5. அசேலகவக்³கோ³

1. அசேலகஸிக்கா²பத³வண்ணனா

269. அசேலகவக்³க³ஸ்ஸ 9 பட²மஸிக்கா²பதே³ – பரிவேஸனந்தி பரிவிஸனட்டா²னம். பரிப்³பா³ஜகஸமாபன்னோதி பப்³ப³ஜ்ஜம் ஸமாபன்னோ. தே³தி ஆபத்தி பாசித்தியஸ்ஸாதி ஸமதித்திகம் யாகு³பத்தம் ஏகபயோகே³ன தே³தி, ஏகம் பாசித்தியம். அவச்சி²ந்தி³த்வா அவச்சி²ந்தி³த்வா தே³தி, பயோகே³ பயோகே³ பாசித்தியம். ஏஸேவ நயோ பூவப⁴த்தாதீ³ஸு. தித்தி²யே அதித்தி²யஸஞ்ஞீதி மாதா வா பிதா வா தித்தி²யேஸு பப்³ப³ஜதி, தேஸம் மாதாபிதுஸஞ்ஞாய தே³ந்தஸ்ஸாபி பாசித்தியமேவ ஹோதி. தா³பேதீதி அனுபஸம்பன்னேன தா³பேதி.

273. உபனிக்கி²பித்வா தே³தீதி ததா²ரூபே பா⁴ஜனே ட²பேத்வா தம் பா⁴ஜனம் தேஸம் ஸந்திகே பூ⁴மியம் நிக்கி²பித்வா தே³தி, தேஸம் வா பா⁴ஜனம் நிக்கி²பாபேத்வா தத்த² தே³தி, பத்தம் ஆதா⁴ரகே வா பூ⁴மியம் வா ட²பேத்வாபி ‘‘இதோ க³ண்ஹதா²’’தி வத்தும் வட்டதி. ஸசே தித்தி²யோ வத³தி ‘‘மய்ஹம் நாம இத³ம் ஸந்தகம், இத⁴ ந ஆகிரதா²’’தி ஆகிரிதப்³ப³ம். தஸ்ஸ ஸந்தகத்தா ஸஹத்தா² தா³னம் நாம ந ஹோதி. ஸேஸமேத்த² உத்தானமேவ.

ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

அசேலகஸிக்கா²பத³ம் பட²மம்.

2. உய்யோஜனஸிக்கா²பத³வண்ணனா

274. து³தியஸிக்கா²பதே³ – படிக்கமனேபீதி ஆஸனஸாலாயம்பி. ப⁴த்தவிஸ்ஸக்³க³ந்தி ப⁴த்தகிச்சம். ந ஸம்பா⁴வேஸீதி ந பாபுணி.

276. அனாசாரந்தி வுத்தாவஸேஸம் காயவசீத்³வாரவீதிக்கமம். த³ஸ்ஸனூபசாரம் வா ஸவனூபசாரம் வா விஜஹந்தஸ்ஸாதி ஏத்த² யதி³ டி²தோ வா நிஸின்னோ வா உய்யோஜேதி; யோ உய்யோஜிதோ, ஸோ விஜஹதி, தஸ்ஸ ச ஆபத்தி நாம நத்தி². தஸ்மிம் பன விஜஹந்தேபி அத்த²தோ இதரேன விஜஹிதமேவ ஹோதி. தஸ்மா யோ உய்யோஜேதி, தஸ்ஸேவாயம் ஆபத்தி. தத்த² ஸசே உபசாரப்³ப⁴ந்தரே ஏகோ பாதோ³ ஹோதி, து³க்கடம். ஸீமாதிக்கமே பாசித்தியம். ஏத்த² ச த³ஸ்ஸனூபசாரஸ்ஸ அப்³போ⁴காஸே த்³வாத³ஸஹத்த²ப்பமாணம், ததா² ஸவனூபசாரஸ்ஸ. ஸசே பன அந்தரா குட்டத்³வாரபாகாராத³யோ ஹோந்தி, தேஹி அந்தரிதபா⁴வோ த³ஸ்ஸனூபசாராதிக்கமோ, தஸ்ஸ வஸேன ஆபத்தி வேதி³தப்³பா³. ந அஞ்ஞோ கோசி பச்சயோ ஹோதீதி ட²பேத்வா வுத்தப்பகாரமனாசாரம் அஞ்ஞம் கிஞ்சி காரணம் ந ஹோதி.

277. கலிஸாஸனம் ஆரோபேதீதி ‘‘கலீ’’தி கோதோ⁴; தஸ்ஸ ஸாஸனம் ஆரோபேதி; கோத⁴ஸ்ஸ ஆணம் ஆரோபேதி; கோத⁴வஸேன டா²னனிஸஜ்ஜாதீ³ஸு தோ³ஸம் த³ஸ்ஸேத்வா ‘‘பஸ்ஸத² போ⁴ இமஸ்ஸ டா²னம், நிஸஜ்ஜம் ஆலோகிதம் விலோகிதம் கா²ணுகோ விய திட்ட²தி, ஸுனகோ² விய நிஸீத³தி, மக்கடோ விய இதோ சிதோ ச விலோகேதீ’’தி ஏவம் அமனாபவசனம் வத³தி ‘‘அப்பேவ நாம இமினாபி உப்³பா³ள்ஹோ பக்கமேய்யா’’தி. ஸேஸம் உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

உய்யோஜனஸிக்கா²பத³ம் து³தியம்.

3. ஸபோ⁴ஜனஸிக்கா²பத³வண்ணனா

279. ததியஸிக்கா²பதே³ – ஸயனிக⁴ரேதி ஸயனியக⁴ரே. யதோ அய்யஸ்ஸ பி⁴க்கா² தி³ன்னாதி யஸ்மா பி⁴க்கா² தி³ன்னா, யம் ஆக³தேன லத்³த⁴ப்³ப³ம் தம் வோ லத்³த⁴ம்; க³ச்ச²தா²தி அதி⁴ப்பாயோ. பரியுட்டி²தோதி ராக³பரியுட்டி²தோ; மேது²னாதி⁴ப்பாயோதி அத்தோ².

280. ஸஹ உபோ⁴ஹி ஜனேஹீதி ஸபோ⁴ஜனம்; தஸ்மிம் ஸபோ⁴ஜனே. அத² வா ஸபோ⁴ஜனேதி ஸபோ⁴கே³. ராக³பரியுட்டி²தஸ்ஸ ஹி புரிஸஸ்ஸ இத்தீ² போ⁴கோ³ இத்தி²யா ச புரிஸோ. தேனேவஸ்ஸ பத³பா⁴ஜனே – ‘‘இத்தீ² சேவ ஹோதி புரிஸோ சா’’திஆதி³ வுத்தம். மஹல்லகே க⁴ரேதி மஹல்லகே ஸயனிக⁴ரே. பிட்ட²ஸங்கா⁴டஸ்ஸ ஹத்த²பாஸம் விஜஹித்வாதி தஸ்ஸ ஸயனிக⁴ரே க³ப்³ப⁴ஸ்ஸ யோ பிட்ட²ஸங்கா⁴டோ, தஸ்ஸ ஹத்த²பாஸம் விஜஹித்வா; அந்தோஸயனஸ்ஸ ஆஸன்னே டா²னே நிஸீத³தீதி அத்தோ². ஈதி³ஸஞ்ச ஸயனிக⁴ரம் மஹாசதுஸ்ஸாலாதீ³ஸு ஹோதி. பிட்டி²வம்ஸம் அதிக்கமித்வாதி இமினா மஜ்ஜா²திக்கமம் த³ஸ்ஸேதி. தஸ்மா யதா² வா ததா² வா கதஸ்ஸ கு²த்³த³கஸ்ஸ ஸயனிக⁴ரஸ்ஸ மஜ்ஜா²திக்கமே ஆபத்தி வேதி³தப்³பா³. ஸேஸமேத்த² உத்தானமேவ.

பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், த்³விவேத³னந்தி.

ஸபோ⁴ஜனஸிக்கா²பத³ம் ததியம்.

284. சதுத்த²பஞ்சமஸிக்கா²பதே³ஸு யம் வத்தப்³ப³ம் ஸியா, தம் ஸப்³ப³ம் அனியதத்³வயே வுத்தனயமேவ. யதா² ச ஸபோ⁴ஜனஸிக்கா²பத³ம், ஏவமேதானிபி பட²மபாராஜிகஸமுட்டா²னானேவாதி.

ரஹோபடிச்ச²ன்னஸிக்கா²பத³ம் சதுத்த²ம், ரஹோனிஸஜ்ஜஸிக்கா²பத³ம் பஞ்சமம்.

6. சாரித்தஸிக்கா²பத³வண்ணனா

294. ச²ட்ட²ஸிக்கா²பதே³ – தே³தா²வுஸோ ப⁴த்தந்தி ஏத்த² தம் கிர ப⁴த்தம் அபி⁴ஹடம் அஹோஸி, தஸ்மா ஏவமாஹம்ஸு. அனபி⁴ஹடே பன ஏவம் வத்தும் ந லப்³ப⁴தி, பயுத்தவாசா ஹோதி.

295. தேன ஹி பி⁴க்க²வே படிக்³க³ஹேத்வா நிக்கி²பதா²தி இத³ம் பன ப⁴க³வா குலஸ்ஸ ஸத்³தா⁴னுரக்க²ணத்தா²ய ஆஹ. யதி³ ‘‘பா⁴ஜேத்வா கா²த³தா²’’தி வதே³ய்ய, மனுஸ்ஸானம் பஸாத³ஞ்ஞத²த்தம் ஸியா. உஸ்ஸாரியித்தா²தி படிஹரியித்த²; க⁴ரம்யேவ நம் க³ஹேத்வா அக³மம்ஸூதி வுத்தம் ஹோதி.

298. ஸந்தம் பி⁴க்கு²ந்தி ஏத்த² கித்தாவதா ஸந்தோ ஹோதி, கித்தாவதா அஸந்தோதி? அந்தோவிஹாரே யத்த² டி²தஸ்ஸ குலானி பயிருபாஸனசித்தம் உப்பன்னம், ததோ பட்டா²ய யம் பஸ்ஸே வா அபி⁴முகே² வா பஸ்ஸதி, யஸ்ஸ ஸக்கா ஹோதி பகதிவசனேன ஆரோசேதும், அயம் ஸந்தோ நாம. இதோ சிதோ ச பரியேஸித்வா ஆரோசனகிச்சம் நாம நத்தி². யோ ஹி ஏவம் பரியேஸிதப்³போ³, ஸோ அஸந்தோயேவ. அபிச அந்தோஉபசாரஸீமாய பி⁴க்கு²ம் தி³ஸ்வா ஆபுச்சி²ஸ்ஸாமீதி க³ந்த்வா தத்த² யம் பஸ்ஸதி, ஸோ ஆபுச்சி²தப்³போ³. நோ சே பஸ்ஸதி, அஸந்தம் பி⁴க்கு²ம் அனாபுச்சா² பவிட்டோ² நாம ஹோதி.

302. அந்தராராமந்தி அந்தோகா³மே விஹாரோ ஹோதி, தம் க³ச்ச²தி. ப⁴த்தியக⁴ரந்தி நிமந்திதக⁴ரம் வா ஸலாகப⁴த்தாதி³தா³யகானம் வா க⁴ரம். ஆபதா³ஸூதி ஜீவிதப்³ரஹ்மசரியந்தராயேஸு ஸதி க³ந்தும் வட்டதி. ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரயம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சாரித்தஸிக்கா²பத³ம் ச²ட்ட²ம்.

7. மஹானாமஸிக்கா²பத³வண்ணனா

303. ஸத்தமஸிக்கா²பதே³ – மஹானாமோ நாம ப⁴க³வதோ சூளபிதுபுத்தோ மாஸமத்தேன மஹல்லகதரோ த்³வீஸு ப²லேஸு பதிட்டி²தோ அரியஸாவகோ. பே⁴ஸஜ்ஜம் உஸ்ஸன்னம் ஹோதீதி வஜதோ ஆஹரித்வா ட²பிதஸப்பி ப³ஹு ஹோதி.

306. ஸாதி³தப்³பா³தி தஸ்மிம் ஸமயே ரோகோ³ நத்தீ²தி ந படிக்கி²பிதப்³பா³; ரோகே³ ஸதி விஞ்ஞாபேஸ்ஸாமீதி அதி⁴வாஸேதப்³பா³. ஏத்தகேஹி பே⁴ஸஜ்ஜேஹி பவாரேமீதி நாமவஸேன ஸப்பிதேலாதீ³ஸு த்³வீஹி தீஹி வா பரிமாணவஸேன பத்தே²ன நாளியா ஆள்ஹகேனாதி வா.அஞ்ஞம் பே⁴ஸஜ்ஜம் விஞ்ஞாபேதீதி ஸப்பினா பவாரிதோ தேலம் விஞ்ஞாபேதி, ஆள்ஹகேன பவாரிதோ தோ³ணம். ந பே⁴ஸஜ்ஜேன கரணீயேனாதி மிஸ்ஸகப⁴த்தேனபி சே யாபேதும் ஸக்கோதி, ந பே⁴ஸஜ்ஜகரணீயம் நாம ஹோதி.

310. பவாரிதானந்தி யே அத்தனோ புக்³க³லிகாய பவாரணாய பவாரிதா; தேஸம் பவாரிதானுரூபேன விஞ்ஞத்தியா அனாபத்தி. ஸங்க⁴வஸேன பவாரிதேஸு பன பமாணம் ஸல்லக்கே²தப்³ப³மேவாதி. ஸேஸம் உத்தானமேவ.

ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

மஹானாமஸிக்கா²பத³ம் ஸத்தமம்.

8. உய்யுத்தஸேனாஸிக்கா²பத³வண்ணனா

311. அட்ட²மே – அப்³பு⁴ய்யாதோதி அபி⁴உய்யாதோ; பரஸேனம் அபி⁴முகோ² க³மிஸ்ஸாமீதி நக³ரதோ நிக்³க³தோதி அத்தோ². உய்யுத்தந்தி கதஉய்யோக³ம்; கா³மதோ நிக்க²ந்தந்தி அத்தோ².

314. த்³வாத³ஸபுரிஸோ ஹத்தீ²தி சத்தாரோ ஆரோஹகா ஏகேகபாத³ரக்க²கா த்³வே த்³வேதி ஏவம் த்³வாத³ஸபுரிஸோ ஹோதி. திபுரிஸோ அஸ்ஸோதி ஏகோ ஆரோஹகோ த்³வே பாத³ரக்க²காதி ஏவம் திபுரிஸோ ஹோதி. சதுபுரிஸோ ரதோ²தி ஏகோ ஸாரதி² ஏகோ யோதோ⁴ த்³வே ஆணிரக்க²காதி ஏவம் சதுபுரிஸோ ஹோதி. சத்தாரோ புரிஸா ஸரஹத்தா²தி ஆவுத⁴ஹத்தா² சத்தாரோ புரிஸாதி அயம் பச்சி²மகோடியா சதுரங்க³ஸமன்னாக³தா ஸேனா நாம. ஈதி³ஸம் ஸேனம் த³ஸ்ஸனாய க³ச்ச²தோ பதே³ பதே³ து³க்கடம். த³ஸ்ஸனூபசாரம் விஜஹித்வாதி கேனசி அந்தரிதா வா நின்னம் ஓருள்ஹா வா ந தி³ஸ்ஸதி; இத⁴ ட²த்வா ந ஸக்கா த³ட்டு²ந்தி அஞ்ஞம் டா²னம் க³ந்த்வா பஸ்ஸதோ பயோகே³ பயோகே³ பாசித்தியந்தி அத்தோ².

315. ஏகமேகந்தி ஹத்தி²ஆதீ³ஸு சதூஸு அங்கே³ஸு ஏகமேகம்; அந்தமஸோ ஏகபுரிஸாருள்ஹகஹத்தி²ம்பி ஏகம்பி ஸரஹத்த²ம் புரிஸம். அனுய்யுத்தா நாம ராஜா உய்யானம் வா நதி³ம் வா க³ச்ச²தி; ஏவம் அனுய்யுத்தா ஹோதி.

316. ஆபதா³ஸூதி ஜீவிதப்³ரஹ்மசரியந்தராயேஸு ஸதி ஏத்த² க³தோ முஞ்சிஸ்ஸாமீதி க³ச்ச²தோ அனாபத்தி. ஸேஸமேத்த² உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், லோகவஜ்ஜம், காயகம்மம், அகுஸலசித்தம், திவேத³னந்தி.

உய்யுத்தஸேனாஸிக்கா²பத³ம் அட்ட²மம்.

9. ஸேனாவாஸஸிக்கா²பத³வண்ணனா

319. நவமே – அத்த²ங்க³தே ஸூரியே ஸேனாய வஸதீதி திட்ட²து வா நிஸீத³து வா ஸயது வா ஸசேபி ஆகாஸே இத்³தி⁴யா கஞ்சி இரியாபத²ம் கப்பேதி, பாசித்தியமேவ. ஸேனா வா படிஸேனாய ருத்³தா⁴ ஹோதீதி யதா² ஸஞ்சாரோ சி²ஜ்ஜதி; ஏவம் ருத்³தா⁴ ஹோதி. பலிபு³த்³தோ⁴தி வேரிகேன வா இஸ்ஸரேன வா ருத்³தோ⁴. ஸேஸம் உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

ஸேனாவாஸஸிக்கா²பத³ம் நவமம்.

10. உய்யோதி⁴கஸிக்கா²பத³வண்ணனா

322. த³ஸமே – உக்³க³ந்த்வா உக்³க³ந்த்வா ஏத்த² யுஜ்ஜ²ந்தீதி உய்யோதி⁴கம்; ஸம்பஹாரட்டா²னஸ்ஸேதம் அதி⁴வசனம். ப³லஸ்ஸ அக்³க³ம் ஜானந்தி ஏத்தா²தி ப³லக்³க³ம்; ப³லக³ணனட்டா²னந்தி அத்தோ². ஸேனாய வியூஹம் ஸேனாப்³யூஹம்; ஸேனானிவேஸஸ்ஸேதம் அதி⁴வசனம். தயோ ஹத்தீ² பச்சி²மம் ஹத்தா²னீகந்தி யோ புப்³பே³ வுத்தோ த்³வாத³ஸபுரிஸோ ஹத்தீ²தி தேன ஹத்தி²னா தயோ ஹத்தீ². ஸேஸேஸுபி ஏஸேவ நயோ. ஸேஸம் உய்யுத்தஸேனாஸிக்கா²பதே³ வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹீதி.

உய்யோதி⁴கஸிக்கா²பத³ம் த³ஸமம்.

ஸமத்தோ வண்ணனாக்கமேன அசேலகவக்³கோ³ பஞ்சமோ.