4. பட²மஸேனாஸனஸிக்கா²பத³வண்ணனா

108. சதுத்த²ஸிக்கா²பதே³ – ஹேமந்திகே காலேதி ஹேமந்தகாலே ஹிமபாதஸமயே. காயம் ஓதாபேந்தாதி மஞ்சபீடா²தீ³ஸு நிஸின்னா பா³லாதபேன காயம் ஓதாபேந்தா. காலே ஆரோசிதேதி யாகு³ப⁴த்தாதீ³ஸு யஸ்ஸ கஸ்ஸசி காலே ஆரோசிதே. ஓவட்ட²ம் ஹோதீதி ஹிமவஸ்ஸேன ஓவட்ட²ம் திந்தம் ஹோதி.

110. அவஸ்ஸிகஸங்கேதேதி வஸ்ஸிகவஸ்ஸானமாஸாதி ஏவம் அபஞ்ஞத்தே சத்தாரோ ஹேமந்திகே சத்தாரோ ச கி³ம்ஹிகே அட்ட² மாஸேதி அத்தோ². மண்ட³பே வாதி ஸாகா²மண்ட³பே வா பத³ரமண்ட³பே வா. ருக்க²மூலே வாதி யஸ்ஸ கஸ்ஸசி ருக்க²ஸ்ஸ ஹேட்டா². யத்த² காகா வா குலலா வா ந ஊஹத³ந்தீதி யத்த² து⁴வனிவாஸேன குலாவகே கத்வா வஸமானா ஏதே காககுலலா வா அஞ்ஞே வா ஸகுந்தா தம் ஸேனாஸனம் ந ஊஹத³ந்தி, தாதி³ஸே ருக்க²மூலே நிக்கி²பிதும் அனுஜானாமீதி. தஸ்மா யத்த² கோ³சரப்பஸுதா ஸகுந்தா விஸ்ஸமித்வா க³ச்ச²ந்தி, தஸ்ஸ ருக்க²ஸ்ஸ மூலே நிக்கி²பிதும் வட்டதி. யஸ்மிம் பன து⁴வனிவாஸேன குலாவகே கத்வா வஸந்தி, தஸ்ஸ ருக்க²ஸ்ஸ மூலே ந நிக்கி²பிதப்³ப³ம். ‘‘அட்ட² மாஸே’’தி வசனதோ யேஸு ஜனபதே³ஸு வஸ்ஸகாலே ந வஸ்ஸதி, தேஸுபி சத்தாரோ மாஸே நிக்கி²பிதும் ந வட்டதியேவ. ‘‘அவஸ்ஸிகஸங்கேதே’’தி வசனதோ யத்த² ஹேமந்தே தே³வோ வஸ்ஸதி, தத்த² ஹேமந்தேபி அஜ்ஜோ²காஸே நிக்கி²பிதும் ந வட்டதி. கி³ம்ஹே பன ஸப்³ப³த்த² விக³தவலாஹகம் விஸுத்³த⁴ம் நப⁴ம் ஹோதி, ஏவரூபே காலே கேனசிதே³வ கரணீயேன அஜ்ஜோ²காஸே மஞ்சபீட²ம் நிக்கி²பிதும் வட்டதி.

அப்³போ⁴காஸிகேனாபி வத்தம் ஜானிதப்³ப³ம், தஸ்ஸ ஹி ஸசே புக்³க³லிகமஞ்சகோ அத்தி², தத்தே²வ ஸயிதப்³ப³ம். ஸங்கி⁴கம் க³ண்ஹந்தேன வேத்தேன வா வாகேன வா வீதமஞ்சகோ க³ஹேதப்³போ³. தஸ்மிம் அஸதி புராணமஞ்சகோ க³ஹேதப்³போ³. தஸ்மிம்பி அஸதி நவவாயிமோ வா ஓனத்³த⁴கோ வா க³ஹேதப்³போ³. க³ஹேத்வா ச பன ‘‘அஹம் உக்கட்ட²ருக்க²மூலிகோ உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே ருக்க²மூலே வா பஞ்ஞபேத்வா நிபஜ்ஜிதும் ந வட்டதி. ஸசே பன சதுக்³கு³ணேனபி சீவரேன கதகுடி அதேமேந்தம் ரக்கி²தும் ந ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி.

அரஞ்ஞே பண்ணகுடீஸு வஸந்தானம் ஸீலஸம்பதா³ய பஸன்னசித்தா மனுஸ்ஸா நவம் மஞ்சபீட²ம் தே³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி வஸித்வா க³ச்ச²ந்தேஹி ஸாமந்தவிஹாரே ஸபா⁴க³பி⁴க்கூ²னம் பேஸேத்வா க³ந்தப்³ப³ம், ஸபா⁴கா³னம் அபா⁴வே அனோவஸ்ஸகே நிக்கி²பித்வா க³ந்தப்³ப³ம், அனோவஸ்ஸகே அஸதி ருக்கே² லக்³கே³த்வா க³ந்தப்³ப³ம். சேதியங்க³ணே ஸம்மஜ்ஜனிம் க³ஹேத்வா போ⁴ஜனஸாலங்க³ணம் வா உபோஸதா²கா³ரங்க³ணம் வா பரிவேணதி³வாட்டா²னஅக்³கி³ஸாலாதீ³ஸு வா அஞ்ஞதரம் ஸம்மஜ்ஜித்வா தோ⁴வித்வா புன ஸம்மஜ்ஜனீமாளகேயேவ ட²பேதப்³பா³. உபோஸதா²கா³ராதீ³ஸு அஞ்ஞதரஸ்மிம் க³ஹேத்வா அவஸேஸானி ஸம்மஜ்ஜந்தஸ்ஸாபி ஏஸேவ நயோ.

யோ பன பி⁴க்கா²சாரமக்³க³ம் ஸம்மஜ்ஜந்தோவ க³ந்துகாமோ ஹோதி, தேன ஸம்மஜ்ஜித்வா ஸசே அந்தராமக்³கே³ ஸாலா அத்தி², தத்த² ட²பேதப்³பா³. ஸசே நத்தி², வலாஹகானம் அனுட்டி²தபா⁴வம் ஸல்லக்கே²த்வா ‘‘யாவாஹம் கா³மதோ நிக்க²மாமி, தாவ ந வஸ்ஸிஸ்ஸதீ’’தி ஜானந்தேன யத்த² கத்த²சி நிக்கி²பித்வா புன பச்சாக³ச்ச²ந்தேன பாகதிகட்டா²னே ட²பேதப்³பா³. ஸசே வஸ்ஸிஸ்ஸதீதி ஜானந்தோ அஜ்ஜோ²காஸே ட²பேதி, து³க்கடந்தி மஹாபச்சரியம் வுத்தம். ஸசே பன தத்ர தத்ரேவ ஸம்மஜ்ஜனத்தா²ய ஸம்மஜ்ஜனீ நிக்கி²த்தா ஹோதி, தம் தம் டா²னம் ஸம்மஜ்ஜித்வா தத்ர தத்ரேவ நிக்கி²பிதும் வட்டதி. ஆஸனஸாலம் ஸம்மஜ்ஜந்தேன வத்தம் ஜானிதப்³ப³ம். தத்ரித³ம் வத்தம் – மஜ்ஜ²தோ பட்டா²ய பாத³ட்டா²னாபி⁴முகா² வாலிகா ஹரிதப்³பா³. கசவரம் ஹத்தே²ஹி க³ஹேத்வா ப³ஹி ச²ட்³டே³தப்³ப³ம்.

111. மஸாரகோதி மஞ்சபாதே³ விஜ்ஜி²த்வா தத்த² அடனியோ பவேஸேத்வா கதோ. பு³ந்தி³காப³த்³தோ⁴தி அடனீஹி மஞ்சபாதே³ ட³ம்ஸாபேத்வா பல்லங்கஸங்கே²பேன கதோ. குளீரபாத³கோதி அஸ்ஸமேண்ட³காதீ³னம் பாத³ஸதி³ஸேஹி பாதே³ஹி கதோ. யோ வா பன கோசி வங்கபாத³கோ, அயம் வுச்சதி குளீரபாத³கோ. ஆஹச்சபாத³கோதி அயம் பன ‘‘ஆஹச்சபாத³கோ நாம மஞ்சோ அங்கே³ விஜ்ஜி²த்வா கதோ ஹோதீ’’தி ஏவம் பரதோ பாளியம்யேவ வுத்தோ, தஸ்மா அடனியோ விஜ்ஜி²த்வா தத்த² பாத³ஸிக²ம் பவேஸேத்வா உபரி ஆணிம் த³த்வா கதமஞ்சோ ‘‘ஆஹச்சபாத³கோ’’தி வேதி³தப்³போ³. பீடே²பி ஏஸேவ நயோ. அந்தோ ஸம்வேடே²த்வா ப³த்³த⁴ம் ஹோதீதி ஹேட்டா² ச உபரி ச வித்த²தம் மஜ்ஜே² ஸங்கி²த்தம் பணவஸண்டா²னம் கத்வா ப³த்³த⁴ம் ஹோதி, தம் கிர மஜ்ஜே² ஸீஹப்³யக்³க⁴சம்மபரிக்கி²த்தம்பி கரோந்தி. அகப்பியசம்மம் நாமேத்த² நத்தி². ஸேனாஸனஞ்ஹி ஸோவண்ணமயம்பி வட்டதி, தஸ்மா தம் மஹக்³க⁴ம் ஹோதி. அனுபஸம்பன்னம் ஸந்த²ராபேதி தஸ்ஸ பலிபோ³தோ⁴தி யேன ஸந்த²ராபிதம், தஸ்ஸ பலிபோ³தோ⁴. லேட்³டு³பாதம் அதிக்கமந்தஸ்ஸ ஆபத்தி பாசித்தியஸ்ஸாதி தா²மமஜ்ஜி²மஸ்ஸ புரிஸஸ்ஸ லேட்³டு³பாதம் அதிக்கமந்தஸ்ஸ பாசித்தியம்.

அயம் பனேத்த² வினிச்ச²யோ – தே²ரோ போ⁴ஜனஸாலாயம் ப⁴த்தகிச்சம் கத்வா த³ஹரம் ஆணாபேதி ‘‘க³ச்ச² தி³வாட்டா²னே மஞ்சபீட²ம் பஞ்ஞபேஹீ’’தி. ஸோ ததா² கத்வா நிஸின்னோ. தே²ரோ யதா²ருசிம் விசரித்வா தத்த² க³ந்த்வா த²விகம் வா உத்தராஸங்க³ம் வா ட²பேதி, ததோ பட்டா²ய தே²ரஸ்ஸ பலிபோ³தோ⁴. நிஸீதி³த்வா ஸயம் க³ச்ச²ந்தோ நேவ உத்³த⁴ரதி, ந உத்³த⁴ராபேதி, லேட்³டு³பாதாதிக்கமே பாசித்தியம். ஸசே பன தே²ரோ தத்த² த²விகம் வா உத்தராஸங்க³ம் வா அட்ட²பேத்வா சங்கமந்தோவ த³ஹரம் ‘‘க³ச்ச² த்வ’’ந்தி ப⁴ணதி, தேன ‘‘இத³ம் ப⁴ந்தே மஞ்சபீட²’’ந்தி ஆசிக்கி²தப்³ப³ம். ஸசே தே²ரோ வத்தம் ஜானாதி ‘‘த்வம் க³ச்ச², அஹம் பாகதிகம் கரிஸ்ஸாமீ’’தி வத்தப்³ப³ம். ஸசே பா³லோ ஹோதி அனுக்³க³ஹிதவத்தோ ‘‘க³ச்ச², மா இத⁴ திட்ட², நேவ நிஸீதி³தும் ந நிபஜ்ஜிதும் தே³மீ’’தி த³ஹரம் தஜ்ஜேதியேவ. த³ஹரேன ‘‘ப⁴ந்தே ஸுக²ம் ஸயதா²’’தி கப்பம் லபி⁴த்வா வந்தி³த்வா க³ந்தப்³ப³ம். தஸ்மிம் க³தே தே²ரஸ்ஸேவ பலிபோ³தோ⁴. புரிமனயேனேவ சஸ்ஸ ஆபத்தி வேதி³தப்³பா³.

அத² பன ஆணத்திக்க²ணேயேவ த³ஹரோ ‘‘மய்ஹம் ப⁴ந்தே ப⁴ண்ட³கதோ⁴வனாதி³ கிஞ்சி கரணீயம் அத்தீ²’’தி வத³தி, தே²ரோ ச நம் ‘‘த்வம் பஞ்ஞபேத்வா க³ச்சா²ஹீ’’தி வத்வா போ⁴ஜனஸாலதோ நிக்க²மித்வா அஞ்ஞத்த² க³ச்ச²தி, பாது³த்³தா⁴ரேன காரேதப்³போ³. ஸசே தத்தே²வ க³ந்த்வா நிஸீத³தி புரிமனயேனேவ சஸ்ஸ லேட்³டு³பாதாதிக்கமே ஆபத்தி. ஸசே பன தே²ரோ ஸாமணேரம் ஆணாபேதி, ஸாமணேரே தத்த² மஞ்சபீட²ம் பஞ்ஞபேத்வா நிஸின்னேபி போ⁴ஜனஸாலதோ அஞ்ஞத்த² க³ச்ச²ந்தோ பாது³த்³தா⁴ரேன காரேதப்³போ³. க³ந்த்வா நிஸின்னோ புன க³மனகாலே லேட்³டு³பாதாதிக்கமே ஆபத்தியா காரேதப்³போ³. ஸசே பன ஆணாபேந்தோ மஞ்சபீட²ம் பஞ்ஞபேத்வா தத்தே²வ நிஸீதா³தி ஆணாபேதி, யத்ரிச்ச²தி தத்ர க³ந்த்வா ஆக³ந்தும் லப⁴தி. ஸயம் பன பாகதிகம் அகத்வா க³ச்ச²ந்தஸ்ஸ லேட்³டு³பாதாதிக்கமே பாசித்தியம். அந்தரஸன்னிபாதே மஞ்சபீடா²னி பஞ்ஞபேத்வா நிஸின்னேஹி க³மனகாலே ஆராமிகானம் இமம் படிஸாமேதா²தி வத்தப்³ப³ம், அவத்வா க³ச்ச²ந்தானம் லேட்³டு³பாதாதிக்கமே ஆபத்தி.

மஹாத⁴ம்மஸவனம் நாம ஹோதி தத்த² உபோஸதா²கா³ரதோபி போ⁴ஜனஸாலதோபி ஆஹரித்வா மஞ்சபீடா²னி பஞ்ஞபேந்தி. ஆவாஸிகானம்யேவ பலிபோ³தோ⁴. ஸசே ஆக³ந்துகா ‘‘இத³ம் அம்ஹாகம் உபஜ்ஜா²யஸ்ஸ இத³ம் ஆசரியஸ்ஸா’’தி க³ண்ஹந்தி, ததோ பட்டா²ய தேஸம்யேவ பலிபோ³தோ⁴. க³மனகாலே பாகதிகம் அகத்வா லேட்³டு³பாதம் அதிக்கமந்தானம் ஆபத்தி. மஹாபச்சரியம் புன வுத்தம் – ‘‘யாவ அஞ்ஞே ந நிஸீத³ந்தி, தாவ யேஹி பஞ்ஞத்தம், தேஸம் பா⁴ரோ. அஞ்ஞேஸு ஆக³ந்த்வா நிஸின்னேஸு நிஸின்னகானம் பா⁴ரோ. ஸசே தே அனுத்³த⁴ரித்வா வா அனுத்³த⁴ராபேத்வா வா க³ச்ச²ந்தி, து³க்கடம். கஸ்மா? அனாணத்தியா பஞ்ஞபிதத்தா’’தி. த⁴ம்மாஸனே பஞ்ஞத்தே யாவ உஸ்ஸாரகோ வா த⁴ம்மகதி²கோ வா நாக³ச்ச²தி, தாவ பஞ்ஞாபகானம் பலிபோ³தோ⁴, தஸ்மிம் ஆக³ந்த்வா நிஸின்னே தஸ்ஸ பலிபோ³தோ⁴. ஸகலம் அஹோரத்தம் த⁴ம்மஸவனம் ஹோதி, அஞ்ஞோ உஸ்ஸாரகோ வா த⁴ம்மகதி²கோ வா உட்ட²ஹதி, அஞ்ஞோ நிஸீத³தி, யோ யோ ஆக³ந்த்வா நிஸீத³தி, தஸ்ஸ தஸ்ஸ பா⁴ரோ. உட்ட²ஹந்தேன பன ‘‘இத³மாஸனம் தும்ஹாகம் பா⁴ரோ’’தி வத்வா க³ந்தப்³ப³ம். ஸசேபி இதரஸ்மிம் அனாக³தேயேவ பட²மம் நிஸின்னோ உட்டா²ய க³ச்ச²தி, தஸ்மிஞ்ச அந்தோஉபசாரட்டே²யேவ இதரோ ஆக³ந்த்வா நிஸீத³தி, உட்டா²ய க³தோ ஆபத்தியா ந காரேதப்³போ³. ஸசே பன இதரஸ்மிம் அனாக³தேயேவ பட²மம் நிஸின்னோ உட்டா²யாஸனா லேட்³டு³பாதம் அதிக்கமதி, ஆபத்தியா காரேதப்³போ³. ஸப்³ப³த்த² ச ‘‘லேட்³டு³பாதாதிக்கமே பட²மபாதே³ து³க்கடம், து³தியே பாசித்திய’’ந்தி அயம் நயோ மஹாபச்சரியம் வுத்தோ.

112. சிமிலிகம் வாதிஆதீ³ஸு சிமிலிகா நாம ஸுதா⁴தி³பரிகம்மகதாய பூ⁴மியா வண்ணானுரக்க²ணத்த²ம் கதா ஹோதி, தம் ஹேட்டா² பத்த²ரித்வா உபரி கடஸாரகம் பத்த²ரந்தி. உத்தரத்த²ரணம் நாம மஞ்சபீடா²னம் உபரி அத்த²ரிதப்³ப³கம் பச்சத்த²ரணம். பூ⁴மத்த²ரணம் நாம பூ⁴மியம் அத்த²ரிதப்³பா³ கடஸாரகாதி³விகதி. தட்டிகம் நாம தாலபண்ணேஹி வா வாகேஹி வா கததட்டிகா. சம்மக²ண்டோ³ நாம ஸீஹப்³யக்³க⁴தீ³பிதரச்ச²சம்மாதீ³ஸுபி யம்கிஞ்சி சம்மம். அட்ட²கதா²ஸு ஹி ஸேனாஸனபரிபோ⁴கே³ படிக்கி²த்தசம்மம் நாம ந தி³ஸ்ஸதி, தஸ்மா ஸீஹசம்மாதீ³னம் பரிஹரணேயேவ படிக்கே²போ வேதி³தப்³போ³. பாத³புஞ்ச²னீ நாம ரஜ்ஜுகேஹி வா பிலோதிகாஹி வா பாத³புஞ்ச²னத்த²ம் கதா. ப²லகபீட²ம் நாம ப²லகமயம் பீட²ம். அத² வா ப²லகஞ்சேவ தா³ருமயபீட²ஞ்ச; ஏதேன ஸப்³ப³ம்பி தா³ருப⁴ண்டா³தி³ ஸங்க³ஹிதம். மஹாபச்சரியம் பன வித்தா²ரேனேவ வுத்தம் – ‘‘ஆதா⁴ரகம் பத்தபிதா⁴னம் பாத³கத²லிகம் தாலவண்டம் பீ³ஜனீபத்தகம் யம்கிஞ்சி தா³ருப⁴ண்ட³ம் அந்தமஸோ பானீயஉளுங்கம் பானீயஸங்க²ம் அஜ்ஜோ²காஸே நிக்கி²பித்வா க³ச்ச²ந்தஸ்ஸ து³க்கட’’ந்தி. மஹாஅட்ட²கதா²யம் பன ஏஸ நயோ து³தியஸிக்கா²பதே³ த³ஸ்ஸிதோ. அஜ்ஜோ²காஸே ரஜனம் பசித்வா ரஜனபா⁴ஜனம் ரஜனஉளுங்கோ ரஜனதோ³ணிகாதி ஸப்³ப³ம் அக்³கி³ஸாலாய படிஸாமேதப்³ப³ம். ஸசே அக்³கி³ஸாலா நத்தி², அனோவஸ்ஸகே பப்³பா⁴ரே நிக்கி²பிதப்³ப³ம். தஸ்மிம்பி அஸதி யத்த² ஓலோகேந்தா பி⁴க்கூ² பஸ்ஸந்தி, தாதி³ஸே டா²னே ட²பேத்வாபி க³ந்தும் வட்டதி.

அஞ்ஞஸ்ஸ புக்³க³லிகேதி யஸ்மிம் விஸ்ஸாஸக்³கா³ஹோ ந ருஹதி, தஸ்ஸ ஸந்தகே து³க்கடம். யஸ்மிம் பன விஸ்ஸாஸோ ருஹதி, தஸ்ஸ ஸந்தகம் அத்தனோ புக்³க³லிகமிவ ஹோதீதி மஹாபச்சரியாதீ³ஸு வுத்தம்.

113. ஆபுச்ச²ம் க³ச்ச²தீதி யோ பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதி, அத்தனோ பலிபோ³த⁴ம் விய மஞ்ஞதி, யோ ததா²ரூபம் ஆபுச்சி²த்வா க³ச்ச²தி, தஸ்ஸ அனாபத்தி. ஓதாபேந்தோ க³ச்ச²தீதி ஆதபே ஓதாபேந்தோ ஆக³ந்த்வா உத்³த⁴ரிஸ்ஸாமீதி க³ச்ச²தி; ஏவம் க³ச்ச²தோ அனாபத்தி. கேனசி பலிபு³த்³த⁴ம் ஹோதீதி ஸேனாஸனம் கேனசி உபத்³து³தம் ஹோதீதி அத்தோ². ஸசேபி ஹி வுட்³ட⁴தரோ பி⁴க்கு² உட்டா²பேத்வா க³ண்ஹாதி, ஸசேபி யக்கோ² வா பேதோ வா ஆக³ந்த்வா நிஸீத³தி, கோசி வா இஸ்ஸரோ ஆக³ந்த்வா க³ண்ஹாதி, ஸேனாஸனம் பலிபு³த்³த⁴ம் ஹோதி, ஸீஹப்³யக்³கா⁴தீ³ஸு வா பன தம் பதே³ஸம் ஆக³ந்த்வா டி²தேஸுபி ஸேனாஸனம் பலிபு³த்³த⁴ம் ஹோதியேவ. ஏவம் கேனசி பலிபு³த்³தே⁴ அனுத்³த⁴ரித்வாபி க³ச்ச²தோ அனாபத்தி. ஆபதா³ஸூதி ஜீவிதப்³ரஹ்மசரியந்தராயேஸு. ஸேஸம் உத்தானமேவாதி.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மஸேனாஸனஸிக்கா²பத³ம் சதுத்த²ம்.