நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

வினயபிடகே

சூளவக்³க³-அட்ட²கதா²

1. கம்மக்க²ந்த⁴கம்

தஜ்ஜனீயகம்மகதா²

1. சூளவக்³க³ஸ்ஸ பட²மே கம்மக்க²ந்த⁴கே தாவ பண்டு³கலோஹிதகாதி பண்டு³கோ சேவ லோஹிதகோ சாதி ச²ப்³ப³க்³கி³யேஸு த்³வே ஜனா; தேஸம் நிஸ்ஸிதகாபி பண்டு³கலோஹிதகாத்வேவ பஞ்ஞாயந்தி. ப³லவாப³லவம் படிமந்தேதா²தி ஸுட்டு²ப³லவம் படிவத³த². அலமத்த²தராதி ஸமத்த²தரா.

தஜ்ஜனீயகம்மகதா² நிட்டி²தா.

அத⁴ம்மகம்மத்³வாத³ஸககதா²

4. அஸம்முகா² கதந்திஆதீ³ஸு ஸங்க⁴த⁴ம்மவினயபுக்³க³லஸம்முகா²னம் வினா கதம், சுதி³தகம் அப்படிபுச்சி²த்வா கதம், தஸ்ஸேவ அப்படிஞ்ஞாய கதம். அதே³ஸனாகா³மினியாதி பாராஜிகாபத்தியா வா ஸங்கா⁴தி³ஸேஸாபத்தியா வா. ஏத்த² புரிமகேஸு தீஸு திகேஸு நவ பதா³ அத⁴ம்மேனகதம் வக்³கே³னகதந்தி இமேஹி ஸத்³தி⁴ம் ஏகேகம் க³ஹேத்வா நவ திகா வுத்தா. ஏவம் ஸப்³பே³பி த்³வாத³ஸ திகா ஹோந்தி. படிபக்க²வஸேன ஸுக்கபக்கே²ஸுபி ஏதேயேவ த்³வாத³ஸ திகா வுத்தா.

6. அனனுலோமிகேஹி கி³ஹிஸம்ஸக்³கே³ஹீதி பப்³ப³ஜிதானம் அனனுச்ச²விகேஹி ஸஹஸோகிதாதீ³ஹி கி³ஹிஸம்ஸக்³கே³ஹி.

திண்ணம், பி⁴க்க²வே, பி⁴க்கூ²னந்திஆதி³ ஏகேகேனாபி அங்கே³ன தஜ்ஜனீயகம்மம் காதும் வட்டதீதி த³ஸ்ஸனத்த²ம் வுத்தம். தஜ்ஜனீயஸ்ஸ ஹி விஸேஸேன ப⁴ண்ட³னகாரகத்தம் அங்க³ம், நியஸ்ஸஸ்ஸ அபி⁴ண்ஹாபத்திகத்தம், பப்³பா³ஜனீயஸ்ஸ குலதூ³ஸகத்தம் வுத்தம். இமேஸு பன தீஸு அங்கே³ஸு யேன கேனசி ஸப்³பா³னிபி காதும் வட்டதி. யதி³ ஏவம் யம் சம்பேய்யக்க²ந்த⁴கே வுத்தம் – ‘‘தஜ்ஜனீயகம்மாரஹஸ்ஸ நியஸ்ஸகம்மம் கரோதி…பே… உபஸம்பதா³ரஹம் அப்³பே⁴தி; ஏவம் கோ² உபாலி அத⁴ம்மகம்மம் ஹோதி அவினயகம்மம், ஏவஞ்ச பன ஸங்கோ⁴ ஸாதிஸாரோ ஹோதீ’’தி இத³ம் விருஜ்ஜ²தீதி. இத³ஞ்ச ந விருஜ்ஜ²தி. கஸ்மா? வசனத்த²னானத்ததோ, ‘‘தஜ்ஜனீயகம்மாரஹஸ்ஸா’’தி இமஸ்ஸ ஹி வசனஸ்ஸ கம்மஸன்னிட்டா²னம் அத்தோ². ‘‘திண்ணம், பி⁴க்க²வே’’திஆதி³வசனஸ்ஸ அங்க³ஸம்ப⁴வோ, தஸ்மா யதா³ ஸங்கே⁴ன ஸன்னிபதித்வா ‘‘இத³ம் நாம இமஸ்ஸ பி⁴க்கு²னோ கம்மம் கரோமா’’தி ஸன்னிட்டா²னம் கதம் ஹோதி, ததா³ கம்மாரஹோ நாம ஹோதி. தஸ்ஸ இமினா லக்க²ணேன தஜ்ஜனீயாதி³கம்மாரஹஸ்ஸ நியஸ்ஸகம்மாதி³கரணம் அத⁴ம்மகம்மஞ்சேவ அவினயகம்மஞ்சாதி வேதி³தப்³ப³ம். யஸ்ஸ பன ப⁴ண்ட³னகாரகாதீ³ஸு அங்கே³ஸு அஞ்ஞதரம் அங்க³ம் அத்தி², தஸ்ஸ ஆகங்க²மானோ ஸங்கோ⁴ யதா²னுஞ்ஞாதேஸு அங்கே³ஸு ச கம்மேஸு ச யேன கேனசி அங்கே³ன யம்கிஞ்சி கம்மம் வவத்த²பேத்வா தம் பி⁴க்கு²ம் கம்மாரஹம் கத்வா கம்மம் கரேய்ய. அயமேத்த² வினிச்ச²யோ. ஏவம் புப்³பே³னாபரம் ஸமேதி.

தத்த² கிஞ்சாபி தஜ்ஜனீயகம்மே ப⁴ண்ட³னகாரகவஸேன கம்மவாசா வுத்தா, அத² கோ² பா³லஸ்ஸ அப்³யத்தஸ்ஸ ஆபத்திப³ஹுலஸ்ஸ தஜ்ஜனீயகம்மம் கரோந்தேன பா³லஅப்³யத்தவஸேனேவ கம்மவாசா காதப்³பா³. ஏவஞ்ஹி பூ⁴தேன வத்து²னா கதம் கம்மம் ஹோதி, ந ச அஞ்ஞஸ்ஸ கம்மஸ்ஸ வத்து²னா. கஸ்மா? யஸ்மா இத³ம்பி அனுஞ்ஞாதந்தி. ஏஸ நயோ ஸப்³ப³த்த². அட்டா²ரஸ ஸம்மாவத்தனவத்தூ²னி பாரிவாஸிகக்க²ந்த⁴கே வண்ணயிஸ்ஸாம.

அத⁴ம்மகம்மத்³வாத³ஸககதா² நிட்டி²தா.

நப்படிப்பஸ்ஸம்பே⁴தப்³ப³அட்டா²ரஸகாதி³கதா²

8. லோமம் பாதேந்தீதி பன்னலோமா ஹோந்தி; பி⁴க்கூ² அனுவத்தந்தீதி அத்தோ². நேத்தா²ரம் வத்தந்தீதி நித்த²ரந்தானம் ஏதந்தி நேத்தா²ரம்; யேன ஸக்கா நிஸ்ஸாரணா நித்த²ரிதும், தம் அட்டா²ரஸவித⁴ம் ஸம்மாவத்தனம் வத்தந்தீதி அத்தோ². கித்தகம் காலம் வத்தம் பூரேதப்³ப³ந்தி? த³ஸ வா பஞ்ச வா தி³வஸானி. இமஸ்மிஞ்ஹி கம்மக்க²ந்த⁴கே ஏத்தகேன வத்தம் பூரிதமேவ ஹோதி.

நப்படிப்பஸ்ஸம்பே⁴தப்³ப³அட்டா²ரஸகாதி³கதா² நிட்டி²தா.

நியஸ்ஸகம்மகதா²

11. ஸேய்யஸகவத்து²ஸ்மிம் – அபிஸ்ஸு பி⁴க்கூ² பகதாதி அபிஸ்ஸு பி⁴க்கூ² நிச்சம் ப்³யாவடா ஹோந்தி. ஸேஸம் தஜ்ஜனீயே வுத்தஸதி³ஸமேவ.

நியஸ்ஸகம்மகதா² நிட்டி²தா.

பப்³பா³ஜனீயகம்மகதா²

21. அஸ்ஸஜிபுனப்³ப³ஸுகவத்து² ஸங்கா⁴தி³ஸேஸவண்ணனாயம் வுத்தம்.

27. காயிகேன த³வேனாதிஆதீ³ஸு பனேத்த² காயிகோ த³வோ நாம காயகீளா வுச்சதி. ஸேஸபத³த்³வயேபி ஏஸேவ நயோ. காயிகோ அனாசாரோ நாம காயத்³வாரே பஞ்ஞத்தஸிக்கா²பத³வீதிக்கமோ வுச்சதி. ஸேஸத்³வயேபி ஏஸேவ நயோ. காயிகம் உபகா⁴திகம் நாம காயத்³வாரே பஞ்ஞத்தஸிக்கா²பத³ஸ்ஸ அஸிக்க²னபா⁴வேன உபஹனனம் வுச்சதி; நாஸனம் வினாஸனந்தி அத்தோ². ஸேஸத்³வயேபி ஏஸேவ நயோ. காயிகோ மிச்சா²ஜீவோ நாம படிக்கி²த்தவேஜ்ஜகம்மாதி³வஸேன தேலபசனஅரிட்ட²பசனாதீ³னி. வாசஸிகோ மிச்சா²ஜீவோ நாம கி³ஹீனம் ஸாஸனஸம்படிச்ச²னாரோசனாதீ³னி. காயிகவாசஸிகோ நாம தது³ப⁴யம். ஸேஸம் தஜ்ஜனீயே வுத்தனயமேவ.

பப்³பா³ஜனீயகம்மகதா² நிட்டி²தா.

படிஸாரணீயகம்மகதா²

33. ஸுத⁴ம்மவத்து²ஸ்மிம் பன – அனபலோகேத்வாதி ந ஆபுச்சி²த்வா. ஏதத³வோசாதி கிம் தே க³ஹபதி தே²ரானம் படியத்தந்தி ஸப்³ப³ம் விவராபேத்வா தி³ஸ்வா ஏதம் அவோச. ஏகா ச கோ² இத⁴ நத்தி² யதி³த³ம் திலஸம்கு³ளிகாதி யா அயம் திலஸக்க²லிகா நாம வுச்சதி, ஸா நத்தீ²தி அத்தோ². தஸ்ஸ கிர க³ஹபதினோ வம்ஸே ஆதி³ம்ஹி ஏகோ பூவியோ அஹோஸி. தேன நம் தே²ரோ ஜாதியா கு²ம்ஸேதுகாமோ ஏவமாஹ. யதே³வ கிஞ்சீதி ஏவம் ப³ஹும் பு³த்³த⁴வசனம் ரதனம் பஹாய கிஞ்சிதே³வ திலஸம்கு³ளிகாவசனம் பா⁴ஸிதம். குக்குடபோதகஉதா³ஹரணேன இத³ம் த³ஸ்ஸேதி ‘‘யதா² ஸோ நேவ காகவஸ்ஸிதம் ந குக்குடவஸ்ஸிதம் அகாஸி, ஏவம் தயாபி நேவ பி⁴க்கு²வசனம் ந கி³ஹிவசனம் வுத்த’’ந்தி.

படிஸாரணீயகம்மகதா² நிட்டி²தா.

அத⁴ம்மகம்மாதி³த்³வாத³ஸககதா²

37. அஸம்முகா² கதந்திஆத³யோ திகா வுத்தப்பகாரா ஏவ.

39. அங்க³ஸமன்னாக³மோ புரிமேஹி அஸதி³ஸோ. தத்த² யதா² லாப⁴ம் ந லப⁴ந்தி; ஏவம் பரிஸக்கந்தோ பரக்கமந்தோ அலாபா⁴ய பரிஸக்கதி நாம. ஏஸ நயோ அனத்தா²தீ³ஸு. தத்த² அனத்தோ²தி அத்த²ப⁴ங்கோ³. அனாவாஸோதி தஸ்மிம் டா²னே அவஸனம். கி³ஹீனம் பு³த்³த⁴ஸ்ஸ அவண்ணந்தி கி³ஹீனம் ஸந்திகே பு³த்³த⁴ஸ்ஸ அவண்ணம் பா⁴ஸதி. த⁴ம்மிகம் படிஸ்ஸவம் ந ஸச்சாபேதீதி யதா² ஸச்சோ ஹோதி, ஏவம் ந கரோதி; வஸ்ஸாவாஸம் படிஸ்ஸுணித்வா ந க³ச்ச²தி, அஞ்ஞம் வா ஏவரூபம் கரோதி. பஞ்சன்னம் பி⁴க்க²வேதிஆதி³ ஏகங்கே³னபி கம்மாரஹபா⁴வத³ஸ்ஸனத்த²ம் வுத்தம். ஸேஸமேத்த² உத்தானத்த²ஞ்சேவ, தஜ்ஜனீயே ச வுத்தனயமேவ.

அத⁴ம்மகம்மாதி³த்³வாத³ஸககதா² நிட்டி²தா.

ஆபத்தியா அத³ஸ்ஸனே உக்கே²பனீயகம்மகதா²

46. ச²ன்னவத்து²ஸ்மிம் – ஆவாஸபரம்பரஞ்ச பி⁴க்க²வே ஸம்ஸதா²தி ஸப்³பா³வாஸேஸு ஆரோசேத².

50. ப⁴ண்ட³னகாரகோதிஆதீ³ஸு ப⁴ண்ட³னாதி³பச்சயா ஆபன்னம் ஆபத்திம் ரோபேத்வா தஸ்ஸா அத³ஸ்ஸனேயேவ கம்மம் காதப்³ப³ம். திகா வுத்தப்பகாரா ஏவ.

51. ஸம்மாவத்தனாயம் பனேத்த² தேசத்தாலீஸ வத்தானி. தத்த² ந அனுத்³த⁴ம்ஸேதப்³போ³தி ந சோதே³தப்³போ³. ந பி⁴க்கு² பி⁴க்கூ²ஹீதி அஞ்ஞோ பி⁴க்கு² அஞ்ஞேஹி பி⁴க்கூ²ஹி ந பி⁴ந்தி³தப்³போ³. ந கி³ஹித்³த⁴ஜோதி ஓதா³தவத்தா²னி அச்சி²ன்னத³ஸபுப்ப²த³ஸானி ச ந தா⁴ரேதப்³பா³னி. ந தித்தி²யத்³த⁴ஜோதி குஸசீராதீ³னி ந தா⁴ரேதப்³பா³னி. ந ஆஸாதே³தப்³போ³தி ந அபஸாதே³தப்³போ³. அந்தோ வா ப³ஹி வாதி விஹாரஸ்ஸ அந்தோ வா ப³ஹி வா. ந தித்தி²யாதி³பத³த்தயம் உத்தானமேவ. ஸேஸம் ஸப்³ப³ம் பாரிவாஸிகக்க²ந்த⁴கே வண்ணயிஸ்ஸாம. ஸேஸம் தஜ்ஜனீயே வுத்தனயமேவ. ஆபத்தியா அப்படிகம்மே உக்கே²பனீயகம்மம் இமினா ஸதி³ஸமேவ.

65. அரிட்ட²வத்து² கு²த்³த³கவண்ணனாயம் வுத்தம். ‘‘ப⁴ண்ட³னகாரகோ’’திஆதீ³ஸு யம் தி³ட்டி²ம் நிஸ்ஸாய ப⁴ண்ட³னாதீ³னி கரோதி, தஸ்ஸா அப்படினிஸ்ஸக்³கே³யேவ கம்மம் காதப்³ப³ம். ஸேஸம் தஜ்ஜனீயே வுத்தனயமேவ. ஸம்மாவத்தனாயம்பி ஹி இத⁴ தேசத்தாலீஸம்யேவ வத்தானீதி.

ஆபத்தியா அத³ஸ்ஸனே உக்கே²பனீயகம்மகதா² நிட்டி²தா.

கம்மக்க²ந்த⁴கவண்ணனா நிட்டி²தா.

2. பாரிவாஸிகக்க²ந்த⁴கம்

பாரிவாஸிகவத்தகதா²

75. பாரிவாஸிகக்க²ந்த⁴கே – பாரிவாஸிகாதி பரிவாஸம் பரிவஸந்தா. தத்த² சதுப்³பி³தோ⁴ பரிவாஸோ – அப்படிச்ச²ன்னபரிவாஸோ, படிச்ச²ன்னபரிவாஸோ, ஸுத்³த⁴ந்தபரிவாஸோ, ஸமோதா⁴னபரிவாஸோதி. தேஸு ‘‘யோ, பி⁴க்க²வே, அஞ்ஞோபி அஞ்ஞதித்தி²யபுப்³போ³ இமஸ்மிம் த⁴ம்மவினயே ஆகங்க²தி பப்³ப³ஜ்ஜம், ஆகங்க²தி உபஸம்பத³ம், தஸ்ஸ சத்தாரோ மாஸே பரிவாஸோ தா³தப்³போ³’’தி (மஹாவ. 86) ஏவம் மஹாக²ந்த⁴கே வுத்தோ தித்தி²யபரிவாஸோ அப்படிச்ச²ன்னபரிவாஸோ நாம. தத்த² யம் வத்தப்³ப³ம் தம் வுத்தமேவ. அயம் பன இத⁴ அனதி⁴ப்பேதோ. ஸேஸா தயோ யேன ஸங்கா⁴தி³ஸேஸாபத்தி ஆபன்னா சேவ ஹோதி படிச்சா²தி³தா ச, தஸ்ஸ தா³தப்³பா³. தேஸு யம் வத்தப்³ப³ம் தம் ஸமுச்சயக்க²ந்த⁴கே வக்கா²ம. ஏதே பன இத⁴ அதி⁴ப்பேதா. தஸ்மா ஏதேஸு யம்கிஞ்சி பரிவாஸம் பரிவஸந்தா ‘‘பாரிவாஸிகா’’தி வேதி³தப்³பா³.

பகதத்தானம் பி⁴க்கூ²னந்தி ட²பேத்வா நவகதரம் பாரிவாஸிகம் அவஸேஸானம் அந்தமஸோ மூலாயபடிகஸ்ஸனாரஹாதீ³னம்பி. அபி⁴வாத³னபச்சுட்டா²னந்தி யம் தே அபி⁴வாத³னாதி³ம் கரோந்தி, தம் ஸாதி³யந்தி, ஸம்படிச்ச²ந்தி; ந படிக்கி²பந்தீதி அத்தோ². தத்த² ஸாமீசிகம்மந்தி ட²பேத்வா அபி⁴வாத³னாதீ³னி அஞ்ஞஸ்ஸ அனுச்ச²விகஸ்ஸ பீ³ஜனவாததா³னாதி³னோ ஆபி⁴ஸமாசாரிகஸ்ஸேதம் அதி⁴வசனம். ஆஸனாபி⁴ஹாரந்தி ஆஸனஸ்ஸ அபி⁴ஹரணம், ஆஸனம் க³ஹேத்வா அபி⁴க³மனம் பஞ்ஞாபனமேவ வா. ஸேய்யாபி⁴ஹாரேபி ஏஸேவ நயோ. பாதோ³த³கந்தி பாத³தோ⁴வனஉத³கம். பாத³பீட²ந்தி தோ⁴தபாத³ட்ட²பனகம். பாத³கத²லிகந்தி அதோ⁴தபாத³ட்ட²பனகம் பாத³க⁴ம்ஸனம் வா. ஆபத்தி து³க்கடஸ்ஸாதி ஸத்³தி⁴விஹாரிகானம்பி ஸாதி³யந்தஸ்ஸ து³க்கடமேவ, தஸ்மா தே வத்தப்³பா³ – ‘‘அஹம் வினயகம்மம் கரோமி, மய்ஹம் வத்தம் மா கரோத², மா மம் கா³மப்பவேஸனம் ஆபுச்ச²தா²’’தி. ஸசே ஸத்³தா⁴பப்³ப³ஜிதா குலபுத்தா ‘‘தும்ஹே, ப⁴ந்தே, தும்ஹாகம் வினயகம்மம் கரோதா²’’தி வத்வா வத்தம் கரோந்தி, கா³மப்பவேஸனம்பி ஆபுச்ச²ந்தியேவ, வாரிதகாலதோ பட்டா²ய அனாபத்தி. மிது² யதா²வுட்³ட⁴ந்தி பாரிவாஸிகபி⁴க்கூ²னம் அஞ்ஞமஞ்ஞம் யோ யோ வுட்³டோ⁴ தேன தேன நவகதரஸ்ஸ ஸாதி³தும்.

பஞ்ச யதா²வுட்³ட⁴ந்தி பகதத்தேஹிபி ஸத்³தி⁴ம் வுட்³ட⁴படிபாடியா ஏவ. தஸ்மா பாதிமோக்கே² உத்³தி³ஸ்ஸமானே ஹத்த²பாஸே நிஸீதி³தும் வட்டதி. மஹாபச்சரியம் பன ‘‘பாளியா அனிஸீதி³த்வா பாளிம் விஹாய ஹத்த²பாஸம் அமுஞ்சந்தேன நிஸீதி³தப்³ப³’’ந்தி வுத்தம். பாரிஸுத்³தி⁴உபோஸதே² கரீயமானே ஸங்க⁴னவகட்டா²னே நிஸீதி³த்வா தத்தே²வ நிஸின்னேன அத்தனோ பாளியா பாரிஸுத்³தி⁴உபோஸதோ² காதப்³போ³. பவாரணாயபி ஸங்க⁴னவகட்டா²னே நிஸீதி³த்வா தத்தே²வ நிஸின்னேன அத்தனோ பாளியா பவாரேதப்³ப³ம். ஸங்கே⁴ன க⁴ண்டிம் பஹரித்வா பா⁴ஜீயமானம் வஸ்ஸிகஸாடிகம்பி அத்தனோ பத்தட்டா²னே க³ஹேதும் வட்டதி.

ஓணோஜனந்தி விஸ்ஸஜ்ஜனம் வுச்சதி. ஸசே ஹி பாரிவாஸிகஸ்ஸ த்³வே தீணி உத்³தே³ஸப⁴த்தாதீ³னி பாபுணந்தி, அஞ்ஞா சஸ்ஸ புக்³க³லிகப⁴த்தபச்சாஸா ஹோதி, தானி படிபாடியா க³ஹேத்வா ‘‘ப⁴ந்தே, ஹேட்டா² கா³ஹேத², அஜ்ஜ மய்ஹம் ப⁴த்தபச்சாஸா அத்தி², ஸ்வே க³ண்ஹிஸ்ஸாமீ’’தி வத்வா விஸ்ஸஜ்ஜேதப்³பா³னி. ஏவம் தானி புனதி³வஸேஸு க³ண்ஹிதும் லப⁴தி. புனதி³வஸே ஸப்³ப³பட²மம் ஏதஸ்ஸ தா³தப்³ப³ந்தி குருந்தி³யம் வுத்தம். யதி³ பன ந க³ண்ஹாதி ந விஸ்ஸஜ்ஜேதி, புனதி³வஸே ந லப⁴தி, இத³ம் ஓணோஜனம் நாம பாரிவாஸிகஸ்ஸேவ ஓதி³ஸ்ஸ அனுஞ்ஞாதம். கஸ்மா? தஸ்ஸ ஹி ஸங்க⁴னவகட்டா²னே நிஸின்னஸ்ஸ ப⁴த்தக்³கே³ யாகு³க²ஜ்ஜகாதீ³னி பாபுணந்தி வா ந வா, தஸ்மா ஸோ ‘‘பி⁴க்கா²ஹாரேன மா கிலமித்தா²’’தி இத³மஸ்ஸ ஸங்க³ஹகரணத்தா²ய ஓதி³ஸ்ஸ அனுஞ்ஞாதம்.

ப⁴த்தந்தி ஆக³தாக³தேஹி வுட்³ட⁴படிபாடியா க³ஹேத்வா க³ந்தப்³ப³ம் விஹாரே ஸங்க⁴ஸ்ஸ சதுஸ்ஸாலப⁴த்தம், ஏதம் யதா²வுட்³ட⁴ம் லப⁴தி. பாளியா பன க³ந்தும் வா டா²தும் வா ந லப⁴தி, தஸ்மா பாளிதோ ஓஸக்கித்வா ஹத்த²பாஸே டி²தேன ஹத்த²ம் பஸாரேத்வா யதா² ஸேனோ நிபதித்வா க³ண்ஹாதி, ஏவம் க³ண்ஹிதப்³ப³ம். ஆராமிகஸமணுத்³தே³ஸேஹி ஆஹராபேதும் ந லப⁴தி. ஸசே ஸயமேவ ஆஹரந்தி, வட்டதி. ரஞ்ஞோ மஹாபேளப⁴த்தேபி ஏஸேவ நயோ. சதுஸ்ஸாலப⁴த்தே பன ஸசே ஓணோஜனம் கத்துகாமோ ஹோதி, அத்தனோ அத்தா²ய உக்கி²த்தே பிண்டே³ ‘‘அஜ்ஜ மே ப⁴த்தம் அத்தி², ஸ்வே க³ண்ஹிஸ்ஸாமீ’’தி வத்தப்³ப³ம். புனதி³வஸே த்³வே பிண்டே³ லப⁴தீதி மஹாபச்சரியம் வுத்தம். உத்³தே³ஸப⁴த்தாதீ³னிபி பாளிதோ ஓஸக்கித்வாவ க³ஹேதப்³பா³னி. யத்த² பன நிஸீதா³பேத்வா பரிவிஸந்தி, தத்த² ஸாமணேரானம் ஜேட்ட²கேன பி⁴க்கூ²னம் ஸங்க⁴னவகேன ஹுத்வா நிஸீதி³தப்³ப³ம்.

76. இதா³னி யா அயம் ஸம்மாவத்தனா வுத்தா, தத்த² ந உபஸம்பாதே³தப்³ப³ந்தி உபஜ்ஜா²யேன ஹுத்வா ந உபஸம்பாதே³தப்³ப³ம்; வத்தம் நிக்கி²பித்வா பன உபஸம்பாதே³தும் வட்டதி. ஆசரியேன ஹுத்வாபி கம்மவாசா ந ஸாவேதப்³பா³, அஞ்ஞஸ்மிம் அஸதி வத்தம் நிக்கி²பித்வா ஸாவேதும் வட்டதி. ந நிஸ்ஸயோதி ஆக³ந்துகானம் நிஸ்ஸயோ ந தா³தப்³போ³. யேஹிபி பகதியாவ நிஸ்ஸயோ க³ஹிதோ, தே வத்தப்³பா³ – ‘‘அஹம் வினயகம்மம் கரோமி, அஸுகத்தே²ரஸ்ஸ நாம ஸந்திகே நிஸ்ஸயம் க³ண்ஹத², மய்ஹம் வத்தம் மா கரோத², மா மம் கா³மப்பவேஸனம் ஆபுச்ச²தா²’’தி. ஸசே ஏவம் வுத்தேபி கரோந்தியேவ, வாரிதகாலதோ பட்டா²ய கரோந்தேஸுபி அனாபத்தி.

ந ஸாமணேரோதி அஞ்ஞோ ஸாமணேரோ ந க³ஹேதப்³போ³. உபஜ்ஜ²ம் த³த்வா க³ஹிதஸாமணேராபி வத்தப்³பா³ – ‘‘அஹம் வினயகம்மம் கரோமி, மய்ஹம் வத்தம் மா கரோத², மா மம் கா³மப்பவேஸனம் ஆபுச்ச²தா²’’தி. ஸசே ஏவம் வுத்தேபி கரோந்தியேவ, வாரிதகாலதோ பட்டா²ய கரோந்தேஸுபி அனாபத்தி. பி⁴க்கு²னோவாத³கஸம்முதி நாம ஆதி⁴பச்சட்டா²னபூ⁴தாதி படிக்கி²த்தா, தஸ்மா பி⁴க்கு²ஸங்க⁴ஸ்ஸ வத்தப்³ப³ம் – ‘‘ப⁴ந்தே, அஹம் வினயகம்மம் கரோமி, பி⁴க்கு²னோவாத³கம் ஜானாதா²’’தி, படிப³லஸ்ஸ வா பி⁴க்கு²ஸ்ஸ பா⁴ரோ காதப்³போ³. ஆக³தா பி⁴க்கு²னியோ ‘‘ஸங்க⁴ஸந்திகம் க³ச்ச²த², ஸங்கோ⁴ வோ ஓவாத³தா³யகம் ஜானிஸ்ஸதீ’’தி வா ‘‘அஹம் வினயகம்மம் கரோமி, அஸுகபி⁴க்கு²ஸ்ஸ நாம ஸந்திகம் க³ச்ச²த², ஸோ வோ ஓவாத³ம் த³ஸ்ஸதீ’’தி வா வத்தப்³பா³.

ஸா ஆபத்தீதி ஸுக்கவிஸ்ஸட்டி²யா பரிவாஸே தி³ன்னே ஸுக்கவிஸ்ஸட்டி² நாபஜ்ஜிதப்³பா³. அஞ்ஞா வா தாதி³ஸிகாதி காயஸம்ஸக்³கா³தி³க³ருகாபத்தி. ததோ வா பாபிட்ட²தராதி பாராஜிகாபத்தி; ஸத்தஸு ஹி ஆபத்தீஸு து³ப்³பா⁴ஸிதாபத்தி பாபிட்டா²; து³க்கடாபத்தி பாபிட்ட²தரா; து³க்கடாபத்தி பாபிட்டா², பாடிதே³ஸனீயாபத்தி பாபிட்ட²தராதி ஏவம் பாசித்தியது²ல்லச்சயஸங்கா⁴தி³ஸேஸபாராஜிகாபத்தீஸு நயோ நேதப்³போ³. தாஸம் வத்தூ²ஸுபி து³ப்³பா⁴ஸிதவத்து² பாபிட்ட²ம், து³க்கடவத்து² பாபிட்ட²தரந்தி புரிமனயேனேவ பே⁴தோ³ வேதி³தப்³போ³. பண்ணத்திவஜ்ஜஸிக்கா²பதே³ பன வத்து²பி ஆபத்திபி பாபிட்டா². லோகவஜ்ஜே உப⁴யம்பி பாபிட்ட²தரம்.

கம்மந்தி பரிவாஸகம்மவாசா வுச்சதி. தம் கம்மம் ‘‘அகதம் து³க்கட’’ந்திஆதீ³ஹி வா ‘‘கிம் இத³ம் கம்மம் நாம கஸிகம்மம் கோ³ரக்க²கம்ம’’ந்திஆதீ³ஹி வா வசனேஹி ந க³ரஹிதப்³ப³ம். கம்மிகாதி யேஹி பி⁴க்கூ²ஹி கம்மம் கதம், தே வுச்சந்தி, தே ‘‘பா³லா அப்³யத்தா’’திஆதீ³ஹி வசனேஹி ந க³ரஹிதப்³பா³. ந ஸவசனீயம் காதப்³ப³ந்தி பலிபோ³த⁴த்தா²ய வா பக்கோஸனத்தா²ய வா ஸவசனீயம் ந காதப்³ப³ம், பலிபோ³த⁴த்தா²ய ஹி கரோந்தோ ‘‘அஹம் ஆயஸ்மந்தம் இமஸ்மிம் வத்து²ஸ்மிம் ஸவசனீயம் கரோமி, இமம்ஹா ஆவாஸா ஏகபத³ம்பி மா பக்காமி, யாவ ந தம் அதி⁴கரணம் வூபஸந்தம் ஹோதீ’’தி ஏவம் கரோதி. பக்கோஸனத்தா²ய கரோந்தோ ‘‘அஹம் தே ஸவசனீயம் கரோமி, ஏஹி மயா ஸத்³தி⁴ம் வினயத⁴ரானம் ஸம்முகீ²பா⁴வம் க³ச்சா²மா’’தி ஏவம் கரோதி; தது³ப⁴யம்பி ந காதப்³ப³ம்.

ந அனுவாதோ³தி விஹாரே ஜேட்ட²கட்டா²னம் ந காதப்³ப³ம். பாதிமோக்கு²த்³தே³ஸகேன வா த⁴ம்மஜ்ஜே²ஸகேன வா ந ப⁴விதப்³ப³ம். நாபி தேரஸஸு ஸம்முதீஸு ஏகஸம்முதிவஸேனாபி இஸ்ஸரியகம்மம் காதப்³ப³ம். ந ஓகாஸோதி ‘‘கரோது மே ஆயஸ்மா ஓகாஸம், அஹம் தம் வத்துகாமோ’’தி ஏவம் பகதத்தஸ்ஸ ஓகாஸோ ந காரேதப்³போ³, வத்து²னா வா ஆபத்தியா வா ந சோதே³தப்³போ³, ‘‘அயம் புப்³பே³ தே தோ³ஸோ’’தி ந ஸாரேதப்³போ³. ந பி⁴க்கூ²ஹி ஸம்பயோஜேதப்³ப³ந்தி அஞ்ஞமஞ்ஞம் யோஜேத்வா கலஹோ ந காரேதப்³போ³.

புரதோதி ஸங்க⁴த்தே²ரேன ஹுத்வா புரதோ ந க³ந்தப்³ப³ம், த்³வாத³ஸஹத்த²ம் உபசாரம் முஞ்சித்வா ஏககேன க³ந்தப்³ப³ம். நிஸீத³னேபி ஏஸேவ நயோ. ஆஸனபரியந்தோதி ப⁴த்தக்³கா³தீ³ஸு ஸங்க⁴னவகாஸனம் வுச்சதி; ஸ்வாஸ்ஸ தா³தப்³போ³, தத்த² நிஸீதி³தப்³ப³ம். ஸேய்யாபரியந்தோதி ஸேய்யானம் பரியந்தோ, ஸப்³ப³லாமகம் மஞ்சபீட²ம். அயஞ்ஹி வஸ்ஸக்³கே³ன அத்தனோ பத்தட்டா²னே ஸேய்யம் க³ஹேதும் ந லப⁴தி. ஸப்³ப³பி⁴க்கூ²ஹி விசினித்வா க³ஹிதாவஸேஸா மங்குலகூ³த²ப⁴ரிதா வேத்தலதாதி³வினத்³தா⁴ லாமகஸேய்யா அஸ்ஸ தா³தப்³பா³. விஹாரபரியந்தோதி யதா² ச ஸேய்யா, ஏவம் வஸனஆவாஸோபி வஸ்ஸக்³கே³ன அத்தனோ பத்தட்டா²னே தஸ்ஸ ந வட்டதி. ஸப்³ப³பி⁴க்கூ²ஹி விசினித்வா க³ஹிதாவஸேஸா பன ரஜோஹதபூ⁴மி ஜதுகமூஸிகப⁴ரிதா பண்ணஸாலா அஸ்ஸ தா³தப்³பா³. ஸசே பகதத்தா ஸப்³பே³ ருக்க²மூலிகா அப்³போ⁴காஸிகா ச ஹோந்தி, ச²ன்னம் ந உபேந்தி, ஸப்³பே³பி ஏதேஹி விஸ்ஸட்டா²வாஸா நாம ஹோந்தி. தேஸு யம் இச்ச²தி, தம் லப⁴தி. வஸ்ஸூபனாயிகதி³வஸே பச்சயம் ஏகபஸ்ஸே ட²த்வா வஸ்ஸக்³கே³ன க³ண்ஹிதும் லப⁴தி. ஸேனாஸனம் ந லப⁴தி, நிப³த்³த⁴வஸ்ஸாவாஸிகம் ஸேனாஸனம் க³ண்ஹிதுகாமேன வத்தம் நிக்கி²பித்வா க³ஹேதப்³ப³ம்.

தேன ச ஸோ ஸாதி³தப்³போ³தி யம் அஸ்ஸ ஆஸனாதி³பரியந்தம் பி⁴க்கூ² தே³ந்தி, ஸோ ஏவ ஸாதி³தப்³போ³. புரேஸமணேன வா பச்சா²ஸமணேன வாதி ஞாதிபவாரிதட்டா²னே ‘‘ஏத்தகே பி⁴க்கூ² க³ஹேத்வா ஆக³ச்ச²தா²’’தி நிமந்திதேன ‘‘ப⁴ந்தே, அஸுகம் நாம குலம் பி⁴க்கூ² நிமந்தேஸி, ஏத² தத்த² க³ச்சா²மா’’தி ஏவம் ஸம்விதா⁴ய பி⁴க்கூ² புரேஸமணே வா பச்சா²ஸமணே வா கத்வா ந க³ந்தப்³ப³ம். ‘‘ப⁴ந்தே, அஸுகஸ்மிம் நாம கா³மே மனுஸ்ஸா பி⁴க்கூ²னம் ஆக³மனம் இச்ச²ந்தி, ஸாது⁴ வதஸ்ஸ ஸசே தேஸம் ஸங்க³ஹம் கரேய்யாதா²’’தி ஏவம் பன பரியாயேன கதே²தும் வட்டதி.

ந ஆரஞ்ஞிகங்க³ந்தி ஆக³தாக³தானம் ஆரோசேதும் ஹராயமானேன ஆரஞ்ஞிகது⁴தங்க³ம் ந ஸமாதா³தப்³ப³ம். யேனாபி பகதியா ஸமாதி³ன்னம், தேன து³தியம் பி⁴க்கு²ம் க³ஹேத்வா அரஞ்ஞே அருணம் உட்டா²பேதப்³ப³ம், ந ச ஏககேன வத்த²ப்³ப³ம். ததா² ப⁴த்தக்³கா³தீ³ஸு ஆஸனபரியந்தே நிஸஜ்ஜாய ஹராயமானேன பிண்ட³பாதிகது⁴தங்க³ம்பி ந ஸமாதா³தப்³ப³ம். யோ பன பகதியாவ பிண்ட³பாதிகோ தஸ்ஸ படிஸேதோ⁴ நத்தி².

ந ச தப்பச்சயாதி ‘‘நீஹடப⁴த்தோ ஹுத்வா விஹாரேயேவ நிஸீதி³த்வா பு⁴ஞ்ஜந்தோ ரத்தியோ க³ணயிஸ்ஸாமி, க³ச்ச²தோ மே பி⁴க்கு²ம் தி³ஸ்வா அனாரோசேந்தஸ்ஸ ரத்திச்சே²தோ³ ஸியா’’தி இமினா காரணேன பிண்ட³பாதோ ந நீஹராபேதப்³போ³. மா மம் ஜானிம்ஸூதி ‘‘மா மம் ஏகபி⁴க்கு²பி ஜானாதூ’’தி ச இமினா அஜ்ஜா²ஸயேன விஹாரே ஸாமணேரேஹி பசாபேத்வா பு⁴ஞ்ஜிதும்பி ந லப⁴தி. கா³மம் பிண்டா³ய பவிஸிதப்³ப³மேவ. கி³லானஸ்ஸ பன நவகம்மஆசரியுபஜ்ஜா²யகிச்சாதி³பஸுதஸ்ஸ வா விஹாரேயேவ அச்சி²தும் வட்டதி. ஸசேபி கா³மே அனேகஸதா பி⁴க்கூ² விசரந்தி, ந ஸக்கா ஹோதி ஆரோசேதும், கா³மகாவாஸம் க³ந்த்வா ஸபா⁴க³ட்டா²னே வஸிதும் வட்டதி.

ஆக³ந்துகேனாதி கஞ்சி விஹாரம் க³தேன தத்த² பி⁴க்கூ²னம் ஆரோசேதப்³ப³ம். ஸசே ஸப்³பே³ ஏகட்டா²னே டி²தே பஸ்ஸதி, ஏகட்டா²னே டி²தேனேவ ஆரோசேதப்³ப³ம். அத² ருக்க²மூலாதீ³ஸு விஸும் விஸும் டி²தா ஹோந்தி, தத்த² தத்த² க³ந்த்வா ஆரோசேதப்³ப³ம். ஸஞ்சிச்ச அனாரோசேந்தஸ்ஸ ரத்திச்சே²தோ³ ச ஹோதி, வத்தபே⁴தே³ ச து³க்கடம். அத² விசினந்தோ ஏகச்சே ந பஸ்ஸதி, ரத்திச்சே²தோ³வ ஹோதி, ந வத்தபே⁴த³து³க்கடம்.

ஆக³ந்துகஸ்ஸாதி அத்தனோ வஸனவிஹாரம் ஆக³தஸ்ஸாபி ஏகஸ்ஸ வா ப³ஹூனம் வா வுத்தனயேனேவ ஆரோசேதப்³ப³ம். ரத்திச்சே²த³வத்தபே⁴தா³பி சேத்த² வுத்தனயேனேவ வேதி³தப்³பா³. ஸசே ஆக³ந்துகா முஹுத்தம் விஸ்ஸமித்வா வா அவிஸ்ஸமித்வா ஏவ வா விஹாரமஜ்ஜே²ன க³ச்ச²ந்தி, தேஸம்பி ஆரோசேதப்³ப³ம். ஸசே தஸ்ஸ அஜானந்தஸ்ஸேவ க³ச்ச²ந்தி, அயஞ்ச பன க³தகாலே ஜானாதி, க³ந்த்வா ஆரோசேதப்³ப³ம். ஸம்பாபுணிதும் அஸக்கோந்தஸ்ஸ ரத்திச்சே²தோ³வ ஹோதி, ந வத்தபே⁴த³து³க்கடம். யேபி அந்தோவிஹாரம் அப்பவிஸித்வா உபசாரஸீமம் ஓக்கமித்வா க³ச்ச²ந்தி, அயஞ்ச நேஸம் ச²த்தஸத்³த³ம் வா உக்காஸிதஸத்³த³ம் வா கி²பிதஸத்³த³ம் வா ஸுத்வாவ ஆக³ந்துகபா⁴வம் ஜானாதி, க³ந்த்வா ஆரோசேதப்³ப³ம். க³தகாலே ஜானந்தேனபி அனுப³ந்தி⁴த்வா ஆரோசேதப்³ப³மேவ. ஸம்பாபுணிதும் அஸக்கோந்தஸ்ஸ ரத்திச்சே²தோ³வ ஹோதி, ந வத்தபே⁴த³து³க்கடம். யோபி ரத்திம்யேவ ஆக³ந்த்வா ரத்திம்யேவ க³ச்ச²தி, ஸோபிஸ்ஸ ரத்திச்சே²த³ம் கரோதி, அஞ்ஞாதத்தா பன வத்தபே⁴த³து³க்கடம் நத்தி². ஸசே அஜானித்வாவ அப்³பா⁴னம் கரோதி, அகதமேவ ஹோதீதி குருந்தி³யம் வுத்தம். தஸ்மா அதி⁴கா ரத்தியோ க³ஹேத்வா காதப்³ப³ம், அயம் அபண்ணகபடிபதா³.

நதீ³ஆதீ³ஸு நாவாய க³ச்ச²ந்தம்பி பரதீரே டி²தம்பி ஆகாஸேன க³ச்ச²ந்தம்பி பப்³ப³ததலஅரஞ்ஞாதீ³ஸு தூ³ரே டி²தம்பி பி⁴க்கு²ம் தி³ஸ்வா ஸசே ‘‘பி⁴க்கூ²’’தி வவத்தா²னம் அத்தி², நாவாதீ³ஹி வா க³ந்த்வா மஹாஸத்³த³ம் கத்வா வா வேகே³ன அனுப³ந்தி⁴த்வா வா ஆரோசேதப்³ப³ம், அனாரோசேந்தஸ்ஸ ரத்திச்சே²தோ³ சேவ வத்தபே⁴த³து³க்கடஞ்ச. ஸசே வாயமந்தோபி ஸம்பாபுணிதும் வா ஸாவேதும் வா ந ஸக்கோதி, ரத்திச்சே²தோ³வ ஹோதி, ந வத்தபே⁴த³து³க்கடம். ஸங்க⁴ஸேனாப⁴யத்தே²ரோ பன விஸயாவிஸயேன கதே²தி – ‘‘விஸயே கிர அனாரோசேந்தஸ்ஸ ரத்திச்சே²தோ³ சேவ வத்தபே⁴த³து³க்கடஞ்ச ஹோதி, அவிஸயே பன உப⁴யம்பி நத்தீ²’’தி. கரவீகதிஸ்ஸத்தே²ரோ ‘‘ஸமணோ அயந்தி வவத்தா²னமேவ பமாணம், ஸசேபி அவிஸயோ ஹோதி, வத்தபே⁴த³து³க்கடமேவ நத்தி², ரத்திச்சே²தோ³ பன ஹோதியேவா’’தி ஆஹ.

உபோஸதே²தி ‘‘உபோஸத²ம் ஸம்பாபுணிஸ்ஸாமா’’தி ஆக³ந்துகா பி⁴க்கூ² ஆக³ச்ச²ந்தி, இத்³தி⁴யா க³ச்ச²ந்தாபி உபோஸத²பா⁴வம் ஞத்வா ஓதரித்வா உபோஸத²ம் கரோந்தி, தஸ்மா ஆக³ந்துகஸோத⁴னத்த²ம் உபோஸத²தி³வஸே ஆரோசேதப்³ப³ம். பவாரணாயபி ஏஸேவ நயோ. கி³லானோதி க³ந்தும் அஸமத்தோ². தூ³தேனாதி ஏத்த² அனுபஸம்பன்னம் பேஸேதும் ந வட்டதி, பி⁴க்கு²ம் பேஸேத்வா ஆரோசாபேதப்³ப³ம்.

அபி⁴க்கு²கோ ஆவாஸோதி ஸுஞ்ஞவிஹாரோ; யத்த² ஏகோபி பி⁴க்கு² நத்தி², தத்த² வாஸத்தா²ய ந க³ந்தப்³ப³ம். ந ஹி தத்த² வுத்த²ரத்தியோ க³ணனூபிகா ஹோந்தி, பகதத்தேன பன ஸத்³தி⁴ம் வட்டதி. த³ஸவித⁴ந்தராயே பன ஸசேபி ரத்தியோ க³ணனூபிகா ந ஹோந்தி, அந்தராயதோ பரிமுச்சனத்தா²ய க³ந்தப்³ப³மேவ. தேன வுத்தம் – ‘‘அஞ்ஞத்ர அந்தராயா’’தி. நானாஸம்வாஸகேஹி ஸத்³தி⁴ம் வினயகம்மம் காதும் ந வட்டதி. தேஸம் அனாரோசனேபி ரத்திச்சே²தோ³ நத்தி², அபி⁴க்கு²காவாஸஸதி³ஸமேவ ஹோதி. தேன வுத்தம் – ‘‘யத்த²ஸ்ஸு பி⁴க்கூ² நானாஸம்வாஸகா’’தி. ஸேஸம் உபோஸத²க்க²ந்த⁴கே வுத்தனயமேவ.

81. ஏகச்ச²ன்னே ஆவாஸேதிஆதீ³ஸு ஆவாஸோ நாம வஸனத்தா²ய கதஸேனாஸனம். அனாவாஸோ நாம சேதியக⁴ரம் போ³தி⁴க⁴ரம் ஸம்முஞ்ஜனிஅட்டகோ தா³ருஅட்டகோ பானீயமாளோ வச்சகுடி த்³வாரகோட்ட²கோதி ஏவமாதி³. ததியபதே³ன தது³ப⁴யம்பி க³ஹிதம். ஏதேஸு யத்த² கத்த²சி ஏகச்ச²ன்னே ச²த³னதோ உத³கபதனட்டா²னபரிச்சி²ன்னே ஓகாஸே உக்கி²த்தகோ வஸிதும் ந லப⁴தி. ‘‘பாரிவாஸிகோ பன அந்தோஆவாஸேயேவ ந லப⁴தீ’’தி மஹாபச்சரியம் வுத்தம். மஹாஅட்ட²கதா²யம் பன ‘‘அவிஸேஸேன உத³கபாதேன வாரித’’ந்தி வுத்தம். குருந்தி³யம் ‘‘ஏதேஸு ஏத்தகேஸு பஞ்சவண்ணச்ச²த³னப³த்³த⁴ட்டா²னேஸு பாரிவாஸிகஸ்ஸ ச உக்கி²த்தகஸ்ஸ ச பகதத்தேன ஸத்³தி⁴ம் உத³கபாதேன வாரித’’ந்தி வுத்தம். தஸ்மா நானூபசாரேபி ஏகச்ச²ன்னே ந வட்டதி. ஸசே பனேத்த² தத³ஹுபஸம்பன்னேபி பகதத்தே பட²மம் பவிஸித்வா நிபன்னே ஸட்டி²வஸ்ஸோபி பாரிவாஸிகோ பச்சா² பவிஸித்வா ஜானந்தோ நிபஜ்ஜதி, ரத்திச்சே²தோ³ சேவ வத்தபே⁴த³து³க்கடஞ்ச. அஜானந்தஸ்ஸ ரத்திச்சே²தோ³வ ந வத்தபே⁴த³து³க்கடம். ஸசே பன தஸ்மிம் பட²மம் நிபன்னே பச்சா² பகதத்தோ பவிஸித்வா நிபஜ்ஜதி, பாரிவாஸிகோ ச ஜானாதி, ரத்திச்சே²தோ³ சேவ வத்தபே⁴த³து³க்கடஞ்ச. நோ சே ஜானாதி, ரத்திச்சே²தோ³வ ந வத்தபே⁴த³து³க்கடம்.

வுட்டா²தப்³ப³ம் நிமந்தேதப்³போ³தி தத³ஹுபஸம்பன்னம்பி தி³ஸ்வா வுட்டா²தப்³ப³மேவ; வுட்டா²ய ச ‘‘அஹம் இமினா ஸுக²னிஸின்னோ வுட்டா²பிதோ’’தி பரம்முகே²ன ந க³ந்தப்³ப³ம், ‘‘இத³ம் ஆசரிய-ஆஸனம், ஏத்த² நிஸீத³தா²’’தி ஏவம் நிமந்தேதப்³போ³யேவ. நவகேன பன ‘‘மஹாதே²ரம் ஓப³த்³த⁴ம் கரோமீ’’தி பாரிவாஸிகத்தே²ரஸ்ஸ ஸந்திகம் ந க³ந்தப்³ப³ம். ஏகாஸனேதி ஸமானவஸ்ஸிகாஸனே மஞ்சே வா பீடே² வா. ந ச²மாயம் நிஸின்னேதி பகதத்தே பூ⁴மியம் நிஸின்னே இதரேன அந்தமஸோ திணஸந்தா²ரேபி உச்சதரே வாலிகாதலேபி வா ந நிஸீதி³தப்³ப³ம், த்³வாத³ஸஹத்த²ம் பன உபசாரம் முஞ்சித்வா நிஸீதி³தும் வட்டதி. ஏகசங்கமேதி ஸஹாயேன விய ஸத்³தி⁴ம் சங்கமந்தோ ஏகஸ்மிம் சங்கமே.

ச²மாயம் சங்கமந்தந்தி ச²மாயம் சங்கமந்தே, அயமேவ வா பாடோ². அயம் பனேத்த² அத்தோ² – அகதபரிச்சே²தா³ய பூ⁴மியா சங்கமந்தே பரிச்சே²த³ம் கத்வா வாலிகம் ஆகிரித்வா ஆலம்ப³னம் யோஜேத்வா கதசங்கமே நீசேபி ந சங்கமிதப்³ப³ம், கோ பன வாதோ³ இட்ட²காசயஸம்பன்னே வேதி³காபரிக்கி²த்தேதி! ஸசே பன பாகாரபரிக்கி²த்தோ ஹோதி த்³வாரகோட்ட²கயுத்தோ பப்³ப³தந்தரவனந்தரகு³ம்ப³ந்தரேஸு வா ஸுப்படிச்ச²ன்னோ, தாதி³ஸே சங்கமே சங்கமிதும் வட்டதி. அப்படிச்ச²ன்னேபி உபசாரம் முஞ்சித்வா வட்டதி.

வுட்³ட⁴தரேனாதி ஏத்த² ஸசே வுட்³ட⁴தரே பாரிவாஸிகே பட²மம் நிபன்னே இதரோ ஜானந்தோ பச்சா² நிபஜ்ஜதி, ரத்திச்சே²தோ³ சஸ்ஸ ஹோதி வத்தபே⁴தே³ ச து³க்கடம். வுட்³ட⁴தரஸ்ஸ பன ரத்திச்சே²தோ³வ ந வத்தபே⁴த³து³க்கடம். அஜானித்வா நிபஜ்ஜதி, த்³வின்னம்பி வத்தபே⁴தோ³ நத்தி², ரத்திச்சே²தோ³ பன ஹோதி. அத² நவகபாரிவாஸிகே பட²மம் நிபன்னே வுட்³ட⁴தரோ பச்சா² நிபஜ்ஜதி, நவகோ ச ஜானாதி, ரத்தி சஸ்ஸ சி²ஜ்ஜதி, வத்தபே⁴தே³ ச து³க்கடம் ஹோதி. வுட்³ட⁴தரஸ்ஸ ரத்திச்சே²தோ³வ ந வத்தபே⁴தோ³. நோ சே ஜானாதி, த்³வின்னம்பி வத்தபே⁴தோ³ நத்தி², ரத்திச்சே²தோ³ பன ஹோதி. ஸசே த்³வேபி அபச்சா²புரிமம் நிபஜ்ஜந்தி, வுட்³ட⁴தரஸ்ஸ ரத்திச்சே²தோ³வ இதரஸ்ஸ வத்தபே⁴தோ³பீதி குருந்தி³யம் வுத்தம். த்³வே பாரிவாஸிகா ஸமவஸ்ஸா, ஏகோ பட²மம் நிபன்னோ, ஏகோ ஜானந்தோவ பச்சா² நிபஜ்ஜதி, ரத்தி ச சி²ஜ்ஜதி, வத்தபே⁴தே³ ச து³க்கடம். பட²மம் நிபன்னஸ்ஸ ரத்திச்சே²தோ³வ ந வத்தபே⁴தோ³. ஸசே பச்சா² நிபஜ்ஜந்தோபி ந ஜானாதி, த்³வின்னம்பி வத்தபே⁴தோ³ நத்தி², ரத்திச்சே²தோ³ பன ஹோதி. ஸசே த்³வேபி அபச்சா²புரிமம் நிபஜ்ஜந்தி, த்³வின்னம்பி ரத்திச்சே²தோ³யேவ, ந வத்தபே⁴தோ³. ஸசே ஹி த்³வே பாரிவாஸிகா ஏகதோ வஸேய்யும், தே அஞ்ஞமஞ்ஞஸ்ஸ அஜ்ஜா²சாரம் ஞத்வா அகா³ரவா வா விப்படிஸாரினோ வா ஹுத்வா பாபிட்ட²தரம் வா ஆபத்திம் ஆபஜ்ஜேய்யும் விப்³ப⁴மேய்யும் வா, தஸ்மா நேஸம் ஸஹஸேய்யா ஸப்³ப³ப்பகாரேன படிக்கி²த்தா. ஸேஸம் வுத்தனயேனேவ வேதி³தப்³ப³ம். மூலாயபடிகஸ்ஸனாரஹாத³யோ சேத்த² பாரிவாஸிகானம் பகதத்தட்டா²னே டி²தாதி வேதி³தப்³பா³.

பாரிவாஸிகசதுத்தோ² சே, பி⁴க்க²வே, பரிவாஸந்தி ஏத்த² பாரிவாஸிகம் சதுத்த²ம் கத்வா அஞ்ஞஸ்ஸ பரிவாஸதா³னாதீ³னி காதும் ந வட்டதி. ஏதேஸ்வேவாயம் க³ணபூரகோ ந ஹோதி, ஸேஸஸங்க⁴கம்மேஸு ஹோதி. க³ணே பன அப்பஹோந்தே வத்தம் நிக்கி²பாபேத்வா க³ணபூரகோ காதப்³போ³தி.

83. இமம் பன வத்தகத²ம் ஸுத்வா வினயத⁴ரஉபாலித்தே²ரஸ்ஸ ரஹோக³தஸ்ஸ ஏவம் பரிவிதக்கோ உத³பாதி³ – ‘‘ப⁴க³வதா ப³ஹு பாரிவாஸிகவத்தம் பஞ்ஞத்தம், கதிஹி நு கோ² ஏத்த² காரணேஹி ரத்திச்சே²தோ³ ஹோதீ’’தி! ஸோ ப⁴க³வந்தம் உபஸங்கமித்வா தமத்த²ம் புச்சி². ப⁴க³வா சஸ்ஸ ப்³யாகாஸி. தேன வுத்தம் – ‘‘அத² கோ² ஆயஸ்மா உபாலி…பே… ரத்திச்சே²தா³’’தி. தத்த² ஸஹவாஸோதி ய்வாயம் பகதத்தேன பி⁴க்கு²னா ஸத்³தி⁴ம் ஏகச்ச²ன்னேதிஆதி³னா நயேன வுத்தோ ஏகதோ வாஸோ. விப்பவாஸோதி ஏககஸ்ஸேவ வாஸோ. அனாரோசனாதி ஆக³ந்துகாதீ³னம் அனாரோசனா. ஏதேஸு தீஸு ஏகேகேன காரணேன ரத்திச்சே²தோ³ ஹோதி.

84. ந ஸக்கோந்தீதி ஸங்க⁴ஸ்ஸ மஹந்ததாய தத்த² தத்த² க³ந்த்வா ஸப்³பே³ஸம் ஆரோசேதும் அஸக்கோந்தா ஸோதே⁴தும் ந ஸக்கோந்தி. பரிவாஸம் நிக்கி²பாமி, வத்தம் நிக்கி²பாமீதி இமேஸு த்³வீஸு பதே³ஸு ஏகேனாபி நிக்கி²த்தோவ ஹோதி பரிவாஸோ; த்³வீஹி ஸுனிக்கி²த்தோயேவ. ஸமாதா³னேபி ஏஸேவ நயோ. ஏவம் வத்தம் ஸமாதி³யித்வா பரிவுத்த²பரிவாஸஸ்ஸ மானத்தம் க³ண்ஹதோ புன வத்தஸமாதா³னகிச்சம் நத்தி², ஸமாதி³ன்னவத்தோயேவ ஹேஸ தஸ்மாஸ்ஸ சா²ரத்தம் மானத்தம் தா³தப்³ப³ம், சிண்ணமானத்தோ அப்³பே⁴தப்³போ³. ஏவம் அனாபத்திகோ ஹுத்வா ஸுத்³த⁴ந்தே பதிட்டி²தோ திஸ்ஸோ ஸிக்கா² பூரேத்வா து³க்க²ஸ்ஸந்தம் கரிஸ்ஸதீதி.

பாரிவாஸிகவத்தகதா² நிட்டி²தா.

மூலாயபடிகஸ்ஸனாரஹவத்தகதா²

86. மூலாயபடிகஸ்ஸனாரஹா பி⁴க்கூ² ஸாதி³யந்தி பகதத்தானந்தி ட²பேத்வா நவகதரம் மூலாயபடிகஸ்ஸனாரஹம் அவஸேஸானம் அந்தமஸோ பாரிவாஸிகாதீ³னம்பி. இமேஸஞ்ஹி பாரிவாஸிகமூலாயபடிகஸ்ஸனாரஹமானத்தாரஹமானத்தாசாரிகப்³பா⁴னாரஹானம் பஞ்சன்னம் ட²பேத்வா அத்தனோ அத்தனோ நவகதரம், ஸேஸா ஸப்³பே³ பகதத்தா ஏவ. கஸ்மா? மிது² யதா²வுட்³ட⁴ம் அபி⁴வாத³னாதீ³னம் அனுஞ்ஞாதத்தா. தேன வுத்தம் – ‘‘அவஸேஸானம் அந்தமஸோ பாரிவாஸிகாதீ³னம்பீ’’தி. மூலாயபடிகஸ்ஸனாரஹாதி³லக்க²ணம் பன நேஸம் பரதோ ஆவிப⁴விஸ்ஸதி. ஸேஸமேத்த² இதோ பரேஸு ச மானத்தாரஹாதி³வத்தேஸு பாரிவாஸிகவத்தே வுத்தனயேனேவ வேதி³தப்³ப³ம்.

87. மூலாயபடிகஸ்ஸனாரஹசதுத்தோ² சேதிஆதீ³ஸுபி யதே²வ பாரிவாஸிகோ; ஏவம் ஏதேபி ஏதேஸு வினயகம்மேஸு க³ணபூரகா ந ஹோந்தி, ஸேஸஸங்க⁴கம்மேஸு ஹோந்தி.

மூலாயபடிகஸ்ஸனாரஹவத்தகதா² நிட்டி²தா.

மானத்தசாரிகவத்தகதா²

90. மானத்தசாரிகஸ்ஸ வத்தேஸு ‘‘தே³வஸிகம் ஆரோசேதப்³ப³’’ந்தி விஸேஸோ.

92. ரத்திச்சே²தே³ஸு ஊனே க³ணேதி ஏத்த² க³ணோதி சத்தாரோ வா அதிரேகா வா; தஸ்மா ஸசேபி தீஹி பி⁴க்கூ²ஹி ஸத்³தி⁴ம் வஸதி, ரத்திச்சே²தோ³ ஹோதியேவ. மானத்தனிக்கே²பஸமாதா³னேஸு வுத்தஸதி³ஸோவ வினிச்ச²யோ. ஸேஸம் ஸப்³ப³த்த² உத்தானமேவாதி.

மானத்தசாரிகவத்தகதா² நிட்டி²தா.

பாரிவாஸிகக்க²ந்த⁴கவண்ணனா நிட்டி²தா.

3. ஸமுச்சயக்க²ந்த⁴கம்

ஸுக்கவிஸ்ஸட்டி²கதா²

97. ஸமுச்சயக்க²ந்த⁴கே – சா²ரத்தம் மானத்தந்தி ஏத்த² சதுப்³பி³த⁴ம் மானத்தம் – அப்படிச்ச²ன்னமானத்தம், படிச்ச²ன்னமானத்தம், பக்க²மானத்தம், ஸமோதா⁴னமானத்தந்தி. தத்த² அப்படிச்ச²ன்னமானத்தம் நாம – யம் அப்படிச்ச²ன்னாய ஆபத்தியா பரிவாஸம் அத³த்வா கேவலம் ஆபத்திம் ஆபன்னபா⁴வேனேவ மானத்தாரஹஸ்ஸ மானத்தம் தி³ய்யதி. படிச்ச²ன்னமானத்தம் நாம – யம் படிச்ச²ன்னாய ஆபத்தியா பரிவுத்த²பரிவாஸஸ்ஸ தி³ய்யதி. பக்க²மானத்தம் நாம – யம் படிச்ச²ன்னாய வா அப்படிச்ச²ன்னாய வா ஆபத்தியா அத்³த⁴மாஸம் பி⁴க்கு²னீனம் தி³ய்யதி. ஸமோதா⁴னமானத்தம் நாம – யம் ஓதா⁴ய ஏகதோ கத்வா தி³ய்யதி. தேஸு இத³ம் ‘‘அப்படிச்ச²ன்னாய சா²ரத்தம் மானத்த’’ந்தி வசனதோ ‘‘அப்படிச்ச²ன்னமானத்த’’ந்தி வேதி³தப்³ப³ம். தம் தே³ந்தேன ஸசே ஏகம் ஆபத்திம் ஆபன்னோ ஹோதி, இத⁴ வுத்தனயேன தா³தப்³ப³ம். ஸசே த்³வே வா திஸ்ஸோ வா ததுத்தரிம் வா ஆபன்னோ, யதே²வ ‘‘ஏகம் ஆபத்தி’’ந்தி வுத்தம்; ஏவம் ‘‘த்³வே ஆபத்தியோ, திஸ்ஸோ ஆபத்தியோ’’தி வத்தப்³ப³ம். ததுத்தரி பன ஸசேபி ஸதம் வா ஸஹஸ்ஸம் வா ஹோதி, ‘‘ஸம்ப³ஹுலா’’தி வத்தப்³ப³ம். நானாவத்து²காயோபி ஏகதோ கத்வா தா³தப்³பா³, தாஸம் தா³னவிதி⁴ம் பரிவாஸதா³னே கத²யிஸ்ஸாம.

ஏவம் ஆபத்திவஸேன கம்மவாசம் கத்வா தி³ன்னே மானத்தே ‘‘ஏவமேதம் தா⁴ரயாமீ’’தி கம்மவாசாபரியோஸானே மாளகஸீமாயமேவ ‘‘மானத்தம் ஸமாதி³யாமி, வத்தம் ஸமாதி³யாமீ’’தி வுத்தனயேன வத்தம் ஸமாதா³தப்³ப³ம். வத்தம் ஸமாதி³யித்வா தத்தே²வ ஸங்க⁴ஸ்ஸ ஆரோசேதப்³ப³ம், ஆரோசேந்தேன ச ஏவம் ஆரோசேதப்³ப³ம் –

‘‘அஹம், ப⁴ந்தே, ஏகம் ஆபத்திம் ஆபஜ்ஜிம் ஸஞ்சேதனிகம் ஸுக்கவிஸ்ஸட்டி²ம் அப்படிச்ச²ன்னம், ஸோஹம் ஸங்க⁴ம் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா அப்படிச்ச²ன்னாய சா²ரத்தம் மானத்தம் யாசிம், தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா அப்படிச்ச²ன்னாய சா²ரத்தம் மானத்தம் அதா³ஸி. ஸோஹம் மானத்தம் சராமி, வேத³யாமஹம், ப⁴ந்தே ‘வேத³யதீ’தி மம் ஸங்கோ⁴ தா⁴ரேதூ’’தி.

இமஞ்ச பன அத்த²ம் க³ஹேத்வா யாய காயசி பா⁴ஸாய ஆரோசேதும் வட்டதியேவ. ஆரோசேத்வா ஸசே நிக்கி²பிதுகாமோ, வுத்தனயேனேவ ஸங்க⁴மஜ்ஜே² நிக்கி²பிதப்³ப³ம். மாளகதோ பி⁴க்கூ²ஸு நிக்க²ந்தேஸு ஏகஸ்ஸபி ஸந்திகே நிக்கி²பிதும் வட்டதி. மாளகதோ நிக்க²மித்வா ஸதிம் படிலப⁴ந்தேன ஸஹக³ச்ச²ந்தஸ்ஸ ஸந்திகே நிக்கி²பிதப்³ப³ம். ஸசே ஸோபி பக்கந்தோ, அஞ்ஞஸ்ஸ யஸ்ஸ மாளகே நாரோசிதம், தஸ்ஸ ஆரோசேத்வா நிக்கி²பிதப்³ப³ம். ஆரோசேந்தேன பன அவஸானே ‘‘வேத³யதீதி மம் ஆயஸ்மா தா⁴ரேதூ’’தி வத்தப்³ப³ம். த்³வின்னம் ஆரோசேந்தேன ‘‘ஆயஸ்மந்தா தா⁴ரேந்தூ’’தி, திண்ணம் ஆரோசேந்தேன ‘‘ஆயஸ்மந்தோ தா⁴ரேந்தூ’’தி வத்தப்³ப³ம். நிக்கி²த்தகாலதோ பட்டா²ய பகதத்தட்டா²னே திட்ட²தி.

ஸசே அப்பபி⁴க்கு²கோ விஹாரோ ஹோதி, ஸபா⁴கா³ பி⁴க்கூ² வஸந்தி, வத்தம் அனிக்கி²பித்வா அந்தோவிஹாரேயேவ ரத்தியோ க³ணேதப்³பா³. அத² ந ஸக்கா ஸோதே⁴தும், வுத்தனயேனேவ வத்தம் நிக்கி²பித்வா பச்சூஸஸமயே சதூஹி பஞ்சஹி வா பி⁴க்கூ²ஹி ஸத்³தி⁴ம் பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லேட்³டு³பாதே அதிக்கமித்வா மஹாமக்³க³தோ ஓக்கம்ம கு³ம்பே³ன வா வதியா வா படிச்ச²ன்னட்டா²னே நிஸீதி³தப்³ப³ம். அந்தோஅருணேயேவ வுத்தனயேன வத்தம் ஸமாதி³யித்வா ஆரோசேதப்³ப³ம். ஸசே அஞ்ஞோ கோசி பி⁴க்கு² கேனசிதே³வ கரணீயேன தம் டா²னம் ஆக³ச்ச²தி, ஸசே ஏஸ தம் பஸ்ஸதி, ஸத்³த³ம் வாஸ்ஸ ஸுணாதி, ஆரோசேதப்³ப³ம். அனாரோசேந்தஸ்ஸ ரத்திச்சே²தோ³ சேவ வத்தபே⁴தோ³ ச.

அத² த்³வாத³ஸஹத்த²ம் உபசாரம் ஓக்கமித்வா அஜானந்தஸ்ஸேவ க³ச்ச²தி, ரத்திச்சே²தோ³ ஹோதி ஏவ, வத்தபே⁴தோ³ பன நத்தி². ஆரோசிதகாலதோ பட்டா²ய ச ஏகம் பி⁴க்கு²ம் ட²பேத்வா ஸேஸேஹி ஸதி கரணீயே க³ந்தும்பி வட்டதி. அருணே உட்டி²தே தஸ்ஸ பி⁴க்கு²ஸ்ஸ ஸந்திகே வத்தம் நிக்கி²பிதப்³ப³ம். ஸசே ஸோபி கேனசி கம்மேன புரேஅருணேயேவ க³ச்ச²தி, அஞ்ஞம் விஹாரதோ நிக்க²ந்தம் வா ஆக³ந்துகம் வா யம் பட²மம் பஸ்ஸதி, தஸ்ஸ ஸந்திகே ஆரோசேத்வா வத்தம் நிக்கி²பிதப்³ப³ம். அயஞ்ச யஸ்மா க³ணஸ்ஸ ஆரோசேத்வா பி⁴க்கூ²னஞ்ச அத்தி²பா⁴வம் ஸல்லக்கே²த்வாவ வஸி, தேனஸ்ஸ ஊனே க³ணே சரணதோ³ஸோ வா விப்பவாஸோ வா ந ஹோதி. ஸசே ந கஞ்சி பஸ்ஸதி, விஹாரம் க³ந்த்வா அத்தனா ஸத்³தி⁴ம் க³தபி⁴க்கூ²ஸு ஏகஸ்ஸ ஸந்திகே நிக்கி²பிதப்³ப³ந்தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘யம் பட²மம் பஸ்ஸதி, தஸ்ஸ ஆரோசேத்வா நிக்கி²பிதப்³ப³ம்; அயம் நிக்கி²த்தவத்தஸ்ஸ பரிஹாரோ’’தி ஆஹ.

ஏவம் சா²ரத்தம் மானத்தம் அக²ண்ட³ம் சரித்வா யத்த² ஸியா வீஸதிக³ணோ பி⁴க்கு²ஸங்கோ⁴, தத்த² ஸோ பி⁴க்கு² அப்³பே⁴தப்³போ³. அப்³பே⁴ந்தேஹி ச பட²மம் அப்³பா⁴னாரஹோ காதப்³போ³. அயஞ்ஹி நிக்கி²த்தவத்தத்தா பகதத்தட்டா²னே டி²தோ, பகதத்தஸ்ஸ ச அப்³பா⁴னம் காதும் ந வட்டதி, தஸ்மா வத்தம் ஸமாதா³பேதப்³போ³. வத்தே ஸமாதி³ன்னே அப்³பா⁴னாரஹோ ஹோதி. தேனாபி வத்தம் ஸமாதி³யித்வா ஆரோசேத்வா அப்³பா⁴னம் யாசிதப்³ப³ம். அனிக்கி²த்தவத்தஸ்ஸ புன வத்தஸமாதா³னகிச்சம் நத்தி². ஸோ ஹி சா²ரத்தாதிக்கமேனேவ அப்³பா⁴னாரஹோ ஹோதி, தஸ்மா ஸோ அப்³பே⁴தப்³போ³. தத்ர ய்வாயம் ‘‘ஏவஞ்ச பன, பி⁴க்க²வே, அப்³பே⁴தப்³போ³’’தி பாளியம்யேவ அப்³பா⁴னவிதி⁴ வுத்தோ, அயஞ்ச ஏகாபத்திவஸேன வுத்தோ. ஸசே பன த்³வே திஸ்ஸோ ஸம்ப³ஹுலா வா ஏகவத்து²கா வா நானாவத்து²கா வா ஆபத்தியோ ஹோந்தி, தாஸம் வஸேன கம்மவாசா காதப்³பா³. ஏவம் அப்படிச்ச²ன்னமானத்தம் தா³தப்³ப³ம். படிச்ச²ன்னமானத்தம் பன யஸ்மா படிச்ச²ன்னாய ஆபத்தியா பரிவுத்த²பரிவாஸஸ்ஸ தா³தப்³ப³ம் ஹோதி, தஸ்மா நம் பரிவாஸகதா²யம்யேவ கத²யிஸ்ஸாம.

பரிவாஸகதா²

102. ‘‘தேன ஹி, பி⁴க்க²வே, ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் தே³தூ’’திஆதி³னா நயேன பாளியம் அனேகேஹி ஆகாரேஹி பரிவாஸோ ச மானத்தஞ்ச வுத்தம். தஸ்ஸ யஸ்மா ஆக³தாக³தட்டா²னே வினிச்ச²யோ வுச்சமானோ பாளி விய அதிவித்தா²ரம் ஆபஜ்ஜதி, ந ச ஸக்கா ஹோதி ஸுகே²ன பரிக்³க³ஹேதும், தஸ்மா நம் ஸமோதா⁴னேத்வா இதே⁴வ த³ஸ்ஸயிஸ்ஸாம.

அயஞ்ஹி இத⁴ அதி⁴ப்பேதோ பரிவாஸோ நாம – படிச்ச²ன்னபரிவாஸோ, ஸுத்³த⁴ந்தபரிவாஸோ, ஸமோதா⁴னபரிவாஸோதி திவிதோ⁴ ஹோதி. தத்த² படிச்ச²ன்னபரிவாஸோ தாவ யதா²படிச்ச²ன்னாய ஆபத்தியா தா³தப்³போ³. கஸ்ஸசி ஹி ஏகாஹபடிச்ச²ன்னா ஆபத்தி ஹோதி யதா² அயம் உதா³யித்தே²ரஸ்ஸ, கஸ்ஸசி த்³வீஹாதி³படிச்ச²ன்னா யதா² பரதோ ஆக³தா உதா³யித்தே²ரஸ்ஸேவ, கஸ்ஸசி ஏகா ஆபத்தி ஹோதி யதா² அயம், கஸ்ஸசி த்³வே திஸ்ஸோ ததுத்தரி வா யதா² பரதோ ஆக³தா, தஸ்மா படிச்ச²ன்னபரிவாஸம் தே³ந்தேன பட²மம் தாவ படிச்ச²ன்னபா⁴வோ ஜானிதப்³போ³.

அயஞ்ஹி ஆபத்தி நாம த³ஸஹாகாரேஹி படிச்ச²ன்னா ஹோதி. தத்தா²யம் மாதிகா – ஆபத்தி ச ஹோதி ஆபத்திஸஞ்ஞீ ச, பகதத்தோ ச ஹோதி பகதத்தஸஞ்ஞீ ச, அனந்தராயிகோ ச ஹோதி அனந்தராயிகஸஞ்ஞீ ச, பஹு ச ஹோதி பஹுஸஞ்ஞீ ச, சா²தே³துகாமோ ச ஹோதி சா²தே³தி சாதி.

தத்த² ஆபத்தி ச ஹோதி ஆபத்திஸஞ்ஞீ சாதி யம் ஆபன்னோ, ஸா ஆபத்தியேவ ஹோதி. ஸோபி ச தத்த² ஆபத்திஸஞ்ஞீயேவ. இதி ஜானந்தோ சா²தே³தி, ச²ன்னாவ ஹோதி. அத² பனாயம் தத்த² அனாபத்திஸஞ்ஞீ, அச்ச²ன்னா ஹோதி, அனாபத்தி பன ஆபத்திஸஞ்ஞாயபி அனாபத்திஸஞ்ஞாயபி சா²தே³ந்தேனாபி அச்சா²தி³தாவ ஹோதி. லஹுகம் வா க³ருகாதி க³ருகம் வா லஹுகாதி சா²தே³தி, அலஜ்ஜிபக்கே² திட்ட²தி, ஆபத்தி பன அச்ச²ன்னா ஹோதி. க³ருகம் லஹுகாதி மஞ்ஞமானோ தே³ஸேதி, நேவ தே³ஸிதா ஹோதி, ந ச²ன்னா. க³ருகம் க³ருகாதி ஞத்வா சா²தே³தி, ச²ன்னா ஹோதி. க³ருகலஹுகபா⁴வம் ந ஜானாதி, ஆபத்திம் சா²தே³மீதி சா²தே³தி, ச²ன்னாவ ஹோதி.

பகதத்தோதி திவித⁴ம் உக்கே²பனீயகம்மம் அகதோ – ஸோ சே பகதத்தஸஞ்ஞீ ஹுத்வா சா²தே³தி, ச²ன்னா ஹோதி. அத² ‘‘மய்ஹம் ஸங்கே⁴ன கம்மம் கத’’ந்தி அபகதத்தஸஞ்ஞீ ஹுத்வா சா²தே³தி, அச்ச²ன்னா ஹோதி. அபகதத்தேன பகதத்தஸஞ்ஞினா வா அபகதத்தஸஞ்ஞினா வா சா²தி³தாபி அச்ச²ன்னாவ ஹோதி. வுத்தம்பி சேதம் –

‘‘ஆபஜ்ஜதி க³ருகம் ஸாவஸேஸம்,

சா²தே³தி அனாத³ரியம் படிச்ச;

ந பி⁴க்கு²னீ நோ ச பு²ஸேய்ய வஜ்ஜம்,

பஞ்ஹா மேஸா குஸலேஹி சிந்திதா’’தி. (பரி. 481);

அயஞ்ஹி பஞ்ஹோ உக்கி²த்தகேன கதி²தோ.

அனந்தராயிகோதி யஸ்ஸ த³ஸஸு அந்தராயேஸு ஏகோபி நத்தி², ஸோ சே அனந்தராயிகஸஞ்ஞீ ஹுத்வா சா²தே³தி, ச²ன்னா ஹோதி. ஸசேபி ஸோ பீ⁴ருகஜாதிகதாய அந்த⁴காரே அமனுஸ்ஸசண்ட³மிக³ப⁴யேன அந்தராயிகஸஞ்ஞீ ஹுத்வா சா²தே³தி, அச்ச²ன்னாவ ஹோதி. யஸ்ஸ ஹி பப்³ப³தவிஹாரே வஸந்தஸ்ஸ கந்த³ரம் வா நதி³ம் வா அதிக்கமித்வா ஆரோசேதப்³ப³ம் ஹோதி, அந்தராமக்³கே³ ச சண்ட³வாளஅமனுஸ்ஸாதி³ப⁴யம் அத்தி², மக்³கே³ அஜக³ரா நிபஜ்ஜந்தி, நதீ³ பூரா ஹோதி, ஏகஸ்மிம் பன ஸதியேவ அந்தராயே அந்தராயிகஸஞ்ஞீ ஹுத்வா சா²தே³தி, அச்ச²ன்னாவ ஹோதி. அந்தராயிகஸ்ஸ பன அந்தராயிகஸஞ்ஞாய வா அனந்தராயிகஸஞ்ஞாய வா சா²த³யதோ அச்ச²ன்னாவ ஹோதி.

பஹூதி யோ ஸக்கோதி பி⁴க்கு²னோ ஸந்திகம் க³ந்துஞ்சேவ ஆரோசேதுஞ்ச; ஸோ சே பஹுஸஞ்ஞீ ஹுத்வா சா²தே³தி, ச²ன்னா ஹோதி. ஸசஸ்ஸ முகே² அப்பமத்தகோ க³ண்டோ³ வா ஹோதி, ஹனுகவாதோ வா விஜ்ஜ²தி, த³ந்தோ வா ருஜ்ஜதி, பி⁴க்கா² வா மந்தா³ லத்³தா⁴ ஹோதி, தாவதகேன பன நேவ வத்தும் ந ஸக்கோதி ந க³ந்தும்; அபிச கோ² ந ஸக்கோமீதி ஸஞ்ஞீ ஹோதி, அயம் பஹு ஹுத்வா அப்பஹுஸஞ்ஞீ நாம. இமினா சா²தி³தாபி அச்சா²தி³தா. அப்பஹுனா பன வத்தும் வா க³ந்தும் வா அஸமத்தே²ன பஹுஸஞ்ஞினா வா அப்பஹுஸஞ்ஞினா வா சா²தி³தா ஹோது, அச்சா²தி³தாவ.

சா²தே³துகாமோ ச ஹோதி சா²தே³தி சாதி இத³ம் உத்தானத்த²மேவ. ஸசே பன சா²தே³ஸ்ஸாமீதி து⁴ரனிக்கே²பம் கத்வா புரேப⁴த்தே வா பச்சா²ப⁴த்தே வா பட²மயாமாதீ³ஸு வா லஜ்ஜித⁴ம்மம் ஓக்கமித்வா அந்தோஅருணேயேவ ஆரோசேதி, அயம் சா²தே³துகாமோ ந சா²தே³தி நாம.

யஸ்ஸ பன அபி⁴க்கு²கே டா²னே வஸந்தஸ்ஸ ஆபத்திம் ஆபஜ்ஜித்வா ஸபா⁴க³ஸ்ஸ பி⁴க்கு²னோ ஆக³மனம் ஆக³மேந்தஸ்ஸ ஸபா⁴க³ஸந்திகம் வா க³ச்ச²ந்தஸ்ஸ அத்³த⁴மாஸோபி மாஸோபி அதிக்கமதி, அயம் ந சா²தே³துகாமோ சா²தே³தி நாம, அயம்பி அச்ச²ன்னாவ ஹோதி.

யோ பன ஆபன்னமத்தோவ அக்³கி³ம் அக்கந்தபுரிஸோ விய ஸஹஸா அபக்கமித்வா ஸபா⁴க³ட்டா²னம் க³ந்த்வா ஆவி கரோதி, அயம் ந சா²தே³துகாமோவ ந சா²தே³தி நாம. ஸசே பன ஸபா⁴க³ம் தி³ஸ்வாபி ‘‘அயம் மே உபஜ்ஜா²யோ வா ஆசரியோ வா’’தி லஜ்ஜாய நாரோசேதி, ச²ன்னாவ ஹோதி ஆபத்தி. உபஜ்ஜா²யாதி³பா⁴வோ ஹி இத⁴ அப்பமாணம் அவேரிஸபா⁴க³மத்தமேவ பமாணம், தஸ்மா அவேரிஸபா⁴க³ஸ்ஸ ஸந்திகே ஆரோசேதப்³பா³.

யோ பன விஸபா⁴கோ³ ஹோதி ஸுத்வா பகாஸேதுகாமோ, ஏவரூபஸ்ஸ உபஜ்ஜா²யஸ்ஸாபி ஸந்திகே ந ஆரோசேதப்³பா³. தத்த² புரேப⁴த்தம் வா ஆபத்திம் ஆபன்னோ ஹோது பச்சா²ப⁴த்தம் வா, தி³வா வா ரத்திம் வா யாவ அருணம் ந உக்³க³ச்ச²தி தாவ ஆரோசேதப்³ப³ம். உத்³த⁴ஸ்தே அருணே படிச்ச²ன்னா ஹோதி, படிச்சா²த³னபச்சயா ச து³க்கடம் ஆபஜ்ஜதி. ஸபா⁴க³ஸங்கா⁴தி³ஸேஸம் ஆபன்னஸ்ஸ பன ஸந்திகே ஆவி காதும் ந வட்டதி. ஸசே ஆவி கரோதி, ஆபத்தி ஆவிகதா ஹோதி, து³க்கடா பன ந முச்சதி, தஸ்மா ஸுத்³த⁴ஸ்ஸ ஸந்திகே ஆவிகாதப்³பா³. ஆவிகரோந்தோ ச ‘‘துய்ஹம் ஸந்திகே ஏகம் ஆபத்திம் ஆவிகரோமீ’’தி வா ‘‘ஆசிக்கா²மீ’’தி வா ‘‘ஆரோசேமீ’’தி வா ‘‘மம ஏகம் ஆபத்திம் ஆபன்னபா⁴வம் ஜானாஹீ’’தி வா வத³து, ‘‘ஏகம் க³ருகாபத்திம் ஆவிகரோமீ’’திஆதி³னா வா நயேன வத³து, ஸப்³பே³ஹிபி ஆகாரேஹி அப்படிச்ச²ன்னாவ ஹோதீதி குருந்தி³யம் வுத்தம். ஸசே பன லஹுகாபத்திம் ஆவிகரோமீதிஆதி³னா நயேன வத³தி, படிச்ச²ன்னா ஹோதி, வத்து²ம் ஆரோசேதி, ஆபத்திம் ஆரோசேதி, உப⁴யம் ஆரோசேதி, திவிதே⁴னாபி ஆரோசிதாவ ஹோதி. இதி இமானி த³ஸ காரணானி உபலக்கே²த்வா படிச்ச²ன்னபரிவாஸம் தே³ந்தேன பட²மமேவ படிச்ச²ன்னபா⁴வோ ஜானிதப்³போ³.

ததோ படிச்ச²ன்னதி³வஸே ச ஆபத்தியோ ச ஸல்லக்கே²த்வா ஸசே ஏகாஹபடிச்ச²ன்னா ஹோதி – ‘‘அஹம், ப⁴ந்தே, ஏகம் ஆபத்திம் ஆபஜ்ஜிம் ஸஞ்சேதனிகம் ஸுக்கவிஸ்ஸட்டி²ம் ஏகாஹபடிச்ச²ன்ன’’ந்தி ஏவம் யாசாபேத்வா இத⁴ வுத்தனயேனேவ கம்மவாசம் வத்வா பரிவாஸோ தா³தப்³போ³. அத² த்³வீஹதீஹாதி³படிச்ச²ன்னா ஹோதி, த்³வீஹபடிச்ச²ன்னம் தீஹபடிச்ச²ன்னம் சதூஹபடிச்ச²ன்னம் பஞ்சாஹபடிச்ச²ன்னம் சா²ஹபடிச்ச²ன்னம் ஸத்தாஹபடிச்ச²ன்னம் அட்டா²ஹபடிச்ச²ன்னம் நவாஹபடிச்ச²ன்னம் த³ஸாஹபடிச்ச²ன்னம் ஏகாத³ஸாஹபடிச்ச²ன்னம் த்³வாத³ஸாஹபஅச்ச²ன்னம் தேரஸாஹபடிச்ச²ன்னம் சுத்³த³ஸாஹபடிச்ச²ன்னந்தி ஏவம் யாவ சுத்³த³ஸ தி³வஸானி தி³வஸவஸேன யோஜனா காதப்³பா³. பஞ்சத³ஸ தி³வஸானி படிச்ச²ன்னாய பக்க²படிச்ச²ன்னந்தி வத்வா யோஜனா காதப்³பா³. ததோ யாவ ஏகூனதிம்ஸதிமோ தி³வஸோ, தாவ அதிரேகபக்க²படிச்ச²ன்னந்தி.

ததோ மாஸபடிச்ச²ன்னம் அதிரேகமாஸபடிச்ச²ன்னம் த்³வேமாஸபடிச்ச²ன்னம் அதிரேகத்³வேமாஸபடிச்ச²ன்னம் தேமாஸபடிச்ச²ன்னம் அதிரேகதேமாஸபடிச்ச²ன்னம் சதுமாஸபடிச்ச²ன்னம் அதிரேகசதுமாஸபடிச்ச²ன்னம் பஞ்சமாஸபடிச்ச²ன்னம் அதிரேகபஞ்சமாஸபடிச்ச²ன்னம் ச²மாஸபடிச்ச²ன்னம் அதிரேகச²மாஸபடிச்ச²ன்னம் ஸத்தமாஸபடிச்ச²ன்னம் அதிரேகஸத்தமாஸபடிச்ச²ன்னம் அட்ட²மாஸபடிச்ச²ன்னம் அதிரேகஅட்ட²மாஸபடிச்ச²ன்னம் நவமாஸபடிச்ச²ன்னம் அதிரேகனவமாஸபடிச்ச²ன்னம் த³ஸமாஸபடிச்ச²ன்னம் அதிரேகத³ஸமாஸபடிச்ச²ன்னம் ஏகாத³ஸமாஸபடிச்ச²ன்னம் அதிரேகஏகாத³ஸமாஸபடிச்ச²ன்னந்தி ஏவம் யோஜனா காதப்³பா³. ஸம்வச்ச²ரே பரிபுண்ணே ஏகஸம்வச்ச²ரபடிச்ச²ன்னந்தி. ததோ பரம் அதிரேகஏகஸம்வச்ச²ர… த்³வேஸம்வச்ச²ர… அதிரேகத்³வேஸம்வச்ச²ர… திஸம்வச்ச²ர… அதிரகேதிஸம்வச்ச²ர… சதுஸம்வச்ச²ர… அதிரேகசதுஸம்வச்ச²ர… பஞ்சஸம்வச்ச²ர… அதிரேகபஞ்சஸம்வச்ச²ரபடிச்ச²ன்னந்தி ஏவம் யாவ ஸட்டி²ஸம்வச்ச²ர… அதிரேகஸட்டி²ஸம்வச்ச²ரபடிச்ச²ன்னந்தி வா ததோ வா பி⁴ய்யோபி வத்வா யோஜனா காதப்³பா³.

ஸசே பன த்³வே திஸ்ஸோ ததுத்தரி வா ஆபத்தியோ ஹோந்தி, யதா² இத⁴ ஏகம் ஆபத்திந்தி வுத்தம்; ஏவம் த்³வே ஆபத்தியோ திஸ்ஸோ ஆபத்தியோதி வத்தப்³ப³ம். ததோ பரம் பன ஸதம் வா ஹோது ஸஹஸ்ஸம் வா, ஸம்ப³ஹுலாதி வத்தும் வட்டதி. நானாவத்து²காஸுபி ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் – ஏகம் ஸுக்கவிஸ்ஸட்டி²ம், ஏகம் காயஸம்ஸக்³க³ம், ஏகம் து³ட்டு²ல்லவாசம், ஏகம் அத்தகாமம், ஏகம் ஸஞ்சரித்தம், ஏகாஹபடிச்ச²ன்னாயோ’’தி ஏவம் க³ணனவஸேன வா ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் நானாவத்து²காயோ ஏகாஹபடிச்ச²ன்னாயோ’’தி ஏவம் வத்து²கித்தனவஸேன வா, ‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் ஏகாஹபடிச்ச²ன்னாயோ’’தி ஏவம் நாமமத்தவஸேன வா யோஜனா காதப்³பா³.

தத்த² நாமம் து³வித⁴ம் – ஸஜாதிஸாதா⁴ரணஞ்ச ஸப்³ப³ஸாதா⁴ரணஞ்ச. தத்த² ஸங்கா⁴தி³ஸேஸோதி ஸஜாதிஸாதா⁴ரணம், ஆபத்தீதி ஸப்³ப³ஸாதா⁴ரணம்; தஸ்மா ‘‘ஸம்ப³ஹுலா ஆபத்தியோ ஆபஜ்ஜிம் ஏகாஹபடிச்ச²ன்னாயோ’’தி ஏவம் ஸப்³ப³ஸாதா⁴ரணனாமவஸேனபி வத்தும் வட்டதி. இத³ஞ்ஹி ஸப்³ப³ம்பி பரிவாஸாதி³கம் வினயகம்மம் வத்து²வஸேன கோ³த்தவஸேன நாமவஸேன ஆபத்திவஸேன ச காதும் வட்டதியேவ.

தத்த² ‘‘ஸுக்கவிஸ்ஸட்டீ²’’தி வத்து² சேவ கோ³த்தஞ்ச. ‘‘ஸங்கா⁴தி³ஸேஸோ’’தி நாமஞ்சேவ ஆபத்தி ச. ‘‘காயஸம்ஸக்³கோ³’’தி வத்து² சேவ கோ³த்தஞ்ச. ‘‘ஸங்கா⁴தி³ஸேஸோ’’தி நாமஞ்சேவ ஆபத்தி ச, தத்த² ‘‘ஸுக்கவிஸ்ஸட்டி²ம் காயஸம்ஸக்³க³’’ந்திஆதி³னா வசனேனாபி ‘‘நானாவத்து²காயோ’’தி வசனேனாபி வத்து² சேவ கோ³த்தஞ்ச க³ஹிதம் ஹோதி. ‘‘ஸங்கா⁴தி³ஸேஸோ’’தி வசனேனாபி ‘‘ஆபத்தியோ’’தி வசனேனாபி நாமஞ்சேவ ஆபத்தி ச க³ஹிதா ஹோதி. இத⁴ பன ஏகம் ஆபத்திம் ஆபஜ்ஜிம் ஸஞ்சேதனிகம் ‘‘ஸுக்கவிஸ்ஸட்டி²’’ந்தி நாமம்பி வத்து²கோ³த்தானிபி க³ஹிதானேவ. யதா² ச இத⁴ ‘‘அயம் உதா³யி பி⁴க்கூ²’’தி வுத்தம்; ஏவம் யோ யோ ஆபன்னோ ஹோதி, தஸ்ஸ தஸ்ஸ நாமம் க³ஹேத்வா ‘‘அயம் இத்த²ன்னாமோ பி⁴க்கூ²’’தி கம்மவாசா காதப்³பா³.

கம்மவாசாபரியோஸானே ச தேன பி⁴க்கு²னா மாளகஸீமாயமேவ ‘‘பரிவாஸம் ஸமாதி³யாமி, வத்தம் ஸமாதி³யாமீ’’தி வுத்தனயேனேவ வத்தம் ஸமாதா³தப்³ப³ம். ஸமாதி³யித்வா தத்தே²வ ஸங்க⁴ஸ்ஸ ஆரோசேதப்³ப³ம், ஆரோசேந்தேன ச ஏவம் ஆரோசேதப்³ப³ம் –

‘‘அஹம், ப⁴ந்தே, ஏகம் ஆபத்திம் ஆபஜ்ஜிம் ஸஞ்சேதனிகம் ஸுக்கவிஸ்ஸட்டி²ம் ஏகாஹபடிச்ச²ன்னம், ஸோஹம் ஸங்க⁴ம் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் யாசிம், தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் அதா³ஸி, ஸோஹம் பரிவஸாமி – ‘வேத³யாமஹம், ப⁴ந்தே, வேத³யதீ’தி மம் ஸங்கோ⁴ தா⁴ரேதூ’’தி.

இமஞ்ச பனத்த²ம் க³ஹேத்வா யாய காயசி பா⁴ஸாய ஆரோசேதும் வட்டதியேவ. ஆரோசேத்வா ஸசே நிக்கி²பிதுகாமோ, வுத்தனயேனேவ ஸங்க⁴மஜ்ஜே² நிக்கி²பிதப்³ப³ம். மாளகதோ பி⁴க்கூ²ஸு நிக்க²ந்தேஸு ஏகஸ்ஸாபி ஸந்திகே நிக்கி²பிதும் வட்டதி. மாளகதோ நிக்க²மித்வா ஸதிம் படிலப⁴ந்தேன ஸஹக³ச்ச²ந்தஸ்ஸ ஸந்திகே நிக்கி²பிதப்³ப³ம். ஸசே ஸோபி பக்கந்தோ, அஞ்ஞஸ்ஸ யஸ்ஸ மாளகே நாரோசிதம், தஸ்ஸ ஆரோசேத்வா நிக்கி²பிதப்³ப³ம். ஆரோசேந்தேன ச அவஸானே ‘‘வேத³யதீதி மம் ஆயஸ்மா தா⁴ரேதூ’’தி வத்தப்³ப³ம். த்³வின்னம் ஆரோசேந்தேன ‘‘ஆயஸ்மந்தா தா⁴ரேந்தூ’’தி, திண்ணம் ஆரோசேந்தேன ‘‘ஆயஸ்மந்தோ தா⁴ரேந்தூ’’தி வத்தப்³ப³ம். நிக்கி²த்தகாலதோ பட்டா²ய பகதத்தட்டா²னே திட்ட²தி.

ஸசே அப்பபி⁴க்கு²கோ விஹாரோ ஹோதி, ஸபா⁴கா³ பி⁴க்கூ² வஸந்தி, வத்தம் அனிக்கி²பித்வா விஹாரேயேவ ரத்திபரிக்³க³ஹோ காதப்³போ³. அத² ந ஸக்கா ஸோதே⁴தும், வுத்தனயேனேவ வத்தம் நிக்கி²பித்வா பச்சூஸஸமயே ஏகேன பி⁴க்கு²னா ஸத்³தி⁴ம் மானத்தவண்ணனாயம் வுத்தனயேனேவ உபசாரஸீமம் அதிக்கமித்வா மஹாமக்³கா³ ஓக்கம்ம படிச்ச²ன்னே டா²னே நிஸீதி³த்வா அந்தோஅருணேயேவ வுத்தனயேனேவ வத்தம் ஸமாதி³யித்வா தஸ்ஸ பி⁴க்கு²னோ பரிவாஸோ ஆரோசேதப்³போ³. ஆரோசேந்தேன ஸசே நவகதரோ ஹோதி, ‘‘ஆவுஸோ’’தி வத்தப்³ப³ம். ஸசே வுட்³ட⁴தரோ, ‘‘ப⁴ந்தே’’தி வத்தப்³ப³ம். ஸசே அஞ்ஞோ கோசி பி⁴க்கு² கேனசிதே³வ கரணீயேன தம் டா²னம் ஆக³ச்ச²தி, ஸசே ஏஸ தம் பஸ்ஸதி, ஸத்³த³ம் வாஸ்ஸ ஸுணாதி, ஆரோசேதப்³ப³ம்; அனாரோசேந்தஸ்ஸ ரத்திச்சே²தோ³ சேவ வத்தபே⁴தோ³ ச. அத² த்³வாத³ஸஹத்த²ம் உபசாரம் ஓக்கமித்வா அஜானந்தஸ்ஸேவ க³ச்ச²தி, ரத்திச்சே²தோ³யேவ ஹோதி, வத்தபே⁴தோ³ பன நத்தி².

உக்³க³தே அருணே வத்தம் நிக்கி²பிதப்³ப³ம். ஸசே ஸோ பி⁴க்கு² கேனசிதே³வ கரணீயேன பக்கந்தோ ஹோதி, யம் அஞ்ஞம் ஸப்³ப³பட²மம் பஸ்ஸதி, தஸ்ஸ ஆரோசேத்வா நிக்கி²பிதப்³ப³ம். ஸசே பன கஞ்சி ந பஸ்ஸதி, விஹாரம் க³ந்த்வா அத்தனா ஸத்³தி⁴ம் க³தபி⁴க்கு²ஸ்ஸ ஸந்திகே நிக்கி²பிதப்³ப³ந்தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘யம் பட²மம் பஸ்ஸதி, தஸ்ஸ ஆரோசேத்வா நிக்கி²பிதப்³ப³ம், அயம் நிக்கி²த்தவத்தஸ்ஸ பரிஹாரோ’’தி ஆஹ.

ஏவம் யத்தகானி தி³வஸானி ஆபத்தி படிச்ச²ன்னா ஹோதி, தத்தகானி ததோ அதி⁴கதரானி வா குக்குச்சவினோத³னத்தா²ய பரிவஸித்வா ஸங்க⁴ம் உபஸங்கமித்வா வத்தம் ஸமாதி³யித்வா மானத்தம் யாசிதப்³ப³ம். அயஞ்ஹி வத்தே ஸமாதி³ன்னே ஏவ மானத்தாரஹோ ஹோதி நிக்கி²த்தவத்தேன பரிவுத்த²த்தா. அனிக்கி²த்தவத்தஸ்ஸ பன புன ஸமாதா³னகிச்சம் நத்தி², ஸோ ஹி படிச்ச²ன்னதி³வஸாதிக்கமேனேவ மானத்தாரஹோ ஹோதி, தஸ்மா தஸ்ஸ மானத்தம் தா³தப்³ப³மேவ. இத³ம் படிச்ச²ன்னமானத்தம் நாம. தம் தே³ந்தேன ஸசே ஏகாபத்தி ஹோதி, பாளியம் வுத்தனயேனேவ தா³தப்³ப³ம். அத² த்³வே வா திஸ்ஸோ வா ‘‘ஸோஹம் பரிவுத்த²பரிவாஸோ ஸங்க⁴ம் த்³வின்னம் ஆபத்தீனம் திஸ்ஸன்னம் ஆபத்தீனம் ஏகாஹபடிச்ச²ன்னானம் சா²ரத்தம் மானத்தம் யாசாமீ’’தி பரிவாஸே வுத்தனயேனேவ ஆபத்தியோ ச தி³வஸே ச ஸல்லக்கே²த்வா யோஜனா காதப்³பா³.

அப்படிச்ச²ன்னாபத்திம் படிச்ச²ன்னாபத்தியா ஸமோதா⁴னேத்வாபி தா³தும் வட்டதி. கத²ம்? படிச்ச²ன்னாய ஏகாஹபரிவாஸம் வஸித்வா –

‘‘அஹம், ப⁴ந்தே, ஏகம் ஆபத்திம் ஆபஜ்ஜிம் ஸஞ்சேதனிகம் ஸுக்கவிஸ்ஸட்டி²ம் ஏகாஹபடிச்ச²ன்னம், ஸோஹம் ஸங்க⁴ம் ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் யாசிம், தஸ்ஸ மே ஸங்கோ⁴ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் அதா³ஸி, ஸோஹம் பரிவுத்த²பரிவாஸோ. அஹம், ப⁴ந்தே, ஏகம் ஆபத்திம் ஆபஜ்ஜிம் ஸஞ்சேதனிகம் ஸுக்கவிஸ்ஸட்டி²ம் அப்படிச்ச²ன்னம். ஸோஹம், ப⁴ந்தே, ஸங்க⁴ம் தாஸம் ஆபத்தீனம் ஸஞ்சேதனிகானம் ஸுக்கவிஸ்ஸட்டீ²னம் படிச்ச²ன்னாய ச அப்படிச்ச²ன்னாய ச சா²ரத்தம் மானத்தம் யாசாமீ’’தி.

அத²ஸ்ஸ தத³னுரூபம் கம்மவாசம் கத்வா மானத்தம் தா³தப்³ப³ம். ஸசே படிச்ச²ன்னா த்³வே, அப்படிச்ச²ன்னா ஏகா ‘‘படிச்ச²ன்னானஞ்ச அப்படிச்ச²ன்னாய சா’’தி வத்தப்³ப³ம். அத² படிச்ச²ன்னா ஏகா, அப்படிச்ச²ன்னா த்³வே, ‘‘படிச்ச²ன்னாய ச அப்படிச்ச²ன்னானஞ்சா’’தி வத்தப்³ப³ம். ஸசே படிச்ச²ன்னாபி த்³வே, அப்படிச்ச²ன்னாபி த்³வே, ‘‘படிச்ச²ன்னானஞ்ச அப்படிச்ச²ன்னானஞ்சா’’தி வத்தப்³ப³ம். ஸப்³ப³த்த² அனுரூபம் கம்மவாசம் கத்வா மானத்தம் தா³தப்³ப³ம். சிண்ணமானத்தஸ்ஸ ச தத³னுரூபமேவ கம்மவாசம் கத்வா அப்³பா⁴னம் காதப்³ப³ம். இத⁴ பன ஏகாபத்திவஸேன வுத்தம். இதி யம் படிச்ச²ன்னாய ஆபத்தியா பரிவாஸாவஸானே மானத்தம் தி³ய்யதி, இத³ம் படிச்ச²ன்னமானத்தம் நாம. ஏவமேத்த² ஏகேனேவ யோஜனாமுகே²ன படிச்ச²ன்னபரிவாஸோ ச படிச்ச²ன்னமானத்தஞ்ச வுத்தந்தி வேதி³தப்³ப³ம். பக்க²மானத்தம் ஸமோதா⁴னமானத்தஞ்ச அவஸேஸபரிவாஸகதா²வஸானே கத²யிஸ்ஸாம.

ஸுத்³த⁴ந்தபரிவாஸோ ஸமோதா⁴னபரிவாஸோதி ஹி த்³வே பரிவாஸா அவஸேஸா. தத்த² ‘‘ஸுத்³த⁴ந்தபரிவாஸோ’’ நாம பரதோ அத⁴ம்மிகமானத்தசாராவஸானே ‘‘தேன கோ² பன ஸமயேன அஞ்ஞதரோ பி⁴க்கு² ஸம்ப³ஹுலா ஸங்கா⁴தி³ஸேஸா ஆபத்தியோ ஆபன்னோ ஹோதி, ஆபத்திபரியந்தம் ந ஜானாதி, ரத்திபரியந்தம் ந ஜானாதீ’’தி இமஸ்மிம் வத்து²ஸ்மிம் அனுஞ்ஞாதபரிவாஸோ. ஸோ து³விதோ⁴ – சூளஸுத்³த⁴ந்தோ, மஹாஸுத்³த⁴ந்தோதி. து³விதோ⁴பி சேஸ ரத்திபரிச்சே²த³ம் ஸகலம் வா ஏகச்சம் வா அஜானந்தஸ்ஸ ச அஸ்ஸரந்தஸ்ஸ ச தத்த² வேமதிகஸ்ஸ ச தா³தப்³போ³. ஆபத்திபரியந்தம் பன ஏத்தகா அஹம் ஆபத்தியோ ஆபன்னோதி ஜானாது வா மா வா, அகாரணமேதம்.

தத்த² யோ உபஸம்பத³தோ பட்டா²ய அனுலோமக்கமேன வா ஆரோசிததி³வஸதோ பட்டா²ய படிலோமக்கமேன வா ‘‘அஸுகஞ்ச அஸுகஞ்ச தி³வஸம் வா பக்க²ம் வா மாஸம் வா ஸம்வச்ச²ரம் வா தவ ஸுத்³த⁴பா⁴வம் ஜானாஸீ’’தி புச்சி²யமானோ ‘‘ஆம, ப⁴ந்தே, ஜானாமி, ஏத்தகம் நாம காலம் அஹம் ஸுத்³தோ⁴’’தி வத³தி, தஸ்ஸ தி³ன்னோ ஸுத்³த⁴ந்தபரிவாஸோ ‘‘சூளஸுத்³த⁴ந்தோ’’தி வுச்சதி.

தம் க³ஹேத்வா பரிவஸந்தேன யத்தகம் காலம் அத்தனோ ஸுத்³தி⁴ம் ஜானாதி, தத்தகம் அபனேத்வா அவஸேஸம் மாஸம் வா த்³வேமாஸம் வா பரிவஸிதப்³ப³ம். ஸசே மாஸமத்தம் அஸுத்³தோ⁴ம்ஹீதி ஸல்லக்கே²த்வா அக்³க³ஹேஸி பரிவஸந்தோ ச புன அஞ்ஞம் மாஸம் ஸரதி, தம்பி மாஸம் பரிவஸிதப்³ப³மேவ. புன பரிவாஸதா³னகிச்சம் நத்தி². அத² த்³வேமாஸம் அஸுத்³தோ⁴ம்ஹீதி ஸல்லக்கே²த்வா அக்³க³ஹேஸி, பரிவஸந்தோ ச மாஸமத்தமேவாஹம் அஸுத்³தோ⁴ம்ஹீதி ஸன்னிட்டா²னம் கரோதி, மாஸமேவ பரிவஸிதப்³ப³ம். புன பரிவாஸதா³னகிச்சம் நத்தி². அயஞ்ஹி ஸுத்³த⁴ந்தபரிவாஸோ நாம உத்³த⁴ம்பி ஆரோஹதி, ஹேட்டா²பி ஓரோஹதி, இத³மஸ்ஸ லக்க²ணம். அஞ்ஞஸ்மிம் பன ஆபத்திவுட்டா²னே இத³ம் லக்க²ணம் – யோ அப்படிச்ச²ன்னம் ஆபத்திம் படிச்ச²ன்னாதி வினயகம்மம் கரோதி, தஸ்ஸ ஆபத்தி வுட்டா²தி. யோ படிச்ச²ன்னம் அப்படிச்ச²ன்னாதி வினயகம்மம் கரோதி, தஸ்ஸ ந வுட்டா²தி. அசிரபடிச்ச²ன்னம் சிரபடிச்ச²ன்னாதி கரோந்தஸ்ஸாபி வுட்டா²தி. சிரபடிச்ச²ன்னம் அசிரபடிச்ச²ன்னாதி கரோந்தஸ்ஸ ந வுட்டா²தி. ஏகம் ஆபத்திம் ஆபஜ்ஜித்வா ஸம்ப³ஹுலாதி கரோந்தஸ்ஸாபி வுட்டா²தி, ஏகம் வினா ஸம்ப³ஹுலானம் அபா⁴வதோ. ஸம்ப³ஹுலா பன ஆபஜ்ஜித்வா ஏகம் ஆபஜ்ஜிந்தி கரோந்தஸ்ஸ ந வுட்டா²தி.

யோ பன யதா²வுத்தேன அனுலோமபடிலோமனயேன புச்சி²யமானோபி ரத்திபரியந்தம் ந ஜானாதி நேவ ஸரதி வேமதிகோ வா ஹோதி, தஸ்ஸ தி³ன்னோ ஸுத்³த⁴ந்தபரிவாஸோ ‘‘மஹாஸுத்³த⁴ந்தோ’’தி வுச்சதி. தம் க³ஹேத்வா க³ஹிததி³வஸதோ பட்டா²ய யாவ உபஸம்பத³தி³வஸோ, தாவ ரத்தியோ க³ணேத்வா பரிவஸிதப்³ப³ம். அயம் உத்³த⁴ம் நாரோஹதி, ஹேட்டா² பன ஓரோஹதி. தஸ்மா ஸசே பரிவஸந்தோ ரத்திபரிச்சே²தே³ ஸன்னிட்டா²னம் கரோதி, மாஸோ வா ஸம்வச்ச²ரோ வா மய்ஹம் ஆபன்னஸ்ஸாதி மாஸம் வா ஸம்வச்ச²ரம் வா பரிவஸிதப்³ப³ம். பரிவாஸயாசனதா³னலக்க²ணம் பனேத்த² பரதோ பாளியம் ஆக³தனயேனேவ வேதி³தப்³ப³ம். கம்மவாசாபரியோஸானே வத்தஸமாதா³னமானத்தஅப்³பா⁴னானி வுத்தனயானேவ. அயம் ஸுத்³த⁴ந்தபரிவாஸோ நாம.

‘‘ஸமோதா⁴னபரிவாஸோ’’ நாம திவிதோ⁴ ஹோதி – ஓதா⁴னஸமோதா⁴னோ, அக்³க⁴ஸமோதா⁴னோ, மிஸ்ஸகஸமோதா⁴னோதி. தத்த² ‘‘ஓதா⁴னஸமோதா⁴னோ’’ நாம – அந்தராபத்திம் ஆபஜ்ஜித்வா படிச்சா²தே³ந்தஸ்ஸ பரிவுத்த²தி³வஸே ஓது⁴னித்வா மக்கே²த்வா புரிமாய ஆபத்தியா மூலதி³வஸபரிச்சே²தே³ பச்சா² ஆபன்னம் ஆபத்திம் ஸமோத³ஹித்வா தா³தப்³ப³பரிவாஸோ வுச்சதி. ஸோ பரதோ ‘‘தேன ஹி பி⁴க்க²வே ஸங்கோ⁴ உதா³யிம் பி⁴க்கு²ம் அந்தரா ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா பஞ்சாஹபடிச்ச²ன்னாய மூலாய படிகஸ்ஸித்வா புரிமாய ஆபத்தியா ஸமோதா⁴னபரிவாஸம் தே³தூ’’தி இதோ பட்டா²ய வித்தா²ரதோ பாளியம்யேவ ஆக³தோ.

அயம் பனேத்த² வினிச்ச²யோ – யோ படிச்ச²ன்னாய ஆபத்தியா பரிவாஸம் க³ஹேத்வா பரிவஸந்தோ வா மானத்தாரஹோ வா மானத்தம் சரந்தோ வா அப்³பா⁴னாரஹோ வா அஞ்ஞம் ஆபத்திம் ஆபஜ்ஜித்வா புரிமாய ஆபத்தியா ஸமா வா ஊனதரா வா ரத்தியோ படிச்சா²தே³தி, தஸ்ஸ மூலாயபடிகஸ்ஸனேன தே பரிவுத்த²தி³வஸே ச மானத்தசிண்ணதி³வஸே ச ஸப்³பே³ ஓது⁴னித்வா அதி³வஸே கத்வா பச்சா² ஆபன்னாபத்திம் மூலாபத்தியம் ஸமோதா⁴ய பரிவாஸோ தா³தப்³போ³. தேன ஸசே மூலாபத்தி பக்க²படிச்ச²ன்னா, அந்தராபத்தி ஊனகபக்க²படிச்ச²ன்னா, புன பக்க²மேவ பரிவாஸோ பரிவஸிதப்³போ³. அதா²பி அந்தராபத்தி பக்க²படிச்ச²ன்னாவ பக்க²மேவ பரிவஸிதப்³ப³ம். ஏதேனுபாயேன யாவ ஸட்டி²வஸ்ஸபடிச்ச²ன்னா மூலாபத்தி, தாவ வினிச்ச²யோ வேதி³தப்³போ³. ஸட்டி²வஸ்ஸானி பரிவஸித்வா மானத்தாரஹோ ஹுத்வாபி ஹி ஏகதி³வஸம் அந்தராபத்திம் படிச்சா²தே³த்வா புனபி ஸட்டி²வஸ்ஸானி பரிவாஸாரஹோ ஹோதி.

ஸசே பன அந்தராபத்தி மூலாபத்திதோ அதிரேகபடிச்ச²ன்னா ஹோதி, தத்த² ‘‘கிம் காதப்³ப³’’ந்தி வுத்தே மஹாஸுமத்தே²ரோ ஆஹ – ‘‘அதேகிச்சோ² அயம் புக்³க³லோ, அதேகிச்சோ² நாம ஆவிகாராபேத்வா விஸ்ஸஜ்ஜேதப்³போ³’’தி. மஹாபது³மத்தே²ரோ பனாஹ – ‘‘கஸ்மா அதேகிச்சோ² நாம, நனு அயம் ஸமுச்சயக்க²ந்த⁴கோ நாம பு³த்³தா⁴னம் டி²தகாலஸதி³ஸோ, ஆபத்தி நாம படிச்ச²ன்னா வா ஹோது அப்படிச்ச²ன்னா வா ஸமகஊனதரஅதிரேகபடிச்ச²ன்னா வா வினயத⁴ரஸ்ஸ கம்மவாசம் யோஜேதும் ஸமத்த²பா⁴வோயேவேத்த² பமாணம், தஸ்மா யா அதிரேகபடிச்ச²ன்னா ஹோதி, தம் மூலாபத்திம் கத்வா தத்த² இதரம் ஸமோதா⁴ய பரிவாஸோ தா³தப்³போ³’’தி. அயம் ‘‘ஓதா⁴னஸமோதா⁴னோ’’ நாம.

‘‘அக்³க⁴ஸமோதா⁴னோ’’ நாம ஸம்ப³ஹுலாஸு ஆபத்தீஸு யா ஏகா வா த்³வே வா திஸ்ஸோ வா ஸம்ப³ஹுலா வா ஆபத்தியோ ஸப்³ப³சிரபடிச்ச²ன்னாயோ, தாஸம் அக்³கே⁴ன ஸமோதா⁴ய தாஸம் ரத்திபரிச்சே²த³வஸேன அவஸேஸானம் ஊனதரபடிச்ச²ன்னானம் ஆபத்தீனம் பரிவாஸோ தி³ய்யதி. அயம் வுச்சதி அக்³க⁴ஸமோதா⁴னோ. ஸோபி பரதோ ‘‘தேன கோ² பன ஸமயேன அஞ்ஞதரோ பி⁴க்கு² ஸம்ப³ஹுலா ஸங்கா⁴தி³ஸேஸா ஆபத்தியோ ஆபன்னோ ஹோதி, ஏகா ஆபத்தி ஏகாஹபடிச்ச²ன்னா ஏகா ஆபத்தி த்³வீஹபடிச்ச²ன்னா’’திஆதி³னா நயேன பாளியம் ஆக³தோயேவ.

யஸ்ஸ பன ஸதம் ஆபத்தியோ த³ஸாஹபடிச்ச²ன்னா, அபரம்பி ஸதம் ஆபத்தியோ த³ஸாஹபடிச்ச²ன்னாதி ஏவம் த³ஸக்க²த்தும் கத்வா ஆபத்திஸஹஸ்ஸம் தி³வஸஸதபடிச்ச²ன்னம் ஹோதி, தேன கிம் காதப்³ப³ந்தி? ஸப்³ப³ம் ஸமோத³ஹித்வா த³ஸ தி³வஸே பரிவஸிதப்³ப³ம். ஏவம் ஏகேனேவ த³ஸாஹேன தி³வஸஸதம்பி பரிவஸிதமேவ ஹோதி. வுத்தம்பி சேதம் –

‘‘த³ஸஸதம் ரத்திஸதம், ஆபத்தியோ சா²த³யித்வான;

த³ஸ ரத்தியோ வஸித்வான, முச்சேய்ய பாரிவாஸிகோ’’தி. (பரி. 477);

அயம் அக்³க⁴ஸமோதா⁴னோ நாம.

‘‘மிஸ்ஸகஸமோதா⁴னோ’’ நாம – யோ நானாவத்து²கா ஆபத்தியோ ஏகதோ கத்வா தி³ய்யதி. தத்ராயம் நயோ –

‘‘அஹம், ப⁴ந்தே, ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் ஏகம் ஸுக்கவிஸ்ஸட்டி²ம், ஏகம் காயஸம்ஸக்³க³ம், ஏகம் து³ட்டு²ல்லவாசம், ஏகம் அத்தகாமம், ஏகம் ஸஞ்சரித்தம், ஏகம் குடிகாரம், ஏகம் விஹாரகாரம், ஏகம் து³ட்ட²தோ³ஸம், ஏகம் அஞ்ஞபா⁴கி³யம், ஏகம் ஸங்க⁴பே⁴த³ம், ஏகம் பே⁴தா³னுவத்தகம், ஏகம் து³ப்³ப³சம், ஏகம் குலதூ³ஸகம், ஸோஹம், ப⁴ந்தே, ஸங்க⁴ம் தாஸம் ஆபத்தீனம் ஸமோதா⁴னபரிவாஸம் யாசாமீ’’தி –

திக்க²த்தும் யாசாபேத்வா தத³னுரூபாய கம்மவாசாய பரிவாஸோ தா³தப்³போ³.

ஏத்த² ச ஸங்கா⁴தி³ஸேஸா ஆபத்தியோ ஆபஜ்ஜிம் நானாவத்து²காயோதிபி ஸங்கா⁴தி³ஸேஸா ஆபத்தியோ ஆபஜ்ஜிந்திபி ஏவம் புப்³பே³ வுத்தனயேன வத்து²வஸேனபி கோ³த்தவஸேனபி நாமவஸேனபி ஆபத்திவஸேனபி யோஜேத்வா கம்மவாசம் காதும் வட்டதியேவாதி அயம் மிஸ்ஸகஸமோதா⁴னோ. ஸப்³ப³பரிவாஸகம்மவாசாவஸானே பன நிக்கி²த்தானிக்கி²த்தவத்தாதி³கதா² புரிமனயேனேவ வேதி³தப்³பா³தி.

பரிவாஸகதா² நிட்டி²தா.

இதா³னி யம் வுத்தம் ‘‘பக்க²மானத்தஞ்ச ஸமோதா⁴னமானத்தஞ்ச அவஸேஸபரிவாஸகதா²வஸானே கத²யிஸ்ஸாமா’’தி, தஸ்ஸோகாஸோ ஸம்பத்தோ, தஸ்மா வுச்சதி – ‘‘பக்க²மானத்த’’ந்தி பி⁴க்கு²னியா தா³தப்³ப³மானத்தம். தம் பன படிச்ச²ன்னாயபி அப்படிச்ச²ன்னாயபி ஆபத்தியா அட்³ட⁴மாஸமேவ தா³தப்³ப³ம். வுத்தஞ்ஹேதம் – ‘‘க³ருத⁴ம்மம் அஜ்ஜா²பன்னாய பி⁴க்கு²னியா உப⁴தோஸங்கே⁴ பக்க²மானத்தம் சரிதப்³ப³’’ந்தி (சூளவ. 403). தம் பன பி⁴க்கு²னீஹி அத்தனோ ஸீமம் ஸோதே⁴த்வா விஹாரஸீமாய வா விஹாரஸீமம் ஸோதே⁴தும் அஸக்கோந்தீஹி க²ண்ட³ஸீமாய வா ஸப்³ப³ந்திமேன பரிச்சே²தே³ன சதுவக்³க³க³ணம் ஸன்னிபாதாபேத்வா தா³தப்³ப³ம். ஸசே ஏகா ஆபத்தி ஹோதி ஏகிஸ்ஸா வஸேன, ஸசே த்³வே வா திஸ்ஸோ வா ஸம்ப³ஹுலா வா ஏகவத்து²கா வா நானாவத்து²கா வா தாஸம் தாஸம் வஸேன வத்து²கோ³த்தனாமஆபத்தீஸு யம் யம் இச்ச²தி தம் தம் ஆதா³ய யோஜனா காதப்³பா³.

தத்ரித³ம் ஏகாபத்திவஸேன முக²மத்தத³ஸ்ஸனம், தாய ஆபன்னாய பி⁴க்கு²னியா பி⁴க்கு²னிஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸ வசனீயோ – ‘‘அஹம், அய்யே, ஏகம் ஆபத்திம் ஆபஜ்ஜிம் கா³மந்தரம், ஸாஹம், அய்யே, ஏகிஸ்ஸா ஆபத்தியா கா³மந்தராய பக்க²மானத்தம் யாசாமீ’’தி.

ஏவம் திக்க²த்தும் யாசாபேத்வா ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

‘‘ஸுணாது மே அய்யே ஸங்கோ⁴, அயம் இத்த²ன்னாமா பி⁴க்கு²னீ ஏகம் ஆபத்திம் ஆபஜ்ஜி கா³மந்தரம், ஸா ஸங்க⁴ம் ஏகிஸ்ஸா ஆபத்தியா கா³மந்தராய பக்க²மானத்தம் யாசதி, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமாய பி⁴க்கு²னியா ஏகிஸ்ஸா ஆபத்தியா கா³மந்தராய பக்க²மானத்தம் த³தே³ய்ய, ஏஸா ஞத்தி.

‘‘ஸுணாது மே அய்யே ஸங்கோ⁴, அயம்…பே… து³தியம்பி… ததியம்பி ஏதமத்த²ம் வதா³மி. ஸுணாது மே அய்யே ஸங்கோ⁴…பே… தே³தி… தி³ன்னம் ஸங்கே⁴ன இத்த²ன்னாமாய பி⁴க்கு²னியா ஏகிஸ்ஸா ஆபத்தியா கா³மந்தராய பக்க²மானத்தம், க²மதி ஸங்க⁴ஸ்ஸ, தஸ்மா துண்ஹீ; ஏவமேதம் தா⁴ரயாமீ’’தி.

கம்மவாசாபரியோஸானே வத்தம் ஸமாதி³யித்வா பி⁴க்கு²மானத்தகதா²ய வுத்தனயேனேவ ஸங்க⁴ஸ்ஸ ஆரோசேத்வா நிக்கி²த்தவத்தம் வஸிதுகாமாய தத்தே²வ ஸங்க⁴மஜ்ஜே² வா பக்கந்தாஸு பி⁴க்கு²னீஸு ஏகபி⁴க்கு²னியா வா து³தியிகாய வா ஸந்திகே வுத்தனயேனேவ நிக்கி²பிதப்³ப³ம். அஞ்ஞிஸ்ஸா பன ஆக³ந்துகாய ஸந்திகே ஆரோசேத்வா நிக்கி²பிதப்³ப³ம். நிக்கி²த்தகாலதோ பட்டா²ய பகதத்தட்டா²னே திட்ட²தி. புன ஸமாதி³யித்வா அருணம் உட்டா²பேந்தியா பன பி⁴க்கு²னீனம்யேவ ஸந்திகே வஸிதும் ந லப⁴தி. ‘‘உப⁴தோஸங்கே⁴ பக்க²மானத்தம் சரிதப்³ப³’’ந்தி ஹி வுத்தம். தஸ்மா அஸ்ஸா ஆசரியுபஜ்ஜா²யாஹி விஹாரம் க³ந்த்வா ஸங்கா³ஹகபக்கே² டி²தோ ஏகோ மஹாதே²ரோ வா த⁴ம்மகதி²கோ வா பி⁴க்கு² வத்தப்³போ³ – ‘‘ஏகிஸ்ஸா பி⁴க்கு²னியா வினயகம்மம் கத்தப்³ப³மத்தி², தத்ர நோ அய்யா, சத்தாரோ பி⁴க்கூ² பேஸேதா²’’தி. ஸங்க³ஹம் அகாதும் ந லப்³ப⁴தி, பேஸேஸ்ஸாமீதி வத்தப்³ப³ம். சதூஹி பகதத்தபி⁴க்கு²னீஹி மானத்தசாரினிம் பி⁴க்கு²னிம் க³ஹேத்வா அந்தோஅருணேயேவ நிக்க²மித்வா கா³மூபசாரதோ த்³வே லேட்³டு³பாதே அதிக்கமித்வா மக்³கா³ ஓக்கம்ம கு³ம்ப³வதிஆதீ³ஹி படிச்ச²ன்னட்டா²னே நிஸீதி³தப்³ப³ம். விஹாரூபசாரதோபி த்³வே லேட்³டு³பாதா அதிக்கமிதப்³பா³ சதூஹி பகதத்தபி⁴க்கூ²ஹிபி தத்த² க³ந்தப்³ப³ம். க³ந்த்வா பன பி⁴க்கு²னீஹி ஸத்³தி⁴ம் ந ஏகட்டா²னே நிஸீதி³தப்³ப³ம், படிக்கமித்வா அவிதூ³ரட்டா²னே நிஸீதி³தப்³ப³ம். குருந்தி³மஹாபச்சரீஸு பன ‘‘பி⁴க்கு²னீஹிபி ப்³யத்தம் ஏகம் வா த்³வே வா உபாஸிகாயோ பி⁴க்கூ²ஹிபி ஏகம் வா த்³வே வா உபாஸகே அத்தரக்க²ணத்தா²ய க³ஹேத்வா க³ந்தப்³ப³’’ந்தி வுத்தம். குருந்தி³யம்யேவ ச பி⁴க்கு²னுபஸ்ஸயஸ்ஸ ச விஹாரஸ்ஸ ச உபசாரம் முஞ்சிதும் வட்டதீ’’தி வுத்தம், கா³மஸ்ஸாதி ந வுத்தம்.

ஏவம் நிஸின்னேஸு பன பி⁴க்கூ²ஸு ச பி⁴க்கு²னீஸு ச தாய பி⁴க்கு²னியா ‘‘மானத்தம் ஸமாதி³யாமி, வத்தம் ஸமாதி³யாமீ’’தி வத்தம் ஸமாதி³யித்வா பி⁴க்கு²னீஸங்க⁴ஸ்ஸ தாவ ஏவம் ஆரோசேதப்³ப³ம் –

‘‘அஹம், அய்யே, ஏகம் ஆபத்திம் ஆபஜ்ஜிம் கா³மந்தரம், ஸாஹம் ஸங்க⁴ம் ஏகிஸ்ஸா ஆபத்தியா கா³மந்தராய பக்க²மானத்தம் யாசிம், தஸ்ஸ மே ஸங்கோ⁴ ஏகிஸ்ஸா ஆபத்தியா கா³மந்தராய பக்க²மானத்தம் அதா³ஸி, ஸாஹம் பக்க²மானத்தம் சராமி, ‘வேத³யாமஹம், அய்யே, வேத³யதீ’தி மம் ஸங்கோ⁴ தா⁴ரேதூ’’தி.

ததோ பி⁴க்கு²ஸங்க⁴ஸ்ஸ ஸந்திகம் க³ந்த்வா ஏவம் ஆரோசேதப்³ப³ம் – ‘‘அஹம், அய்யா, ஏகம் ஆபத்திம் ஆபஜ்ஜிம் …பே… வேத³யாமஹம், அய்யா, வேத³யதீதி மம் ஸங்கோ⁴ தா⁴ரேதூ’’தி. இதா⁴பி யாய காயசி பா⁴ஸாய ஆரோசேதும் வட்டதி.

ஆரோசேத்வா ச பி⁴க்கு²னிஸங்க⁴ஸ்ஸேவ ஸந்திகே நிஸீதி³தப்³ப³ம், ஆரோசிதகாலதோ பட்டா²ய பி⁴க்கூ²னம் க³ந்தும் வட்டதி. ஸசே ஸாஸங்கம் ஹோதி, பி⁴க்கு²னியோ தத்தே²வ டா²னம் பச்சாஸீஸந்தி, டா²தப்³ப³ம். ஸசே அஞ்ஞோ பி⁴க்கு² வா பி⁴க்கு²னீ வா தம் டா²னம் ஏதி, பஸ்ஸந்தியா ஆரோசேதப்³ப³ம். நோ சே ஆரோசேதி, ரத்திச்சே²தோ³ சேவ வத்தபே⁴த³து³க்கடஞ்ச. ஸசே அஜானந்தியா ஏவ உபசாரம் ஓக்கமித்வா க³ச்ச²தி, ரத்திச்சே²தோ³வ ஹோதி, ந வத்தபே⁴த³து³க்கடம். ஸசே பி⁴க்கு²னியோ உபஜ்ஜா²யாதீ³னம் வத்தகரணத்த²ம் பகே³வ க³ந்துகாமா ஹோந்தி, ரத்திவிப்பவாஸக³ணஓஹீயனகா³மந்தராபத்திரக்க²ணத்த²ம் ஏகம் பி⁴க்கு²னிம் ட²பேத்வா க³ந்தப்³ப³ம். தாய அருணே உட்டி²தே தஸ்ஸா ஸந்திகே வத்தம் நிக்கி²பிதப்³ப³ம். ஏதேனுபாயேன அக²ண்டா³ பஞ்சத³ஸ ரத்தியோ மானத்தம் சரிதப்³ப³ம்.

அனிக்கி²த்தவத்தாய பன பாரிவாஸிகக்க²ந்த⁴கே வுத்தனயேனேவ ஸம்மா வத்திதப்³ப³ம். அயம் பன விஸேஸோ – ‘‘ஆக³ந்துகஸ்ஸ ஆரோசேதப்³ப³’’ந்தி ஏத்த² யத்தகா புரேப⁴த்தம் வா பச்சா²ப⁴த்தம் வா தம் கா³மம் பி⁴க்கூ² வா பி⁴க்கு²னியோ வா ஆக³ச்ச²ந்தி, ஸப்³பே³ஸம் ஆரோசேதப்³ப³ம். அனாரோசேந்தியா ரத்திச்சே²தோ³ ச வத்தபே⁴த³து³க்கடஞ்ச. ஸசேபி ரத்திம் கோசி பி⁴க்கு² தம் கா³மூபசாரம் ஓக்கமித்வா க³ச்ச²தி, ரத்திச்சே²தோ³ ஹோதியேவ, அஜானனபச்சயா பன வத்தபே⁴த³தோ முச்சதி. குருந்தி³ஆதீ³ஸு பன அனிக்கி²த்தவத்தபி⁴க்கூ²னம் வுத்தனயேனேவ கதே²தப்³ப³ந்தி வுத்தம். தம் பாரிவாஸிகவத்தாதீ³னம் உபசாரஸீமாய பரிச்சி²ன்னத்தா யுத்ததரம் தி³ஸ்ஸதி. உபோஸதே² ஆரோசேதப்³ப³ம், பவாரணாய ஆரோசேதப்³ப³ம், சதுன்னம் பி⁴க்கூ²னஞ்ச பி⁴க்கு²னீனஞ்ச தே³வஸிகம் ஆரோசேதப்³ப³ம். ஸசே பி⁴க்கூ²னம் தஸ்மிம் கா³மே பி⁴க்கா²சாரோ ஸம்பஜ்ஜதி, தத்தே²வ க³ந்தப்³ப³ம். நோ சே ஸம்பஜ்ஜதி, அஞ்ஞத்ர சரித்வாபி தத்ர ஆக³ந்த்வா அத்தானம் த³ஸ்ஸேத்வா க³ந்தப்³ப³ம். ப³ஹிகா³மே வா ஸங்கேதட்டா²னம் காதப்³ப³ம் – ‘‘அஸுகஸ்மிம் நாம டா²னே அம்ஹே பஸ்ஸிஸ்ஸஸீ’’தி. தாய ஸங்கேதட்டா²னம் க³ந்த்வா ஆரோசேதப்³ப³ம். ஸங்கேதட்டா²னே அதி³ஸ்வா விஹாரம் க³ந்த்வா ஆரோசேதப்³ப³ம். விஹாரே ஸப்³ப³பி⁴க்கூ²னம் ஆரோசேதப்³ப³ம். ஸசே ஸப்³பே³ஸம் ஸக்கா ந ஹோதி ஆரோசேதும், ப³ஹிஉபசாரஸீமாய ட²த்வா பி⁴க்கு²னியோ பேஸேதப்³பா³. தாஹி ஆனீதானம் சதுன்னம் பி⁴க்கூ²னம் ஆரோசேதப்³ப³ம். ஸசே விஹாரோ தூ³ரோ ஹோதி ஸாஸங்கோ, உபாஸகே ச உபாஸிகாயோ ச க³ஹேத்வா க³ந்தப்³ப³ம். ஸசே பன அயம் ஏகா வஸதி, ரத்திவிப்பவாஸம் ஆபஜ்ஜதி, தஸ்மாஸ்ஸா ஏகா பகதத்தா பி⁴க்கு²னீ ஸம்மன்னித்வா தா³தப்³பா³ ஏகச்ச²ன்னே வஸனத்தா²ய.

ஏவம் அக²ண்ட³ம் மானத்தம் சரித்வா வீஸதிக³ணே பி⁴க்கு²னிஸங்கே⁴ வுத்தனயேனேவ அப்³பா⁴னம் காதப்³ப³ம். ஸசே மானத்தம் சரமானா அந்தராபத்திம் ஆபஜ்ஜதி, மூலாய படிகஸ்ஸித்வா தஸ்ஸா ஆபத்தியா மானத்தம் தா³தப்³ப³ந்தி குருந்தி³யம் வுத்தம். இத³ம் ‘‘பக்க²மானத்தம்’’ நாம.

‘‘ஸமோதா⁴னமானத்தம்’’ பன திவித⁴ம் ஹோதி – ஓதா⁴னஸமோதா⁴னம், அக்³க⁴ஸமோதா⁴னம், மிஸ்ஸகஸமோதா⁴னந்தி. தத்த² யதே³தம் பரதோ உதா³யித்தே²ரஸ்ஸ பஞ்சாஹபடிச்ச²ன்னாய ஆபத்தியா பரிவாஸம் பரிவஸந்தஸ்ஸ பரிவாஸே ச மானத்தாரஹட்டா²னே ச அந்தராபத்திம் ஆபஜ்ஜித்வா மூலாயபடிகஸ்ஸிதஸ்ஸ ‘‘தேன ஹி, பி⁴க்க²வே, ஸங்கோ⁴ உதா³யிஸ்ஸ பி⁴க்கு²னோ திஸ்ஸன்னம் ஆபத்தீனம் சா²ரத்தம் மானத்தம் தே³தூ’’தி மானத்தம் அனுஞ்ஞாதம், இத³ம் ‘‘ஓதா⁴னஸமோதா⁴னம்’’ நாம. இத³ஞ்ஹி புனப்புனம் மூலாயபடிகஸ்ஸனேன பரிவுத்த²தி³வஸே ஓது⁴னித்வா புரிமாபத்தீஹி ஸத்³தி⁴ம் ஸமோதா⁴ய தி³ன்னம், தஸ்மா ஓதா⁴னஸமோதா⁴னந்தி வுச்சதி. குருந்தி³யம் பன ‘‘ஸமோதா⁴னபரிவாஸம் வுத்த²ஸ்ஸ தா³தப்³ப³ம் மானத்தம் ஸமோதா⁴னமானத்த’’ந்தி வுத்தம். தம்பி தேன பரியாயேன யுஜ்ஜதி.

அக்³க⁴ஸமோதா⁴னம் பன மிஸ்ஸகஸமோதா⁴னஞ்ச அக்³க⁴ஸமோதா⁴னமிஸ்ஸகஸமோதா⁴னபரிவாஸாவஸானே தா³தப்³ப³மானத்தமேவ வுச்சதி, தம் பரிவாஸகம்மவாசானுஸாரேன யோஜேத்வா தா³தப்³ப³ம். ஏத்தாவதா யம் வுத்தம் ‘‘தேன ஹி, பி⁴க்க²வே, ஸங்கோ⁴ உதா³யிஸ்ஸ பி⁴க்கு²னோ ஏகிஸ்ஸா ஆபத்தியா ஸஞ்சேதனிகாய ஸுக்கவிஸ்ஸட்டி²யா ஏகாஹபடிச்ச²ன்னாய ஏகாஹபரிவாஸம் தே³தூதிஆதி³னா நயேன பாளியம் அனேகேஹி ஆகாரேஹி பரிவாஸோ ச மானத்தஞ்ச வுத்தம், தஸ்ஸ யஸ்மா ஆக³தாக³தடா²னே வினிச்ச²யோ வுச்சமானோ பாளி விய அதிவித்தா²ரம் ஆபஜ்ஜதி, ந ச ஸக்கா ஹோதி ஸுகே²ன பரிக்³க³ஹேதும், தஸ்மா நம் ஸமோதா⁴னேத்வா இதே⁴வ த³ஸ்ஸேஸ்ஸாமா’’தி, ததி³த³ம் அத்த²தோ ஸம்பாதி³தம் ஹோதி.

படிச்ச²ன்னபரிவாஸகதா²

102. இதா³னி யா தாவ அயம் படிச்ச²ன்னாய ஏகிஸ்ஸா ஆபத்தியா வஸேன பாளி வுத்தா, ஸா உத்தானத்தா²வ.

108. ததோ பரம் த்³வீஹதீஹசதூஹபஞ்சாஹபடிச்ச²ன்னானம் வஸேன பாளிம் வத்வா பஞ்சாஹபடிச்ச²ன்னாய பரிவாஸதோ பட்டா²ய அந்தராபத்தி த³ஸ்ஸிதா. யஸ்மா பன தம் ஆபத்திம் ஆபன்னோ மூலாயபடிகஸ்ஸனாரஹோ நாம ஹோதி, தஸ்மாஸ்ஸ தத்த² மூலாயபடிகஸ்ஸனம் அனுஞ்ஞாதம். ஸசே பன நிக்கி²த்தவத்தோ ஆபஜ்ஜதி, மூலாயபடிகஸ்ஸனாரஹோ ந ஹோதி. கஸ்மா? யஸ்மா ந ஸோ பரிவஸந்தோ ஆபன்னோ, பகதத்தட்டா²னே டி²தோ ஆபன்னோ, தஸ்மா தஸ்ஸா ஆபத்தியா விஸும் மானத்தம் சரிதப்³ப³ம். ஸசே படிச்ச²ன்னா ஹோதி பரிவாஸோபி வஸிதப்³போ³. யஞ்சேதம் மூலாயபடிகஸ்ஸனம் வுத்தம், தஸ்மிம்பி கதே பரிவுத்த²தி³வஸா மக்கி²தா ஹோந்தி. இதி பரிவாஸே அந்தராபத்திம் த³ஸ்ஸேத்வா புன மானத்தாரஹஸ்ஸ அந்தராபத்திம் த³ஸ்ஸேத்வா மூலாயபடிகஸ்ஸனம் வுத்தம், தஸ்மிம்பி கதே பரிவுத்த²தி³வஸா மக்கி²தாவ ஹோந்தி. ததோ பரிவுத்த²பரிவாஸஸ்ஸ தாஸம் திஸ்ஸன்னம்பி ஆபத்தீனம் ஸமோதா⁴னமானத்தம் த³ஸ்ஸிதம். ததோ மானத்தசாரிகஸ்ஸ அந்தராபத்திம் த³ஸ்ஸேத்வா மூலாயபடிகஸ்ஸனம் வுத்தம். தஸ்மிம் பன படிகஸ்ஸனே கதே மானத்தசிண்ணதி³வஸாபி பரிவுத்த²தி³வஸாபி மக்கி²தாவ ஹோந்தி. ததோ அப்³பா⁴னாரஹஸ்ஸ அந்தராபத்திம் த³ஸ்ஸேத்வா மூலாயபடிகஸ்ஸனம் வுத்தம். தஸ்மிம்பி கதே ஸப்³பே³ தே மக்கி²தாவ ஹோந்தி. ததோ பரம் ஸப்³பா³ அந்தராபத்தியோ யோஜேத்வா அப்³பா⁴னகம்மம் த³ஸ்ஸிதம். ஏவம் படிச்ச²ன்னவாரே ஏகாஹபடிச்ச²ன்னாதி³வஸேன பஞ்ச, அந்தராபத்திவஸேன சதஸ்ஸோதி நவ கம்மவாசா த³ஸ்ஸிதா ஹோந்தி.

படிச்ச²ன்னபரிவாஸகதா² நிட்டி²தா.