3. பரம்பரபோ⁴ஜனஸிக்கா²பத³வண்ணனா

221. ததியஸிக்கா²பதே³ – ந கோ² இத³ம் ஓரகம் ப⁴விஸ்ஸதி, யத²யிமே மனுஸ்ஸா ஸக்கச்சம் ப⁴த்தம் கரோந்தீதி, யேன நியாமேன இமே மனுஸ்ஸா ஸக்கச்சம் ப⁴த்தம் கரோந்தி, தேன ஞாயதி – ‘‘இத³ம் ஸாஸனம் இத³ம் வா பு³த்³த⁴ப்பமுகே² ஸங்கே⁴ தா³னம் ந கோ² ஓரகம் ப⁴விஸ்ஸதி, பரித்தம் லாமகம் நேவ ப⁴விஸ்ஸதீ’’தி. கிரபதிகோதி ஏத்த² ‘‘கிரோ’’தி தஸ்ஸ குலபுத்தஸ்ஸ நாமம்; அதி⁴பச்சட்டே²ன பன ‘‘கிரபதிகோ’’தி வுச்சதி. ஸோ கிர இஸ்ஸரோ அதி⁴பதி மாஸஉதுஸம்வச்ச²ரனியாமேன வேதனம் த³த்வா கம்மகாரகே கம்மம் காரேதி. ப³த³ரா படியத்தாதி உபசாரவஸேன வத³தி. ப³த³ரமிஸ்ஸேனாதி ப³த³ரஸாளவேன.

222. உஸ்ஸூரே ஆஹரியித்தா²தி அதிதி³வா ஆஹரியித்த².

226. மய்ஹம் ப⁴த்தபச்சாஸம் இத்த²ன்னாமஸ்ஸ த³ம்மீதி அயம் ப⁴த்தவிகப்பனா நாம ஸம்முகா²பி பரம்முகா²பி வட்டதி. ஸம்முகா² தி³ஸ்வா ‘‘துய்ஹம் விகப்பேமீ’’தி வத்வா பு⁴ஞ்ஜிதப்³ப³ம், அதி³ஸ்வா பஞ்சஸு ஸஹத⁴ம்மிகேஸு ‘‘இத்த²ன்னாமஸ்ஸ விகப்பேமீ’’தி வத்வா பு⁴ஞ்ஜிதப்³ப³ம். மஹாபச்சரியாதீ³ஸு பன பரம்முகா²விகப்பனாவ வுத்தா. ஸா சாயம் யஸ்மா வினயகம்மேன ஸங்க³ஹிதா, தஸ்மா ப⁴க³வதோ விகப்பேதும் ந வட்டதி. ப⁴க³வதி ஹி க³ந்த⁴குடியம் நிஸின்னேபி ஸங்க⁴மஜ்ஜே² நிஸின்னேபி ஸங்கே⁴ன க³ணப்பஹோனகே பி⁴க்கூ² க³ஹேத்வா தம் தம் கம்மம் கதம் ஸுகதமேவ ஹோதி, ப⁴க³வா நேவ கம்மம் கோபேதி; ந ஸம்பாதே³தி. ந கோபேதி த⁴ம்மிஸ்ஸரத்தா, ந ஸம்பாதே³தி அக³ணபூரகத்தா.

229. த்³வே தயோ நிமந்தனே ஏகதோ பு⁴ஞ்ஜதீதி த்³வே தீணி நிமந்தனானி ஏகபத்தே பக்கி²பித்வா மிஸ்ஸேத்வா ஏகம் கத்வா பு⁴ஞ்ஜதீதி அத்தோ². த்³வே தீணி குலானி நிமந்தேத்வா ஏகஸ்மிம் டா²னே நிஸீதா³பேத்வா இதோ சிதோ ச ஆஹரித்வா ப⁴த்தம் ஆகிரந்தி, ஸூபப்³யஞ்ஜனம் ஆகிரந்தி, ஏகமிஸ்ஸகம் ஹோதி, ஏத்த² அனாபத்தீதி மஹாபச்சரியம் வுத்தம். ஸசே பன மூலனிமந்தனம் ஹேட்டா² ஹோதி, பச்சி²மம் பச்சி²மம் உபரி, தம் உபரிதோ பட்டா²ய பு⁴ஞ்ஜந்தஸ்ஸ ஆபத்தி. ஹத்த²ம் பன அந்தோ பவேஸேத்வா பட²மனிமந்தனதோ ஏகம்பி கப³ளம் உத்³த⁴ரித்வா பு⁴த்தகாலதோ பட்டா²ய யதா² ததா² வா பு⁴ஞ்ஜந்தஸ்ஸ அனாபத்தி. ஸசேபி தத்த² கீ²ரம் வா ரஸம் வா ஆகிரந்தி, யேன அஜ்ஜோ²த்த²தம் ப⁴த்தம் ஏகரஸம் ஹோதி, கோடிதோ பட்டா²ய பு⁴ஞ்ஜந்தஸ்ஸ அனாபத்தீதி மஹாபச்சரியம் வுத்தம். மஹாஅட்ட²கதா²யம் பன வுத்தம் – ‘‘கீ²ரப⁴த்தம் வா ரஸப⁴த்தம் வா லபி⁴த்வா நிஸின்னஸ்ஸ தத்தே²வ அஞ்ஞேபி கீ²ரப⁴த்தம் வா ரஸப⁴த்தம் வா ஆகிரந்தி, கீ²ரம் வா ரஸம் வா பிவதோ அனாபத்தி. பு⁴ஞ்ஜந்தேன பன பட²மம் லத்³த⁴மம்ஸக²ண்ட³ம் வா ப⁴த்தபிண்ட³ம் வா முகே² பக்கி²பித்வா கோடிதோ பட்டா²ய பு⁴ஞ்ஜிதும் வட்டதி. ஸப்பிபாயாஸேபி ஏஸேவ நயோ’’தி.

மஹாஉபாஸகோ பி⁴க்கு²ம் நிமந்தேதி, தஸ்ஸ குலம் உபக³தஸ்ஸ உபாஸகோபி தஸ்ஸ புத்ததா³ரபா⁴திகப⁴கி³னிஆத³யோபி அத்தனோ அத்தனோ கோட்டா²ஸம் ஆஹரித்வா பத்தே பக்கி²பந்தி, உபாஸகேன பட²மம் தி³ன்னம் அபு⁴ஞ்ஜித்வா பச்சா² லத்³த⁴ம் பு⁴ஞ்ஜந்தஸ்ஸ ‘‘அனாபத்தீ’’தி மஹாஅட்ட²கதா²யம் வுத்தம். குருந்த³ட்ட²கதா²யம் பன வட்டதீதி வுத்தம். மஹாபச்சரியம் ‘‘ஸசே பாடேக்கம் பசந்தி, அத்தனோ அத்தனோ பக்கப⁴த்ததோ ஆஹரித்வா தே³ந்தி, தத்த² பச்சா² ஆஹடம் பட²மம் பு⁴ஞ்ஜந்தஸ்ஸ பாசித்தியம். யதி³ பன ஸப்³பே³ஸம் ஏகோவ பாகோ ஹோதி, பரம்பரபோ⁴ஜனம் ந ஹோதீ’’தி வுத்தம். மஹாஉபாஸகோ நிமந்தேத்வா நிஸீதா³பேதி, அஞ்ஞோ மனுஸ்ஸோ பத்தம் க³ண்ஹாதி, ந தா³தப்³ப³ம். கிம் ப⁴ந்தே ந தே³தா²தி? நனு உபாஸக தயா நிமந்திதம்ஹாதி! ஹோது ப⁴ந்தே, லத்³த⁴ம் லத்³த⁴ம் பு⁴ஞ்ஜதா²தி வத³தி, பு⁴ஞ்ஜிதும் வட்டதி. அஞ்ஞேன ஆஹரித்வா ப⁴த்தே தி³ன்னே ஆபுச்சி²த்வாபி பு⁴ஞ்ஜிதும் வட்டதீதி குருந்தி³யம் வுத்தம்.

அனுமோத³னம் கத்வா க³ச்ச²ந்தம் த⁴ம்மம் ஸோதுகாமா ‘‘ஸ்வேபி ப⁴ந்தே ஆக³ச்சே²ய்யாதா²’’தி ஸப்³பே³ நிமந்தேந்தி, புனதி³வஸே ஆக³ந்த்வா லத்³த⁴ம் லத்³த⁴ம் பு⁴ஞ்ஜிதும் வட்டதி. கஸ்மா? ஸப்³பே³ஹி நிமந்திதத்தா. ஏகோ பி⁴க்கு² பிண்டா³ய சரந்தோ ப⁴த்தம் லப⁴தி, தமஞ்ஞோ உபாஸகோ நிமந்தேத்வா க⁴ரே நிஸீதா³பேதி, ந ச தாவ ப⁴த்தம் ஸம்பஜ்ஜதி. ஸசே ஸோ பி⁴க்கு² பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தி. அபு⁴த்வா நிஸின்னே ‘‘கிம் ப⁴ந்தே ந பு⁴ஞ்ஜஸீ’’தி வுத்தே ‘‘தயா நிமந்திதத்தா’’தி வத்வா லத்³த⁴ம் லத்³த⁴ம் பு⁴ஞ்ஜத² ப⁴ந்தே’’தி வுத்தோ பு⁴ஞ்ஜதி, வட்டதி.

ஸகலேன கா³மேனாதி ஸகலேன கா³மேன ஏகதோ ஹுத்வா நிமந்திதஸ்ஸேவ யத்த² கத்த²சி பு⁴ஞ்ஜதோ அனாபத்தி. பூகே³பி ஏஸேவ நயோ. நிமந்தியமானோ பி⁴க்க²ம் க³ஹேஸ்ஸாமீதி ப⁴ணதீதி ‘‘ப⁴த்தம் க³ண்ஹா’’தி நிமந்தியமானோ ‘‘ந மய்ஹம் தவ ப⁴த்தேனத்தோ², பி⁴க்க²ம் க³ண்ஹிஸ்ஸாமீ’’தி வத³தி. ஏத்த² பன மஹாபது³மத்தே²ரோ ஆஹ – ‘‘ஏவம் வத³ந்தோ இமஸ்மிம் ஸிக்கா²பதே³ அனிமந்தனம் காதும் ஸக்கோதி, பு⁴ஞ்ஜனத்தா²ய பன ஓகாஸோ கதோ ஹோதீதி நேவ க³ணபோ⁴ஜனதோ ந சாரித்ததோ முச்சதீ’’தி. மஹாஸுமத்தே²ரோ ஆஹ – ‘‘யத³க்³கே³ன அனிமந்தனம் காதும் ஸக்கோதி, தத³க்³கே³ன நேவ க³ணபோ⁴ஜனம் ந சாரித்தம் ஹோதீ’’தி. ஸேஸம் உத்தானமேவ.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம் ஏத்த² ஹி போ⁴ஜனம் கிரியா, அவிகப்பனம் அகிரியா, நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பரம்பரபோ⁴ஜனஸிக்கா²பத³ம் ததியம்.