3. ஓவாத³வக்³கோ³

1. ஓவாத³ஸிக்கா²பத³வண்ணனா

141-144. பி⁴க்கு²னிவக்³க³ஸ்ஸ பட²மஸிக்கா²பதே³ – லாபி⁴னோ ஹோந்தீதி ஏத்த² ந தேஸம் பி⁴க்கு²னியோ தே³ந்தி, ந தா³பேந்தி, மஹாகுலேஹி பப்³ப³ஜிதா பன குலதீ⁴தரோ அத்தனோ ஸந்திகம் ஆக³தானம் ஞாதிமனுஸ்ஸானம் ‘‘குதோ அய்யே ஓவாத³ம் உத்³தே³ஸம் பரிபுச்ச²ம் லப⁴தா²’’தி புச்ச²ந்தானம் ‘‘அஸுகோ ச அஸுகோ ச தே²ரோ ஓவத³தீ’’தி அஸீதிமஹாஸாவகே உத்³தி³ஸித்வா கதா²னுஸாரேன தேஸம் ஸீலஸுதாசாரஜாதிகோ³த்தாதி³பே⁴த³ம் விஜ்ஜமானகு³ணம் கத²யந்தி. ஏவரூபா ஹி விஜ்ஜமானகு³ணா கதே²தும் வட்டந்தி. ததோ பஸன்னசித்தா மனுஸ்ஸா தே²ரானம் சீவராதி³பே⁴த³ம் மஹந்தம் லாப⁴ஸக்காரம் அபி⁴ஹரிம்ஸு. தேன வுத்தம் – ‘‘லாபி⁴னோ ஹோந்தி சீவர…பே… பரிக்கா²ரான’’ந்தி.

பி⁴க்கு²னியோ உபஸங்கமித்வாதி தேஸம் கிர ஸந்திகே தாஸு ஏகா பி⁴க்கு²னீபி ந ஆக³ச்ச²தி, லாப⁴தண்ஹாய பன ஆகட்³டி⁴யமானஹத³யா தாஸம் உபஸ்ஸயம் அக³மம்ஸு. தம் ஸந்தா⁴ய வுத்தம் – ‘‘பி⁴க்கு²னியோ உபஸங்கமித்வா’’தி. தாபி பி⁴க்கு²னியோ சலசித்ததாய தேஸம் வசனம் அகம்ஸுயேவ. தேன வுத்தம் – ‘‘அத² கோ² தா பி⁴க்கு²னியோ…பே… நிஸீதி³ம்ஸூ’’தி. திரச்சா²னகத²ந்தி ஸக்³க³மக்³க³க³மனேபி திரச்சா²னபூ⁴தம் ராஜகதா²தி³மனேகவித⁴ம் நிரத்த²ககத²ம். இத்³தோ⁴தி ஸமித்³தோ⁴, ஸஹிதத்தோ² க³ம்பீ⁴ரோ ப³ஹுரஸோ லக்க²ணபடிவேத⁴ஸம்யுத்தோதி அதி⁴ப்பாயோ.

145-147. அனுஜானாமி பி⁴க்க²வேதி ஏத்த² யஸ்மா தே பி⁴க்கூ² ‘‘மா தும்ஹே பி⁴க்க²வே பி⁴க்கு²னியோ ஓவதி³த்தா²’’தி வுச்சமானா அதி³ட்ட²ஸச்சத்தா ததா²க³தே ஆகா⁴தம் ப³ந்தி⁴த்வா அபாயுபகா³ ப⁴வேய்யும், தஸ்மா நேஸம் தம் அபாயுபக³தம் பரிஹரந்தோ ப⁴க³வா அஞ்ஞேனேவ உபாயேன தே பி⁴க்கு²னோவாத³தோ பரிபா³ஹிரே கத்துகாமோ இமம் பி⁴க்கு²னோவாத³கஸம்முதிம் அனுஜானீதி வேதி³தப்³போ³. ஏவம் இத⁴ பரிபா³ஹிரே கத்துகாமதாய அனுஜானித்வா பரதோ கரோந்தோவ ‘‘அனுஜானாமி பி⁴க்க²வே அட்ட²ஹங்கே³ஹி ஸமன்னாக³த’’ந்திஆதி³மாஹ. இமானி ஹி அட்ட²ங்கா³னி ச²ப்³ப³க்³கி³யானம் ஸுபினந்தேனபி ந பூ⁴தபுப்³பா³னீதி.

தத்த² ஸீலமஸ்ஸ அத்தீ²தி ஸீலவா. இதா³னி யஞ்ச தம் ஸீலம், யதா² ச தம் தஸ்ஸ அத்தி² நாம ஹோதி, தம் த³ஸ்ஸேந்தோ ‘‘பாதிமோக்க²ஸம்வரஸம்வுதோ’’திஆதி³மாஹ. தத்த² பாதிமோக்கோ²வ ஸம்வரோ பாதிமோக்க²ஸம்வரோ. பாதிமோக்க²ஸம்வரேன ஸம்வுதோ ஸமன்னாக³தோதி பாதிமோக்க²ஸம்வரஸம்வுதோ.

விஹரதீதி வத்ததி. வுத்தஞ்ஹேதம் விப⁴ங்கே³ –

‘‘பாதிமோக்க²ந்தி ஸீலம் பதிட்டா² ஆதி³ சரணம் ஸம்யமோ ஸம்வரோ மோக்க²ம் பமோக்க²ம் குஸலானம் த⁴ம்மானம் ஸமாபத்தியா; ஸம்வரோதி காயிகோ அவீதிக்கமோ வாசஸிகோ அவீதிக்கமோ காயிகவாசஸிகோ அவீதிக்கமோ. ஸம்வுதோதி இமினா பாதிமோக்க²ஸம்வரேன உபேதோ ஹோதி ஸமுபேதோ உபக³தோ ஸமுபக³தோ உபபன்னோ ஸமுபபன்னோ ஸம்பன்னோ ஸமன்னாக³தோ, தேன வுச்சதி ‘பாதிமோக்க²ஸம்வரஸம்வுதோ’தி. விஹரதீதி இரியதி வத்ததி பாலேதி யபேதி யாபேதி சரதி விஹரதி, தேன வுச்சதி ‘விஹரதீ’’’தி (விப⁴. 511-512).

ஆசாரகோ³சரஸம்பன்னோதி மிச்சா²ஜீவபடிஸேத⁴கேன ந வேளுதா³னாதி³னா ஆசாரேன, வேஸியாதி³அகோ³சரம் பஹாய ஸத்³தா⁴ஸம்பன்னகுலாதி³னா ச கோ³சரேன ஸம்பன்னோ. அணுமத்தேஸு வஜ்ஜேஸு ப⁴யத³ஸ்ஸாவீதி அப்பமத்தகேஸு வஜ்ஜேஸு ப⁴யத³ஸ்ஸாவீ, தானி வஜ்ஜானி ப⁴யதோ த³ஸ்ஸனஸீலோதி வுத்தம் ஹோதி. ஸமாதா³ய ஸிக்க²தி ஸிக்கா²பதே³ஸூதி அதி⁴ஸீலஸிக்கா²தி³பா⁴வேன திதா⁴ டி²தேஸு ஸிக்கா²பதே³ஸு தம் தம் ஸிக்கா²பத³ம் ஸமாதா³ய ஸம்மா ஆதா³ய ஸாது⁴கம் க³ஹேத்வா அவிஜஹந்தோ ஸிக்க²தீதி அத்தோ². அயமேத்த² ஸங்கே²போ, வித்தா²ரோ பன யோ இச்ச²தி, தேன விஸுத்³தி⁴மக்³க³தோ க³ஹேதப்³போ³.

ப³ஹு ஸுதமஸ்ஸாதி ப³ஹுஸ்ஸுதோ. ஸுதம் தா⁴ரேதீதி ஸுதத⁴ரோ; யத³ஸ்ஸ தம் ப³ஹு ஸுதம் நாம, தம் ந ஸுதமத்தமேவ; அத² கோ² நம் தா⁴ரேதீதி அத்தோ². மஞ்ஜூஸாயம் விய ரதனம் ஸுதம் ஸன்னிசிதமஸ்மிந்தி ஸுதஸன்னிசயோ. ஏதேன யம் ஸோ ஸுதம் தா⁴ரேதி, தஸ்ஸ மஞ்ஜூஸாய கோ³பேத்வா ஸன்னிசிதரதனஸ்ஸேவ சிரகாலேனாபி அவினாஸனம் த³ஸ்ஸேதி. இதா³னி தம் ஸுதம் ஸரூபதோ த³ஸ்ஸேந்தோ ‘‘யே தே த⁴ம்மா’’திஆதி³மாஹ, தம் வேரஞ்ஜகண்டே³ வுத்தனயமேவ. இத³ம் பனேத்த² நிக³மனம் – ததா²ரூபாஸ்ஸ த⁴ம்மா ப³ஹுஸ்ஸுதா ஹோந்தி, தஸ்மா ப³ஹுஸ்ஸுதோ. தா⁴தா, தஸ்மா ஸுதத⁴ரோ. வசஸா பரிசிதா மனஸானுபேக்கி²தா, தி³ட்டி²யா ஸுப்படிவித்³தா⁴; தஸ்மா ஸுதஸன்னிசயோ. தத்த² வசஸா பரிசிதாதி வாசாய பகு³ணா கதா. மனஸானுபேக்கி²தாதி மனஸா அனுபேக்கி²தா, ஆவஜ்ஜந்தஸ்ஸ தீ³பஸஹஸ்ஸேன ஓபா⁴ஸிதா விய ஹோந்தி. தி³ட்டி²யா ஸுப்படிவித்³தா⁴தி அத்த²தோ ச காரணதோ ச பஞ்ஞாய ஸுட்டு² படிவித்³தா⁴ ஸுபச்சக்க²கதா ஹோந்தி.

அயம் பன ப³ஹுஸ்ஸுதோ நாம திவிதோ⁴ ஹோதி – நிஸ்ஸயமுச்சனகோ, பரிஸுபட்டா²பகோ, பி⁴க்கு²னோவாத³கோதி. தத்த² நிஸ்ஸயமுச்சனகேன உபஸம்பதா³ய பஞ்சவஸ்ஸேன ஸப்³ப³ந்திமேன பரிச்சே²தே³ன த்³வே மாதிகா பகு³ணா வாசுக்³க³தா காதப்³பா³ பக்க²தி³வஸேஸு த⁴ம்மஸாவனத்தா²ய ஸுத்தந்ததோ சத்தாரோ பா⁴ணவாரா, ஸம்பத்தானம் பரிகத²னத்தா²ய அந்த⁴கவிந்த³மஹாராஹுலோவாத³அம்ப³ட்ட²ஸதி³ஸோ ஏகோ கதா²மக்³கோ³, ஸங்க⁴ப⁴த்தமங்க³லாமங்க³லேஸு அனுமோத³னத்தா²ய திஸ்ஸோ அனுமோத³னா, உபோஸத²பவாரணாதி³ஜானனத்த²ம் கம்மாகம்மவினிச்ச²யோ, ஸமணத⁴ம்மகரணத்த²ம் ஸமாதி⁴வஸேன வா விபஸ்ஸனாவஸேன வா அரஹத்தபரியோஸானமேகம் கம்மட்டா²னம், ஏத்தகம் உக்³க³ஹேதப்³ப³ம். ஏத்தாவதா ஹி அயம் ப³ஹுஸ்ஸுதோ ஹோதி சாதுத்³தி³ஸோ, யத்த² கத்த²சி அத்தனோ இஸ்ஸரியேன வஸிதும் லப⁴தி.

பரிஸுபட்டா²பகேன உபஸம்பதா³ய த³ஸவஸ்ஸேன ஸப்³ப³ந்திமேன பரிச்சே²தே³ன பரிஸம் அபி⁴வினயே வினேதும் த்³வே விப⁴ங்கா³ பகு³ணா வாசுக்³க³தா காதப்³பா³, அஸக்கோந்தேன தீஹி ஜனேஹி ஸத்³தி⁴ம் பரிவத்தனக்க²மா காதப்³பா³, கம்மாகம்மஞ்ச க²ந்த⁴கவத்தஞ்ச உக்³க³ஹேதப்³ப³ம். பரிஸாய பன அபி⁴த⁴ம்மே வினயனத்த²ம் ஸசே மஜ்ஜி²மபா⁴ணகோ ஹோதி மூலபண்ணாஸகோ உக்³க³ஹேதப்³போ³, தீ³க⁴பா⁴ணகேன மஹாவக்³கோ³, ஸம்யுத்தபா⁴ணகேன ஹேட்டி²மா வா தயோ வக்³கா³ மஹாவக்³கோ³ வா, அங்கு³த்தரபா⁴ணகேன ஹேட்டா² வா உபரி வா உபட்³ட⁴னிகாயோ உக்³க³ஹேதப்³போ³, அஸக்கோந்தேன திகனிபாததோ பட்டா²ய ஹேட்டா² உக்³க³ஹேதும்பி வட்டதி. மஹாபச்சரியம் பன ‘‘ஏகம் உக்³க³ண்ஹந்தேன சதுக்கனிபாதம் வா பஞ்சகனிபாதம் வா க³ஹேதும் வட்டதீ’’தி வுத்தம். ஜாதகபா⁴ணகேன ஸாட்ட²கத²ம் ஜாதகம் உக்³க³ஹேதப்³ப³ம், ததோ ஓரம் ந வட்டதி. த⁴ம்மபத³ம்பி ஸஹ வத்து²னா உக்³க³ஹேதும் வட்டதீதி மஹாபச்சரியம் வுத்தம். ததோ ததோ ஸமுச்சயம் கத்வா மூலபண்ணாஸகமத்தம் வட்டதி, ந வட்டதீதி? ‘‘ந வட்டதீ’’தி குருந்த³ட்ட²கதா²யம் படிக்கி²த்தம், இதராஸு விசாரணாயேவ நத்தி². அபி⁴த⁴ம்மே கிஞ்சி உக்³க³ஹேதப்³ப³ந்தி ந வுத்தம். யஸ்ஸ பன ஸாட்ட²கத²ம்பி வினயபிடகம் அபி⁴த⁴ம்மபிடகஞ்ச பகு³ணம், ஸுத்தந்தே ச வுத்தப்பகாரோ க³ந்தோ² நத்தி², பரிஸம் உபட்டா²பேதும் ந லப⁴தி. யேன பன ஸுத்தந்ததோ வினயதோ ச வுத்தப்பமாணோ க³ந்தோ² உக்³க³ஹிதோ, அயம் பரிஸுபட்டா²பகோ ப³ஹுஸ்ஸுதோ ஹோதி தி³ஸாபாமோக்கோ² யேனகாமங்க³மோ, பரிஸம் உபட்டா²பேதும் லப⁴தி.

பி⁴க்கு²னோவாத³கேன பன ஸாட்ட²கதா²னி தீணி பிடகானி உக்³க³ஹேதப்³பா³னி, அஸக்கோந்தேன சதூஸு நிகாயேஸு ஏகஸ்ஸ அட்ட²கதா² பகு³ணா காதப்³பா³, ஏகனிகாயேன ஹி ஸேஸனிகாயேஸுபி பஞ்ஹம் கதே²தும் ஸக்கி²ஸ்ஸதி. ஸத்தஸு பகரணேஸு சதுப்பகரணஸ்ஸ அட்ட²கதா² பகு³ணா காதப்³பா³, தத்த² லத்³த⁴னயேன ஹி ஸேஸபகரணேஸு பஞ்ஹம் கதே²தும் ஸக்கி²ஸ்ஸதி. வினயபிடகம் பன நானத்த²ம் நானாகாரணம், தஸ்மா தம் ஸத்³தி⁴ம் அட்ட²கதா²ய பகு³ணம் காதப்³ப³மேவ. ஏத்தாவதா ஹி பி⁴க்கு²னோவாத³கோ ப³ஹுஸ்ஸுதோ நாம ஹோதீதி.

உப⁴யானி கோ² பனஸ்ஸாதிஆதி³ பன யஸ்மா அஞ்ஞஸ்மிம் ஸகலே நவங்கே³பி பா³ஹுஸ்ஸச்சே ஸதி ஸாட்ட²கத²ம் வினயபிடகம் வினா ந வட்டதியேவ, தஸ்மா விஸும் வுத்தம். தத்த² வித்தா²ரேனாதி உப⁴தோவிப⁴ங்கே³ன ஸத்³தி⁴ம். ஸ்வாக³தானீதி ஸுட்டு² ஆக³தானி. யதா² ஆக³தானி பன ஸ்வாக³தானி ஹோந்தி, தம் த³ஸ்ஸேதும் ‘‘ஸுவிப⁴த்தானீ’’திஆதி³ வுத்தம். தத்த² ஸுவிப⁴த்தானீதி ஸுட்டு² விப⁴த்தானி பத³பச்சாப⁴ட்ட²ஸங்கரதோ³ஸவிரஹிதானி. ஸுப்பவத்தீனீதி பகு³ணானி வாசுக்³க³தானி. ஸுவினிச்சி²தானி ஸுத்தஸோதி க²ந்த⁴கபரிவாரதோ ஆஹரிதப்³ப³ஸுத்தவஸேன ஸுட்டு² வினிச்சி²தானி. அனுப்³யஞ்ஜனஸோதி அக்க²ரபத³பாரிபூரியா ச ஸுவினிச்சி²தானி அக²ண்டா³னி அவிபரீதக்க²ரானி. ஏதேன அட்ட²கதா² தீ³பிதா, அட்ட²கதா²தோ ஹி ஏஸ வினிச்ச²யோ ஹோதீதி.

கல்யாணவாசோதி ஸிதி²லத⁴னிதாதீ³னம் யதா²விதா⁴னவசனேன பரிமண்ட³லபத³ப்³யஞ்ஜனாய போரியா வாசாய ஸமன்னாக³தோ விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா. கல்யாணவாக்கரணோதி மது⁴ரஸ்ஸரோ, மாதுகா³மோ ஹி ஸரஸம்பத்திரதோ, தஸ்மா பரிமண்ட³லபத³ப்³யஞ்ஜனம்பி வசனம் ஸரஸம்பத்திரஹிதம் ஹீளேதி. யேபு⁴ய்யேன பி⁴க்கு²னீனம் பியோ ஹோதி மனாபோதி ஸப்³பா³ஸம் பியோ நாம து³ல்லபோ⁴, ப³ஹுதரானம் பன பண்டி³தானம் பி⁴க்கு²னீனம் ஸீலாசாரஸம்பத்தியா பியோ ஹோதி மனவட்³ட⁴னகோ. படிப³லோ ஹோதி பி⁴க்கு²னியோ ஓவதி³துந்தி ஸுத்தஞ்ச காரணஞ்ச த³ஸ்ஸேந்தோ வட்டப⁴யேன தஜ்ஜேத்வா பி⁴க்கு²னியோ ஓவதி³தும் தாதி³ஸம் த⁴ம்மம் தே³ஸேதும் ஸமத்தோ² ஹோதி. காஸாயவத்த²வஸனாயாதி காஸாயவத்த²னிவத்தா²ய. க³ருத⁴ம்மந்தி கி³ஹிகாலே பி⁴க்கு²னியா காயஸம்ஸக்³க³ம் வா ஸிக்க²மானாஸாமணேரீஸு மேது²னத⁴ம்மம் வா அனஜ்ஜா²பன்னபுப்³போ³ ஹோதி. மாதுகா³மோ ஹி புப்³பே³ கதமனுஸ்ஸரந்தோ ஸம்வரே டி²தஸ்ஸாபி த⁴ம்மதே³ஸனாய கா³ரவம் ந கரோதி. அத² வா தஸ்மியேவ அஸத்³த⁴ம்மே சித்தம் உப்பாதே³தி. வீஸதிவஸ்ஸோ வாதி உபஸம்பதா³ய வீஸதிவஸ்ஸோ ததோ அதிரேகவஸ்ஸோ வா. ஏவரூபோ ஹி விஸபா⁴கே³ஹி வத்தூ²ஹி புனப்புனம் ஸமாக³ச்ச²ந்தோபி த³ஹரோ விய ஸஹஸா ஸீலவினாஸம் ந பாபுணாதி, அத்தனோ வயம் பச்சவேக்கி²த்வா அயுத்தட்டா²னே ச²ந்த³ராக³ம் வினேதும் படிப³லோ ஹோதி, தேன வுத்தம் – ‘‘வீஸதிவஸ்ஸோ வா ஹோதி அதிரேகவீஸதிவஸ்ஸோ வா’’தி.

ஏத்த² ச ‘‘ஸீலவா’’திஆதி³ ஏகமங்க³ம், ‘‘ப³ஹுஸ்ஸுதோ ஹோதீ’’திஆதி³ து³தியம், ‘‘உப⁴யானி கோ² பனஸ்ஸா’’திஆதி³ ததியம், ‘‘கல்யாணவாசோ ஹோதி கல்யாணவாக்கரணோ’’தி சதுத்த²ம், ‘‘யேபு⁴ய்யேன பி⁴க்கு²னீனம் பியோ ஹோதி மனாபோ’’தி பஞ்சமம், ‘‘படிப³லோ ஹோதி பி⁴க்கு²னியோ ஓவதி³து’’ந்தி ச²ட்ட²ம், ‘‘ந கோ² பனேத’’ந்திஆதி³ ஸத்தமம், ‘‘வீஸதிவஸ்ஸோ’’திஆதி³ அட்ட²மந்தி வேதி³தப்³ப³ம்.

148. ஞத்திசதுத்தே²னாதி புப்³பே³ வத்து²ஸ்மிம் வுத்தேனேவ. க³ருத⁴ம்மேஹீதி க³ருகேஹி த⁴ம்மேஹி, தே ஹி கா³ரவம் கத்வா பி⁴க்கு²னீஹி ஸம்படிச்சி²தப்³ப³த்தா க³ருத⁴ம்மாதி வுச்சந்தி. ஏகதோஉபஸம்பன்னாயாதி ஏத்த² பி⁴க்கு²னீனம் ஸந்திகே ஏகதோஉபஸம்பன்னாய, யோ க³ருத⁴ம்மேன ஓவத³தி, தஸ்ஸ து³க்கடம். பி⁴க்கூ²னம் ஸந்திகே உபஸம்பன்னாய பன யதா²வத்து²கமேவ.

149. பரிவேணம் ஸம்மஜ்ஜித்வாதி ஸசே பாதோ அஸம்மட்ட²ம் ஸம்மட்ட²ம்பி வா புன திணபண்ணாதீ³ஹி உக்லாபம் பாத³ப்பஹாரேஹி ச விகிண்ணவாலிகம் ஜாதம், ஸம்மஜ்ஜிதப்³ப³ம். அஸம்மட்ட²ஞ்ஹி தம் தி³ஸ்வா ‘‘அய்யோ அத்தனோ நிஸ்ஸிதகே த³ஹரபி⁴க்கூ²பி வத்தபடிபத்தியம் ந யோஜேதி, த⁴ம்மம்யேவ கதே²தீ’’தி தா பி⁴க்கு²னியோ அஸோதுகாமா விய ப⁴வேய்யும். தேன வுத்தம் – ‘‘பரிவேணம் ஸம்மஜ்ஜித்வா’’தி. அந்தோகா³மதோ பன பி⁴க்கு²னியோ ஆக³ச்ச²ந்தியோ பிபாஸிதா ச கிலந்தா ச ஹோந்தி, தா பானீயஞ்ச ஹத்த²பாத³முக²ஸீதலகரணஞ்ச பச்சாஸீஸந்தி, தஸ்மிஞ்ச அஸதி புரிமனயேனேவ அகா³ரவம் ஜனேத்வா அஸோதுகாமாபி ஹோந்தி. தேன வுத்தம் – ‘‘பானீயம் பரிபோ⁴ஜனீயம் உபட்ட²பேத்வா’’தி.

ஆஸனந்தி நீசபீட²கப²லகதட்டிககடஸாரகாதி³பே⁴த³ம் அந்தமஸோ ஸாகா²ப⁴ங்க³ம்பி ‘‘இத³ம் தாஸம் ஆஸனம் ப⁴விஸ்ஸதீ’’தி ஏவம் ஆஸனம் பஞ்ஞபேத்வா. த⁴ம்மதே³ஸனாபத்திமோசனத்த²ம் பன து³தியோ இச்சி²தப்³போ³. தேன வுத்தம் – ‘‘து³தியம் க³ஹேத்வா நிஸீதி³தப்³ப³’’ந்தி. நிஸீதி³தப்³ப³ந்தி ந விஹாரபச்சந்தே, அத² கோ² விஹாரமஜ்ஜே² உபோஸதா²கா³ரஸ்ஸ வா போ⁴ஜனஸாலாய வா த்³வாரே ஸப்³பே³ஸம் ஓஸரணட்டா²னே நிஸீதி³தப்³ப³ம். ஸமக்³கா³த்தா²தி ஸப்³பா³ ஆக³தத்தா²தி அத்தோ². வத்தந்தீதி ஆக³ச்ச²ந்தி; பகு³ணா வாசுக்³க³தாதி அத்தோ². நிய்யாதே³தப்³போ³தி அப்பேதப்³போ³. ஓஸாரேதப்³போ³தி பாளி வத்தப்³பா³. வஸ்ஸஸதூபஸம்பன்னாயாதிஆதி³ வத்தப்³ப³பாளித³ஸ்ஸனம்.

தத்த² ஸாமீசிகம்மந்தி மக்³க³ஸம்பதா³னபீ³ஜனபானீயாபுச்ச²னாதி³கம் அனுச்ச²விகவத்தம். ஏத்த² ச பி⁴க்கு²னியா பி⁴க்கு²ஸ்ஸ அபி⁴வாத³னம் நாம அந்தோகா³மே வா ப³ஹிகா³மே வா அந்தோவிஹாரே வா ப³ஹிவிஹாரே வா அந்தரக⁴ரே வா ரதி²காய வா அந்தமஸோ ராஜுஸ்ஸாரணாயபி வத்தமானாய தே³வே வஸ்ஸமானே ஸகத்³த³மாய பூ⁴மியா ச²த்தபத்தஹத்தா²யபி ஹத்தி²அஸ்ஸாதீ³ஹி அனுப³த்³தா⁴யபி காதப்³ப³மேவ. ஏகாப³த்³தா⁴ய பாளியா பி⁴க்கா²சாரம் பவிஸந்தே தி³ஸ்வா ஏகஸ்மிம் டா²னே ‘‘வந்தா³மி அய்யா’’தி வந்தி³தும் வட்டதி. ஸசே அந்தரந்தரா த்³வாத³ஸஹத்தே² முஞ்சித்வா க³ச்ச²ந்தி, விஸும் விஸும் வந்தி³தப்³பா³. மஹாஸன்னிபாதே நிஸின்னே ஏகஸ்மிம்யேவ டா²னே வந்தி³தும் வட்டதி. ஏஸ நயோ அஞ்ஜலிகம்மேபி. யத்த² கத்த²சி நிஸின்னாய பன பச்சுட்டா²னம் காதப்³ப³ம், தஸ்ஸ தஸ்ஸ ஸாமீசிகம்மஸ்ஸ அனுரூபே பதே³ஸே ச காலே ச தம் தம் காதப்³ப³ம்.

ஸக்கத்வாதி யதா² கதோ ஸுகதோ ஹோதி, ஏவம் கத்வா. க³ரும்கத்வாதி தத்த² கா³ரவம் ஜனேத்வா. மானேத்வாதி மனேன பியம் கத்வா. பூஜேத்வாதி இமேஸம்யேவ திண்ணம் கிச்சானம் கரணேன பூஜேத்வா. அனதிக்கமனீயோதி ந அதிக்கமிதப்³போ³.

அபி⁴க்கு²கே ஆவாஸேதி ஏத்த² ஸசே பி⁴க்கு²னுபஸ்ஸயதோ அட்³ட⁴யோஜனப்³ப⁴ந்தரே ஓவாத³தா³யகா பி⁴க்கூ² ந வஸந்தி, அயம் அபி⁴க்கு²கோ ஆவாஸோ நாம. ஏத்த² வஸ்ஸம் ந வஸிதப்³ப³ம். வுத்தஞ்ஹேதம் – ‘‘அபி⁴க்கு²கோ நாம ஆவாஸோ ந ஸக்கா ஹோதி ஓவாதா³ய வா ஸம்வாஸாய வா க³ந்து’’ந்தி (பாசி. 1048). ந ச ஸக்கா ததோ பரம் பச்சா²ப⁴த்தம் க³ந்த்வா த⁴ம்மம் ஸுத்வா ஆக³ந்தும். ஸசே தத்த² வஸ்ஸம் வஸிதும் அனிச்ச²மானா பி⁴க்கு²னியோ ஞாதகா வா உபட்டா²கா வா ஏவம்வத³ந்தி – ‘‘வஸத², அய்யே, மயம் பி⁴க்கூ² ஆனேஸ்ஸாமா’’தி வட்டதி. ஸசே பன வுத்தப்பமாணே பதே³ஸே வஸ்ஸம் உபக³ந்துகாமா பி⁴க்கூ² ஆக³ந்த்வா ஸாகா²மண்ட³பேபி ஏகரத்தம் வுத்தா² ஹோந்தி; ந நிமந்திதா ஹுத்வா க³ந்துகாமா. ஏத்தாவதாபி ஸபி⁴க்கு²கோ ஆவாஸோ ஹோதி, ஏத்த² வஸ்ஸம் உபக³ந்தும் வட்டதி. உபக³ச்ச²ந்தீஹி ச பக்க²ஸ்ஸ தேரஸியம்யேவ பி⁴க்கூ² யாசிதப்³பா³ – ‘‘மயம் அய்யா தும்ஹாகம் ஓவாதே³ன வஸிஸ்ஸாமா’’தி. யதோ பன உஜுனா மக்³கே³ன அட்³ட⁴யோஜனே பி⁴க்கூ²னம் வஸனட்டா²னம், தேன பன மக்³கே³ன க³ச்ச²ந்தீனம் ஜீவிதந்தராயோ வா ப்³ரஹ்மசரியந்தராயோ வா ஹோதி, அஞ்ஞேன மக்³கே³ன க³ச்ச²ந்தீனம் அதிரேகட்³ட⁴யோஜனம் ஹோதி, அயம் அபி⁴க்கு²காவாஸட்டா²னேயேவ திட்ட²தி. ஸசே பன ததோ கா³வுதமத்தே அஞ்ஞோ பி⁴க்கு²னுபஸ்ஸயோ கே²மட்டா²னே ஹோதி, தாஹி பி⁴க்கு²னீஹி தா பி⁴க்கு²னியோ யாசித்வா புன க³ந்த்வா பி⁴க்கூ² யாசிதப்³பா³ ‘‘அய்யா அம்ஹாகம் உஜுமக்³கே³ அந்தராயோ அத்தி², அஞ்ஞேன மக்³கே³ன அதிரேகட்³ட⁴யோஜனம் ஹோதி. அந்தராமக்³கே³ பன அம்ஹாகம் உபஸ்ஸயதோ கா³வுதமத்தே அஞ்ஞோ பி⁴க்கு²னுபஸ்ஸயோ அத்தி², அய்யானம் ஸந்திகா தத்த² ஆக³தஓவாதே³ன வஸிஸ்ஸாமா’’தி. தேஹி பி⁴க்கூ²ஹி ஸம்படிச்சி²தப்³ப³ம். ததோ தாஹி பி⁴க்கு²னீஹி தம் பி⁴க்கு²னுபஸ்ஸயம் ஆக³ந்த்வா உபோஸதோ² காதப்³போ³, தா வா பி⁴க்கு²னியோ தி³ஸ்வா அத்தனோ உபஸ்ஸயமேவ க³ந்த்வா காதும்பி வட்டதி.

ஸசே பன வஸ்ஸம் உபக³ந்துகாமா பி⁴க்கூ² சாதுத்³த³ஸே விஹாரம் ஆக³ச்ச²ந்தி, பி⁴க்கு²னீஹி ச ‘‘இத⁴ அய்யா வஸ்ஸம் வஸிஸ்ஸதா²’’தி புச்சி²தா ‘‘ஆமா’’தி வத்வா புன தாஹி ‘‘தேனஹி அய்யா மயம்பி தும்ஹாகம் ஓவாத³ம் அனுஜீவந்தியோ வஸிஸ்ஸாமா’’தி வுத்தா து³தியதி³வஸே கா³மே பி⁴க்கா²சாரஸம்பத³ம் அபஸ்ஸந்தா ‘‘ந ஸக்கா இத⁴ வஸிது’’ந்தி பக்கமந்தி. அத² தா பி⁴க்கு²னியோ உபோஸத²தி³வஸே விஹாரம் க³ந்த்வா பி⁴க்கூ² ந பஸ்ஸந்தி, ஏத்த² கிம் காதப்³ப³ந்தி? யத்த² பி⁴க்கூ² வஸந்தி, தத்த² க³ந்த்வா பச்சி²மிகாய வஸ்ஸம் உபக³ந்தப்³ப³ம். ‘‘பச்சி²மிகாய வஸ்ஸம் உபக³ந்தும் ஆக³மிஸ்ஸந்தீ’’தி வா ஆபோ⁴க³ம் கத்வா ஆக³தானம் ஸந்திகே ஓவாதே³ன வஸிதப்³ப³ம். ஸசே பன பச்சி²மிகாயபி ந கேசி ஆக³ச்ச²ந்தி, அந்தராமக்³கே³ ச ராஜப⁴யம் வா சோரப⁴யம் வா து³ப்³பி⁴க்க²ம் வா ஹோதி, அபி⁴க்கு²காவாஸே வஸந்தியா ஆபத்தி, வஸ்ஸச்சே²த³ம் கத்வா க³ச்ச²ந்தியாபி ஆபத்தி, ஸா ரக்கி²தப்³பா³. ஆபதா³ஸு ஹி அபி⁴க்கு²கே ஆவாஸே வஸந்தியா அனாபத்தி வுத்தா. ஸசே ஆக³ந்த்வா வஸ்ஸம் உபக³தா பி⁴க்கூ² புன கேனசி காரணேன பக்கமந்தி, வஸிதப்³ப³மேவ. வுத்தஞ்ஹேதம் – ‘‘அனாபத்தி வஸ்ஸூபக³தா பி⁴க்கூ² பக்கந்தா வா ஹோந்தி விப்³ப⁴ந்தா வா காலங்கதா வா பக்க²ஸங்கந்தா வா ஆபதா³ஸு உம்மத்திகாய ஆதி³கம்மிகாயா’’தி. பவாரேந்தியா பன யத்த² பி⁴க்கூ² அத்தி², தத்த² க³ந்த்வா பவாரேதப்³ப³ம்.

அன்வத்³த⁴மாஸந்தி அத்³த⁴மாஸே அத்³த⁴மாஸே. த்³வே த⁴ம்மா பச்சாஸீஸிதப்³பா³தி த்³வே த⁴ம்மா இச்சி²தப்³பா³. உபோஸத²புச்ச²கந்தி உபோஸத²புச்ச²னம், தத்த² பன்னரஸிகே உபோஸதே² பக்க²ஸ்ஸ சாதுத்³த³ஸியம் சாதுத்³த³ஸிகே தேரஸியம் க³ந்த்வா உபோஸதோ² புச்சி²தப்³போ³. மஹாபச்சரியம் பன ‘‘பக்க²ஸ்ஸ தேரஸியம்யேவ க³ந்த்வா ‘அயம் உபோஸதோ² சாதுத்³த³ஸிகோ பன்னரஸிகோ’தி புச்சி²தப்³ப³’’ந்தி வுத்தம். உபோஸத²தி³வஸே ஓவாத³த்தா²ய உபஸங்கமிதப்³ப³ம். பாடிபத³தி³வஸதோ பன பட்டா²ய த⁴ம்மஸவனத்தா²ய க³ந்தப்³ப³ம். இதி ப⁴க³வா அஞ்ஞஸ்ஸ கம்மஸ்ஸ ஓகாஸம் அத³த்வா நிரந்தரம் பி⁴க்கு²னீனம் பி⁴க்கூ²னம் ஸந்திகே க³மனமேவ பஞ்ஞபேஸி. கஸ்மா? மந்த³பஞ்ஞத்தா மாதுகா³மஸ்ஸ. மந்த³பஞ்ஞோ ஹி மாதுகா³மோ, தஸ்மா நிச்சம் த⁴ம்மஸவனம் ப³ஹூபகாரம். ஏவஞ்ச ஸதி ‘‘யம் மயம் ஜானாம, தமேவ அய்யா ஜானந்தீ’’தி மானம் அகத்வா பி⁴க்கு²ஸங்க⁴ம் பயிரூபாஸமானா ஸாத்தி²கம் பப்³ப³ஜ்ஜம் கரிஸ்ஸந்தி, தஸ்மா ப⁴க³வா ஏவமகாஸி. பி⁴க்கு²னியோபி ‘‘யதா²னுஸிட்ட²ம் படிபஜ்ஜிஸ்ஸாமா’’தி ஸப்³பா³யேவ நிரந்தரம் விஹாரம் உபஸங்கமிம்ஸு. வுத்தஞ்ஹேதம் –

‘‘தேன கோ² பன ஸமயேன ஸப்³போ³ பி⁴க்கு²னிஸங்கோ⁴ ஓவாத³ம் க³ச்ச²தி. மனுஸ்ஸா உஜ்ஜா²யந்தி கி²ய்யந்தி விபாசேந்தி ‘ஜாயாயோ இமா இமேஸம், ஜாரியோ இமா இமேஸம், இதா³னிமே இமாஹி ஸத்³தி⁴ம் அபி⁴ரமிஸ்ஸந்தீ’தி. ப⁴க³வதோ ஏதமத்த²ம் ஆரோசேஸும் – ‘ந, பி⁴க்க²வே, ஸப்³பே³ன பி⁴க்கு²னிஸங்கே⁴ன ஓவாதோ³ க³ந்தப்³போ³, க³ச்சே²ய்ய சே, ஆபத்தி து³க்கடஸ்ஸ. அனுஜானாமி பி⁴க்க²வே சதூஹி பஞ்சஹி பி⁴க்கு²னீஹி ஓவாத³ம் க³ந்து’ந்தி. புனபி ததே²வ உஜ்ஜா²யிம்ஸு. புன ப⁴க³வா ‘அனுஜானாமி, பி⁴க்க²வே, த்³வே திஸ்ஸோ பி⁴க்கு²னியோ ஓவாத³ம் க³ந்து’’’ந்தி ஆஹ.

தஸ்மா பி⁴க்கு²னிஸங்கே⁴ன த்³வே திஸ்ஸோ பி⁴க்கு²னியோ யாசித்வா பேஸேதப்³பா³ – ‘‘ஏத²ய்யே, பி⁴க்கு²ஸங்க⁴ம் ஓவாதூ³பஸங்கமனம் யாசத², பி⁴க்கு²னிஸங்கோ⁴ அய்யா…பே… ஓவாதூ³பஸங்கமன’’ந்தி (சூளவ. 413). தாஹி பி⁴க்கு²னீஹி ஆராமம் க³ந்தப்³ப³ம். ததோ ஓவாத³படிக்³கா³ஹகம் ஏகம் பி⁴க்கு²ம் உபஸங்கமித்வா வந்தி³த்வா ஸோ பி⁴க்கு² ஏகாய பி⁴க்கு²னியா ஏவமஸ்ஸ வசனீயோ ‘‘பி⁴க்கு²னிஸங்கோ⁴, அய்ய, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர அய்ய பி⁴க்கு²னிஸங்கோ⁴ ஓவாதூ³பஸங்கமன’’ந்தி. தேன பி⁴க்கு²னா பாதிமோக்கு²த்³தே³ஸகோ பி⁴க்கு² உபஸங்கமித்வா ஏவமஸ்ஸ வசனீயோ ‘‘பி⁴க்கு²னிஸங்கோ⁴ ப⁴ந்தே பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர ப⁴ந்தே பி⁴க்கு²னிஸங்கோ⁴ ஓவாதூ³பஸங்கமன’’ந்தி. பாதிமோக்கு²த்³தே³ஸகேன வத்தப்³போ³ ‘‘அத்தி² கோசி பி⁴க்கு² பி⁴க்கு²னோவாத³கோ ஸம்மதோ’’தி. ஸசே ஹோதி கோசி பி⁴க்கு² பி⁴க்கு²னோவாத³கோ ஸம்மதோ, பாதிமோக்கு²த்³தே³ஸகேன வத்தப்³போ³ ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தம் பி⁴க்கு²னிஸங்கோ⁴ உபஸங்கமதூ’’தி.

ஸசே ந ஹோதி கோசி பி⁴க்கு² பி⁴க்கு²னோவாத³கோ ஸம்மதோ, பாதிமோக்கு²த்³தே³ஸகேன வத்தப்³போ³ – ‘‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’’ந்தி. ஸசே கோசி பி⁴க்கு² உஸ்ஸஹதி பி⁴க்கு²னியோ ஓவதி³தும், ஸோ ச ஹோதி அட்ட²ஹங்கே³ஹி ஸமன்னாக³தோ, ஸம்மன்னித்வா வத்தப்³போ³ – ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தம் பி⁴க்கு²னிஸங்கோ⁴ உபஸங்கமதூ’’தி.

ஸசே பன கோசி ந உஸ்ஸஹதி பி⁴க்கு²னியோ ஓவதி³தும், பாதிமோக்கு²த்³தே³ஸகேன வத்தப்³போ³ – ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி. ஏத்தாவதா ஹி ஸகலம் ஸிக்க²த்தயஸங்க³ஹம் ஸாஸனமாரோசிதம் ஹோதி. தேன பி⁴க்கு²னா ‘‘ஸாதூ⁴’’தி ஸம்படிச்சி²த்வா பாடிபதே³ பி⁴க்கு²னீனம் ஆரோசேதப்³ப³ம். பி⁴க்கு²னிஸங்கே⁴னபி தா பி⁴க்கு²னியோ பேஸேதப்³பா³ ‘‘க³ச்ச²த²ய்யே, புச்ச²த² ‘கிம் அய்ய லப⁴தி பி⁴க்கு²னிஸங்கோ⁴ ஓவாதூ³பஸங்கமன’’’ந்தி. தாஹி ‘‘ஸாது⁴ அய்யே’’தி ஸம்படிச்சி²த்வா ஆராமம் க³ந்த்வா தம் பி⁴க்கு²ம் உபஸங்கமித்வா ஏவம் வத்தப்³ப³ம் – ‘‘கிம் அய்ய லப⁴தி பி⁴க்கு²னிஸங்கோ⁴ ஓவாதூ³பஸங்கமன’’ந்தி. தேன வத்தப்³ப³ம் – ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி. தாஹி ‘‘ஸாது⁴ அய்யா’’தி ஸம்படிச்சி²தப்³ப³ம். ஏகதோ ஆக³தானம் வஸேன சேதம் வுத்தம், தாஸு பன ஏகாய பி⁴க்கு²னியா வத்தப்³ப³ஞ்ச ஸம்படிச்சி²தப்³ப³ஞ்ச, இதரா தஸ்ஸா ஸஹாயிகா.

ஸசே பன பி⁴க்கு²னிஸங்கோ⁴ வா பி⁴க்கு²ஸங்கோ⁴ வா ந பூரதி, உப⁴யதோபி வா க³ணமத்தமேவ புக்³க³லமத்தம் வா ஹோதி, ஏகா பி⁴க்கு²னீ வா ப³ஹூஹி பி⁴க்கு²னுபஸ்ஸயேஹி ஓவாத³த்தா²ய பேஸிதா ஹோதி, தத்ராயம் வசனக்கமோ – ‘‘பி⁴க்கு²னியோ அய்ய பி⁴க்கு²ஸங்க⁴ஸ்ஸ பாதே³ வந்த³ந்தி, ஓவாதூ³பஸங்கமனஞ்ச யாசந்தி, லப⁴ந்து கிர அய்ய பி⁴க்கு²னியோ ஓவாதூ³பஸங்கமன’’ந்தி. ‘‘அஹம் அய்ய பி⁴க்கு²ஸங்க⁴ஸ்ஸ பாதே³ வந்தா³மி; ஓவாதூ³பஸங்கமனஞ்ச யாசாமி, லபா⁴மஹம் அய்ய ஓவாதூ³பஸங்கமன’’ந்தி.

‘‘பி⁴க்கு²னிஸங்கோ⁴ அய்ய அய்யானம் பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர அய்ய பி⁴க்கு²னீஸங்கோ⁴ ஓவாதூ³பஸங்கமன’’ந்தி. ‘‘பி⁴க்கு²னியோ அய்ய அய்யானம் பாதே³ வந்த³ந்தி, ஓவாதூ³பஸங்கமனஞ்ச யாசந்தி, லப⁴ந்து கிர அய்ய பி⁴க்கு²னியோ ஓவாதூ³பஸங்கமன’’ந்தி. ‘‘அஹம் அய்ய அய்யானம் பாதே³ வந்தா³மி, ஓவாதூ³பஸங்கமனஞ்ச யாசாமி, லபா⁴மஹம் அய்ய ஓவாதூ³பஸங்கமன’’ந்தி.

‘‘பி⁴க்கு²னிஸங்கோ⁴ அய்ய அய்யஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர அய்ய பி⁴க்கு²னிஸங்கோ⁴ ஓவாதூ³பஸங்கமன’’ந்தி. ‘‘பி⁴க்கு²னியோ அய்ய அய்யஸ்ஸ பாதே³ வந்த³ந்தி; ஓவாதூ³பஸங்கமனஞ்ச யாசந்தி, லப⁴ந்து கிர அய்ய பி⁴க்கு²னியோ ஓவாதூ³பஸங்கமன’’ந்தி. ‘‘அஹம் அய்ய அய்யஸ்ஸ பாதே³ வந்தா³மி, ஓவாதூ³பஸங்கமனஞ்ச யாசாமி, லபா⁴மஹம் அய்ய ஓவாதூ³பஸங்கமன’’ந்தி.

‘‘பி⁴க்கு²னிஸங்கோ⁴ ச அய்ய பி⁴க்கு²னியோ ச பி⁴க்கு²னீ ச பி⁴க்கு²ஸங்க⁴ஸ்ஸ அய்யானம் அய்யஸ்ஸ பாதே³ வந்த³தி வந்த³ந்தி வந்த³தி, ஓவாதூ³பஸங்கமனஞ்ச யாசதி யாசந்தி யாசதி, லப⁴து கிர லப⁴ந்து கிர லப⁴து கிர அய்ய பி⁴க்கு²னிஸங்கோ⁴ ச பி⁴க்கு²னியோ ச பி⁴க்கு²னீ ச ஓவாதூ³பஸங்கமன’’ந்தி.

தேனபி பி⁴க்கு²னா உபோஸத²காலே ஏவம் வத்தப்³ப³ம் – ‘‘பி⁴க்கு²னியோ ப⁴ந்தே பி⁴க்கு²ஸங்க⁴ஸ்ஸ பாதே³ வந்த³ந்தி, ஓவாதூ³பஸங்கமனஞ்ச யாசந்தி, லப⁴ந்து கிர ப⁴ந்தே பி⁴க்கு²னியோ ஓவாதூ³பஸங்கமன’’ந்தி. ‘‘பி⁴க்கு²னீ ப⁴ந்தே பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர ப⁴ந்தே பி⁴க்கு²னீ ஓவாதூ³பஸங்கமன’’ந்தி.

‘‘பி⁴க்கு²னிஸங்கோ⁴ ப⁴ந்தே, பி⁴க்கு²னியோ ப⁴ந்தே, பி⁴க்கு²னீ ப⁴ந்தே ஆயஸ்மந்தானம் பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர ப⁴ந்தே பி⁴க்கு²னீ ஓவாதூ³பஸங்கமன’’ந்தி.

‘‘பி⁴க்கு²னிஸங்கோ⁴ ச ப⁴ந்தே, பி⁴க்கு²னியோ ச பி⁴க்கு²னீ ச பி⁴க்கு²ஸங்க⁴ஸ்ஸ ஆயஸ்மந்தானம் பாதே³ வந்த³தி வந்த³ந்தி வந்த³தி, ஓவாதூ³பஸங்கமனஞ்ச யாசதி யாசந்தி யாசதி, லப⁴து கிர லப⁴ந்து கிர லப⁴து கிர ப⁴ந்தே பி⁴க்கு²னிஸங்கோ⁴ ச பி⁴க்கு²னியோ ச பி⁴க்கு²னீ ச ஓவாதூ³பஸங்கமன’’ந்தி.

பாதிமோக்கு²த்³தே³ஸகேனாபி ஸசே ஸம்மதோ பி⁴க்கு² அத்தி², புரிமனயேனேவ தம் பி⁴க்கு²னியோ, தம் பி⁴க்கு²னீ, தம் பி⁴க்கு²னிஸங்கோ⁴ ச பி⁴க்கு²னியோ ச பி⁴க்கு²னீ ச உபஸங்கமந்து உபஸங்கமது உபஸங்கமதூதி வத்தப்³ப³ம். ஸசே நத்தி², பாஸாதி³கேன பி⁴க்கு²னிஸங்கோ⁴ ச பி⁴க்கு²னியோ ச பி⁴க்கு²னீ ச ஸம்பாதே³து ஸம்பாதே³ந்து ஸம்பாதே³தூதி வத்தப்³ப³ம்.

ஓவாத³படிக்³கா³ஹகேன பாடிபதே³ பச்சாஹரித்வா ததே²வ வத்தப்³ப³ம். ஓவாத³ம் பன பா³லகி³லானக³மிகே ட²பேத்வா அஞ்ஞோ ஸசேபி ஆரஞ்ஞகோ ஹோதி, அப்படிக்³க³ஹேதும் ந லப⁴தி. வுத்தஞ்ஹேதம் ப⁴க³வதா –

‘‘அனுஜானாமி, பி⁴க்க²வே, ட²பேத்வா பா³லம் ட²பேத்வா கி³லானம் ட²பேத்வா க³மிகம் அவஸேஸேஹி ஓவாத³ம் க³ஹேது’’ந்தி (சூளவ. 414).

தத்த² யோ சாதுத்³த³ஸிகபன்னரஸிகேஸு வா உபோஸதே²ஸு பாடிபதே³ வா க³ந்துகாமோ, ஸோ க³மிகோ து³தியபக்க²தி³வஸே க³ச்ச²ந்தோபி அக்³க³ஹேதும் ந லப⁴தி, ‘‘ந, பி⁴க்க²வே, ஓவாதோ³ ந க³ஹேதப்³போ³, யோ ந க³ண்ஹேய்ய, ஆபத்தி து³க்கடஸ்ஸா’’தி (சூளவ. 414) வுத்தம் ஆபத்திம் ஆபஜ்ஜதியேவ. ஓவாத³ம் க³ஹேத்வா ச உபோஸத²க்³கே³ அனாரோசேதும் வா பாடிபதே³ பி⁴க்கு²னீனம் அபச்சாஹரிதும் வா ந வட்டதி. வுத்தஞ்ஹேதம் –

‘‘ந, பி⁴க்க²வே, ஓவாதோ³ ந ஆரோசேதப்³போ³. யோ ந ஆரோசேய்ய, ஆபத்தி து³க்கடஸ்ஸா’’தி (சூளவ. 415).

அபரம்பி வுத்தம் –

‘‘ந, பி⁴க்க²வே, ஓவாதோ³ ந பச்சாஹரிதப்³போ³. யோ ந பச்சாஹரேய்ய, ஆபத்தி து³க்கடஸ்ஸா’’தி (சூளவ. 415).

தத்த² ஆரஞ்ஞகேன பச்சாஹரணத்த²ம் ஸங்கேதோ காதப்³போ³. வுத்தஞ்ஹேதம் – ‘‘அனுஜானாமி, பி⁴க்க²வே, ஆரஞ்ஞகேன பி⁴க்கு²னா ஓவாத³ம் க³ஹேதும், ஸங்கேதஞ்ச காதும், அத்ர படிஹரிஸ்ஸாமீ’’தி. தஸ்மா ஆரஞ்ஞகோ பி⁴க்கு² ஸசே பி⁴க்கு²னீனம் வஸனகா³மே பி⁴க்க²ம் லப⁴தி, தத்தே²வ சரித்வா பி⁴க்கு²னியோ தி³ஸ்வா ஆரோசேத்வா க³ந்தப்³ப³ம். நோ சஸ்ஸ தத்த² பி⁴க்கா² ஸுலபா⁴ ஹோதி, ஸாமந்தகா³மே சரித்வா பி⁴க்கு²னீனம் கா³மம் ஆக³ம்ம ததே²வ காதப்³ப³ம். ஸசே தூ³ரம் க³ந்தப்³ப³ம் ஹோதி, ஸங்கேதோ காதப்³போ³ – ‘‘அஹம் அமுகம் நாம தும்ஹாகம் கா³மத்³வாரே ஸப⁴ம் வா மண்ட³பம் வா ருக்க²மூலம் வா உபஸங்கமிஸ்ஸாமி, தத்த² ஆக³ச்சே²ய்யாதா²’’தி. பி⁴க்கு²னீஹி தத்த² க³ந்தப்³ப³ம், அக³ந்தும் ந லப்³ப⁴தி. வுத்தஞ்ஹேதம் – ‘‘ந, பி⁴க்க²வே, பி⁴க்கு²னியா ஸங்கேதம் ந க³ந்தப்³ப³ம். யா ந க³ச்சே²ய்ய, ஆபத்தி து³க்கடஸ்ஸா’’தி (சூளவ. 415).

உப⁴தோஸங்கே⁴ தீஹி டா²னேஹி பவாரேதப்³ப³ந்தி ஏத்த² பி⁴க்கு²னீஹி சாதுத்³த³ஸே அத்தனா பவாரேத்வா உபோஸதே² பி⁴க்கு²ஸங்கே⁴ பவாரேதப்³ப³ம். வுத்தஞ்ஹேதம் –

‘‘அனுஜானாமி, பி⁴க்க²வே, அஜ்ஜதனாய பவாரேத்வா அபரஜ்ஜு பி⁴க்கு²ஸங்க⁴ம் பவாரேது’’ந்தி (சூளவ. 427).

பி⁴க்கு²னிக²ந்த⁴கே வுத்தனயேனேவ சேத்த² வினிச்ச²யோ வேதி³தப்³போ³. வுத்தஞ்ஹேதம் –

‘‘தேன கோ² பன ஸமயேன ஸப்³போ³ பி⁴க்கு²னிஸங்கோ⁴ பவாரேந்தோ கோலாஹலமகாஸி. ப⁴க³வதோ ஏதமத்த²ம் ஆரோசேஸும். அனுஜானாமி, பி⁴க்க²வே, ஏகம் பி⁴க்கு²னிம் ப்³யத்தம் படிப³லம் ஸம்மன்னிதும் பி⁴க்கு²னிஸங்க⁴ஸ்ஸ அத்தா²ய பி⁴க்கு²ஸங்க⁴ம் பவாரேதும். ஏவஞ்ச பன, பி⁴க்க²வே, ஸம்மன்னிதப்³பா³. பட²மம் பி⁴க்கு²னீ யாசிதப்³பா³, யாசித்வா ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

‘‘ஸுணாது மே, அய்யே ஸங்கோ⁴, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமம் பி⁴க்கு²னிம் ஸம்மன்னேய்ய பி⁴க்கு²னிஸங்க⁴ஸ்ஸ அத்தா²ய பி⁴க்கு²ஸங்க⁴ம் பவாரேதும். ஏஸா ஞத்தி.

‘‘ஸுணாது மே, அய்யே ஸங்கோ⁴, ஸங்கோ⁴ இத்த²ன்னாமம் பி⁴க்கு²னிம் ஸம்மன்னேய்ய பி⁴க்கு²னிஸங்க⁴ஸ்ஸ அத்தா²ய பி⁴க்கு²ஸங்க⁴ம் பவாரேதும். யஸ்ஸா அய்யாய க²மதி இத்த²ன்னாமாய பி⁴க்கு²னியா ஸம்முதி பி⁴க்கு²னிஸங்க⁴ஸ்ஸ அத்தா²ய பி⁴க்கு²ஸங்க⁴ம் பவாரேதும், ஸா துண்ஹஸ்ஸ; யஸ்ஸா நக்க²மதி, ஸா பா⁴ஸேய்ய.

‘‘ஸம்மதா ஸங்கே⁴ன இத்த²ன்னாமா பி⁴க்கு²னீ பி⁴க்கு²னிஸங்க⁴ஸ்ஸ அத்தா²ய பி⁴க்கு²ஸங்க⁴ம் பவாரேதும். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி (சூளவ. 427).

தாய ஸம்மதாய பி⁴க்கு²னியா பி⁴க்கு²னிஸங்க⁴ம் ஆதா³ய பி⁴க்கு²ஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘பி⁴க்கு²னிஸங்கோ⁴ அய்ய, பி⁴க்கு²ஸங்க⁴ம் பவாரேதி – தி³ட்டே²ன வா ஸுதேன வா பரிஸங்காய வா. வத³தய்ய பி⁴க்கு²ஸங்கோ⁴ பி⁴க்கு²னிஸங்க⁴ம் அனுகம்பம் உபாதா³ய, பஸ்ஸந்தோ படிகரிஸ்ஸதி. து³தியம்பி அய்ய, ததியம்பி அய்ய, பி⁴க்கு²னிஸங்கோ⁴…பே… படிகரிஸ்ஸதீ’’தி.

ஸசே பி⁴க்கு²னிஸங்கோ⁴ ந பூரதி, ‘‘பி⁴க்கு²னியோ அய்ய பி⁴க்கு²ஸங்க⁴ம் பவாரேந்தி – தி³ட்டே²ன வா ஸுதேன வா பரிஸங்காய வா, வத³தய்ய பி⁴க்கு²ஸங்கோ⁴ பி⁴க்கு²னியோ அனுகம்பம் உபாதா³ய, பஸ்ஸந்தியோ படிகரிஸ்ஸந்தீ’’தி ச, ‘‘அஹம் அய்ய பி⁴க்கு²ஸங்க⁴ம் பவாரேமி – தி³ட்டே²ன வா ஸுதேன வா பரிஸங்காய வா, வத³து மம் அய்ய பி⁴க்கு²ஸங்கோ⁴ அனுகம்பம் உபாதா³ய, பஸ்ஸந்தீ படிகரிஸ்ஸாமீ’’தி ச ஏவம் திக்க²த்தும் வத்தப்³ப³ம்.

ஸசே பி⁴க்கு²ஸங்கோ⁴ ந பூரதி, ‘‘பி⁴க்கு²னிஸங்கோ⁴ அய்யா அய்யே பவாரேதி – தி³ட்டே²ன வா ஸுதேன வா பரிஸங்காய வா, வத³ந்தய்யா பி⁴க்கு²னிஸங்க⁴ம் அனுகம்பம் உபாதா³ய, பஸ்ஸந்தோ படிகரிஸ்ஸதீ’’தி ச, ‘‘பி⁴க்கு²னிஸங்கோ⁴ அய்ய அய்யம் பவாரேதி – தி³ட்டே²ன வா ஸுதேன வா பரிஸங்காய வா, வத³தய்யோ பி⁴க்கு²னிஸங்க⁴ம் அனுகம்பம் உபாதா³ய, பஸ்ஸந்தோ படிகரிஸ்ஸதீ’’தி ச ஏவம் திக்க²த்தும் வத்தப்³ப³ம்.

உபி⁴ன்னம் அபாரிபூரியா ‘‘பி⁴க்கு²னியோ அய்யா அய்யே பவாரேந்தி – தி³ட்டே²ன வா ஸுதேன வா பரிஸங்காய வா, வத³ந்தய்யா பி⁴க்கு²னியோ அனுகம்பம் உபாதா³ய, பஸ்ஸந்தியோ படிகரிஸ்ஸந்தீ’’தி ச, ‘‘பி⁴க்கு²னியோ அய்ய அய்யம் பவாரேந்தி – தி³ட்டே²ன வா ஸுதேன வா பரிஸங்காய வா, வத³தய்யோ பி⁴க்கு²னியோ அனுகம்பம் உபாதா³ய, பஸ்ஸந்தியோ படிகரிஸ்ஸந்தீ’’தி ச, ‘‘அஹம் அய்யா அய்யே பவாரேமி – தி³ட்டே²ன வா ஸுதேன வா பரிஸங்காய வா, வத³ந்து மம் அய்யா அனுகம்பம் உபாதா³ய, பஸ்ஸந்தீ படிகரிஸ்ஸாமீ’’தி ச, ‘‘அஹம் அய்ய அய்யம் பவாரேமி – தி³ட்டே²ன வா ஸுதேன வா பரிஸங்காய வா, வத³து மம் அய்யோ அனுகம்பம் உபாதா³ய, பஸ்ஸந்தீ படிகரிஸ்ஸாமீ’’தி ச ஏவம் திக்க²த்தும் வத்தப்³ப³ம்.

மானத்தசரணஞ்ச உபஸம்பதா³பரியேஸனா ச யதா²டா²னேயேவ ஆவி ப⁴விஸ்ஸதி.

ந பி⁴க்கு²னியா கேனசி பரியாயேனாதி த³ஸஹி வா அக்கோஸவத்தூ²ஹி அஞ்ஞேன வா கேனசி பரியாயேன பி⁴க்கு² நேவ அக்கோஸிதப்³போ³, ந பரிபா⁴ஸிதப்³போ³, ந ப⁴யேன தஜ்ஜேதப்³போ³. ஓவடோதி பிஹிதோ வாரிதோ படிக்கி²த்தோ. வசனயேவ வசனபதோ². அனோவடோதி அபிஹிதோ அவாரிதோ அப்படிக்கி²த்தோ. தஸ்மா பி⁴க்கு²னியா ஆதி⁴பச்சட்டா²னே ஜேட்ட²கட்டா²னே ட²த்வா ‘‘ஏவம் அபி⁴க்கம, ஏவம் படிக்கம, ஏவம் நிவாஸேஹி, ஏவம் பாருபாஹீ’’தி கேனசி பரியாயேன நேவ பி⁴க்கு² ஓவதி³தப்³போ³, ந அனுஸாஸிதப்³போ³. தோ³ஸம் பன தி³ஸ்வா ‘‘புப்³பே³ மஹாதே²ரா ந ஏவம் அபி⁴க்கமந்தி, ந படிக்கமந்தி, ந நிவாஸேந்தி, ந பாருபந்தி, ஈதி³ஸம் காஸாவம்பி ந தா⁴ரேந்தி, ந ஏவம் அக்கீ²னி அஞ்ஜேந்தீ’’திஆதி³னா நயேன விஜ்ஜமானதோ³ஸம் த³ஸ்ஸேதும் வட்டதி. பி⁴க்கூ²ஹி பன ‘‘அயம் வுட்³ட⁴ஸமணீ ஏவம் நிவாஸேதி, ஏவம் பாருபதி, மா ஏவம் நிவாஸேஹி, மா ஏவம் பாருபாஹி, மா திலகம்மபண்ணகம்மாதீ³னி கரோஹீ’’தி யதா²ஸுக²ம் பி⁴க்கு²னிம் ஓவதி³தும் அனுஸாஸிதும் வட்டதி.

ஸமக்³க³ம்ஹய்யாதி ப⁴ணந்தந்தி ‘‘ஸமக்³கா³ அம்ஹ அய்ய’’ இதி ப⁴ணந்தம் பி⁴க்கு²னிஸங்க⁴ம். அஞ்ஞம் த⁴ம்மம் ப⁴ணதீதி அஞ்ஞம் ஸுத்தந்தம் வா அபி⁴த⁴ம்மம் வா. ஸமக்³க³ம்ஹய்யாதி வசனேன ஹி ஓவாத³ம் பச்சாஸீஸந்தி, தஸ்மா ட²பேத்வா ஓவாத³ம் அஞ்ஞம் த⁴ம்மம் ப⁴ணந்தஸ்ஸ து³க்கடம். ஓவாத³ம் அனிய்யாதே³த்வாதி ஏஸோ ப⁴கி³னியோ ஓவாதோ³தி அவத்வா.

150. அத⁴ம்மகம்மேதிஆதீ³ஸு பி⁴க்கு²னோவாத³கஸம்முதிகம்மம் கம்மந்தி வேதி³தப்³ப³ம். தத்த² அத⁴ம்மகம்மே த்³வின்னம் நவகானம் வஸேன அட்டா²ரஸ பாசித்தியானி. த⁴ம்மகம்மே து³தியஸ்ஸ நவகஸ்ஸ அவஸானபதே³ அனாபத்தி, ஸேஸேஸு ஸத்தரஸ து³க்கடானி.

152. உத்³தே³ஸம் தே³ந்தோதி அட்ட²ன்னம் க³ருத⁴ம்மானம் பாளிம் உத்³தி³ஸந்தோ. பரிபுச்ச²ம் தே³ந்தோதி தஸ்ஸாயேவ பகு³ணாய க³ருத⁴ம்மபாளியா அட்ட²கத²ம் கதே²ந்தோதி அத்தோ². ஓஸாரேஹி அய்யாதி வுச்சமானோ ஓஸாரேதீதி ஏவம் வுச்சமானோ அட்ட²க³ருத⁴ம்மபாளிம் ஓஸாரேதீதி அத்தோ². ஏவம் உத்³தே³ஸம் தே³ந்தோ, பரிபுச்ச²ம் தே³ந்தோ, யோ ச ஓஸாரேஹீதி வுச்சமானோ அட்ட² க³ருத⁴ம்மே ப⁴ணதி, தஸ்ஸ பாசித்தியேன அனாபத்தி. அஞ்ஞம் த⁴ம்மம் ப⁴ணந்தஸ்ஸ து³க்கடேன அனாபத்தி. பஞ்ஹம் புச்ச²தி, பஞ்ஹம் புட்டோ² கதே²தீதி பி⁴க்கு²னீ க³ருத⁴ம்மனிஸ்ஸிதம் வா க²ந்தா⁴தி³னிஸ்ஸிதம் வா பஞ்ஹம் புச்ச²தி, தம் யோ பி⁴க்கு² கதே²தி, தஸ்ஸாபி அனாபத்தி. அஞ்ஞஸ்ஸத்தா²ய ப⁴ணந்தந்தி சதுபரிஸதிம் த⁴ம்மம் தே³ஸேந்தம் பி⁴க்கு²ம் உபஸங்கமித்வா பி⁴க்கு²னியோ ஸுணந்தி, தத்ராபி பி⁴க்கு²ஸ்ஸ அனாபத்தி. ஸிக்க²மானாய ஸாமணேரியாதி ஏதாஸம் தே³ஸேந்தஸ்ஸாபி அனாபத்தி. ஸேஸம் உத்தானத்த²மேவ.

பத³ஸோத⁴ம்மஸமுட்டா²னம் – வாசதோ ச வாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம் திவேத³னந்தி.

ஓவாத³ஸிக்கா²பத³ம் பட²மம்.

2. அத்த²ங்க³தஸிக்கா²பத³வண்ணனா

153. து³தியஸிக்கா²பதே³ – பரியாயேனாதி வாரேன, படிபாடியாதி அத்தோ². அதி⁴சேதஸோதி அதி⁴சித்தவதோ, ஸப்³ப³சித்தானம் அதி⁴கேன அரஹத்தப²லசித்தேன ஸமன்னாக³தஸ்ஸாதி அத்தோ². அப்பமஜ்ஜதோதி நப்பமஜ்ஜதோ, அப்பமாதே³ன குஸலானம் த⁴ம்மானம் ஸாதச்சகிரியாய ஸமன்னாக³தஸ்ஸாதி வுத்தம் ஹோதி. முனினோதி ‘‘யோ முனாதி உபோ⁴ லோகே, முனி தேன பவுச்சதீ’’தி (த⁴. ப. 269) ஏவம் உப⁴யலோகமுனனேன வா, மோனம் வுச்சதி ஞாணம், தேன ஞாணேன ஸமன்னாக³தத்தா வா கீ²ணாஸவோ முனி நாம வுச்சதி, தஸ்ஸ முனினோ. மோனபதே²ஸு ஸிக்க²தோதி அரஹத்தஞாணஸங்கா²தஸ்ஸ மோனஸ்ஸ பதே²ஸு ஸத்ததிம்ஸபோ³தி⁴பக்கி²யத⁴ம்மேஸு தீஸு வா ஸிக்கா²ஸு ஸிக்க²தோ. இத³ஞ்ச புப்³ப³பா⁴க³படிபத³ம் க³ஹேத்வா வுத்தம், தஸ்மா ஏவம் புப்³ப³பா⁴கே³ ஸிக்க²தோ இமாய ஸிக்கா²ய முனிபா⁴வம் பத்தஸ்ஸ முனினோதி ஏவமேத்த² அத்தோ² த³ட்ட²ப்³போ³. ஸோகா ந ப⁴வந்தி தாதி³னோதி தாதி³ஸஸ்ஸ கீ²ணாஸவமுனினோ அப்³ப⁴ந்தரே இட்ட²வியோகா³தி³வத்து²கா ஸோகா ந ஸந்தி. அத² வா தாதி³னோதி தாதி³லக்க²ணஸமன்னாக³தஸ்ஸ ஏவரூபஸ்ஸ முனினோ ஸோகா ந ப⁴வந்தீதி அயமேத்த² அத்தோ². உபஸந்தஸ்ஸாதி ராகா³தீ³னம் உபஸமேன உபஸந்தஸ்ஸ. ஸதா³ ஸதீமதோதி ஸதிவேபுல்லப்பத்தத்தா நிச்சகாலம் ஸதியா அவிரஹிதஸ்ஸ. ஆகாஸே அந்தலிக்கே²தி அந்தலிக்க²ஸங்கா²தே ஆகாஸே, ந கஸிணுக்³கா⁴டிமே, ந பன ரூபபரிச்சே²தே³. சங்கமதிபி திட்ட²திபீதி தாஸம் பி⁴க்கு²னீனம் கத²ம் ஸுத்வா ‘‘இமா பி⁴க்கு²னியோ மம் ‘ஏத்தகமேவ அயம் ஜானாதீ’தி அவமஞ்ஞந்தி, ஹந்த³ தா³னி ஏதாஸம் அத்தனோ ஆனுபா⁴வம் த³ஸ்ஸேமீ’’தி த⁴ம்மப³ஹுமானம் உப்பாதே³த்வா அபி⁴ஞ்ஞாபாத³கம் சதுத்த²ஜ்ஜா²னம் ஸமாபஜ்ஜித்வா வுட்டா²ய ஏவரூபம் இத்³தி⁴பாடிஹாரியம் த³ஸ்ஸேஸி – ‘‘ஆகாஸே அந்தலிக்கே² சங்கமதிபி…பே… அந்தரதா⁴யதிபீ’’தி. தத்த² அந்தரதா⁴யதிபீதி அந்தரதா⁴யதிபி அத³ஸ்ஸனம்பி க³ச்ச²தீதி அத்தோ². தஞ்சேவ உதா³னம் ப⁴ணதி அஞ்ஞஞ்ச ப³ஹும் பு³த்³த⁴வசனந்தி தே²ரோ கிர அத்தனோ பா⁴துதே²ரஸ்ஸ ஸந்திகே –

‘‘பது³மம் யதா² கோகனுத³ம் ஸுக³ந்த⁴ம்,

பாதோ ஸியா பு²ல்லமவீதக³ந்த⁴ம்;

அங்கீ³ரஸம் பஸ்ஸ விரோசமானம்,

தபந்தமாதி³ச்சமிவந்தலிக்கே²’’தி. (ஸம். நி. 1.123);

இமம் கா³த²ம் உத்³தி³ஸாபேத்வா சத்தாரோ மாஸே ஸஜ்ஜா²யி. ந ச பகு³ணம் கத்துமஸக்கி². ததோ நம் தே²ரோ ‘‘அப⁴ப்³போ³ த்வம் இமஸ்மிம் ஸாஸனே’’தி விஹாரா நிக்கட்³டா⁴பேஸி, ஸோ ரோத³மானோ த்³வாரகோட்ட²கே அட்டா²ஸி. அத² ப⁴க³வா பு³த்³த⁴சக்கு²னா வேனேய்யஸத்தே ஓலோகேந்தோ தம் தி³ஸ்வா விஹாரசாரிகம் சரமானோ விய தஸ்ஸ ஸந்திகம் க³ந்த்வா ‘‘சூளபந்த²க, கஸ்மா ரோத³ஸீ’’தி ஆஹ. ஸோ தமத்த²ம் ஆரோசேஸி. அத²ஸ்ஸ ப⁴க³வா ஸுத்³த⁴ம் பிலோதிகக²ண்ட³ம் த³த்வா ‘‘இத³ம் ‘ரஜோஹரணம் ரஜோஹரண’ந்தி பரிமஜ்ஜாஹீ’’தி ஆஹ. ஸோ ‘‘ஸாதூ⁴’’தி ஸம்படிச்சி²த்வா அத்தனோ நிவாஸட்டா²னே நிஸீதி³த்வா தஸ்ஸ ஏகமந்தம் பரிமஜ்ஜி, பரிமஜ்ஜிதட்டா²னம் காளகமஹோஸி. ஸோ ‘‘ஏவம் பரிஸுத்³த⁴ம்பி நாம வத்த²ம் இமம் அத்தபா⁴வம் நிஸ்ஸாய காளகம் ஜாத’’ந்தி ஸம்வேக³ம் படிலபி⁴த்வா விபஸ்ஸனம் ஆரபி⁴. அத²ஸ்ஸ ப⁴க³வா ஆரத்³த⁴வீரியபா⁴வம் ஞத்வா ‘‘அதி⁴சேதஸோ’’தி இமம் ஓபா⁴ஸகா³த²ம் அபா⁴ஸி. தே²ரோ கா³தா²பரியோஸானே அரஹத்தம் பாபுணி. தஸ்மா தே²ரோ பகதியாவ இமம் கா³த²ம் மமாயதி, ஸோ தம் இமிஸ்ஸா கா³தா²ய மமாயனபா⁴வம் ஜானாபேதும் தம்யேவ ப⁴ணதி. அஞ்ஞஞ்ச அந்தரந்தரா ஆஹரித்வா ப³ஹும் பு³த்³த⁴வசனம். தேன வுத்தம் – ‘‘தஞ்சேவ உதா³னம் ப⁴ணதி, அஞ்ஞஞ்ச ப³ஹும் பு³த்³த⁴வசன’’ந்தி.

156. ஏகதோ உபஸம்பன்னாயாதி பி⁴க்கு²னிஸங்கே⁴ உபஸம்பன்னாய, பி⁴க்கு²ஸங்கே⁴ பன உபஸம்பன்னம் ஓவத³ந்தஸ்ஸ பாசித்தியம். ஸேஸமேத்த² உத்தானமேவ. இத³ம்பி ச பத³ஸோத⁴ம்மஸமுட்டா²னமேவ.

அத்த²ங்க³தஸிக்கா²பத³ம் து³தியம்.

3. பி⁴க்கு²னுபஸ்ஸயஸிக்கா²பத³வண்ணனா

162. ததியஸிக்கா²பதே³ – அஞ்ஞத்ர ஸமயா ஓவத³தி ஆபத்தி பாசித்தியஸ்ஸாதிஆதீ³ஸு அட்ட²ஹி க³ருத⁴ம்மேஹி ஓவத³ந்தஸ்ஸேவ பாசித்தியம், அஞ்ஞேன த⁴ம்மேன து³க்கடந்தி வேதி³தப்³ப³ம். ஏகதோஉபஸம்பன்னாயாதி பி⁴க்கு²னிஸங்கே⁴ உபஸம்பன்னாய, பி⁴க்கு²ஸங்கே⁴ உபஸம்பன்னாய பன ஓவத³தோ பாசித்தியமேவ. இதோ பரம்பி யத்த² யத்த² ‘‘ஏகதோஉபஸம்பன்னா’’தி வுச்சதி, ஸப்³ப³த்த² அயமேவ அத்தோ² த³ட்ட²ப்³போ³. ஸேஸம் உத்தானமேவ.

கதி²னஸமுட்டா²னம் – காயவாசதோ, காயவாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

பி⁴க்கு²னுபஸ்ஸயஸிக்கா²பத³ம் ததியம்.

இத³ம் பனேத்த² மஹாபச்சரியம் வுத்தம் பகிண்ணகம் – அஸம்மதோ சே பி⁴க்கு² அத்த²ங்க³தே ஸூரியே பி⁴க்கு²னுபஸ்ஸயம் உபஸங்கமித்வா அட்ட²ஹி க³ருத⁴ம்மேஹி ஓவத³தி, தீணி பாசித்தியானி. அஞ்ஞேன த⁴ம்மேன ஓவத³தோ த்³வே து³க்கடானி, ஏகம் பாசித்தியம். கத²ம்? அஸம்மதமூலகம் து³க்கடம், உபஸ்ஸயம் க³ந்த்வா அஞ்ஞேன த⁴ம்மேன ஓவத³னமூலகம் து³க்கடம், அத்த²ங்க³தே ஸூரியே ஓவத³னமூலகம் பாசித்தியந்தி. ஸம்மதஸ்ஸ அத்த²ங்க³தே ஸூரியே தத்த² க³ந்த்வா அட்ட²ஹி க³ருத⁴ம்மேஹி ஓவத³ந்தஸ்ஸ ஏகா அனாபத்தி, த்³வே பாசித்தியானி. கத²ம்? ஸம்மதத்தா அனாபத்தி, அத்த²ங்க³தே ஸூரியே ஓவத³னமூலகம் ஏகம், க³ந்த்வா க³ருத⁴ம்மேஹி ஓவத³னமூலகம் ஏகந்தி த்³வே பாசித்தியானி. தஸ்ஸேவ அஞ்ஞேன த⁴ம்மேன ஓவத³தோ ஏகா அனாபத்தி, ஏகம் து³க்கடம், ஏகம் பாசித்தியம். கத²ம்? ஸம்மதத்தா அனாபத்தி, க³ந்த்வா அஞ்ஞேன த⁴ம்மேன ஓவத³னமூலகம் து³க்கடம், அத்த²ங்க³தே ஸூரியே ஓவத³னமூலகம் பாசித்தியந்தி. தி³வா பன க³ந்த்வா ஓவத³தோ ஸம்மதஸ்ஸ ச அஸம்மதஸ்ஸ ச ரத்திம் ஓவத³னமூலகம் ஏகம் பாசித்தியம் அபனேத்வா அவஸேஸா ஆபத்தானாபத்தியோ வேதி³தப்³பா³தி.

பகிண்ணககதா² நிட்டி²தா.

4. ஆமிஸஸிக்கா²பத³வண்ணனா

164. சதுத்த²ஸிக்கா²பதே³ – ந ப³ஹுகதாதி ந கதப³ஹுமானா, ந த⁴ம்மே ப³ஹுமானம் கத்வா ஓவத³ந்தீதி அதி⁴ப்பாயோ. ‘‘பி⁴க்கு²னோவாத³கம் அவண்ணம் கத்துகாமோ’’திஆதீ³னம் உஜ்ஜா²பனகே வுத்தனயேனேவத்தோ² வேதி³தப்³போ³.

உபஸம்பன்னம் ஸங்கே⁴ன அஸம்மதந்தி ஏத்த² அஸம்மதோ நாம ஸம்மதேன வா ஸங்கே⁴ன வா பா⁴ரம் கத்வா ட²பிதோ வேதி³தப்³போ³. அனுபஸம்பன்னம் ஸம்மதம் வா அஸம்மதம் வாதி ஏத்த² பன பி⁴க்கு²காலே ஸம்முதிம் லபி⁴த்வா ஸாமணேரபூ⁴மியம் டி²தோ ஸம்மதோ, ஸம்மதேன வா ஸங்கே⁴ன வா ட²பிதோ ப³ஹுஸ்ஸுதோ ஸாமணேரோ அஸம்மதோதி வேதி³தப்³போ³. ஸேஸம் வுத்தனயத்தா உத்தானமேவ.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ஆமிஸஸிக்கா²பத³ம் சதுத்த²ம்.

5. சீவரதா³னஸிக்கா²பத³வண்ணனா

169. பஞ்சமஸிக்கா²பதே³ – விஸிகா²யாதி ரதி²காய. பிண்டா³ய சரதீதி நிப³த்³த⁴சாரவஸேன அபி⁴ண்ஹம் சரதி. ஸந்தி³ட்டா²தி ஸந்தி³ட்ட²மித்தா அஹேஸும். ஸேஸமேத்த² பத³தோ உத்தானத்த²ம், வினிச்ச²யதோ சீவரபடிக்³க³ஹணஸிக்கா²பதே³ வுத்தனயேனேவ வேதி³தப்³ப³ம் ஸத்³தி⁴ம் ஸமுட்டா²னாதீ³ஹி. தத்ர ஹி பி⁴க்கு² படிக்³கா³ஹகோ, இத⁴ பி⁴க்கு²னீ, அயம் விஸேஸோ. ஸேஸம் தாதி³ஸமேவாதி.

சீவரதா³னஸிக்கா²பத³ம் பஞ்சமம்.

6. சீவரஸிப்³ப³னஸிக்கா²பத³வண்ணனா

175. ச²ட்ட²ஸிக்கா²பதே³ – உதா³யீதி லாளுதா³யீ. பட்டோ²தி படிப³லோ, நிபுணோ சேவ ஸமத்தோ² சாதி வுத்தம் ஹோதி. அஞ்ஞதரா பி⁴க்கு²னீதி தஸ்ஸேவ புராணது³தியிகா. படிபா⁴னசித்தந்தி அத்தனோ படிபா⁴னேன கதசித்தம், ஸோ கிர சீவரம் ரஜித்வா தஸ்ஸ மஜ்ஜே² நானாவண்ணேஹி விப்பகதமேது²னம் இத்தி²புரிஸரூபமகாஸி. தேன வுத்தம் – ‘‘மஜ்ஜே² படிபா⁴னசித்தம் வுட்டா²பேத்வா’’தி. யதா²ஸம்ஹடந்தி யதா²ஸம்ஹரிதமேவ.

176. சீவரந்தி யம் நிவாஸிதும் வா பாருபிதும் வா ஸக்கா ஹோதி, ஏவஞ்ஹி மஹாபச்சரியாதீ³ஸு வுத்தம். ஸயம் ஸிப்³ப³தீதி ஏத்த² ஸிப்³பி³ஸ்ஸாமீதி விசாரேந்தஸ்ஸாபி சி²ந்த³ந்தஸ்ஸாபி து³க்கடம், ஸிப்³ப³ந்தஸ்ஸ பன பாசித்தியம். ஆராபதே² ஆராபதே²தி ஸூசிம் பவேஸேத்வா பவேஸேத்வா நீஹரணே. ஸசே பன ஸகலஸூசிம் அனீஹரந்தோ தீ³க⁴ஸுத்தப்பவேஸனத்த²ம் ஸதக்க²த்தும்பி விஜ்ஜி²த்வா நீஹரதி, ஏகமேவ பாசித்தியம். ஸகிம் ஆணத்தோதி ஸகிம் ‘‘சீவரம் ஸிப்³பா³’’தி வுத்தோ. ப³ஹுகம்பி ஸிப்³ப³தீதி ஸசேபி ஸப்³ப³ம் ஸூசிகம்மம் பரியோஸாபேத்வா சீவரம் நிட்டா²பேதி, ஏகமேவ பாசித்தியம். அத² பன ‘‘இமஸ்மிம் சீவரே கத்தப்³ப³கம்மம் தவ பா⁴ரோ’’தி வுத்தோ கரோதி, ஆணத்தஸ்ஸ ஆராபதே² ஆராபதே² ஏகமேகம் பாசித்தியம், ஆணாபகஸ்ஸ ஏகவாசாய ஸம்ப³ஹுலானிபி. புனப்புனம் ஆணத்தியம் பன வத்தப்³ப³மேவ நத்தி².

யேபி ஸசே ஆசரியுபஜ்ஜா²யேஸு அத்தனோ ஞாதிகானம் சீவரம் ஸிப்³ப³ந்தேஸு தேஸம் நிஸ்ஸிதகா ‘‘ஆசரியுபஜ்ஜா²யவத்தம் வா கதி²னவத்தம் வா கரோமா’’தி ஸிப்³ப³ந்தி, தேஸம்பி ஆராபத²க³ணனாய ஆபத்தியோ. ஆசரியுபஜ்ஜா²யா அத்தனோ ஞாதிகானம் சீவரம் அந்தேவாஸிகேஹி ஸிப்³பா³பேந்தி, ஆசரியுபஜ்ஜா²யானம் து³க்கடம், அந்தேவாஸிகானம் பாசித்தியம். அந்தேவாஸிகா அத்தனோ ஞாதிகானம் ஆசரியுபஜ்ஜா²யேஹி ஸிப்³பா³பேந்தி, தத்ராபி ஏஸேவ நயோ. அந்தேவாஸிகானம்பி ஆசரியுபஜ்ஜா²யானம்பி ஞாதிகாய சீவரம் ஹோதி, ஆசரியுபஜ்ஜா²யா பன அந்தேவாஸிகே வஞ்சேத்வா ஸிப்³பா³பேந்தி, உபி⁴ன்னம்பி து³க்கடம். கஸ்மா? அந்தேவாஸிகானம் அஞ்ஞாதிகஸஞ்ஞாய ஸிப்³பி³தத்தா, இதரேஸம் அகப்பியே நியோஜிதத்தா. தஸ்மா ‘‘இத³ம் தே மாது சீவரம், இத³ம் ப⁴கி³னியா’’தி ஆசிக்கி²த்வா ஸிப்³பா³பேதப்³ப³ம்.

179. அஞ்ஞம் பரிக்கா²ரந்தி யம்கிஞ்சி உபாஹனத்த²விகாதி³ம். ஸேஸம் உத்தானமேவ. ச²ஸமுட்டா²னம் – கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சீவரஸிப்³ப³னஸிக்கா²பத³ம் ச²ட்ட²ம்.

7. ஸம்விதா⁴னஸிக்கா²பத³வண்ணனா

181. ஸத்தமஸிக்கா²பதே³ – பச்சா² க³ச்ச²ந்தீனம் சோரா அச்சி²ந்தி³ம்ஸூதி பச்சா² க³ச்ச²ந்தீனம் பத்தசீவரம் சோரா ஹரிம்ஸு. தூ³ஸேஸுந்தி தா பி⁴க்கு²னியோ சோரா தூ³ஸயிம்ஸு, ஸீலவினாஸம் பாபயிம்ஸூதி அத்தோ².

182-3. ஸம்விதா⁴யாதி ஸம்வித³ஹித்வா, க³மனகாலே ஸங்கேதம் கத்வாதி அத்தோ². குக்குடஸம்பாதே³தி ஏத்த² யஸ்மா கா³மா நிக்க²மித்வா குக்குடோ பத³ஸாவ அஞ்ஞம் கா³மம் க³ச்ச²தி, அயம் குக்குடஸம்பாதோ³தி வுச்சதி. தத்ராயம் வசனத்தோ² – ஸம்பத³ந்தி ஏத்தா²தி ஸம்பாதோ³. கே ஸம்பத³ந்தி? குக்குடா. குக்குடானம் ஸம்பாதோ³ குக்குடஸம்பாதோ³. அத² வா ஸம்பாதோ³தி க³மனம், குக்குடானம் ஸம்பாதோ³ ஏத்த² அத்தீ²திபி குக்குடஸம்பாதோ³. குக்குடஸம்பாதே இதிபி பாடோ², தத்த² யஸ்ஸ கா³மஸ்ஸ கே³ஹச்ச²த³னபிட்டி²தோ குக்குடோ உப்பதித்வா அஞ்ஞஸ்ஸ கே³ஹச்ச²த³னபிட்டி²யம் பததி, அயம் குக்குடஸம்பாதோதி வுச்சதி. வசனத்தோ² பனேத்த² வுத்தனயேனேவ வேதி³தப்³போ³. த்³விதா⁴ வுத்தப்பகாரோபி சேஸ கா³மோ அச்சாஸன்னோ ஹோதி, உபசாரோ ந லப்³ப⁴தி. யஸ்மிம் பன கா³மே பச்சூஸே வஸ்ஸந்தஸ்ஸ குக்குடஸ்ஸ ஸத்³தோ³ அனந்தரே கா³மே ஸுய்யதி, தாதி³ஸேஹி கா³மேஹி ஸம்புண்ணரட்டே² கா³மந்தரே கா³மந்தரே பாசித்தியந்தி அட்ட²கதா²யம் வுத்தம். கிஞ்சாபி வுத்தம், ‘‘கா³மந்தரே கா³மந்தரே ஆபத்தி பாசித்தியஸ்ஸா’’தி வசனதோ பன ஸசேபி ரதனமத்தந்தரோ கா³மோ ஹோதி, யோ தஸ்ஸ மனுஸ்ஸேஹி ட²பிதஉபசாரோ, தம் ஓக்கமந்தஸ்ஸ ஆபத்தியேவ.

தத்ராயம் ஆபத்திவினிச்ச²யோ – ஸம்விதா⁴னகாலே ஹி ஸசே உபோ⁴பி பி⁴க்கு²னுபஸ்ஸயே வா அந்தராராமே வா ஆஸனஸாலாய வா தித்தி²யஸேய்யாய வா ட²த்வா ஸம்வித³ஹந்தி, அனாபத்தி கப்பியபூ⁴மி கிராயம். தஸ்மா ஏத்த² ஸம்வித³ஹனபச்சயா து³க்கடாபத்திம் ந வத³ந்தி, க³ச்ச²ந்தஸ்ஸ யதா²வத்து²கமேவ. ஸசே பன அந்தோகா³மே பி⁴க்கு²னுபஸ்ஸயத்³வாரே ரதி²காய அஞ்ஞேஸு வா சதுக்கஸிங்கா⁴டகஹத்தி²ஸாலாதீ³ஸு ஸம்வித³ஹந்தி, பி⁴க்கு²னோ ஆபத்தி து³க்கடஸ்ஸ. ஏவம் ஸம்வித³ஹித்வா கா³மதோ நிக்க²மந்தி, நிக்க²மனே அனாபத்தி, அனந்தரகா³மஸ்ஸ உபசாரோக்கமனே பன பி⁴க்கு²னோ பாசித்தியம். தத்ராபி ‘‘பட²மபாதே³ து³க்கடம், து³தியபாதே³ பாசித்திய’’ந்தி மஹாபச்சரியம் வுத்தம். கா³மதோ நிக்க²மித்வா பன யாவ அனந்தரகா³மஸ்ஸ உபசாரம் ந ஓக்கமந்தி, ஏத்த²ந்தரே ஸம்வித³ஹிதேபி பி⁴க்கு²னோ து³க்கடம், அனந்தரகா³மஸ்ஸ உபசாரோக்கமனே புரிமனயேனேவ ஆபத்தி. ஸசே தூ³ரம் க³ந்துகாமா ஹோந்தி, கா³மூபசாரக³ணனாய ஓக்கமனே ஓக்கமனே ஆபத்தி, தஸ்ஸ தஸ்ஸ பன கா³மஸ்ஸ அதிக்கமனே அனாபத்தி. ஸசே பன பி⁴க்கு²னீ ‘‘அஸுகம் நாம கா³மம் க³மிஸ்ஸாமீ’’தி உபஸ்ஸயதோ நிக்க²மதி, பி⁴க்கு²பி தமேவ கா³மம் ஸந்தா⁴ய ‘‘அஸுகம் நாம கா³மம் க³மிஸ்ஸாமீ’’தி விஹாரதோ நிக்க²மதி. அத² த்³வேபி கா³மத்³வாரே ஸமாக³ந்த்வா ‘‘தும்ஹே குஹிம் க³ச்ச²த², அஸுகம் நாம கா³மம் தும்ஹே குஹிந்தி, மயம்பி தத்தே²வா’’தி வத்வா ‘‘ஏஹி தா³னி, க³ச்சா²மா’’தி ஸம்விதா⁴ய க³ச்ச²ந்தி, அனாபத்தி. கஸ்மா? புப்³ப³மேவ க³மிஸ்ஸாமாதி நிக்க²ந்தத்தாதி மஹாபச்சரியம் வுத்தம். தம் நேவ பாளியா ந ஸேஸஅட்ட²கதா²ய ஸமேதி.

அத்³த⁴யோஜனே அத்³த⁴யோஜனேதி ஏகமேகம் அத்³த⁴யோஜனம் அதிக்கமந்தஸ்ஸ இதா³னி அதிக்கமிஸ்ஸதீதி பட²மபாதே³ து³க்கடம், து³தியபாதே³ பாசித்தியம். இமஸ்மிஞ்ஹி நயே அதிக்கமனே ஆபத்தி, ஓக்கமனே அனாபத்தி.

184. பி⁴க்கு² ஸம்வித³ஹதீதி நக³ரத்³வாரே வா ரதி²காய வா பி⁴க்கு²னிம் தி³ஸ்வா ‘‘அஸுகம் கா³மம் நாம க³தபுப்³ப³த்தா²’’தி வத³தி, ‘‘நாம்ஹி அய்ய க³தபுப்³பா³’’தி ‘‘ஏஹி க³ச்சா²மா’’தி வா ‘‘ஸ்வே அஹம் க³மிஸ்ஸாமி, த்வம்பி ஆக³ச்சே²ய்யாஸீ’’தி வா வத³தி. பி⁴க்கு²னீ ஸம்வித³ஹதீதி கா³மந்தரே சேதியவந்த³னத்த²ம் கா³மதோ நிக்க²மந்தம் பி⁴க்கு²ம் தி³ஸ்வா ‘‘அய்ய குஹிம் க³ச்ச²தா²’’தி வத³தி. ‘‘அஸுகம் நாம கா³மம் சேதியவந்த³னத்த²’’ந்தி. ‘‘அஹம்பி அய்ய ஆக³ச்சா²மீ’’தி ஏவம் பி⁴க்கு²னீயேவ ஸம்வித³ஹதி, ந பி⁴க்கு².

185. விஸங்கேதேனாதி ஏத்த² ‘‘புரேப⁴த்தம் க³ச்சி²ஸ்ஸாமா’’தி வத்வா பச்சா²ப⁴த்தம் க³ச்ச²ந்தி, ‘‘அஜ்ஜ வா க³மிஸ்ஸாமா’’தி வத்வா ஸ்வே க³ச்ச²ந்தி. ஏவம் காலவிஸங்கேதேயேவ அனாபத்தி, த்³வாரவிஸங்கேதே பன மக்³க³விஸங்கேதே வா ஸதிபி ஆபத்தியேவ. ஆபதா³ஸூதி ரட்ட²பே⁴தே³ சக்கஸமாருள்ஹா ஜனபதா³ பரியாயந்தி ஏவரூபாஸு ஆபதா³ஸு அனாபத்தி. ஸேஸம் உத்தானமேவாதி.

சதுஸமுட்டா²னம் – காயதோ காயவாசதோ காயசித்ததோ காயவாசாசித்ததோ ச ஸமுட்டா²தி, கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

ஸம்விதா⁴னஸிக்கா²பத³ம் ஸத்தமம்.

8. நாவாபி⁴ருஹனஸிக்கா²பத³வண்ணனா

188. அட்ட²மஸிக்கா²பதே³ – ஸம்விதா⁴யாதி லோகஸ்ஸாத³மித்தஸந்த²வவஸேன கீளாபுரேக்கா²ரா ஸம்வித³ஹித்வா. உத்³த⁴ம்கா³மினிந்தி உத்³த⁴ம் நதி³யா படிஸோதம் க³ச்ச²ந்திம். யஸ்மா பன யோ உத்³த⁴ம் ஜவனதோ உஜ்ஜவனிகாய நாவாய கீளதி, ஸோ ‘‘உத்³த⁴ம்கா³மினிம் அபி⁴ருஹதீ’’தி வுச்சதி. தேனஸ்ஸ பத³பா⁴ஜனே அத்த²மேவ த³ஸ்ஸேதும் ‘‘உஜ்ஜவனிகாயா’’தி வுத்தம். அதோ⁴கா³மினிந்தி அதோ⁴ அனுஸோதம் க³ச்ச²ந்திம். யஸ்மா பன யோ அதோ⁴ ஜவனதோ ஓஜவனிகாய நாவாய கீளதி, ஸோ ‘‘அதோ⁴கா³மினிம் அபி⁴ருஹதீ’’தி வுச்சதி. தேனஸ்ஸாபி பத³பா⁴ஜனே அத்த²மேவ த³ஸ்ஸேதும் ‘‘ஓஜவனிகாயா’’தி வுத்தம். தத்த² யம் தித்த²ஸம்படிபாத³னத்த²ம் உத்³த⁴ம் வா அதோ⁴ வா ஹரந்தி, ஏத்த² அனாபத்தி. திரியம் தரணாயாதி உபயோக³த்தே² நிஸ்ஸக்கவசனம்.

189. கா³மந்தரே கா³மந்தரேதி ஏத்த² யஸ்ஸா நதி³யா ஏகம் தீரம் குக்குடஸம்பாத³கா³மேஹி நிரந்தரம், ஏகம் அகா³மகம் அரஞ்ஞம், தஸ்ஸா ஸகா³மகதீரபஸ்ஸேன க³மனகாலே கா³மந்தரக³ணனாய பாசித்தியானி, அகா³மகதீரபஸ்ஸேன க³மனகாலே அத்³த⁴யோஜனக³ணனாய. யா பன யோஜனவித்த²தா ஹோதி, தஸ்ஸா மஜ்ஜே²ன க³மனேபி அத்³த⁴யோஜனக³ணனாய பாசித்தியானி வேதி³தப்³பா³னி. அனாபத்தி திரியம் தரணாயாதி ஏத்த² ந கேவலம் நதி³யா, யோபி மஹாதித்த²பட்டனதோ தாமலித்திம் வா ஸுவண்ணபூ⁴மிம் வா க³ச்ச²தி, தஸ்ஸாபி அனாபத்தி. ஸப்³ப³அட்ட²கதா²ஸு ஹி நதி³யம்யேவ ஆபத்தி விசாரிதா, ந ஸமுத்³தே³.

191. விஸங்கேதேனாதி இதா⁴பி காலவிஸங்கேதேனேவ அனாபத்தி, தித்த²விஸங்கேதேன பன நாவாவிஸங்கேதேன வா க³ச்ச²ந்தஸ்ஸ ஆபத்தியேவ. ஸேஸம் பட²மஸிக்கா²பத³ஸதி³ஸமேவ ஸத்³தி⁴ம் ஸமுட்டா²னாதீ³ஹீதி.

நாவாபி⁴ருஹனஸிக்கா²பத³ம் அட்ட²மம்.

9. பரிபாசிதஸிக்கா²பத³வண்ணனா

192. நவமஸிக்கா²பதே³ – மஹானாகே³ திட்ட²மானேதி பு⁴ம்மத்தே² உபயோக³வசனம், மஹானாகே³ஸு திட்ட²மானேஸூதி அத்தோ². அத² வா மஹானாகே³ திட்ட²மானே ‘‘அதி³ஸ்வா’’தி அயமேத்த² பாட²ஸேஸோ த³ட்ட²ப்³போ³. இதரதா² ஹி அத்தோ² ந யுஜ்ஜதி. அந்தராகதா²தி அவஸானம் அப்பத்வா ஆரம்ப⁴ஸ்ஸ ச அவஸானஸ்ஸ ச வேமஜ்ஜ²ட்டா²னம் பத்தகதா². விப்பகதாதி கயிரமானா ஹோதி. ஸச்சம் மஹானாகா³ கோ² தயா க³ஹபதீதி அத்³த⁴ச்சி²கேன ஓலோகயமானா தே²ரே பவிஸந்தே தி³ஸ்வா தேஹி ஸுதபா⁴வம் ஞத்வா ஏவமாஹ.

194. பி⁴க்கு²னிபரிபாசிதந்தி பி⁴க்கு²னியா பரிபாசிதம், கு³ணப்பகாஸனேன நிப்பா²தி³தம்; லத்³த⁴ப்³ப³ம் கதந்தி அத்தோ². பத³பா⁴ஜனே பனஸ்ஸ பி⁴க்கு²னிஞ்ச தஸ்ஸா பரிபாசனாகாரஞ்ச த³ஸ்ஸேதும் ‘‘பி⁴க்கு²னீ நாம உப⁴தோஸங்கே⁴ உபஸம்பன்னா, பரிபாசேதி நாம புப்³பே³ அதா³துகாமான’’ந்திஆதி³ வுத்தம். புப்³பே³ கி³ஹிஸமாரம்பா⁴தி ஏத்த² புப்³பே³தி பட²மம். ஸமாரம்போ⁴தி ஸமாரத்³த⁴ம் வுச்சதி, படியாதி³தஸ்ஸேதம் அதி⁴வசனம். கி³ஹீனம் ஸமாரம்போ⁴ கி³ஹிஸமாரம்போ⁴. பி⁴க்கு²னியா பரிபாசனதோ பட²மமேவ யம் கி³ஹீனம் படியாதி³தம் ப⁴த்தம், ததோ அஞ்ஞத்ர தம் பிண்ட³பாதம் ட²பேத்வா அஞ்ஞம் பு⁴ஞ்ஜந்தஸ்ஸ ஆபத்தி, தம் பன பு⁴ஞ்ஜந்தஸ்ஸ அனாபத்தீதி வுத்தம் ஹோதி. பத³பா⁴ஜனே பன யஸ்மா ஞாதகபவாரிதேஹி பி⁴க்கு²ஸ்ஸத்தா²ய அஸமாரத்³தோ⁴பி பிண்ட³பாதோ அத்த²தோ ஸமாரத்³தோ⁴வ ஹோதி, யதா²ஸுக²ம் ஆஹராபேதப்³ப³தோ, தஸ்மா ப்³யஞ்ஜனம் அனாதி³யித்வா அத்த²மேவ த³ஸ்ஸேதும் ‘‘கி³ஹிஸமாரம்போ⁴ நாம ஞாதகா வா ஹோந்தி பவாரிதா வா’’தி வுத்தம்.

195. பகதிபடியத்தந்தி பகதியா தஸ்ஸேவ பி⁴க்கு²னோ அத்தா²ய படியாதி³தம் ஹோதி ‘‘தே²ரஸ்ஸ த³ஸ்ஸாமா’’தி. மஹாபச்சரியம் பன ‘‘தஸ்ஸ அஞ்ஞஸ்ஸா’’தி அவத்வா ‘‘பி⁴க்கூ²னம் த³ஸ்ஸாமாதி படியத்தம் ஹோதீ’’தி அவிஸேஸேன வுத்தம்.

197. பஞ்ச போ⁴ஜனானி ட²பேத்வா ஸப்³ப³த்த² அனாபத்தீதி யாகு³க²ஜ்ஜகப²லாப²லே ஸப்³ப³த்த² பி⁴க்கு²னிபரிபாசிதேபி அனாபத்தி. ஸேஸம் உத்தானமேவ. பட²மபாராஜிகஸமுட்டா²னம் – காயசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், திசித்தம், திவேத³னந்தி.

பரிபாசிதஸிக்கா²பத³ம் நவமம்.

10. ரஹோனிஸஜ்ஜஸிக்கா²பத³வண்ணனா

198. த³ஸமஸிக்கா²பதே³ – ஸப்³போ³ பாளிஅத்தோ² ச வினிச்ச²யோ ச து³தியஅனியதே வுத்தனயேனேவ வேதி³தப்³போ³. இத³ஞ்ஹி ஸிக்கா²பத³ம் து³தியானியதேன ச உபரி உபனந்த⁴ஸ்ஸ சதுத்த²ஸிக்கா²பதே³ன ச ஸத்³தி⁴ம் ஏகபரிச்சே²த³ம், அட்டு²ப்பத்திவஸேன பன விஸும் பஞ்ஞத்தந்தி.

ரஹோனிஸஜ்ஜஸிக்கா²பத³ம் த³ஸமம்.

ஸமத்தோ வண்ணனாக்கமேன பி⁴க்கு²னிவக்³கோ³ ததியோ.