5. து³தியஸேனாஸனஸிக்கா²பத³வண்ணனா

116. து³தியஸேனாஸனஸிக்கா²பதே³ – பி⁴ஸீதி மஞ்சகபி⁴ஸி வா பீட²கபி⁴ஸி வா. சிமிலிகாதீ³னிபி புரிமஸிக்கா²பதே³ வுத்தப்பகாரானியேவ. நிஸீத³னந்தி ஸத³ஸம் வேதி³தப்³ப³ம். பச்சத்த²ரணந்தி பாவாரோ கோஜவோதி ஏத்தகமேவ வுத்தம். திணஸந்தா²ரோதி யேஸம் கேஸஞ்சி திணானம் ஸந்தா²ரோ. ஏஸ நயோ பண்ணஸந்தா²ரே. பரிக்கே²பம் அதிக்கமந்தஸ்ஸாதி ஏத்த² பட²மபாத³ம் அதிக்காமேந்தஸ்ஸ து³க்கடம், து³தியாதிக்கமே பாசித்தியம். அபரிக்கி²த்தஸ்ஸ உபசாரோ நாம ஸேனாஸனதோ த்³வே லேட்³டு³பாதா.

அனாபுச்ச²ம் வா க³ச்சே²ய்யாதி ஏத்த² பி⁴க்கு²ம்ஹி ஸதி பி⁴க்கு² ஆபுச்சி²தப்³போ³. தஸ்மிம் அஸதி ஸாமணேரோ, தஸ்மிம் அஸதி ஆராமிகோ, தஸ்மிம்பி அஸதி யேன விஹாரோ காரிதோ ஸோ விஹாரஸாமிகோ, தஸ்ஸ வா குலே யோ கோசி ஆபுச்சி²தப்³போ³. தஸ்மிம்பி அஸதி சதூஸு பாஸாணேஸு மஞ்சம் ட²பேத்வா மஞ்சே அவஸேஸமஞ்சபீடா²னி ஆரோபேத்வா உபரி பி⁴ஸிஆதி³கம் த³ஸவித⁴ம்பி ஸேய்யம் ராஸிம் கரித்வா தா³ருப⁴ண்ட³ம் மத்திகாப⁴ண்ட³ம் படிஸாமேத்வா த்³வாரவாதபானானி பித³ஹித்வா க³மியவத்தம் பூரேத்வா க³ந்தப்³ப³ம். ஸசே பன ஸேனாஸனம் ஓவஸ்ஸதி, ச²த³னத்த²ஞ்ச திணம் வா இட்ட²கா வா ஆனீதா ஹோந்தி, ஸசே உஸ்ஸஹதி, சா²தே³தப்³ப³ம். நோ சே ஸக்கோதி, யோ ஓகாஸோ அனோவஸ்ஸகோ, தத்த² மஞ்சபீடா²தீ³னி நிக்கி²பித்வா க³ந்தப்³ப³ம். ஸசே ஸப்³ப³ம்பி ஓவஸ்ஸதி, உஸ்ஸஹந்தேன அந்தோகா³மே உபாஸகானம் க⁴ரே ட²பேதப்³ப³ம். ஸசே தேபி ‘‘ஸங்கி⁴கம் நாம ப⁴ந்தே பா⁴ரியம், அக்³கி³தா³ஹாதீ³னம் பா⁴யாமா’’தி ந ஸம்படிச்ச²ந்தி, அஜ்ஜோ²காஸேபி பாஸாணானம் உபரி மஞ்சம் ட²பேத்வா ஸேஸம் புப்³பே³ வுத்தனயேனேவ நிக்கி²பித்வா திணேஹி ச பண்ணேஹி ச படிச்சா²தே³த்வா க³ந்தும் வட்டதி. யஞ்ஹி தத்த² அங்க³மத்தம்பி அவஸிஸ்ஸதி, தம் அஞ்ஞேஸம் தத்த² ஆக³தானம் பி⁴க்கூ²னம் உபகாரம் ப⁴விஸ்ஸதீதி.

117. விஹாரஸ்ஸ உபசாரேதிஆதீ³ஸு விஹாரஸ்ஸூபசாரோ நாம பரிவேணம். உபட்டா²னஸாலாதி பரிவேணபோ⁴ஜனஸாலா. மண்ட³போதி பரிவேணமண்ட³போ. ருக்க²மூலந்தி பரிவேணருக்க²மூலம். அயம் தாவ நயோ குருந்த³ட்ட²கதா²யம் வுத்தோ. கிஞ்சாபி வுத்தோ, அத² கோ² விஹாரோதி அந்தோக³ப்³போ⁴ வா அஞ்ஞம் வா ஸப்³ப³பரிச்ச²ன்னம் கு³த்தஸேனாஸனம் வேதி³தப்³ப³ம். விஹாரஸ்ஸ உபசாரேதி தஸ்ஸ ப³ஹி ஆஸன்னே ஓகாஸே. உபட்டா²னஸாலாயம் வாதி போ⁴ஜனஸாலாயம் வா. மண்ட³பே வாதி அபரிச்ச²ன்னே பரிச்ச²ன்னே வாபி ப³ஹூனம் ஸன்னிபாதமண்ட³பே. ருக்க²மூலே வத்தப்³ப³ம் நத்தி². ஆபத்தி து³க்கடஸ்ஸாதி வுத்தப்பகாரஞ்ஹி த³ஸவித⁴ம் ஸேய்யம் அந்தோக³ப்³பா⁴தி³ம்ஹி கு³த்தட்டா²னே பஞ்ஞபேத்வா க³ச்ச²ந்தஸ்ஸ யஸ்மா ஸேய்யாபி ஸேனாஸனம்பி உபசிகாஹி பலுஜ்ஜதி, வம்மிகராஸியேவ ஹோதி, தஸ்மா பாசித்தியம் வுத்தம். ப³ஹி பன உபட்டா²னஸாலாதீ³ஸு பஞ்ஞபேத்வா க³ச்ச²ந்தஸ்ஸ ஸேய்யாமத்தமேவ நஸ்ஸேய்ய, டா²னஸ்ஸ அகு³த்ததாய ந ஸேனாஸனம், தஸ்மா ஏத்த² து³க்கடம் வுத்தம். மஞ்சம் வா பீட²ம் வாதி ஏத்த² யஸ்மா ந ஸக்கா மஞ்சபீட²ம் ஸஹஸா உபசிகாஹி கா²யிதும், தஸ்மா தம் விஹாரேபி ஸந்த²ரித்வா க³ச்ச²ந்தஸ்ஸ து³க்கடம் வுத்தம். விஹாரூபசாரே பன தம் விஹாரசாரிகம் ஆஹிண்ட³ந்தாபி தி³ஸ்வா படிஸாமேஸ்ஸந்தி.

118. உத்³த⁴ரித்வா க³ச்ச²தீதி ஏத்த² உத்³த⁴ரித்வா க³ச்ச²ந்தேன மஞ்சபீட²கவாடம் ஸப்³ப³ம் அபனேத்வா ஸம்ஹரித்வா சீவரவம்ஸே லக்³கே³த்வா க³ந்தப்³ப³ம். பச்சா² ஆக³ந்த்வா வஸனகபி⁴க்கு²னாபி புன மஞ்சபீட²ம் வா பஞ்ஞபேத்வா ஸயித்வா க³ச்ச²ந்தேன ததே²வ காதப்³ப³ம். அந்தோகுட்டதோ ஸேய்யம் ப³ஹிகுட்டே பஞ்ஞபேத்வா வஸந்தேன க³மனகாலே க³ஹிதட்டா²னேயேவ படிஸாமேதப்³ப³ம். உபரிபாஸாத³தோ ஓரோபேத்வா ஹேட்டா²பாஸாதே³ வஸந்தஸ்ஸபி ஏஸேவ நயோ. ரத்திட்டா²னதி³வாட்டா²னேஸு மஞ்சபீட²ம் பஞ்ஞபேத்வாபி க³மனகாலே புன க³ஹிதட்டா²னேயேவ ட²பேதப்³ப³ம்.

ஆபுச்ச²ம் க³ச்ச²தீதி ஏத்தா²யம் ஆபுச்சி²தப்³பா³னாபுச்சி²தப்³ப³வினிச்ச²யோ – யா தாவ பூ⁴மியம் தீ³க⁴ஸாலா வா பண்ணஸாலா வா ஹோதி, யம் வா ருக்க²த்த²ம்பே⁴ஸு, கதகே³ஹம் உபசிகானம் உட்டா²னட்டா²னம் ஹோதி, ததோ பக்கமந்தேன தாவ ஆபுச்சி²த்வாவ பக்கமிதப்³ப³ம். தஸ்மிஞ்ஹி கதிபயானி தி³வஸானி அஜக்³கி³யமானே வம்மிகாவ ஸந்திட்ட²ந்தி. யம் பன பாஸாணபிட்டி²யம் வா பாஸாணத்த²ம்பே⁴ஸு வா கதஸேனாஸனம் ஸிலுச்சயலேணம் வா ஸுதா⁴லித்தஸேனாஸனம் வா யத்த² உபசிகாஸங்கா நத்தி², ததோ பக்கமந்தஸ்ஸ ஆபுச்சி²த்வாபி அனாபுச்சி²த்வாபி க³ந்தும் வட்டதி, ஆபுச்ச²னம் பன வத்தம். ஸசே தாதி³ஸேபி ஸேனாஸனே ஏகேன பஸ்ஸேன உபசிகா ஆரோஹந்தி, ஆபுச்சி²த்வாவ க³ந்தப்³ப³ம். யோ பன ஆக³ந்துகோ பி⁴க்கு² ஸங்கி⁴கம் ஸேனாஸனம் க³ஹேத்வா வஸந்தம் பி⁴க்கு²ம் அனுவத்தந்தோ அத்தனோ ஸேனாஸனம் அக்³க³ஹேத்வா வஸதி, யாவ ஸோ ந க³ண்ஹாதி, தாவ தம் ஸேனாஸனம் புரிமபி⁴க்கு²ஸ்ஸேவ பலிபோ³தோ⁴. யதா³ பன ஸோ ஸேனாஸனம் க³ஹேத்வா அத்தனோ இஸ்ஸரியேன வஸதி, ததோ பட்டா²ய ஆக³ந்துகஸ்ஸேவ பலிபோ³தோ⁴. ஸசே உபோ⁴பி விப⁴ஜித்வா க³ண்ஹந்தி, உபி⁴ன்னம்பி பலிபோ³தோ⁴. மஹாபச்சரியம் பன வுத்தம் – ‘‘ஸசே த்³வே தயோ ஏகதோ ஹுத்வா பஞ்ஞபேந்தி, க³மனகாலே ஸப்³பே³ஹிபி ஆபுச்சி²தப்³ப³ம். தேஸு சே பட²மம் க³ச்ச²ந்தோ ‘பச்சி²மோ ஜக்³கி³ஸ்ஸதீ’தி ஆபோ⁴க³ம் கத்வா க³ச்ச²தி வட்டதி. பச்சி²மஸ்ஸ ஆபோ⁴கே³ன முத்தி நத்தி². ப³ஹூ ஏகம் பேஸேத்வா ஸந்த²ராபேந்தி, க³மனகாலே ஸப்³பே³ஹி வா ஆபுச்சி²தப்³ப³ம், ஏகம் வா பேஸேத்வா ஆபுச்சி²தப்³ப³ம். அஞ்ஞதோ மஞ்சபீடா²தீ³னி ஆனேத்வா அஞ்ஞத்ர வஸித்வாபி க³மனகாலே தத்தே²வ நேதப்³பா³னி. ஸசே அஞ்ஞாவாஸதோ ஆனேத்வா வஸமானஸ்ஸ அஞ்ஞோ வுட்³ட⁴தரோ ஆக³ச்ச²தி, ந படிபா³ஹிதப்³போ³, ‘மயா ப⁴ந்தே அஞ்ஞாவாஸதோ ஆனீதம், பாகதிகம் கரேய்யாதா²’தி வத்தப்³ப³ம். தேன ‘ஏவம் கரிஸ்ஸாமீ’தி ஸம்படிச்சி²தே இதரஸ்ஸ க³ந்தும் வட்டதி. ஏவமஞ்ஞத்த² ஹரித்வாபி ஸங்கி⁴கபரிபோ⁴கே³ன பரிபு⁴ஞ்ஜந்தஸ்ஸ நட்ட²ம் வா ஜிண்ணம் வா சோரேஹி வா ஹடம் கீ³வா ந ஹோதி, புக்³க³லிகபரிபோ⁴கே³ன பரிபு⁴ஞ்ஜந்தஸ்ஸ பன கீ³வா ஹோதி. அஞ்ஞஸ்ஸ மஞ்சபீட²ம் பன ஸங்கி⁴கபரிபோ⁴கே³ன வா புக்³க³லிகபரிபோ⁴கே³ன வா பரிபு⁴ஞ்ஜந்தஸ்ஸ நட்ட²ம் கீ³வாயேவ’’.

கேனசி பலிபு³த்³த⁴ம் ஹோதீதி வுட்³ட⁴தரபி⁴க்கூ²இஸ்ஸரியயக்க²ஸீஹவாளமிக³கண்ஹஸப்பாதீ³ஸு யேன கேனசி ஸேனாஸனம் பலிபு³த்³த⁴ம் ஹோதி. ஸாபேக்கோ² க³ந்த்வா தத்த² டி²தோ ஆபுச்ச²தி, கேனசி பலிபு³த்³தோ⁴ ஹோதீதி அஜ்ஜேவ ஆக³ந்த்வா படிஜக்³கி³ஸ்ஸாமீதி ஏவம் ஸாபேக்கோ² நதீ³பாரம் வா கா³மந்தரம் வா க³ந்த்வா யத்த²ஸ்ஸ க³மனசித்தம் உப்பன்னம், தத்தே²வ டி²தோ கஞ்சி பேஸேத்வா ஆபுச்ச²தி, நதீ³பூரராஜசோராதீ³ஸு வா கேனசி பலிபு³த்³தோ⁴ ஹோதி உபத்³து³தோ, ந ஸக்கோதி பச்சாக³ந்தும், ஏவம்பூ⁴தஸ்ஸபி அனாபத்தி. ஸேஸம் பட²மஸிக்கா²பதே³ வுத்தனயமேவ ஸத்³தி⁴ம் ஸமுட்டா²னாதீ³ஹீதி.

து³தியஸேனாஸனஸிக்கா²பத³ம் பஞ்சமம்.