2. பூ⁴தகா³மவக்³கோ³

1. பூ⁴தகா³மஸிக்கா²பத³வண்ணனா

89. ஸேனாஸனவக்³க³ஸ்ஸ பட²மஸிக்கா²பதே³ – அனாதி³யந்தோதி தஸ்ஸா வசனம் அக³ண்ஹந்தோ. தா³ரகஸ்ஸ பா³ஹும் ஆகோடேஸீதி உக்கி²த்தம் ப²ரஸும் நிக்³க³ஹேதும் அஸக்கோந்தோ மனுஸ்ஸானம் சக்கு²விஸயாதீதே மஹாராஜஸந்திகா லத்³தே⁴ ருக்க²ட்ட²கதி³ப்³ப³விமானே நிபன்னஸ்ஸ தா³ரகஸ்ஸ பா³ஹும் த²னமூலேயேவ சி²ந்தி³. ந கோ² மேதம் பதிரூபந்திஆதி³ம்ஹி அயம் ஸங்கே²பவண்ணனா – ஹிமவந்தே கிர பக்க²தி³வஸேஸு தே³வதாஸன்னிபாதோ ஹோதி, தத்த² ருக்க²த⁴ம்மம் புச்ச²ந்தி – ‘‘த்வம் ருக்க²த⁴ம்மே டி²தா ந டி²தா’’தி? ருக்க²த⁴ம்மோ நாம ருக்கே² சி²ஜ்ஜமானே ருக்க²தே³வதாய மனோபதோ³ஸஸ்ஸ அகரணம். தத்த² யா தே³வதா ருக்க²த⁴ம்மே அட்டி²தா ஹோதி, ஸா தே³வதாஸன்னிபாதம் பவிஸிதும் ந லப⁴தி. இதி ஸா தே³வதா இமஞ்ச ருக்க²த⁴ம்மே அட்டா²னபச்சயம் ஆதீ³னவம் அத்³த³ஸ, ப⁴க³வதோ ச ஸம்முகா² ஸுதபுப்³ப³த⁴ம்மதே³ஸனானுஸாரேன ததா²க³தஸ்ஸ ச²த்³த³ந்தாதி³காலே புப்³ப³சரிதம் அனுஸ்ஸரி. தேனஸ்ஸா ஏதத³ஹோஸி – ‘‘ந கோ² மேதம் பதிரூபம்…பே… வோரோபேய்ய’’ந்தி. யம்னூனாஹம் ப⁴க³வதோ ஏதமத்த²ம் ஆரோசேய்யந்தி இத³ம் பனஸ்ஸா ‘‘அயம் பி⁴க்கு² ஸபிதிகோ புத்தோ, அத்³தா⁴ ப⁴க³வா இமம் இமஸ்ஸ அஜ்ஜா²சாரம் ஸுத்வா மரியாத³ம் ப³ந்தி⁴ஸ்ஸதி, ஸிக்கா²பத³ம் பஞ்ஞபேஸ்ஸதீ’’தி படிஸஞ்சிக்க²ந்தியா அஹோஸி. ஸசஜ்ஜ த்வம் தே³வதேதி ஸசே அஜ்ஜ த்வம் தே³வதே. பஸவேய்யாஸீதி ஜனேய்யாஸி உப்பாதே³ய்யாஸி. ஏவஞ்ச பன வத்வா ப⁴க³வா தம் தே³வதம் ஸஞ்ஞாபேந்தோ –

‘‘யோ வே உப்பதிதம் கோத⁴ம், ரத²ம் ப⁴ந்தம்வ வாரயே;

தமஹம் ஸாரதி²ம் ப்³ரூமி, ரஸ்மிக்³கா³ஹோ இதரோ ஜனோ’’தி. (த⁴. ப. 222);

இமம் கா³த²மபா⁴ஸி. கா³தா²பரியோஸானே ஸா தே³வதா ஸோதாபத்திப²லே பதிட்டா²ஸி. புன ப⁴க³வா ஸம்பத்தபரிஸாய த⁴ம்மம் தே³ஸேந்தோ –

‘‘யோ உப்பதிதம் வினேதி கோத⁴ம், விஸடம் ஸப்பவிஸம்வ ஓஸதே⁴ஹி;

ஸோ பி⁴க்கு² ஜஹாதி ஓரபாரம், உரகோ³ ஜிண்ணமிவத்தசம் புராண’’ந்தி. (ஸு. நி. 1);

இமம் கா³த²மபா⁴ஸி. தத்ர பட²மகா³தா² த⁴ம்மபதே³ ஸங்க³ஹம் ஆருள்ஹா, து³தியா ஸுத்தனிபாதே, வத்து² பன வினயேதி. அத² ப⁴க³வா த⁴ம்மம் தே³ஸேந்தோயேவ தஸ்ஸா தே³வதாய வஸனட்டா²னம் ஆவஜ்ஜந்தோ பதிரூபம் டா²னம் தி³ஸ்வா ‘‘க³ச்ச², தே³வதே, அஸுகஸ்மிம் ஓகாஸே ருக்கோ² விவித்தோ, தஸ்மிம் உபக³ச்சா²’’தி ஆஹ. ஸோ கிர ருக்கோ² ந ஆளவிரட்டே², ஜேதவனஸ்ஸ அந்தோபரிக்கே²பே, யஸ்ஸ தே³வபுத்தஸ்ஸ பரிக்³க³ஹோ அஹோஸி, ஸோ சுதோ; தஸ்மா ‘‘விவித்தோ’’தி வுத்தோ. ததோ பட்டா²ய ச பன ஸா தே³வதா ஸம்மாஸம்பு³த்³த⁴தோ லத்³த⁴பரிஹாரா பு³த்³து⁴பட்டா²யிகா அஹோஸி. யதா³ தே³வதாஸமாக³மோ ஹோதி, ததா³ மஹேஸக்க²தே³வதாஸு ஆக³ச்ச²ந்தீஸு அஞ்ஞா அப்பேஸக்கா² தே³வதா யாவ மஹாஸமுத்³த³சக்கவாளபப்³ப³தா தாவ படிக்கமந்தி. அயம் பன அத்தனோ வஸனட்டா²னே நிஸீதி³த்வாவ த⁴ம்மம் ஸுணாதி. யம்பி பட²மயாமே பி⁴க்கூ² பஞ்ஹம் புச்ச²ந்தி, மஜ்ஜி²மயாமே தே³வதா, தம் ஸப்³ப³ம் தத்தே²வ நிஸீதி³த்வா ஸுணாதி. சத்தாரோ ச மஹாராஜானோபி ப⁴க³வதோ உபட்டா²னம் ஆக³ந்த்வா க³ச்ச²ந்தா தம் தே³வதம் தி³ஸ்வாவ க³ச்ச²ந்தி.

90. பூ⁴தகா³மபாதப்³யதாயாதி ஏத்த² ப⁴வந்தி அஹுவுஞ்சாதி பூ⁴தா; ஜாயந்தி வட்³ட⁴ந்தி ஜாதா வட்³டி⁴தா சாதி அத்தோ². கா³மோதி ராஸி; பூ⁴தானம் கா³மோதி பூ⁴தகா³மோ; பூ⁴தா ஏவ வா கா³மோ பூ⁴தகா³மோ; பதிட்டி²தஹரிததிணருக்கா²தீ³னமேதம் அதி⁴வசனம். பாதப்³யஸ்ஸ பா⁴வோ பாதப்³யதா; சே²த³னபே⁴த³னாதீ³ஹி யதா²ருசி பரிபு⁴ஞ்ஜிதப்³ப³தாதி அத்தோ². தஸ்ஸா பூ⁴தகா³மபாதப்³யதாய; நிமித்தத்தே² பு⁴ம்மவசனம், பூ⁴தகா³மபாதப்³யதாஹேது, பூ⁴தகா³மஸ்ஸ சே²த³னாதி³பச்சயா பாசித்தியந்தி அத்தோ².

91. இதா³னி தம் பூ⁴தகா³மம் விப⁴ஜித்வா த³ஸ்ஸேந்தோ பூ⁴தகா³மோ நாம பஞ்ச பீ³ஜஜாதானீதிஆதி³மாஹ. தத்த² பூ⁴தகா³மோ நாமாதி பூ⁴தகா³மம் உத்³த⁴ரித்வா யஸ்மிம் ஸதி பூ⁴தகா³மோ ஹோதி, தம் த³ஸ்ஸேதும் ‘‘பஞ்ச பீ³ஜஜாதானீ’’தி ஆஹாதி அட்ட²கதா²ஸு வுத்தம். ஏவம் ஸந்தேபி ‘‘யானி வா பனஞ்ஞானிபி அத்தி² மூலே ஜாயந்தீ’’திஆதீ³னி ந ஸமேந்தி. ந ஹி மூலபீ³ஜாதீ³னி மூலாதீ³ஸு ஜாயந்தி, மூலாதீ³ஸு ஜாயமானானி பன தானி பீ³ஜாகதானி, தஸ்மா ஏவமேத்த² வண்ணனா வேதி³தப்³பா³ – பூ⁴தகா³மோ நாமாதி விப⁴ஜிதப்³ப³பத³ம். பஞ்சாதி தஸ்ஸ விபா⁴க³பரிச்சே²தோ³. பீ³ஜஜாதானீதி பரிச்சி²ன்னத⁴ம்மனித³ஸ்ஸனம். தஸ்ஸத்தோ² – பீ³ஜேஹி ஜாதானி பீ³ஜஜாதானி; ருக்கா²தீ³னமேதம் அதி⁴வசனம். அபரோ நயோ – பீ³ஜானி ச தானி விஜாதானி ச பஸூதானி நிப்³ப³த்தபண்ணமூலானீதி பீ³ஜஜாதானி. ஏதேன அல்லவாலிகாதீ³ஸு ட²பிதானம் நிப்³ப³த்தபண்ணமூலானம் ஸிங்கி³வேராதீ³னம் ஸங்க³ஹோ கதோ ஹோதி.

இதா³னி யேஹி பீ³ஜேஹி ஜாதத்தா ருக்கா²தீ³னி பீ³ஜஜாதானீதி வுத்தானி, தானி த³ஸ்ஸேந்தோ ‘‘மூலபீ³ஜ’’ந்திஆதி³மாஹ. தேஸம் உத்³தே³ஸோ பாகடோ ஏவ. நித்³தே³ஸே யானி வா பனஞ்ஞானிபி அத்தி² மூலே ஜாயந்தி மூலே ஸஞ்ஜாயந்தீதி ஏத்த² பீ³ஜதோ நிப்³ப³த்தேன பீ³ஜம் த³ஸ்ஸிதம், தஸ்மா ஏவமேத்த² அத்தோ² த³ட்ட²ப்³போ³, யானி வா பனஞ்ஞானிபி அத்தி² ஆலுவகஸேருகமலுப்பலபுண்ட³ரீககுவலயகந்த³பாடலிமூலாதி³பே⁴தே³ மூலே க³ச்ச²வல்லிருக்கா²தீ³னி ஜாயந்தி ஸஞ்ஜாயந்தி, தானி யம்ஹி மூலே ஜாயந்தி சேவ ஸஞ்ஜாயந்தி ச தஞ்ச, பாளியம் வுத்தம் ஹலித்³தா³தி³ ச ஸப்³ப³ம்பி ஏதம் மூலபீ³ஜம் நாம. ஏஸேவ நயோ க²ந்த⁴பீ³ஜாதீ³ஸு. யேவாபனகக²ந்த⁴பீ³ஜேஸு பனேத்த² அம்பா³டகஇந்த³ஸாலனுஹீபாளிப⁴த்³த³கணிகாராதீ³னி க²ந்த⁴பீ³ஜானி, அமூலவல்லி சதுரஸ்ஸவல்லிகணவீராதீ³னி ப²ளுபீ³ஜானி மகசிஸுமனஜயஸுமனாதீ³னி அக்³க³பீ³ஜானி, அம்ப³ஜம்பூ³பனஸட்டி²ஆதீ³னி பீ³ஜபீ³ஜானீதி த³ட்ட²ப்³பா³னி.

92. இதா³னி யம் வுத்தம் ‘‘பூ⁴தகா³மபாதப்³யதாய பாசித்திய’’ந்தி தத்த² ஸஞ்ஞாவஸேன ஆபத்தானாபத்திபே⁴த³ம் பாதப்³யதாபே⁴த³ஞ்ச த³ஸ்ஸேந்தோ பீ³ஜே பீ³ஜஸஞ்ஞீதிஆதி³மாஹ. தத்த² யதா² ‘‘ஸாலீனம் சேபி ஓத³னம் பு⁴ஞ்ஜதீ’’திஆதீ³ஸு (ம. நி. 1.76) ஸாலிதண்டு³லானம் ஓத³னோ ‘‘ஸாலீனம் ஓத³னோ’’தி வுச்சதி, ஏவம் பீ³ஜதோ ஸம்பூ⁴தோ பூ⁴தகா³மோ ‘‘பீ³ஜ’’ந்தி வுத்தோதி வேதி³தப்³போ³. யம் பன ‘‘பீ³ஜகா³மபூ⁴தகா³மஸமாரம்பா⁴ படிவிரதோ’’திஆதீ³ஸு (தீ³. நி. 1.10) வுத்தம் பூ⁴தகா³மபரிமோசனம் கத்வா ட²பிதம் பீ³ஜம், தம் து³க்கடவத்து². அத² வா யதே³தம் ‘‘பூ⁴தகா³மோ நாமா’’தி ஸிக்கா²பத³விப⁴ங்க³ஸ்ஸ ஆதி³பத³ம், தேன ஸத்³தி⁴ம் யோஜேத்வா யம் பீ³ஜம் பூ⁴தகா³மோ நாம ஹோதி, தஸ்மிம் பீ³ஜே பீ³ஜஸஞ்ஞீ ஸத்த²காதீ³னி க³ஹேத்வா ஸயம் வா சி²ந்த³தி அஞ்ஞேன வா சே²தா³பேதி, பாஸாணாதீ³னி க³ஹேத்வா ஸயம் வா பி⁴ந்த³தி அஞ்ஞேன வா பே⁴தா³பேதி, அக்³கி³ம் உபஸம்ஹரித்வா ஸயம் வா பசதி அஞ்ஞேன வா பசாபேதி, ஆபத்தி பாசித்தியஸ்ஸாதி ஏவமேத்த² அத்தோ² வேதி³தப்³போ³. யதா²ருதம் பன க³ஹேத்வா பூ⁴தகா³மவினிமுத்தஸ்ஸ பீ³ஜஸ்ஸ சி²ந்த³னாதி³பே⁴தா³ய பாதப்³யதாய பாசித்தியம் ந வத்தப்³ப³ம்.

அயஞ்ஹேத்த² வினிச்ச²யகதா² – பூ⁴தகா³மம் விகோபேந்தஸ்ஸ பாசித்தியம் பூ⁴தகா³மபரிமோசிதம் பஞ்சவித⁴ம்பி பீ³ஜகா³மம் விகோபேந்தஸ்ஸ து³க்கடம். பீ³ஜகா³மபூ⁴தகா³மோ நாமேஸ அத்தி² உத³கட்டோ², அத்தி² த²லட்டோ². தத்த² உத³கட்டோ² ஸாஸபமத்திகா திலபீ³ஜகாதி³பே⁴தா³ ஸபண்ணிகா அபண்ணிகா ச ஸப்³பா³ ஸேவாலஜாதி அந்தமஸோ உத³கபப்படகம் உபாதா³ய ‘‘பூ⁴தகா³மோ’’தி வேதி³தப்³போ³. உத³கபப்படகோ நாம உபரி த²த்³தோ⁴ ப²ருஸவண்ணோ, ஹேட்டா² முது³ நீலவண்ணோ ஹோதி. தத்த² யஸ்ஸ ஸேவாலஸ்ஸ மூலம் ஓரூஹித்வா பத²வியம் பதிட்டி²தம், தஸ்ஸ பத²வீ டா²னம். யோ உத³கே ஸஞ்சரதி, தஸ்ஸ உத³கம். பத²வியம் பதிட்டி²தம் யத்த² கத்த²சி விகோபேந்தஸ்ஸ உத்³த⁴ரித்வா வா டா²னந்தரம் ஸங்காமேந்தஸ்ஸ பாசித்தியம். உத³கே ஸஞ்சரந்தம் விகோபேந்தஸ்ஸேவ பாசித்தியம். ஹத்தே²ஹி பன இதோ சிதோ ச வியூஹித்வா ந்ஹாயிதும் வட்டதி, ஸகலஞ்ஹி உத³கம் தஸ்ஸ டா²னம். தஸ்மா ந ஸோ ஏத்தாவதா டா²னந்தரம் ஸங்காமிதோ ஹோதி. உத³கதோ பன உத³கேன வினா ஸஞ்சிச்ச உக்கி²பிதும் ந வட்டதி, உத³கேன ஸத்³தி⁴ம் உக்கி²பித்வா புன உத³கே பக்கி²பிதும் வட்டதி. பரிஸ்ஸாவனந்தரேன நிக்க²மதி, கப்பியம் காராபேத்வாவ உத³கம் பரிபு⁴ஞ்ஜிதப்³ப³ம். உப்பலினீபது³மினீஆதீ³னி ஜலஜவல்லிதிணானி உத³கதோ உத்³த⁴ரந்தஸ்ஸ வா தத்தே²வ விகோபேந்தஸ்ஸ வா பாசித்தியம். பரேஹி உப்பாடிதானி விகோபேந்தஸ்ஸ து³க்கடம். தானி ஹி பீ³ஜகா³மே ஸங்க³ஹம் க³ச்ச²ந்தி. திலபீ³ஜகஸாஸபமத்தகஸேவாலோபி உத³கதோ உத்³த⁴தோ அமிலாதோ அக்³க³பீ³ஜஸங்க³ஹம் க³ச்ச²தி. மஹாபச்சரியாதீ³ஸு ‘‘அனந்தகதிலபீ³ஜகஉத³கபப்படகாதீ³னி து³க்கடவத்து²கானீ’’தி வுத்தம், தத்த² காரணம் ந தி³ஸ்ஸதி. அந்த⁴கட்ட²கதா²யம் ‘‘ஸம்புண்ணபூ⁴தகா³மோ ந ஹோதி, தஸ்மா து³க்கட’’ந்தி வுத்தம், தம்பி ந ஸமேதி, பூ⁴தகா³மே ஹி பாசித்தியம், பீ³ஜகா³மே து³க்கடம் வுத்தம். அஸம்புண்ணபூ⁴தகா³மோ நாம ததியோ கோட்டா²ஸோ நேவ பாளியம் ந அட்ட²கதா²ஸு ஆக³தோ. அத² ஏதம் பீ³ஜகா³மஸங்க³ஹம் க³ச்சி²ஸ்ஸதீதி, தம்பி ந யுத்தம், அபூ⁴தகா³மமூலத்தா தாதி³ஸஸ்ஸ பீ³ஜகா³மஸ்ஸாதி. அபிச ‘‘க³ருகலஹுகேஸு க³ருகே டா²தப்³ப³’’ந்தி ஏதம் வினயலக்க²ணம்.

த²லட்டே² – சி²ன்னருக்கா²னம் அவஸிட்டோ² ஹரிதகா²ணு நாம ஹோதி. தத்த² ககுத⁴கரஞ்ஜபியங்கு³பனஸாதீ³னம் கா²ணு உத்³த⁴ம் வட்³ட⁴தி, ஸோ பூ⁴தகா³மேன ஸங்க³ஹிதோ. தாலனாளிகேராதீ³னம் கா²ணு உத்³த⁴ம் ந வட்³ட⁴தி, ஸோ பீ³ஜகா³மேன ஸங்க³ஹிதோ. கத³லியா பன அப²லிதாய கா²ணு பூ⁴தகா³மேன ஸங்க³ஹிதோ, ப²லிதாய பீ³ஜகா³மேன. கத³லீ பன ப²லிதா யாவ நீலபண்ணா, தாவ பூ⁴தகா³மேனேவ ஸங்க³ஹிதா, ததா² ப²லிதோ வேளு. யதா³ பன அக்³க³தோ பட்டா²ய ஸுஸ்ஸதி, ததா³ பீ³ஜகா³மேன ஸங்க³ஹம் க³ச்ச²தி. கதரபீ³ஜகா³மேன? ப²ளுபீ³ஜகா³மேன. கிம் ததோ நிப்³ப³த்ததி? ந கிஞ்சி. யதி³ ஹி நிப்³ப³த்தேய்ய, பூ⁴தகா³மேனேவ ஸங்க³ஹம் க³ச்சே²ய்ய. இந்த³ஸாலாதி³ருக்கே² சி²ந்தி³த்வா ராஸிம் கரோந்தி, கிஞ்சாபி ராஸிகதத³ண்ட³கேஹி ரதனப்பமாணாபி ஸாகா² நிக்க²மந்தி, பீ³ஜகா³மேனேவ ஸங்க³ஹம் க³ச்ச²ந்தி. தத்த² மண்ட³பத்தா²ய வா வதிஅத்தா²ய வா வல்லிஆரோபனத்தா²ய வா பூ⁴மியம் நிக²ணந்தி, மூலேஸு சேவ பண்ணேஸு ச நிக்³க³தேஸு புன பூ⁴தகா³மஸங்க்²யம் க³ச்ச²ந்தி. மூலமத்தேஸு பன பண்ணமத்தேஸு வா நிக்³க³தேஸு பீ³ஜகா³மேன ஸங்க³ஹிதா ஏவ.

யானி கானிசி பீ³ஜானி பத²வியம் வா உத³கேன ஸிஞ்சித்வா ட²பிதானி, கபாலாதீ³ஸு வா அல்லபம்ஸும் பக்கி²பித்வா நிக்கி²த்தானி ஹோந்தி, ஸப்³பா³னி மூலமத்தே பண்ணமத்தே வா நிக்³க³தேபி பீ³ஜானியேவ. ஸசேபி மூலானி ச உபரி அங்குரோ ச நிக்³க³ச்ச²தி, யாவ அங்குரோ ஹரிதோ ந ஹோதி, தாவ பீ³ஜானியேவ. முக்³கா³தீ³னம் பன பண்ணேஸு உட்டி²தேஸு வீஹிஆதீ³னம் வா அங்குரே ஹரிதே நீலபண்ணவண்ணே ஜாதே பூ⁴தகா³மஸங்க³ஹம் க³ச்ச²ந்தி. தாலட்டீ²னம் பட²மம் ஸூகரதா³டா² விய மூலம் நிக்³க³ச்ச²தி. நிக்³க³தேபி யாவ உபரி பத்தவட்டி ந நிக்³க³ச்ச²தி, தாவ பீ³ஜகா³மோயேவ. நாளிகேரஸ்ஸ தசம் பி⁴ந்தி³த்வா த³ந்தஸூசி விய அங்குரோ நிக்³க³ச்ச²தி, யாவ மிக³ஸிங்க³ஸதி³ஸா நீலபத்தவட்டி ந ஹோதி, தாவ பீ³ஜகா³மோயேவ. மூலே அனிக்³க³தேபி தாதி³ஸாய பத்தவட்டியா ஜாதாய அமூலகபூ⁴தகா³மே ஸங்க³ஹம் க³ச்ச²தி.

அம்ப³ட்டி²ஆதீ³னி வீஹிஆதீ³ஹி வினிச்சி²னிதப்³பா³னி. வந்தா³கா வா அஞ்ஞா வா யா காசி ருக்கே² ஜாயித்வா ருக்க²ம் ஓத்த²ரதி, ருக்கோ²வ தஸ்ஸா டா²னம், தம் விகோபேந்தஸ்ஸ வா ததோ உத்³த⁴ரந்தஸ்ஸ வா பாசித்தியம். ஏகா அமூலிகா லதா ஹோதி, அங்கு³லிவேட²கோ விய வனப்பகு³ம்ப³த³ண்ட³கே வேடே²தி, தஸ்ஸாபி அயமேவ வினிச்ச²யோ. கே³ஹமுக²பாகாரவேதி³காசேதியாதீ³ஸு நீலவண்ணோ ஸேவாலோ ஹோதி, யாவ த்³வே தீணி பத்தானி ந ஸஞ்ஜாயந்தி தாவ அக்³க³பீ³ஜஸங்க³ஹம் க³ச்ச²தி. பத்தேஸு ஜாதேஸு பாசித்தியவத்து². தஸ்மா தாதி³ஸேஸு டா²னேஸு ஸுதா⁴லேபம்பி தா³தும் ந வட்டதி. அனுபஸம்பன்னேன லித்தஸ்ஸ உபரிஸ்னேஹலேபோ தா³தும் வட்டதி. ஸசே நிதா³க⁴ஸமயே ஸுக்க²ஸேவாலோ திட்ட²தி, தம் ஸம்முஞ்ஜனீஆதீ³ஹி க⁴ம்ஸித்வா அபனேதும் வட்டதி. பானீயக⁴டாதீ³னம் ப³ஹி ஸேவாலோ து³க்கடவத்து², அந்தோ அப்³போ³ஹாரிகோ. த³ந்தகட்ட²பூவாதீ³ஸு கண்ணகம்பி அப்³போ³ஹாரிகமேவ. வுத்தஞ்ஹேதம் – ‘‘ஸசே கே³ருகபரிகம்மகதா பி⁴த்தி கண்ணகிதா ஹோதி, சோளகம் தேமேத்வா பீளேத்வா பமஜ்ஜிதப்³பா³’’தி (மஹாவ. 66).

பாஸாணஜாதிபாஸாணத³த்³து³ஸேவாலஸேலேய்யகாதீ³னி அஹரிதவண்ணானி அபத்தகானி ச து³க்கடவத்து²கானி. அஹிச்ச²த்தகம் யாவ மகுளம் ஹோதி, தாவ து³க்கடவத்து². புப்பி²தகாலதோ பட்டா²ய அப்³போ³ஹாரிகம். அல்லருக்க²தோ பன அஹிச்ச²த்தகம் க³ண்ஹந்தோ ருக்க²த்தசம் விகோபேதி, தஸ்மா தத்த² பாசித்தியம். ருக்க²பப்படிகாயபி ஏஸேவ நயோ. யா பன இந்த³ஸாலககுதா⁴தீ³னம் பப்படிகா ருக்க²தோ முச்சித்வா திட்ட²தி, தம் க³ண்ஹந்தஸ்ஸ அனாபத்தி. நிய்யாஸம்பி ருக்க²தோ முச்சித்வா டி²தம் ஸுக்க²ருக்கே² வா லக்³க³ம் க³ண்ஹிதும் வட்டதி. அல்லருக்க²தோ ந வட்டதி. லாகா²யபி ஏஸேவ நயோ. ருக்க²ம் சாலேத்வா பண்டு³பலாஸம் வா பரிணதகணிகாராதி³புப்ப²ம் வா பாதேந்தஸ்ஸ பாசித்தியமேவ. ஹத்த²குக்குச்சேன முது³கேஸு இந்த³ஸாலனுஹீக²ந்தா⁴தீ³ஸு வா தத்த²ஜாதகதாலபண்ணாதீ³ஸு வா அக்க²ரம் சி²ந்த³ந்தஸ்ஸாபி ஏஸேவ நயோ.

ஸாமணேரானம் புப்ப²ம் ஓசினந்தானம் ஸாக²ம் ஓனாமேத்வா தா³தும் வட்டதி. தேஹி பன புப்பே²ஹி பானீயம் ந வாஸேதப்³ப³ம். பானீயவாஸத்தி²கேன ஸாமணேரம் உக்கி²பித்வா ஓசினாபேதப்³பா³னி. ப²லஸாகா²பி அத்தனா கா²தி³துகாமேன ந ஓனாமேதப்³பா³. ஸாமணேரம் உக்கி²பித்வா ப²லம் கா³ஹாபேதப்³ப³ம். யம்கிஞ்சி க³ச்ச²ம் வா லதம் வா உப்பாடேந்தேஹி ஸாமணேரேஹி ஸத்³தி⁴ம் க³ஹேத்வா ஆகட்³டி⁴தும் ந வட்டதி. தேஸம் பன உஸ்ஸாஹஜனனத்த²ம் அனாகட்³ட⁴ந்தேன கட்³ட⁴னாகாரம் த³ஸ்ஸேந்தேன விய அக்³கே³ க³ஹேதும் வட்டதி. யேஸம் ருக்கா²னம் ஸாகா² ருஹதி, தேஸம் ஸாக²ம் மக்கி²காபீ³ஜனாதீ³னம் அத்தா²ய கப்பியம் அகாராபேத்வா க³ஹிதம் தசே வா பத்தே வா அந்தமஸோ நகே²னபி விலிக²ந்தஸ்ஸ து³க்கடம். அல்லஸிங்கி³வேராதீ³ஸுபி ஏஸேவ நயோ. ஸசே பன கப்பியம் காராபேத்வா ஸீதலே பதே³ஸே ட²பிதஸ்ஸ மூலம் ஸஞ்ஜாயதி, உபரிபா⁴கே³ சி²ந்தி³தும் வட்டதி. ஸசே அங்குரோ ஜாயதி, ஹேட்டா²பா⁴கே³ சி²ந்தி³தும் வட்டதி. மூலே ச நீலங்குரே ச ஜாதே ந வட்டதி.

சி²ந்த³தி வா சே²தா³பேதி வாதி அந்தமஸோ ஸம்முஞ்ஜனோஸலாகாயபி திணானி சி²ந்தி³ஸ்ஸாமீதி பூ⁴மிம் ஸம்மஜ்ஜந்தோ ஸயம் வா சி²ந்த³தி, அஞ்ஞேன வா சே²தா³பேதி. பி⁴ந்த³தி வா பே⁴தா³பேதி வாதி அந்தமஸோ சங்கமந்தோபி சி²ஜ்ஜனகம் சி²ஜ்ஜது, பி⁴ஜ்ஜனகம் பி⁴ஜ்ஜது, சங்கமிதட்டா²னம் த³ஸ்ஸேஸ்ஸாமீதி ஸஞ்சிச்ச பாதே³ஹி அக்கமந்தோ திணவல்லிஆதீ³னி ஸயம் வா பி⁴ந்த³தி அஞ்ஞேன வா பே⁴தா³பேதி. ஸசேபி ஹி திணம் வா லதம் வா க³ண்டி²ம் கரோந்தஸ்ஸ பி⁴ஜ்ஜதி, க³ண்டி²பி ந காதப்³போ³. தாலருக்கா²தீ³ஸு பன சோரானம் அனாருஹனத்தா²ய தா³ருமக்கடகம் ஆகோடேந்தி, கண்டகே ப³ந்த⁴ந்தி, பி⁴க்கு²ஸ்ஸ ஏவம் காதும் ந வட்டதி. ஸசே தா³ருமக்கடகோ ருக்கே² அல்லீனமத்தோவ ஹோதி, ருக்க²ம் ந பீளேதி, வட்டதி. ‘‘ருக்க²ம் சி²ந்த³, லதம் சி²ந்த³, கந்த³ம் வா மூலம் வா உப்பாடேஹீ’’தி வத்தும்பி வட்டதி, அனியாமிதத்தா. நியாமேத்வா பன ‘‘இமம் ருக்க²ம் சி²ந்தா³’’திஆதி³ வத்தும் ந வட்டதி. நாமம் க³ஹேத்வாபி ‘‘அம்ப³ருக்க²ம் சதுரஸ்ஸவல்லிம் ஆலுவகந்த³ம் முஞ்ஜதிணம் அஸுகருக்க²ச்ச²ல்லிம் சி²ந்த³ பி⁴ந்த³ உப்பாடேஹீ’’திஆதி³வசனம்பி அனியாமிதமேவ ஹோதி. ‘‘இமம் அம்ப³ருக்க²’’ந்திஆதி³வசனமேவ ஹி நியாமிதம் நாம, தம் ந வட்டதி.

பசதி வா பசாபேதி வாதி அந்தமஸோ பத்தம்பி பசிதுகாமோ திணாதீ³னம் உபரி ஸஞ்சிச்ச அக்³கி³ம் கரோந்தோ ஸயம் வா பசதி, அஞ்ஞேன வா பசாபேதீதி ஸப்³ப³ம் பத²வீக²ணனஸிக்கா²பதே³ வுத்தனயேன வேதி³தப்³ப³ம். அனியாமேத்வா பன ‘‘முக்³கே³ பச, மாஸே பசா’’திஆதி³ வத்தும் வட்டதி. ‘‘இமே முக்³கே³ பச, இமே மாஸே பசா’’தி ஏவம் வத்தும் ந வட்டதி.

அனாபத்தி இமம் ஜானாதிஆதீ³ஸு ‘‘இமம் மூலபே⁴ஸஜ்ஜம் ஜான, இமம் மூலம் வா பண்ணம் வா தே³ஹி, இமம் ருக்க²ம் வா லதம் வா ஆஹர, இமினா புப்பே²ன வா ப²லேன வா பண்ணேன வா அத்தோ², இமம் ருக்க²ம் வா லதம் வா ப²லம் வா கப்பியம் கரோஹீ’’தி ஏவமத்தோ² த³ட்ட²ப்³போ³. ஏத்தாவதா பூ⁴தகா³மபரிமோசனம் கதம் ஹோதி. பரிபு⁴ஞ்ஜந்தேன பன பீ³ஜகா³மபரிமோசனத்த²ம் புன கப்பியம் காரேதப்³ப³ம்.

கப்பியகரணஞ்சேத்த² இமினா ஸுத்தானுஸாரேன வேதி³தப்³ப³ம் – ‘‘அனுஜானாமி, பி⁴க்க²வே, பஞ்சஹி ஸமணகப்பேஹி ப²லம் பரிபு⁴ஞ்ஜிதும் அக்³கி³பரிஜிதம் ஸத்த²பரிஜிதம் நக²பரிஜிதம் அபீ³ஜம் நிப்³ப³ட்டபீ³ஜமேவ பஞ்சம’’ந்தி. தத்த² ‘‘அக்³கி³பரிஜித’’ந்தி அக்³கி³னா பரிஜிதம் அதி⁴பூ⁴தம் த³ட்³ட⁴ம் பு²ட்ட²ந்தி அத்தோ². ‘‘ஸத்த²பரிஜித’’ந்தி ஸத்தே²ன பரிஜிதம் அதி⁴பூ⁴தம் சி²ன்னம் வித்³த⁴ம் வாதி அத்தோ². ஏஸ நயோ நக²பரிஜிதே. அபீ³ஜனிப்³ப³ட்டபீ³ஜானி ஸயமேவ கப்பியானி. அக்³கி³னா கப்பியம் கரோந்தேன கட்ட²க்³கி³கோ³மயக்³கி³ஆதீ³ஸு யேன கேனசி அந்தமஸோ லோஹக²ண்டே³னபி ஆதி³த்தேன கப்பியம் காதப்³ப³ம். தஞ்ச கோ² ஏகதே³ஸே பு²ஸந்தேன ‘‘கப்பிய’’ந்தி வத்வாவ காதப்³ப³ம். ஸத்தே²ன கரோந்தேன யஸ்ஸ கஸ்ஸசி லோஹமயஸத்த²ஸ்ஸ அந்தமஸோ ஸூசினக²ச்சே²த³னானம்பி துண்டே³ன வா தா⁴ராய வா சே²த³ம் வா வேத⁴ம் வா த³ஸ்ஸேந்தேன ‘‘கப்பிய’’ந்தி வத்வாவ காதப்³ப³ம். நகே²ன கப்பியம் கரோந்தேன பூதினகே²ன ந காதப்³ப³ம். மனுஸ்ஸானம் பன ஸீஹப்³யக்³க⁴தீ³பிமக்கடாதீ³னம் ஸகுந்தானஞ்ச நகா² திகி²ணா ஹோந்தி, தேஹி காதப்³ப³ம். அஸ்ஸமஹிம்ஸஸூகரமிக³கோ³ரூபாதீ³னம் கு²ரா அதிகி²ணா, தேஹி ந காதப்³ப³ம், கதம்பி அகதம் ஹோதி. ஹத்தி²னகா² பன கு²ரா ந ஹோந்தி, தேஹி வட்டதி. யேஹி பன காதும் வட்டதி, தேஹி தத்த²ஜாதகேஹிபி உத்³த⁴ரித்வா க³ஹிதகேஹிபி சே²த³ம் வா வேத⁴ம் வா த³ஸ்ஸேந்தேன ‘‘கப்பிய’’ந்தி வத்வாவ காதப்³ப³ம்.

தத்த² ஸசேபி பீ³ஜானம் பப்³ப³தமத்தோ ராஸி ருக்க²ஸஹஸ்ஸம் வா சி²ந்தி³த்வா ஏகாப³த்³த⁴ம் கத்வா உச்சூ²னம் வா மஹாபா⁴ரோ ப³ந்தி⁴த்வா ட²பிதோ ஹோதி, ஏகஸ்மிம் பீ³ஜே வா ருக்க²ஸாகா²ய வா உச்சு²ம்ஹி வா கப்பியே கதே ஸப்³ப³ம் கதம் ஹோதி. உச்சூ² ச தா³ரூனி ச ஏகதோ ப³த்³தா⁴னி ஹோந்தி, உச்சு²ம் கப்பியம் கரிஸ்ஸாமீதி தா³ரும் விஜ்ஜ²தி, வட்டதியேவ. ஸசே பன யாய ரஜ்ஜுயா வா வல்லியா வா ப³த்³தா⁴னி, தம் விஜ்ஜ²தி, ந வட்டதி. உச்சு²க²ண்டா³னம் பச்சி²ம் பூரேத்வா ஆஹரந்தி, ஏகஸ்மிம் க²ண்டே³ கப்பியே கதே ஸப்³ப³ம் கதமேவ ஹோதி. மரிசபக்காதீ³ஹி மிஸ்ஸேத்வா ப⁴த்தம் ஆஹரந்தி, ‘‘கப்பியம் கரோஹீ’’தி வுத்தே ஸசேபி ப⁴த்தஸித்தே² விஜ்ஜ²தி, வட்டதியேவ. திலதண்டு³லாதீ³ஸுபி ஏஸேவ நயோ. யாகு³யா பக்கி²த்தானி பன ஏகாப³த்³தா⁴னி ஹுத்வா ந ஸந்திட்ட²ந்தி, தத்த² ஏகமேகம் விஜ்ஜி²த்வா கப்பியம் காதப்³ப³மேவ. கபித்த²ப²லாதீ³னம் அந்தோ மிஞ்ஜம் கடாஹம் முஞ்சித்வா ஸஞ்சரதி, பி⁴ந்தா³பேத்வா கப்பியம் காராபேதப்³ப³ம். ஏகாப³த்³த⁴ம் ஹோதி, கடாஹேபி காதும் வட்டதி.

அஸஞ்சிச்சாதி பாஸாணருக்கா²தீ³னி வா பவட்டேந்தஸ்ஸ ஸாக²ம் வா கட்³ட⁴ந்தஸ்ஸ கத்தரத³ண்டே³ன வா பூ⁴மிம் பஹரித்வா க³ச்ச²ந்தஸ்ஸ திணானி சி²ஜ்ஜந்தி, தானி தேன சி²ந்தி³ஸ்ஸாமீதி ஏவம் ஸஞ்சிச்ச அச்சி²ன்னத்தா அஸஞ்சிச்ச சி²ன்னானி நாம ஹோந்தி. இதி அஸஞ்சிச்ச சி²ந்த³ந்தஸ்ஸ அனாபத்தி.

அஸதியாதி அஞ்ஞவிஹிதோ கேனசி ஸத்³தி⁴ம் கிஞ்சி கதே²ந்தோ பாத³ங்கு³ட்ட²கேன வா ஹத்தே²ன வா திணம் வா லதம் வா சி²ந்த³ந்தோ திட்ட²தி, ஏவம் அஸதியா சி²ந்த³ந்தஸ்ஸ அனாபத்தி.

அஜானந்தஸ்ஸாதி ஏத்த²ப்³ப⁴ந்தரே பீ³ஜகா³மோதி வா பூ⁴தகா³மோதி வா ந ஜானாதி, சி²ந்தா³மீதிபி ந ஜானாதி, கேவலம் வதியா வா பலாலபுஞ்ஜே வா நிகா²த³னம் வா க²ணித்திம் வா குதா³லம் வா ஸங்கோ³பனத்தா²ய ட²பேதி, ட³ய்ஹமானஹத்தோ² வா அக்³கி³ம் பாதேதி, தத்ர சே திணானி சி²ஜ்ஜந்தி வா ட³ய்ஹந்தி வா அனாபத்தி. மனுஸ்ஸவிக்³க³ஹபாராஜிகவண்ணனாயம் பன ஸப்³ப³அட்ட²கதா²ஸு ‘‘ஸசே பி⁴க்கு² ருக்கே²ன வா அஜ்ஜோ²த்த²டோ ஹோதி, ஓபாதே வா பதிதோ ஸக்கா ச ஹோதி ருக்க²ம் சி²ந்தி³த்வா பூ⁴மிம் வா க²ணித்வா நிக்க²மிதும், ஜீவிதஹேதுபி அத்தனா ந காதப்³ப³ம். அஞ்ஞேன பன பி⁴க்கு²னா பூ⁴மிம் வா க²ணித்வா ருக்க²ம் வா சி²ந்தி³த்வா அல்லருக்க²தோ வா த³ண்ட³கம் சி²ந்தி³த்வா தம் ருக்க²ம் பவட்டேத்வா நிக்கா²மேதும் வட்டதி, அனாபத்தீ’’தி வுத்தம். தத்த² காரணம் ந தி³ஸ்ஸதி – ‘‘அனுஜானாமி, பி⁴க்க²வே, த³வடா³ஹே ட³ய்ஹமானே படக்³கி³ம் தா³தும், பரித்தம் காது’’ந்தி (சூளவ. 283) இத³ம் பன ஏகமேவ ஸுத்தம் தி³ஸ்ஸதி. ஸசே ஏதஸ்ஸ அனுலோமம் ‘‘அத்தனோ ந வட்டதி, அஞ்ஞஸ்ஸ வட்டதீ’’தி இத³ம் நானாகரணம் ந ஸக்கா லத்³து⁴ம். அத்தனோ அத்தா²ய கரோந்தோ அத்தஸினேஹேன அகுஸலசித்தேனேவ கரோதி, பரோ பன காருஞ்ஞேன, தஸ்மா அனாபத்தீதி சே. ஏதம்பி அகாரணம். குஸலசித்தேனாபி ஹி இமம் ஆபத்திம் ஆபஜ்ஜதி. ஸப்³ப³அட்ட²கதா²ஸு பன வுத்தத்தா ந ஸக்கா படிஸேதே⁴தும். க³வேஸிதப்³பா³ ஏத்த² யுத்தி. அட்ட²கதா²சரியானம் வா ஸத்³தா⁴ய க³ந்தப்³ப³ந்தி. ஸேஸம் உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி. கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பூ⁴தகா³மஸிக்கா²பத³ம் பட²மம்.

2. அஞ்ஞவாத³கஸிக்கா²பத³வண்ணனா

94. து³தியஸிக்கா²பதே³ – அனாசாரம் ஆசரித்வாதி அகாதப்³ப³ம் கத்வா; காயவசீத்³வாரேஸு ஆபத்திம் ஆபஜ்ஜித்வாதி வுத்தம் ஹோதி. அஞ்ஞேனஞ்ஞம் படிசரதீதி அஞ்ஞேன வசனேன அஞ்ஞம் வசனம் படிசரதி படிச்சா²தே³தி அஜ்ஜோ²த்த²ரதி; இதா³னி தம் படிசரணவிதி⁴ம் த³ஸ்ஸேந்தோ ‘‘கோ ஆபன்னோ’’திஆதி³மாஹ. தத்ராயம் வசனஸம்ப³ந்தோ⁴ – ஸோ கிர கிஞ்சி வீதிக்கமம் தி³ஸ்வா ‘‘ஆவுஸோ, ஆபத்திம் ஆபன்னோஸீ’’தி ஸங்க⁴மஜ்ஜே² ஆபத்தியா அனுயுஞ்ஜியமானோ ‘‘கோ ஆபன்னோ’’தி வத³தி. ‘‘ததோ த்வ’’ந்தி வுத்தே ‘‘அஹம் கிம் ஆபன்னோ’’தி வத³தி. அத² ‘‘பாசித்தியம் வா து³க்கடம் வா’’தி வுத்தே வத்து²ம் புச்ச²ந்தோ ‘‘அஹம் கிஸ்மிம் ஆபன்னோ’’தி வத³தி. ததோ ‘‘அஸுகஸ்மிம் நாம வத்து²ஸ்மி’’ந்தி வுத்தே ‘‘அஹம் கத²ம் ஆபன்னோ, கிம் கரோந்தோ ஆபன்னோம்ஹீ’’தி புச்ச²தி. அத² ‘‘இத³ம் நாம கரோந்தோ ஆபன்னோ’’தி வுத்தே ‘‘கம் ப⁴ணதா²’’தி வத³தி. ததோ ‘‘தம் ப⁴ணாமா’’தி வுத்தே ‘‘கிம் ப⁴ணதா²’’தி வத³தி.

அபிசேத்த² அயம் பாளிமுத்தகோபி அஞ்ஞேனஞ்ஞம் படிசரணவிதி⁴ – பி⁴க்கூ²ஹி ‘‘தவ ஸிபாடிகாய கஹாபணோ தி³ட்டோ², கிஸ்ஸேவமஸாருப்பம் கரோஸீ’’தி வுத்தோ ‘‘ஸுதி³ட்ட²ம், ப⁴ந்தே, ந பனேஸோ கஹாபணோ; திபுமண்ட³லம் ஏத’’ந்தி ப⁴ணந்தோ வா ‘‘த்வம் ஸுரம் பிவந்தோ தி³ட்டோ², கிஸ்ஸேவம் கரோஸீ’’தி வுத்தோ ‘‘ஸுதி³ட்டோ², ப⁴ந்தே, ந பனேஸா ஸுரா, பே⁴ஸஜ்ஜத்தா²ய ஸம்பாதி³தம் அரிட்ட²’’ந்தி ப⁴ணந்தோ வா ‘‘த்வம் படிச்ச²ன்னே ஆஸனே மாதுகா³மேன ஸத்³தி⁴ம் நிஸின்னோ தி³ட்டோ², கிஸ்ஸேவமஸாருப்பம் கரோஸீ’’தி வுத்தோ ‘‘யேன தி³ட்ட²ம் ஸுதி³ட்ட²ம், விஞ்ஞூ பனேத்த² து³தியோ அத்தி², ஸோ கிஸ்ஸ ந தி³ட்டோ²’’தி ப⁴ணந்தோ வா, ‘‘ஈதி³ஸம் தயா கிஞ்சி தி³ட்ட²’’ந்தி புட்டோ² ‘‘ந ஸுணாமீ’’தி ஸோதமுபனேந்தோ வா, ஸோதத்³வாரே புச்ச²ந்தானம் சக்கு²ம் உபனேந்தோ வா, அஞ்ஞேனஞ்ஞம் படிசரதீதி வேதி³தப்³போ³. அஞ்ஞவாத³கம் ரோபேதூதி அஞ்ஞவாத³கம் ஆரோபேது; பதிட்டா²பேதூதி அத்தோ². விஹேஸகம் ரோபேதூதி ஏதஸ்மிம்பி ஏஸேவ நயோ.

98. அஞ்ஞவாத³கே விஹேஸகே பாசித்தியந்தி ஏத்த² அஞ்ஞம் வத³தீதி அஞ்ஞவாத³கம்; அஞ்ஞேனஞ்ஞம் படிசரணஸ்ஸேதம் நாமம். விஹேஸேதீதி விஹேஸகம்; துண்ஹீபூ⁴தஸ்ஸேதம் நாமம், தஸ்மிம் அஞ்ஞவாத³கே விஹேஸகே. பாசித்தியந்தி வத்து²த்³வயே பாசித்தியத்³வயம் வுத்தம்.

100. அரோபிதே அஞ்ஞவாத³கேதி கம்மவாசாய அனாரோபிதே அஞ்ஞவாத³கே. அரோபிதே விஹேஸகேதி ஏதஸ்மிம்பி ஏஸேவ நயோ.

101. த⁴ம்மகம்மே த⁴ம்மகம்மஸஞ்ஞீதிஆதீ³ஸு யம் தம் அஞ்ஞவாத³கவிஹேஸகரோபனகம்மம் கதம், தஞ்சே த⁴ம்மகம்மம் ஹோதி, ஸோ ச பி⁴க்கு² தஸ்மிம் த⁴ம்மகம்மஸஞ்ஞீ அஞ்ஞவாத³கஞ்ச விஹேஸகஞ்ச கரோதி, அத²ஸ்ஸ தஸ்மிம் அஞ்ஞவாத³கே ச விஹேஸகே ச ஆபத்தி பாசித்தியஸ்ஸாதி இமினா நயேன அத்தோ² வேதி³தப்³போ³.

102. அஜானந்தோ புச்ச²தீதி ஆபத்திம் வா ஆபன்னபா⁴வம் அஜானந்தோயேவ ‘‘கிம் தும்ஹே ப⁴ணத², அஹம் ந ஜானாமீ’’தி புச்ச²தி. கி³லானோ வா ந கதே²தீதி முகே² தாதி³ஸோ ப்³யாதி⁴ ஹோதி, யேன கதே²தும் ந ஸக்கோதி. ஸங்க⁴ஸ்ஸ ப⁴ண்ட³னம் வாதிஆதீ³ஸு ஸங்க⁴மஜ்ஜே² கதி²தே தப்பச்சயா ஸங்க⁴ஸ்ஸ ப⁴ண்ட³னம் வா கலஹோ வா விவாதோ³ வா ப⁴விஸ்ஸதி, ஸோ மா அஹோஸீதி மஞ்ஞமானோ ந கதே²தீதி இமினா நயேன அத்தோ² வேதி³தப்³போ³. ஸேஸம் உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, ஸியா கிரியம், ஸியா அகிரியம், அஞ்ஞேனஞ்ஞம் படிசரந்தஸ்ஸ ஹி கிரியம் ஹோதி, துண்ஹீபா⁴வேன விஹேஸந்தஸ்ஸ அகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

அஞ்ஞவாத³கஸிக்கா²பத³ம் து³தியம்.

3. உஜ்ஜா²பனகஸிக்கா²பத³வண்ணனா

103. ததியஸிக்கா²பதே³ – த³ப்³ப³ம் மல்லபுத்தம் பி⁴க்கூ² உஜ்ஜா²பேந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா தம் ஆயஸ்மந்தம் தேஹி பி⁴க்கூ²ஹி அவஜானாபேந்தி, அவஞ்ஞாய ஓலோகாபேந்தி, லாமகதோ வா சிந்தாபேந்தீ’’தி அத்தோ². லக்க²ணம் பனேத்த² ஸத்³த³ஸத்தா²னுஸாரேன வேதி³தப்³ப³ம். ஓஜ்ஜா²பேந்தீதிபி பாடோ². அயமேவத்தோ². ச²ந்தா³யாதி ச²ந்தே³ன பக்க²பாதேன; அத்தனோ அத்தனோ ஸந்தி³ட்ட²ஸம்ப⁴த்தானம் பணீதானி பஞ்ஞபேதீதி அதி⁴ப்பாயோ. கி²ய்யந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா பகாஸேந்தி.

105. உஜ்ஜா²பனகே கி²ய்யனகே பாசித்தியந்தி ஏத்த² யேன வசனேன உஜ்ஜா²பேந்தி, தம் உஜ்ஜா²பனகம். யேன ச கி²ய்யந்தி தம் கி²ய்யனகம். தஸ்மிம் உஜ்ஜா²பனகே கி²ய்யனகே. பாசித்தியந்தி வத்து²த்³வயே பாசித்தியத்³வயம் வுத்தம்.

106. உஜ்ஜா²பனகம் நாம உபஸம்பன்னம் ஸங்கே⁴ன ஸம்மதம் ஸேனாஸனபஞ்ஞாபகம் வா…பே… அப்பமத்தகவிஸ்ஸஜ்ஜனகம் வாதி ஏதேஸம் பதா³னம் ‘‘மங்குகத்துகாமோ’’தி இமினா ஸம்ப³ந்தோ⁴. அவண்ணம் கத்துகாமோ அயஸம் கத்துகாமோதி இமேஸம் பன வஸேன உபஸம்பன்னந்திஆதீ³ஸு ‘‘உபஸம்பன்னஸ்ஸா’’தி ஏவம் விப⁴த்திவிபரிணாமோ காதப்³போ³. உஜ்ஜா²பேதி வா கி²ய்யதி வா ஆபத்தி பாசித்தியஸ்ஸாதி ஏத்த² பன யஸ்மா ‘‘கி²ய்யனகம் நாமா’’தி ஏவம் மாதிகாபத³ம் உத்³த⁴ரித்வாபி ‘‘உஜ்ஜா²பனகம் நாமா’’தி இமஸ்ஸ பத³ஸ்ஸ வுத்தவிப⁴ங்கோ³யேவ வத்தப்³போ³ ஹோதி, அஞ்ஞவாத³கஸிக்கா²பதே³ விய அஞ்ஞோ விஸேஸோ நத்தி², தஸ்மா தம் விஸும் அனுத்³த⁴ரித்வா அவிப⁴ஜித்வா நிக³மனமேவ ஏகதோ கதந்தி வேதி³தப்³ப³ம். த⁴ம்மகம்மே த⁴ம்மகம்மஸஞ்ஞீதிஆதீ³ஸு யம் தஸ்ஸ உபஸம்பன்னஸ்ஸ ஸம்முதிகம்மம் கதம் தஞ்சே த⁴ம்மகம்மம் ஹோதி, ஸோ ச பி⁴க்கு² தஸ்மிம் த⁴ம்மகம்மஸஞ்ஞீ உஜ்ஜா²பனகஞ்ச கி²ய்யனகஞ்ச கரோதி, அத²ஸ்ஸ தஸ்மிம் உஜ்ஜா²பனகே ச கி²ய்யனகே ச ஆபத்தி பாசித்தியஸ்ஸாதி இமினா நயேன அத்தோ² வேதி³தப்³போ³.

அனுபஸம்பன்னம் உஜ்ஜா²பேதி வா கி²ய்யதி வாதி ஏத்த² உபஸம்பன்னம் ஸங்கே⁴ன ஸம்மதம் அஞ்ஞம் அனுபஸம்பன்னம் உஜ்ஜா²பேதி அவஜானாபேதி, தஸ்ஸ வா தம் ஸந்திகே கி²ய்யதீதி அத்தோ². உபஸம்பன்னம் ஸங்கே⁴ன அஸம்மதந்தி கம்மவாசாய அஸம்மதம் கேவலம் ‘‘தவேஸோ பா⁴ரோ’’தி ஸங்கே⁴ன ஆரோபிதபா⁴ரம் பி⁴க்கூ²னம் வா பா²ஸுவிஹாரத்தா²ய ஸயமேவ தம் பா⁴ரம் வஹந்தம், யத்ர வா த்³வே தயோ பி⁴க்கூ² விஹரந்தி, தத்ர வா தாதி³ஸம் கம்மம் கரோந்தந்தி அதி⁴ப்பாயோ. அனுபஸம்பன்னம் ஸங்கே⁴ன ஸம்மதம் வா அஸம்மதம் வாதி ஏத்த² பன கிஞ்சாபி அனுபஸம்பன்னஸ்ஸ தேரஸ ஸம்முதியோ தா³தும் ந வட்டந்தி. அத² கோ² உபஸம்பன்னகாலே லத்³த⁴ஸம்முதிகோ பச்சா² அனுபஸம்பன்னபா⁴வே டி²தோ, தம் ஸந்தா⁴ய ‘‘ஸங்கே⁴ன ஸம்மதம் வா’’தி வுத்தம். யஸ்ஸ பன ப்³யத்தஸ்ஸ ஸாமணேரஸ்ஸ கேவலம் ஸங்கே⁴ன வா ஸம்மதேன வா பி⁴க்கு²னா ‘‘த்வம் இத³ம் கம்மம் கரோஹீ’’தி பா⁴ரோ கதோ, தாதி³ஸம் ஸந்தா⁴ய ‘‘அஸம்மதம் வா’’தி வுத்தம். ஸேஸமேத்த² உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

உஜ்ஜா²பனகஸிக்கா²பத³ம் ததியம்.

4. பட²மஸேனாஸனஸிக்கா²பத³வண்ணனா

108. சதுத்த²ஸிக்கா²பதே³ – ஹேமந்திகே காலேதி ஹேமந்தகாலே ஹிமபாதஸமயே. காயம் ஓதாபேந்தாதி மஞ்சபீடா²தீ³ஸு நிஸின்னா பா³லாதபேன காயம் ஓதாபேந்தா. காலே ஆரோசிதேதி யாகு³ப⁴த்தாதீ³ஸு யஸ்ஸ கஸ்ஸசி காலே ஆரோசிதே. ஓவட்ட²ம் ஹோதீதி ஹிமவஸ்ஸேன ஓவட்ட²ம் திந்தம் ஹோதி.

110. அவஸ்ஸிகஸங்கேதேதி வஸ்ஸிகவஸ்ஸானமாஸாதி ஏவம் அபஞ்ஞத்தே சத்தாரோ ஹேமந்திகே சத்தாரோ ச கி³ம்ஹிகே அட்ட² மாஸேதி அத்தோ². மண்ட³பே வாதி ஸாகா²மண்ட³பே வா பத³ரமண்ட³பே வா. ருக்க²மூலே வாதி யஸ்ஸ கஸ்ஸசி ருக்க²ஸ்ஸ ஹேட்டா². யத்த² காகா வா குலலா வா ந ஊஹத³ந்தீதி யத்த² து⁴வனிவாஸேன குலாவகே கத்வா வஸமானா ஏதே காககுலலா வா அஞ்ஞே வா ஸகுந்தா தம் ஸேனாஸனம் ந ஊஹத³ந்தி, தாதி³ஸே ருக்க²மூலே நிக்கி²பிதும் அனுஜானாமீதி. தஸ்மா யத்த² கோ³சரப்பஸுதா ஸகுந்தா விஸ்ஸமித்வா க³ச்ச²ந்தி, தஸ்ஸ ருக்க²ஸ்ஸ மூலே நிக்கி²பிதும் வட்டதி. யஸ்மிம் பன து⁴வனிவாஸேன குலாவகே கத்வா வஸந்தி, தஸ்ஸ ருக்க²ஸ்ஸ மூலே ந நிக்கி²பிதப்³ப³ம். ‘‘அட்ட² மாஸே’’தி வசனதோ யேஸு ஜனபதே³ஸு வஸ்ஸகாலே ந வஸ்ஸதி, தேஸுபி சத்தாரோ மாஸே நிக்கி²பிதும் ந வட்டதியேவ. ‘‘அவஸ்ஸிகஸங்கேதே’’தி வசனதோ யத்த² ஹேமந்தே தே³வோ வஸ்ஸதி, தத்த² ஹேமந்தேபி அஜ்ஜோ²காஸே நிக்கி²பிதும் ந வட்டதி. கி³ம்ஹே பன ஸப்³ப³த்த² விக³தவலாஹகம் விஸுத்³த⁴ம் நப⁴ம் ஹோதி, ஏவரூபே காலே கேனசிதே³வ கரணீயேன அஜ்ஜோ²காஸே மஞ்சபீட²ம் நிக்கி²பிதும் வட்டதி.

அப்³போ⁴காஸிகேனாபி வத்தம் ஜானிதப்³ப³ம், தஸ்ஸ ஹி ஸசே புக்³க³லிகமஞ்சகோ அத்தி², தத்தே²வ ஸயிதப்³ப³ம். ஸங்கி⁴கம் க³ண்ஹந்தேன வேத்தேன வா வாகேன வா வீதமஞ்சகோ க³ஹேதப்³போ³. தஸ்மிம் அஸதி புராணமஞ்சகோ க³ஹேதப்³போ³. தஸ்மிம்பி அஸதி நவவாயிமோ வா ஓனத்³த⁴கோ வா க³ஹேதப்³போ³. க³ஹேத்வா ச பன ‘‘அஹம் உக்கட்ட²ருக்க²மூலிகோ உக்கட்ட²அப்³போ⁴காஸிகோ’’தி சீவரகுடிம்பி அகத்வா அஸமயே அஜ்ஜோ²காஸே ருக்க²மூலே வா பஞ்ஞபேத்வா நிபஜ்ஜிதும் ந வட்டதி. ஸசே பன சதுக்³கு³ணேனபி சீவரேன கதகுடி அதேமேந்தம் ரக்கி²தும் ந ஸக்கோதி, ஸத்தாஹவத்³த³லிகாதீ³னி ப⁴வந்தி, பி⁴க்கு²னோ காயானுக³திகத்தா வட்டதி.

அரஞ்ஞே பண்ணகுடீஸு வஸந்தானம் ஸீலஸம்பதா³ய பஸன்னசித்தா மனுஸ்ஸா நவம் மஞ்சபீட²ம் தே³ந்தி ‘‘ஸங்கி⁴கபரிபோ⁴கே³ன பரிபு⁴ஞ்ஜதா²’’தி வஸித்வா க³ச்ச²ந்தேஹி ஸாமந்தவிஹாரே ஸபா⁴க³பி⁴க்கூ²னம் பேஸேத்வா க³ந்தப்³ப³ம், ஸபா⁴கா³னம் அபா⁴வே அனோவஸ்ஸகே நிக்கி²பித்வா க³ந்தப்³ப³ம், அனோவஸ்ஸகே அஸதி ருக்கே² லக்³கே³த்வா க³ந்தப்³ப³ம். சேதியங்க³ணே ஸம்மஜ்ஜனிம் க³ஹேத்வா போ⁴ஜனஸாலங்க³ணம் வா உபோஸதா²கா³ரங்க³ணம் வா பரிவேணதி³வாட்டா²னஅக்³கி³ஸாலாதீ³ஸு வா அஞ்ஞதரம் ஸம்மஜ்ஜித்வா தோ⁴வித்வா புன ஸம்மஜ்ஜனீமாளகேயேவ ட²பேதப்³பா³. உபோஸதா²கா³ராதீ³ஸு அஞ்ஞதரஸ்மிம் க³ஹேத்வா அவஸேஸானி ஸம்மஜ்ஜந்தஸ்ஸாபி ஏஸேவ நயோ.

யோ பன பி⁴க்கா²சாரமக்³க³ம் ஸம்மஜ்ஜந்தோவ க³ந்துகாமோ ஹோதி, தேன ஸம்மஜ்ஜித்வா ஸசே அந்தராமக்³கே³ ஸாலா அத்தி², தத்த² ட²பேதப்³பா³. ஸசே நத்தி², வலாஹகானம் அனுட்டி²தபா⁴வம் ஸல்லக்கே²த்வா ‘‘யாவாஹம் கா³மதோ நிக்க²மாமி, தாவ ந வஸ்ஸிஸ்ஸதீ’’தி ஜானந்தேன யத்த² கத்த²சி நிக்கி²பித்வா புன பச்சாக³ச்ச²ந்தேன பாகதிகட்டா²னே ட²பேதப்³பா³. ஸசே வஸ்ஸிஸ்ஸதீதி ஜானந்தோ அஜ்ஜோ²காஸே ட²பேதி, து³க்கடந்தி மஹாபச்சரியம் வுத்தம். ஸசே பன தத்ர தத்ரேவ ஸம்மஜ்ஜனத்தா²ய ஸம்மஜ்ஜனீ நிக்கி²த்தா ஹோதி, தம் தம் டா²னம் ஸம்மஜ்ஜித்வா தத்ர தத்ரேவ நிக்கி²பிதும் வட்டதி. ஆஸனஸாலம் ஸம்மஜ்ஜந்தேன வத்தம் ஜானிதப்³ப³ம். தத்ரித³ம் வத்தம் – மஜ்ஜ²தோ பட்டா²ய பாத³ட்டா²னாபி⁴முகா² வாலிகா ஹரிதப்³பா³. கசவரம் ஹத்தே²ஹி க³ஹேத்வா ப³ஹி ச²ட்³டே³தப்³ப³ம்.

111. மஸாரகோதி மஞ்சபாதே³ விஜ்ஜி²த்வா தத்த² அடனியோ பவேஸேத்வா கதோ. பு³ந்தி³காப³த்³தோ⁴தி அடனீஹி மஞ்சபாதே³ ட³ம்ஸாபேத்வா பல்லங்கஸங்கே²பேன கதோ. குளீரபாத³கோதி அஸ்ஸமேண்ட³காதீ³னம் பாத³ஸதி³ஸேஹி பாதே³ஹி கதோ. யோ வா பன கோசி வங்கபாத³கோ, அயம் வுச்சதி குளீரபாத³கோ. ஆஹச்சபாத³கோதி அயம் பன ‘‘ஆஹச்சபாத³கோ நாம மஞ்சோ அங்கே³ விஜ்ஜி²த்வா கதோ ஹோதீ’’தி ஏவம் பரதோ பாளியம்யேவ வுத்தோ, தஸ்மா அடனியோ விஜ்ஜி²த்வா தத்த² பாத³ஸிக²ம் பவேஸேத்வா உபரி ஆணிம் த³த்வா கதமஞ்சோ ‘‘ஆஹச்சபாத³கோ’’தி வேதி³தப்³போ³. பீடே²பி ஏஸேவ நயோ. அந்தோ ஸம்வேடே²த்வா ப³த்³த⁴ம் ஹோதீதி ஹேட்டா² ச உபரி ச வித்த²தம் மஜ்ஜே² ஸங்கி²த்தம் பணவஸண்டா²னம் கத்வா ப³த்³த⁴ம் ஹோதி, தம் கிர மஜ்ஜே² ஸீஹப்³யக்³க⁴சம்மபரிக்கி²த்தம்பி கரோந்தி. அகப்பியசம்மம் நாமேத்த² நத்தி². ஸேனாஸனஞ்ஹி ஸோவண்ணமயம்பி வட்டதி, தஸ்மா தம் மஹக்³க⁴ம் ஹோதி. அனுபஸம்பன்னம் ஸந்த²ராபேதி தஸ்ஸ பலிபோ³தோ⁴தி யேன ஸந்த²ராபிதம், தஸ்ஸ பலிபோ³தோ⁴. லேட்³டு³பாதம் அதிக்கமந்தஸ்ஸ ஆபத்தி பாசித்தியஸ்ஸாதி தா²மமஜ்ஜி²மஸ்ஸ புரிஸஸ்ஸ லேட்³டு³பாதம் அதிக்கமந்தஸ்ஸ பாசித்தியம்.

அயம் பனேத்த² வினிச்ச²யோ – தே²ரோ போ⁴ஜனஸாலாயம் ப⁴த்தகிச்சம் கத்வா த³ஹரம் ஆணாபேதி ‘‘க³ச்ச² தி³வாட்டா²னே மஞ்சபீட²ம் பஞ்ஞபேஹீ’’தி. ஸோ ததா² கத்வா நிஸின்னோ. தே²ரோ யதா²ருசிம் விசரித்வா தத்த² க³ந்த்வா த²விகம் வா உத்தராஸங்க³ம் வா ட²பேதி, ததோ பட்டா²ய தே²ரஸ்ஸ பலிபோ³தோ⁴. நிஸீதி³த்வா ஸயம் க³ச்ச²ந்தோ நேவ உத்³த⁴ரதி, ந உத்³த⁴ராபேதி, லேட்³டு³பாதாதிக்கமே பாசித்தியம். ஸசே பன தே²ரோ தத்த² த²விகம் வா உத்தராஸங்க³ம் வா அட்ட²பேத்வா சங்கமந்தோவ த³ஹரம் ‘‘க³ச்ச² த்வ’’ந்தி ப⁴ணதி, தேன ‘‘இத³ம் ப⁴ந்தே மஞ்சபீட²’’ந்தி ஆசிக்கி²தப்³ப³ம். ஸசே தே²ரோ வத்தம் ஜானாதி ‘‘த்வம் க³ச்ச², அஹம் பாகதிகம் கரிஸ்ஸாமீ’’தி வத்தப்³ப³ம். ஸசே பா³லோ ஹோதி அனுக்³க³ஹிதவத்தோ ‘‘க³ச்ச², மா இத⁴ திட்ட², நேவ நிஸீதி³தும் ந நிபஜ்ஜிதும் தே³மீ’’தி த³ஹரம் தஜ்ஜேதியேவ. த³ஹரேன ‘‘ப⁴ந்தே ஸுக²ம் ஸயதா²’’தி கப்பம் லபி⁴த்வா வந்தி³த்வா க³ந்தப்³ப³ம். தஸ்மிம் க³தே தே²ரஸ்ஸேவ பலிபோ³தோ⁴. புரிமனயேனேவ சஸ்ஸ ஆபத்தி வேதி³தப்³பா³.

அத² பன ஆணத்திக்க²ணேயேவ த³ஹரோ ‘‘மய்ஹம் ப⁴ந்தே ப⁴ண்ட³கதோ⁴வனாதி³ கிஞ்சி கரணீயம் அத்தீ²’’தி வத³தி, தே²ரோ ச நம் ‘‘த்வம் பஞ்ஞபேத்வா க³ச்சா²ஹீ’’தி வத்வா போ⁴ஜனஸாலதோ நிக்க²மித்வா அஞ்ஞத்த² க³ச்ச²தி, பாது³த்³தா⁴ரேன காரேதப்³போ³. ஸசே தத்தே²வ க³ந்த்வா நிஸீத³தி புரிமனயேனேவ சஸ்ஸ லேட்³டு³பாதாதிக்கமே ஆபத்தி. ஸசே பன தே²ரோ ஸாமணேரம் ஆணாபேதி, ஸாமணேரே தத்த² மஞ்சபீட²ம் பஞ்ஞபேத்வா நிஸின்னேபி போ⁴ஜனஸாலதோ அஞ்ஞத்த² க³ச்ச²ந்தோ பாது³த்³தா⁴ரேன காரேதப்³போ³. க³ந்த்வா நிஸின்னோ புன க³மனகாலே லேட்³டு³பாதாதிக்கமே ஆபத்தியா காரேதப்³போ³. ஸசே பன ஆணாபேந்தோ மஞ்சபீட²ம் பஞ்ஞபேத்வா தத்தே²வ நிஸீதா³தி ஆணாபேதி, யத்ரிச்ச²தி தத்ர க³ந்த்வா ஆக³ந்தும் லப⁴தி. ஸயம் பன பாகதிகம் அகத்வா க³ச்ச²ந்தஸ்ஸ லேட்³டு³பாதாதிக்கமே பாசித்தியம். அந்தரஸன்னிபாதே மஞ்சபீடா²னி பஞ்ஞபேத்வா நிஸின்னேஹி க³மனகாலே ஆராமிகானம் இமம் படிஸாமேதா²தி வத்தப்³ப³ம், அவத்வா க³ச்ச²ந்தானம் லேட்³டு³பாதாதிக்கமே ஆபத்தி.

மஹாத⁴ம்மஸவனம் நாம ஹோதி தத்த² உபோஸதா²கா³ரதோபி போ⁴ஜனஸாலதோபி ஆஹரித்வா மஞ்சபீடா²னி பஞ்ஞபேந்தி. ஆவாஸிகானம்யேவ பலிபோ³தோ⁴. ஸசே ஆக³ந்துகா ‘‘இத³ம் அம்ஹாகம் உபஜ்ஜா²யஸ்ஸ இத³ம் ஆசரியஸ்ஸா’’தி க³ண்ஹந்தி, ததோ பட்டா²ய தேஸம்யேவ பலிபோ³தோ⁴. க³மனகாலே பாகதிகம் அகத்வா லேட்³டு³பாதம் அதிக்கமந்தானம் ஆபத்தி. மஹாபச்சரியம் புன வுத்தம் – ‘‘யாவ அஞ்ஞே ந நிஸீத³ந்தி, தாவ யேஹி பஞ்ஞத்தம், தேஸம் பா⁴ரோ. அஞ்ஞேஸு ஆக³ந்த்வா நிஸின்னேஸு நிஸின்னகானம் பா⁴ரோ. ஸசே தே அனுத்³த⁴ரித்வா வா அனுத்³த⁴ராபேத்வா வா க³ச்ச²ந்தி, து³க்கடம். கஸ்மா? அனாணத்தியா பஞ்ஞபிதத்தா’’தி. த⁴ம்மாஸனே பஞ்ஞத்தே யாவ உஸ்ஸாரகோ வா த⁴ம்மகதி²கோ வா நாக³ச்ச²தி, தாவ பஞ்ஞாபகானம் பலிபோ³தோ⁴, தஸ்மிம் ஆக³ந்த்வா நிஸின்னே தஸ்ஸ பலிபோ³தோ⁴. ஸகலம் அஹோரத்தம் த⁴ம்மஸவனம் ஹோதி, அஞ்ஞோ உஸ்ஸாரகோ வா த⁴ம்மகதி²கோ வா உட்ட²ஹதி, அஞ்ஞோ நிஸீத³தி, யோ யோ ஆக³ந்த்வா நிஸீத³தி, தஸ்ஸ தஸ்ஸ பா⁴ரோ. உட்ட²ஹந்தேன பன ‘‘இத³மாஸனம் தும்ஹாகம் பா⁴ரோ’’தி வத்வா க³ந்தப்³ப³ம். ஸசேபி இதரஸ்மிம் அனாக³தேயேவ பட²மம் நிஸின்னோ உட்டா²ய க³ச்ச²தி, தஸ்மிஞ்ச அந்தோஉபசாரட்டே²யேவ இதரோ ஆக³ந்த்வா நிஸீத³தி, உட்டா²ய க³தோ ஆபத்தியா ந காரேதப்³போ³. ஸசே பன இதரஸ்மிம் அனாக³தேயேவ பட²மம் நிஸின்னோ உட்டா²யாஸனா லேட்³டு³பாதம் அதிக்கமதி, ஆபத்தியா காரேதப்³போ³. ஸப்³ப³த்த² ச ‘‘லேட்³டு³பாதாதிக்கமே பட²மபாதே³ து³க்கடம், து³தியே பாசித்திய’’ந்தி அயம் நயோ மஹாபச்சரியம் வுத்தோ.

112. சிமிலிகம் வாதிஆதீ³ஸு சிமிலிகா நாம ஸுதா⁴தி³பரிகம்மகதாய பூ⁴மியா வண்ணானுரக்க²ணத்த²ம் கதா ஹோதி, தம் ஹேட்டா² பத்த²ரித்வா உபரி கடஸாரகம் பத்த²ரந்தி. உத்தரத்த²ரணம் நாம மஞ்சபீடா²னம் உபரி அத்த²ரிதப்³ப³கம் பச்சத்த²ரணம். பூ⁴மத்த²ரணம் நாம பூ⁴மியம் அத்த²ரிதப்³பா³ கடஸாரகாதி³விகதி. தட்டிகம் நாம தாலபண்ணேஹி வா வாகேஹி வா கததட்டிகா. சம்மக²ண்டோ³ நாம ஸீஹப்³யக்³க⁴தீ³பிதரச்ச²சம்மாதீ³ஸுபி யம்கிஞ்சி சம்மம். அட்ட²கதா²ஸு ஹி ஸேனாஸனபரிபோ⁴கே³ படிக்கி²த்தசம்மம் நாம ந தி³ஸ்ஸதி, தஸ்மா ஸீஹசம்மாதீ³னம் பரிஹரணேயேவ படிக்கே²போ வேதி³தப்³போ³. பாத³புஞ்ச²னீ நாம ரஜ்ஜுகேஹி வா பிலோதிகாஹி வா பாத³புஞ்ச²னத்த²ம் கதா. ப²லகபீட²ம் நாம ப²லகமயம் பீட²ம். அத² வா ப²லகஞ்சேவ தா³ருமயபீட²ஞ்ச; ஏதேன ஸப்³ப³ம்பி தா³ருப⁴ண்டா³தி³ ஸங்க³ஹிதம். மஹாபச்சரியம் பன வித்தா²ரேனேவ வுத்தம் – ‘‘ஆதா⁴ரகம் பத்தபிதா⁴னம் பாத³கத²லிகம் தாலவண்டம் பீ³ஜனீபத்தகம் யம்கிஞ்சி தா³ருப⁴ண்ட³ம் அந்தமஸோ பானீயஉளுங்கம் பானீயஸங்க²ம் அஜ்ஜோ²காஸே நிக்கி²பித்வா க³ச்ச²ந்தஸ்ஸ து³க்கட’’ந்தி. மஹாஅட்ட²கதா²யம் பன ஏஸ நயோ து³தியஸிக்கா²பதே³ த³ஸ்ஸிதோ. அஜ்ஜோ²காஸே ரஜனம் பசித்வா ரஜனபா⁴ஜனம் ரஜனஉளுங்கோ ரஜனதோ³ணிகாதி ஸப்³ப³ம் அக்³கி³ஸாலாய படிஸாமேதப்³ப³ம். ஸசே அக்³கி³ஸாலா நத்தி², அனோவஸ்ஸகே பப்³பா⁴ரே நிக்கி²பிதப்³ப³ம். தஸ்மிம்பி அஸதி யத்த² ஓலோகேந்தா பி⁴க்கூ² பஸ்ஸந்தி, தாதி³ஸே டா²னே ட²பேத்வாபி க³ந்தும் வட்டதி.

அஞ்ஞஸ்ஸ புக்³க³லிகேதி யஸ்மிம் விஸ்ஸாஸக்³கா³ஹோ ந ருஹதி, தஸ்ஸ ஸந்தகே து³க்கடம். யஸ்மிம் பன விஸ்ஸாஸோ ருஹதி, தஸ்ஸ ஸந்தகம் அத்தனோ புக்³க³லிகமிவ ஹோதீதி மஹாபச்சரியாதீ³ஸு வுத்தம்.

113. ஆபுச்ச²ம் க³ச்ச²தீதி யோ பி⁴க்கு² வா ஸாமணேரோ வா ஆராமிகோ வா லஜ்ஜீ ஹோதி, அத்தனோ பலிபோ³த⁴ம் விய மஞ்ஞதி, யோ ததா²ரூபம் ஆபுச்சி²த்வா க³ச்ச²தி, தஸ்ஸ அனாபத்தி. ஓதாபேந்தோ க³ச்ச²தீதி ஆதபே ஓதாபேந்தோ ஆக³ந்த்வா உத்³த⁴ரிஸ்ஸாமீதி க³ச்ச²தி; ஏவம் க³ச்ச²தோ அனாபத்தி. கேனசி பலிபு³த்³த⁴ம் ஹோதீதி ஸேனாஸனம் கேனசி உபத்³து³தம் ஹோதீதி அத்தோ². ஸசேபி ஹி வுட்³ட⁴தரோ பி⁴க்கு² உட்டா²பேத்வா க³ண்ஹாதி, ஸசேபி யக்கோ² வா பேதோ வா ஆக³ந்த்வா நிஸீத³தி, கோசி வா இஸ்ஸரோ ஆக³ந்த்வா க³ண்ஹாதி, ஸேனாஸனம் பலிபு³த்³த⁴ம் ஹோதி, ஸீஹப்³யக்³கா⁴தீ³ஸு வா பன தம் பதே³ஸம் ஆக³ந்த்வா டி²தேஸுபி ஸேனாஸனம் பலிபு³த்³த⁴ம் ஹோதியேவ. ஏவம் கேனசி பலிபு³த்³தே⁴ அனுத்³த⁴ரித்வாபி க³ச்ச²தோ அனாபத்தி. ஆபதா³ஸூதி ஜீவிதப்³ரஹ்மசரியந்தராயேஸு. ஸேஸம் உத்தானமேவாதி.

கதி²னஸமுட்டா²னம் – காயவாசதோ காயவாசாசித்ததோ ச ஸமுட்டா²தி, கிரியாகிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பட²மஸேனாஸனஸிக்கா²பத³ம் சதுத்த²ம்.

5. து³தியஸேனாஸனஸிக்கா²பத³வண்ணனா

116. து³தியஸேனாஸனஸிக்கா²பதே³ – பி⁴ஸீதி மஞ்சகபி⁴ஸி வா பீட²கபி⁴ஸி வா. சிமிலிகாதீ³னிபி புரிமஸிக்கா²பதே³ வுத்தப்பகாரானியேவ. நிஸீத³னந்தி ஸத³ஸம் வேதி³தப்³ப³ம். பச்சத்த²ரணந்தி பாவாரோ கோஜவோதி ஏத்தகமேவ வுத்தம். திணஸந்தா²ரோதி யேஸம் கேஸஞ்சி திணானம் ஸந்தா²ரோ. ஏஸ நயோ பண்ணஸந்தா²ரே. பரிக்கே²பம் அதிக்கமந்தஸ்ஸாதி ஏத்த² பட²மபாத³ம் அதிக்காமேந்தஸ்ஸ து³க்கடம், து³தியாதிக்கமே பாசித்தியம். அபரிக்கி²த்தஸ்ஸ உபசாரோ நாம ஸேனாஸனதோ த்³வே லேட்³டு³பாதா.

அனாபுச்ச²ம் வா க³ச்சே²ய்யாதி ஏத்த² பி⁴க்கு²ம்ஹி ஸதி பி⁴க்கு² ஆபுச்சி²தப்³போ³. தஸ்மிம் அஸதி ஸாமணேரோ, தஸ்மிம் அஸதி ஆராமிகோ, தஸ்மிம்பி அஸதி யேன விஹாரோ காரிதோ ஸோ விஹாரஸாமிகோ, தஸ்ஸ வா குலே யோ கோசி ஆபுச்சி²தப்³போ³. தஸ்மிம்பி அஸதி சதூஸு பாஸாணேஸு மஞ்சம் ட²பேத்வா மஞ்சே அவஸேஸமஞ்சபீடா²னி ஆரோபேத்வா உபரி பி⁴ஸிஆதி³கம் த³ஸவித⁴ம்பி ஸேய்யம் ராஸிம் கரித்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா த்³வாரவாதபானானி பித³ஹித்வா க³மியவத்தம் பூரேத்வா க³ந்தப்³ப³ம். ஸசே பன ஸேனாஸனம் ஓவஸ்ஸதி, ச²த³னத்த²ஞ்ச திணம் வா இட்ட²கா வா ஆனீதா ஹோந்தி, ஸசே உஸ்ஸஹதி, சா²தே³தப்³ப³ம். நோ சே ஸக்கோதி, யோ ஓகாஸோ அனோவஸ்ஸகோ, தத்த² மஞ்சபீடா²தீ³னி நிக்கி²பித்வா க³ந்தப்³ப³ம். ஸசே ஸப்³ப³ம்பி ஓவஸ்ஸதி, உஸ்ஸஹந்தேன அந்தோகா³மே உபாஸகானம் க⁴ரே ட²பேதப்³ப³ம். ஸசே தேபி ‘‘ஸங்கி⁴கம் நாம ப⁴ந்தே பா⁴ரியம், அக்³கி³தா³ஹாதீ³னம் பா⁴யாமா’’தி ந ஸம்படிச்ச²ந்தி, அஜ்ஜோ²காஸேபி பாஸாணானம் உபரி மஞ்சம் ட²பேத்வா ஸேஸம் புப்³பே³ வுத்தனயேனேவ நிக்கி²பித்வா திணேஹி ச பண்ணேஹி ச படிச்சா²தே³த்வா க³ந்தும் வட்டதி. யஞ்ஹி தத்த² அங்க³மத்தம்பி அவஸிஸ்ஸதி, தம் அஞ்ஞேஸம் தத்த² ஆக³தானம் பி⁴க்கூ²னம் உபகாரம் ப⁴விஸ்ஸதீதி.

117. விஹாரஸ்ஸ உபசாரேதிஆதீ³ஸு விஹாரஸ்ஸூபசாரோ நாம பரிவேணம். உபட்டா²னஸாலாதி பரிவேணபோ⁴ஜனஸாலா. மண்ட³போதி பரிவேணமண்ட³போ. ருக்க²மூலந்தி பரிவேணருக்க²மூலம். அயம் தாவ நயோ குருந்த³ட்ட²கதா²யம் வுத்தோ. கிஞ்சாபி வுத்தோ, அத² கோ² விஹாரோதி அந்தோக³ப்³போ⁴ வா அஞ்ஞம் வா ஸப்³ப³பரிச்ச²ன்னம் கு³த்தஸேனாஸனம் வேதி³தப்³ப³ம். விஹாரஸ்ஸ உபசாரேதி தஸ்ஸ ப³ஹி ஆஸன்னே ஓகாஸே. உபட்டா²னஸாலாயம் வாதி போ⁴ஜனஸாலாயம் வா. மண்ட³பே வாதி அபரிச்ச²ன்னே பரிச்ச²ன்னே வாபி ப³ஹூனம் ஸன்னிபாதமண்ட³பே. ருக்க²மூலே வத்தப்³ப³ம் நத்தி². ஆபத்தி து³க்கடஸ்ஸாதி வுத்தப்பகாரஞ்ஹி த³ஸவித⁴ம் ஸேய்யம் அந்தோக³ப்³பா⁴தி³ம்ஹி கு³த்தட்டா²னே பஞ்ஞபேத்வா க³ச்ச²ந்தஸ்ஸ யஸ்மா ஸேய்யாபி ஸேனாஸனம்பி உபசிகாஹி பலுஜ்ஜதி, வம்மிகராஸியேவ ஹோதி, தஸ்மா பாசித்தியம் வுத்தம். ப³ஹி பன உபட்டா²னஸாலாதீ³ஸு பஞ்ஞபேத்வா க³ச்ச²ந்தஸ்ஸ ஸேய்யாமத்தமேவ நஸ்ஸேய்ய, டா²னஸ்ஸ அகு³த்ததாய ந ஸேனாஸனம், தஸ்மா ஏத்த² து³க்கடம் வுத்தம். மஞ்சம் வா பீட²ம் வாதி ஏத்த² யஸ்மா ந ஸக்கா மஞ்சபீட²ம் ஸஹஸா உபசிகாஹி கா²யிதும், தஸ்மா தம் விஹாரேபி ஸந்த²ரித்வா க³ச்ச²ந்தஸ்ஸ து³க்கடம் வுத்தம். விஹாரூபசாரே பன தம் விஹாரசாரிகம் ஆஹிண்ட³ந்தாபி தி³ஸ்வா படிஸாமேஸ்ஸந்தி.

118. உத்³த⁴ரித்வா க³ச்ச²தீதி ஏத்த² உத்³த⁴ரித்வா க³ச்ச²ந்தேன மஞ்சபீட²கவாடம் ஸப்³ப³ம் அபனேத்வா ஸம்ஹரித்வா சீவரவம்ஸே லக்³கே³த்வா க³ந்தப்³ப³ம். பச்சா² ஆக³ந்த்வா வஸனகபி⁴க்கு²னாபி புன மஞ்சபீட²ம் வா பஞ்ஞபேத்வா ஸயித்வா க³ச்ச²ந்தேன ததே²வ காதப்³ப³ம். அந்தோகுட்டதோ ஸேய்யம் ப³ஹிகுட்டே பஞ்ஞபேத்வா வஸந்தேன க³மனகாலே க³ஹிதட்டா²னேயேவ படிஸாமேதப்³ப³ம். உபரிபாஸாத³தோ ஓரோபேத்வா ஹேட்டா²பாஸாதே³ வஸந்தஸ்ஸபி ஏஸேவ நயோ. ரத்திட்டா²னதி³வாட்டா²னேஸு மஞ்சபீட²ம் பஞ்ஞபேத்வாபி க³மனகாலே புன க³ஹிதட்டா²னேயேவ ட²பேதப்³ப³ம்.

ஆபுச்ச²ம் க³ச்ச²தீதி ஏத்தா²யம் ஆபுச்சி²தப்³பா³னாபுச்சி²தப்³ப³வினிச்ச²யோ – யா தாவ பூ⁴மியம் தீ³க⁴ஸாலா வா பண்ணஸாலா வா ஹோதி, யம் வா ருக்க²த்த²ம்பே⁴ஸு, கதகே³ஹம் உபசிகானம் உட்டா²னட்டா²னம் ஹோதி, ததோ பக்கமந்தேன தாவ ஆபுச்சி²த்வாவ பக்கமிதப்³ப³ம். தஸ்மிஞ்ஹி கதிபயானி தி³வஸானி அஜக்³கி³யமானே வம்மிகாவ ஸந்திட்ட²ந்தி. யம் பன பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் ஸிலுச்சயலேணம் வா ஸுதா⁴லித்தஸேனாஸனம் வா யத்த² உபசிகாஸங்கா நத்தி², ததோ பக்கமந்தஸ்ஸ ஆபுச்சி²த்வாபி அனாபுச்சி²த்வாபி க³ந்தும் வட்டதி, ஆபுச்ச²னம் பன வத்தம். ஸசே தாதி³ஸேபி ஸேனாஸனே ஏகேன பஸ்ஸேன உபசிகா ஆரோஹந்தி, ஆபுச்சி²த்வாவ க³ந்தப்³ப³ம். யோ பன ஆக³ந்துகோ பி⁴க்கு² ஸங்கி⁴கம் ஸேனாஸனம் க³ஹேத்வா வஸந்தம் பி⁴க்கு²ம் அனுவத்தந்தோ அத்தனோ ஸேனாஸனம் அக்³க³ஹேத்வா வஸதி, யாவ ஸோ ந க³ண்ஹாதி, தாவ தம் ஸேனாஸனம் புரிமபி⁴க்கு²ஸ்ஸேவ பலிபோ³தோ⁴. யதா³ பன ஸோ ஸேனாஸனம் க³ஹேத்வா அத்தனோ இஸ்ஸரியேன வஸதி, ததோ பட்டா²ய ஆக³ந்துகஸ்ஸேவ பலிபோ³தோ⁴. ஸசே உபோ⁴பி விப⁴ஜித்வா க³ண்ஹந்தி, உபி⁴ன்னம்பி பலிபோ³தோ⁴. மஹாபச்சரியம் பன வுத்தம் – ‘‘ஸசே த்³வே தயோ ஏகதோ ஹுத்வா பஞ்ஞபேந்தி, க³மனகாலே ஸப்³பே³ஹிபி ஆபுச்சி²தப்³ப³ம். தேஸு சே பட²மம் க³ச்ச²ந்தோ ‘பச்சி²மோ ஜக்³கி³ஸ்ஸதீ’தி ஆபோ⁴க³ம் கத்வா க³ச்ச²தி வட்டதி. பச்சி²மஸ்ஸ ஆபோ⁴கே³ன முத்தி நத்தி². ப³ஹூ ஏகம் பேஸேத்வா ஸந்த²ராபேந்தி, க³மனகாலே ஸப்³பே³ஹி வா ஆபுச்சி²தப்³ப³ம், ஏகம் வா பேஸேத்வா ஆபுச்சி²தப்³ப³ம். அஞ்ஞதோ மஞ்சபீடா²தீ³னி ஆனேத்வா அஞ்ஞத்ர வஸித்வாபி க³மனகாலே தத்தே²வ நேதப்³பா³னி. ஸசே அஞ்ஞாவாஸதோ ஆனேத்வா வஸமானஸ்ஸ அஞ்ஞோ வுட்³ட⁴தரோ ஆக³ச்ச²தி, ந படிபா³ஹிதப்³போ³, ‘மயா ப⁴ந்தே அஞ்ஞாவாஸதோ ஆனீதம், பாகதிகம் கரேய்யாதா²’தி வத்தப்³ப³ம். தேன ‘ஏவம் கரிஸ்ஸாமீ’தி ஸம்படிச்சி²தே இதரஸ்ஸ க³ந்தும் வட்டதி. ஏவமஞ்ஞத்த² ஹரித்வாபி ஸங்கி⁴கபரிபோ⁴கே³ன பரிபு⁴ஞ்ஜந்தஸ்ஸ நட்ட²ம் வா ஜிண்ணம் வா சோரேஹி வா ஹடம் கீ³வா ந ஹோதி, புக்³க³லிகபரிபோ⁴கே³ன பரிபு⁴ஞ்ஜந்தஸ்ஸ பன கீ³வா ஹோதி. அஞ்ஞஸ்ஸ மஞ்சபீட²ம் பன ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா பரிபு⁴ஞ்ஜந்தஸ்ஸ நட்ட²ம் கீ³வாயேவ’’.

கேனசி பலிபு³த்³த⁴ம் ஹோதீதி வுட்³ட⁴தரபி⁴க்கூ²இஸ்ஸரியயக்க²ஸீஹவாளமிக³கண்ஹஸப்பாதீ³ஸு யேன கேனசி ஸேனாஸனம் பலிபு³த்³த⁴ம் ஹோதி. ஸாபேக்கோ² க³ந்த்வா தத்த² டி²தோ ஆபுச்ச²தி, கேனசி பலிபு³த்³தோ⁴ ஹோதீதி அஜ்ஜேவ ஆக³ந்த்வா படிஜக்³கி³ஸ்ஸாமீதி ஏவம் ஸாபேக்கோ² நதீ³பாரம் வா கா³மந்தரம் வா க³ந்த்வா யத்த²ஸ்ஸ க³மனசித்தம் உப்பன்னம், தத்தே²வ டி²தோ கஞ்சி பேஸேத்வா ஆபுச்ச²தி, நதீ³பூரராஜசோராதீ³ஸு வா கேனசி பலிபு³த்³தோ⁴ ஹோதி உபத்³து³தோ, ந ஸக்கோதி பச்சாக³ந்தும், ஏவம்பூ⁴தஸ்ஸபி அனாபத்தி. ஸேஸம் பட²மஸிக்கா²பதே³ வுத்தனயமேவ ஸத்³தி⁴ம் ஸமுட்டா²னாதீ³ஹீதி.

து³தியஸேனாஸனஸிக்கா²பத³ம் பஞ்சமம்.

6. அனுபக²ஜ்ஜஸிக்கா²பத³வண்ணனா

119. ச²ட்ட²ஸிக்கா²பதே³ – பலிபு³ந்தே⁴ந்தீதி பட²மதரம் க³ந்த்வா பத்தசீவரம் அதிஹரித்வா ரும்பி⁴த்வா திட்ட²ந்தி. தே²ரா பி⁴க்கூ² வுட்டா²பேந்தீதி ‘‘அம்ஹாகம் ஆவுஸோ பாபுணாதீ’’தி வஸ்ஸக்³கே³ன க³ஹேத்வா வுட்டா²பேந்தி. அனுபக²ஜ்ஜ ஸேய்யம் கப்பேந்தீதி ‘‘தும்ஹாகம் ப⁴ந்தே மஞ்சட்டா²னம்யேவ பாபுணாதி, ந ஸப்³போ³ விஹாரோ. அம்ஹாகம் தா³னி இத³ம் டா²னம் பாபுணாதீ’’தி அனுபவிஸித்வா மஞ்சபீட²ம் பஞ்ஞபேத்வா நிஸீத³ந்திபி நிபஜ்ஜந்திபி ஸஜ்ஜா²யம்பி கரோந்தி.

120. ஜானந்தி ‘‘அனுட்டா²பனீயோ அய’’ந்தி ஜானந்தோ; தேனேவஸ்ஸ விப⁴ங்கே³ ‘‘வுட்³டோ⁴தி ஜானாதீ’’திஆதி³ வுத்தம். வுட்³டோ⁴ ஹி அத்தனோ வுட்³ட⁴தாய அனுட்டா²பனீயோ, கி³லானோ கி³லானதாய, ஸங்கோ⁴ பன ப⁴ண்டா³கா³ரிகஸ்ஸ வா த⁴ம்மகதி²கவினயத⁴ராதீ³னம் வா க³ணவாசகஆசரியஸ்ஸ வா ப³ஹூபகாரதம் கு³ணவிஸிட்ட²தஞ்ச ஸல்லக்கே²ந்தோ து⁴வவாஸத்தா²ய விஹாரம் ஸம்மன்னித்வா தே³தி, தஸ்மா யஸ்ஸ ஸங்கே⁴ன தி³ன்னோ, ஸோபி அனுட்டா²பனீயோ. காமஞ்சேத்த² கி³லானஸ்ஸாபி ஸங்கோ⁴யேவ அனுச்ச²விகம் ஸேனாஸனம் தே³தி, கி³லானோ பன ‘‘அபலோகேத்வா ஸங்கே⁴ன அதி³ன்னஸேனாஸனோபி ந பீளேதப்³போ³ அனுகம்பிதப்³போ³’’தி த³ஸ்ஸேதும் விஸும் வுத்தோ.

121. உபசாரேதி ஏத்த² மஞ்சபீடா²னம் தாவ மஹல்லகே விஹாரே ஸமந்தா தி³யட்³டோ⁴ ஹத்தோ² உபசாரோ, கு²த்³த³கே யதோ பஹோதி ததோ தி³யட்³டோ⁴ ஹத்தோ², பாதே³ தோ⁴வித்வா பவிஸந்தஸ்ஸ பஸ்ஸாவத்தா²ய நிக்க²மந்தஸ்ஸ ச யாவ த்³வாரே நிக்கி²த்தபாத³தோ⁴வனபாஸாணதோ பஸ்ஸாவட்டா²னதோ ச மஞ்சபீட²ம், தாவ தி³யட்³ட⁴ஹத்த²வித்தா²ரோ மக்³கோ³ உபசாரோ நாம. தஸ்மிம் மஞ்சஸ்ஸ வா பீட²ஸ்ஸ வா உபசாரே டி²தஸ்ஸ வா பி⁴க்கு²னோ பவிஸந்தஸ்ஸ வா நிக்க²மந்தஸ்ஸ வா உபசாரே யோ அனுபக²ஜ்ஜ ஸேய்யம் கப்பேதுகாமோ ஸேய்யம் ஸந்த²ரதி வா ஸந்த²ராபேதி வா, ஆபத்தி து³க்கடஸ்ஸ.

அபி⁴னிஸீத³தி வா அபி⁴னிபஜ்ஜதி வாதி ஏத்த² அபி⁴னிஸீத³னமத்தேன அபி⁴னிபஜ்ஜனமத்தேனேவ வா பாசித்தியம். ஸசே பன த்³வேபி கரோதி, த்³வே பாசித்தியானி. உட்டா²யுட்டா²ய நிஸீத³தோ வா நிபஜ்ஜதோ வா பயோகே³ பயோகே³ பாசித்தியம்.

122. உபசாரம் ட²பேத்வா ஸேய்யம் ஸந்த²ரதி வா ஸந்த²ராபேதி வாதி இமஸ்மிம் இதோ பரே ச ‘‘விஹாரஸ்ஸ உபசாரே’’திஆதி³கே து³க்கடவாரேபி யதா² இத⁴ அபி⁴னிஸீத³னமத்தே அபி⁴னிபஜ்ஜனமத்தே உப⁴யகரணே பயோக³பே⁴தே³ ச பாசித்தியப்பபே⁴தோ³ வுத்தோ, ஏவம் து³க்கடப்பபே⁴தோ³ வேதி³தப்³போ³. ஏவரூபேன ஹி விஸபா⁴க³புக்³க³லேன ஏகவிஹாரே வா ஏகபரிவேணே வா வஸந்தேன அத்தோ² நத்தி², தஸ்மா ஸப்³ப³த்தே²வஸ்ஸ நிவாஸோ வாரிதோ. அஞ்ஞஸ்ஸ புக்³க³லிகேதி இதா⁴பி விஸ்ஸாஸிகஸ்ஸ புக்³க³லிகம் அத்தனோ புக்³க³லிகஸதி³ஸமேவ, தத்த² அனாபத்தி.

123. ஆபதா³ஸூதி ஸசே ப³ஹி வஸந்தஸ்ஸ ஜீவிதப்³ரஹ்மசரியந்தராயோ ஹோதி, ஏவரூபாஸு ஆபதா³ஸு யோ பவிஸதி, தஸ்ஸாபி அனாபத்தி. ஸேஸம் உத்தானமேவாதி. பட²மபாராஜிகஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், அகுஸலசித்தம், து³க்க²வேத³னந்தி.

அனுபக²ஜ்ஜஸிக்கா²பத³ம் ச²ட்ட²ம்.

7. நிக்கட்³ட⁴னஸிக்கா²பத³வண்ணனா

126. ஸத்தமஸிக்கா²பதே³ – ஏகேன பயோகே³ன ப³ஹுகேபி த்³வாரே அதிக்காமேதீதி யே சதுபூ⁴மகபஞ்சபூ⁴மகா பாஸாதா³ ச²ஸத்தகோட்ட²கானி வா சதுஸ்ஸாலானி, தாதி³ஸேஸு ஸேனாஸனேஸு ஹத்தே²ஸு வா கீ³வாய வா க³ஹேத்வா அந்தரா அட்ட²பேந்தோ ஏகேன பயோகே³ன அதிக்காமேதி, ஏகமேவ பாசித்தியம். ட²பேத்வா ட²பேத்வா நானாபயோகே³ஹி அதிக்காமேந்தஸ்ஸ த்³வாரக³ணனாய பாசித்தியானி. ஹத்தே²ன அனாமஸித்வா ‘‘நிக்க²மா’’தி வத்வா வாசாய நிக்கட்³ட⁴ந்தஸ்ஸாபி ஏஸேவ நயோ.

அஞ்ஞம் ஆணாபேதீதி ஏத்த² ‘‘இமம் நிக்கட்³டா⁴’’தி ஆணத்திமத்தே து³க்கடம். ஸசே ஸோ ஸகிம் ஆணத்தோ ப³ஹுகேபி த்³வாரே அதிக்காமேதி, ஏகம் பாசித்தியம். ஸசே பன ‘‘ஏத்தகானி த்³வாரானி நிக்கட்³டா⁴ஹீ’’தி வா ‘‘யாவ மஹாத்³வாரம் தாவ நிக்கட்³டா⁴ஹீ’’தி வா ஏவம் நியாமேத்வா ஆணத்தோ ஹோதி, த்³வாரக³ணனாய பாசித்தியானி.

தஸ்ஸ பரிக்கா²ரந்தி யம்கிஞ்சி தஸ்ஸ ஸந்தகம் பத்தசீவரபரிஸ்ஸாவனத⁴மகரணமஞ்சபீட²பி⁴ஸிபி³ம்போ³ஹனாதி³பே⁴த³ம், அந்தமஸோ ரஜனச²ல்லிம்பி; யோ நிக்கட்³ட⁴தி வா நிக்கட்³டா⁴பேதி வா; தஸ்ஸ வத்து²க³ணனாய து³க்கடானி. கா³ள்ஹம் ப³ந்தி⁴த்வா ட²பிதேஸு பன ஏகாவ ஆபத்தீதி மஹாபச்சரியம் வுத்தம்.

127. அஞ்ஞஸ்ஸ புக்³க³லிகேதி இதா⁴பி விஸ்ஸாஸிகபுக்³க³லிகம் அத்தனோ புக்³க³லிகஸதி³ஸமேவ. யதா² ச இத⁴; ஏவம் ஸப்³ப³த்த². யத்ர பன விஸேஸோ ப⁴விஸ்ஸதி, தத்ர வக்கா²ம.

128. அலஜ்ஜிம் நிக்கட்³ட⁴தி வாதிஆதீ³ஸு ப⁴ண்ட³னகாரககலஹகாரகமேவ ஸகலஸங்கா⁴ராமதோ நிக்கட்³டி⁴தும் லப⁴தி, ஸோ ஹி பக்க²ம் லபி⁴த்வா ஸங்க⁴ம்பி பி⁴ந்தே³ய்ய. அலஜ்ஜீஆத³யோ பன அத்தனோ வஸனட்டா²னதோயேவ நிக்கட்³டி⁴தப்³பா³, ஸகலஸங்கா⁴ராமதோ நிக்கட்³டி⁴தும் ந வட்டதி. உம்மத்தகஸ்ஸாதி ஸயம் உம்மத்தகஸ்ஸ அனாபத்தி. ஸேஸம் உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

நிக்கட்³ட⁴னஸிக்கா²பத³ம் ஸத்தமம்.

8. வேஹாஸகுடிஸிக்கா²பத³வண்ணனா

129. அட்ட²மஸிக்கா²பதே³ – உபரிவேஹாஸகுடியாதி உபரி அச்ச²ன்னதலாய த்³விபூ⁴மிககுடியா வா திபூ⁴மிகாதி³குடியா வா. மஞ்சம் ஸஹஸா அபி⁴னிஸீதீ³தி மஞ்சம் ஸஹஸா அபி⁴ப⁴வித்வா அஜ்ஜோ²த்த²ரித்வா நிஸீதி³. பு⁴ம்மத்தே² வா ஏதம் உபயோக³வசனம்; மஞ்சே நிஸீதீ³தி அத்தோ². அபீ⁴தி இத³ம் பன பத³ஸோப⁴னத்த²ம் உபஸக்³க³மத்தமேவ. நிப்பதித்வாதி நிபதித்வா நிக்க²மித்வா வா. தஸ்ஸ ஹி உபரி ஆணீபி ந தி³ன்னா, தஸ்மா நிக்க²ந்தோ. விஸ்ஸரமகாஸீதி விரூபம் ஆதுரஸ்ஸரமகாஸி.

131. வேஹாஸகுடி நாம மஜ்ஜி²மஸ்ஸ புரிஸஸ்ஸ அஸீஸக⁴ட்டாதி யா பமாணமஜ்ஜி²மஸ்ஸ புரிஸஸ்ஸ ஸப்³ப³ஹேட்டி²மாஹி துலாஹி ஸீஸம் ந க⁴ட்டேதி, ஏதேன இத⁴ அதி⁴ப்பேதா வேஹாஸகுடி த³ஸ்ஸிதா ஹோதி, ந வேஹாஸகுடிலக்க²ணம். யா ஹி காசி உபரி அச்சி²ன்னதலா த்³விபூ⁴மிகா குடி திபூ⁴மிகாதி³குடி வா ‘‘வேஹாஸகுடீ’’தி வுச்சதி. இத⁴ பன அஸீஸக⁴ட்டா அதி⁴ப்பேதா. அபி⁴னிஸீத³னாதீ³ஸு புப்³பே³ வுத்தனயேனேவ பயோக³வஸேன ஆபத்திபே⁴தோ³ வேதி³தப்³போ³.

133. அவேஹாஸகுடியாதி பூ⁴மியம் கதபண்ணஸாலாதீ³ஸு அனாபத்தி. ந ஹி ஸக்கா தத்த² பரஸ்ஸ பீளா காதும். ஸீஸக⁴ட்டாயாதி யாயம் ஸீஸக⁴ட்டா ஹோதி, தத்தா²பி அனாபத்தி. ந ஹி ஸக்கா தத்த² ஹேட்டா²பாஸாதே³ அனோணதேன விசரிதும், தஸ்மா அஸஞ்சரணட்டா²னத்தா பரபீளா ந ப⁴விஸ்ஸதி. ஹேட்டா² அபரிபோ⁴க³ம் ஹோதீதி யஸ்ஸா ஹேட்டா² த³ப்³ப³ஸம்பா⁴ராதீ³னம் நிக்கி²த்தத்தா அபரிபோ⁴க³ம் ஹோதி, தத்தா²பி அனாபத்தி. பத³ரஸஞ்சிதம் ஹோதீதி யஸ்ஸா உபரிமதலம் தா³ருப²லகேஹி வா க⁴னஸந்த²தம் ஹோதி, ஸுதா⁴தி³பரிகம்மகதம் வா தத்தா²பி அனாபத்தி. படாணி தி³ன்னா ஹோதீதி மஞ்சபீடா²னம் பாத³ஸிகா²ஸு ஆணீ தி³ன்னா ஹோதி, யத்த² நிஸீத³ந்தேபி ந நிப்பதந்தி, தாதி³ஸே மஞ்சபீடே² நிஸீத³தோபி அனாபத்தி. தஸ்மிம் டி²தோதி ஆஹச்சபாத³கே மஞ்சே வா பீடே² வா டி²தோ உபரி நாக³த³ந்தகாதீ³ஸு லக்³கி³தகம் சீவரம் வா கிஞ்சி வா க³ண்ஹாதி வா, அஞ்ஞம் வா லக்³கே³தி, தஸ்ஸாபி அனாபத்தி. ஸேஸம் உத்தானமேவ. ஏளகலோமஸமுட்டா²னம் – காயதோ ச காயசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

வேஹாஸகுடிஸிக்கா²பத³ம் அட்ட²மம்.

9. மஹல்லகவிஹாரஸிக்கா²பத³வண்ணனா

135. நவமஸிக்கா²பதே³ – யாவ த்³வாரகோஸாதி ஏத்த² த்³வாரகோஸோ நாம பிட்ட²ஸங்கா⁴டஸ்ஸ ஸமந்தா கவாடவித்தா²ரப்பமாணோ ஓகாஸோ. மஹாபச்சரியம் பன ‘‘த்³வாரபா³ஹதோ பட்டா²ய தி³யட்³டோ⁴ ஹத்தோ²’’தி வுத்தம். குருந்தி³யம் பன ‘‘த்³வாரஸ்ஸ உபோ⁴ஸு பஸ்ஸேஸு கவாடப்பமாண’’ந்தி. மஹாஅட்ட²கதா²யம் ‘‘கவாடம் நாம தி³யட்³ட⁴ஹத்த²ம்பி ஹோதி த்³விஹத்த²ம்பி அட்³ட⁴தேய்யஹத்த²ம்பீ’’தி வுத்தம், தம் ஸுவுத்தம். ததே³வ ஹி ஸந்தா⁴ய ப⁴க³வதாபி ‘‘பிட்ட²ஸங்கா⁴டஸ்ஸ ஸமந்தா ஹத்த²பாஸா’’தி அயம் உக்கட்ட²னித்³தே³ஸோ கதோ. அக்³க³ளட்ட²பனாயாதி ஸகவாடகத்³வாரப³ந்த⁴ட்ட²பனாய; ஸகவாடகஸ்ஸ த்³வாரப³ந்த⁴ஸ்ஸ நிச்சலபா⁴வத்தா²யாதி அத்தோ². த்³வாரட்ட²பனாயாதி இத³ம்பி ஹி பத³பா⁴ஜனம் இமமேவத்த²ம் ஸந்தா⁴ய பா⁴ஸிதம். அயம் பனேத்த² அதி⁴ப்பாயோ – கவாடஞ்ஹி லஹுபரிவட்டகம் விவரணகாலே பி⁴த்திம் ஆஹனதி, பித³ஹனகாலே த்³வாரப³ந்த⁴ம். தேன ஆஹனனேன பி⁴த்தி கம்பதி, ததோ மத்திகா சலதி, சலித்வா ஸிதி²லா வா ஹோதி பததி வா. தேனாஹ ப⁴க³வா ‘‘யாவ த்³வாரகோஸா அக்³க³ளட்ட²பனாயா’’தி. தத்த² கிஞ்சாபி ‘‘இத³ம் நாம கத்தப்³ப³’’ந்தி நேவ மாதிகாயம் ந பத³பா⁴ஜனே வுத்தம், அட்டு²ப்பத்தியம் பன ‘‘புனப்புனம் சா²தா³பேஸி புனப்புனம் லேபாபேஸீ’’தி அதி⁴காரதோ யாவ த்³வாரகோஸா அக்³க³ளட்ட²பனாய புனப்புனம் லிம்பிதப்³போ³ வா லேபாபேதப்³போ³ வாதி ஏவமத்தோ² த³ட்ட²ப்³போ³.

யம் பன பத³பா⁴ஜனே ‘‘பிட்ட²ஸங்கா⁴டஸ்ஸ ஸமந்தா ஹத்த²பாஸா’’தி வுத்தம். தத்த² யஸ்ஸ வேமஜ்ஜே² த்³வாரம் ஹோதி, உபரிபா⁴கே³ உச்சா பி⁴த்தி, தஸ்ஸ தீஸு தி³ஸாஸு ஸமந்தா ஹத்த²பாஸா உபசாரோ ஹோதி, கு²த்³த³கஸ்ஸ விஹாரஸ்ஸ த்³வீஸு தி³ஸாஸு உபசாரோ ஹோதி. தத்ராபி யம் பி⁴த்திம் விவரியமானம் கவாடம் ஆஹனதி, ஸா அபரிபூரஉபசாராபி ஹோதி. உக்கட்ட²பரிச்சே²தே³ன பன தீஸு தி³ஸாஸு ஸமந்தா ஹத்த²பாஸா த்³வாரஸ்ஸ நிச்சலபா⁴வத்தா²ய லேபோ அனுஞ்ஞாதோ. ஸசே பனஸ்ஸ த்³வாரஸ்ஸ அதோ⁴பா⁴கே³பி லேபோகாஸோ அத்தி², தம்பி லிம்பிதும் வட்டதி. ஆலோகஸந்தி⁴பரிகம்மாயாதி ஏத்த² ஆலோகஸந்தீ⁴தி வாதபானகவாடகா வுச்சந்தி, தேபி விவரணகாலே வித³த்தி²மத்தம்பி அதிரேகம்பி பி⁴த்திப்பதே³ஸம் பஹரந்தி. உபசாரோ பனேத்த² ஸப்³ப³தி³ஸாஸு லப்³ப⁴தி, தஸ்மா ஸப்³ப³தி³ஸாஸு கவாடவித்தா²ரப்பமாணோ ஓகாஸோ ஆலோகஸந்தி⁴பரிகம்மத்தா²ய லிம்பிதப்³போ³ வா லேபாபேதப்³போ³ வாதி அயமேத்த² அதி⁴ப்பாயோ.

ஸேதவண்ணந்திஆதி³கம் ந மாதிகாய பத³பா⁴ஜனம். இமினா ஹி விஹாரஸ்ஸ பா⁴ரிகத்தம் நாம நத்தீ²தி பத³பா⁴ஜனேயேவ அனுஞ்ஞாதம், தஸ்மா ஸப்³ப³மேதம் யதா²ஸுக²ம் கத்தப்³ப³ம்.

ஏவம் லேபகம்மே யம் கத்தப்³ப³ம், தம் த³ஸ்ஸேத்வா புன ச²த³னே கத்தப்³ப³ம் த³ஸ்ஸேதும் ‘‘த்³வத்திச்ச²த³னஸ்ஸா’’திஆதி³ வுத்தம். தத்த² த்³வத்திச்ச²த³னஸ்ஸ பரியாயந்தி ச²த³னஸ்ஸ த்³வத்திபரியாயம்; பரியாயோ வுச்சதி பரிக்கே²போ, பரிக்கே²பத்³வயம் வா பரிக்கே²பத்தயம் வா அதி⁴ட்டா²தப்³ப³ந்தி அத்தோ². அப்பஹரிதே டி²தேனாதி அஹரிதே டி²தேன. ஹரிதந்தி சேத்த² ஸத்தத⁴ஞ்ஞபே⁴த³ம் புப்³ப³ண்ணம் முக்³க³மாஸதிலகுலத்த²அலாபு³கும்ப⁴ண்டா³தி³பே⁴த³ஞ்ச அபரண்ணம் அதி⁴ப்பேதம். தேனேவாஹ – ‘‘ஹரிதம் நாம புப்³ப³ண்ணம் அபரண்ண’’ந்தி.

ஸசே ஹரிதே டி²தோ அதி⁴ட்டா²தி, ஆபத்தி து³க்கடஸ்ஸாதி ஏத்த² பன யஸ்மிம்பி கே²த்தே வுத்தம் பீ³ஜம் ந தாவ ஸம்பஜ்ஜதி, வஸ்ஸே வா பன பதிதே ஸம்பஜ்ஜிஸ்ஸதி, தம்பி ஹரிதஸங்க்²யமேவ க³ச்ச²தி. தஸ்மா ஏவரூபே கே²த்தேபி டி²தேன ந அதி⁴ட்டா²தப்³ப³ம், அஹரிதேயேவ டி²தேன அதி⁴ட்டா²தப்³ப³ம். தத்ராபி அயம் பரிச்சே²தோ³, பிட்டி²வம்ஸஸ்ஸ வா கூடாகா³ரகண்ணிகாய வா உபரி து²பிகாய வா பஸ்ஸே நிஸின்னோ ச²த³னமுக²வட்டிஅந்தேன ஓலோகேந்தோ யஸ்மிம் பூ⁴மிபா⁴கே³ டி²தம் பஸ்ஸதி, யஸ்மிஞ்ச பூ⁴மிபா⁴கே³ டி²தோ, தம் உபரி நிஸின்னகம் பஸ்ஸதி, தஸ்மிம் டா²னே அதி⁴ட்டா²தப்³ப³ம். தஸ்ஸ அந்தோ அஹரிதேபி ட²த்வா அதி⁴ட்டா²தும் ந லப்³ப⁴தி. கஸ்மா? விஹாரஸ்ஸ ஹி பதந்தஸ்ஸ அயம் பதனோகாஸோதி.

136. மக்³கே³ன சா²தே³ந்தஸ்ஸாதி ஏத்த² மக்³கே³ன சா²த³னம் நாம அபரிக்கி²பித்வா உஜுகமேவ சா²த³னம்; தம் இட்ட²கஸிலாஸுதா⁴ஹி லப்³ப⁴தி. த்³வே மக்³கே³ அதி⁴ட்ட²ஹித்வாதி த்³வே மக்³கா³ ஸசே து³ச்ச²ன்னா ஹோந்தி, அபனேத்வாபி புனப்புனம் சா²தே³தும் லப்³ப⁴தி, தஸ்மா யதா² இச்ச²தி; ததா² த்³வே மக்³கே³ அதி⁴ட்ட²ஹித்வா ததியம்மக்³க³ம் ‘‘இதா³னி ஏவம் சா²தே³ஹீ’’தி ஆணாபேத்வா பக்கமிதப்³ப³ம். பரியாயேனாதி பரிக்கே²பேன. ஏவம்ச²த³னம் பன திணபண்ணேஹி லப்³ப⁴தி. தஸ்மா இதா⁴பி யதா² இச்ச²தி ததா² த்³வே பரியாயே அதி⁴ட்ட²ஹித்வா ததியம் பரியாயம் ‘‘இதா³னி ஏவம் சா²தே³ஹீ’’தி ஆணாபேத்வா பக்கமிதப்³ப³ம். ஸசே ந பக்கமதி, துண்ஹீபூ⁴தேன டா²தப்³ப³ம். ஸப்³ப³ம்பி சேதம் ச²த³னம் ச²த³னூபரி வேதி³தப்³ப³ம். உபரூபரிச்ச²ன்னோ ஹி விஹாரோ சிரம் அனோவஸ்ஸகோ ஹோதீதி மஞ்ஞமானா ஏவம் சா²தே³ந்தி. ததோ சே உத்தரிந்தி திண்ணம் மக்³கா³னம் வா பரியாயானம் வா உபரி சதுத்தே² மக்³கே³ வா பரியாயே வா.

137. கரளே கரளேதி திணமுட்டி²யம் திணமுட்டி²யம். ஸேஸமேத்த² உத்தானமேவாதி. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

மஹல்லகவிஹாரஸிக்கா²பத³ம் நவமம்.

10. ஸப்பாணகஸிக்கா²பத³வண்ணனா

140. த³ஸமஸிக்கா²பதே³ – ஜானம் ஸப்பாணகந்தி ஸப்பாணகம் ஏதந்தி யதா² ததா² வா ஜானந்தோ. ஸிஞ்சேய்ய வா ஸிஞ்சாபேய்ய வாதி தேன உத³கேன ஸயம் வா ஸிஞ்சேய்ய, அஞ்ஞம் வா ஆணாபேத்வா ஸிஞ்சாபேய்ய. பாளியம் பன ‘‘ஸிஞ்சேய்யாதி ஸயம் ஸிஞ்சதீ’’தி ஈதி³ஸானம் வசனானம் அத்தோ² புப்³பே³ வுத்தனயேனேவ வேதி³தப்³போ³.

தத்த² தா⁴ரம் அவிச்சி²ந்தி³த்வா ஸிஞ்சந்தஸ்ஸ ஏகஸ்மிம் உத³கக⁴டே ஏகாவ ஆபத்தி. ஏஸ நயோ ஸப்³ப³பா⁴ஜனேஸு. தா⁴ரம் விச்சி²ந்த³ந்தஸ்ஸ பன பயோகே³ பயோகே³ ஆபத்தி. மாதிகம் ஸம்முக²ம் கரோதி, தி³வஸம்பி ஸந்த³து, ஏகாவ ஆபத்தி. ஸசே தத்த² தத்த² ப³ந்தி⁴த்வா அஞ்ஞதோ அஞ்ஞதோ நேதி, பயோகே³ பயோகே³ ஆபத்தி. ஸகடபா⁴ரமத்தஞ்சேபி திணம் ஏகபயோகே³ன உத³கே பக்கி²பதி, ஏகாவ ஆபத்தி. ஏகேகம் திணம் வா பண்ணம் வா பக்கி²பந்தஸ்ஸ பயோகே³ பயோகே³ ஆபத்தி. மத்திகாயபி அஞ்ஞேஸுபி கட்ட²கோ³மயாதீ³ஸு ஏஸேவ நயோ. இத³ம் பன மஹாஉத³கம் ஸந்தா⁴ய ந வுத்தம், யம் திணே வா மத்திகாய வா பக்கி²த்தாய பரியாதா³னம் க³ச்ச²தி, ஆவிலம் வா ஹோதி, யத்த² பாணகா மரந்தி, தாதி³ஸம் உத³கம் ஸந்தா⁴ய வுத்தந்தி வேதி³தப்³ப³ம். ஸேஸமேத்த² உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம் திவேத³னந்தி.

ஸப்பாணகஸிக்கா²பத³ம் த³ஸமம்.

ஸமத்தோ வண்ணனாக்கமேன ஸேனாஸனவக்³கோ³ து³தியோ.