ஸசி பவாரணா அத்தீ²’தி வத்வா ‘ந பவாரேதீ’’’தி ஆஹ. அபரோ ப⁴த்தம் அபி⁴ஹரந்தம் பி⁴க்கு²ம் ஸல்லக்கே²த்வா ‘‘கிம் ஆவுஸோ இதோபி கிஞ்சி க³ண்ஹிஸ்ஸஸி, த³ம்மி தே கிஞ்சீ’’தி ஆஹ. தத்ராபி ‘‘‘ஏவம் நாக³மிஸ்ஸதீ’தி வுத்தத்தா ‘பவாரணா ஹோதீ’’’தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘‘க³ண்ஹிஸ்ஸஸீ’தி வத³ந்தஸ்ஸ நாம ‘கஸ்ஸசி பவாரணா அத்தீ²’தி வத்வா ‘ந பவாரேதீ’’’தி ஆஹ.

ஏகோ ஸமம்ஸகம் ரஸம் அபி⁴ஹரித்வா ‘‘ரஸம் க³ண்ஹதா²’’தி வத³தி, தம் ஸுத்வா படிக்கி²பதோ பவாரணா நத்தி². ‘‘மச்ச²ரஸம் மம்ஸரஸ’’ந்தி வுத்தே படிக்கி²பதோ ஹோதி, ‘‘இத³ம் க³ண்ஹதா²’’தி வுத்தேபி ஹோதியேவ. மம்ஸம் விஸும் கத்வா ‘‘மம்ஸரஸம் க³ண்ஹதா²’’தி வத³தி, தத்த² சே ஸாஸபமத்தம்பி மம்ஸக²ண்ட³ம் அத்தி², தம் படிக்கி²பதோ பவாரணா ஹோதி. ஸசே பன பரிஸ்ஸாவிதோ ஹோதி, ‘‘வட்டதீ’’தி அப⁴யத்தே²ரோ ஆஹ.

மம்ஸரஸேன ஆபுச்ச²ந்தம் மஹாதே²ரோ ‘‘முஹுத்தம் ஆக³மேஹீ’’தி வத்வா ‘‘தா²லகம் ஆவுஸோ ஆஹரா’’தி ஆஹ. ஏத்த² கத²ந்தி? மஹாஸுமத்தே²ரோ தாவ ‘‘அபி⁴ஹாரகஸ்ஸ க³மனம் பட²மம் உபச்சி²ன்னம், தஸ்மா பவாரேதீ’’தி ஆஹ. மஹாபது³மத்தே²ரோ பன ‘‘அயம் குஹிம் க³ச்ச²தி, கீதி³ஸம் ஏதஸ்ஸ க³மனம், க³ண்ஹந்தஸ்ஸாபி நாம பவாரணா அத்தீ²’’தி வத்வா ‘‘ந பவாரேதீ’’தி ஆஹ. களீரபனஸாதீ³ஹி மிஸ்ஸேத்வா மம்ஸம் பசந்தி, தம் க³ஹேத்வா ‘‘களீரஸூபம் க³ண்ஹத², பனஸப்³யஞ்ஜனம் க³ண்ஹதா²’’தி வத³ந்தி, ஏவம்பி ந பவாரேதி. கஸ்மா? அபவாரணாரஹஸ்ஸ நாமேன வுத்தத்தா. ஸசே பன ‘‘மச்ச²ஸூபம் மம்ஸஸூப’’ந்தி வா ‘‘இமம் க³ண்ஹதா²’’தி வா வத³ந்தி, பவாரேதி. மம்ஸகரம்ப³கோ நாம ஹோதி, தம் தா³துகாமோபி ‘‘கரம்ப³கம் க³ண்ஹதா²’’தி வத³தி, வட்டதி; ந பவாரேதி. ‘‘மம்ஸகரம்ப³க’’ந்தி வா ‘‘இத³’’ந்தி வா வுத்தே பன பவாரேதி. ஏஸேவ நயோ ஸப்³பே³ஸு மச்ச²மம்ஸமிஸ்ஸகேஸு.

யோ பன நிமந்தனே பு⁴ஞ்ஜமானோ மம்ஸம் அபி⁴ஹடம் ‘‘உத்³தி³ஸ்ஸ கத’’ந்தி மஞ்ஞமானோ படிக்கி²பதி, பவாரிதோவ ஹோதீதி மஹாபச்சரியம் வுத்தம். மிஸ்ஸககதா² பன குருந்தி³யம் ஸுட்டு² வுத்தா. ஏவஞ்ஹி தத்த² வுத்தம் – பிண்ட³பாதசாரிகோ பி⁴க்கு² ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத³தி, ந பவாரேதி. ‘‘ப⁴த்தம் க³ண்ஹதா²’’தி வுத்தே பவாரேதி. கஸ்மா? யேனாபுச்சி²தோ, தஸ்ஸ அத்தி²தாய. அயமேத்த² அதி⁴ப்பாயோ – ‘‘யாகு³மிஸ்ஸகம் க³ண்ஹதா²’’தி வத³தி, தத்ர சே யாகு³ ப³ஹுதரா வா ஹோதி ஸமஸமா வா, ந பவாரேதி. யாகு³ மந்தா³, ப⁴த்தம் ப³ஹுதரம், பவாரேதி. இத³ஞ்ச ஸப்³ப³அட்ட²கதா²ஸு வுத்தத்தா ந ஸக்கா படிக்கி²பிதும், காரணம் பனேத்த² து³த்³த³ஸம். ‘‘ப⁴த்தமிஸ்ஸகம் க³ண்ஹதா²’’தி வத³தி, ப⁴த்தம் ப³ஹுகம் வா ஸமம் வா அப்பதரம் வா ஹோதி, பவாரேதியேவ. ப⁴த்தம் வா யாகு³ம் வா அனாமஸித்வா ‘‘மிஸ்ஸகம் க³ண்ஹதா²’’தி வத³தி, தத்ர சே ப⁴த்தம் ப³ஹுதரம் வா ஸமகம் வா ஹோதி, பவாரேதி. அப்பதரம் ந பவாரேதி. இத³ஞ்ச கரம்ப³கேன ந ஸமானேதப்³ப³ம். கரம்ப³கோ ஹி மம்ஸமிஸ்ஸகோபி ஹோதி அமம்ஸமிஸ்ஸகோபி, தஸ்மா ‘‘கரம்ப³க’’ந்தி வுத்தே பவாரணா நத்தி². இத³ம் பன ப⁴த்தமிஸ்ஸகமேவ. ஏத்த² வுத்தனயேனேவ பவாரணா ஹோதி. ப³ஹுரஸே ப⁴த்தே ரஸம், ப³ஹுகீ²ரே கீ²ரம் ப³ஹுஸப்பிம்ஹி ச பாயாஸே ஸப்பிம் க³ண்ஹதா²தி விஸும் கத்வா தே³தி, தம் படிக்கி²பதோ பவாரணா நத்தி².

யோ பன க³ச்ச²ந்தோ பவாரேதி, ஸோ க³ச்ச²ந்தோவ பு⁴ஞ்ஜிதும் லப⁴தி. கத்³த³மம் வா உத³கம் வா பத்வா டி²தேன அதிரித்தம் காரேதப்³ப³ம். ஸசே அந்தரா நதீ³ பூரா ஹோதி, நதீ³தீரே கு³ம்ப³ம் அனுபரியாயந்தேன பு⁴ஞ்ஜிதப்³ப³ம். அத² நாவா வா ஸேது வா அத்தி², தம் அபி⁴ருஹித்வாபி சங்கமந்தேனவ பு⁴ஞ்ஜிதப்³ப³ம், க³மனம் ந உபச்சி²ந்தி³தப்³ப³ம். யானே வா ஹத்தி²அஸ்ஸபிட்டே² வா சந்த³மண்ட³லே வா ஸூரியமண்ட³லே வா நிஸீதி³த்வா பவாரிதேன யாவ மஜ்ஜ²ன்ஹிகம், தாவ தேஸு க³ச்ச²ந்தேஸுபி நிஸின்னேனேவ பு⁴ஞ்ஜிதப்³ப³ம். யோ டி²தோ பவாரேதி, டி²தேனேவ, யோ நிஸின்னோ பவாரேதி, நிஸின்னேனேவ பு⁴ஞ்ஜிதப்³ப³ம். தம் தம் இரியாபத²ம் கோபேந்தேன அதிரித்தம் காரேதப்³ப³ம். யோ உக்குடிகோ நிஸீதி³த்வா பவாரேதி, தேன உக்குடிகேனேவ பு⁴ஞ்ஜிதப்³ப³ம். தஸ்ஸ பன ஹேட்டா² பலாலபீட²ம் வா கிஞ்சி வா நிஸீத³னகம் தா³தப்³ப³ம். பீட²கே நிஸீதி³த்வா பவாரிதேன ஆஸனம் அசாலேத்வாவ சதஸ்ஸோ தி³ஸா பரிவத்தந்தேன பு⁴ஞ்ஜிதும் லப்³ப⁴தி. மஞ்சே நிஸீதி³த்வா பவாரிதேன இதோ வா ஏத்தோ வா ஸம்ஸரிதும் ந லப்³ப⁴தி. ஸசே பன நம் ஸஹ மஞ்சேன உக்கி²பித்வா அஞ்ஞத்ர நேந்தி, வட்டதி. நிபஜ்ஜித்வா பவாரிதேன நிபன்னேனேவ பு⁴ஞ்ஜிதப்³ப³ம். பரிவத்தந்தேன யேன பஸ்ஸேன நிபன்னோ, தஸ்ஸ டா²னம் நாதிக்கமேதப்³ப³ம்.

அனதிரித்தந்தி ந அதிரித்தம்; ந அதி⁴கந்தி அத்தோ². தம் பன யஸ்மா கப்பியகதாதீ³ஹி ஸத்தஹி வினயகம்மாகாரேஹி அகதம் வா கி³லானஸ்ஸ அனதி⁴கம் வா ஹோதி, தஸ்மா பத³பா⁴ஜனே ‘‘அகப்பியகத’’ந்திஆதி³ வுத்தம். தத்த² அகப்பியகதந்தி யம் தத்த² ப²லம் வா கந்த³மூலாதி³ வா பஞ்சஹி ஸமணகப்பேஹி கப்பியம் அகதம்; யஞ்ச அகப்பியமம்ஸம் வா அகப்பியபோ⁴ஜனம் வா, ஏதம் அகப்பியம் நாம. தம் அகப்பியம் ‘‘அலமேதம் ஸப்³ப³’’ந்தி ஏவம் அதிரித்தம் கதம்பி அகப்பியகதந்தி வேதி³தப்³ப³ம். அப்படிக்³க³ஹிதகதந்தி பி⁴க்கு²னா அப்படிக்³க³ஹிதம்யேவ புரிமனயேனேவ அதிரித்தம் கதம். அனுச்சாரிதகதந்தி கப்பியம் காராபேதும் ஆக³தேன பி⁴க்கு²னா ஈஸகம்பி அனுக்கி²த்தம் வா அனபனாமிதம் வா கதம். அஹத்த²பாஸே கதந்தி கப்பியம் காராபேதும் ஆக³தஸ்ஸ ஹத்த²பாஸதோ ப³ஹி டி²தேன கதம். அபு⁴த்தாவினா கதந்தி யோ ‘‘அலமேதம் ஸப்³ப³’’ந்தி அதிரித்தம் கரோதி, தேன பவாரணப்பஹோனகம் போ⁴ஜனம் அபு⁴த்தேன கதம். பு⁴த்தாவினா பவாரிதேன ஆஸனா வுட்டி²தேன கதந்தி இத³ம் உத்தானமேவ. அலமேதம் ஸப்³ப³ந்தி அவுத்தந்தி வசீபே⁴த³ம் கத்வா ஏவம் அவுத்தம் ஹோதி. இதி இமேஹி ஸத்தஹி வினயகம்மாகாரேஹி யம் அதிரித்தம் கப்பியம் அகதம், யஞ்ச ந கி³லானாதிரித்தம், தது³ப⁴யம்பி அனதிரித்தந்தி வேதி³தப்³ப³ம்.

அதிரித்தம் பன தஸ்ஸேவ படிபக்க²னயேன வேதி³தப்³ப³ம். அபிசேத்த² பு⁴த்தாவினா கதம் ஹோதீதி அனந்தரே நிஸின்னஸ்ஸ ஸபா⁴க³ஸ்ஸ பி⁴க்கு²னோ பத்ததோ ஏகம்பி ஸித்த²ம் வா மம்ஸஹீரம் வா கா²தி³த்வா கதம்பி பு⁴த்தாவினாவ கதம் ஹோதீதி வேதி³தப்³ப³ம். ஆஸனா அவுட்டி²தேனாதி ஏத்த² பன அஸம்மோஹத்த²ம் அயம் வினிச்ச²யோ – த்³வே பி⁴க்கூ² பாதோவ பு⁴ஞ்ஜமானா பவாரிதா ஹோந்தி – ஏகேன தத்தே²வ நிஸீதி³தப்³ப³ம், இதரேன நிச்சப⁴த்தம் வா ஸலாகப⁴த்தம் வா ஆனேத்வா உபட்³ட⁴ம் தஸ்ஸ பி⁴க்கு²னோ பத்தே ஆகிரித்வா ஹத்த²ம் தோ⁴வித்வா ஸேஸம் தேன பி⁴க்கு²னா கப்பியம் காராபேத்வா பு⁴ஞ்ஜிதப்³ப³ம். கஸ்மா? யஞ்ஹி தஸ்ஸ ஹத்தே² லக்³க³ம், தம் அகப்பியம் ஹோதி. ஸசே பன பட²மம் நிஸின்னோ பி⁴க்கு² ஸயமேவ தஸ்ஸ பத்ததோ ஹத்தே²ன க³ண்ஹாதி, ஹத்த²தோ⁴வனகிச்சம் நத்தி². ஸசே பன ஏவம் கப்பியம் காராபேத்வா பு⁴ஞ்ஜந்தஸ்ஸ புன கிஞ்சி ப்³யஞ்ஜனம் வா கா²த³னீயம் வா பத்தே ஆகிரந்தி, யேன பட²மம் கப்பியம் கதம், ஸோ புன காதும் ந லப⁴தி. யேன அகதம், தேன காதப்³ப³ம். யஞ்ச அகதம், தம் காதப்³ப³ம். ‘‘யேன அகத’’ந்தி அஞ்ஞேன பி⁴க்கு²னா யேன பட²மம் ந கதம், தேன காதப்³ப³ம். ‘‘யஞ்ச அகத’’ந்தி யேன பட²மம் கப்பியம் கதம், தேனாபி யம் அகதம் தம் காதப்³ப³ம். பட²மபா⁴ஜனே பன காதும் ந லப்³ப⁴தி. தத்த² ஹி கரியமானம் பட²மம் கதேன ஸத்³தி⁴ம் கதம் ஹோதி, தஸ்மா அஞ்ஞஸ்மிம் பா⁴ஜனே காதும் வட்டதீதி அதி⁴ப்பாயோ. ஏவம் கதம் பன தேன பி⁴க்கு²னா பட²மம் கதேன ஸத்³தி⁴ம் பு⁴ஞ்ஜிதும் வட்டதி.

கப்பியம் கரோந்தேன ச ந கேவலம் பத்தேயேவ, குண்டே³பி பச்சி²யம்பி யத்த² கத்த²சி புரதோ ட²பேத்வா ஓனாமிதபா⁴ஜனே காதப்³ப³ம். தம் ஸசேபி பி⁴க்கு²ஸதம் பவாரிதம் ஹோதி, ஸப்³பே³ஸம் பு⁴ஞ்ஜிதும் வட்டதி, அப்பவாரிதானம்பி வட்டதி. யேன பன கப்பியம் கதம், தஸ்ஸ ந வட்டதி. ஸசேபி பவாரேத்வா பிண்டா³ய பவிட்ட²ம் பி⁴க்கு²ம் பத்தம் க³ஹேத்வா அவஸ்ஸம் பு⁴ஞ்ஜனகே மங்க³லனிமந்தனே நிஸீதா³பேந்தி, அதிரித்தம் காரேத்வாவ பு⁴ஞ்ஜிதப்³ப³ம். ஸசே தத்த² அஞ்ஞோ பி⁴க்கு² நத்தி², ஆஸனஸாலம் வா விஹாரம் வா பத்தம் பேஸேத்வா காரேதப்³ப³ம். கப்பியம் கரோந்தேன பன அனுபஸம்பன்னஸ்ஸ ஹத்தே² டி²தம் ந காதப்³ப³ம். ஸசே ஆஸனஸாலாயம் அப்³யத்தோ பி⁴க்கு² ஹோதி, ஸயம் க³ந்த்வா கப்பியம் காராபேத்வா ஆனேத்வா பு⁴ஞ்ஜிதப்³ப³ம்.

கி³லானாதிரித்தந்தி ஏத்த² ந கேவலம் யம் கி³லானஸ்ஸ பு⁴த்தாவஸேஸம் ஹோதி, தம் கி³லானாதிரித்தம்; அத² கோ² யம்கிஞ்சி கி³லானம் உத்³தி³ஸ்ஸ அஜ்ஜ வா ஸ்வே வா யதா³ வா இச்ச²தி, ததா³ கா²தி³ஸ்ஸதீதி ஆஹடம், தம் ஸப்³ப³ம் ‘‘கி³லானாதிரித்த’’ந்தி வேதி³தப்³ப³ம். யம் யாமகாலிகாதீ³ஸு அஜ்ஜோ²ஹாரே அஜ்ஜோ²ஹாரே து³க்கடம், தம் அஸம்ஸட்ட²வஸேன வுத்தம். ஸசே பன ஆமிஸஸம்ஸட்டா²னி ஹோந்தி, ஆஹாரத்தா²யபி அனாஹாரத்தா²யபி படிக்³க³ஹேத்வா அஜ்ஜோ²ஹரந்தஸ்ஸ பாசித்தியமேவ.

241. ஸதி பச்சயேதி யாமகாலிகம் பிபாஸாய ஸதி பிபாஸச்சே²த³னத்த²ம், ஸத்தாஹகாலிகம் யாவஜீவிகஞ்ச தேன தேன உபஸமேதப்³ப³கே ஆபா³தே⁴ ஸதி தஸ்ஸ உபஸமனத்த²ம் பரிபு⁴ஞ்ஜதோ அனாபத்தி. ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மபவாரணஸிக்கா²பத³ம் பஞ்சமம்.

6. து³தியபவாரணஸிக்கா²பத³வண்ணனா

242. ச²ட்ட²ஸிக்கா²பதே³ – அனாசாரம் ஆசரதீதி பண்ணத்திவீதிக்கமம் கரோதி. உபனந்தீ⁴தி உபனாஹம் ஜனேந்தோ தஸ்மிம் புக்³க³லே அத்தனோ கோத⁴ம் ப³ந்தி⁴; புனப்புனம் ஆகா⁴தம் ஜனேஸீதி அத்தோ². உபனத்³தோ⁴ பி⁴க்கூ²தி ஸோ ஜனிதஉபனாஹோ பி⁴க்கு².

243. அபி⁴ஹட்டு²ம் பவாரேய்யாதி அபி⁴ஹரித்வா ‘‘ஹந்த³ பி⁴க்கு² கா²த³ வா பு⁴ஞ்ஜ வா’’தி ஏவம் பவாரேய்ய. பத³பா⁴ஜனே பன ‘‘ஹந்த³ பி⁴க்கூ²’’திஆதி³ம் அனுத்³த⁴ரித்வா ஸாதா⁴ரணமேவ அபி⁴ஹட்டு²ம் பவாரணாய அத்த²ம் த³ஸ்ஸேதும் ‘‘யாவதகம் இச்ச²ஸி தாவதகம் க³ண்ஹாஹீ’’தி வுத்தம். ஜானந்தி பவாரிதபா⁴வம் ஜானந்தோ. தம் பனஸ்ஸ ஜானனம் யஸ்மா தீஹாகாரேஹி ஹோதி, தஸ்மா ‘‘ஜானாதி நாம ஸாமம் வா ஜானாதீ’’திஆதி³னா நயேன பத³பா⁴ஜனம் வுத்தம். ஆஸாத³னாபேக்கோ²தி ஆஸாத³னம் சோத³னம் மங்குகரணபா⁴வம் அபேக்க²மானோ.

படிக்³க³ண்ஹாதி ஆபத்தி து³க்கடஸ்ஸாதி யஸ்ஸ அபி⁴ஹடம் தஸ்மிம் படிக்³க³ண்ஹந்தே அபி⁴ஹாரகஸ்ஸ பி⁴க்கு²னோ து³க்கடம். இதரஸ்ஸ பன ஸப்³போ³ ஆபத்திபே⁴தோ³ பட²மஸிக்கா²பதே³ வுத்தோ, இமஸ்மிம் பன ஸிக்கா²பதே³ ஸப்³பா³ ஆபத்தியோ அபி⁴ஹாரகஸ்ஸேவ வேதி³தப்³பா³. ஸேஸம் பட²மஸிக்கா²பதே³ வுத்தனயத்தா பாகடமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

து³தியபவாரணஸிக்கா²பத³ம் ச²ட்ட²ம்.

7. விகாலபோ⁴ஜனஸிக்கா²பத³வண்ணனா

247. ஸத்தமஸிக்கா²பதே³ – கி³ரக்³க³ஸமஜ்ஜோதி கி³ரிம்ஹி அக்³க³ஸமஜ்ஜோ, கி³ரிஸ்ஸ வா அக்³க³தே³ஸே ஸமஜ்ஜோ. ஸோ கிர ஸத்தமே தி³வஸே ப⁴விஸ்ஸதீதி நக³ரே கோ⁴ஸனா கரியதி, நக³ரஸ்ஸ ப³ஹித்³தா⁴ ஸமே பூ⁴மிபா⁴கே³ பப்³ப³தச்சா²யாய மஹாஜனகாயோ ஸன்னிபததி, அனேகப்பகாரானி நடனாடகானி பவத்தந்தி, தேஸம் த³ஸ்ஸனத்த²ம் மஞ்சாதிமஞ்சே ப³ந்த⁴ந்தி. ஸத்தரஸவக்³கி³யா அபஞ்ஞத்தே ஸிக்கா²பதே³ த³ஹராவ உபஸம்பன்னா, தே ‘‘நாடகானி ஆவுஸோ பஸ்ஸிஸ்ஸாமா’’தி தத்த² அக³மம்ஸு. அத² நேஸம் ஞாதகா ‘‘அம்ஹாகம் அய்யா ஆக³தா’’தி துட்ட²சித்தா ந்ஹாபேத்வா விலிம்பேத்வா போ⁴ஜேத்வா அஞ்ஞம்பி பூவகா²த³னீயாதி³ம் ஹத்தே² அத³ம்ஸு. தே ஸந்தா⁴ய வுத்தம் – ‘‘மனுஸ்ஸா ஸத்தரஸவக்³கி³யே பி⁴க்கூ² பஸ்ஸித்வா’’திஆதி³.

248-9. விகாலேதி விக³தே காலே. காலோதி பி⁴க்கூ²னம் போ⁴ஜனகாலோ அதி⁴ப்பேதோ, ஸோ ச ஸப்³ப³ந்திமேன பரிச்சே²தே³ன மஜ்ஜ²ன்ஹிகோ, தஸ்மிம் வீதிவத்தேதி அதி⁴ப்பாயோ. தேனேவஸ்ஸ பத³பா⁴ஜனே ‘‘விகாலோ நாம மஜ்ஜ²ன்ஹிகே வீதிவத்தே யாவ அருணுக்³க³மனா’’தி வுத்தம், டி²தமஜ்ஜ²ன்ஹிகோபி காலஸங்க³ஹம் க³ச்ச²தி. ததோ பட்டா²ய பன கா²தி³தும் வா பு⁴ஞ்ஜிதும் வா ந ஸக்கா, ஸஹஸா பிவிதும் ஸக்கா ப⁴வேய்ய, குக்குச்சகேன பன ந கத்தப்³ப³ம். காலபரிச்சே²த³ஜானனத்த²ஞ்ச காலத்த²ம்போ⁴ யோஜேதப்³போ³, காலந்தரேவ ப⁴த்தகிச்சம் காதப்³ப³ம்.

அவஸேஸம் கா²த³னீயம் நாமாதி ஏத்த² யம் தாவ ஸக்க²லிமோத³காதி³புப்³ப³ண்ணாபரண்ணமயம், தத்த² வத்தப்³ப³மேவ நத்தி². யம்பி வனமூலாதி³ப்பபே⁴த³ம் ஆமிஸக³திகம் ஹோதி, ஸேய்யதி²த³ம் – மூலகா²த³னீயம் கந்த³கா²த³னீயம் மூளாலகா²த³னீயம் மத்த²ககா²த³னீயம் க²ந்த⁴கா²த³னீயம் தசகா²த³னீயம் பத்தகா²த³னீயம் புப்ப²கா²த³னீயம் ப²லகா²த³னீயம் அட்டி²கா²த³னீயம் பிட்ட²கா²த³னீயம் நிய்யாஸகா²த³னீயந்தி, இத³ம்பி கா²த³னீயஸங்க்²யமேவ க³ச்ச²தி.

தத்த² பன ஆமிஸக³திகஸல்லக்க²ணத்த²ம் இத³ம் முக²மத்தனித³ஸ்ஸனம் – மூலகா²த³னீயே தாவ மூலகமூலம் கா²ரகமூலம் சச்சுமூலம் தம்ப³கமூலம் தண்டு³லேய்யகமூலம் வத்து²லேய்யகமூலம் வஜகலிமூலம் ஜஜ்ஜ²ரீமூலந்தி ஏவமாதீ³னி ஸூபேய்யபண்ணமூலானி ஆமிஸக³திகானி. ஏத்த² ச வஜகலிமூலே ஜரட்ட²ம் சி²ந்தி³த்வா ச²ட்³டே³ந்தி, தம் யாவஜீவிகம் ஹோதி. அஞ்ஞம்பி ஏவரூபம் ஏதேனேவ நயேன வேதி³தப்³ப³ம். மூலககா²ரகஜஜ்ஜ²ரீமூலானம் பன ஜரட்டா²னிபி ஆமிஸக³திகானேவாதி வுத்தம். யானி பன பாளியம் –

‘‘அனுஜானாமி, பி⁴க்க²வே, மூலானி பே⁴ஸஜ்ஜானி ஹலித்³தி³ம் ஸிங்கி³வேரம் வசம் வசத்தம் அதிவிஸம் கடுகரோஹிணிம் உஸீரம் ப⁴த்³த³முத்தகம், யானி வா பனஞ்ஞானிபி அத்தி² மூலானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. தேஸம் சூளபஞ்சமூலம் மஹாபஞ்சமூலந்திஆதி³னா நயேன க³ணியமானானம் க³ணனாய அந்தோ நத்தி². கா²த³னீயத்த²ம் போ⁴ஜனீயத்த²ஞ்ச ப²ரணாபா⁴வோயேவ பன தேஸம் லக்க²ணம். தஸ்மா யம்கிஞ்சி மூலம் தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரதி, தம் யாவகாலிகம்; இதரம் யாவஜீவிகந்தி வேதி³தப்³ப³ம். தேஸு ப³ஹும் வத்வாபி ஹி இமஸ்மிம்யேவ லக்க²ணே டா²தப்³ப³ம். நாமஸஞ்ஞாஸு பன வுச்சமானாஸு தம் தம் நாமம் அஜானந்தானம் ஸம்மோஹோயேவ ஹோதி, தஸ்மா நாமஸஞ்ஞாய ஆத³ரம் அகத்வா லக்க²ணமேவ த³ஸ்ஸிதம்.

யதா² ச மூலே; ஏவம் கந்தா³தீ³ஸுபி யம் லக்க²ணம் த³ஸ்ஸிதம், தஸ்ஸேவ வஸேன வினிச்ச²யோ வேதி³தப்³போ³. யஞ்ச தம் பாளியம் ஹலித்³தா³தி³ அட்ட²வித⁴ம் வுத்தம், தஸ்ஸ க²ந்த⁴தசபுப்ப²ப²லம்பி ஸப்³ப³ம் யாவஜீவிகந்தி வுத்தம்.

கந்த³கா²த³னீயே து³விதோ⁴ கந்தோ³ – தீ³கோ⁴ ச ரஸ்ஸோ ச பி⁴ஸகிம்ஸுககந்தா³தி³ வட்டோ உப்பலகஸேருககந்தா³தி³, யம் ‘‘க³ண்டீ²’’திபி வத³ந்தி. தத்த² ஸப்³பே³ஸம் கந்தா³னம் ஜிண்ணஜரட்டா²னஞ்ச ச²ல்லி ச ஸுகு²மமூலானி ச யாவஜீவிகானி. தருணோ பன ஸுக²கா²த³னீயோ, ஸாலகல்யாணீபோதககந்தோ³ கிம்ஸுகபோதககந்தோ³ அம்பா³டககந்தோ³ கேதககந்தோ³ மாலுவகந்தோ³ பி⁴ஸஸங்கா²தோ பது³மபுண்ட³ரீககந்தோ³ பிண்டா³லுமஸாலுஆத³யோ ச கீ²ரவல்லிகந்தோ³ ஆலுவகந்தோ³ ஸிக்³கு³கந்தோ³ தாலகந்தோ³ நீலுப்பலரத்துப்பலகுமுத³ஸோக³ந்தி⁴கானம் கந்தா³ கத³லிகந்தோ³ வேளுகந்தோ³ கஸேருககந்தோ³தி ஏவமாத³யோ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்ச போ⁴ஜனீயத்த²ஞ்ச ப²ரணககந்தா³ யாவகாலிகா.

கீ²ரவல்லிகந்தோ³ அதோ⁴தோ யாவஜீவிகோ, தோ⁴தோ யாவகாலிகோ. கீ²ரகாகோலீஜீவிகஉஸப⁴கலஸுணாதி³கந்தா³ பன யாவஜீவிகா. தே பாளியம் – ‘‘யானி வா பனஞ்ஞானிபி அத்தி² மூலானி பே⁴ஸஜ்ஜானீ’’தி ஏவம் மூலபே⁴ஸஜ்ஜஸங்க³ஹேனேவ ஸங்க³ஹிதா.

மூளாலகா²த³னீயே பன பது³மமூளாலம் புண்ட³ரீகமுளாலஸதி³ஸமேவ. ஏரகமூலம் கந்து³லமூலந்தி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ஞ்ச போ⁴ஜனீயத்த²ஞ்ச ப²ரணகமுளாலம் யாவகாலிகம். ஹலித்³தி³ஸிங்கி³வேரமகசிசதுரஸ்ஸவல்லிகேதகதாலஹிந்தாலகுந்தாலனாளிகேரபூக³ருக்கா²தி³முளாலம் பன யாவஜீவிகம், தம் ஸப்³ப³ம்பி பாளியம் – ‘‘யானி வா பனஞ்ஞானிபி அத்தி² மூலானி பே⁴ஸஜ்ஜானீ’’தி (மஹாவ. 263) ஏவம் மூலபே⁴ஸஜ்ஜஸங்க³ஹேனேவ ஸங்க³ஹிதம்.

மத்த²ககா²த³னீயே தாலஹிந்தாலகுந்தாலகேதகனாளிகேரபூக³ருக்க²க²ஜ்ஜூரீவேத்தஏரககத³லீனம் களீரஸங்கா²தா மத்த²கா வேணுகளீரோ நளகளீரோ உச்சு²களீரோ மூலககளீரோ ஸாஸபகளீரோ ஸதாவரிகளீரோ ஸத்தன்னம் த⁴ஞ்ஞானம் களீராதி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகோ ருக்க²வல்லிஆதீ³னம் மத்த²கோ யாவகாலிகோ. ஹலித்³தி³ஸிங்கி³வேரவசமகசிலஸுணானம்களீரா தாலஹிந்தாலகுந்தாலனாளிகேரகளீரானஞ்ச சி²ந்தி³த்வா பாதிதோ ஜரட்ட²பு³ந்தோ³ யாவஜீவிகோ.

க²ந்த⁴கா²த³னீயே அந்தோபத²வீக³தோ ஸாலகல்யாணீக²ந்தோ⁴ உச்சு²க²ந்தோ⁴ நீலுப்பலரத்துப்பலகுமுத³ஸோக³ந்தி⁴கானம் க²ந்த⁴காதி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகோ க²ந்தோ⁴ யாவகாலிகோ. உப்பலஜாதீனம் பண்ணத³ண்ட³கோ பது³மஜாதீனம் ஸப்³போ³பி த³ண்ட³கோ காரவிந்த³கத³ண்டா³த³யோ ச அவஸேஸஸப்³ப³க²ந்தா⁴ யாவஜீவிகா.

தசகா²த³னீயே உச்சு²தசோவ ஏகோ யாவகாலிகோ, ஸோபி ஸரஸோ. ஸேஸோ ஸப்³போ³ யாவஜீவிகோ. தேஸம் பன மத்த²கக²ந்த⁴தசானம் திண்ணம் பாளியம் கஸாவபே⁴ஸஜ்ஜேன ஸங்க³ஹோ வேதி³தப்³போ³. வுத்தஞ்ஹேதம் –

‘‘அனுஜானாமி, பி⁴க்க²வே, கஸாவானி பே⁴ஸஜ்ஜானி நிம்ப³கஸாவம், குடஜகஸாவம், படோலகஸாவம், ப²க்³க³வகஸாவம் நத்தமாலகஸாவம், யானி வா பனஞ்ஞானிபி அத்தி² கஸாவானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி, ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263).

ஏத்த² ஹி ஏதேஸம்பி ஸங்க³ஹோ ஸிஜ்ஜ²தி. வுத்தகஸாவானி ச ஸப்³பா³னி கப்பியானீதி வேதி³தப்³பா³னி.

பத்தகா²த³னீயே மூலகம் கா²ரகோ சச்சு தம்ப³கோ தண்டு³லேய்யகோ பபுன்னாகோ³ வத்து²லேய்யகோ வஜகலி ஜஜ்ஜ²ரீ ஸேல்லு ஸிக்³கு³ காஸமத்³த³கோ உம்மா சீனமுக்³கோ³ மாஸோ ராஜமாஸோ ட²பேத்வா மஹானிப்பா²வம் அவஸேஸனிப்பா²வோ அக்³கி³மந்தோ² ஸுனிஸன்னகோ ஸேதவரணோ நாளிகா பூ⁴மியம் ஜாதலோணீதி ஏதேஸம் பத்தானி அஞ்ஞானி ச ஏவரூபானி தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகானி பத்தானி ஏகம்ஸேன யாவகாலிகானி. யா பனஞ்ஞா மஹானக²பிட்டி²மத்தா பண்ணலோணி ருக்கே² ச க³ச்சே² ச ஆரோஹதி, தஸ்ஸா பத்தம் யாவஜீவிகம். ப்³ரஹ்மீபத்தஞ்ச யாவகாலிகந்தி தீ³பவாஸினோ வத³ந்தி. அம்ப³பல்லவம் யாவகாலிகம், அஸோகபல்லவம் பன யாவஜீவிகம்.

யானி வா பனஞ்ஞானி பாளியம் –

‘‘அனுஜானாமி, பி⁴க்க²வே, பண்ணானி பே⁴ஸஜ்ஜானி நிம்ப³பண்ணம் குடஜபண்ணம் படோலபண்ணம் ஸுலஸிபண்ணம் கப்பாஸகபண்ணம் யானி வா பனஞ்ஞானிபி அத்தி² பண்ணானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. ந கேவலஞ்ச பண்ணானியேவ தேஸம் புப்ப²ப²லாதீ³னிபி யாவஜீவிகானி. பண்ணானம் ப²க்³க³வபண்ணம் அஜ்ஜுகபண்ணம் ப²ணிஜ்ஜகபண்ணம் படோலபண்ணம் தம்பூ³லபண்ணம் பது³மினிபண்ணந்தி ஏவம் க³ணனவஸேன அந்தோ நத்தி².

புப்ப²கா²த³னீயே மூலகபுப்ப²ம் கா²ரகபுப்ப²ம் சச்சுபுப்ப²ம் தம்ப³கபுப்ப²ம் வஜகலிபுப்ப²ம் ஜஜ்ஜ²ரீபுப்ப²ம் சூளனிப்பா²வபுப்ப²ம் மஹானிப்பா²வபுப்ப²ம் கஸேருகபுப்ப²ம் நாளிகேரதாலகேதகானம் தருணபுப்பா²னி ஸேதவரணபுப்ப²ம் ஸிக்³கு³புப்ப²ம் உப்பலபது³மஜாதிகானம் புப்பா²னி கண்ணிகமத்தம் அக³ந்தி⁴கபுப்ப²ம் களீரபுப்ப²ம் ஜீவந்தீபுப்ப²ந்தி ஏவமாதி³ தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகபுப்ப²ம் யாவகாலிகம். அஸோகப³குலகுய்யகபுன்னாக³சம்பகஜாதிகணவீரகணிகாரகுந்த³னவமாலிகமல்லிகாதீ³னம் பன புப்ப²ம் யாவஜீவிகம் தஸ்ஸ க³ணனாய அந்தோ நத்தி². பாளியம் பனஸ்ஸ கஸாவபே⁴ஸஜ்ஜேனேவ ஸங்க³ஹோ வேதி³தப்³போ³.

ப²லகா²த³னீயே பனஸலபு³ஜதாலனாளிகேரஅம்ப³ஜம்பூ³அம்பா³டகதிந்திணிகமாதுலுங்க³கபித்த²லாபு³கும்ப⁴ண்ட³புஸ்ஸப²லதிம்ப³ரூஸகதிபுஸவாதிங்க³ணசோசமோசமது⁴காதீ³னம் ப²லானி யானி லோகே தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரந்தி, ஸப்³பா³னி தானி யாவகாலிகானி. நாமக³ணனவஸேன நேஸம் ந ஸக்கா பரியந்தம் த³ஸ்ஸேதும். யானி பன பாளியம் –

‘‘அனுஜானாமி, பி⁴க்க²வே, ப²லானி பே⁴ஸஜ்ஜானி – பி³லங்க³ம், பிப்ப²லிம், மரிசம், ஹரீதகம், விபீ⁴தகம், ஆமலகம், கோ³ட்ட²ப²லம், யானி வா பனஞ்ஞானிபி அத்தி² ப²லானி பே⁴ஸஜ்ஜானி நேவ கா²த³னீயே கா²த³னீயத்த²ம் ப²ரந்தி ந போ⁴ஜனீயே போ⁴ஜனீயத்த²ம் ப²ரந்தீ’’தி (மஹாவ. 263) –

வுத்தானி, தானி யாவஜீவிகானி. தேஸம்பி அபரிபக்கானி அச்சி²வ பி³ம்ப³வரணகேதககாஸ்மரீஆதீ³னம் ப²லானி ஜாதிப²லம் கடுகப²லம் ஏளா தக்கோலந்தி ஏவம் நாமவஸேன ந ஸக்கா பரியந்தம் த³ஸ்ஸேதும்.

அட்டி²கா²த³னீயே லபு³ஜட்டி² பனஸட்டி² அம்பா³டகட்டி² ஸாலட்டி² க²ஜ்ஜூரீகேதகதிம்ப³ரூஸகானம் தருணப²லட்டி² திந்திணிகட்டி² பி³ம்ப³ப²லட்டி² உப்பல பது³மஜாதீனம் போக்க²ரட்டீ²தி ஏவமாதீ³னி தேஸு தேஸு ஜனபதே³ஸு மனுஸ்ஸானம் பகதிஆஹாரவஸேன கா²த³னீயத்த²ம் போ⁴ஜனீயத்த²ஞ்ச ப²ரணகானி அட்டீ²னி யாவகாலிகானி. மது⁴கட்டி² புன்னாக³ட்டி² ஹரீதகாதீ³னம் அட்டீ²னி ஸித்³த⁴த்த²கட்டி² ராஜிகட்டீ²தி ஏவமாதீ³னி அட்டீ²னி யாவஜீவிகானி. தேஸம் பாளியம் ப²லபே⁴ஸஜ்ஜேனேவ ஸங்க³ஹோ வேதி³தப்³போ³.

பிட்ட²கா²த³னீயே ஸத்தன்னம் தாவ த⁴ஞ்ஞானம் த⁴ஞ்ஞானுலோமானம் அபரண்ணானஞ்ச பிட்ட²ம் பனஸபிட்ட²ம் லபு³ஜபிட்ட²ம் அம்பா³டகபிட்ட²ம் ஸாலபிட்ட²ம் தோ⁴தகதாலபிட்ட²ஞ்ச கீ²ரவல்லிபிட்ட²ஞ்சாதி ஏவமாதீ³னி தேஸு தேஸு ஜனபதே³ஸு பகதிஆஹாரவஸேன மனுஸ்ஸானம் கா²த³னீயத்த²ம் போ⁴ஜனீயத்த²ஞ்ச ப²ரணகானி பிட்டா²னி யாவகாலிகானி. அதோ⁴தகம் தாலபிட்ட²ம் கீ²ரவல்லிபிட்ட²ம் அஸ்ஸக³ந்தா⁴தி³பிட்டா²னி ச யாவஜீவிகானி. தேஸம் பாளியம் கஸாவேஹி ச மூலப²லேஹி ச ஸங்க⁴ஹோ வேதி³தப்³போ³.

நிய்யாஸகா²த³னீயே ஏகோ உச்சு²னிய்யாஸோவ ஸத்தாஹகாலிகோ. ஸேஸா ‘‘அனுஜானாமி, பி⁴க்க²வே, ஜதூனி பே⁴ஸஜ்ஜானி – ஹிங்கு³ம் ஹிங்கு³ஜதும் ஹிங்கு³ஸிபாடிகம் தகம் தகபத்திம் தகபண்ணிம் ஸஜ்ஜுலஸம் யானி வா பனஞ்ஞானிபி அத்தி² ஜதூனி பே⁴ஸஜ்ஜானீ’’தி (மஹாவ. 263) ஏவம் பாளியம் வுத்தனிய்யாஸா யாவஜீவிகா. தத்த² யேவாபனகவஸேன ஸங்க³ஹிதானம் அம்ப³னிய்யாஸோ கணிகாரனிய்யாஸோதி ஏவம் நாமவஸேன ந ஸக்கா பரியந்தம் த³ஸ்ஸேதும். ஏவம் இமேஸு மூலகா²த³னீயாதீ³ஸு யம்கிஞ்சி யாவகாலிகம், ஸப்³ப³ம்பி இமஸ்மிம் அத்தே² ‘‘அவஸேஸம் கா²த³னீயம் நாமா’’தி ஸங்க³ஹிதம்.

போ⁴ஜனீயம் நாம பஞ்ச போ⁴ஜனானீதிஆதி³ம்ஹி யம் வத்தப்³ப³ம் தம் வுத்தமேவ. கா²தி³ஸ்ஸாமி பு⁴ஞ்ஜிஸ்ஸாமீதி, படிக்³க³ண்ஹாதீதி யோ பி⁴க்கு² விகாலே ஏதம் கா²த³னீயம் போ⁴ஜனீயஞ்ச படிக்³க³ண்ஹாதி, தஸ்ஸ படிக்³க³ஹணே தாவ ஆபத்தி து³க்கடஸ்ஸ. ஸேஸமேத்த² உத்தானமேவ.

ஏளகலோமஸமுட்டா²னம் – காயதோ ச காயசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

விகாலபோ⁴ஜனஸிக்கா²பத³ம் ஸத்தமம்.

8. ஸன்னிதி⁴காரகஸிக்கா²பத³வண்ணனா

252. அட்ட²மஸிக்கா²பதே³ – பே³லட்ட²ஸீஸோ நாம ஜடிலஸஹஸ்ஸப்³ப⁴ந்தரோ மஹாதே²ரோ. அரஞ்ஞே விஹரதீதி ஜேதவனஸ்ஸ அவிதூ³ரே பதா⁴னக⁴ரே ஏகஸ்மிம் ஆவாஸே வஸதி. ஸுக்க²குரந்தி அஸூபப்³யஞ்ஜனம் ஓத³னம். ஸோ கிர அந்தோகா³மே பு⁴ஞ்ஜித்வா பச்சா² பிண்டா³ய சரித்வா தாதி³ஸம் ஓத³னம் ஆஹரதி, தஞ்ச கோ² அப்பிச்ச²தாய, ந பச்சயகி³த்³த⁴தாய. தே²ரோ கிர ஸத்தாஹம் நிரோத⁴ஸமாபத்தியா வீதினாமேத்வா ஸமாபத்திதோ வுட்டா²ய தம் பிண்ட³பாதம் உத³கேன தேமேத்வா பு⁴ஞ்ஜதி, ததோ புன ஸத்தாஹம் ஸமாபத்தியா நிஸீத³தி. ஏவம் த்³வேபி தீணிபி சத்தாரிபி ஸத்தாஹானி வீதினாமேத்வா கா³மம் பிண்டா³ய பவிஸதி. தேன வுத்தம் – ‘‘சிரேன கா³மம் பிண்டா³ய பவிஸதீ’’தி.

253. காரோ கரணம் கிரியாதி அத்த²தோ ஏகம், ஸன்னிதி⁴காரோ அஸ்ஸாதி ஸன்னிதி⁴காரம்; ஸன்னிதி⁴காரமேவ ஸன்னிதி⁴காரகம். படிக்³க³ஹேத்வா ஏகரத்தம் வீதினாமிதஸ்ஸேதம் அதி⁴வசனம். தேனேவஸ்ஸ பத³பா⁴ஜனே வுத்தம் – ‘‘ஸன்னிதி⁴காரகம் நாம அஜ்ஜ படிக்³க³ஹிதம் அபரஜ்ஜூ’’தி.

படிக்³க³ண்ஹாதி ஆபத்தி து³க்கடஸ்ஸாதி ஏவம் ஸன்னிதி⁴கதம் யம்கிஞ்சி யாவகாலிகம் வா யாமகாலிகம் வா அஜ்ஜோ²ஹரிதுகாமதாய க³ண்ஹந்தஸ்ஸ படிக்³க³ஹணே தாவ ஆபத்தி து³க்கடஸ்ஸ. அஜ்ஜோ²ஹரதோ பன ஏகமேகஸ்மிம் அஜ்ஜோ²ஹாரே பாசித்தியம். ஸசேபி பத்தோ து³த்³தோ⁴தோ ஹோதி, யம் அங்கு³லியா க⁴ம்ஸந்தஸ்ஸ லேகா² பஞ்ஞாயதி, க³ண்டி²கபத்தஸ்ஸ வா க³ண்டி²கந்தரே ஸ்னேஹோ பவிட்டோ² ஹோதி, ஸோ உண்ஹே ஓதாபேந்தஸ்ஸ பக்³க⁴ரதி, உண்ஹயாகு³யா வா க³ஹிதாய ஸந்தி³ஸ்ஸதி, தாதி³ஸே பத்தேபி புனதி³வஸே பு⁴ஞ்ஜந்தஸ்ஸ பாசித்தியம். தஸ்மா பத்தம் தோ⁴வித்வா புன தத்த² அச்சோ²த³கம் வா ஆஸிஞ்சித்வா அங்கு³லியா வா க⁴ம்ஸித்வா நிஸ்னேஹபா⁴வோ ஜானிதப்³போ³. ஸசே ஹி உத³கே வா ஸ்னேஹபா⁴வோ பத்தே வா அங்கு³லிலேகா² பஞ்ஞாயதி, து³த்³தோ⁴தோ ஹோதி. தேலவண்ணபத்தே பன அங்கு³லிலேகா² பஞ்ஞாயதி, ஸா அப்³போ³ஹாரிகா. யம் பி⁴க்கூ² நிரபேக்கா² ஸாமணேரானம் பரிச்சஜந்தி, தஞ்சே ஸாமணேரா நித³ஹித்வா தே³ந்தி, ஸப்³ப³ம் வட்டதி. ஸயம் படிக்³க³ஹேத்வா அபரிச்சத்தமேவ ஹி து³தியதி³வஸே ந வட்டதி. ததோ ஹி ஏகஸித்த²ம்பி அஜ்ஜோ²ஹரதோ பாசித்தியமேவ.

அகப்பியமம்ஸேஸு மனுஸ்ஸமம்ஸே து²ல்லச்சயேன ஸத்³விம் பாசித்தியம், அவஸேஸேஸு து³க்கடேன ஸத்³தி⁴ம். யாமகாலிகம் ஸதி பச்சயே அஜ்ஜோ²ஹரதோ பாசித்தியம். ஆஹாரத்தா²ய அஜ்ஜோ²ஹரதோ து³க்கடேன ஸத்³தி⁴ம் பாசித்தியம். ஸசே பவாரிதோ ஹுத்வா அனதிரித்தகதம் அஜ்ஜோ²ஹரதி, பகதிஆமிஸே த்³வே பாசித்தியானி, மனுஸ்ஸமம்ஸே து²ல்லச்சயேன ஸத்³தி⁴ம் த்³வே, ஸேஸஅகப்பியமம்ஸே து³க்கடேன ஸத்³தி⁴ம், யாமகாலிகம் ஸதி பச்சயே ஸாமிஸேன முகே²ன அஜ்ஜோ²ஹரதோ த்³வே, நிராமிஸேன ஏகமேவ. ஆஹாரத்தா²ய அஜ்ஜோ²ஹரதோ விகப்பத்³வயேபி து³க்கடம் வட்³ட⁴தி. ஸசே விகாலே அஜ்ஜோ²ஹரதி, பகதிபோ⁴ஜனே ஸன்னிதி⁴பச்சயா ச விகாலபோ⁴ஜனபச்சயா ச த்³வே பாசித்தியானி, அகப்பியமம்ஸேஸு து²ல்லச்சயஞ்ச து³க்கடஞ்ச வட்³ட⁴தி. யாமகாலிகேஸு விகாலபச்சயா அனாபத்தி, அனதிரித்தபச்சயா பன விகாலே ஸப்³ப³விகப்பேஸு அனாபத்தி.

255. ஸத்தாஹகாலிகம் யாவஜீவிகம் ஆஹாரத்தா²யாதி ஆஹாரத்தா²ய படிக்³க³ண்ஹதோ படிக்³க³ஹணபச்சயா தாவ து³க்கடம், அஜ்ஜோ²ஹரதோ பன ஸசே நிராமிஸம் ஹோதி, அஜ்ஜோ²ஹாரே அஜ்ஜோ²ஹாரே து³க்கடம். அத² ஆமிஸஸம்ஸட்ட²ம் படிக்³க³ஹேத்வா ட²பிதம் ஹோதி, யதா²வத்து²கம் பாசித்தியமேவ.

256. அனாபத்தி யாவகாலிகந்திஆதி³ம்ஹி விகாலபோ⁴ஜனஸிக்கா²பதே³ நித்³தி³ட்ட²ம் கா²த³னீயபோ⁴ஜனீயம் யாவ மஜ்ஜ²ந்திகஸங்கா²தோ காலோ, தாவ பு⁴ஞ்ஜிதப்³ப³தோ யாவகாலிகம். ஸத்³தி⁴ம் அனுலோமபானேஹி அட்ட²வித⁴ம் பானம் யாவ ரத்தியா பச்சி²மயாமஸங்கா²தோ யாமோ, தாவ பரிபு⁴ஞ்ஜிதப்³ப³தோ யாமோ காலோ அஸ்ஸாதி யாமகாலிகம். ஸப்பிஆதி³ பஞ்சவித⁴ம் பே⁴ஸஜ்ஜம் ஸத்தாஹம் நிதே⁴தப்³ப³தோ ஸத்தாஹோ காலோ அஸ்ஸாதி ஸத்தாஹகாலிகம். ட²பேத்வா உத³கம் அவஸேஸம் ஸப்³ப³ம்பி யாவஜீவம் பரிஹரித்வா ஸதி பச்சயே பரிபு⁴ஞ்ஜிதப்³ப³தோ யாவஜீவகந்தி வுச்சதி.

தத்த² அருணோத³யேவ படிக்³க³ஹிதம் யாவகாலிகம் ஸதக்க²த்தும்பி நித³ஹித்வா யாவகாலோ நாதிக்கமதி தாவ, யாமகாலிகம் ஏகம் அஹோரத்தம், ஸத்தாஹகாலிகம் ஸத்தரத்தம், இதரம் ஸதி பச்சயே, யாவஜீவம்பி பரிபு⁴ஞ்ஜந்தஸ்ஸ அனாபத்தி. ஸேஸமேத்த² உத்தானமேவ. அட்ட²கதா²ஸு பன இமஸ்மிம் டா²னே பானகதா² கப்பியானுலோமகதா² ‘‘கப்பதி நு கோ² யாவகாலிகேன யாமகாலிக’’ந்திஆதி³கதா² ச கப்பியபூ⁴மிகதா² ச வித்தா²ரிதா, தம் மயம் ஆக³தட்டா²னேயேவ கத²யிஸ்ஸாம.

ஏளகலோமஸமுட்டா²னம் – காயதோ ச காயசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ஸன்னிதி⁴காரகஸிக்கா²பத³ம் அட்ட²மம்.

9. பணீதபோ⁴ஜனஸிக்கா²பத³வண்ணனா

257. நவமஸிக்கா²பதே³ – பணீதபோ⁴ஜனானீதி உத்தமபோ⁴ஜனானி. கஸ்ஸ ஸம்பன்னம் ந மனாபந்தி ஸம்பத்தியுத்தம் கஸ்ஸ ந பியம். ஸாது³ந்தி ஸுரஸம்.

259. யோ பன பி⁴க்கு² ஏவரூபானி பணீதபோ⁴ஜனானி அகி³லானோ அத்தனோ அத்தா²ய விஞ்ஞாபேத்வா பு⁴ஞ்ஜேய்யாதி ஏத்த² ஸுத்³தா⁴னி ஸப்பிஆதீ³னி விஞ்ஞாபேத்வா பு⁴ஞ்ஜந்தோ பாசித்தியம் நாபஜ்ஜதி, ஸேகி²யேஸு ஸூபோத³னவிஞ்ஞத்திது³க்கடம் ஆபஜ்ஜதி, ஓத³னஸம்ஸட்டா²னி பன விஞ்ஞாபேத்வா பு⁴ஞ்ஜந்தோ பாசித்தியம் ஆபஜ்ஜதீதி வேதி³தப்³போ³, அயம் கிரேத்த² அதி⁴ப்பாயோ. தேனேவ ச ‘‘பணீதானீ’’தி அவத்வா ‘‘பணீதபோ⁴ஜனானீ’’தி ஸுத்தே வுத்தம். ‘‘பணீதானீ’’தி ஹி வுத்தே ஸப்பிஆதீ³னம்யேவ க³ஹணம் ஹோதி, ‘‘பணீதபோ⁴ஜனானீ’’தி வுத்தே பன பணீதஸம்ஸட்டா²னி ஸத்தத⁴ஞ்ஞனிப்³ப³த்தானி போ⁴ஜனானி பணீதபோ⁴ஜனானீதி அயமத்தோ² பஞ்ஞாயதி.

இதா³னி விஞ்ஞாபேதி பயோகே³ து³க்கடந்திஆதீ³ஸு அயம் வினிச்ச²யோ – ‘‘ஸப்பினா ப⁴த்தம் தே³ஹி, ஸப்பிம் ஆகிரித்வா தே³ஹி, ஸப்பிமிஸ்ஸகம் கத்வா தே³ஹி, ஸஹஸப்பினா தே³ஹி, ஸப்பிஞ்ச ப⁴த்தஞ்ச தே³ஹீ’’தி விஞ்ஞாபேந்தஸ்ஸ விஞ்ஞத்தியா து³க்கடம், படிக்³க³ஹணே து³க்கடம், அஜ்ஜோ²ஹாரே பாசித்தியம். ‘‘ஸப்பிப⁴த்தம் தே³ஹீ’’தி வுத்தே பன யஸ்மா ஸாலிப⁴த்தம் விய ஸப்பிப⁴த்தம் நாம நத்தி²; தஸ்மா ஸூபோத³னவிஞ்ஞத்திது³க்கடமேவ வேதி³தப்³ப³ம்.

ஸசே பன ‘‘ஸப்பினா ப⁴த்தம் தே³ஹீ’’தி வுத்தே ப⁴த்தம் த³த்வா ‘‘ஸப்பிம் கத்வா பு⁴ஞ்ஜா’’தி நவனீதம் வா கீ²ரம் வா த³தி⁴ம் வா தே³தி, மூலம் வா பன தே³தி, ‘‘இமினா ஸப்பிம் க³ஹேத்வா பு⁴ஞ்ஜா’’தி யதா²வத்து²கமேவ. ‘‘கோ³ஸப்பினா ப⁴த்தம் தே³ஹீ’’தி வுத்தே பன கோ³ஸப்பினா வா தே³து, கோ³ஸப்பிம்ஹி அஸதி, புரிமனயேனேவ கோ³னவனீதாதீ³னி வா கா³விம்யேவ வா தே³து ‘‘இதோ ஸப்பினா பு⁴ஞ்ஜா’’தி யதா²வத்து²கமேவ. ஸசே பன கோ³ஸப்பினா யாசிதோ அஜியா ஸப்பிஆதீ³ஹி தே³தி, விஸங்கேதம். ஏவஞ்ஹி ஸதி அஞ்ஞம் யாசிதேன அஞ்ஞம் தி³ன்னம் நாம ஹோதி, தஸ்மா அனாபத்தி. ஏஸ நயோ அஜியா ஸப்பினா தே³ஹீதி ஆதீ³ஸுபி.

‘‘கப்பியஸப்பினா தே³ஹீ’’தி வுத்தே அகப்பியஸப்பினா தே³தி, விஸங்கேதமேவ. ‘‘அகப்பியஸப்பினாதி வுத்தே அகப்பியஸப்பினா தே³தி, படிக்³க³ஹணேபி பரிபோ⁴கே³பி து³க்கடமேவ. அகப்பியஸப்பிம்ஹி அஸதி புரிமனயேனேவ அகப்பியனவனீதாதீ³னி தே³தி ‘‘ஸப்பிம் கத்வா பு⁴ஞ்ஜா’’தி அகப்பியஸப்பினாவ தி³ன்னம் ஹோதி. ‘‘அகப்பியஸப்பினா’’தி வுத்தே கப்பியேன தே³தி, விஸங்கேதம். ‘‘ஸப்பினா’’தி வுத்தே ஸேஸேஸு நவனீதாதீ³ஸு அஞ்ஞதரேன தே³தி, விஸங்கேதமேவ. ஏஸ நயோ நவனீதேன தே³ஹீதிஆதீ³ஸுபி. யேன யேன ஹி விஞ்ஞத்தி ஹோதி, தஸ்மிம் வா தஸ்ஸ மூலே வா லத்³தே⁴, தம் தம் லத்³த⁴மேவ ஹோதி.

ஸசே பன அஞ்ஞம் பாளியா ஆக³தம் வா அனாக³தம் வா தே³ந்தி, விஸங்கேதம். பாளியம் ஆக³தனவனீதாதீ³னி ட²பேத்வா அஞ்ஞேஹி நவனீதாதீ³ஹி விஞ்ஞாபேந்தஸ்ஸ து³க்கடம். யதா² ச ‘‘ஸப்பிப⁴த்தம் தே³ஹீ’’தி வுத்தே ஸாலிப⁴த்தஸ்ஸ விய ஸப்பிப⁴த்தஸ்ஸ அபா⁴வா ஸூபோத³னவிஞ்ஞத்திது³க்கடமேவ ஹோதீதி வுத்தம். ஏவம் நவனீதப⁴த்தம் தே³ஹீதிஆதீ³ஸுபி. படிபாடியா ஏகமேகம் வித்தா²ரேத்வா வுச்சமானேபி ஹி அயமேவத்தோ² வத்தப்³போ³ ஸியா, ஸோ ச ஸங்கே²பேனபி ஸக்கா ஞாதும், கிம் தத்த² வித்தா²ரேன? தேன வுத்தம் – ‘‘ஏஸ நயோ நவனீதேன தே³ஹீதிஆதீ³ஸுபீ’’தி.

ஸசே பன ஸப்³பே³ஹிபி ஸப்பிஆதீ³ஹி ஏகட்டா²னே வா நானாட்டா²னே வா விஞ்ஞாபேத்வா படிலத்³த⁴ம் ஏகபா⁴ஜனே ஆகிரித்வா ஏகரஸம் கத்வா ததோ குஸக்³கே³னாபி ஜிவ்ஹக்³கே³ பி³ந்து³ம் ட²பேத்வா அஜ்ஜோ²ஹரதி, நவ பாசித்தியானி ஆபஜ்ஜதி. வுத்தம்பி சேதம் பரிவாரே –

‘‘காயிகானி ந வாசஸிகானி,

ஸப்³பா³னி நானாவத்து²கானி;

அபுப்³ப³ம் அசரிமம் ஆபஜ்ஜேய்ய ஏகதோ,

பஞ்ஹாமேஸா குஸலேஹி சிந்திதா’’தி. (பரி. 481);

261. அகி³லானோ கி³லானஸஞ்ஞீதி ஏத்த² ஸசே கி³லானஸஞ்ஞீபி ஹுத்வா பே⁴ஸஜ்ஜத்தா²ய பஞ்ச பே⁴ஸஜ்ஜானி விஞ்ஞாபேதி, மஹானாமஸிக்கா²பதே³ன காரேதப்³போ³. நவ பணீதபோ⁴ஜனானி விஞ்ஞாபேந்தோ பன இமினா ஸிக்கா²பதே³ன காரேதப்³போ³. பி⁴க்கு²னீனம் பன ஏதானி பாடிதே³ஸனீயவத்தூ²னி ஹோந்தி, ஸூபோத³னவிஞ்ஞத்தியம் உப⁴யேஸம்பி ஸேக²பண்ணத்திது³க்கடமேவ. ஸேஸமேத்த² உத்தானமேவ.

சதுஸமுட்டா²னம் – காயதோ காயவாசதோ காயசித்ததோ காயவாசாசித்ததோ ச ஸமுட்டா²தி,

கிரியம், நோஸஞ்ஞாவிமோக்க²ம், அசித்தகம், பண்ணதிவஜ்ஜம், காயகம்மம், வசீகம்மம், திசித்தம், திவேத³னந்தி.

பணீதபோ⁴ஜனஸிக்கா²பத³ம் நவமம்.

10. த³ந்தபோனஸிக்கா²பத³வண்ணனா

263. த³ஸமஸிக்கா²பதே³ – சதூஸு பச்சயேஸு அந்தமஸோ த³ந்தகட்ட²ம்பி ஸப்³ப³ம் பம்ஸுகூலமேவ அஸ்ஸாதி ஸப்³ப³பம்ஸுகூலிகோ. ஸோ கிர ஸுஸானே ச²ட்³டி³தபா⁴ஜனமேவ பத்தம் கத்வா தத்த² ச²ட்³டி³தசோளகேஹேவ சீவரம் கத்வா தத்த² ச²ட்³டி³தமஞ்சபீட²கானியேவ க³ஹேத்வா பரிபு⁴ஞ்ஜதி. அய்யவோஸாடிதகானீதி ஏத்த² அய்யா வுச்சந்தி காலங்கதா பிதிபிதாமஹா. வோஸாடிதகானி வுச்சந்தி தேஸம் அத்தா²ய ஸுஸானாதீ³ஸு ச²ட்³டி³தகானி கா²த³னீயபோ⁴ஜனீயானி; மனுஸ்ஸா கிர காலங்கதே ஞாதகே உத்³தி³ஸ்ஸ யம் தேஸம் ஸஜீவகாலே பியம் ஹோதி, தம் ஏதேஸு ஸுஸானாதீ³ஸு பிண்ட³ம் பிண்ட³ம் கத்வா ‘‘ஞாதகா நோ பரிபு⁴ஞ்ஜந்தூதி ட²பேந்தி. ஸோ பி⁴க்கு² தம் க³ஹேத்வா பு⁴ஞ்ஜதி, அஞ்ஞம் பணீதம்பி தி³ய்யமானம் ந இச்ச²தி. தேன வுத்தம் – ‘‘ஸுஸானேபி ருக்க²மூலேபி உம்மாரேபி அய்யவோஸாடிதகானி ஸாமம் க³ஹேத்வா பரிபு⁴ஞ்ஜதீ’’தி. தே²ரோதி தி²ரோ க⁴னப³த்³தோ⁴. வட²ரோதி தூ²லோ; தூ²லோ ச க⁴னஸரீரோ சாயம் பி⁴க்கூ²தி வுத்தம் ஹோதி. மனுஸ்ஸமம்ஸம் மஞ்ஞே கா²த³தீதி மனுஸ்ஸமம்ஸம் கா²த³தீதி நம் ஸல்லக்கே²ம; மனுஸ்ஸமம்ஸம் கா²த³ந்தா ஹி ஈதி³ஸா ப⁴வந்தீதி அயம் தேஸம் அதி⁴ப்பாயோ.

264. உத³கத³ந்தபோனே குக்குச்சாயந்தீதி ஏத்த² தே பி⁴க்கூ² ‘‘அதி³ன்னம் முக²த்³வாரம் ஆஹாரம் ஆஹரேய்யா’’தி பத³ஸ்ஸ ஸம்மா அத்த²ம் அஸல்லக்கே²த்வா குக்குச்சாயிஸும், ப⁴க³வா பன யதா²உப்பன்னஸ்ஸ வத்து²ஸ்ஸ வஸேன பிதா விய தா³ரகே தே பி⁴க்கூ² ஸஞ்ஞாபேந்தோ அனுபஞ்ஞத்திம் ட²பேஸி.

265. அதி³ன்னந்தி காயேன வா காயபடிப³த்³தே⁴ன வா க³ண்ஹந்தஸ்ஸ காயகாயபடிப³த்³த⁴னிஸ்ஸக்³கி³யானம் அஞ்ஞதரவஸேன ந தி³ன்னம். ஏததே³வ ஹி ஸந்தா⁴ய பத³பா⁴ஜனே ‘‘அதி³ன்னம் நாம அப்படிக்³க³ஹிதகம் வுச்சதீ’’தி வுத்தம். து³தியபாராஜிகே பன ‘‘அதி³ன்னம் நாம பரபரிக்³க³ஹிதகம் வுச்சதீ’’தி வுத்தம். தி³ன்னந்தி இத³ம் பன தஸ்ஸேவ அதி³ன்னஸ்ஸ படிபக்க²வஸேன லக்க²ணத³ஸ்ஸனத்த²ம் உத்³த⁴டம். நித்³தே³ஸே சஸ்ஸ ‘‘காயேன வா காயபடிப³த்³தே⁴ன வா நிஸ்ஸக்³கி³யேன வா தே³ந்தே’’தி ஏவம் அஞ்ஞஸ்மிம் த³த³மானே ‘‘ஹத்த²பாஸே டி²தோ காயேன வா காயபடிப³த்³தே⁴ன வா படிக்³க³ண்ஹாதீதி தம் ஏவம் தி³ய்யமானம் அந்தமஸோ ரத²ரேணும்பி ஸசே புப்³பே³ வுத்தலக்க²ணே ஹத்த²பாஸே டி²தோ காயேன வா காயபடிப³த்³தே⁴ன வா படிக்³க³ண்ஹாதி, ஏதம் ஏவம் படிக்³க³ஹிதம் தி³ன்னம் நாம வுச்சதி. ந ‘‘இத³ம் க³ண்ஹ, இத³ம் தவ ஹோதூ’’திஆதி³வசனேன நிஸ்ஸட்ட²ம்.

தத்த² காயேனாதி ஹத்தா²தீ³ஸு யேன கேனசி ஸரீராவயவேன; அந்தமஸோ பாத³ங்கு³லியாபி தி³ய்யமானம் காயேன தி³ன்னம் நாம ஹோதி, படிக்³க³ஹணேபி ஏஸேவ நயோ. யேன கேனசி ஹி ஸரீராவயவேன க³ஹிதம் காயேன க³ஹிதமேவ ஹோதி. ஸசேபி நத்து²கரணியா தி³ய்யமானம் நாஸாபுடேன அகல்லகோ வா முகே²ன படிக்³க³ண்ஹாதி. ஆபோ⁴க³மத்தமேவ ஹி ஏத்த² பமாணந்தி அயம் நயோ மஹாபச்சரியம் வுத்தோ. காயபடிப³த்³தே⁴னாதி கடச்சு²ஆதீ³ஸு யேன கேனசி உபகரணேன தி³ன்னம் காயபடிப³த்³தே⁴ன தி³ன்னம் நாம ஹோதி. படிக்³க³ஹணேபி ஏஸேவ நயோ. யேன கேனசி ஸரீரபடிப³த்³தே⁴ன பத்ததா²லகாதி³னா க³ஹிதம் காயபடிப³த்³தே⁴ன க³ஹிதமேவ ஹோதி. நிஸ்ஸக்³கி³யேனாதி காயதோ ச காயபடிப³த்³த⁴தோ ச மோசேத்வா ஹத்த²பாஸே டி²தஸ்ஸ காயேன வா காயபடிப³த்³தே⁴ன வா பாதியமானம்பி நிஸ்ஸக்³கி³யேன பயோகே³ன தி³ன்னம் நாம ஹோதி. அயம் தாவ பாளிவண்ணனா.

அயம் பனேத்த² பாளிமுத்தகவினிச்ச²யோ – பஞ்சங்கே³ஹி படிக்³க³ஹணம் ருஹதி – தா²மமஜ்ஜி²மஸ்ஸ புரிஸஸ்ஸ உச்சாரணமத்தம் ஹோதி, ஹத்த²பாஸோ பஞ்ஞாயதி, அபி⁴ஹாரோ பஞ்ஞாயதி, தே³வோ வா மனுஸ்ஸோ வா திரச்சா²னக³தோ வா காயேன வா காயபடிப³த்³தே⁴ன வா நிஸ்ஸக்³கி³யேன வா தே³தி, தம் சே பி⁴க்கு² காயேன வா காயபடிப³த்³தே⁴ன வா படிக்³க³ண்ஹாதி. ஏவம் பஞ்சஹங்கே³ஹி படிக்³க³ஹணம் ருஹதி.

தத்த² டி²தனிஸின்னனிபன்னானம் பவாரணஸிக்கா²பதே³ வுத்தனயேனேவ ஹத்த²பாஸோ வேதி³தப்³போ³. ஸசே பன தா³யகபடிக்³கா³ஹகேஸு ஏகோ ஆகாஸே ஹோதி, ஏகோ பூ⁴மியம், பூ⁴மட்ட²ஸ்ஸ ச ஸீஸேன ஆகாஸட்ட²ஸ்ஸ ச ட²பேத்வா தா³தும் வா க³ஹேதும் வா பஸாரிதஹத்த²ம், யம் ஆஸன்னதரம் அங்க³ம், தஸ்ஸ ஓரிமந்தேன ஹத்த²பாஸப்பமாணம் பரிச்சி²ந்தி³தப்³ப³ம். ஸசேபி ஏகோ கூபே ஹோதி, ஏகோ கூபதடே, ஏகோ வா பன ருக்கே², ஏகோ பத²வியம், வுத்தனயேனேவ ஹத்த²பாஸப்பமாணம் பரிச்சி²ந்தி³தப்³ப³ம். ஏவரூபே ஹத்த²பாஸே ட²த்வா ஸசேபி பக்கீ² முக²துண்ட³கேன வா ஹத்தீ² வா ஸோண்டா³ய க³ஹேத்வா புப்ப²ம் வா ப²லம் வா தே³தி, படிக்³க³ஹணம் ருஹதி. ஸசே பன அத்³த⁴ட்ட²மரதனஸ்ஸாபி ஹத்தி²னோ க²ந்தே⁴ நிஸின்னோ, தேன ஸோண்டா³ய தி³ய்யமானம் க³ண்ஹாதி, வட்டதியேவ.

ஏகோ ப³ஹூனி ப⁴த்தப்³யஞ்ஜனபா⁴ஜனானி ஸீஸே கத்வா பி⁴க்கு²ஸ்ஸ ஸந்திகம் ஆக³ந்த்வா டி²தகோவ க³ண்ஹதா²தி வத³தி, ந தாவ அபி⁴ஹாரோ பஞ்ஞாயதி, தஸ்மா ந க³ஹேதப்³ப³ம். ஸசே பன ஈஸகம்பி ஓனமதி, பி⁴க்கு²னா ஹத்த²ம் பஸாரேத்வா ஹேட்டி²மபா⁴ஜனம் ஏகதே³ஸேனாபி ஸம்படிச்சி²தப்³ப³ம். ஏத்தாவதா ஸப்³ப³பா⁴ஜனானி படிக்³க³ஹிதானி ஹோந்தி, ததோ பட்டா²ய ஓரோபேத்வா வா உக்³கா⁴டேத்வா வா யம் இச்ச²தி, தம் க³ஹேத்வா பு⁴ஞ்ஜிதும் வட்டதி. ஸப⁴த்தபச்சி²ஆதி³ம்ஹி பன ஏகபா⁴ஜனே வத்தப்³ப³மேவ நத்தி², காஜேன ப⁴த்தம் ஹரந்தோபி ஸசே காஜம் ஓனாமேத்வா தே³தி, வட்டதி. திம்ஸஹத்தோ² வேணு ஹோதி, ஏகஸ்மிம் அந்தே கு³ளகும்போ⁴ ப³த்³தோ⁴, ஏகஸ்மிம் ஸப்பிகும்போ⁴, தஞ்சே படிக்³க³ண்ஹாதி, ஸப்³ப³ம் படிக்³க³ஹிதமேவ. உச்சு²யந்ததோ³ணிதோ பக்³க⁴ரந்தமேவ ரஸம் க³ண்ஹதா²தி வத³தி, அபி⁴ஹாரோ ந பஞ்ஞாயதீதி ந க³ஹேதப்³போ³. ஸசே பன கஸடம் ச²ட்³டே³த்வா ஹத்தே²ன உஸ்ஸிஞ்சித்வா உஸ்ஸிஞ்சித்வா தே³தி, வட்டதி.

ப³ஹூ பத்தா மஞ்சே வா பீடே² வா கடஸாரகே வா தோ³ணியம் வா ப²லகே வா ட²பிதா ஹோந்தி, யத்த² டி²தஸ்ஸ தா³யகோ ஹத்த²பாஸே ஹோதி, தத்த² ட²த்வா படிக்³க³ஹணஸஞ்ஞாய மஞ்சாதீ³னி அங்கு³லியாபி பு²ஸித்வா டி²தேன வா நிஸின்னேன வா நிபன்னேன வா யம் தேஸு பத்தேஸு தி³ய்யதி, தம் ஸப்³ப³ம் படிக்³க³ஹிதம் ஹோதி. ஸசேபி படிக்³க³ஹேஸ்ஸாமீதி மஞ்சாதீ³னி ஆருஹித்வா நிஸீத³தி, வட்டதியேவ. ஸசே பன மஞ்சாதீ³னி ஹத்தே²ன க³ஹேத்வா மஞ்சே நிஸீத³தி, வத்தப்³ப³மேவ நத்தி².

பத²வியம் பன ஸசேபி குச்சி²யா குச்சி²ம் ஆஹச்ச டி²தா ஹோந்தி, யம் யம் அங்கு³லியா வா ஸூசியா வா பு²ஸித்வா நிஸின்னோ ஹோதி, தத்த² தத்த² தி³ய்யமானமேவ படிக்³க³ஹிதம் ஹோதி. ‘‘யத்த² கத்த²சி மஹாகடஸாரஹத்த²த்த²ரணாதீ³ஸு ட²பிதபத்தே படிக்³க³ஹணம் ந ருஹதீ’’தி வுத்தம், தம் ஹத்த²பாஸாதிக்கமம் ஸந்தா⁴ய வுத்தந்தி வேதி³தப்³ப³ம். ஹத்த²பாஸே பன ஸதி யத்த² கத்த²சி வட்டதி அஞ்ஞத்ர தத்த²ஜாதகா.

தத்த²ஜாதகே பன பது³மினிபண்ணே வா கிம்ஸுகபண்ணாதி³ம்ஹி வா ந வட்டதி. ந ஹி தம் காயபடிப³த்³த⁴ஸங்க்²யம் க³ச்ச²தி. யதா² ச தத்த²ஜாதகே; ஏவம் கா²ணுகே ப³ந்தி⁴த்வா ட²பிதமஞ்சாதி³ம்ஹி அஸம்ஹாரிமே ப²லகே வா பாஸாணே வா ந ருஹதியேவ, தேபி ஹி தத்த²ஜாதகஸங்கே²புபகா³ ஹோந்தி. பூ⁴மியம் அத்த²தேஸு ஸுகு²மேஸு திந்திணிகாதி³பண்ணேஸுபி படிக்³க³ஹணம் ந ருஹதி, ந ஹி தானி ஸந்தா⁴ரேதும் ஸமத்தா²னீதி. மஹந்தேஸு பன பது³மினிபண்ணாதீ³ஸு ருஹதி. ஸசே ஹத்த²பாஸம் அதிக்கம்ம டி²தோ தீ³க⁴த³ண்ட³கேன உளுங்கேன தே³தி, ஆக³ந்த்வா தே³ஹீதி வத்தப்³போ³. வசனம் அஸுத்வா வா அனாதி³யித்வா வா பத்தே ஆகிரதியேவ, புன படிக்³க³ஹேதப்³ப³ம். தூ³ரே ட²த்வா ப⁴த்தபிண்ட³ம் கி²பந்தேபி ஏஸேவ நயோ.

ஸசே பத்தத்த²விகதோ நீஹரியமானே பத்தே ரஜனசுண்ணானி ஹோந்தி, ஸதி உத³கே தோ⁴விதப்³போ³, அஸதி ரஜனசுண்ணம் புச்சி²த்வா படிக்³க³ஹேத்வா வா பிண்டா³ய சரிதப்³ப³ம். ஸசே பிண்டா³ய சரந்தஸ்ஸ ரஜம் பததி, படிக்³க³ஹேத்வா பி⁴க்கா² க³ண்ஹிதப்³பா³. அப்படிக்³க³ஹேத்வா க³ண்ஹதோ வினயது³க்கடம். தம் பன புன படிக்³க³ஹேத்வா பு⁴ஞ்ஜதோ அனாபத்தி. ஸசே பன ‘‘படிக்³க³ஹேத்வா தே³தா²’’தி வுத்தே வசனம் அஸுத்வா வா அனாதி³யித்வா வா பி⁴க்க²ம் தே³ந்தியேவ, வினயது³க்கடம் நத்தி², புன படிக்³க³ஹேத்வா அஞ்ஞா பி⁴க்கா² க³ஹேதப்³பா³.