10. பி⁴க்கு²னிக்க²ந்த⁴கம்

மஹாபஜாபதிகோ³தமீவத்து²கதா²

402. பி⁴க்கு²னிக்க²ந்த⁴கே – அலம் கோ³தமி மா தே ருச்சீதி கஸ்மா படிக்கி²பதி, நனு ஸப்³பே³ஸம்பி பு³த்³தா⁴னம் சதஸ்ஸோ பரிஸா ஹோந்தீதி? காமம் ஹோந்தி, கிலமேத்வா பன அனேகக்க²த்தும் யாசிதேன அனுஞ்ஞாதம் பப்³ப³ஜ்ஜம் ‘‘து³க்கே²ன லத்³தா⁴ அயம் அம்ஹேஹீ’’தி ஸம்மா பரிபாலேஸ்ஸந்தீதி ப⁴த்³த³கம் கத்வா அனுஜானிதுகாமோ படிக்கி²பதி. அட்ட²க³ருத⁴ம்மகதா² மஹாவிப⁴ங்கே³யேவ கதி²தா.

403. கும்ப⁴தே²னகேஹீதி கும்பே⁴ தீ³பம் ஜாலேத்வா தேன ஆலோகேன பரக⁴ரே ப⁴ண்ட³ம் விசினித்வா தே²னகசோரேஹி.

ஸேதட்டி²கா நாம ரோக³ஜாதீதி ஏகோ பாணகோ நாளிமஜ்ஜ²க³தம் கண்ட³ம் விஜ்ஜ²தி, யேன வித்³த⁴த்தா நிக்க²ந்தம்பி ஸாலிஸீஸம் கீ²ரம் க³ஹேதும் ந ஸக்கோதி.

மஞ்ஜிட்டி²கா நாம ரோக³ஜாதீதி உச்சூ²னம் அந்தோரத்தபா⁴வோ. மஹதோ தளாகஸ்ஸ படிகச்சேவ ஆளிந்தி இமினா பன ஏதமத்த²ம் த³ஸ்ஸேதி – யதா² மஹதோ தளாகஸ்ஸ ஆளியா அப³த்³தா⁴யபி கிஞ்சி உத³கம் திட்டே²ய்ய, பட²மமேவ ப³த்³தா⁴ய பன யம் அப³த்³த⁴பச்சயா ந திட்டே²ய்ய, தம்பி திட்டே²ய்ய; ஏவமேவ யே இமே அனுப்பன்னே வத்து²ஸ்மிம் படிகச்சேவ அவீதிக்கமனத்தா²ய க³ருத⁴ம்மா பஞ்ஞத்தா. தேஸு அபஞ்ஞத்தேஸுபி மாதுகா³மஸ்ஸ பப்³ப³ஜிதத்தா பஞ்சேவ வஸ்ஸஸதானி ஸத்³த⁴ம்மோ திட்டே²ய்ய. படிகச்சேவ பஞ்ஞத்தத்தா பன அபரானிபி பஞ்சவஸ்ஸஸதானி ட²ஸ்ஸதீதி ஏவம் பட²மம் வுத்தம் வஸ்ஸஸஹஸ்ஸமேவ ட²ஸ்ஸதீதி. வஸ்ஸஸஹஸ்ஸந்தி சேதம் படிஸம்பி⁴தா³பபே⁴த³ப்பத்தகீ²ணாஸவவஸேனேவ வுத்தம். ததோ பன உத்தரிம்பி ஸுக்க²விபஸ்ஸககீ²ணாஸவவஸேன வஸ்ஸஸஹஸ்ஸம், அனாகா³மிவஸேன வஸ்ஸஸஹஸ்ஸம், ஸகதா³கா³மிவஸேன வஸ்ஸஸஹஸ்ஸம், ஸோதாபன்னவஸேன வஸ்ஸஸஹஸ்ஸந்தி ஏவம் பஞ்சவஸ்ஸஸஹஸ்ஸானி படிவேத⁴ஸத்³த⁴ம்மோ ட²ஸ்ஸதி. பரியத்தித⁴ம்மோபி தானியேவ. ந ஹி பரியத்தியா அஸதி படிவேதோ⁴ அத்தி², நாபி பரியத்தியா ஸதி படிவேதோ⁴ ந ஹோதி; லிங்க³ம் பன பரியத்தியா அந்தரஹிதாயபி சிரம் பவத்திஸ்ஸதீதி.

மஹாபஜாபதிகோ³தமீவத்து²கதா² நிட்டி²தா.

பி⁴க்கு²னீஉபஸம்பதா³னுஜானனகதா²

404. அனுஜானாமி பி⁴க்க²வே பி⁴க்கூ²ஹி பி⁴க்கு²னியோ உபஸம்பாதே³துந்தி இமாய அனுபஞ்ஞத்தியா பி⁴க்கூ² பஞ்சஸதா ஸாகியானியோ மஹாபஜாபதியா ஸத்³தி⁴விஹாரினியோ கத்வா உபஸம்பாதே³ஸும். இதி தா ஸப்³பா³பி ஏகதோஉபஸம்பன்னா நாம அஹேஸும். யே கோ² த்வம் கோ³தமீதி இமினா ஓவாதே³ன கோ³தமீ அரஹத்தம் பத்தா.

409. கம்மம் ந கரீயதீதி தஜ்ஜனீயாதி³ ஸத்தவித⁴ம்பி கம்மம் ந கரீயதி. க²மாபேந்தீதி ந புன ஏவம் கரிஸ்ஸாமீதி க²மாபேந்தி.

410. அனுஜானாமி, பி⁴க்க²வே, பி⁴க்கூ²ஹி பி⁴க்கு²னீனம் கம்மம் ரோபேத்வா நிய்யாதே³துந்தி ஏத்த² தஜ்ஜனீயாதீ³ஸு ‘‘இத³ம் நாம கம்மம் ஏதிஸ்ஸா காதப்³ப³’’ந்தி ஏவம் ரோபேத்வா ‘‘தம் தா³னி தும்ஹேவ கரோதா²’’தி நிய்யாதே³தப்³ப³ம். ஸசே பன அஞ்ஞஸ்மிம் ரோபிதே அஞ்ஞம் கரோந்தி, ‘‘தஜ்ஜனீயகம்மாரஹஸ்ஸ நியஸ்ஸகம்மம் கரோதீ’’தி ஏத்த² வுத்தனயேன காரேதப்³ப³தம் ஆபஜ்ஜந்தி.

411. கத்³த³மோத³கேனாதி ஏத்த² ந கேவலம் கத்³த³மோத³கேன, விப்பஸன்னஉத³கரஜனகத்³த³மாதீ³ஸுபி யேன கேனசி ஓஸிஞ்சந்தஸ்ஸ து³க்கடமேவ. அவந்தி³யோ ஸோ பி⁴க்க²வே பி⁴க்கு² பி⁴க்கு²னிஸங்கே⁴ன காதப்³போ³தி பி⁴க்கு²னுபஸ்ஸயே ஸன்னிபதித்வா ‘‘அஸுகோ நாம அய்யோ பி⁴க்கு²னீனம் அபஸாத³னீயம் த³ஸ்ஸேதி, ஏதஸ்ஸ அய்யஸ்ஸ அவந்தி³யகரணம் ருச்சதீ’’தி ஏவம் திக்க²த்தும் ஸாவேதப்³ப³ம். ஏத்தாவதா அவந்தி³யோ கதோ ஹோதி. ததோ பட்டா²ய யதா² ஸாமணேரே தி³ஸ்வா ந வந்த³ந்தி; ஏவமேவ தி³ஸ்வாபி ந வந்தி³தப்³போ³. தேன பி⁴க்கு²னா ஸம்மா வத்தந்தேன பி⁴க்கு²னுபஸ்ஸயம் ஆக³ந்த்வா விஹாரேயேவ ஸங்க⁴ம் வா க³ணம் வா ஏகபுக்³க³லம் வா உபஸங்கமித்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ‘‘பி⁴க்கு²னிஸங்கோ⁴ மய்ஹம் க²மதூ’’தி க²மாபேதப்³ப³ம். தேன பி⁴க்கு²னா பி⁴க்கு²னீனம் ஸந்திகம் ஆக³ந்த்வா ‘‘ஏஸோ பி⁴க்கு² தும்ஹே க²மாபேதீ’’தி வத்தப்³ப³ம். ததோ பட்டா²ய ஸோ வந்தி³தப்³போ³. அயமேத்த² ஸங்கே²போ, வித்தா²ரம் பன கம்மவிப⁴ங்கே³ வக்கா²ம.

ஓபா⁴ஸேந்தீதி அஸத்³த⁴ம்மேன ஓபா⁴ஸேந்தி. பி⁴க்கு²னீஹி ஸத்³தி⁴ம் ஸம்பயோஜேந்தீதி பி⁴க்கு²னீஹி ஸத்³தி⁴ம் புரிஸே அஸத்³த⁴ம்மேன ஸம்பயோஜேந்தி. அவந்தி³யகரணம் வுத்தனயமேவ. ஆவரணந்தி விஹாரப்பவேஸனே நிவாரணம். ஓவாத³ம் ட²பேதுந்தி ஏத்த² ந பி⁴க்கு²னுபஸ்ஸயம் க³ந்த்வா ட²பேதப்³போ³. ஓவாத³த்தா²ய பன ஆக³தா பி⁴க்கு²னியோ வத்தப்³பா³ ‘‘அஸுகா நாம பி⁴க்கு²னீ ஸாபத்திகா, தஸ்ஸா ஓவாத³ம் ட²பேமி, மா தாய ஸத்³தி⁴ம் உபோஸத²ம் கரித்தா²’’தி. காயவிவரணாதீ³ஸுபி த³ண்ட³கம்மம் வுத்தனயமேவ.

413. ந பி⁴க்க²வே பி⁴க்கு²னியா ஓவாதோ³ ந க³ந்தப்³போ³திஆதி³ பி⁴க்கு²னிவிப⁴ங்க³வண்ணனாயம் வுத்தமேவ.

416. பா²ஸுகா நமேந்தீதி கி³ஹிதா³ரிகாயோ விய க⁴னபட்டகேன காயப³ந்த⁴னேன பா²ஸுகா நமனத்தா²ய ப³ந்த⁴ந்தி. ஏகபரியாகதந்தி ஏகவாரம் பரிக்கி²பனகம்.

விலீவேன பட்டேனாதி ஸண்ஹேஹி வேளுவிலீவேஹி கதபட்டேன. து³ஸ்ஸபட்டேனாதி ஸேதவத்த²பட்டேன. து³ஸ்ஸவேணியாதி து³ஸ்ஸேன கதவேணியா. து³ஸ்ஸவட்டியாதி து³ஸ்ஸேன கதவட்டியா. சோளபட்டாதீ³ஸு சோளகாஸாவம் சோளந்தி வேதி³தப்³ப³ம்.

அட்டி²ல்லேனாதி கோ³ஜங்க⁴ட்டி²கேன. ஜக⁴னந்தி கடிப்பதே³ஸோ வுச்சதி. ஹத்த²ம் கோட்டாபேந்தீதி அக்³க³பா³ஹம் கோட்டாபேத்வா மோரபத்தாதீ³ஹி சித்தாலங்காரம் கரோந்தி. ஹத்த²கோச்ச²ந்தி பிட்டி²ஹத்த²ம். பாத³ந்தி ஜங்க⁴ம். பாத³கோச்ச²ந்தி பிட்டி²பாத³ம்.

417. முக²லிம்பனாதீ³னி வுத்தனயானேவ. அவங்க³ம் கரோந்தீதி அக்கீ² அஞ்ஜந்தியோ அவங்க³தே³ஸே அதோ⁴முக²ம் லேக²ம் கரோந்தி. விஸேஸகந்தி க³ண்ட³ப்பதே³ஸே விசித்ரஸண்டா²னம் விஸேஸகம் கரோந்தி. ஓலோகேந்தீதி வாதபானம் விவரித்வா வீதி²ம் ஓலோகேந்தி. ஸாலோகே திட்ட²ந்தீதி த்³வாரம் விவரித்வா உபட்³ட⁴காயம் த³ஸ்ஸேந்தியோ திட்ட²ந்தி. நச்சந்தி நடஸமஜ்ஜம் காரேந்தி. வேஸிம் வுட்டா²பேந்தீதி க³ணிகம் வுட்டா²பேந்தி. பானாகா³ரம் ட²பேந்தீதி ஸுரம் விக்கிணந்தி. ஸூனம் ட²பேந்தீதி மம்ஸம் விக்கிணந்தி. ஆபணந்தி நானாப⁴ண்டா³னம் அனேகவித⁴ம் ஆபணம் பஸாரேந்தி. தா³ஸம் உபட்டா²பேந்தீதி தா³ஸம் க³ஹேத்வா தேன அத்தனோ வேய்யாவச்சம் காரேந்தி. தா³ஸீஆதீ³ஸுபி ஏஸேவ நயோ. ஹரிதகபக்கிகம் பகிணந்தீதி ஹரிதகஞ்சேவ பக்கஞ்ச பகிணந்தி; பகிண்ணகாபணம் பஸாரேந்தீதி வுத்தம் ஹோதி.

418. ஸப்³ப³னீலகாதி³கதா² கதி²தாயேவ.

419. பி⁴க்கு²னீ சே, பி⁴க்க²வே, காலம் கரோந்தீதிஆதீ³ஸு அயம் பாளிமுத்தகவினிச்ச²யோ – ஸசே ஹி பஞ்சஸு ஸஹத⁴ம்மிகேஸு யோ கோசி காலம் கரோந்தோ ‘‘மமச்சயேன மய்ஹம் பரிக்கா²ரோ உபஜ்ஜா²யஸ்ஸ ஹோது, ஆசரியஸ்ஸ ஹோது, ஸத்³தி⁴விஹாரிகஸ்ஸ ஹோது, அந்தேவாஸிகஸ்ஸ ஹோது, மாது ஹோது, பிது ஹோது, அஞ்ஞஸ்ஸ வா யஸ்ஸ கஸ்ஸசி ஹோதூ’’தி வத³தி தேஸம் ந ஹோதி, ஸங்க⁴ஸ்ஸேவ ஹோதி. ந ஹி பஞ்சன்னம் ஸஹத⁴ம்மிகானம் அச்சயதா³னம் ருஹதி, கி³ஹீனம் பன ருஹதி. பி⁴க்கு² ஹி பி⁴க்கு²னிவிஹாரே காலம் கரோதி, தஸ்ஸ பரிக்கா²ரோ பி⁴க்கூ²னம்யேவ ஹோதி. பி⁴க்கு²னீ பி⁴க்கு²விஹாரே காலம் கரோதி, தஸ்ஸா பரிக்கா²ரோ பி⁴க்கு²னீனம்யேவ ஹோதி.

420. புராணமல்லீதி புராணே கி³ஹிகாலே மல்லகஸ்ஸ ப⁴ரியா. புரிஸப்³யஞ்ஜனந்தி புரிஸனிமித்தம், சி²ன்னம் வா ஹோது அச்சி²ன்னம் வா, படிச்ச²ன்னம் வா அப்படிச்ச²ன்னம் வா. ஸசே ஏதஸ்மிம் டா²னே புரிஸப்³யஞ்ஜனந்தி சித்தம் உப்பாதே³த்வா உபனிஜ்ஜா²யதி, து³க்கடம்.

421. அத்தனோ பரிபோ⁴க³த்தா²ய தி³ன்னம் நாம யம் ‘‘தும்ஹேயேவ பரிபு⁴ஞ்ஜதா²’’தி வத்வா தி³ன்னம், தம் அஞ்ஞஸ்ஸ த³த³தோ து³க்கடம். அக்³க³ம் க³ஹேத்வா பன தா³தும் வட்டதி. ஸசே அஸப்பாயம், ஸப்³ப³ம் அபனேதும் வட்டதி. சீவரம் ஏகாஹம் வா த்³வீஹம் வா பரிபு⁴ஞ்ஜித்வா தா³தும் வட்டதி. பத்தாதீ³ஸுபி ஏஸேவ நயோ.

பி⁴க்கூ²னம் ஸன்னிதி⁴ம் பி⁴க்கு²னீஹி படிக்³கா³ஹாபேத்வாதி ஹிய்யோ படிக்³க³ஹேத்வா ட²பிதமம்ஸம் அஜ்ஜ அஞ்ஞஸ்மிம் அனுபஸம்பன்னே அஸதி பி⁴க்கூ²ஹி படிக்³கா³ஹாபேத்வா பி⁴க்கு²னீஹி பரிபு⁴ஞ்ஜிதப்³ப³ம். பி⁴க்கூ²ஹி படிக்³க³ஹிதஞ்ஹி பி⁴க்கு²னீனம் அப்படிக்³க³ஹிதகட்டா²னே திட்ட²தி, பி⁴க்கு²னீனம் படிக்³க³ஹிதம்பி பி⁴க்கூ²ஸு ஏஸேவ நயோ.

426. ஆஸனம் ஸம்கஸாயந்தியோ காலம் வீதினாமேஸுந்தி அஞ்ஞம் வுட்டா²பேத்வா அஞ்ஞம் நிஸீதா³பேந்தியோ போ⁴ஜனகாலம் அதிக்காமேஸும்.

அட்ட²ன்னம் பி⁴க்கு²னீனம் யதா²வுட்³ட⁴ந்தி ஏத்த² ஸசே புரே அட்ட²ஸு நிஸின்னாஸு தாஸம் அப்³ப⁴ந்தரிமா அஞ்ஞா ஆக³ச்ச²தி, ஸா அத்தனோ நவகம் உட்டா²பேத்வா நிஸீதி³தும் லப⁴தி. யா பன அட்ட²ஹிபி நவகதரா, ஸா ஸசேபி ஸட்டி²வஸ்ஸா ஹோதி, ஆக³தபடிபாடியாவ நிஸீதி³தும் லப⁴தி. அஞ்ஞத்த² ஸப்³ப³த்த² யதா²வுட்³ட⁴ம் ந படிபா³ஹிதப்³ப³ந்தி ட²பேத்வா ப⁴த்தக்³க³ம் அஞ்ஞஸ்மிம் சதுபச்சயபா⁴ஜனீயட்டா²னே ‘‘அஹம் புப்³பே³ ஆக³தா’’தி வுட்³ட⁴ம் படிபா³ஹித்வா கிஞ்சி ந க³ஹேதப்³ப³ம்; யதா²வுட்³ட⁴மேவ வட்டதி. பவாரணாகதா² கதி²தாயேவ.

429. இத்தி²யுத்தந்திஆதீ³ஹி ஸப்³ப³யானானி அனுஞ்ஞாதானி. பாடங்கிந்தி படபோட்டலிகம்.

430. தூ³தேன உபஸம்பதா³ த³ஸன்னம் அந்தராயானம் யேன கேனசி வட்டதி. கம்மவாசாபரியோஸானே ஸா பி⁴க்கு²னீ பி⁴க்கு²னுபஸ்ஸயே டி²தா வா ஹோது நிபன்னா வா ஜாக³ரா வா நித்³த³ம் ஓக்கந்தா வா, உபஸம்பன்னாவ ஹோதி. தாவதே³வ சா²யாதீ³னி ஆக³தாய தூ³தபி⁴க்கு²னியா ஆசிக்கி²தப்³பா³னி.

431. உதோ³ஸிதோதி ப⁴ண்ட³ஸாலா. ந ஸம்மதீதி நப்பஹோதி. உபஸ்ஸயந்தி க⁴ரம். நவகம்மந்தி ஸங்க⁴ஸ்ஸத்தா²ய பி⁴க்கு²னியா நவகம்மம்பி காதும் அனுஜானாமீதி அத்தோ².

432. தஸ்ஸா பப்³ப³ஜிதாயாதி தஸ்ஸா பப்³ப³ஜிதகாலே. யாவ ஸோ தா³ரகோ விஞ்ஞுதம் பாபுணாதீதி யாவ கா²தி³தும் பு⁴ஞ்ஜிதும் நஹாயிதுஞ்ச மண்டி³துஞ்ச அத்தனோ த⁴ம்மதாய ஸக்கோதீதி அத்தோ².

ட²பேத்வா ஸாகா³ரந்தி ஸஹகா³ரஸேய்யமத்தம் ட²பேத்வா. யதா² அஞ்ஞஸ்மிம் புரிஸே; ஏவம் து³தியிகாய பி⁴க்கு²னியா தஸ்மிம் தா³ரகே படிபஜ்ஜிதப்³ப³ந்தி த³ஸ்ஸேதி. மாதா பன நஹாபேதும் பாயேதும் போ⁴ஜேதும் மண்டே³தும் உரே கத்வா ஸயிதுஞ்ச லப⁴தி.

434. யதே³வ ஸா விப்³ப⁴ந்தாதி யஸ்மா ஸா விப்³ப⁴ந்தா அத்தனோ ருசியா க²ந்தியா ஓதா³தானி வத்தா²னி நிவத்தா², தஸ்மாயேவ ஸா அபி⁴க்கு²னீ, ந ஸிக்கா²பச்சக்கா²னேனாதி த³ஸ்ஸேதி. ஸா புன உபஸம்பத³ம் ந லப⁴தி.

ஸா ஆக³தா ந உபஸம்பாதே³தப்³பா³தி ந கேவலம் ந உபஸம்பாதே³தப்³பா³, பப்³ப³ஜ்ஜம்பி ந லப⁴தி. ஓதா³தானி க³ஹேத்வா விப்³ப⁴ந்தா பன பப்³ப³ஜ்ஜாமத்தம் லப⁴தி.

அபி⁴வாத³னந்திஆதீ³ஸு புரிஸா பாதே³ ஸம்பா³ஹந்தா வந்த³ந்தி, கேஸே சி²ந்த³ந்தி, நகே² சி²ந்த³ந்தி, வணபடிகம்மம் கரோந்தி, தம் ஸப்³ப³ம் குக்குச்சாயந்தா ந ஸாதி³யந்தீதி அத்தோ². தத்ரேகே ஆசரியா ‘‘ஸசே ஏகதோ வா உப⁴தோ வா அவஸ்ஸுதா ஹோந்தி ஸாரத்தா, யதா²வத்து²கமேவ’’. ஏகே ஆசரியா ‘‘நத்தி² ஏத்த² ஆபத்தீ’’தி வத³ந்தி. ஏவம் ஆசரியவாத³ம் த³ஸ்ஸேத்வா இத³ம் ஓதி³ஸ்ஸ அனுஞ்ஞாதம் வட்டதீதி அட்ட²கதா²ஸு வுத்தம். தம் பமாணம். ‘‘அனுஜானாமி பி⁴க்க²வே ஸாதி³து’’ந்தி ஹி வசனேனேவ தம் கப்பியம்.

435. பல்லங்கேன நிஸீத³ந்தீதி பல்லங்கம் ஆபு⁴ஜித்வா நிஸீத³ந்தி. அட்³ட⁴பல்லங்கந்தி ஏகம் பாத³ம் ஆபு⁴ஜித்வா கதபல்லங்கம். ஹேட்டா² விவடே உபரி படிச்ச²ன்னேதி ஏத்த² ஸசே கூபோ க²தோ ஹோதி, உபரி பன பத³ரமத்தமேவ ஸப்³ப³தி³ஸாஸு பஞ்ஞாயதி, ஏவரூபேபி வட்டதி.

436. குக்குஸம் மத்திகந்தி குண்ட³கஞ்சேவ மத்திகஞ்ச. ஸேஸமேத்த² உத்தானமேவாதி.

பி⁴க்கு²னீஉபஸம்பதா³னுஜானனகதா² நிட்டி²தா.

பி⁴க்கு²னிக்க²ந்த⁴கவண்ணனா நிட்டி²தா.