5. பட²மபவாரணஸிக்கா²பத³வண்ணனா

236. பஞ்சமஸிக்கா²பதே³ – பி⁴க்கூ² பு⁴த்தாவீ பவாரிதாதி ப்³ராஹ்மணேன ‘‘க³ண்ஹத², ப⁴ந்தே, யாவ இச்ச²தா²’’தி ஏவம் யாவத³த்த²பவாரணாய, ஸயஞ்ச ‘‘அலம், ஆவுஸோ, தோ²கம் தோ²கம் தே³ஹீ’’தி ஏவம் படிக்கே²பபவாரணாய பவாரிதா. படிவிஸ்ஸகேதி ஸாமந்தக⁴ரவாஸிகே.

237. காகோரவஸத்³த³ந்தி காகானம் ஓரவஸத்³த³ம்; ஸன்னிபதித்வா விரவந்தானம் ஸத்³த³ம். அலமேதம் ஸப்³ப³ந்தி ஏத்த² திகாரம் அவத்வாவ ‘‘அலமேதம் ஸப்³ப³ம்’’ ஏத்தகம் வத்தும் வட்டதி.

238-9. பு⁴த்தாவீதி பு⁴த்தவா. தத்த² ச யஸ்மா யேன ஏகம்பி ஸித்த²ம் ஸங்கா²தி³த்வா வா அஸங்கா²தி³த்வா வா அஜ்ஜோ²ஹரிதம் ஹோதி, ஸோ ‘‘பு⁴த்தாவீ’’தி ஸங்க்²யம் க³ச்ச²தி, தேனஸ்ஸ பத³பா⁴ஜனே ‘‘பு⁴த்தாவீ நாம பஞ்சன்னம் போ⁴ஜனான’’ந்திஆதி³ வுத்தம். பவாரிதோதி கதபவாரணோ, கதபடிக்கே²போ. ஸோபி ச யஸ்மா ந படிக்கே²பமத்தேன, அத² கோ² பஞ்சங்க³வஸேன, தேனஸ்ஸ பத³பா⁴ஜனே ‘‘பவாரிதோ நாம அஸனம் பஞ்ஞாயதீ’’திஆதி³ வுத்தம். தத்த² யஸ்மா ‘‘அஸனம் பஞ்ஞாயதீ’’தி இமினா விப்பகதபோ⁴ஜனோ, ‘‘பவாரிதோ’’தி வுத்தோ. யோ ச விப்பகதபோ⁴ஜனோ, தேன கிஞ்சி பு⁴த்தம், கிஞ்சி அபு⁴த்தம், யஞ்ச பு⁴த்தம்; தம் ஸந்தா⁴ய ‘‘பு⁴த்தாவீ’’திபி ஸங்க்²யம் க³ச்ச²தி, தஸ்மா பு⁴த்தாவீவசனேன விஸும் கஞ்சி அத்த²ஸித்³தி⁴ம் ந பஸ்ஸாம. ‘‘தி³ரத்ததிரத்தம், ச²ப்பஞ்சவாசாஹீ’’திஆதீ³ஸு (பாசி. 61-62) பன தி³ரத்தாதி³வசனம் விய பவாரிதபத³ஸ்ஸ பரிவாரகபா⁴வேன ப்³யஞ்ஜனஸிலிட்ட²தாய சேதம் வுத்தந்தி வேதி³தப்³ப³ம்.

அஸனம் பஞ்ஞாயதீதிஆதீ³ஸு விப்பகதபோ⁴ஜனம் தி³ஸ்ஸதி, பு⁴ஞ்ஜமானோ சேஸோ புக்³க³லோ ஹோதீதி அத்தோ². போ⁴ஜனம் பஞ்ஞாயதீதி பவாரணப்பஹோனகபோ⁴ஜனம் தி³ஸ்ஸதி. ஓத³னாதீ³னம் சே அஞ்ஞதரம் படிக்கி²பிதப்³ப³ம் போ⁴ஜனம் ஹோதீதி அத்தோ². ஹத்த²பாஸே டி²தோதி பவாரணப்பஹோனகம் போ⁴ஜனம் க³ண்ஹித்வா தா³யகோ அட்³ட⁴தேய்யஹத்த²ப்பமாணே ஓகாஸே ஹோதீதி அத்தோ². அபி⁴ஹரதீதி ஸோ சே தா³யகோ தஸ்ஸ தம் ப⁴த்தம் காயேன அபி⁴ஹரதீதி அத்தோ². படிக்கே²போ பஞ்ஞாயதீதி படிக்கே²போ தி³ஸ்ஸதி; தஞ்சே அபி⁴ஹடம் ஸோ பி⁴க்கு² காயேன வா வாசாய வா படிக்கி²பதீதி அத்தோ². ஏவம் பஞ்சன்னம் அங்கா³னம் வஸேன பவாரிதோ நாம ஹோதீதி. வுத்தம்பி சேதம் –

‘‘பஞ்சஹி உபாலி ஆகாரேஹி பவாரணா பஞ்ஞாயதி – அஸனம் பஞ்ஞாயதி, போ⁴ஜனம் பஞ்ஞாயதி, ஹத்த²பாஸே டி²தோ, அபி⁴ஹரதி, படிக்கே²போ பஞ்ஞாயதீ’’தி (பரி. 428).

தத்ராயம் வினிச்ச²யோ – ‘‘அஸன’’ந்திஆதீ³ஸு தாவ யஞ்ச அஸ்னாதி யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பதி, தம் ‘‘ஓத³னோ, கும்மாஸோ, ஸத்து, மச்சோ², மம்ஸ’’ந்தி இமேஸம் அஞ்ஞதரமேவ வேதி³தப்³ப³ம். தத்த² ஓத³னோ நாம – ஸாலி, வீஹி, யவோ, கோ³து⁴மோ, கங்கு³, வரகோ, குத்³ரூஸகோதி ஸத்தன்னம் த⁴ஞ்ஞானம் தண்டு³லேஹி நிப்³ப³த்தோ. தத்த² ‘‘ஸாலீ’’தி அந்தமஸோ நீவாரம் உபாதா³ய ஸப்³பா³பி ஸாலிஜாதி. ‘‘வீஹீ’’தி ஸப்³பா³பி வீஹிஜாதி. ‘‘யவகோ³து⁴மேஸு’’ பே⁴தோ³ நத்தி². ‘‘கங்கூ³’’தி ஸேதரத்தகாளபே⁴தா³ ஸப்³பா³பி கங்கு³ஜாதி. ‘‘வரகோ’’தி அந்தமஸோ வரகசோரகம் உபாதா³ய ஸப்³பா³ ஸேதவண்ணா வரகஜாதி. ‘‘குத்³ரூஸகோ’’தி காளகோ த்³ரவோ சேவ ஸாமாகாதி³பே⁴தா³ ச ஸப்³பா³பி திணத⁴ஞ்ஞஜாதி.

நீவாரவரகசோரகா சேத்த² ‘‘த⁴ஞ்ஞானுலோமா’’தி வத³ந்தி. த⁴ஞ்ஞானி வா ஹோந்து த⁴ஞ்ஞானுலோமானி வா, ஏதேஸம் வுத்தப்பபே⁴தா³னம் ஸத்தன்னம் த⁴ஞ்ஞானம் தண்டு³லே க³ஹேத்வா ‘‘ப⁴த்தம் பசிஸ்ஸாமா’’தி வா ‘‘யாகு³ம் பசிஸ்ஸாமா’’தி வா ‘‘அம்பி³லபாயாஸாதீ³ஸு அஞ்ஞதரம் பசிஸ்ஸாமா’’தி வா யம்கிஞ்சி ஸந்தா⁴ய பசந்து, ஸசே உண்ஹம் ஸீதலம் வா பு⁴ஞ்ஜந்தானம் போ⁴ஜனகாலே க³ஹிதக³ஹிதட்டா²னே ஓதி⁴ பஞ்ஞாயதி, ஓத³னஸங்க³ஹமேவ க³ச்ச²தி, பவாரணம் ஜனேதி. ஸசே ஓதி⁴ ந பஞ்ஞாயதி, யாகு³ஸங்க³ஹம் க³ச்ச²தி, பவாரணம் ந ஜனேதி.

யோபி பாயாஸோ வா பண்ணப²லகளீரமிஸ்ஸகா அம்பி³லயாகு³ வா உத்³த⁴னதோ ஓதாரிதமத்தா அப்³பு⁴ண்ஹா ஹோதி, ஆவஜ்ஜித்வா பிவிதும் ஸக்கா, ஹத்தே²ன க³ஹிதோகாஸேபி ஓதி⁴ம் ந த³ஸ்ஸேதி, பவாரணம் ந ஜனேதி. ஸசே பன உஸுமாய விக³தாய ஸீதலீபூ⁴தா க⁴னபா⁴வம் க³ச்ச²தி, ஓதி⁴ம் த³ஸ்ஸேதி, புன பவாரணம் ஜனேதி. புப்³பே³ தனுபா⁴வோ ந ரக்க²தி. ஸசேபி த³தி⁴தக்காதீ³னி ஆரோபேத்வா ப³ஹுபண்ணப²லகளீரே பக்கி²பித்வா முட்டி²மத்தாபி தண்டு³லா பக்கி²த்தா ஹோந்தி, போ⁴ஜனகாலே சே ஓதி⁴ பஞ்ஞாயதி, பவாரணம் ஜனேதி. அயாகு³கே நிமந்தனே ‘‘யாகு³ம் த³ஸ்ஸாமா’’தி ப⁴த்தே உத³ககஞ்ஜிககீ²ராதீ³னி ஆகிரித்வா ‘‘யாகு³ம் க³ண்ஹதா²’’தி தே³ந்தி. கிஞ்சாபி தனுகா ஹோந்தி, பவாரணம் ஜனேதியேவ. ஸசே பன பக்குதி²தேஸு உத³காதீ³ஸு பக்கி²பித்வா பசித்வா தே³ந்தி, யாகு³ஸங்க³ஹமேவ க³ச்ச²தி. யாகு³ஸங்க³ஹம் க³தேபி தஸ்மிம் வா அஞ்ஞஸ்மிம் வா யத்த² மச்ச²மம்ஸம் பக்கி²பந்தி, ஸசே ஸாஸபமத்தம்பி மச்ச²மம்ஸக²ண்ட³ம் வா ந்ஹாரு வா பஞ்ஞாயதி, பவாரணம் ஜனேதி.

ஸுத்³த⁴ரஸகோ பன ரஸகயாகு³ வா ந ஜனேதி. ட²பேத்வா வுத்தத⁴ஞ்ஞானம் தண்டு³லே அஞ்ஞேஹி வேணுதண்டு³லாதீ³ஹி வா கந்த³மூலப²லேஹி வா யேஹி கேஹிசி கதம் ப⁴த்தம்பி பவாரணம் ந ஜனேதி, பகே³வ க⁴னயாகு³. ஸசே பனேத்த² மச்ச²மம்ஸம் பக்கி²பந்தி, ஜனேதி. மஹாபச்சரியம் ‘‘புப்ப²அத்தா²ய ப⁴த்தம்பி பவாரணம் ஜனேதீ’’தி வுத்தம். புப்பி²அத்தா²ய ப⁴த்தம் நாம புப்பி²க²ஜ்ஜகத்தா²ய குதி²ததூத³கே பக்கி²பித்வா ஸேதி³ததண்டு³லா வுச்சந்தி. ஸசே பன தே தண்டு³லே ஸுக்கா²பேத்வா கா²த³ந்தி, வட்டதி; நேவ ஸத்துஸங்க்²யம் ந ப⁴த்தஸங்க்²யம் க³ச்ச²ந்தி. புன தேஹி கதப⁴த்தம் பவாரேதியேவ. தே தண்டு³லே ஸப்பிதேலாதீ³ஸு வா பசந்தி, பூவம் வா கரோந்தி, ந பவாரேந்தி. புது²கா வா தாஹி கதஸத்துப⁴த்தாதீ³னி வா ந பவாரேந்தி.

கும்மாஸோ நாம யவேஹி கதகும்மாஸோ. அஞ்ஞேஹி பன முக்³கா³தீ³ஹி கதகும்மாஸோ பவாரணம் ந ஜனேதி. ஸத்து நாம ஸாலிவீஹியவேஹி கதஸத்து. கங்கு³வரககுத்³ரூஸகஸீஸானிபி ப⁴ஜ்ஜித்வா ஈஸகம் கோட்டேத்வா து²ஸே பலாபேத்வா புன த³ள்ஹம் கோட்டேத்வா சுண்ணம் கரோந்தி. ஸசேபி தம் அல்லத்தா ஏகாப³த்³த⁴ம் ஹோதி, ஸத்துஸங்க³ஹமேவ க³ச்ச²தி. க²ரபாகப⁴ஜ்ஜிதானம் வீஹீனம் தண்டு³லே கோட்டேத்வா தே³ந்தி, தம்பி சுண்ணம் ஸத்துஸங்க³ஹமேவ க³ச்ச²தி. ஸமபாகப⁴ஜ்ஜிதானம் பன வீஹீனம் வா வீஹிபலாபானம் வா தண்டு³லா ப⁴ஜ்ஜிததண்டு³லா ஏவ வா ந பவாரேந்தி. தேஸம் பன தண்டு³லாதீ³னம் சுண்ணம் பவாரேதி. க²ரபாகப⁴ஜ்ஜிதானம் வீஹீனம் குண்ட³கம்பி பவாரேதி. ஸமபாகப⁴ஜ்ஜிதானம் பன ஆதபஸுக்கா²னம் வா குண்ட³கம் ந பவாரேதி. லாஜா வா தேஹி கதப⁴த்தஸத்துஆதீ³னி வா ந பவாரேந்தி. ப⁴ஜ்ஜிதபிட்ட²ம் வா யம்கிஞ்சி ஸுத்³த⁴க²ஜ்ஜகம் வா ந பவாரேதி. மச்ச²மம்ஸபூரிதக²ஜ்ஜகம் பன ஸத்துமோத³கோ வா பவாரேதி. மச்சோ² மம்ஸஞ்ச பாகடமேவ. அயம் பன விஸேஸோ – ஸசேபி யாகு³ம் பிவந்தஸ்ஸ யாகு³ஸித்த²மத்தானேவ த்³வே மச்ச²க²ண்டா³னி வா மம்ஸக²ண்டா³னி வா ஏகபா⁴ஜனே வா நானாபா⁴ஜனே வா தே³ந்தி, தானி சே அகா²த³ந்தோ அஞ்ஞம் யம்கிஞ்சி பவாரணப்பஹோனகம் படிக்கி²பதி, ந பவாரேதி. ததோ ஏகம் கா²தி³தம், ஏகம் ஹத்தே² வா பத்தே வா ஹோதி, ஸோ சே அஞ்ஞம் படிக்கி²பதி, பவாரேதி. த்³வேபி கா²தி³தானி ஹோந்தி, முகே² ஸாஸபமத்தம்பி அவஸிட்ட²ம் நத்தி², ஸசேபி அஞ்ஞம் படிக்கி²பதி, ந பவாரேதி.

கப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கப்பியமம்ஸம் கா²த³ந்தோ அகப்பியமம்ஸம் படிக்கி²பதி, ந பவாரேதி. கஸ்மா? அவத்து²தாய. யஞ்ஹி பி⁴க்கு²னோ கா²தி³தும் வட்டதி, தம்யேவ படிக்கி²பதோ பவாரணா ஹோதி. இத³ம் பன ஜானந்தோ அகப்பியத்தா படிக்கி²பதி, அஜானந்தோபி படிக்கி²பிதப்³ப³ட்டா²னே டி²தமேவ படிக்கி²பதி நாம, தஸ்மா ந பவாரேதி. ஸசே பன அகப்பியமம்ஸம் கா²த³ந்தோ கப்பியமம்ஸம் படிக்கி²பதி, பவாரேதி. கஸ்மா? வத்து²தாய. யஞ்ஹி தேன படிக்கி²த்தம், தம் பவாரணாய வத்து². யம் பன கா²த³தி, தம் கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹதி, தஸ்மா பவாரேதி. அகப்பியமம்ஸம் கா²த³ந்தோ அகப்பியமம்ஸம் படிக்கி²பதி, புரிமனயேனேவ ந பவாரேதி. கப்பியமம்ஸம் வா அகப்பியமம்ஸம் வா கா²த³ந்தோ பஞ்சன்னம் போ⁴ஜனானம் யம்கிஞ்சி கப்பியபோ⁴ஜனம் படிக்கி²பதி, பவாரேதி. குலதூ³ஸகவேஜ்ஜகம்மஉத்தரிமனுஸ்ஸத⁴ம்மாரோசனஸாதி³தரூபியாதீ³ஹி நிப்³ப³த்தம் பு³த்³த⁴படிகுட்ட²ம் அனேஸனாய உப்பன்னம் அகப்பியபோ⁴ஜனம் படிக்கி²பதி, ந பவாரேதி. கப்பியபோ⁴ஜனம் வா அகப்பியபோ⁴ஜனம் வா பு⁴ஞ்ஜந்தோபி கப்பியபோ⁴ஜனம் படிக்கி²பதி, பவாரேதி. அகப்பியபோ⁴ஜனம் படிக்கி²பதி, ந பவாரேதீதி ஸப்³ப³த்த² வுத்தனயேனேவ காரணம் வேதி³தப்³ப³ம்.

ஏவம் ‘‘அஸன’’ந்திஆதீ³ஸு யஞ்ச அஸ்னாதி, யஞ்ச போ⁴ஜனம் ஹத்த²பாஸே டி²தேன அபி⁴ஹடம் படிக்கி²பந்தோ பவாரணம் ஆபஜ்ஜதி, தம் ஞத்வா இதா³னி யதா² ஆபஜ்ஜதி, தஸ்ஸ ஜானனத்த²ம் அயம் வினிச்ச²யோ – ‘‘‘அஸனம் போ⁴ஜன’ந்தி ஏத்த² தாவ யேன ஏகஸித்த²ம்பி அஜ்ஜோ²ஹடம் ஹோதி, ஸோ ஸசே பத்தமுக²ஹத்தா²னம் யத்த² கத்த²சி பஞ்சஸு போ⁴ஜனேஸு ஏகஸ்மிம்பி ஸதி அஞ்ஞம் பஞ்சஸு போ⁴ஜனேஸு ஏகம்பி படிக்கி²பதி, பவாரேதி. கத்த²சி போ⁴ஜனம் நத்தி², ஆமிஸக³ந்த⁴மத்தம் பஞ்ஞாயதி, ந பவாரேதி. முகே² ச ஹத்தே² ச போ⁴ஜனம் நத்தி², பத்தே அத்தி², தஸ்மிம் பன ஆஸனே ந பு⁴ஞ்ஜிதுகாமோ, விஹாரம் பவிஸித்வா பு⁴ஞ்ஜிதுகாமோ, அஞ்ஞஸ்ஸ வா தா³துகாமோ, தஸ்மிம் சே அந்தரே போ⁴ஜனம் படிக்கி²பதி, ந பவாரேதி. கஸ்மா? விப்பகதபோ⁴ஜனபா⁴வஸ்ஸ உபச்சி²ன்னத்தா. யோபி அஞ்ஞத்ர க³ந்த்வா பு⁴ஞ்ஜிதுகாமோ முகே² ப⁴த்தம் கி³லித்வா ஸேஸம் ஆதா³ய க³ச்ச²ந்தோ அந்தராமக்³கே³ அஞ்ஞம் போ⁴ஜனம் படிக்கி²பதி, தஸ்ஸாபி பவாரணா ந ஹோதீ’’தி மஹாபச்சரியம் வுத்தம். யதா² ச பத்தே; ஏவம் ஹத்தே²பி. முகே²பி வா விஜ்ஜமானபோ⁴ஜனம் ஸசே அனஜ்ஜோ²ஹரிதுகாமோ ஹோதி, தஸ்மிஞ்ச க²ணே அஞ்ஞம் படிக்கி²பதி, ந பவாரேதி. ஏகஸ்மிஞ்ஹி பதே³ வுத்தலக்க²ணம் ஸப்³ப³த்த² வேதி³தப்³ப³ம் ஹோதி. அபிச குருந்தி³யம் ஏஸ நயோ த³ஸ்ஸிதோயேவ. வுத்தஞ்ஹி தத்த² ‘‘முகே² ப⁴த்தம் கி³லிதம், ஹத்தே² ப⁴த்தம் விகா⁴ஸாத³ஸ்ஸ தா³துகாமோ, பத்தே ப⁴த்தம் பி⁴க்கு²ஸ்ஸ தா³துகாமோ, ஸசே தஸ்மிம் க²ணே படிக்கி²பதி, ந பவாரேதீ’’தி. ஹத்த²பாஸே டி²தோதி ஏத்த² பன ஸசே பி⁴க்கு² நிஸின்னோ ஹோதி, ஆஸனஸ்ஸ பச்சி²மந்ததோ பட்டா²ய, ஸசே டி²தோ, பண்ஹிஅந்ததோ பட்டா²ய, ஸசே நிபன்னோ, யேன பஸ்ஸேன நிபன்னோ, தஸ்ஸ பாரிமந்ததோ பட்டா²ய, தா³யகஸ்ஸ நிஸின்னஸ்ஸ வா டி²தஸ்ஸ வா நிபன்னஸ்ஸ வா ட²பேத்வா பஸாரிதஹத்த²ம் யம் ஆஸன்னதரம் அங்க³ம், தஸ்ஸ ஓரிமந்தேன பரிச்சி²ந்தி³த்வா அட்³ட⁴தேய்யஹத்தோ² ‘‘ஹத்த²பாஸோ’’தி வேதி³தப்³போ³. தஸ்மிம் ட²த்வா அபி⁴ஹடம் படிக்கி²பந்தஸ்ஸேவ பவாரணா ஹோதி, ந ததோ பரம்.

அபி⁴ஹரதீதி ஹத்த²பாஸப்³ப⁴ந்தரே டி²தோ க³ஹணத்த²ம் உபனாமேதி. ஸசே பன அனந்தரனிஸின்னோபி பி⁴க்கு² ஹத்தே² வா ஊரூஸு வா ஆதா⁴ரகே வா டி²தபத்தம் அனபி⁴ஹரித்வாவ ‘‘ப⁴த்தம் க³ண்ஹா’’தி வத³தி, தம் படிக்கி²பதோ பவாரணா நத்தி². ப⁴த்தபச்சி²ம் ஆனேத்வா புரதோ பூ⁴மியம் ட²பேத்வா ‘‘க³ண்ஹாஹீ’’தி வுத்தேபி ஏஸேவ நயோ. ஈஸகம் பன உத்³த⁴ரித்வா வா அபனாமேத்வா வா ‘‘க³ண்ஹதா²’’தி வுத்தே படிக்கி²பதோ பவாரணா ஹோதி. தே²ராஸனே நிஸின்னோ தே²ரோ தூ³ரே நிஸின்னஸ்ஸ த³ஹரபி⁴க்கு²ஸ்ஸ பத்தம் பேஸேத்வா ‘‘இதோ ஓத³னம் க³ண்ஹாஹீ’’தி வத³தி, க³ண்ஹித்வா பன க³தோ துண்ஹீ திட்ட²தி, த³ஹரோ ‘‘அலம் மய்ஹ’’ந்தி படிக்கி²பதி, ந பவாரேதி. கஸ்மா? தே²ரஸ்ஸ தூ³ரபா⁴வதோ தூ³தஸ்ஸ ச அனபி⁴ஹரணதோதி. ஸசே பன க³ஹேத்வா ஆக³தோ பி⁴க்கு² ‘‘இத³ம் ப⁴த்தம் க³ண்ஹா’’தி வத³தி, தம் படிக்கி²பதோ பவாரணா ஹோதி.

பரிவேஸனாய ஏகோ ஏகேன ஹத்தே²ன ஓத³னபச்சி²ம் ஏகேன கடச்சு²ம் க³ஹேத்வா பி⁴க்கூ² பரிவிஸதி, தத்ர சே அஞ்ஞோ ஆக³ந்த்வா ‘‘அஹம் பச்சி²ம் தா⁴ரேஸ்ஸாமி, த்வம் ஓத³னம் தே³ஹீ’’தி வத்வா க³ஹிதமத்தகமேவ கரோதி, பரிவேஸகோ ஏவ பன தம் தா⁴ரேதி, தஸ்மா ஸா அபி⁴ஹடாவ ஹோதி. ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ஹோதி. ஸசே பன பரிவிஸகேன பு²ட்ட²மத்தாவ ஹோதி, இதரோவ நம் தா⁴ரேதி, ததோ தா³துகாமதாய க³ண்ஹந்தம் படிக்கி²பந்தஸ்ஸ பவாரணா ந ஹோதி. கடச்சு²னா உத்³த⁴டப⁴த்தே பன ஹோதி. கடச்சு²அபி⁴ஹாரோயேவ ஹி தஸ்ஸ அபி⁴ஹாரோ. த்³வின்னம் ஸமபா⁴ரேபி படிக்கி²பந்தோ பவாரேதியேவாதி மஹாபச்சரியம் வுத்தம். அனந்தரஸ்ஸ பி⁴க்கு²னோ ப⁴த்தே தி³ய்யமானே இதரோ பத்தம் ஹத்தே²ஹி பித³ஹதி, பவாரணா நத்தி². கஸ்மா? அஞ்ஞஸ்ஸ அபி⁴ஹடே படிக்கி²த்தத்தா.

படிக்கே²போ பஞ்ஞாயதீதி ஏத்த² வாசாய அபி⁴ஹடம் படிக்கி²பதோ பவாரணா நத்தி². காயேன அபி⁴ஹடம் பன காயேன வா வாசாய வா படிக்கி²பந்தஸ்ஸ பவாரணா ஹோதீதி வேதி³தப்³போ³.

தத்த² காயேன படிக்கே²போ நாம அங்கு³லிம் வா ஹத்த²ம் வா மச்சி²கபீ³ஜனிம் வா சீவரகண்ணம் வா சாலேதி, ப⁴முகாய வா ஆகாரம் கரோதி, குத்³தோ⁴ வா ஓலோகேதி, வாசாய படிக்கே²போ நாம ‘‘அல’’ந்தி வா, ‘‘ந க³ண்ஹாமீ’’தி வா, ‘‘மா ஆகிரா’’தி வா, ‘‘அபக³ச்சா²’’தி வா வத³தி; ஏவம் யேன கேனசி ஆகாரேன காயேன வா வாசாய வா படிக்கி²த்தே பவாரணா ஹோதி.

ஏகோ அபி⁴ஹடே ப⁴த்தே பவாரணாய பீ⁴தோ ஹத்த² அபனேத்வா புனப்புனம் பத்தே ஓத³னம் ஆகிரந்தம் ‘‘ஆகிர ஆகிர கோட்டேத்வா பூரேஹீ’’தி வத³தி, ஏத்த² கத²ந்தி? மஹாஸுமத்தே²ரோ தாவ ‘‘அனாகிரணத்தா²ய வுத்தத்தா பவாரணா ஹோதீ’’தி ஆஹ. மஹாபது³மத்தே²ரோ பன ‘‘‘ஆகிர பூரேஹீ’தி வத³ந்தஸ்ஸ நாம ‘கஸ்ஸசி பவாரணா அத்தீ²’தி வத்வா ‘ந பவாரேதீ’’’தி ஆஹ. அபரோ ப⁴த்தம் அபி⁴ஹரந்தம் பி⁴க்கு²ம் ஸல்லக்கே²த்வா ‘‘கிம் ஆவுஸோ இதோபி கிஞ்சி க³ண்ஹிஸ்ஸஸி, த³ம்மி தே கிஞ்சீ’’தி ஆஹ. தத்ராபி ‘‘‘ஏவம் நாக³மிஸ்ஸதீ’தி வுத்தத்தா ‘பவாரணா ஹோதீ’’’தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘‘க³ண்ஹிஸ்ஸஸீ’தி வத³ந்தஸ்ஸ நாம ‘கஸ்ஸசி பவாரணா அத்தீ²’தி வத்வா ‘ந பவாரேதீ’’’தி ஆஹ.

ஏகோ ஸமம்ஸகம் ரஸம் அபி⁴ஹரித்வா ‘‘ரஸம் க³ண்ஹதா²’’தி வத³தி, தம் ஸுத்வா படிக்கி²பதோ பவாரணா நத்தி². ‘‘மச்ச²ரஸம் மம்ஸரஸ’’ந்தி வுத்தே படிக்கி²பதோ ஹோதி, ‘‘இத³ம் க³ண்ஹதா²’’தி வுத்தேபி ஹோதியேவ. மம்ஸம் விஸும் கத்வா ‘‘மம்ஸரஸம் க³ண்ஹதா²’’தி வத³தி, தத்த² சே ஸாஸபமத்தம்பி மம்ஸக²ண்ட³ம் அத்தி², தம் படிக்கி²பதோ பவாரணா ஹோதி. ஸசே பன பரிஸ்ஸாவிதோ ஹோதி, ‘‘வட்டதீ’’தி அப⁴யத்தே²ரோ ஆஹ.

மம்ஸரஸேன ஆபுச்ச²ந்தம் மஹாதே²ரோ ‘‘முஹுத்தம் ஆக³மேஹீ’’தி வத்வா ‘‘தா²லகம் ஆவுஸோ ஆஹரா’’தி ஆஹ. ஏத்த² கத²ந்தி? மஹாஸுமத்தே²ரோ தாவ ‘‘அபி⁴ஹாரகஸ்ஸ க³மனம் பட²மம் உபச்சி²ன்னம், தஸ்மா பவாரேதீ’’தி ஆஹ. மஹாபது³மத்தே²ரோ பன ‘‘அயம் குஹிம் க³ச்ச²தி, கீதி³ஸம் ஏதஸ்ஸ க³மனம், க³ண்ஹந்தஸ்ஸாபி நாம பவாரணா அத்தீ²’’தி வத்வா ‘‘ந பவாரேதீ’’தி ஆஹ. களீரபனஸாதீ³ஹி மிஸ்ஸேத்வா மம்ஸம் பசந்தி, தம் க³ஹேத்வா ‘‘களீரஸூபம் க³ண்ஹத², பனஸப்³யஞ்ஜனம் க³ண்ஹதா²’’தி வத³ந்தி, ஏவம்பி ந பவாரேதி. கஸ்மா? அபவாரணாரஹஸ்ஸ நாமேன வுத்தத்தா. ஸசே பன ‘‘மச்ச²ஸூபம் மம்ஸஸூப’’ந்தி வா ‘‘இமம் க³ண்ஹதா²’’தி வா வத³ந்தி, பவாரேதி. மம்ஸகரம்ப³கோ நாம ஹோதி, தம் தா³துகாமோபி ‘‘கரம்ப³கம் க³ண்ஹதா²’’தி வத³தி, வட்டதி; ந பவாரேதி. ‘‘மம்ஸகரம்ப³க’’ந்தி வா ‘‘இத³’’ந்தி வா வுத்தே பன பவாரேதி. ஏஸேவ நயோ ஸப்³பே³ஸு மச்ச²மம்ஸமிஸ்ஸகேஸு.

யோ பன நிமந்தனே பு⁴ஞ்ஜமானோ மம்ஸம் அபி⁴ஹடம் ‘‘உத்³தி³ஸ்ஸ கத’’ந்தி மஞ்ஞமானோ படிக்கி²பதி, பவாரிதோவ ஹோதீதி மஹாபச்சரியம் வுத்தம். மிஸ்ஸககதா² பன குருந்தி³யம் ஸுட்டு² வுத்தா. ஏவஞ்ஹி தத்த² வுத்தம் – பிண்ட³பாதசாரிகோ பி⁴க்கு² ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத³தி, ந பவாரேதி. ‘‘ப⁴த்தம் க³ண்ஹதா²’’தி வுத்தே பவாரேதி. கஸ்மா? யேனாபுச்சி²தோ, தஸ்ஸ அத்தி²தாய. அயமேத்த² அதி⁴ப்பாயோ – ‘‘யாகு³மிஸ்ஸகம் க³ண்ஹதா²’’தி வத³தி, தத்ர சே யாகு³ ப³ஹுதரா வா ஹோதி ஸமஸமா வா, ந பவாரேதி. யாகு³ மந்தா³, ப⁴த்தம் ப³ஹுதரம், பவாரேதி. இத³ஞ்ச ஸப்³ப³அட்ட²கதா²ஸு வுத்தத்தா ந ஸக்கா படிக்கி²பிதும், காரணம் பனேத்த² து³த்³த³ஸம். ‘‘ப⁴த்தமிஸ்ஸகம் க³ண்ஹதா²’’தி வத³தி, ப⁴த்தம் ப³ஹுகம் வா ஸமம் வா அப்பதரம் வா ஹோதி, பவாரேதியேவ. ப⁴த்தம் வா யாகு³ம் வா அனாமஸித்வா ‘‘மிஸ்ஸகம் க³ண்ஹதா²’’தி வத³தி, தத்ர சே ப⁴த்தம் ப³ஹுதரம் வா ஸமகம் வா ஹோதி, பவாரேதி. அப்பதரம் ந பவாரேதி. இத³ஞ்ச கரம்ப³கேன ந ஸமானேதப்³ப³ம். கரம்ப³கோ ஹி மம்ஸமிஸ்ஸகோபி ஹோதி அமம்ஸமிஸ்ஸகோபி, தஸ்மா ‘‘கரம்ப³க’’ந்தி வுத்தே பவாரணா நத்தி². இத³ம் பன ப⁴த்தமிஸ்ஸகமேவ. ஏத்த² வுத்தனயேனேவ பவாரணா ஹோதி. ப³ஹுரஸே ப⁴த்தே ரஸம், ப³ஹுகீ²ரே கீ²ரம் ப³ஹுஸப்பிம்ஹி ச பாயாஸே ஸப்பிம் க³ண்ஹதா²தி விஸும் கத்வா தே³தி, தம் படிக்கி²பதோ பவாரணா நத்தி².

யோ பன க³ச்ச²ந்தோ பவாரேதி, ஸோ க³ச்ச²ந்தோவ பு⁴ஞ்ஜிதும் லப⁴தி. கத்³த³மம் வா உத³கம் வா பத்வா டி²தேன அதிரித்தம் காரேதப்³ப³ம். ஸசே அந்தரா நதீ³ பூரா ஹோதி, நதீ³தீரே கு³ம்ப³ம் அனுபரியாயந்தேன பு⁴ஞ்ஜிதப்³ப³ம். அத² நாவா வா ஸேது வா அத்தி², தம் அபி⁴ருஹித்வாபி சங்கமந்தேனவ பு⁴ஞ்ஜிதப்³ப³ம், க³மனம் ந உபச்சி²ந்தி³தப்³ப³ம். யானே வா ஹத்தி²அஸ்ஸபிட்டே² வா சந்த³மண்ட³லே வா ஸூரியமண்ட³லே வா நிஸீதி³த்வா பவாரிதேன யாவ மஜ்ஜ²ன்ஹிகம், தாவ தேஸு க³ச்ச²ந்தேஸுபி நிஸின்னேனேவ பு⁴ஞ்ஜிதப்³ப³ம். யோ டி²தோ பவாரேதி, டி²தேனேவ, யோ நிஸின்னோ பவாரேதி, நிஸின்னேனேவ பு⁴ஞ்ஜிதப்³ப³ம். தம் தம் இரியாபத²ம் கோபேந்தேன அதிரித்தம் காரேதப்³ப³ம். யோ உக்குடிகோ நிஸீதி³த்வா பவாரேதி, தேன உக்குடிகேனேவ பு⁴ஞ்ஜிதப்³ப³ம். தஸ்ஸ பன ஹேட்டா² பலாலபீட²ம் வா கிஞ்சி வா நிஸீத³னகம் தா³தப்³ப³ம். பீட²கே நிஸீதி³த்வா பவாரிதேன ஆஸனம் அசாலேத்வாவ சதஸ்ஸோ தி³ஸா பரிவத்தந்தேன பு⁴ஞ்ஜிதும் லப்³ப⁴தி. மஞ்சே நிஸீதி³த்வா பவாரிதேன இதோ வா ஏத்தோ வா ஸம்ஸரிதும் ந லப்³ப⁴தி. ஸசே பன நம் ஸஹ மஞ்சேன உக்கி²பித்வா அஞ்ஞத்ர நேந்தி, வட்டதி. நிபஜ்ஜித்வா பவாரிதேன நிபன்னேனேவ பு⁴ஞ்ஜிதப்³ப³ம். பரிவத்தந்தேன யேன பஸ்ஸேன நிபன்னோ, தஸ்ஸ டா²னம் நாதிக்கமேதப்³ப³ம்.

அனதிரித்தந்தி ந அதிரித்தம்; ந அதி⁴கந்தி அத்தோ². தம் பன யஸ்மா கப்பியகதாதீ³ஹி ஸத்தஹி வினயகம்மாகாரேஹி அகதம் வா கி³லானஸ்ஸ அனதி⁴கம் வா ஹோதி, தஸ்மா பத³பா⁴ஜனே ‘‘அகப்பியகத’’ந்திஆதி³ வுத்தம். தத்த² அகப்பியகதந்தி யம் தத்த² ப²லம் வா கந்த³மூலாதி³ வா பஞ்சஹி ஸமணகப்பேஹி கப்பியம் அகதம்; யஞ்ச அகப்பியமம்ஸம் வா அகப்பியபோ⁴ஜனம் வா, ஏதம் அகப்பியம் நாம. தம் அகப்பியம் ‘‘அலமேதம் ஸப்³ப³’’ந்தி ஏவம் அதிரித்தம் கதம்பி அகப்பியகதந்தி வேதி³தப்³ப³ம். அப்படிக்³க³ஹிதகதந்தி பி⁴க்கு²னா அப்படிக்³க³ஹிதம்யேவ புரிமனயேனேவ அதிரித்தம் கதம். அனுச்சாரிதகதந்தி கப்பியம் காராபேதும் ஆக³தேன பி⁴க்கு²னா ஈஸகம்பி அனுக்கி²த்தம் வா அனபனாமிதம் வா கதம். அஹத்த²பாஸே கதந்தி கப்பியம் காராபேதும் ஆக³தஸ்ஸ ஹத்த²பாஸதோ ப³ஹி டி²தேன கதம். அபு⁴த்தாவினா கதந்தி யோ ‘‘அலமேதம் ஸப்³ப³’’ந்தி அதிரித்தம் கரோதி, தேன பவாரணப்பஹோனகம் போ⁴ஜனம் அபு⁴த்தேன கதம். பு⁴த்தாவினா பவாரிதேன ஆஸனா வுட்டி²தேன கதந்தி இத³ம் உத்தானமேவ. அலமேதம் ஸப்³ப³ந்தி அவுத்தந்தி வசீபே⁴த³ம் கத்வா ஏவம் அவுத்தம் ஹோதி. இதி இமேஹி ஸத்தஹி வினயகம்மாகாரேஹி யம் அதிரித்தம் கப்பியம் அகதம், யஞ்ச ந கி³லானாதிரித்தம், தது³ப⁴யம்பி அனதிரித்தந்தி வேதி³தப்³ப³ம்.

அதிரித்தம் பன தஸ்ஸேவ படிபக்க²னயேன வேதி³தப்³ப³ம். அபிசேத்த² பு⁴த்தாவினா கதம் ஹோதீதி அனந்தரே நிஸின்னஸ்ஸ ஸபா⁴க³ஸ்ஸ பி⁴க்கு²னோ பத்ததோ ஏகம்பி ஸித்த²ம் வா மம்ஸஹீரம் வா கா²தி³த்வா கதம்பி பு⁴த்தாவினாவ கதம் ஹோதீதி வேதி³தப்³ப³ம். ஆஸனா அவுட்டி²தேனாதி ஏத்த² பன அஸம்மோஹத்த²ம் அயம் வினிச்ச²யோ – த்³வே பி⁴க்கூ² பாதோவ பு⁴ஞ்ஜமானா பவாரிதா ஹோந்தி – ஏகேன தத்தே²வ நிஸீதி³தப்³ப³ம், இதரேன நிச்சப⁴த்தம் வா ஸலாகப⁴த்தம் வா ஆனேத்வா உபட்³ட⁴ம் தஸ்ஸ பி⁴க்கு²னோ பத்தே ஆகிரித்வா ஹத்த²ம் தோ⁴வித்வா ஸேஸம் தேன பி⁴க்கு²னா கப்பியம் காராபேத்வா பு⁴ஞ்ஜிதப்³ப³ம். கஸ்மா? யஞ்ஹி தஸ்ஸ ஹத்தே² லக்³க³ம், தம் அகப்பியம் ஹோதி. ஸசே பன பட²மம் நிஸின்னோ பி⁴க்கு² ஸயமேவ தஸ்ஸ பத்ததோ ஹத்தே²ன க³ண்ஹாதி, ஹத்த²தோ⁴வனகிச்சம் நத்தி². ஸசே பன ஏவம் கப்பியம் காராபேத்வா பு⁴ஞ்ஜந்தஸ்ஸ புன கிஞ்சி ப்³யஞ்ஜனம் வா கா²த³னீயம் வா பத்தே ஆகிரந்தி, யேன பட²மம் கப்பியம் கதம், ஸோ புன காதும் ந லப⁴தி. யேன அகதம், தேன காதப்³ப³ம். யஞ்ச அகதம், தம் காதப்³ப³ம். ‘‘யேன அகத’’ந்தி அஞ்ஞேன பி⁴க்கு²னா யேன பட²மம் ந கதம், தேன காதப்³ப³ம். ‘‘யஞ்ச அகத’’ந்தி யேன பட²மம் கப்பியம் கதம், தேனாபி யம் அகதம் தம் காதப்³ப³ம். பட²மபா⁴ஜனே பன காதும் ந லப்³ப⁴தி. தத்த² ஹி கரியமானம் பட²மம் கதேன ஸத்³தி⁴ம் கதம் ஹோதி, தஸ்மா அஞ்ஞஸ்மிம் பா⁴ஜனே காதும் வட்டதீதி அதி⁴ப்பாயோ. ஏவம் கதம் பன தேன பி⁴க்கு²னா பட²மம் கதேன ஸத்³தி⁴ம் பு⁴ஞ்ஜிதும் வட்டதி.

கப்பியம் கரோந்தேன ச ந கேவலம் பத்தேயேவ, குண்டே³பி பச்சி²யம்பி யத்த² கத்த²சி புரதோ ட²பேத்வா ஓனாமிதபா⁴ஜனே காதப்³ப³ம். தம் ஸசேபி பி⁴க்கு²ஸதம் பவாரிதம் ஹோதி, ஸப்³பே³ஸம் பு⁴ஞ்ஜிதும் வட்டதி, அப்பவாரிதானம்பி வட்டதி. யேன பன கப்பியம் கதம், தஸ்ஸ ந வட்டதி. ஸசேபி பவாரேத்வா பிண்டா³ய பவிட்ட²ம் பி⁴க்கு²ம் பத்தம் க³ஹேத்வா அவஸ்ஸம் பு⁴ஞ்ஜனகே மங்க³லனிமந்தனே நிஸீதா³பேந்தி, அதிரித்தம் காரேத்வாவ பு⁴ஞ்ஜிதப்³ப³ம். ஸசே தத்த² அஞ்ஞோ பி⁴க்கு² நத்தி², ஆஸனஸாலம் வா விஹாரம் வா பத்தம் பேஸேத்வா காரேதப்³ப³ம். கப்பியம் கரோந்தேன பன அனுபஸம்பன்னஸ்ஸ ஹத்தே² டி²தம் ந காதப்³ப³ம். ஸசே ஆஸனஸாலாயம் அப்³யத்தோ பி⁴க்கு² ஹோதி, ஸயம் க³ந்த்வா கப்பியம் காராபேத்வா ஆனேத்வா பு⁴ஞ்ஜிதப்³ப³ம்.

கி³லானாதிரித்தந்தி ஏத்த² ந கேவலம் யம் கி³லானஸ்ஸ பு⁴த்தாவஸேஸம் ஹோதி, தம் கி³லானாதிரித்தம்; அத² கோ² யம்கிஞ்சி கி³லானம் உத்³தி³ஸ்ஸ அஜ்ஜ வா ஸ்வே வா யதா³ வா இச்ச²தி, ததா³ கா²தி³ஸ்ஸதீதி ஆஹடம், தம் ஸப்³ப³ம் ‘‘கி³லானாதிரித்த’’ந்தி வேதி³தப்³ப³ம். யம் யாமகாலிகாதீ³ஸு அஜ்ஜோ²ஹாரே அஜ்ஜோ²ஹாரே து³க்கடம், தம் அஸம்ஸட்ட²வஸேன வுத்தம். ஸசே பன ஆமிஸஸம்ஸட்டா²னி ஹோந்தி, ஆஹாரத்தா²யபி அனாஹாரத்தா²யபி படிக்³க³ஹேத்வா அஜ்ஜோ²ஹரந்தஸ்ஸ பாசித்தியமேவ.

241. ஸதி பச்சயேதி யாமகாலிகம் பிபாஸாய ஸதி பிபாஸச்சே²த³னத்த²ம், ஸத்தாஹகாலிகம் யாவஜீவிகஞ்ச தேன தேன உபஸமேதப்³ப³கே ஆபா³தே⁴ ஸதி தஸ்ஸ உபஸமனத்த²ம் பரிபு⁴ஞ்ஜதோ அனாபத்தி. ஸேஸமேத்த² உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மபவாரணஸிக்கா²பத³ம் பஞ்சமம்.