9. பாதிமோக்க²ட்ட²பனக்க²ந்த⁴கம்

பாதிமோக்கு²த்³தே³ஸயாசனகதா²

383. பாதிமோக்க²ட்ட²பனக்க²ந்த⁴கே – (நந்தி³முகி²யா ரத்தியாதி அருணுட்டி²தகாலேபி ஹி நந்தி³முகா² விய ரத்தி கா²யதி. தேனாஹ ‘‘நந்தி³முகி²யா ரத்தியா’’தி. அந்தோபூதிந்தி அத்தசித்தஸந்தானே கிலேஸபூதிபா⁴வேன அந்தோபூதிம். அவஸ்ஸுதந்தி கிலேஸவஸ்ஸனவஸேன அவஸ்ஸுதம். கஸம்பு³கஜாதந்தி ஆகிண்ணதோ³ஸதாய ஸம்கிலிட்ட²ஜாதம்.) யாவ பா³ஹாக³ஹணாபி நாமாதி ‘‘அபரிஸுத்³தா⁴ ஆனந்த³ பரிஸா’’தி வசனம் ஸுத்வாயேவ ஹி தேன பக்கமிதப்³ப³ம் ஸியா, ஏவம் அபக்கமித்வா யாவ பா³ஹாக³ஹணாபி நாம ஸோ மோக⁴புரிஸோ ஆக³மேஸ்ஸதி, அச்ச²ரியமித³ந்தி த³ஸ்ஸேதி.

384. ந ஆயதகேனேவ பபாதோதி ந பட²மமேவ க³ம்பீ⁴ரோ; அனுபுப்³பே³ன க³ம்பீ⁴ரோதி அத்தோ². டி²தத⁴ம்மோ வேலம் நாதிவத்ததீதி வீசீனம் ஓஸக்கனகந்த³ரம் மரியாத³வேலம் நாதிக்கமதி. தீரம் வாஹேதீதி தீரதோ அப்பேதி; உஸ்ஸாரேதீதி அத்தோ². அஞ்ஞாபடிவேதோ⁴தி அரஹத்தப்பத்தி.

385. ச²ன்னமதிவஸ்ஸதீதி ஆபத்திம் ஆபஜ்ஜித்வா படிச்சா²தே³ந்தோ அஞ்ஞம் நவம் ஆபத்திம் ஆபஜ்ஜதி இத³மேதம் ஸந்தா⁴ய வுத்தம். விவடம் நாதிவஸ்ஸதீதி ஆபத்திம் ஆபஜ்ஜித்வா விவரந்தோ அஞ்ஞம் நாபஜ்ஜதி இத³மேதம் ஸந்தா⁴ய வுத்தம்.

பாதிமோக்கு²த்³தே³ஸயாசனகதா² நிட்டி²தா.

பாதிமோக்க²ஸவனாரஹகதா²

386. ட²பிதம் ஹோதி பாதிமோக்க²ந்தி ஏத்த² புரே வா பச்சா² வா ட²பிதம்பி அட்ட²பிதம் ஹோதி, கே²த்தே ட²பிதமேவ பன ட²பிதம் நாம ஹோதி. தஸ்மா ‘‘ஸுணாது மே, ப⁴ந்தே ஸங்கோ⁴, அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லம், ஸங்கோ⁴ உபோஸத²ம் கரேய்யா’’தி ஏத்த² யாவ ரே-காரம் ப⁴ணதி, தாவ ட²பேதப்³ப³ம், இத³ஞ்ஹி கே²த்தம். ய்ய-காரே பன வுத்தே ட²பேந்தேன பச்சா² ட²பிதம் நாம ஹோதி. ‘‘ஸுணாது மே’’தி அனாரத்³தே⁴யேவ ட²பேந்தேன புரே ட²பிதம் ஹோதி.

பாதிமோக்க²ஸவனாரஹகதா² நிட்டி²தா.

த⁴ம்மிகாத⁴ம்மிகபாதிமோக்க²ட்ட²பனகதா²

387. அமூலிகாய ஸீலவிபத்தியா பாதிமோக்க²ம் ட²பேதி அகதாயாதி தேன புக்³க³லேன ஸா விபத்தி கதா வா ஹோது அகதா வா, பாதிமோக்க²ட்ட²பனகஸ்ஸ ஸஞ்ஞாஅமூலிகவஸேன அமூலிகா ஹோதி. கதாகதாயாதி கதஞ்ச அகதஞ்ச உப⁴யம் க³ஹேத்வா வுத்தம்.

த⁴ம்மிகம் ஸாமக்³கி³ம் ந உபேதீதி கம்மம் கோபேதுகாமதாய ஸங்க⁴ஸ்ஸ கம்மே கரீயமானே நேவ ஆக³ச்ச²தி, ந ச²ந்த³ம் தே³தி, ஸம்முகீ²பூ⁴தோவ படிக்கோஸதி, தேன து³க்கடம் ஆபஜ்ஜதி. இச்சஸ்ஸாபி ஸாபத்திகஸ்ஸேவ பாதிமோக்க²ம் ட²பிதம் ஹோதி. பச்சாதி³யதீதி ‘‘புன காதப்³ப³ம் கம்ம’’ந்தி பச்சாதி³யதி, தேன உக்கோடனகேன பாசித்தியம் ஆபஜ்ஜதி. இச்சஸ்ஸாபி ஸாபத்திகஸ்ஸேவ பாதிமோக்க²ம் ட²பிதம் ஹோதி.

த⁴ம்மிகாத⁴ம்மிகபாதிமோக்க²ட்ட²பனகதா² நிட்டி²தா.

த⁴ம்மிகபாதிமோக்க²ட்ட²பனகதா²

388. யேஹி ஆகாரேஹி யேஹி லிங்கே³ஹி யேஹி நிமித்தேஹீதி ஏத்த² மக்³கே³னமக்³க³படிபாத³னாதீ³ஸு ஆகாராதி³ஸஞ்ஞா வேதி³தப்³பா³. தேன தி³ட்டே²ன தேன ஸுதேன தாய பரிஸங்காயாதி ஏத்த² தி³ட்ட²ஞ்ச ஸுதஞ்ச பாளியம் ஆக³தமேவ. ஸசே பன தேஹி தி³ட்ட²ஸுதேஹி பரிஸங்கம் உப்பாதே³ய்ய, தம் ஸந்தா⁴ய வுத்தம் ‘‘தாய பரிஸங்காயா’’தி.

த⁴ம்மிகபாதிமோக்க²ட்ட²பனகதா² நிட்டி²தா.

அத்தாதா³னஅங்க³கதா²

398. அத்தாதா³னம் ஆதா³துகாமேனாதி ஏத்த² ஸாஸனம் ஸோதே⁴துகாமோ பி⁴க்கு² யம் அதி⁴கரணம் அத்தனா ஆதி³யதி, தம் அத்தாதா³னந்தி வுச்சதி. அகாலோ இமம் அத்தாதா³னம் ஆதா³துந்தி ஏத்த² ராஜப⁴யம் சோரப⁴யம் து³ப்³பி⁴க்க²ப⁴யம் வஸ்ஸாரத்தோதி அயம் அகாலோ, விபரீதோ காலோ.

அபூ⁴தம் இத³ம் அத்தாதா³னந்தி அஸந்தமித³ம், மயா அத⁴ம்மோ வா த⁴ம்மோதி, த⁴ம்மோ வா அத⁴ம்மோதி, அவினயோ வா வினயோதி, வினயோ வா அவினயோதி, து³ஸ்ஸீலோ வா புக்³க³லோ ஸீலவாதி, ஸீலவா வா து³ஸ்ஸீலோதி க³ஹிதோதி அத்தோ²; விபரியாயேன பூ⁴தம் வேதி³தப்³ப³ம். அனத்த²ஸம்ஹிதம் இத³ம் அத்தாதா³னந்தி ஏத்த² யம் ஜீவிதந்தராயாய வா ப்³ரஹ்மசரியந்தராயாய வா ஸம்வத்ததி, இத³ம் அனத்த²ஸம்ஹிதம், விபரீதம் அத்த²ஸம்ஹிதம் நாம.

ந லபி⁴ஸ்ஸாமி ஸந்தி³ட்டே² ஸம்ப⁴த்தே பி⁴க்கூ²தி அப்பேகதா³ ஹி ராஜப⁴யாதீ³ஸு ஏவரூபா அத்தனோ பக்க²ஸ்ஸ உபத்த²ம்ப⁴கா பி⁴க்கூ² லத்³து⁴ம் ந ஸக்கா ஹோந்தி, தம் ஸந்தா⁴ய வுத்தம் ‘‘ந லபி⁴ஸ்ஸாமீ’’தி. அப்பேகதா³ பன கே²மஸுபி⁴க்கா²தீ³ஸு லத்³து⁴ம் ஸக்கா ஹோந்தி, தம் ஸந்தா⁴ய ‘‘லபி⁴ஸ்ஸாமீ’’தி வுத்தம்.

ப⁴விஸ்ஸதி ஸங்க⁴ஸ்ஸ ததோனிதா³னம் ப⁴ண்ட³னந்தி கோஸம்ப³கானம் விய ப⁴ண்ட³னம் கலஹோ விக்³க³ஹோ விவாதோ³ ஸங்க⁴பே⁴தோ³ ச ப⁴விஸ்ஸதீதி. பச்சா²பி அவிப்படிஸாரகரம் ப⁴விஸ்ஸதீதி ஸுப⁴த்³த³ம் வுட்³ட⁴பப்³ப³ஜிதம் நிக்³க³ஹேத்வா பஞ்சஸதிகஸங்கீ³திம் கரோந்தஸ்ஸ மஹாகஸ்ஸபத்தே²ரஸ்ஸேவ, த³ஸவத்து²கே அதி⁴கரணே த³ஸபி⁴க்கு²ஸஹஸ்ஸானி நிக்³க³ஹேத்வா ஸத்தஸதிகஸங்கீ³திம் கரோந்தஸ்ஸ ஆயஸ்மதோ யஸஸ்ஸேவ, ஸட்டி²பி⁴க்கு²ஸஹஸ்ஸானி நிக்³க³ஹேத்வா ஸஹஸ்ஸிகஸங்கீ³திம் கரோந்தஸ்ஸ மோக்³க³லிபுத்ததிஸ்ஸத்தே²ரஸ்ஸேவ ச பச்சா² ஸமனுஸ்ஸரணகரணம் ஹோதி, ஸாஸனஸ்ஸ ச விக³துபக்கிலேஸசந்தி³மஸூரியஸஸ்ஸிரிகதாய ஸம்வத்ததி.

அத்தாதா³னஅங்க³கதா² நிட்டி²தா.

சோத³கேனபச்சவேக்கி²தப்³ப³த⁴ம்மகதா²

399. அச்சி²த்³தே³ன அப்படிமம்ஸேனாதிஆதீ³ஸு யேன க³ஹட்ட²பப்³ப³ஜிதேஸு யோ கோசி பஹடோ வா ஹோதி, கி³ஹீனம் க³ண்ட³பா²லனாதீ³னி வேஜ்ஜகம்மானி வா கதானி, தஸ்ஸ காயஸமாசாரோ உபசிகாஹி கா²யிததாலபண்ணமிவ சி²த்³தோ³ ச படிமாஸிதும் யத்த² கத்த²சி க³ஹேத்வா ஆகட்³டி⁴தும் ஸக்குணேய்யதாய ஸப்படிமம்ஸோ ச ஹோதி, விபரீதோ அச்சி²த்³தோ³ அப்படிமம்ஸோதி வேதி³தப்³போ³தி. வசீஸமாசாரோ பன முஸாவாத³ஓமஸவாத³பேஸுஞ்ஞஅமூலகானுத்³த⁴ம்ஸனாதீ³ஹி சி²த்³தோ³ ச ஸப்படிமம்ஸோ ச ஹோதி, விபரீதோ அச்சி²த்³தோ³ அப்படிமம்ஸோ.

மேத்தம் நு கோ² மே சித்தந்தி பலிபோ³தே⁴ சி²ந்தி³த்வா கம்மட்டா²னபா⁴வனானுயோகே³ன அதி⁴க³தம் மேத்தசித்தம். அனாகா⁴தந்தி ஆகா⁴தவிரஹிதம், விக்க²ம்ப⁴னவஸேன விஹதாகா⁴தந்தி அத்தோ². இத³ம் பனாவுஸோ கத்த² வுத்தம் ப⁴க³வதாதி இத³ம் ஸிக்கா²பத³ம் கதரஸ்மிம் நக³ரே வுத்தந்தி அத்தோ².

சோத³கேனபச்சவேக்கி²தப்³ப³த⁴ம்மகதா² நிட்டி²தா.

சோத³கேனஉபட்டா²பேதப்³ப³கதா²

400. காலேன வக்கா²மீதிஆதீ³ஸு ஏகோ ஏகம் ஓகாஸம் காரேத்வா சோதே³ந்தோ காலேன வத³தி நாம. ஸங்க⁴மஜ்ஜ²க³ணமஜ்ஜ²ஸலாகக்³க³யாகு³அக்³க³விதக்கமாளகபி⁴க்கா²சாரமக்³க³ஆஸனஸாலாதீ³ஸு உபட்டா²கேஹி பரிவாரிதக்க²ணே வா சோதே³ந்தோ அகாலேன வத³தி நாம. தச்சே²ன வத³ந்தோ பூ⁴தேன வத³தி நாம. ‘‘அம்போ⁴ மஹல்லக, பரிஸாவசர, பம்ஸுகூலிக, த⁴ம்மகதி²க, பதிரூபம் தவ இத³’’ந்தி வத³ந்தோ ப²ருஸேன வத³தி நாம. காரணனிஸ்ஸிதம் பன கத்வா ‘‘ப⁴ந்தே மஹல்லகத்த², பரிஸாவசரா, பம்ஸுகூலிகா, த⁴ம்மகதி²கத்த², பதிரூபம் தும்ஹாகம் இத³’’ந்தி வத³ந்தோ ஸண்ஹேன வத³தி நாம. காரணனிஸ்ஸிதம் கத்வா வத³ந்தோ அத்த²ஸம்ஹிதேன வத³தி நாம. மேத்தசித்தோ வக்கா²மி நோ தோ³ஸந்தரோதி மேத்தசித்தம் உபட்ட²பேத்வா வக்கா²மி, ந து³ட்ட²சித்தோ ஹுத்வா.

சோத³கேனஉபட்டா²பேதப்³ப³கதா² நிட்டி²தா.

சோத³கசுதி³தகபடிஸம்யுத்தகதா²

401. அஜ்ஜ²த்தம் மனஸிகரித்வாதி அத்தனோ சித்தே உப்பாதே³த்வா. காருஞ்ஞதாதி கருணாபா⁴வோ. இமினா கருணஞ்ச கருணாபுப்³ப³பா⁴க³ஞ்ச த³ஸ்ஸேதி. ஹிதேஸிதாதி ஹிதக³வேஸனதா. அனுகம்பிதாதி தேன ஹிதேன ஸம்யோஜனதா. த்³வீஹிபி மேத்தஞ்ச மேத்தாபுப்³ப³பா⁴க³ஞ்ச த³ஸ்ஸேதி. ஆபத்திவுட்டா²னதாதி ஆபத்திதோ வுட்டா²பேத்வா ஸுத்³த⁴ந்தே பதிட்டா²பனா. வத்து²ம் சோதே³த்வா ஸாரேத்வா படிஞ்ஞம் ஆரோபேத்வா யதா²படிஞ்ஞாய கம்மகரணம் வினயபுரேக்கா²ரதா நாம. இமே பஞ்ச த⁴ம்மேதி யே ஏதே காருஞ்ஞதாதிஆதி³னா நயேன வுத்தா, இமே பஞ்ச த⁴ம்மே அஜ்ஜ²த்தம் மனஸி கரித்வா பரோ சோதே³தப்³போ³தி.

ஸச்சே ச அகுப்பே சாதி வசீஸச்சே ச அகுப்பனதாய ச. சுதி³தகேன ஹி ஸச்சஞ்ச வத்தப்³ப³ம், கோபோ ச ந காதப்³போ³. நேவ அத்தனா குஜ்ஜி²தப்³போ³, ந பரோ க⁴ட்டேதப்³போ³தி அத்தோ². ஸேஸம் ஸப்³ப³த்த² உத்தானமேவாதி.

சோத³கசுதி³தகபடிஸம்யுத்தகதா² நிட்டி²தா.

பாதிமோக்க²ட்ட²பனக்க²ந்த⁴கவண்ணனா நிட்டி²தா.