7. ஸப்பாணகவக்³கோ³

1. ஸஞ்சிச்சபாணஸிக்கா²பத³வண்ணனா

382. ஸப்பாணகவக்³க³ஸ்ஸ பட²மஸிக்கா²பதே³ – இஸ்ஸாஸோ ஹோதீதி கி³ஹிகாலே த⁴னுக்³க³ஹாசரியோ ஹோதி. ஜீவிதா வோரோபிதாதி ஜீவிதா வியோஜிதா.

ஸிக்கா²பதே³பி வோரோபேய்யாதி வியோஜேய்ய. யஸ்மா பன வோஹாரமத்தமேவேதம்; ந ஹேத்த² கிஞ்சி வியோஜிதே ஸீஸாலங்காரே ஸீஸம் விய ஜீவிதா வோரோபிதே பாணேபி ஜீவிதம் நாம விஸும் திட்ட²தி, அஞ்ஞத³த்து² அந்தரதா⁴னமேவ க³ச்ச²தி, தஸ்மா தமத்த²ம் த³ஸ்ஸேதும் பத³பா⁴ஜனே ‘‘ஜீவிதிந்த்³ரியம் உபச்சி²ந்த³தீ’’திஆதி³ வுத்தம். இமஸ்மிஞ்ச ஸிக்கா²பதே³ திரச்சா²னக³தோயேவ ‘‘பாணோ’’தி வேதி³தப்³போ³. தம் கு²த்³த³கம்பி மஹந்தம்பி மாரேந்தஸ்ஸ ஆபத்தினானாகரணம் நத்தி². மஹந்தே பன உபக்கமமஹந்தத்தா அகுஸலமஹத்தம் ஹோதி. பாணே பாணஸஞ்ஞீதி அந்தமஸோ மஞ்சபீட²ம் ஸோதே⁴ந்தோ மங்கு³லபீ³ஜகேபி பாணஸஞ்ஞீ நிக்காருணிகதாய தம் பி⁴ந்த³ந்தோ அபனேதி, பாசித்தியம். தஸ்மா ஏவரூபேஸு டா²னேஸு காருஞ்ஞம் உபட்ட²பேத்வா அப்பமத்தேன வத்தம் காதப்³ப³ம். ஸேஸம் மனுஸ்ஸவிக்³க³ஹே வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹீதி.

ஸஞ்சிச்சபாணஸிக்கா²பத³ம் பட²மம்.

2. ஸப்பாணகஸிக்கா²பத³வண்ணனா

387. து³தியே – ஸப்பாணகந்தி யே பாணகா பரிபோ⁴கே³ன மரந்தி, தேஹி பாணகேஹி ஸப்பாணகம், தாதி³ஸஞ்ஹி ஜானம் பரிபு⁴ஞ்ஜதோ பயோகே³ பயோகே³ பாசித்தியம். பத்தபூரம்பி அவிச்சி²ந்தி³த்வா ஏகபயோகே³ன பிவதோ ஏகா ஆபத்தி. தாதி³ஸேன உத³கேன ஸாமிஸம் பத்தம் ஆவிஞ்சி²த்வா தோ⁴வதோபி தாதி³ஸே உத³கே உண்ஹயாகு³பத்தம் நிப்³பா³பயதோபி தம் உத³கம் ஹத்தே²ன வா உளுங்கேன வா க³ஹேத்வா ந்ஹாயதோபி பயோகே³ பயோகே³ பாசித்தியம். உத³கஸோண்டி³ம் வா போக்க²ரணிம் வா பவிஸித்வா ப³ஹினிக்க²மனத்தா²ய வீசிம் உட்டா²பயதோபி. ஸோண்டி³ம் வா போக்க²ரணிம் வா ஸோதே⁴ந்தேஹி ததோ க³ஹிதஉத³கம் உத³கேயேவ ஆஸிஞ்சிதப்³ப³ம். ஸமீபம்ஹி உத³கே அஸதி கப்பியஉத³கஸ்ஸ அட்ட² வா த³ஸ வா க⁴டே உத³கஸண்டா²னகப்பதே³ஸே ஆஸிஞ்சித்வா தத்த² ஆஸிஞ்சிதப்³ப³ம். ‘‘பவட்டித்வா உத³கே பதிஸ்ஸதீ’’தி உண்ஹபாஸாணே உத³கம் நாஸிஞ்சிதப்³ப³ம். கப்பியஉத³கேன பன பாஸாணம் நிப்³பா³பேத்வா ஆஸிஞ்சிதும் வட்டதி. ஸேஸமேத்த² உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம்,

வசீகம்மம், திசித்தம், திவேத³னந்தி. ஏத்த² ச படங்க³பாணகானம் பதனம் ஞத்வாபி ஸுத்³த⁴சித்ததாய தீ³பஜாலனே விய ஸப்பாணகபா⁴வம் ஞத்வாபி உத³கஸஞ்ஞாய பரிபு⁴ஞ்ஜிதப்³ப³தோ பண்ணத்திவஜ்ஜதா வேதி³தப்³பா³தி.

ஸப்பாணகஸிக்கா²பத³ம் து³தியம்.

3. உக்கோடனஸிக்கா²பத³வண்ணனா

392. ததியஸிக்கா²பதே³ – உக்கோடேந்தீதி தஸ்ஸ தஸ்ஸ பி⁴க்கு²னோ ஸந்திகம் க³ந்த்வா ‘‘அகதம் கம்ம’’ந்திஆதீ³னி வத³ந்தா உச்சாலேந்தி; யதா²பதிட்டி²தபா⁴வேன பதிட்டா²தும் ந தே³ந்தி.

393. யதா²த⁴ம்மந்தி யோ யஸ்ஸ அதி⁴கரணஸ்ஸ வூபஸமனாய த⁴ம்மோ வுத்தோ, தேனேவ த⁴ம்மேனாதி அத்தோ². நிஹதாதி⁴கரணந்தி நிஹதம் அதி⁴கரணம்; ஸத்தா²ரா வுத்தத⁴ம்மேனேவ வூபஸமிதம் அதி⁴கரணந்தி அத்தோ².

395. த⁴ம்மகம்மே த⁴ம்மகம்மஸஞ்ஞீதி யேன கம்மேன தம் அதி⁴கரணம் வூபஸமிதம், தஞ்சே த⁴ம்மகம்மம் ஹோதி, தஸ்மிம் த⁴ம்மகம்மே அயம்பி த⁴ம்மகம்மஸஞ்ஞீ ஹுத்வா யதி³ உக்கோடேதி, பாசித்தியம் ஆபஜ்ஜதீதி அத்தோ². ஏதேன நயேன ஸேஸபதா³னிபி வேதி³தப்³பா³னி. அயமேத்த² ஸங்கே²போ, வித்தா²ரோ பன ‘‘இமேஸம் சதுன்னம் அதி⁴கரணானம் கதி உக்கோடனா’’திஆதி³னா நயேன பரிவாரே வுத்தோ. அட்ட²கதா²ஸு தம் ஸப்³ப³ம் ஆஹரித்வா தஸ்ஸேவத்தோ² வண்ணிதோ. மயம் பன தம் தத்தே²வ வண்ணயிஸ்ஸாம. இத⁴ ஆஹரித்வா வண்ணியமானே ஹி ஸுட்டு²தரம் ஸம்மோஹோ ப⁴வேய்யாதி ந வண்ணயிம்ஹ. ஸேஸமேத்த² உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

உக்கோடனஸிக்கா²பத³ம் ததியம்.

4. து³ட்டு²ல்லஸிக்கா²பத³வண்ணனா

399. சதுத்தே² – து³ட்டு²ல்லா நாம ஆபத்தீதி ஏத்த² சத்தாரி பாராஜிகானி அத்து²த்³தா⁴ரவஸேன த³ஸ்ஸிதானி, ஸங்கா⁴தி³ஸேஸாபத்தி பன அதி⁴ப்பேதா, தம் சா²தே³ந்தஸ்ஸ பாசித்தியம். து⁴ரம் நிக்கி²த்தமத்தேதி து⁴ரே நிக்கி²த்தமத்தே. ஸசேபி து⁴ரம் நிக்கி²பித்வா பச்சா² ஆரோசேதி, ந ரக்க²தி; து⁴ரம் நிக்கி²த்தமத்தேயேவ பாசித்தியந்தி வுத்தம் ஹோதி. ஸசே பன ஏவம் து⁴ரம் நிக்கி²பித்வா படிச்சா²த³னத்த²மேவ அஞ்ஞஸ்ஸ ஆரோசேதி, ஸோபி அஞ்ஞஸ்ஸாதி ஏதேனுபாயேன ஸமணஸதம்பி ஸமணஸஹஸ்ஸம்பி ஆபத்திம் ஆபஜ்ஜதியேவ தாவ, யாவ கோடி ந சி²ஜ்ஜதி. கதா³ பன கோடி சி²ஜ்ஜதீதி? மஹாஸுமத்தே²ரோ தாவ வத³தி – ‘‘ஆபத்திம் ஆபன்னோ ஏகஸ்ஸ ஆரோசேதி, ஸோ படினிவத்தித்வா தஸ்ஸேவ ஆரோசேதி; ஏவம் கோடி சி²ஜ்ஜதீ’’தி. மஹாபது³மத்தே²ரோ பனாஹ – ‘‘அயஞ்ஹி வத்து²புக்³க³லோயேவ. ஆபத்திம் ஆபன்னோ பன ஏகஸ்ஸ பி⁴க்கு²னோ ஆரோசேதி, அயம் அஞ்ஞஸ்ஸ ஆரோசேதி, ஸோ படினிவத்தித்வா யேனஸ்ஸ ஆரோசிதம், தஸ்ஸேவ ஆரோசேதி; ஏவம் ததியேன புக்³க³லேன து³தியஸ்ஸ ஆரோசிதே கோடி சி²ன்னா ஹோதீ’’தி.

400. அது³ட்டு²ல்லம் ஆபத்திந்தி அவஸேஸே பஞ்சாபத்திக்க²ந்தே⁴. அனுபஸம்பன்னஸ்ஸ து³ட்டு²ல்லம் வா அது³ட்டு²ல்லம் வா அஜ்ஜா²சாரந்தி ஏத்த² அனுபஸம்பன்னஸ்ஸ ஸுக்கவிஸ்ஸட்டி² ச காயஸம்ஸக்³கோ³ சாதி அயம் து³ட்டு²ல்லஅஜ்ஜா²சாரோ நாம. ஸேஸமேத்த² உத்தானமேவாதி. து⁴ரனிக்கே²பஸமுட்டா²னம் – காயவாசாசித்ததோ ஸமுட்டா²தி, அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

து³ட்டு²ல்லஸிக்கா²பத³ம் சதுத்த²ம்.

5. ஊனவீஸதிவஸ்ஸஸிக்கா²பத³வண்ணனா

402. பஞ்சமஸிக்கா²பதே³ – அங்கு³லியோ து³க்கா² ப⁴விஸ்ஸந்தீதி அக்க²ரானி லிக²ந்தஸ்ஸ அங்கு³லியோ து³க்கா² ப⁴விஸ்ஸந்தீதி சிந்தேஸும். உரஸ்ஸ து³க்கோ²தி க³ணனம் ஸிக்க²ந்தேன ப³ஹும் சிந்தேதப்³ப³ம் ஹோதி, தேனஸ்ஸ உரோ து³க்கோ² ப⁴விஸ்ஸதீதி மஞ்ஞிம்ஸு. அக்கீ²னி து³க்கா² ப⁴விஸ்ஸந்தீதி ரூபஸுத்தம் ஸிக்க²ந்தேன கஹாபணா பரிவத்தேத்வா பரிவத்தேத்வா பஸ்ஸிதப்³பா³ ஹோந்தி, தேனஸ்ஸ அக்கீ²னி து³க்கா²னி ப⁴விஸ்ஸந்தீதி மஞ்ஞிம்ஸு. ட³ம்ஸாதீ³ஸு ட³ம்ஸாதி பிங்க³லமக்கி²காயோ. து³க்கா²னந்தி து³க்க²மானம். திப்³பா³னந்தி ப³ஹலானம். க²ரானந்தி திகி²ணானம். கடுகானந்தி ப²ருஸானம்; அமனாபதாய வா கடுகரஸஸதி³ஸானம். அஸாதானந்தி அமது⁴ரானம். பாணஹரானந்தி ஜீவிதஹரானம்.

404. ஸீமம் ஸம்மன்னதீதி நவம் ஸீமம் ப³ந்த⁴தி. குருந்தி³யம் பன உத³குக்கே²பபரிச்சி²ந்த³னேபி து³க்கடம் வுத்தம். பரிபுண்ணவீஸதிவஸ்ஸோதி படிஸந்தி⁴க்³க³ஹணதோ பட்டா²ய பரிபுண்ணவீஸதிவஸ்ஸோ; க³ப்³ப⁴வீஸோபி ஹி பரிபுண்ணவீஸதிவஸ்ஸோத்வேவ ஸங்க்²யே க³ச்ச²தி. யதா²ஹ –

‘‘தேன கோ² பன ஸமயேன ஆயஸ்மா குமாரகஸ்ஸபோ க³ப்³ப⁴வீஸோ உபஸம்பன்னோ ஹோதி. அத² கோ² ஆயஸ்மதோ குமாரகஸ்ஸபஸ்ஸ ஏதத³ஹோஸி – ‘ப⁴க³வதா பஞ்ஞத்தம், ந ஊனவீஸதிவஸ்ஸோ புக்³க³லோ உபஸம்பாதே³தப்³போ³தி. அஹஞ்சம்ஹி க³ப்³ப⁴வீஸோ உபஸம்பன்னோ. உபஸம்பன்னோ நுகோ²ம்ஹி, நனு கோ² உபஸம்பன்னோ’தி. ப⁴க³வதோ ஏதமத்த²ம் ஆரோசேஸும். யம் பி⁴க்க²வே மாதுகுச்சி²ம்ஹி பட²மம் சித்தம் உப்பன்னம், பட²மம் விஞ்ஞாணம் பாதுபூ⁴தம் தது³பாதா³ய ஸாவஸ்ஸ ஜாதி. அனுஜானாமி, பி⁴க்க²வே, க³ப்³ப⁴வீஸம் உபஸம்பாதே³து’’ந்தி (மஹாவ. 124).

தத்த² யோ த்³வாத³ஸமாஸே மாதுகுச்சி²ஸ்மிம் வஸித்வா மஹாபவாரணாய ஜாதோ, ஸோ ததோ பட்டா²ய யாவ ஏகூனவீஸதிமே வஸ்ஸே மஹாபவாரணா, தம் அதிக்கமித்வா பாடிபதே³ உபஸம்பாதே³தப்³போ³. ஏதேனுபாயேன ஹாயனவட்³ட⁴னம் வேதி³தப்³ப³ம்.

போராணகத்தே²ரா பன ஏகூனவீஸதிவஸ்ஸம் ஸாமணேரம் நிக்க²மனீயபுண்ணமாஸிம் அதிக்கம்ம பாடிபத³தி³வஸே உபஸம்பாதே³ந்தி, தம் கஸ்மாதி? வுச்சதே – ஏகஸ்மிம் வஸ்ஸே ச² சாதுத்³த³ஸிகஉபோஸதா² ஹோந்தி. இதி வீஸதியா வஸ்ஸேஸு சத்தாரோ மாஸா பரிஹாயந்தி. ராஜானோ ததியே ததியே வஸ்ஸே வஸ்ஸம் உக்கட்³ட⁴ந்தி. இதி அட்டா²ரஸஸு வஸ்ஸேஸு ச² மாஸா வட்³ட⁴ந்தி, ததோ உபோஸத²வஸேன பரிஹீனே சத்தாரோ மாஸே அபனேத்வா த்³வே மாஸா அவஸேஸா ஹோந்தி, தே த்³வே மாஸே க³ஹேத்வா வீஸதிவஸ்ஸானி பரிபுண்ணானி ஹோந்தீதி நிக்கங்கா² ஹுத்வா நிக்க²மனீயபுண்ணமாஸிம் அதிக்கம்ம பாடிபதே³ உபஸம்பாதே³ந்தி. ஏத்த² பன யோ பவாரேத்வா வீஸதிவஸ்ஸோ ப⁴விஸ்ஸதி, தம் ஸந்தா⁴ய ‘‘ஏகூனவீஸதிவஸ்ஸ’’ந்தி வுத்தம். தஸ்மா யோ மாதுகுச்சி²ஸ்மிம் த்³வாத³ஸமாஸே வஸி, ஸோ ஏகவீஸதிவஸ்ஸோ ஹோதி. யோ ஸத்தமாஸே வஸி, ஸோ ஸத்தமாஸாதி⁴கவீஸதிவஸ்ஸோ. ச²மாஸஜாதோ பன ந ஜீவதி.

406. அனாபத்தி ஊனவீஸதிவஸ்ஸம் பரிபுண்ணவீஸதிவஸ்ஸஸஞ்ஞீதி ஏத்த² கிஞ்சாபி உபஸம்பாதே³ந்தஸ்ஸ அனாபத்தி, புக்³க³லோ பன அனுபஸம்பன்னோவ ஹோதி. ஸசே பன ஸோ த³ஸவஸ்ஸச்சயேன அஞ்ஞம் உபஸம்பாதே³தி, தஞ்சே முஞ்சித்வா க³ணோ பூரதி, ஸூபஸம்பன்னோ. ஸோபி ச யாவ ந ஜானாதி, தாவஸ்ஸ நேவ ஸக்³க³ந்தராயோ ந மோக்க²ந்தராயோ, ஞத்வா பன புன உபஸம்பஜ்ஜிதப்³ப³ம். ஸேஸம் உத்தானமேவ.

திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம்,

வசீகம்மம், திசித்தம், திவேத³னந்தி.

ஊனவீஸதிவஸ்ஸஸிக்கா²பத³ம் பஞ்சமம்.

6. தே²ய்யஸத்த²ஸிக்கா²பத³வண்ணனா

407. ச²ட்டே² – படியாலோகந்தி ஸூரியாலோகஸ்ஸ படிமுக²ம்; பச்சி²மதி³ஸந்தி அத்தோ². கம்மியாதி ஸுங்கட்டா²னே கம்மிகா.

409. ராஜானம் வா தே²ய்யம் க³ச்ச²ந்தீதி ராஜானம் வா தே²னேத்வா வஞ்சேத்வா ரஞ்ஞோ ஸந்தகம் கிஞ்சி க³ஹேத்வா இதா³னி ந தஸ்ஸ த³ஸ்ஸாமாதி க³ச்ச²ந்தி.

411. விஸங்கேதேனாதி காலவிஸங்கேதேன தி³வஸவிஸங்கேதேன ச க³ச்ச²தோ அனாபத்தி. மக்³க³விஸங்கேதேன பன அடவிவிஸங்கேதேன வா ஆபத்தியேவ. ஸேஸமேத்த² பி⁴க்கு²னிவக்³கே³ வுத்தனயத்தா உத்தானத்த²மேவ. தே²ய்யஸத்த²ஸமுட்டா²னம் – காயசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

தே²ய்யஸத்த²ஸிக்கா²பத³ம் ச²ட்ட²ம்.

7. ஸம்விதா⁴னஸிக்கா²பத³வண்ணனா

412. ஸத்தமே – பதூ⁴பேந்தோ நிஸீதீ³தி பஜ்ஜா²யந்தோ அத்தானம்யேவ பரிபா⁴ஸந்தோ நிஸீதி³. நாய்யோ ஸோ பி⁴க்கு² மம் நிப்பாதேஸீதி அய்யோ அயம் பி⁴க்கு² மம் ந நிக்கா²மேஸி; ந மம் க³ஹேத்வா அக³மாஸீதி அத்தோ². ஸேஸமேத்த² பி⁴க்கு²னியா ஸத்³தி⁴ம் ஸம்விதா⁴னஸிக்கா²பதே³ வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹீதி.

ஸம்விதா⁴னஸிக்கா²பத³ம் ஸத்தமம்.

8. அரிட்ட²ஸிக்கா²பத³வண்ணனா

417. அட்ட²மே – க³த்³தே⁴ பா³த⁴யிம்ஸூதி க³த்³த⁴பா³தி⁴னோ; க³த்³த⁴பா³தி⁴னோ புப்³ப³புரிஸா அஸ்ஸாதி க³த்³த⁴பா³தி⁴புப்³போ³, தஸ்ஸ க³த்³த⁴பா³தி⁴புப்³ப³ஸ்ஸ கி³ஜ்ஜ²கா⁴தககுலப்பஸுதஸ்ஸாதி அத்தோ².

ஸக்³க³மோக்கா²னம் அந்தராயம் கரோந்தீதி அந்தராயிகா. தே கம்மகிலேஸவிபாகஉபவாத³ஆணாவீதிக்கமவஸேன பஞ்சவிதா⁴. தத்த² பஞ்சானந்தரியகம்மா கம்மந்தராயிகா நாம. ததா² பி⁴க்கு²னீதூ³ஸககம்மம், தம் பன மோக்க²ஸ்ஸேவ அந்தராயம் கரோதி, ந ஸக்³க³ஸ்ஸ. நியதமிச்சா²தி³ட்டி²த⁴ம்மா கிலேஸந்தராயிகா நாம. பண்ட³கதிரச்சா²னக³தஉப⁴தோப்³யஞ்ஜனகானம் படிஸந்தி⁴த⁴ம்மா விபாகந்தராயிகா நாம. அரியூபவாதா³ உபவாத³ந்தராயிகா நாம, தே பன யாவ அரியே ந க²மாபேந்தி தாவதே³வ, ந ததோ பரம். ஸஞ்சிச்ச ஆபன்னா ஆபத்தியோ ஆணாவீதிக்கமந்தராயிகா நாம, தாபி யாவ பி⁴க்கு²பா⁴வம் வா படிஜானாதி, ந வுட்டா²தி வா ந தே³ஸேதி வா தாவதே³வ, ந ததோ பரம்.

தத்ராயம் பி⁴க்கு² ப³ஹுஸ்ஸுதோ த⁴ம்மகதி²கோ ஸேஸந்தராயிகே ஜானாதி, வினயே பன அகோவித³த்தா பண்ணத்திவீதிக்கமந்தராயிகே ந ஜானாதி, தஸ்மா ரஹோக³தோ ஏவம் சிந்தேஸி – ‘‘இமே ஆகா³ரிகா பஞ்ச காமகு³ணே பரிபு⁴ஞ்ஜந்தா ஸோதாபன்னாபி ஸகதா³கா³மினோபி அனாகா³மினோபி ஹோந்தி, பி⁴க்கூ²பி மனாபிகானி சக்கு²விஞ்ஞேய்யானி ரூபானி பஸ்ஸந்தி…பே… காயவிஞ்ஞேய்யே போ²ட்ட²ப்³பே³ பு²ஸந்தி, முது³கானி அத்த²ரணபாவுரணாதீ³னி பரிபு⁴ஞ்ஜந்தி, ஏதம் ஸப்³ப³ம் வட்டதி. கஸ்மா இத்தி²ரூபா…பே… இத்தி²போ²ட்ட²ப்³பா³ ஏவ ந வட்டந்தி, ஏதேபி வட்டந்தீ’’தி. ஏவம் ரஸேன ரஸம் ஸம்ஸந்தி³த்வா ஸச்ச²ந்த³ராக³பரிபோ⁴க³ஞ்ச நிச்ச²ந்த³ராக³பரிபோ⁴க³ஞ்ச ஏகம் கத்வா தூ²லவாகேஹி ஸத்³தி⁴ம் அதிஸுகு²மஸுத்தம் க⁴டேந்தோ விய ஸாஸபேன ஸத்³தி⁴ம் ஸினேரும் உபஸம்ஹரந்தோ விய பாபகம் தி³ட்டி²க³தம் உப்பாதே³த்வா ‘‘கிம் ப⁴க³வதா மஹாஸமுத்³த³ம் ப³ந்த⁴ந்தேன விய மஹதா உஸ்ஸாஹேன பட²மபாராஜிகம் பஞ்ஞத்தம், நத்தி² ஏத்த² தோ³ஸோ’’தி ஸப்³ப³ஞ்ஞுதஞ்ஞாணேன ஸத்³தி⁴ம் படிவிருஜ்ஜ²ந்தோ ப⁴ப்³ப³புக்³க³லானம் ஆஸம் சி²ந்த³ந்தோ ஜினஸ்ஸ ஆணாசக்கே பஹாரமதா³ஸி. தேனாஹ – ‘‘ததா²ஹம் ப⁴க³வதா த⁴ம்மம் தே³ஸிதம் ஆஜானாமீ’’திஆதி³.

அட்டி²கங்கலூபமாதிஆதி³ம்ஹி அட்டி²கங்கலூபமா அப்பஸ்ஸாத³ட்டே²ன. மம்ஸபேஸூபமா ப³ஹுஸாதா⁴ரணட்டே²ன. திணுக்கூபமா அனுத³ஹனட்டே²ன. அங்கா³ரகாஸூபமா மஹாபி⁴தாபனட்டே²ன. ஸுபினகூபமா இத்தரபச்சுபட்டா²னட்டே²ன. யாசிதகூபமா தாவகாலிகட்டே²ன. ருக்க²ப²லூபமா ஸப்³ப³ங்க³பச்சங்க³பலிப⁴ஞ்ஜனட்டே²ன. அஸிஸூனூபமா அதி⁴குட்டனட்டே²ன. ஸத்திஸூலூபமா வினிவிஜ்ஜ²னட்டே²ன. ஸப்பஸிரூபமா ஸாஸங்கஸப்படிப⁴யட்டே²னாதி அயமேத்த² ஸங்கே²போ. வித்தா²ரோ பன பபஞ்சஸூத³னியம் மஜ்ஜி²மட்ட²கதா²யம் (ம. நி. 1.234 ஆத³யோ; 2.42 ஆத³யோ) க³ஹேதப்³போ³. ஏவம் ப்³யாகோ²தி ஏவம் விய கோ². ஸேஸமேத்த² புப்³பே³ வுத்தனயத்தா உத்தானமேவ.

ஸமனுபா⁴ஸனஸமுட்டா²னம் – காயவாசாசித்ததோ ஸமுட்டா²தி, அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

அரிட்ட²ஸிக்கா²பத³ம் அட்ட²மம்.

9. உக்கி²த்தஸம்போ⁴க³ஸிக்கா²பத³வண்ணனா

424-5. நவமே – அகடானுத⁴ம்மேனாதி அனுத⁴ம்மோ வுச்சதி ஆபத்தியா அத³ஸ்ஸனே வா அப்படிகம்மே வா பாபிகாய தி³ட்டி²யா அப்படினிஸ்ஸக்³கே³ வா த⁴ம்மேன வினயேன ஸத்து²ஸாஸனேன உக்கி²த்தகஸ்ஸ அனுலோமவத்தம் தி³ஸ்வா கதா ஓஸாரணா; ஸோ ஓஸாரணஸங்கா²தோ அனுத⁴ம்மோ யஸ்ஸ ந கதோ, அயம் அகடானுத⁴ம்மோ நாம, தாதி³ஸேன ஸத்³தி⁴ந்தி அத்தோ². தேனேவஸ்ஸ பத³பா⁴ஜனே ‘‘அகடானுத⁴ம்மோ நாம உக்கி²த்தோ அனோஸாரிதோ’’தி வுத்தம்.

தே³தி வா படிக்³க³ண்ஹாதி வாதி ஏகபயோகே³ன ப³ஹும்பி த³த³தோ வா க³ண்ஹதோ வா ஏகம் பாசித்தியம். விச்சி²ந்தி³த்வா விச்சி²ந்தி³த்வா தே³ந்தஸ்ஸ ச க³ண்ஹந்தஸ்ஸ ச பயோக³க³ணனாய பாசித்தியானி. ஸேஸமேத்த² உத்தானமேவ. திஸமுட்டா²னம் – கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

உக்கி²த்தஸம்போ⁴க³ஸிக்கா²பத³ம் நவமம்.

10. கண்டகஸிக்கா²பத³வண்ணனா

428. த³ஸமே – தி³ட்டி²க³தம் உப்பன்னந்தி அரிட்ட²ஸ்ஸ விய ஏதஸ்ஸாபி அயோனிஸோ உம்முஜ்ஜந்தஸ்ஸ உப்பன்னம். நாஸேதூதி ஏத்த² திவிதா⁴ நாஸனா – ஸம்வாஸனாஸனா, லிங்க³னாஸனா, த³ண்ட³கம்மனாஸனாதி. தத்த² ஆபத்தியா அத³ஸ்ஸனாதீ³ஸு உக்கே²பனா ஸம்வாஸனாஸனா நாம. ‘‘தூ³ஸகோ நாஸேதப்³போ³ (பாரா. 66) மேத்தியம் பி⁴க்கு²னிம் நாஸேதா²’’தி (பாரா. 384) அயம் லிங்க³னாஸனா நாம. ‘‘அஜ்ஜதக்³கே³ தே ஆவுஸோ ஸமணுத்³தே³ஸ ந சேவ ஸோ ப⁴க³வா ஸத்தா² அபதி³ஸிதப்³போ³’’தி அயம் த³ண்ட³கம்மனாஸனா நாம. அயம் இத⁴ அதி⁴ப்பேதா. தேனாஹ – ‘‘ஏவஞ்ச பன பி⁴க்க²வே நாஸேதப்³போ³…பே… வினஸ்ஸா’’தி. தத்த² சராதி க³ச்ச². பிரேதி பர அமாமக. வினஸ்ஸாதி நஸ்ஸ; யத்த² தே ந பஸ்ஸாம, தத்த² க³ச்சா²தி.

429. உபலாபேய்யாதி ஸங்க³ண்ஹேய்ய. உபட்டா²பேய்யாதி தேன அத்தனோ உபட்டா²னம் காராபேய்ய. ஸேஸம் அரிட்ட²ஸிக்கா²பதே³ வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹீதி.

கண்டகஸிக்கா²பத³ம் த³ஸமம்.

ஸமத்தோ வண்ணனாக்கமேன ஸப்பாணகவக்³கோ³ ஸத்தமோ.