3. உஜ்ஜா²பனகஸிக்கா²பத³வண்ணனா

103. ததியஸிக்கா²பதே³ – த³ப்³ப³ம் மல்லபுத்தம் பி⁴க்கூ² உஜ்ஜா²பேந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா தம் ஆயஸ்மந்தம் தேஹி பி⁴க்கூ²ஹி அவஜானாபேந்தி, அவஞ்ஞாய ஓலோகாபேந்தி, லாமகதோ வா சிந்தாபேந்தீ’’தி அத்தோ². லக்க²ணம் பனேத்த² ஸத்³த³ஸத்தா²னுஸாரேன வேதி³தப்³ப³ம். ஓஜ்ஜா²பேந்தீதிபி பாடோ². அயமேவத்தோ². ச²ந்தா³யாதி ச²ந்தே³ன பக்க²பாதேன; அத்தனோ அத்தனோ ஸந்தி³ட்ட²ஸம்ப⁴த்தானம் பணீதானி பஞ்ஞபேதீதி அதி⁴ப்பாயோ. கி²ய்யந்தீதி ‘‘ச²ந்தா³ய த³ப்³போ³ மல்லபுத்தோ’’திஆதீ³னி வத³ந்தா பகாஸேந்தி.

105. உஜ்ஜா²பனகே கி²ய்யனகே பாசித்தியந்தி ஏத்த² யேன வசனேன உஜ்ஜா²பேந்தி, தம் உஜ்ஜா²பனகம். யேன ச கி²ய்யந்தி தம் கி²ய்யனகம். தஸ்மிம் உஜ்ஜா²பனகே கி²ய்யனகே. பாசித்தியந்தி வத்து²த்³வயே பாசித்தியத்³வயம் வுத்தம்.

106. உஜ்ஜா²பனகம் நாம உபஸம்பன்னம் ஸங்கே⁴ன ஸம்மதம் ஸேனாஸனபஞ்ஞாபகம் வா…பே… அப்பமத்தகவிஸ்ஸஜ்ஜனகம் வாதி ஏதேஸம் பதா³னம் ‘‘மங்குகத்துகாமோ’’தி இமினா ஸம்ப³ந்தோ⁴. அவண்ணம் கத்துகாமோ அயஸம் கத்துகாமோதி இமேஸம் பன வஸேன உபஸம்பன்னந்திஆதீ³ஸு ‘‘உபஸம்பன்னஸ்ஸா’’தி ஏவம் விப⁴த்திவிபரிணாமோ காதப்³போ³. உஜ்ஜா²பேதி வா கி²ய்யதி வா ஆபத்தி பாசித்தியஸ்ஸாதி ஏத்த² பன யஸ்மா ‘‘கி²ய்யனகம் நாமா’’தி ஏவம் மாதிகாபத³ம் உத்³த⁴ரித்வாபி ‘‘உஜ்ஜா²பனகம் நாமா’’தி இமஸ்ஸ பத³ஸ்ஸ வுத்தவிப⁴ங்கோ³யேவ வத்தப்³போ³ ஹோதி, அஞ்ஞவாத³கஸிக்கா²பதே³ விய அஞ்ஞோ விஸேஸோ நத்தி², தஸ்மா தம் விஸும் அனுத்³த⁴ரித்வா அவிப⁴ஜித்வா நிக³மனமேவ ஏகதோ கதந்தி வேதி³தப்³ப³ம். த⁴ம்மகம்மே த⁴ம்மகம்மஸஞ்ஞீதிஆதீ³ஸு யம் தஸ்ஸ உபஸம்பன்னஸ்ஸ ஸம்முதிகம்மம் கதம் தஞ்சே த⁴ம்மகம்மம் ஹோதி, ஸோ ச பி⁴க்கு² தஸ்மிம் த⁴ம்மகம்மஸஞ்ஞீ உஜ்ஜா²பனகஞ்ச கி²ய்யனகஞ்ச கரோதி, அத²ஸ்ஸ தஸ்மிம் உஜ்ஜா²பனகே ச கி²ய்யனகே ச ஆபத்தி பாசித்தியஸ்ஸாதி இமினா நயேன அத்தோ² வேதி³தப்³போ³.

அனுபஸம்பன்னம் உஜ்ஜா²பேதி வா கி²ய்யதி வாதி ஏத்த² உபஸம்பன்னம் ஸங்கே⁴ன ஸம்மதம் அஞ்ஞம் அனுபஸம்பன்னம் உஜ்ஜா²பேதி அவஜானாபேதி, தஸ்ஸ வா தம் ஸந்திகே கி²ய்யதீதி அத்தோ². உபஸம்பன்னம் ஸங்கே⁴ன அஸம்மதந்தி கம்மவாசாய அஸம்மதம் கேவலம் ‘‘தவேஸோ பா⁴ரோ’’தி ஸங்கே⁴ன ஆரோபிதபா⁴ரம் பி⁴க்கூ²னம் வா பா²ஸுவிஹாரத்தா²ய ஸயமேவ தம் பா⁴ரம் வஹந்தம், யத்ர வா த்³வே தயோ பி⁴க்கூ² விஹரந்தி, தத்ர வா தாதி³ஸம் கம்மம் கரோந்தந்தி அதி⁴ப்பாயோ. அனுபஸம்பன்னம் ஸங்கே⁴ன ஸம்மதம் வா அஸம்மதம் வாதி ஏத்த² பன கிஞ்சாபி அனுபஸம்பன்னஸ்ஸ தேரஸ ஸம்முதியோ தா³தும் ந வட்டந்தி. அத² கோ² உபஸம்பன்னகாலே லத்³த⁴ஸம்முதிகோ பச்சா² அனுபஸம்பன்னபா⁴வே டி²தோ, தம் ஸந்தா⁴ய ‘‘ஸங்கே⁴ன ஸம்மதம் வா’’தி வுத்தம். யஸ்ஸ பன ப்³யத்தஸ்ஸ ஸாமணேரஸ்ஸ கேவலம் ஸங்கே⁴ன வா ஸம்மதேன வா பி⁴க்கு²னா ‘‘த்வம் இத³ம் கம்மம் கரோஹீ’’தி பா⁴ரோ கதோ, தாதி³ஸம் ஸந்தா⁴ய ‘‘அஸம்மதம் வா’’தி வுத்தம். ஸேஸமேத்த² உத்தானமேவாதி.

திஸமுட்டா²னம் – காயசித்ததோ வாசாசித்ததோ காயவாசாசித்ததோ ச ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

உஜ்ஜா²பனகஸிக்கா²பத³ம் ததியம்.