6. ஸுராபானவக்³கோ³

1. ஸுராபானஸிக்கா²பத³வண்ணனா

326. ஸுராபானவக்³க³ஸ்ஸ பட²மஸிக்கா²பதே³ – ப⁴த்³த³வதிகாதி ஏகோ கா³மோ, ஸோ ப⁴த்³தி³காய வதியா ஸமன்னாக³தத்தா ஏதம் நாம லபி⁴. பதா²வினோதி அத்³தி⁴கா. தேஜஸா தேஜந்தி அத்தனோ தேஜஸா ஆனுபா⁴வேன நாக³ஸ்ஸ தேஜம். காபோதிகாதி கபோதபாத³ஸமவண்ணரத்தோபா⁴ஸா. பஸன்னாதி ஸுராமண்ட³ஸ்ஸேதம் அதி⁴வசனம். அனனுச்ச²வியம் பி⁴க்க²வே ஸாக³தஸ்ஸாதி பஞ்சாபி⁴ஞ்ஞஸ்ஸ ஸதோ மஜ்ஜபானம் நாம ந அனுச்ச²வியந்தி வுத்தம் ஹோதி.

328. புப்பா²ஸவோ நாம மது⁴கபுப்பா²தீ³னம் ரஸேன கதோ. ப²லாஸவோ நாம முத்³தி³கப²லாதீ³னி மத்³தி³த்வா தேஸம் ரஸேன கதோ. மத்⁴வாஸவோ நாம முத்³தி³கானம் ஜாதிரஸேன கதோ; மக்கி²கமது⁴னாபி கரியதீதி வத³ந்தி. கு³ளாஸவோ நாம உச்சு²ரஸாதீ³ஹி கரியதி. ஸுரா நாம பிட்ட²கிண்ணபக்கி²த்தா; நாளிகேராதீ³னம்பி ரஸேன கதா ஸுராத்வேவ ஸங்க்²யம் க³ச்ச²தி, தஸ்ஸாயேவ கிண்ணபக்கி²த்தாய மண்டே³ க³ஹிதே மேரயோத்வேவ ஸங்க்²யம் க³ச்ச²தீதி வத³ந்தி. அந்தமஸோ குஸக்³கே³னபி பிவதீதி ஏதம் ஸுரம் வா மேரயம் வா பீ³ஜதோ பட்டா²ய குஸக்³கே³ன பிவதோபி பாசித்தியந்தி அத்தோ². ஏகேன பன பயோகே³ன ப³ஹும்பி பிவந்தஸ்ஸ ஏகா ஆபத்தி. விச்சி²ந்தி³த்வா விச்சி²ந்தி³த்வா பிவதோ பயோக³க³ணனாய ஆபத்தியோ.

329. அமஜ்ஜஞ்ச ஹோதி மஜ்ஜவண்ணம் மஜ்ஜக³ந்த⁴ம் மஜ்ஜரஸந்தி லோணஸோவீரகம் வா ஸுத்தம் வா ஹோதி. ஸூபஸம்பாகேதி வாஸகா³ஹாபனத்த²ம் ஈஸகம் மஜ்ஜம் பக்கி²பித்வா ஸூபம் பசந்தி, தஸ்மிம் அனாபத்தி. மம்ஸஸம்பாகேபி ஏஸேவ நயோ. தேலம் பன வாதபே⁴ஸஜ்ஜத்த²ம் மஜ்ஜேன ஸத்³தி⁴ம் பசந்தி, தஸ்மிம்பி அனதிக்கி²த்தமஜ்ஜேயேவ அனாபத்தி, யம் பன அதிக்கி²த்தமஜ்ஜம் ஹோதி, ஏத்த² மஜ்ஜஸ்ஸ வண்ணக³ந்த⁴ரஸா பஞ்ஞாயந்தி, தஸ்மிம் ஆபத்தியேவ. அமஜ்ஜம் அரிட்ட²ந்தி யோ அரிட்டோ² மஜ்ஜம் ந ஹோதி, தஸ்மிம் அனாபத்தி. ஆமலகாதீ³னம்யேவ கிர ரஸேன அரிட்ட²ம் கரோந்தி, ஸோ மஜ்ஜவண்ணக³ந்த⁴ரஸோயேவ ஹோதி, ந ச மஜ்ஜம்; தம் ஸந்தா⁴யேதம் வுத்தம். யோ பன ஸம்பா⁴ரபக்கி²த்தோ, ஸோ மஜ்ஜம் ஹோதி, பீ³ஜதோ பட்டா²ய ந வட்டதி. ஸேஸமேத்த² உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், லோகவஜ்ஜம், காயகம்மம் அகுஸலசித்தம், திவேத³னந்தி. வத்து²அஜானனதாய சேத்த² அசித்தகதா வேதி³தப்³பா³, அகுஸலேனேவ பாதப்³ப³தாய லோகவஜ்ஜதாதி.

ஸுராபானஸிக்கா²பத³ம் பட²மம்.

2. அங்கு³லிபதோத³கஸிக்கா²பத³வண்ணனா

330. து³தியே – அங்கு³லிபதோத³கேனாதி அங்கு³லீஹி உபகச்ச²காதி³க⁴ட்டனம் வுச்சதி. உத்தஸந்தோதி அதிஹாஸேன கிலமந்தோ. அனஸ்ஸாஸகோதி உபச்சி²ன்னஅஸ்ஸாஸபஸ்ஸாஸஸஞ்சாரோ ஹுத்வா. அனுபஸம்பன்னம் காயேன காயந்தி ஏத்த² பி⁴க்கு²னீபி அனுபஸம்பன்னட்டா²னே டி²தா, தம்பி கி²ட்³டா³தி⁴ப்பாயேன பு²ஸந்தஸ்ஸ து³க்கடம். ஸேஸமேத்த² உத்தானமேவ.

பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், த்³விவேத³னந்தி.

அங்கு³லிபதோத³கஸிக்கா²பத³ம் து³தியம்.

3. ஹஸத⁴ம்மஸிக்கா²பத³வண்ணனா

335. ததியே – அப்பகதஞ்ஞுனோதி யம் ப⁴க³வதா பகதம் பஞ்ஞத்தம், தம் ந ஜானந்தீதி அத்தோ².

336. உத³கே ஹஸத⁴ம்மேதி உத³ககீளிகா வுச்சதி. உபரிகோ³ப்ப²கேதி கோ³ப்ப²கானம் உபரிபா⁴க³ப்பமாணே. ஹஸாதி⁴ப்பாயோதி கீளாதி⁴ப்பாயோ. நிமுஜ்ஜதி வாதிஆதீ³ஸு நிமுஜ்ஜனத்தா²ய ஓரோஹந்தஸ்ஸ பத³வாரே பத³வாரே து³க்கடம். நிமுஜ்ஜனும்முஜ்ஜனேஸு பயோகே³ பயோகே³ பாசித்தியம். நிமுஜ்ஜித்வா அந்தோஉத³கேயேவ க³ச்ச²ந்தஸ்ஸ ஹத்த²வாரபத³வாரேஸு ஸப்³ப³த்த² பாசித்தியம். பலவதீதி தரதி. ஹத்தே²ஹி தரந்தஸ்ஸ ஹத்த²வாரே ஹத்த²வாரே பாசித்தியம். பாதே³ஸுபி ஏஸேவ நயோ. யேன யேன அங்கே³ன தரதி, தஸ்ஸ தஸ்ஸ பயோகே³ பயோகே³ பாசித்தியம். தீரதோ வா ருக்க²தோ வா உத³கே பததி, பாசித்தியமேவ. நாவாய கீளதீதி பி²யாரித்தாதீ³ஹி நாவம் பாஜேந்தோ வா தீரே உஸ்ஸாரேந்தோ வா நாவாய கீளதி, து³க்கடம்.

ஹத்தே²ன வாதிஆதீ³ஸுபி பயோகே³ பயோகே³ து³க்கடம். கேசி ஹத்தே²ன உத³கே கி²த்தாய கத²லாய பதனுப்பதனவாரேஸு து³க்கடம் வத³ந்தி, தம் ந க³ஹேதப்³ப³ம். தத்த² ஹி ஏகபயோக³த்தா ஏகமேவ து³க்கடம், அபிச உபரிகோ³ப்ப²கே வுத்தானி உம்முஜ்ஜனாதீ³னி ட²பேத்வா அஞ்ஞேன யேன கேனசி ஆகாரேன உத³கம் ஓதரித்வா வா அனோதரித்வா வா யத்த² கத்த²சி டி²தம் உத³கம் அந்தமஸோ பி³ந்து³ம் க³ஹேத்வா கி²பனகீளாயபி கீளந்தஸ்ஸ து³க்கடமேவ, அத்த²ஜோதகம் பன அக்க²ரம் லிகி²தும் வட்டதி, அயமேத்த² வினிச்ச²யோ. ஸேஸமேத்த² உத்தானமேவ.

பட²மபாராஜிகஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், திவேத³னந்தி.

ஹஸத⁴ம்மஸிக்கா²பத³ம் ததியம்.

4. அனாத³ரியஸிக்கா²பத³வண்ணனா

342. சதுத்தே² – கதா²யம் நஸ்ஸேய்யாதி கத²ம் அயம் த⁴ம்மோ தந்தி பவேணீ நஸ்ஸேய்ய. தம் வா ந ஸிக்கி²துகாமோதி யேன பஞ்ஞத்தேன வுச்சதி, தம் பஞ்ஞத்தம் ந ஸிக்கி²துகாமோ. அபஞ்ஞத்தேனாதி ஸுத்தே வா அபி⁴த⁴ம்மே வா ஆக³தேன.

344. ஏவம் அம்ஹாகம் ஆசரியானம் உக்³க³ஹோதி ஏத்த² கா³ரய்ஹோ ஆசரியுக்³க³ஹோ ந க³ஹேதப்³போ³; பவேணியா ஆக³தோ ஆசரியுக்³க³ஹோவ க³ஹேதப்³போ³. குருந்தி³யம் பன ‘‘லோகவஜ்ஜே ஆசரியுக்³க³ஹோ ந வட்டதி, பண்ணத்திவஜ்ஜே பன வட்டதீ’’தி வுத்தம். மஹாபச்சரியம் ‘‘ஸுத்தம் ஸுத்தானுலோமஞ்ச உக்³க³ஹிதகானம்யேவ ஆசரியானம் உக்³க³ஹோ பமாணம், அஜானந்தானம் கதா² அப்பமாணந்தி வுத்தம். தம் ஸப்³ப³ம் பவேணியா ஆக³தேஸமோதா⁴னம் க³ச்ச²தி. ஸேஸம் உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

அனாத³ரியஸிக்கா²பத³ம் சதுத்த²ம்.

5. பி⁴ம்ஸாபனஸிக்கா²பத³வண்ணனா

345. பஞ்சமே – ரூபூபஹாராத³யோ மனுஸ்ஸவிக்³க³ஹே வுத்தனயேனேவ வேதி³தப்³பா³. ஸேஸம் உத்தானமேவ. ஸமுட்டா²னாதீ³னி அனாத³ரியஸதி³ஸானேவாதி.

பி⁴ம்ஸாபனஸிக்கா²பத³ம் பஞ்சமம்.

6. ஜோதிஸிக்கா²பத³வண்ணனா

350. ச²ட்டே² – ப⁴க்³கா³தி ஜனபத³ஸ்ஸ நாமம். ஸம்ஸுமாரகி³ரந்தி நக³ரஸ்ஸ. பே⁴ஸகளாவனந்தி தன்னிஸ்ஸிதவனஸ்ஸ. தம் பன மிகா³னம் பா²ஸுவிஹாரத்தா²ய தி³ன்னத்தா மிக³தா³யோதி வுச்சதி. ஸமாத³ஹித்வாதி ஜாலேத்வா. பரிபாதேஸீதி அனுப³ந்தி⁴.

352. பதீ³பேபீதி பதீ³புஜ்ஜலனேபி. ஜோதிகேபீதி பத்தபசனஸேத³கம்மாதீ³ஸு ஜோதிகரணே. ததா²ரூபபச்சயாதி பதீ³பாதி³பச்சயா.

354-5. ஸயம் ஸமாத³ஹதீதி ஏத்த² ஜோதிம் ஸமாத³ஹிதுகாமதாய அரணிஸண்ட²பனதோ பட்டா²ய யாவ ஜாலா ந உட்ட²ஹதி, தாவ ஸப்³ப³பயோகே³ஸு து³க்கடம். படிலாதம் உக்கி²பதீதி த³ய்ஹமானம் அலாதம் பதிதம் உக்கி²பதி, புன யதா²டா²னே ட²பேதீதி அத்தோ². ஏவம் அவிஜ்ஜா²தம் உக்கி²பித்வா பக்கி²பந்தஸ்ஸேவ து³க்கடம், விஜ்ஜா²தம் புன ஜாலாபேந்தஸ்ஸ பாசித்தியமேவ.

356. ததா²ரூபபச்சயாதி ட²பேத்வா பதீ³பாதீ³னி அஞ்ஞேனபி ததா²ரூபேன பச்சயேன ஸமாத³ஹந்தஸ்ஸ அனாபத்தி. ஆபதா³ஸூதி து³ட்ட²வாளமிக³அமனுஸ்ஸேஹி உபத்³த³வோ ஹோதி, தத்த² ஸமாத³ஹந்தஸ்ஸாபி அனாபத்தி. ஸேஸம் உத்தானமேவாதி. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஜோதிஸிக்கா²பத³ம் ச²ட்ட²ம்.

7. நஹானஸிக்கா²பத³வண்ணனா

364. ஸத்தமே – சுண்ணேன வா மத்திகாய வாதி ஏத்த² சுண்ணமத்திகானம் அபி⁴ஸங்க²ரணகாலதோ பட்டா²ய ஸப்³ப³பயோகே³ஸு து³க்கடம்.

366. பாரம் க³ச்ச²ந்தோ ந்ஹாயதீதி ஏத்த² ஸுக்கா²ய நதி³யா வாலிகம் உக்கிரித்வா கதஆவாடகேஸுபி ந்ஹாயிதும் வட்டதி. ஆபதா³ஸூதி ப⁴மராதீ³ஹி அனுப³த்³த⁴ஸ்ஸ உத³கே நிமுஜ்ஜிதும் வட்டதீதி. ஸேஸமேத்த² உத்தானமேவ. ஏளகலோமஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

நஹானஸிக்கா²பத³ம் ஸத்தமம்.

8. து³ப்³ப³ண்ணகரணஸிக்கா²பத³வண்ணனா

368-9. அட்ட²மே – நவம் பன பி⁴க்கு²னா சீவரலாபே⁴னாதி ஏத்த² அலபீ⁴தி லபோ⁴; லபோ⁴யேவ லாபோ⁴. கிம் அலபி⁴? சீவரம். கீதி³ஸம்? நவம். இதி ‘‘நவசீவரலாபே⁴னா’’தி வத்தப்³பே³ அனுனாஸிகலோபம் அகத்வா ‘‘நவசீவரலாபே⁴னா’’தி வுத்தம்; படிலத்³த⁴னவசீவரேனாதி அத்தோ². மஜ்ஜே² டி²தபத³த்³வயே பனாதி நிபாதோ. பி⁴க்கு²னாதி யேன லத்³த⁴ம் தஸ்ஸ நித³ஸ்ஸனம். பத³பா⁴ஜனே பன ப்³யஞ்ஜனம் அனாதி³யித்வா யம் லத்³த⁴ம் தம் த³ஸ்ஸேதும் ‘‘சீவரம் நாம ச²ன்னம் சீவரான’’ந்திஆதி³ வுத்தம். சீவரந்தி ஏத்த² யம் நிவாஸேதும் வா பாருபிதும் வா ஸக்கா ஹோதி, ததே³வ வேதி³தப்³ப³ம். தேனேவ ‘‘விகப்பனுபக³பச்சி²ம’’ந்தி ந வுத்தம். கம்ஸனீலந்தி சம்மகாரனீலம். மஹாபச்சரியம் பன ‘‘அயோமலம் லோஹமலம் ஏதம் கம்ஸனீலம் நாமா’’தி வுத்தம். பலாஸனீலந்தி யோ கோசி நீலவண்ணோ பண்ணரஸோ. து³ப்³ப³ண்ணகரணம் ஆதா³தப்³ப³ந்தி ஏதம் கப்பபி³ந்து³ம் ஸந்தா⁴ய வுத்தம்; ந நீலாதீ³ஹி ஸகலசீவரஸ்ஸ து³ப்³ப³ண்ணகரணம். தஞ்ச பன கப்பம் ஆதி³யந்தேன சீவரம் ரஜித்வா சதூஸு வா கோணேஸு தீஸு வா த்³வீஸு வா ஏகஸ்மிம் வா கோணே மோரஸ்ஸ அக்கி²மண்ட³லமத்தம் வா மங்குலபிட்டி²மத்தம் வா ஆதா³தப்³ப³ம். மஹாபச்சரியம் ‘‘பத்தே வா க³ண்டி²யம் வா ந வட்டதீ’’தி வுத்தம். மஹாஅட்ட²கதா²யம் பன ‘‘வட்டதியேவா’’தி வுத்தம். பாளிகப்பகண்ணிககப்பாத³யோ பன ஸப்³ப³த்த² படிஸித்³தா⁴, தஸ்மா ட²பேத்வா ஏகம் வட்டபி³ந்து³ம் அஞ்ஞேன கேனசிபி விகாரேன கப்போ ந காதப்³போ³.

371. அக்³க³ளேதிஆதீ³ஸு ஏதானி அக்³க³ளாதீ³னி கப்பகதசீவரே பச்சா² ஆரோபேத்வா கப்பகரணகிச்சம் நத்தி². ஸேஸம் உத்தானமேவ. ஏளகலோமஸமுட்டா²னம் – கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம்; காயகம்மம், திசித்தம், திவேத³னந்தி.

து³ப்³ப³ண்ணகரணஸிக்கா²பத³ம் அட்ட²மம்.

9. விகப்பனஸிக்கா²பத³வண்ணனா

374. நவமே – தஸ்ஸ வா அதி³ன்னந்தி சீவரஸாமிகஸ்ஸ ‘‘பரிபு⁴ஞ்ஜ வா விஸ்ஸஜ்ஜேஹி வா யதா²பச்சயம் வா கரோஹீ’’தி ஏவம் வத்வா அதி³ன்னம். தஸ்ஸ வா அவிஸ்ஸஸந்தோதி யேன வினயகம்மம் கதம், தஸ்ஸ அவிஸ்ஸாஸேன வா. தேன பன தி³ன்னம் வா தஸ்ஸ விஸ்ஸாஸேன வா பரிபு⁴ஞ்ஜந்தஸ்ஸ அனாபத்தி. ஸேஸமேத்த² திம்ஸகவண்ணனாயம் வுத்தனயத்தா உத்தானமேவாதி. கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

விகப்பனஸிக்கா²பத³ம் நவமம்.

10. சீவராபனிதா⁴னஸிக்கா²பத³வண்ணனா

377-81. த³ஸமே – அபனிதே⁴ந்தீதி அபனேத்வா நிதே⁴ந்தி. ஹஸாபேக்கோ²தி ஹஸாதி⁴ப்பாயோ. அஞ்ஞம் பரிக்கா²ரந்தி பாளியா அனாக³தம் பத்தத்த²விகாதி³ம். த⁴ம்மிம் கத²ம் கத்வாதி ‘‘ஸமணேன நாம அனிஹிதபரிக்கா²ரேன ப⁴விதும் ந வட்டதீ’’தி ஏவம் த⁴ம்மகத²ம் கதே²த்வா த³ஸ்ஸாமீதி நிக்கி²பதோ அனாபத்தி. ஸேஸமேத்த² உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், திவேத³னந்தி.

சீவராபனிதா⁴னஸிக்கா²பத³ம் த³ஸமம்.

ஸமத்தோ வண்ணனாக்கமேன ஸுராபானவக்³கோ³ ச²ட்டோ².